Bɛtetele me wɔ Warialda, sua ekyi bie mɔɔ wɔ New South Wales la azo. Warialda le sua mɔɔ bɛyɛ ɛbɔ nu gyima ngakyile le kɛ mboane nee nlankɛ ɛzielɛ yɛɛ bɛdua ma nee ninyɛne ngyikyi wɔ ɛkɛ. Sua ne azo te yɛɛ ɛtanelilɛ dɔɔnwo ɛnle zo.

Kɛmɔ medame a mele mralɛ bulu ne anu kpanyinli la ati, menyianle ɛvolɛ 13 la, membɔle ɔ bo kɛ meyɛ gyima meaboa abusua ne. Kɛmɔ meangɔ sukulu kpole la ati, menyɛle ɛbɔ nu gyima. Mekanyia ɛvolɛ 15 la, ɛnee mesie nane, na menea mgbɔnwɔ nwo zo.

Ɛbɔ nu gyima ne mɔɔ menyɛle la manle mengɔle tɛnlabelɛ nwiɔ anu. Ko a le kɛ ɛnee me nye die gyima ne nee ɛleka mɔɔ meyɛ ye la anwo kpalɛ. Aleɛ dwo a yɛkua senle na yɛtɛnla nwolɛ na ɔmaa menea siane ne yɛɛ anwomanyunlu mɔɔ nwɔlɔra ɛlɛta ɛkɛ la wɔ mekɛ mɔɔ kpɔkɛ ne anu anwoma ɛlɛye me nwo la. Mekakye kɛ menzuzule nwolɛ kɛ ɔbayɛ kɛ awie a bɔle ninyɛne ngɛnlɛma ɛhye mɔ a. Noko, eza ɔmanle menzukoale subane ɛtane mɔɔ kɔ zo wɔ ɛbɔ nu ɛkɛ la. Ɛnee mete kɛ bɛka ndane na ɛnee ɔnyɛ se kɛ mebanlo sigalɛte. Yeangyɛ sigalɛte ɛnlonlɛ nee ndanehanlɛ hale me nwo.

Menyianle ɛvolɛ 18 la, mengɔle Sydney. Membɔle mɔdenle kɛ mekɔ sogya noko bɛanva me ɔluakɛ meangɔ sukulu kpole la ati. Menyianle gyima na menlile ɛvolɛ ko wɔ Sydney. Mekɛ ɛhye a le mekɛ mɔɔ lumua mɔɔ menwunle Gyihova Alasevolɛ a. Bɛdole ɛsalɛ bɛvɛlɛle me kɛ memaa yɛhɔ debiezukoalɛ na menliele mendole nu, na ɛkɛ ne ala menwunle kɛ mɔɔ bɛkilehile la le nɔhalɛ.

Noko akee, yeangyɛ biala, menzile kpɔkɛ kɛ mesia meahɔ ɛbɔ nu gyima ne azo. Mengɔvindele Goondiwindi, mɔɔ wɔ Queensland la. Menyianle gyima wɔ ɛkɛ, mengyale raalɛ noko ɔyɛ nyane kɛ, eza membɔle ɔ bo kɛ meno nza.

 Me nee me ye wole ngakula nwiɔ. Yɛwole me mra mrenya ne mɔ la, membɔle ɔ bo menzuzule kɛzi me ɛbɛlabɔlɛ ɛlɛkɔ ye la anwo kpalɛ. Mengakyele mɔɔ mendele ye wɔ Alasevolɛ ne mɔ debiezukoalɛ bo wɔ Sydney la, na menzile kpɔkɛ kɛ mebayɛ nwolɛ debie.

Menwunle Ɛzinzalɛ Arane dɛba bie, mɔɔ Gyihova Alasevolɛ mɔɔ wɔ Australia ɔfese address wɔ zolɛ la. Mengɛlɛle bɛ kɛlata kɛ mehyia moalɛ. Bɛ sa hanle ye la, bɛmanle Dasevolɛ bie mɔɔ le atiakunlukɛnlɛma na ɔlɛ ɛlɔlɛ la rakpɔlale me. Yeangyɛ, ɔbɔle ɔ bo kɛ ɔ nee me sukoa Baebolo ne.

Mekɛ mɔɔ melɛsukoa Baebolo ne la, menwunle kɛ ɔwɔ kɛ meyɛ nzenzaleɛ dɔɔnwo wɔ me ɛbɛlabɔlɛ nu. Baebolo ngyehyɛnu ko mɔɔ hanle me titile la a le 2 Kɔlentema 7:1. Zɔhane ngyehyɛnu ne maa yɛ anwosesebɛ kɛ ‘yɛwowo debie biala mɔɔ gua yɛ sonlabaka ne anwo evinli la yɛgua.’

