KƐMƆ bɛva edwɛkɛkpɔkɛ “Kelaese kpɔvolɛ” bɛli gyima mekɛ tendenle, ɔvi arelemgbunli nwo zo kɔdwu sinima anwo zo la, maa yɛbiza kɛ: Nwane a le Kelaese kpɔvolɛ ne a? Asoo edwɛkɛkpɔkɛ ɛhye fane yɛ nwo ɛnɛ? Saa yɛlɛkpondɛ ahenle mɔɔ le Kelaese kpɔvolɛ ne a, ndelebɛbo wɔ nu kɛ yɛbahɔ Baebolo ne anu ɔluakɛ ɔfinde nuhua fane nnu.

Baebolo kɛlɛvolɛ mɔɔ vale edwɛkɛkpɔkɛ “Kelaese kpɔvolɛ” ne lile gyima la a le ɛzoanvolɛ Dwɔn. Kɛzi ɔhilehilele nu ɛ? Yɛ edwɛkɛ ɛhye mɔɔ wɔ ye kɛlata ne mɔɔ limoa mɔɔ ye duma la zolɛ la nzonlɛ: “Me mra ngakula, awieleɛ mekɛ ne ɛbikye! Bɛde ye dɛba kɛ Kelaese Kpɔvolɛ ne mɔɔ bayɛ ɔ nwo kɛ yemɔ a ɔle Kelaese ne la bara, na kɛkala bɔbɔ, Kelaese kpɔvolɛma dɔɔnwo ɛye bɛ nyunlu, yemɔti yɛnwu kɛ awieleɛ mekɛ ne ala ɛne. Menli ɛhye mɔ vi yɛ nu a hɔle a, na bɛmboka yɛ nwo. Nwane a le adalɛ ne a? Yemɔ a le sonla ne mɔɔ ka kɛ tɛ Kelaese a le Mɛzaya ne la. Sonla zɔhane a le Kelaese Kpɔvolɛ ne a. Ɔluakɛ yemɔ ɔnlie Selɛ ne nee Ralɛ ne ɔndo nu.”—1 Dwɔn 2:18, 19, 22.

Duzu a yɛsukoa yɛfi zɔhane edwɛkɛ ne anu a? Dwɔn hanle “Kelaese kpɔvolɛma dɔɔnwo” anwo edwɛkɛ, mɔɔ kile kɛ Kelaese kpɔvolɛ ne ɛnle sonla ko, emomu menli ekpunli bie. Menli anzɛɛ ahyehyɛdeɛ mɔɔ bɛle Kelaese kpɔvolɛ la ka adalɛ edwɛkɛ, bɛka kɛ tɛ Gyisɛse a le Kelaese ne anzɛɛ Mɛzaya ne a. Bɛmaa ɔyɛ kɛ asɛɛ ngakyile ɛnle Nyamenle nee Ɔ Ra, Gyisɛse Kelaese avinli. Kelaese kpɔvolɛma yɛ bɛ nwo kɛ bɛle Kelaese anzɛɛ ɔ gyakɛ anu gyinlavolɛma, noko ɔluakɛ “menli ɛhye mɔ vi yɛ nu a hɔle” la ati bɛminli bɛvi nɔhalɛ Baebolo ngilehilelɛ ne anwo. Bieko, mekɛ mɔɔ Dwɔn kɛlɛ ye kɛlata ne la ɛnee ekpunli ɛhye wɔ ɛkɛ, wɔ “awieleɛ mekɛ ne,” mɔɔ ɔbayɛ kɛ ɔle ɛzoanvolɛma ne mekɛ mɔɔ li awieleɛ la.

Edwɛkɛ bieko boni a Dwɔn hɛlɛle wɔ Kelaese kpɔvolɛ ne anwo a? Mekɛ mɔɔ ɔka adalɛ ngapezoma anwo edwɛkɛ la, ɔbɔle kɔkɔ kɛ: “Sunsum biala mɔɔ ka to gua kɛ Gyisɛse Kelaese rale kɛ sonla la le Nyamenle Sunsum, yɛɛ sunsum biala mɔɔ ɛnlie Gyisɛse ɛndo nu la ɛnle Nyamenle Sunsum. Sunsum ɛhye le Kelaese Kpɔvolɛ ne sunsum ne mɔɔ bɛdele kɛ ɔbara, na kɛkala ɔwɔ ewiade ye anu dɛbadɛba la.” (1 Dwɔn 4:2, 3) Wɔ Dwɔn kɛlata ne mɔɔ tɔ zo nwiɔ la anu, ɔzile edwɛkɛ ɛhye azo kɛ: “Adalɛma dɔɔnwo ɛdwazo ewiade ɛleka muala. Bɛmɛ a le menli ne mɔɔ ɛnlie ɛndo nu kɛ Gyisɛse Kelaese rale kɛ sonla ala la. Sonla zɛhae le mɛlɛbɛla na ɔle Kelaese Kpɔvolɛ.” (2 Dwɔn 7) Ɔda ali kɛ, Dwɔn dele Kelaese kpɔvolɛ ne abo kɛ bɛmɛ a le menli mɔɔ bɛ nye fuu bɛbɔ adalɛ wɔ Gyisɛse Kelaese nee ye ngilehilelɛ ne anwo la.

