Baebolo ne anu tɛkese ko mɔɔ bɛze ye kpalɛ na bɛka la ɛne. Bɛkile kɛ ngyehyɛnu bieko ɛnle ɛkɛ “mɔɔ ka Nyamenle nee alesama agɔnwolɛvalɛ yɛɛ ngoanelielɛ nwo edwɛkɛ sikalɛ kɛ ɛhye a.” Ɔlua ɛhye ati, wɔ maanle bie mɔ anu, bɛta bɛkile ngɛlɛlera ɛhye, anzɛɛ edwɛkɛ “Dwɔn 3:16” wɔ bagua nu debieyɛlɛ nwo, bɛkɛlɛ bɛgua ngɛlata mɔɔ betɛbeta kale nwo, bane nwo yɛɛ ɛleka gyɛne.

Ɔda ali kɛ, menli mɔɔ ka edwɛkɛ ɛhye la die di kɛ Nyamenle ɛlɔlɛ ne maa bɛnyia anwodozo kɛ bɛbanyia dahuu ngoane. Na ɛdawɔ ɛ? Duzu a Nyamenle ɛlɔlɛ ne kile maa wɔ a? Na duzu a ɛnea a Nyamenle ɛyɛ mɔɔ kile kɛ ɔkulo wɔ a?

Menli dɔɔnwo fi bɛ ɛhulolɛ nu kanvo Nyamenle kɛ yebɔ ewiade, abɔdeɛ nee alesama la. Bɛyɛ ninyɛne mɔɔ ngoane wɔ nu la wɔ adenle mɔɔ yɛ nwanwane la azo, yemɔti ɔbayɛ kɛ ɛnee ɔhyia adwenle kpole bie na bɛahola bɛayɛ ninyɛne ɛhye mɔ. Alehyenlɛ biala menli dɔɔnwo da Nyamenle ase wɔ ngoane ahyɛlɛdeɛ ne anwo. Eza bɛnwu kɛ Nyamenle ala a maa bɛ sa ka ninyɛne mɔɔ bɛhyia na bɛahola bɛadɛnla aze—mɔɔ le kɛ anwoma, nzule, aleɛ, yɛɛ abɔdeɛ nu ninyɛne mɔɔ kɔ zo amaa bɛahɔ zo bɛadɛnla aze na bɛ nye alie la.

Ɔle kpalɛ kɛ yɛda Nyamenle ase wɔ ninyɛne ɛhye mɔ anwo, ɔluakɛ yemɔ a le yɛ Bɔvolɛ nee Boavolɛ a. (Edwɛndolɛ 104:10-28; 145:15, 16; Gyima ne 4:24) Saa yɛdwenle mɔɔ Nyamenle ɛlɛyɛ na yɛahola yɛadɛnla aze la anwo a, ɔmaa yɛnyia ye ɛlɔlɛ ne anwo anyezɔlɛ. Ɛzoanvolɛ Pɔɔlo hanle ye wɔ adenle ɛhye azo kɛ: ‘Nyamenle maa menli kɔsɔɔti ngoane nee  ɛnwomenle nee debie biala. Na ɔlua ɔ nwo zo yɛɛ yɛlɛ ngoane na yɛkeha yɛ nwo na yɛwɔ ɛkɛ a.’—Gyima ne 17:25, 28.

Noko akee, yɛnwu Nyamenle ɛlɔlɛ ne wɔ ndenle dɔɔnwo azo tɛla kɛzi ɔnea yɛ la. Eza yebɔ yɛ wɔ adenle titile zo mɔɔ maa yɛdwenle sunsum nu ninyɛne nwo na ɔboa ɔmaa yɛdi nwolɛ gyima a. (Mateyu 5:3) Wɔ adenle ɛhye azo, alesama mɔɔ yɛ tieyɛ la anye la kɛ bɛbayɛ Nyamenle abusua ne foa na bɛayɛ ɔ “mra.”—Wulomuma 8:19-21.

Kɛmɔ Dwɔn 3:16 kɔ zo ka la, Nyamenle zoanle ɔ Ra Gyisɛse wɔ azɛlɛ ye azo kɛ ɔrahile yɛ ye Nyamenle nee ye Selɛ ne anwo debie na ɔwu ɔmaa yɛ, ɔvale ɔhilele kɛzi Nyamenle kulo yɛ la. Noko, menli dɔɔnwo ka kɛ bɛnde deɛmɔti ɔhyia kɛ Gyisɛse wu maa alesama nee kɛzi Gyisɛse ewule ne kile ɛlɔlɛ mɔɔ Nyamenle lɛ maa yɛ la abo kpalɛ. Bɛmaa yɛnlea kɛzi Baebolo ne kile mɔɔ ɔlua zo a Gyisɛse wule nee nvasoɛ mɔɔ wɔ zo la.

Ewule wɔ ɛkɛ maa alesama kɔsɔɔti, bɛ nwo to bɛ, bɛyɛ mgbanyinli na bɛwu. Noko tɛ ɛhye a le Gyihova Nyamenle bodane wɔ mɔlebɛbo ne a. Ɔmanle alesama mɔɔ lumua la nyianle anyelazo kɛ bɛbadɛnla aze dahuu wɔ azɛlɛ ye azo paladaese nu. Noko ɛnee ɔwɔ kɛ bɛyɛ debie ko: Ɛnee ɔwɔ kɛ bɛtie ye. Nyamenle hanle kɛ saa bɛanyɛ zɔ a, bɛbawu. (Mɔlebɛbo 2:17) Nrenya ne mɔɔ lumua la amgba dele atua tiale Nyamenle tumililɛ na ɔvale ewule ɔrale ɔdaye nee ɔ bo zo amra anwo zo. Ɛzoanvolɛ Pɔɔlo kile nuhua kɛ, “Kɛmɔ ɛtane luale sonla ko anwo zo a rale ewiade, na sonla ko ne ɛtane ne vale ewule rale la, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.”—Wulomuma 5:12.

Noko akee, Nyamenle “kulo pɛlepɛlelilɛ.” (Edwɛndolɛ 37:28) Ɛnee ɔbu ɔ nye ɔgua ɛtane mɔɔ nrenya ne mɔɔ lumua yɛle la azo a ɔnyɛ boɛ ɛdeɛ, noko Nyamenle ambua alesama kɔsɔɔti fɔlɛ kɛ dahuu bɛnwu amaneɛ na bɛwu ɔlua sonla ko ne anzosesebɛ ti. Emomu, kɛmɔ yeva ngoane nwo ngyinlazo mɔɔ se “ɛku ɛ gɔnwo a bɛku wɔ” la yeli gyima la ati, yemaa pɛlepɛlelilɛ ne ɛyɛ sɛsɛ na yebuke dahuu ngoane nwo adenle yemaa alesama mɔɔ yɛ tieyɛ la. (Adendulɛ 21:23) Kpuyia ne a le kɛ, Kɛ ɔkɛyɛ na dasanli ngoane mɔɔ di munli mɔɔ Adam manle ɔminlinle la ara bieko ɛ? Ye mualɛ a le kɛ: Ɔwɔ kɛ awie fa ɔ nwo maa, anzɛɛ fa ngoane mɔɔ sonle bolɛ kɛ Adam ɛdeɛ ne la bɔ afɔle—dasanli ngoane mɔɔ di munli la.

Ɔda ali wienyi kɛ, ɛnee Adam abozonli biala mɔɔ tɔ sinli la ɛnrɛhola ɛnrɛbɔ afɔle zɛhae, kyesɛ Gyisɛse ala. (Edwɛndolɛ 49:6-9) Kɛmɔ bɛwole Gyisɛse la ɛnee ɛtane ɛnle ɔ nwo la ati, ɛnee ɔdi munli kɛ Adam la. Ɛhye ati, Gyisɛse luale ye ngoane ne mɔɔ ɔvale ɔbɔle afɔle la azo liele alesama vile ɛtane akɛlɛyɛlɛ bo. Ɔlua ɛhye mɔɔ ɔyɛle la azo, ɔmanle menli nwiɔ ne mɔɔ lumua la abozoamra nyianle adenle kɛ bɛbanyia ngoane mɔɔ di munli mɔɔ ɛnee Adam nee  Yive lɛ la. (Wulomuma 3:23, 24; 6:23) Debie wɔ ɛkɛ mɔɔ ɔwɔ kɛ yɛyɛ na yɛanyia ɛlɔlɛ kpole ɛhye azo nvasoɛ ɔ?

Saa yɛsia yɛkɔ Dwɔn 3:16 a, yɛyɛ ye nzonlɛ kɛ ‘awie biala mɔɔ kɛlie Gyisɛse kɛli la ɛnrɛwu na ɔbanyia ngoane mɔɔ ɛnlɛ awieleɛ.’ Ɛhye kile kɛ awie banyia dahuu ngoane a ɔwɔ kɛ ɔyɛ nwolɛ debie. Saa yɛbanyia “ngoane mɔɔ ɛnlɛ awieleɛ” a, ɔwɔ kɛ yɛdie Gyisɛse yɛdi na yɛtie ye.

