Nwane A Sie Ewiade Ne A?

BIE a ɛtɛyiale amumuyɛma eku kpanyinli biala ɛlɛ. Asoo ɛhye kile kɛ bɛnle ɛkɛ ɔ? Amumuyɛma mgbanyima lɛ ndenle dɔɔnwo mɔɔ bɛdua zo bɛfa bɛ nwo bɛfea anzɛɛ bɛyɛ bɛ gyima wɔ mekɛ mɔɔ bɛla efiade bɔbɔ la. Noko akee, adwelie ngɛlata ka nyile ɛtane, tuutuubɔlɛ, nee menli mɔɔ bɛwua bɛ bɛkɔtɔne bɛ la anwo edwɛkɛ. Ɛhye mɔ kakye yɛ kɛ amumuyɛma mgbanyima wɔ ɛkɛ mɔɔ bɛmaa menli di zɛhae gyima ne a. Ngyegyelɛ mɔɔ bɛfa bɛba alesama anwo zo la maa yɛnwu kɛ amumuyɛma mgbanyima wɔ ɛkɛ.

Nyamenle Edwɛkɛ Baebolo ne maa yɛnwu kɛ Seetan wɔ ɛkɛ amgba. Ɔle kɛ amumuyɛma kpanyinli mɔɔ lɛ tumi la, ɔdua “adalɛ nwanwane ninyɛne” nee “amumuyɛ adenle zo” ɔmaa ye ɛhulolɛdeɛ yɛ ɛkɛ. Baebolo ne ka bɔbɔ kɛ Seetan “kola kakyi ɔ nwo yɛ kɛ ɔle wienyi nu soanvolɛ.” (2 Tɛsalonaekama 2:9, 10; 2 Kɔlentema 11:14) Yemɔti, yɛbahola yɛalua ngyegyelɛ mɔɔ Abɔnsam maa ɔba la azo yɛanwu kɛ ɔwɔ ɛkɛ. Noko akee, ɔyɛ se ɔmaa menli dɔɔnwo kɛ bɛbalie bɛali kɛ sunsum nu abɔdeɛ atisesebɛ bie mɔɔ ɛnyelɛ ɛnnwu ye la wɔ ɛkɛ. Bɛmaa yɛnlea adenzilɛ nee diedi mɔɔ ɛnle nɔhalɛ mɔɔ ɛmmaa menli dɔɔnwo ɛnlie ɛnli kɛ Abɔnsam wɔ ɛkɛ la kolaa na yɛazuzu mɔɔ Baebolo ne ka ye wɔ Abɔnsam anwo la anwo.

▪ “Duzu ati a ɛlɔlɛ Nyamenle ne babɔ Abɔnsam ɛ?” Baebolo ne ka kɛ Nyamenle le kpalɛ yɛɛ ɔdi munli yemɔti menli dɔɔnwo ɛnde ɔ bo kɛ ɔbabɔ awie mɔɔ ɔdi ɛtane, ɔbɔ adalɛ na ɔ ti yɛ se la. Nɔhalɛ nu, Baebolo ne ɛnga kɛ Nyamenle bɔle awie zɛhae. Noko, ɔka ye wɔ Nyamenle anwo kɛ: “Bodane ne, ye gyima di munli, ɔluakɛ ɔdi pɛlepɛle. Ɔle Nyamenle mɔɔ di nɔhalɛ, ɔnle amumuyɛ, ɔdi pɛlepɛle, ye edwɛkɛ le fɔɔnwo.”—Mɛla ne 32:4; Edwɛndolɛ 5:4.

Kpuyia mɔɔ ɔwɔ kɛ yɛsuzu nwo la a le kɛ: Asoo sonla mɔɔ Nyamenle ɛbɔ ye mɔɔ ɔdi munli la bahola ayɛ ɛtane? Nyamenle ambɔ ye abɔdeɛ kɛ robɔt la, ɔvale adenle mɔɔ yɛlɛ yɛkpa mɔɔ yɛkulo la ɔmanle yɛ. Yemɔti, abɔdeɛ mɔɔ lɛ nrɛlɛbɛ na ɔdi munli la lɛ adenle kpa kɛ ɔbali boɛ anzɛɛ ɔbali ɛtane. Nɔhalɛ nu, saa abɔdeɛ mɔɔ lɛ nrɛlɛbɛ, sonla anzɛɛ anwumabɔvolɛ nyia adenle kpa mɔɔ ɔkulo la a, yɛɛ ye asetɛnla bali munli a.

Saa Nyamenle bazi yɛ adenle wɔ ɛtane mɔɔ yɛkulo kɛ yɛyɛ la anwo a, anrɛɛ ɔnrɛva adenle mɔɔ yɛlɛ yɛkpa mɔɔ yɛkulo la ɔnrɛbɔ yɛ. Gyisɛse hanle adenle mɔɔ yɛlɛ yɛkpa mɔɔ yɛkulo mɔɔ bɛfa bɛdi gyima wɔ adenle ɛtane zo la anwo edwɛkɛ wɔ mekɛ mɔɔ ɔhanle ye wɔ Abɔnsam anwo kɛ: “Yeanli nɔhalɛ ɛlɛ” la. (Dwɔn 8:44) Edwɛkɛ ɛhye maa ɔda ali wienyi kɛ ahenle mɔɔ rayɛle Abɔnsam la ɛnee le sunsum nu abɔdeɛ mɔɔ di munli na ɔlile “nɔhalɛ” wɔ mekɛ bie anu a. * Gyihova Nyamenle vale adenle mɔɔ yɛlɛ yɛkpa mɔɔ yɛkulo la bɔle yɛ ɔluakɛ ɔkulo yɛ yɛɛ ɔlɛ anwodozo wɔ yɛ nu.—Nea ɛlɛka  “Asoo Abɔdeɛ Mɔɔ Di Munli  La Kola Minli Ye Munlililɛ?” mɔɔ wɔ mukelɛ 6 la.

▪ “Abɔnsam le Nyamenle sonvolɛ” Bie mɔ suzu kɛ Baebolo ne hanle ɛhye wɔ Dwobu buluku ne anu. Baebolo nwo buluku bie ka kɛ mekɛ mɔɔ Abɔnsam hanle kɛ “mewɔ akpɔsa nu wɔ aleɛabo” la, ɛnee ɔlɛyɛ gyima mɔɔ busiama mɔɔ ɛnee wɔ Pɛhyea la yɛ fa amaneɛbɔlɛ bɛlɛ bɛ belemgbunli ne la bie. (Dwobu 1:7) Noko akee, saa ɛnee Abɔnsam di busia maa Nyamenle amgba a, ɛnee duzu ati a ɔwɔ kɛ ɔkilehile nu ɔkile Nyamenle kɛ “mewɔ akpɔsa nu wɔ aleɛabo” ɛ? Dwobu buluku ne anga kɛ Abɔnsam le Nyamenle boavolɛ, emomu ɔvɛlɛle ye Seetan, ɔkile “Dwazotiavolɛ,” ɛhye kile kɛ ɔle Nyamenle Kpɔvolɛ kpanyinli. (Dwobu 1:6) Ɛnee nienwu a adwenle mɔɔ menli lɛ kɛ Abɔnsam le Nyamenle sonvolɛ la vi rale a?

Wɔ ɛvoya ne mɔɔ lumua Y. M. la anu, apocryphal mbuluku le kɛ “Jubilees Buluku ne” nee Qumran “Common Rule” ne, yɛle Abɔnsam anwo nvoninli kɛ ɔ nee Nyamenle ɛlɛyɛ ngyehyɛleɛ noko ɔbɛlɛ ