Maa Gyihova Ɛmaa Wɔ Nɔhalɛ Fanwodi
Maa Gyihova Ɛmaa Wɔ Nɔhalɛ Fanwodi
“Neɛnlea fanwodi mɛla ne mɔɔ di munli la anu.”—GYE. 1:25.
ƐBAHOLA WƆAHILEHILE NU Ɔ?
Mɛla boni a maa yɛnyia nɔhalɛ fanwodi a, na nwane mɔ a nyia mɛla ɛhye azo nvasoɛ a?
Duzu a bamaa yɛanyia nɔhalɛ fanwodi a?
Fanwodi boni a wɔ ɛkɛ maa menli mɔɔ kɔ zo dua ngoane adenle ne azo la ɛ?
1, 2. (a) Kɛzi fanwodi mɔɔ wɔ ewiade ye la ɛlɛyɛ ɛ, na duzu ati ɔ? (b) Fanwodi boni a wɔ ɛkɛ maa Gyihova azonvolɛ a?
YƐDE mekɛ mɔɔ anyebolo, mɛladonlɛ nee basabasayɛlɛ ɛlɛkɔ ɔ nyunlu la anu. (2 Tem. 3:1-5) Ɛhye ati, arane ne mɔ di mɛla ngakyile, boa kpolisima wɔ bɛ gyima ne anu, na bɛdua ɛlɛtɔlɔnek ninyɛne zo bɛfa banebɔlɛ bɛmaa. Wɔ maanle bie mɔ anu, menli ne dua debie mɔɔ yɛ dede mɔɔ bɛhyehyɛ ye wɔ bɛ azua nu, apipi dɔɔnwo mɔɔ bɛfa bɛgua bɛ nlenkɛ nloa nee ninyɛne mɔɔ lateleke wɔ nu mɔɔ bɛfa bɛdie bane la azo bɛkpondɛ banebɔlɛ. Menli dɔɔnwo nee bɛ mra ɛnvinde mɔɔ awie ɛmboka bɛ nwo a. Ɔda ali kɛ menli dɔɔnwo ɛnlɛ fanwodi na zɔhane yɛɛ ɔbahɔ zo yeayɛ a.
2 Seetan hanle ye wɔ Yidɛn tola ne anu kɛ, saa menli twe bɛ nwo fi Gyihova anwo a bɛbanyia nɔhalɛ fanwodi. Nea adalɛ kpole mɔɔ edwɛkɛ zɔhane yɛle a! Nɔhalɛ nu, mekɛ mɔɔ menli ɛlɛbu bɛ nye agua ɛbɛlabɔlɛ nee sunsum nu ɛweɛne mɔɔ Nyamenle ɛdo azo la, ɛnee bɛ anwongyelelɛ ne noko ɛlɛyɛ kpole. Ngyegyelɛ ɛhye bie ka yɛdayɛ mɔɔ yɛle Gyihova azonvolɛ la. Noko akee, yɛlɛ anyelazo kɛ kenle ko dedee alesama bavi ɛkpɔlɔlɛ akɛlɛzonlenlɛ nu na banyia mɔɔ Baebolo ne fɛlɛ ye “anyunlunyia fanwodi ne mɔɔ Nyamenle amra lɛ ye la.” (Wulo. 8:21) Nɔhalɛ, Gyihova ɛbɔ ɔ bo ɛlɛsiezie ye azonvolɛ yeamaa zɔhane fanwodi ne. Adenle boni azo?
3. Mɛla boni a Gyihova ɛva ɛmaa Kelaese ɛdoavolɛma a, na kpuyia boni mɔ a yɛbazuzu nwo a?
3 Mualɛ ne wɔ mɔɔ Baebolo kɛlɛvolɛ Gyemise vɛlɛle ye “fanwodi mɛla ne mɔɔ di munli la” anu. (Bɛgenga Gyemise 1:25.) Baebolo ngilebɛbo gyɛne kile ɔ bo kɛ “mɛla mɔɔ maa yɛnyia yɛ ti” (The New English Bible) nee “fanwodi nwo mɛla mɔɔ ɔdi munli” (The New American Bible). Noko akee, adwenle mɔɔ menli dɔɔnwo lɛ ye wɔ mɛla nwo la a le kɛ ɔmmaa bɛnnyia fanwodi. Duzu a le “fanwodi mɛla ne mɔɔ di munli la”? Kɛzi zɔhane mɛla ne maa yɛnyia fanwodi ɛ?
