Ɛdie Nyamenle ɛdi ɔ? Saa ɔle zɔ a, asoo ɛbahola wɔahile debie mɔɔ kile kɛ ɔwɔ ɛkɛ la? Nɔhalɛ ne a le kɛ daselɛ mɔɔ kile kɛ Bɔvolɛ mɔɔ ze nrɛlɛbɛ, ɔlɛ tumi na ɔlɛ ɛlɔlɛ wɔ ɛkɛ la ɛbɔ yɛ nwo ɛyia. Daselɛ boni ɔ, na tumi boni a wɔ nu a? Amaa yɛanwu mualɛ ne la, suzu edwɛkɛ mɔɔ ɛzoanvolɛ Pɔɔlo hɛlɛle wɔ ye kɛlata ne anu hɔmanle Keleseɛnema mɔɔ wɔ Wulomu la anwo nea.

Pɔɔlo hanle kɛ: “Sumunli kɛ Nyamenle bɔle ewiade la yɛɛ ɔbɔle ɔ bo kɛ ɔye ye su kpalɛ ne mɔɔ yɛ nye ɛnnwu ye la wienyi yeahile sonla a. Ninyɛne ɛhye mɔ a le ye damɛnlangoate tumi ne nee ye nyamenleyɛlɛ ne. Menli nwu ɛhye wɔ ninyɛne mɔɔ Nyamenle ɛbɔ la anu. Yemɔti bɛnlɛ nyelebɛnloa fee!” (Wulomuma 1:20) Bɛnwu Bɔvolɛ ne asa nloa wɔ ye gyima nwo kɛmɔ Pɔɔlo hilele la. Bɛmaa yɛnlea Pɔɔlo edwɛkɛ ne anu kpalɛ.

Pɔɔlo hanle kɛ “Sumunli kɛ Nyamenle bɔle ewiade la,” yɛɛ ye subane ne mɔ bɔle ɔ bo kɛ ɔda ali a. Wɔ edwɛkɛ ɛhye anu, Giliki edwɛkɛkpɔkɛ mɔɔ bɛhile ɔ bo “ewiade” la ɛngile Azɛlɛ ye. Emomu, ɔkile alesama. * Yemɔti, ɛnee Pɔɔlo ɛlɛka kɛ bɛbɔle alesama ala la ɛnee bɛkola bɛnwu Bɔvolɛ ne subane ne anwo daselɛ wɔ ninyɛne mɔɔ yebɔ la anu.

Yɛkola yɛnwu zɔhane daselɛ ne. Abɔdeɛ ɛtɛkedale zolɛ, emomu, ‘ɔda ali wienyi.’ Ɔvi abɔdeɛ mɔɔ le kpole kɔdwu mɔɔ le ekyi la azo, ɔda ali wienyi kɛ Bɔvolɛ bie wɔ ɛkɛ na eza ɔlɛ subane kɛnlɛma. Asoo ninyɛne mɔɔ bɛvi nrɛlɛbɛ nu bɛyɛ wɔ abɔdeɛ nu la ɛmmaa yɛnnwu Nyamenle nrɛlɛbɛ ne? Asoo nwɔlɔra mɔɔ ta anwomanyunlu nee sɛlɛkye mɔɔ bu la ɛngile ye tumi? Asoo aleɛ ngakyile mɔɔ maa yɛ nye die nee sɛnzɛne ne mɔɔ tudu na ɔtɔ kɛnlɛma la ɛngile kɛ ɔkulo alesama?—Edwɛndolɛ 104:24; Ayezaya 40:26.

Kɛzi daselɛ ne anu la ɛkɛ ɛ? Nuhua la ɛkɛ wienyi yemɔti menli mɔɔ bɛnnwu ye na ɔlua zo bɛnlie Nyamenle bɛnli la ɛnlɛ “nyelebɛnloa fee.” Nwomanli ko hanle ye wɔ adenle ɛhye azo kɛ: Fa ye kɛ delava bie ɛbu ɔ nye ɛgua sɛkɛlɛneɛ mɔɔ se “Fa Bɛne Zo” la azo. Kpolisinli ɛmaa yegyinla na ɔlɛkɛlɛ kɛlata yeamaa ye. Delava ne ɛlɛsu kpolera kɛ yeannwu sɛkɛlɛneɛ ne. Noko ɛnea mɔɔ delava ne ɛlɛka a ɔle mgbane ɔluakɛ sɛkɛlɛneɛ ne gyi ɛleka mɔɔ awie biala nwu ye la, yɛɛ delava ne anye ɛnyɛ ye nyane. Ɛye yemɔ ɛsie ahane a, ɔle delava ne gyima kɛ ɔkɛnwu sɛkɛlɛneɛ zɛhae na ɔkɛli zolɛ. Zɔhane ala a Nyamenle anwo daselɛ de wɔ abɔdeɛ nu a. Awie biala kola nwu zɔhane “sɛkɛlɛneɛ” ne. Kɛmɔ yɛle abɔdeɛ mɔɔ yɛdwenle la ati, yɛkola yɛnwu ye. Yɛbu yɛ nye yɛgua zolɛ a yɛnlɛ nyelebɛnloa fee.

Nɔhalɛ nu, abɔdeɛ maa yɛnwu yɛ Bɔvolɛ ne anwo ninyɛne dɔɔnwo. Noko debie fofolɛ maa yɛnwu ɔ nwo ninyɛne dɔɔnwo, yemɔ a le Baebolo ne. Yɛkola yɛdua mɔɔ wɔ nu la azo yɛbua kpuyia ɛhye mɔɔ hyia la kɛ: Bodane boni a Nyamenle lɛ maa azɛlɛ ye nee alesama mɔɔ bɛwɔ zolɛ la ɛ? Saa ɛnwu zɔhane kpuyia ne mualɛ a ɔbaboa wɔ yeamaa wɔabikye Nyamenle ne mɔɔ ‘yela ye su kpalɛ ne mɔɔ ɛnyelɛ ɛnnwu ye’ la ali wienyi wɔ ewiade ye anu la.