Kpuyia Mɔɔ Vi Kengavoma Ɛkɛ

Kɛzi ɔwɔ kɛ yɛte ɛzonlenlɛ ɛvolɛ mgbondabulɛ ne abo ɛ?

Yɛ nye la kɛ yɛ sa baha ɛzonlenlɛ gyima ne anwo mgbondabulɛ mɔɔ ba Yearbook ne anu la ɛvolɛ biala. Yɛ nye die kɛ yɛnwu mɔɔ Gyihova menli kɔsɔɔti yɛle wɔ Belemgbunlililɛ ne anwo edwɛkɛhanlɛ ne anu wɔ ewiade amuala la. Noko amaa mgbondabulɛ ne ahola aboa yɛ kpalɛ la, ɔwɔ kɛ yɛte ɔ bo kpalɛ na yɛnyia adwenle mɔɔ fɛta la wɔ nwo. Suzu neazo ekyi ɛhye anwo.

Ɛzonlenlɛ ɛvolɛ. Mekɛ ɛhye bɔ ɔ bo wɔ September na ɔwie wɔ August wɔ ɛvolɛ bieko anu. Ɛzonlenlɛ ɛvolɛ ne mɔɔ baze la mgbondabulɛ a wɔ Yearbook ne anu a. Ɛhye ati, 2010 ɛzonlenlɛ ɛvolɛ ne mɔɔ bɔle ɔ bo September 1, 2009, hɔdwule August 31, 2010 la mgbondabulɛ a wɔ 2011 Yearbook ne anu a.

Nolobɔlɛma mɔɔ tɛla biala nee nolobɔlɛma ngyehyɛnu. “Nolobɔlɛma” a le Gyihova Alasevolɛ mɔɔ bɛzɔne bɛ nee mɔɔ bɛtɛsɔnenle bɛ mɔɔ bɛbɔ Belemgbunlililɛ ne nolo la kɔsɔɔti. “Nolobɔlɛma mɔɔ tɛla biala” la a le menli dɔɔnwo mɔɔ bule mgbonda wɔ siane ko anu wɔ ɛzonlenlɛ ɛvolɛ ne anu mɔɔ mgbondabulɛ mɔɔ bɛ sa anga ye ndɛ boka nwo la. Wɔ adenle ɛhye azo bɛkola bɛtia nolobɔlɛnli bie fane nwiɔ. Noko akee, nolobɔlɛma mɔɔ hanle edwɛkɛ ne na bɛambu mgbonda la ɛmboka nolobɔlɛma mɔɔ tɛla biala la anwo. Ɛhye maa yɛsi zo kɛ ɔhyia kɛ nolobɔlɛnli biala bu mgbonda ndɛndɛ siane biala. “Nolobɔlɛma ngyehyɛnu” a le menli dodo mɔɔ bu mgbonda siane biala la.

Dɔnehwele dodo. Ɛvolɛ 2011 Yearbook ne ka kɛ Gyihova Alasevolɛ vale dɔnehwele mgbe mgbe 1.6 a hanle edwɛkɛ ne a. Noko tɛ mekɛ mɔɔ yɛvale yɛzonlenle la kɔsɔɔti ɛne, ɔluakɛ mekɛ mɔɔ yɛvale yɛhɔkpɔlale mboane ne, yɛhɔle debiezukoalɛ, yɛgenganle Baebolo na yɛdwenlendwenlenle nwo la ɛmboka nwo.

Kakɛ mɔɔ yɛbɔ. Wɔ 2010 ɛzonlenlɛ ɛvolɛ ne anu, Gyihova Alasevolɛ vale dɔla mgbe 155 nleanle adekpakyelɛma titile, edwɛkpatɛlɛvolɛma, nee neavolɛ adenduvoma wɔ bɛ edwɛkɛhanlɛ gyima ne anu. Kakɛ mɔɔ bɛbɔ bɛyɛ yɛ mbuluku ne mɔɔ gyi Baebolo ne azo nee mɔɔ bɛvale bɛnleanle Bɛtɛlema mɔɔ bɛbo 20,000 mɔɔ bɛwɔ ewiade amuala la, ɛmboka mgbondabulɛ ɛhye anwo.

Bɛdabɛ mɔɔ bɛdi ngakyelɛ aleɛ ne bie la. Ɛhye le nolobɔlɛma mɔɔ bɛzɔne bɛ mɔɔ bɛdi Ngakyelɛlilɛ ne bie wɔ ewiade amuala a. Asoo bɛva sunsum ne bɛkpokpa ɛhye mɔ amuala? Ɔngile zɔ. Ninyɛne dɔɔnwo mɔɔ bie a le awie ɛzonlenlɛ dɛba nu diedi, adwenle, anzɛɛ nganeɛdelɛ nu ngyegyelɛ kola maa ɔfo ɔsuzu kɛ ɔbahɔ anwuma. Yemɔti yɛnrɛhola yɛnrɛnwu menli mɔɔ bɛkpokpa bɛ mɔɔ bɛwɔ azɛlɛ ye azo la dodo; yɛɛ ɔngyia kɛ yɛbanwu ye noko. Neazo Eku ne ɛnlɛ bɛdabɛ mɔɔ bɛdi ngakyelɛ aleɛ ne bie la kɔsɔɔti aluma, ɔluakɛ ɔngyia kɛ ɔ nee bɛ muala kɛli ngitanwo. *

Mɔɔ yɛze la a le kɛ mekɛ mɔɔ anwongyelelɛ kpole ne anwo anwoma ne babɔ ɔ bo la ɛnee “yɛ Nyamenle ne sonvolɛma” mɔɔ bɛkpokpa bɛ la bie mɔ tɛbɔ azɛlɛ ye azo. (Yek. 7:1-3) Kɔkpula mekɛ zɔhane, bɛdabɛ mɔɔ bɛkpokpa bɛ la bɛanlea ayɛ yɛ ɛzonlenlɛ gyima—edwɛkɛhanlɛ nee ngilehilelɛ gyima kpole ne mɔɔ bɛlɛyɛ ye wɔ ewiade amuala la anwo kɛlɛtokɛ kpalɛ ɛvolɛ biala.

[Ɔ bo ɛkɛ ne edwɛkɛ]