FANWODI MƐLA NE
4. Duzu a le “fanwodi mɛla ne mɔɔ di munli la,” na nwane mɔ a nyia zolɛ nvasoɛ a?
4 Tɛ Mosisi Mɛla ne mɔɔ manle ɛtane lale ali na Kelaese manle ɔrale nu la a le “fanwodi mɛla ne mɔɔ di munli la.” (Mat. 5:17; Gal. 3:19) Mɛla boni a ɛnee Gyemise ɛlɛka nwolɛ edwɛkɛ a? Ɛnee “Kelaese mɛla ne,” mɔɔ eza bɛfɛlɛ ye “diedi mɛla” nee “fanwodi mɛla” la, anwo edwɛkɛ a wɔ ye adwenle nu a. (Gal. 6:2; Wulo. 3:27, NW; Gye. 2:12) Ɛhye ati, “mɛla ne mɔɔ di munli la” a le debie biala mɔɔ Gyihova kpondɛ kɛ yɛyɛ la. Keleseɛnema mɔɔ bɛkpokpa bɛ nee ‘mboane gyɛne’ ne anu amra kɔsɔɔti nyia zolɛ nvasoɛ.—Dwɔn 10:16.
5. Duzu ati a fanwodi mɛla ne ɛnyɛ ɛnlomboɛ ɛ?
5 “Mɛla ne mɔɔ di munli la” ɛnle kpomgbondee anzɛɛ ɔmbu bɛ kɔme kɛmɔ mɛla mɔɔ wɔ maanle dɔɔnwo anu de la, emomu, ɔle mɛla nee ngyinlazo mɔɔ zolɛlilɛ ɛnyɛ se a. (1 Dwɔn 5:3) Gyisɛse hanle kɛ: “Me gyɛnvayile ne le felafela, yɛɛ bɔlɛ mɔɔ mebava meazoa bɛ la ɛnyɛ ɛnlomboɛ.” (Mat. 11:29, 30) Bieko, ɔngyia kɛ bɛkɛva mɛla dɔɔnwo mɔɔ bɛgyinla zo bɛtwe menli nzo la bɛkɛboka “mɛla ne mɔɔ di munli la” anwo, ɔluakɛ ɔgyi ɛlɔlɛ zo yɛɛ bɛangɛlɛ ye wɔ awolɛ ndɛbandɛba zo, emomu, bɛhɛlɛ ye wɔ adwenle nee ahonle nu.—Bɛgenga Hibuluma 8:6, 10.
KƐZI “MƐLA NE MƆƆ DI MUNLI LA” MAA YƐNYIA FANWODI LA
6, 7. Duzu a yɛbahola yɛaha ye wɔ Gyihova ngyinlazo nwo a, na duzu ati a fanwodi mɛla ne maa yɛ nwo tɔ yɛ ɛ?
6 Mɛla mɔɔ Gyihova ɛli ɛmaa ye abɔdeɛ mɔɔ ze nrɛlɛbɛ la boa bɛ, yɛɛ ɔbɔ bɛ nwo bane. Wɔmɔ fa abɔdeɛ nu mɛla mɔɔ bie a le tumi mɔɔ twe ninyɛne ba aze la kɛ neazo. Menli ɛnga kɛ zɔhane mɛla ne gyegye bɛ. Emomu, bɛkile nwolɛ anyezɔlɛ, na bɛdie bɛto nu kɛ abɔdeɛ nu mɛla nwo hyia maa bɛ boɛyɛlɛ. Zɔhane ala a ɛbɛlabɔlɛ nwo mɛla nee ngyinlazo mɔɔ vi Gyihova ɛkɛ mɔɔ wɔ Kelaese “mɛla ne mɔɔ di munli la” anu la boa alesama a.
