“Bɛdi Me Ngilehilelɛ Zo”

“Saa bɛkɔ zolɛ bɛdi me ngilehilelɛ zo a, ɛnee bɛle me ɛdoavolɛma amgba; bɛbanwu nɔhalɛ ne, na nɔhalɛ ne bamaa bɛanyia bɛ ti.”​—DWƆN 8:31, 32.

Mɔɔ Ɔkile: Gyisɛse nyianle ye “ngilehilelɛ” ne vile anwuma. Gyisɛse hanle kɛ: “Selɛ ne mɔɔ zoanle me la a kile me mɔɔ ɔwɔ kɛ meka la a.” (Dwɔn 12:49) Gyisɛse hanle hilele ye anwuma Selɛ, Gyihova Nyamenle wɔ asɔneyɛlɛ nu kɛ: “Wɔ edwɛkɛ . . . le nɔhalɛ.” Ɛnee ɔta ɔfa Nyamenle Edwɛkɛ ne ɔsi ye ngilehilelɛ zo. (Dwɔn 17:17; Mateyu 4:4, 7, 10) Zɔhane ati, nɔhalɛ Keleseɛnema kɔ zo di ye “ngilehilelɛ” zo​—kile kɛ, bɛdie Nyamenle Edwɛkɛ Baebolo ne bɛto nu kɛ ɔle “nɔhalɛ,” na yemɔ azo a bɛ diedi nee bɛ ɛbɛlabɔlɛ kɔsɔɔti gyi a.

Alumua Keleseɛnema Yɛle Nwolɛ Neazo: Ɛzoanvolɛ Pɔɔlo, Keleseɛnenli mɔɔ ɔhɛlɛle Baebolo mbuluku dɔɔnwo na ɔbɔ mɔdenle kpalɛ la nee Gyisɛse yɛle adwenle wɔ kɛzi ɔbule Nyamenle Edwɛkɛ ne la anwo. Ɔhɛlɛle kɛ: “Bɛfa Nyamenle Sunsum a bɛkɛlɛ Nyamenle Edwɛkɛ ne a, na ɔle kpalɛ.” (2 Temɔte 3:16) Ɔwɔ kɛ menli mɔɔ bɛkpa bɛ bɛmaa bɛkilehile bɛ gɔnwo mɔ Keleseɛnema la sɔ “Nyamenle edwɛkɛ ne mɔɔ bɛkola bɛfa bɛ rɛle bɛto zo . . . la anu kyengye.” (Taetɛse 1:7, 9) Bɛdule alumua Keleseɛnema ne folɛ kɛ: “Bɛnlea boɛ na awie anva mɛlɛbɛla nee adalɛ nrɛlɛbɛ mɔɔ bɛlua ewiade amaamuo zo bɛhyehyɛ, . . . na ɔnvi Kelaese ɛkɛ ne la anyɛ bɛ ngɛkɛlɛ.”​—Kɔlɔsaema 2:8.

Nwane Mɔ A Di Bɛ Neazo Ne Anzi Ɛnɛ A? Kɛmɔ Vatican Dogmatic Constitution on Divine Revelation mɔɔ bɛliele bɛdole nu wɔ 1965 mɔɔ nwolɛ edwɛkɛ wɔ Catechism of the Catholic Church ne anu ka la: “Tɛ Ngɛlɛlera Nwuanzanwuanza ne angome a [Katelek] Asɔne ne gyinla zo die debie biala mɔɔ ɔkɛnwu ye la di a. Ɛhye ati ɔwɔ kɛ bɛdie tetedwɛkɛ nee Ngɛlɛlera Nwuanzanwuanza ne kɔsɔɔti bɛto nu na bɛfa nɔhalɛlilɛ nee anwoazehanlɛ bɛdi zo.” Maclean’s magazine ne vale ɛsɔfo bie mɔɔ ɔwɔ Toronto, Canada la, edwɛkɛ bie mɔɔ ɔbizale la dole gua kɛ: “Duzu ati a ɔwɔ kɛ yɛmaa edwɛkɛ bie mɔɔ bɛhanle ye wɔ ɛvolɛ kɛyɛ apenle nwiɔ mɔɔ ɛze ɛhɔ la kile yɛ adenle ɛ? Yɛlɛ nzuzulɛ ngɛnlɛma, na saa yɛsia yɛkɔfa Gyisɛse nee Ngɛlɛlera ne anu ɛdeɛ ne yɛboka nwo a ɔbazɛkye ye.”

Mɔɔ fane Gyihova Alasevolɛ anwo la, New Catholic Encyclopedia ne hanle kɛ: “Bɛbu Baebolo ne kɛ yemɔ angome a bɛ diedi ne gyi zo na bɛnea zo bɛbɔ bɛ ɛbɛla a.” Kenlensa ye ala, mekɛ mɔɔ raalɛ bie ɛlɛda ɔ nwo ali wɔ Canada kɛ ɔle Gyihova Dasevolɛ la, nrenya bie pɛle ye edwɛkɛ ne azo na ɔdendenle ɔ sa wɔ Baebolo ne azo ɔhanle kɛ. “Meze kɛzi bɛde a, ɛhye a kile zɔ a.”