Menzile kpɔkɛ kɛ mebagyakyi sigalɛte ɛnlonlɛ nee nzabolɛ. Ɛnee ɔnla aze kɛ mebayɛ zɔhane nzenzaleɛ ne, ɔluakɛ ɛnee yeha me nwo mekɛ tendenle. Noko ɛnee meva mezie me nye zo kɛ meyɛ mɔɔ sɔ Nyamenle anye la. Mɔɔ boale me kpalɛ la a le ngyinlazo ne mɔɔ wɔ Wulomuma 12:2, mɔɔ se: ‘Bɛmmamaa ewiade amaamuo di bɛ adwenle, bɛhakyi bɛ adwenle bɔkɔɔ’ mɔɔ menvale membɔle me ɛbɛla la. Menwunle ye kɛ, saa mebahola meahakyi me subane a, ɔwɔ kɛ mekakyi me adwenle na mebu me subane kɛmɔ Nyamenle bu ye la kɛ ɔnle kpalɛ. Ɔlua ye moalɛ zo, mengolale mengyakyile sigalɛte ɛnlonlɛ nee nzabolɛ.

Noko akee, mɔɔ ɛnee yɛ se kpalɛ la a le kɛ mebagyakyi ndanehanlɛ. Ɛnee meze Baebolo ne folɛdulɛ mɔɔ wɔ Ɛfɛsɛsema 4:29 mɔɔ se: “Bɛmmamaa edwɛkɛ ɛtane fi bɛ nloa anu finde” la. Noko akee, me nloa ɛdendɛlɛ anyɛ fɛ ɛkɛ ne ala. Menwunle ye kɛ mesuzu edwɛkɛ mɔɔ wɔ Ayezaya 40:26 la anwo a ɔbaboa me. Ngyehyɛnu ne ka nwɔlɔra mɔɔ ta anwomanyunlu la anwo edwɛkɛ wɔ ɛkɛ ne kɛ: “Bɛdo bɛ nye anwuma na bɛnlea, nwane a bɔle ɛhye mɔ a? Yemɔ yɛɛ ɔbɔle bɛ kɔsɔɔti a, yɛɛ ɔfa ko biala duma ɔfɛlɛ ye. Ye tumi kpole ne ati, yɛɛ ɔlɛ tumi na ɔ nwo yɛ se la ati, ko bɔbɔ ɛmminli.” Menzuzule nwolɛ kɛ saa Nyamenle nyianle tumi bɔle ewiade kpole ɛhye mɔɔ me nye die nwolɛ la a, ɛnee ɔbahola yeamaa meanyia anwosesebɛ meava meayɛ nzenzaleɛ amaa meazɔ ɔ nye. Ɔlua asɔneyɛlɛ nee mɔdenlebɔlɛ zo, ngyikyingyikyi mengolale meneanle me ɛdendɛlɛ ne boɛ.

Kɛmɔ ɛnee menea nane la ati, ɛnee me nee menli ɛnda ɛnli adwelie, ɔluakɛ ɛnee menli ekyi bie a wɔ ɛleka mɔɔ meyɛ ɛbɔ nu gyima ne la. Noko, ɔlua ndetelɛ mɔɔ menyia wɔ Gyihova Alasevolɛ debiezukoalɛ bo la ati, mezukoa kɛzi mebahola meadendɛ la. Ndetelɛ ne maa mekola meka Nyamenle Belemgbunlililɛ ne anwo edwɛkpa ne mekile awie mɔ.—Mateyu 6:9, 10; 24:14.

Meva ɛvolɛ dɔɔnwo mezonle kɛ kpanyinli wɔ asafo ne anu. Mebu ye kɛ ɔle nwolɛ adenle kɛ mebayɛ debie biala mɔɔ mebahola la meava meaboa me gɔnwo mɔ mediema. Noko akee, nyilalɛ kpole kpalɛ mɔɔ menyia la a le kɛ me nee me ye mɔɔ di nɔhalɛ mɔɔ mekulo ye la nee yɛ mra ngɛnlɛma ne mɔ ɛlɛbɔ nu azonle Gyihova.

Meda Gyihova ase kɛ yemaa medame mɔɔ meangɔ sukulu kpole la menyia adenle kɛ ɔlɛkilehile me la. (Ayezaya 54:13) Medie edwɛkɛ mɔɔ wɔ Mrɛlɛbulɛ 10:22 la meto nu bɔkɔɔ, ɔka kɛ: ‘Gyihova nyilalɛ maa sonla nyia ɔ nwo.’ Me nee me abusua ne anye la kɛ yɛbazukoa Gyihova anwo debie dɔɔnwo na yɛazonle ye dahuu.