7 Mɔɔ boka yɛ nwo banebɔlɛ nwo la a le kɛ fanwodi mɛla ne maa yɛnyia adenle yɛdi yɛ atiakunluwɔzo kɔsɔɔti nwo gyima wɔ adenle kpalɛ zo mɔɔ yɛmboda awie mɔ anzɛɛ yɛntietia bɛ fanwodi zo a. Yemɔti, mɔɔ bamaa yɛ nye alie kpalɛ na yɛahola yɛayɛ mɔɔ yɛkulo la a le kɛ yɛbanwu ninyɛne mɔɔ le kpalɛ, mɔɔ bɛ nee Gyihova subane nee ye ngyinlazo yia la. Anzɛɛ, ɔwɔ kɛ yɛkulo mɔɔ Gyihova kulo la na yɛkyi mɔɔ ɔkyi la. Fanwodi mɛla ne boa yɛ maa yɛyɛ ɛhye.—Emɔ. 5:15.
8, 9. Nvasoɛ boni a menli mɔɔ di fanwodi mɛla ne azo la nyia a? Maa ndonwo.
8 Kɛmɔ yɛnli munli la ati, ɔwɔ kɛ yɛbɔ mɔdenle na yɛahola yɛali yɛ atiakunluwɔzo ɛtane zo. Noko akee, ɛnɛ bɔbɔ saa yɛdi fanwodi mɛla ne azo a, yɛnwu kɛzi ɔmaa yɛ nwo tɔ yɛ la. Kɛ neazo la: Ɛnee Baebolo sukoavo bie mɔɔ bɛfɛlɛ ye Jay la no tɛba. Mekɛ mɔɔ ɔnwunle kɛ ye nyɛleɛ ne ɛnzɔ Nyamenle anye la, ɛnee ɔwɔ kɛ ɔsi kpɔkɛ. Asoo ɔbahɔ zo yeali ye atiakunluwɔzo nzi anzɛɛ ɔbali Gyihova adehilelɛ zo? Ɔvile nrɛlɛbɛ nu ɔkpale kɛ ɔbazonle Nyamenle ɔnva nwo kɛ ɔyɛ a ɔ ti akunlu ba tɛba zo la. Mekɛ mɔɔ ɔhakyile ye subane la, kɛzi ɔdele nganeɛ ɛ? Ɔhanle kɛ: “Mendele nganeɛ kɛ me nwo ɛdɔ me bɔkɔɔ na me nye liele bole zo.”
9 Jay ɛbɛlabɔlɛ manle ɔnwunle kɛ ewiade ne anu fanwodi mɔɔ maa bɛdi “nwonane nu adwenleadwenle” nzi la maa bɛyɛ akɛlɛ, noko fanwodi mɔɔ Gyihova fa maa mɔɔ maa bɛdi ‘sunsum nu adwenleadwenle’ nzi la maa bɛnyia “ngoane nee anzonudwolɛ.” (Wulo. 8:5, 6) Nienwu a Jay nyianle anwosesebɛ lile ye subane ne mɔɔ manle ɔyɛle akɛlɛ la azo konim a? Tɛ ɔdaye mumua ne ye anwosesebɛ ɔ; Nyamenle a vale manle ye a. Ɔhanle kɛ: “Menzukoale Baebolo ne dahuu, menzɛlɛle sunsum nwuanzanwuanza ne, na memkpondɛle moalɛ menvile Keleseɛne asafo ne anu amra ɛkɛ.” Nziezielɛ ɛhye mɔ bahola aboa yɛ kɔsɔɔti wɔ mekɛ mɔɔ yɛlɛkpondɛ nɔhalɛ fanwodi la. Bɛmaa yɛnlea kɛzi yɛbayɛ ye la.