Bie a ɛbabiza kɛ: ‘Kɛzi tieyɛ fane ɛhye anwo ɛ? Asoo Gyisɛse anga kɛ “awie biala mɔɔ kɛlie ye kɛli la” banyia ngoane mɔɔ ɛnlɛ awieleɛ ɔ?’ Ɛhye kile kɛ diedi nwo hyia. Noko akee, ɔhyia kɛ yɛkakye kɛ Baebolo ne kile kɛ yɛnyia diedi ala a ɛnee ɔtɛwiele. Kɛmɔ Vine’s Expository Dictionary of Old and New Testament Words kile la, edwɛkɛ mɔɔ Dwɔn vale lile gyima wɔ mɔlebɛbo ne la kile “debie nu anwodozo na tɛ kɛ awie die ali ala.” Saa awie banyia Nyamenle anyunlu ɛlolɛ a, ɔnle kɛ ɔfa ye adwenle ala ɔbu kɛ Gyisɛse a le Dievolɛ ne a. Ɔwɔ kɛ diedinli ne noko bɔ mɔdenle fa mɔɔ Gyisɛse ɛhilehile la bɔ ye ɛbɛla. Saa gyimayɛlɛ ɛnle nu a, diedi biala mɔɔ awie banyia la le mgbane. Baebolo ne ka kɛ, “Diedi mɔɔ gyimayɛlɛ ɛmboka nwolɛ la le wulera.” (Gyemise 2:26) Saa yɛka ye wɔ adenle fofolɛ zo a, ɔwɔ kɛ diedinli ne nyia diedi wɔ Gyisɛse anu—kile kɛ, ɔwɔ kɛ ɔfa ye diedi ne ɔbɔ ye ɛbɛla.

Pɔɔlo hilele edwɛkɛ ne anu kɛ: “Kelaese ɛhulolɛ ne a sie yɛ a, ɔboalekɛ yɛdie yɛto nu kɛ sonla ko [Gyisɛse] wule manle menli kɔsɔɔti, . . . Ɔwule ɔmanle menli muala, amaa bɛdabɛ mɔɔ bɛde ngoane nu la andɛnla ammaa bɛ ngome bɛ nwo, na bɛadɛnla bɛamaa sonla ne mɔɔ bɛ ti a ɔwule na bɛdwazole ye bɛrale ngoane nu la.” (2 Kɔlentema 5:14, 15) Gyisɛse afɔlebɔlɛ ne anwo anyezɔlɛ kpole ɔwɔ kɛ ka yɛ maa yɛyɛ nzenzaleɛ wɔ yɛ ɛbɛlabɔlɛ nu—yɛgyakyi kɛ yɛbava angomedi yɛadɛnla aze yɛamaa yɛ nwo na yɛadɛnla aze yɛamaa Gyisɛse, mɔɔ wule manle yɛ la. Ɛhye kile kɛ, ɔwɔ kɛ yɛmaa mɔɔ Gyisɛse hanle kɛ yɛyɛ la kyia yɛ wɔ yɛ ɛbɛlabɔlɛ nu tɛla debie biala. Nzenzaleɛ ɛhye baha ninyɛne mɔɔ sonle bolɛ maa yɛ, mɔɔ yɛkulo nee debie biala mɔɔ yɛyɛ la. Nyilalɛ boni a menli mɔɔ nyia Gyisɛse anu diedi la bɛanyia a?

Dwɔn 3:16 foa ne mɔɔ li awieleɛ la kile ɛwɔkɛ mɔɔ Nyamenle ɛbɔ bɛdabɛ mɔɔ bɛnyia ɛkpɔnedeɛ ne mɔɔ yeva yemaa la anu diedi na bɛfa Nyamenle ngyinlazo ne mɔ bɛbɔ bɛ ɛbɛla la. Nyamenle ɛhile kɛ menli zɛhae mɔɔ di nɔhalɛ la ‘ɛnrɛwu na bɛbanyia ngoane mɔɔ ɛnlɛ awieleɛ.’ Noko akee, menli mɔɔ banyia Nyamenle ɛlɔlɛ ne azo nvasoɛ la anyelazo ne le ngakyile.

Gyisɛse bɔle ekpunli ko ɛwɔkɛ kɛ bɛbanyia dahuu ngoane wɔ anwuma. Ɔhanle ɔhilele ye nɔhalɛ ɛdoavolɛma kɛ ɔlɛkɔ yeahɔziezie ɛleka yeamaa bɛ amaa bɛ nee ye ali tumi wɔ anyunlunyia nu. (Dwɔn 14:2, 3; Felepaema 3:20, 21) Menli mɔɔ bɛbadwazo bɛ bɛahɔ anwuma la bayɛ ‘Nyamenle nee Kelaese ɛsɔfoma na bɛ nee ye ali tumi kɛ arelemgbunli ɛvolɛ 1,000.’—Yekile 20:6.