Kolaa na Dwɔn ahɛlɛ adalɛma ɛhye mɔ anwo edwɛkɛ la, ɛnee Gyisɛse ɛdu ye ɛdoavolɛma folɛ kɛ: “Bɛnlea bɛ nwo boɛ wɔ Nyamenle kpɔmanvolɛma  alanema anwo; bɛle menli bie mɔɔ bɛyɛ bɛ nwo kɛ asɛɛ bɛnze nwolɛ bie, noko bɛ kunlu le bile.” (Mateyu 7:15) Zɔhane ala a ɛzoanvolɛ Pɔɔlo bɔle Keleseɛnema mɔɔ bɛwɔ Tɛsalonaeka la kɔkɔ kɛ: “Bɛmmamaa awie biala bɛlɛbɛla bɛ wɔ adenle biala anu. Ɔluakɛ [Gyihova] Kenle ne ɛnrɛra kyesɛ Atuadelɛ ɛra zolɛ kpalɛ na mɛladonlɛ ɛhakyi ɔ nwo Amumuyɛnli ne mɔɔ bɛbabua ye ewule fɔlɛ la ɛra.”—2 Tɛsalonaekama 2:3.

Yemɔti wɔ ɛvoya mɔɔ limoa la anu, ɛnee Nyamenle kpɔmanvolɛma alanema anzɛɛ adalɛ ngapezoma nee atuadelɛma wɔ ɛkɛ. Ɛnee bɛlɛbɔ mɔdenle kɛ bɛsɛkye Keleseɛnema asafo ne. Menli mɔɔ bɛka Gyisɛse Kelaese nee ye ngilehilelɛ ne anwo adalɛ edwɛkɛ la boka “Kelaese kpɔvolɛma” ne mɔɔ Dwɔn hanle bɛ nwo edwɛkɛ la anwo. Kɛzi Gyihova bu bɛ la lale ali wɔ mekɛ mɔɔ Pɔɔlo hanle kɛ bɛbabua bɛ “ewule fɔlɛ la.”

Na ɛnɛ noko ɛ? Menli nee ahyehyɛdeɛ mɔɔ bɛle Kelaese kpɔvolɛ la ɛlɛkɔ zo adwazo atia Kelaese nee ye ngilehilelɛ ne. Bɛ nye fuu bɛka adalɛ edwɛkɛ mɔɔ bɛ adwenle a le kɛ bɛnrɛmaa menli ɛnrɛnwu ngakyile mɔɔ wɔ Gyihova Nyamenle mɔɔ le Selɛ ne nee Ɔ Ra, Gyisɛse Kelaese avinli la. Ndelebɛbo wɔ nu kɛ yɛbanlea boɛ wɔ adalɛ edwɛkɛ ɛhye mɔ anwo. Bɛmaa yɛnlea neazo nwiɔ ɛhye.

Ɛvoya dɔɔnwo mɔɔ ɛpɛ nu la, asɔne ne mɔ ɛmaa Nsako ngilehilelɛ ne ɛdɛlɛ, na bɛkile kɛ Selɛ ne nee Ralɛ ne le ko. Kelaese kpɔvolɛma noko ɛmmaa menli ɛnnwu ngakyile mɔɔ wɔ Gyihova Nyamenle nee Gyisɛse Kelaese avinli la. Fealera nu edwɛkɛ ɛhye ɛmmaa menli mɔɔ di nɔhalɛ la ɛnzukoa Gyisɛse Kelaese na bɛmbikye Nyamenle kɛmɔ Baebolo ne tu bɛ folɛ kɛ bɛyɛ la.—1 Kɔlentema 11:1; Gyemise 4:8.

Asɔne ne mɔ ɛzɛkye menli adwenle ɔlua Baebolo abohilelɛma mɔɔ bɛmaa bɛye Nyamenle duma, Gyihova ne bɛfi nu la azo. Bɛyɛ ɛhye ɔnva nwo kɛ Gyihova duma ne finde fane kɛyɛ 7,000 wɔ mɔlebɛbo Baebolo ne anu la. Duzu a vi nu ɛra a? Kɛzi nɔhalɛ Nyamenle ne de bɔbɔ la tɛde fealera nu edwɛkɛ.

Noko, Nyamenle duma Gyihova ne, mɔɔ ye azonvolɛ dɔɔnwo mɔɔ lɛ ahonle kpalɛ ɛnwu ye la ɛmaa bɛbikye Nyamenle. Richard mɔɔ nee Gyihova Alasevolɛ nwiɔ lile adwelie la anwubielɛ ɛne. Richard kilehile nu kɛ, “Bɛhilele me wɔ Baebolo ne anu kɛ nɔhalɛ Nyamenle ne duma a le Gyihova. Me nye liele kɛ menwunle kɛ Nyamenle lɛ duma la. Ɛnee metɛtele ye ɛlɛ.” Ɔvi mekɛ zɔhane, ɔyɛle nzenzaleɛ wɔ ye ɛbɛlabɔlɛ nu ɔmaanle ɔ nee Baebolo ngyinlazo yiale na ɔyɛle mɔɔ sɔ Gyihova anye la. “Nyamenle duma ne ɛmaa me nee ye ɛnyia agɔnwolɛvalɛ kpalɛ.”

Wɔ ɛvoya dɔɔnwo anu, Kelaese kpɔvolɛ ne ɛmaa menli mgbe dɔɔnwo ɛha sunsum nu awozinli kabii nu. Noko Nyamenle Edwɛkɛ, Baebolo ne mɔɔ yɛzukoa la, ɛmaa yɛnwu Kelaese kpɔvolɛ ne kpalɛ na yɛlie yɛ nwo yɛvi Kelaese kpɔvolɛma adalɛ edwɛkɛ kɔsɔɔti anwo.—Dwɔn 17:17.