NEƐNLEA NYAMENLE EDWƐKƐ NE ANU
10. Nyamenle mɛla ne mɔɔ awie “neɛnlea” nu la kile duzu?
10 Gyemise 1:25 foa bie kenga kɛ: “Na awie mɔɔ neɛnlea fanwodi mɛla ne mɔɔ di munli la anu, na ɔsɔ nu dwaa la . . . , yemɔ yɛɛ Nyamenle kɛyila ye wɔ ye ɛbɛlabɔlɛ nu a.” Giliki edwɛkɛkpɔkɛ mɔɔ bɛhile ɔ bo “neɛnlea” nu la kile kɛ “ɛbutu wɔanlea debie nu kpalɛ,” na adwenle mɔɔ wɔ nu la a le kɛ awie fa ye adwenle azie debie zo. Yemɔti, saa yɛkpondɛ kɛ fanwodi mɛla ne nyia yɛ adwenle nee yɛ ahonle zo tumi a, ɔwɔ kɛ yɛbɔ mɔdenle yɛsukoa Baebolo ne na yɛfa asɔneyɛlɛ yɛdwenledwenle mɔɔ yɛkenga la anwo kpalɛ.—1 Tem. 4:15.
11, 12. (a) Kɛzi Gyisɛse zile nɔhalɛ ne mɔɔ ɔwɔ kɛ yɛfa yɛbɔ yɛ ɛbɛla la azo ɛ? (b) Kɛmɔ yɛnwu ye wɔ nvoninli ne anu la, esiane boni a ɔwɔ kɛ ngakula koati a?
11 Eza ɔwɔ kɛ ‘yɛsɔ nu dwaa’ anzɛɛ yɛfa Nyamenle Edwɛkɛ ne yɛbɔ yɛ ɛbɛla. Yemɔti Gyisɛse zele menli mɔɔ liele ye lile la bie mɔ kɛ: “Saa bɛkɔ zolɛ bɛdi me ngilehilelɛ zo a, ɛnee bɛle me ɛdoavolɛma amgba; bɛbanwu nɔhalɛ ne, na nɔhalɛ ne bamaa bɛanyia bɛ ti.” (Dwɔn 8:31, 32) Buluku bie ka kɛ edwɛkɛkpɔkɛ “bɛbanwu” abo eza kile anyezɔlɛ ɔluakɛ “debie mɔɔ awie ‘ze’ la sonle bolɛ maa ye anzɛɛ nwolɛ hyia ye.” Yemɔti, saa yɛfa nɔhalɛ ne yɛbɔ yɛ ɛbɛla a, ɛnee ɔkile kɛ ‘yɛnwu’ ye bɔkɔɔ. Saa yɛyɛ ye zɔ a, ɔbahile kɛ ‘Nyamenle edwɛkɛ ne’ ɛlɛyɛ “gyima” wɔ yɛ nu, ɔbahakyi yɛ subane yeamaa yɛala yɛ anwuma Selɛ ne anyunlunyia ali.—1 Tɛs. 2:13.
12 Biza ɛ nwo kɛ, ‘Asoo menwu nɔhalɛ ne amgba? Mefa mebɔ me ɛbɛla ɔ? Anzɛɛ me nye tɛdie “fanwodi” mɔɔ wɔ ewiade ye anu la bie mɔ anwo?’ Adiema raalɛ bie mɔɔ ye awovolɛ le Keleseɛnema la kakye ye ngakula nu la, ɔhɛlɛle kɛ: “Saa bɛlɛtete wɔ wɔ nɔhalɛ ne anu a, ɛze kɛ Gyihova wɔ ɛkɛ. Noko, mame meannwu ye ɛlɛ. Meangyi mɔɔ ɔkyi la ɛlɛ. Meanlie meanli ye ɛlɛ kɛ mɔɔ ɛnee meyɛ la anwo hyia ye. Yɛɛ meangɔ ye ɛkɛ wɔ mekɛ mɔɔ mewɔ ngyegyelɛ nu la ɛlɛ. Menvale me nwo mendole me ndelebɛbo mɔɔ ɛnɛ menwu kɛ nvasoɛ ɛnle zo ɔluakɛ ɛnee menze ɛhwee la azo.” Ɔyɛ anyelielɛ kɛ nzinlii adiema raalɛ ne nwunle kɛ ye nzuzulɛ ne ɛndenrɛ na ɔyɛle nzenzaleɛ la. Ɔyɛle dahuu adekpakyelɛ bɔbɔ.