Kelaese ɛdoavolɛma ekyi bie a banyia nwolɛ adenle ɛhye a. Nɔhalɛ nu, Gyisɛse hanle kɛ: “Me mboane ekpunli ekyi, bɛmmasulo, ɔluakɛ bɛ Ze mɔɔ wɔ anwuma la kulo kɛ bɛnyia Belemgbunlililɛ ne.” (Luku 12:32) Kɛzi “mboane ekpunli ekyi” ne dodo bayɛ ɛ? Yekile 14:1, 4 ka kɛ: “Mekado me nye la ɛnee Boaneralɛ ne [Gyisɛse Kelaese mɔɔ bɛdwazo ye la] gyi [anwuma] Boka Zayɔn azo; ɔ nee menli 144,000 mɔɔ bɛhɛlɛ ɔdaye ye duma yɛɛ Selɛ ne duma wɔ bɛ nwoma azo la a gyi ɛkɛ a. . . . Bɛmɛ a bɛlie bɛ ngoane bɛvi aleɛabo amra avinli kɛ bɛle menli mɔɔ bɛlumua bɛva bɛ bɛrɛlɛ Nyamenle nee Boaneralɛ ne a.” Saa yɛfa yɛtoto menli mgbe mgbe mɔɔ badɛnla aze la anwo a menli 144,000 ne le “mboane ekpunli ekyi” bie ala. Bɛha bɛ nwo edwɛkɛ kɛ bɛle arelemgbunli, yemɔti nwane mɔ a bɛbali bɛ nwo zo tumi a?

Gyisɛse hanle menli ekpunli mɔɔ tɔ zo nwiɔ mɔɔ di nɔhalɛ mɔɔ bɛbanyia anwuma Belemgbunlililɛ ne azo nvasoɛ la anwo edwɛkɛ. Kɛmɔ yɛnwu ye wɔ Dwɔn 10:16 la, Gyisɛse hanle kɛ: “Me mboane ne  mɔ bie ɛnle tunli ye anu. Ɔwɔ kɛ mekpondɛ bɛ bo zo; bɛbade me ne, na bɛ muala bɛbayɛ mboane ekpunli ko mɔɔ bɛ neavolɛ ko a.” “Mboane” ɛhye mɔ anye la kɛ bɛbanyia dahuu ngoane wɔ azɛlɛ ye azo—anyelazo ko ne ala mɔɔ ɛnee Adam nee Yive lɛ wɔ mɔlebɛbo ne la. Kɛzi yɛkola yɛnwu kɛ bɛbadɛnla azɛlɛ ye azo kenlebie ɛ?

Baebolo ne ɛha ye fane dɔɔnwo kɛ Paladaese bara azɛlɛ ye azo. Saa ɛkulo kɛ ɛnwu ɛhye a, ɛbahola wɔabuke wɔ Baebolo ne na wɔagenga edwɛkɛ ɛhye mɔ: Edwɛndolɛ 37:9-11; 46:8, 9; 72:7, 8, 16; Ayezaya 35:5, 6; 65:21-23; Mateyu 5:5; Dwɔn 5:28, 29; Yekile 21:4. Ngyehyɛnu ɛhye mɔ kile kɛ konle, ɛhɔne, anwodolɛ nee ewule bavi ɛkɛ. Bɛka mekɛ mɔɔ kpalɛma bava anyelielɛ azi bɛ azua, ayɛ bɛ tola, na bɛatete bɛ mra wɔ ɛleka mɔɔ anzondwolɛ wɔ la anwo edwɛkɛ. * Ɛ nye ɛnlie anyelazo ɛhye anwo ɔ? Adwenle kpalɛ bie ati, yɛdie yɛdi kɛ ɔnrɛhyɛ ɛwɔkɛ ɛhye mɔ bara nu.

Saa ɛgyinla na ɛdwenle ninyɛne mɔɔ Nyamenle ɛyɛ ɛmaa ɛdawɔ nee alesama kɔsɔɔti la anwo a, ɔda ali kɛ yelumua yeyɛ dɔɔnwo. Yɛlɛ ngoane, adwenle, kpɔkɛdelɛ yɛɛ ninyɛne mɔɔ boa maa yɛtɛnla aze la. Mɔɔ tɛla ɛhye la, Nyamenle ɛkpɔnedeɛ ahyɛlɛdeɛ ne, mɔɔ ɔluale Gyisɛse mɔɔ wule manle yɛ anwo zo la bamaa yɛanyia nyilalɛ dɔɔnwo kɛmɔ yɛnwu ye wɔ Dwɔn 3:16 la.

Dahuu ngoane wɔ anzondwolɛ, ɛleka kɛnlɛma mɔɔ yɛndwenle anwodolɛ, konle, ɛhɔne anzɛɛ ewule nwo la babuke anyelielɛ nee nyilalɛ mɔɔ ɛnlɛ awieleɛ la anwo adenle amaa yɛ. Saa ɛbanyia nyilalɛ ɛhye mɔ a ɔgyi ɛdawɔ mumua ne ɛ nwo zo. Kpuyia mɔɔ wɔ ɛkɛ la a le kɛ, Duzu a ɛlɛyɛ wɔamaa Nyamenle a?