Nyamenle Ɛlɛtwe Yɛ Nzo Ɔ?
Mekɛ mɔɔ azɛlɛkpusulɛ kpole bie zile Japan wɔ March 2011 na bieko zile Nyevile nu la, maanyɛlɛ kpanyinli bie hanle kɛ: “Ɔwɔ nuhua kɛ melɛdi nyane meamaa bɛdabɛ mɔɔ esiane ne ɛdo bɛ la ɛdeɛ, noko mesuzu kɛ ɔle tembatsu, anzɛɛ anzohwenlɛ mɔɔ vi Nyamenle.”
Mekɛ mɔɔ menli mɔɔ bo 220,000 wule wɔ Haiti azɛlɛkpusulɛ ne anu wɔ January 2010 la, nrenya bie mɔɔ ka edwɛkpa wɔ TV zo na yelie duma la hanle kɛ “bɛ nee abɔnsam yɛle ngyekyeleɛ” na ɔwɔ kɛ “bɛsia bɛtoa nyamenle.”
Mekɛ mɔɔ esiane bie hunle menli 79 wɔ Manila wɔ Philippines la, Katelek asɔne ne ɛsɔfo bie hanle kɛ: “Nyamenle kpondɛ kɛ ɔtunwue yɛ adwenle ne mɔɔ ɛwu na yesolo la.” Adwelie kɛlata bie bɔle amaneɛ kɛ “mgbanyinli mɔɔ wɔ ɛkɛ la anu ɛya ngyɛnu 21 die di kɛ Nyamenle ɛlɛdua ezuawolɛ, ahumuakyima nee esiane ngakyile mɔɔ sisi” maanle ne anu la azo “ala ye ɛya mɔɔ yeva la ali.”
DIEDI mɔɔ menli lɛ kɛ Nyamenle fa esiane twe ɛtanevolɛma anzo la ɛnle debie fofolɛ. Mekɛ mɔɔ azɛlɛkpusulɛ, senle, nee nyevile bo azɛlɛkpusulɛ bie hunle menli 60,000 wɔ Lisbon, Portugal, wɔ ɛvolɛ 1755 ne la, abɔlɔba Voltaire mɔɔ ɛnee ɛlie duma la bizale kɛ: “Asoo ninyɛndane wɔ Lisbon tɛla Paris mɔɔ adwɔmane nyɛleɛ ɛbu zo la?” Nɔhalɛ, menli dɔɔnwo ɛngola ɛnnwu ye saa Nyamenle ɛlɛdua esiane zo ahwe yɛ nzo a. Wɔ maanle dɔɔnwo anu, bɛka kɛ esiane ɛhye mɔ le Nyamenle asa anloa gyima.
Ɛhye mɔ amuala ati, ɔhyia kɛ yɛbiza kɛ: Asoo Nyamenle ɛva esiane ɛhwe menli nzo ɛlɛ? Asoo esiane dɔɔnwo mɔɔ ɛlɛsisi kenlensa ye la le anzohwenlɛ mɔɔ vi Nyamenle?
Bie mɔ gyinla abɔdeɛ nu ninyɛne mɔɔ Nyamenle ɛva ɛzɛkye menli mɔɔ nwolɛ edwɛkɛ wɔ Baebolo ne anu la azo tendɛ tia Nyamenle. (Mɔlebɛbo 7:17-22; 18:20; 19:24, 25; Ɛdianlɛ 16:31-35) Noko akee, saa yɛneɛnlea edwɛkɛ ɛhye mɔ mɔɔ wɔ Baebolo ne anu la anu a, yɛbanwu kɛ wɔ ko biala anu ninyɛne titile nsa ɛhye mɔ da ali. Mɔɔ lumua, bɛvale kɔkɔbɔlɛ bɛmanle. Mɔɔ tɔ zo nwiɔ, esiane mɔɔ sisi ɛnɛ la ku kpalɛma nee ɛtanevolɛma kɔsɔɔti noko ɛzɛkyelɛ mɔɔ vi Nyamenle la ɛnyɛ zɔ. Ɛtanevolɛma mɔɔ ɛngakyi bɛ adwenle anzɛɛ ɛndie kɔkɔbɔlɛ la yɛɛ ɔsɛkye bɛ a. Mɔɔ tɔ zo nsa, Nyamenle buke adenle maa tenlenema nyia bɛ ti.—Mɔlebɛbo 7:1, 23; 19:15-17; Ɛdianlɛ 16:23-27.
Daselɛ biala ɛnle ɛkɛ mɔɔ kile kɛ Nyamenle a ɛlua esiane ngakyile zo ɛhu menli ɛhye mɔ a. Asoo mekɛ bara mɔɔ esiane ɛnrɛzi bieko ɔ? Kɛ ɔkɛyɛ na yɛagyinla esiane nloa ɛ? Edwɛkɛ mɔɔ doɔdoa zo la baye kpuyia ɛhye mɔ anloa.