SUNSUM NWUANZANWUANZA NE MAA YƐNYIA FANWODI
13. Kɛzi Nyamenle sunsum nwuanzanwuanza ne boa maa yɛnyia fanwodi ɛ?
13 Yɛkenga ye wɔ 2 Kɔlentema 3:17 kɛ: “Ɛleka mɔɔ Awulae Sunsum ne wɔ la, fanwodi wɔ ɛkɛ.” Kɛzi sunsum nwuanzanwuanza ne boa maa yɛnyia fanwodi ɛ? Ɔmaa yɛnyia subane le kɛ: “Ɛhulolɛ, anyelielɛ, anzonudwolɛ, abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ, mɛlɛbɛnwoaze, yɛɛ bɛ nwo zo ɛhomolɛ” mɔɔ maa bɛnyia fanwodi la. (Gal. 5:22, 23) Subane ɛhye mɔ, titile ɛhulolɛ ɛnle nu a, anrɛɛ yɛnrɛnyia nɔhalɛ fanwodi—kɛmɔ yɛnwu ye wɔ ewiade ɛhye anu ɛnɛ la. Ɔyɛ anyelielɛ kɛ mekɛ mɔɔ Pɔɔlo hanle sunsum ne ma ne anwo edwɛkɛ wiele la, ɔvale edwɛkɛ ɛhye ɔzɔle zo la: “Ɛhye mɔ, mɛla biala ɛnle ɛkɛ mɔɔ tia bɛ a.” Duzu a ɛnee ɔlɛkile a? Mɛla biala ɛnle ɛkɛ mɔɔ ɔbahola yeazi Nyamenle sunsum ne ma ne ɛzolɛ adenle a. (Gal. 5:18) Anrɛɛ bodane boni azo bɔbɔ a mɛla zɔhane bagyinla a? Gyihova kulo kɛ yɛnyia subane mɔɔ ɔle kɛ Kelaese ɛdeɛ ne la bie, na yɛda ye ali mɔɔ yɛmmaa debie biala ɛnzi yɛ adenle a.
14. Ndenle boni azo a ewiade sunsum ne maa menli yɛ ngɛkɛlɛ a?
14 Bie a menli mɔɔ ɛmaa ewiade sunsum ne ɛli bɛ adwenle la bɛadwenle kɛ bɛlɛ fanwodi ɔluakɛ bɛdi bɛ atiakunluwɔzo nzi. (Bɛgenga 2 Pita 2:18, 19.) Noko ɛhye ɛnle nɔhalɛ. Ɔwɔ kɛ bɛdi mɛla dɔɔnwo amaa bɛahola bɛali bɛ nganeɛdelɛ nee bɛ subane ɛtane ne anwo gyima. Pɔɔlo zele kɛ: “Tɛ menli mɔɔ di boɛ la ati a mɛla ne wɔ ɛkɛ a, mɛla ne wɔ ɛkɛ maa atuadelɛma.” (1 Tem. 1:9, 10) Eza bɛle ngɛkɛlɛ bɛmaa ɛtane, bɛyɛ ‘mɔɔ bɛ nwonane ne atiakunluwɔzo,’ mɔɔ le menlenlɛ atisesebɛ ne se bɛ la. (Ɛfɛ. 2:1-3) Wɔ adenle bie azo, menli ɛhye mɔ le kɛ ngyigyilira mɔɔ bɛde asikyɛlɛ nganeɛ la. Bɛ nganeɛdelɛ twehwe bɛ kɔ esiane nu.—Gye. 1:14, 15.
YƐNYIA FANWODI WƆ KELESEƐNE ASAFO NE ANU
15, 16. Duzu ati a ɔhyia kɛ yɛ nee asafo ne bɔ ɛ, na fanwodi boni a yɛlɛ a?
15 Keleseɛne asafo ne ɛnle eku bie mɔɔ ɛvale ɛ nwo ɛbɔle ye a. Emomu, Gyihova a hwenle wɔ rale asafo ne anu a. (Dwɔn 6:44) Duzu ati a ɔhwenle wɔ a? Asoo ɛnee ɛle tenlenenli na ɛsulo Nyamenle la ati ɔ? Bie a ɛbaha kɛ “Kyɛkyɛ!” Ɛnee duzu a Nyamenle nwunle ye a? Ɔnwunle ahonle mɔɔ bali ye mɛla ne mɔɔ maa fanwodi nee ye edwɛkɛ zo la. Gyihova ɛlua asafo ne azo yemaa wɔ sunsum nu aleɛ, yeziezie wɔ ahonle ne, yemaa wɔde ɛ nwo wɔvi adalɛ ɛzonlenlɛ ngilehilelɛ nee diedi mgbane mgbane nwo, na yehile wɔ kɛzi ɛbayɛ na wɔanyia Kelaese subane ne la. (Bɛgenga Ɛfɛsɛsema 4:22-24.) Yemɔti wɔnyia adenle wɔraboka menli mɔɔ wɔ ewiade ye anu mɔɔ bɛ ngome ala a ɔfɛta kɛ bɛka kɛ bɛlɛ “fanwodi” la anwo.—Gye. 2:12.
16 Suzu ɛhye anwo: Saa ɛ nee menli mɔɔ fa bɛ ahonle kɔsɔɔti kulo Gyihova la wɔ a, asoo wɔ ahonle tu? Asoo ɛzulolɛ maa ɛtoto ɛ nye ɛ nzi? Saa ɛlɛdi adwelie wɔ Belemgbunlililɛ Asalo a, asoo ɛsɔ wɔ ninyɛne nu kyengye mɔɔ ɛsulo kɛ ɔbaminli ɔ? Kyɛkyɛ! Debie biala ɛngyegye wɔ. Asoo ɛwɔ menli mɔɔ ɛnle mediema la avinli a, kɛ ɛte nganeɛ la ɛne? Kyɛkyɛ! Fanwodi ɛhye mɔɔ yɛnyia ye wɔ Nyamenle menli avinli la le fanwodi ne mɔɔ la yɛ nyunlu la anwo neazo ekyi bie ala.
“ANYUNLUNYIA FANWODI NE MƆƆ NYAMENLE AMRA LƐ YE LA”
17. Abusuabɔlɛ boni a wɔ alesama fanwodi nee ‘Nyamenle amra mɔɔ bɛbaye bɛ nwo bɛahile’ la avinli a?
17 Mekɛ mɔɔ Pɔɔlo ka fanwodi mɔɔ Gyihova bava amaa ye azonvolɛ mɔɔ badɛnla azɛlɛ ye azo anwo edwɛkɛ la, ɔhɛlɛle kɛ: “Abɔdeɛ muala ɛlɛkendɛ anwolɔlɛ kpole nu kɛ Nyamenle kɛye ɔ mra kɛhile [“Nyamenle amra baye bɛ nwo ahile,” NW].” Akee ɔvale ɔzɔle zo kɛ: “Bɛbaye abɔdeɛ muala bɛavi ɛkpɔlɔlɛ akɛlɛzonlenlɛ nu na yeanyia anyunlunyia fanwodi ne mɔɔ Nyamenle amra lɛ ye la.” (Wulo. 8:19-21) “Abɔdeɛ” ne gyi ɛkɛ maa alesama mɔɔ bɛlɛ anyelazo kɛ bɛbadɛnla azɛlɛ ye azo la, bɛdabɛ mɔɔ bɛbanyia Nyamenle amra mɔɔ bɛva sunsum ne bɛkpokpa bɛ mɔɔ ‘bɛbaye bɛ nwo bɛahile’ azo nvasoɛ la. Ɛhye babɔ ɔ bo wɔ mekɛ mɔɔ bɛbadwazo ɔ “mra” ɛhye mɔ bahɔ anwuma, na bɛ nee Kelaese aziezie azɛlɛ ye, bɛaye ɛtane bɛavi ɛkɛ na bɛabɔ “menli pemgbenleamgbe” anzɛɛ eku kpole ne anu amra anwo bane bɛahɔ ewiade fofolɛ ne anu la.—Yek. 7:9, 14.
18. Kɛzi alesama mɔɔ yɛ tieyɛ la banyia fanwodi ngyikyi ngyikyi ɛ, na awieleɛ bɔkɔɔ ne fanwodi boni a bɛbanyia a?
18 Akee alesama mɔɔ bɛlie bɛ ngoane la bɛanyia fanwodi bɔkɔɔ—bɛbavi Seetan nee ye sunsum ɛtane ne mɔ tumi bo. (Yek. 20:1-3) Nea anwodɔlɛ mɔɔ ɛhye bayɛ a! Yemɔ anzi, Kelaese nee ɔ gɔnwo mɔ arelemgbunli nee ɛsɔfoma 144,000 ne bɛalua ɛkpɔnenlɛ afɔle ne azo alie aleɛabo amra ngyikyi ngyikyi avi ɛtane nee sinlidɔlɛ mɔɔ Adam manle ɔrale la abo bɔkɔɔ. (Yek. 5:9, 10) Saa alesama di nɔhalɛ wɔ sɔnea nu a, bɛbanyia fanwodi mɔɔ di munli mɔɔ ɛnee Gyihova kpondɛ kɛ bɛnyia la—“anyunlunyia fanwodi ne mɔɔ Nyamenle amra lɛ ye la.” Dwenle nwolɛ nea! Yɛnrɛpele bieko na yɛahola yɛayɛ mɔɔ sɔ Nyamenle anye la. Yɛ sonlabaka ne kɔsɔɔti bali munli na yɛ subane ahakyi ayɛ kɛ Nyamenle ɛsaso la.
19. Duzu a ɔwɔ kɛ yɛkɔ zo yɛyɛ ye ɛnɛ amaa yɛanyia nɔhalɛ fanwodi a?
19 Asoo ɛ nwo ɛlɛdɔ “anyunlunyia fanwodi ne mɔɔ Nyamenle amra lɛ ye la”? Saa ɔle zɔ a, ɛnee maa “fanwodi mɛla ne mɔɔ di munli la” ɛnyia wɔ adwenle nee wɔ ahonle ne azo tumi dahuu. Sukoa Ngɛlɛlera ne anyebolo zo. Fa nɔhalɛ ne bɔ wɔ ɛbɛla, maa ɔyɛ wɔ ɛdeɛ. Sɛlɛ sunsum nwuanzanwuanza. Maa Keleseɛne asafo ne nee sunsum nu aleɛ mɔɔ Gyihova fa maa la ɛboa wɔ. Mmamaa Seetan bɛlɛbɛla wɔ kɛmɔ ɔbɛlɛbɛlale Yive ɔmanle ɔnyianle adwenle kɛ Nyamenle ndenle ɛmmaa bɛnnyia fanwodi la. Nɔhalɛ nu, Abɔnsam anye ɛde kpalɛ. Noko, kɛmɔ yɛbanwu ye wɔ edwɛkɛ mɔɔ doa zo anu la, ɔnle kɛ ‘yɛmaa Seetan di yɛ nwo zo konim, ɔluakɛ yɛze ye ndenle ne mɔ amuala.’—2 Kɔl. 2:11.
[Debiezukoalɛ kpuyia ne mɔ]
[Nvoninli ne mɔ wɔ mukelɛ 14]
Me nye tɛdie “fanwodi” mɔɔ wɔ ewiade ye la bie mɔ anwo ɔ?
[Nvoninli ne mɔ wɔ mukelɛ 14]
Asoo mefa nɔhalɛ ne mebɔ me ɛbɛla?
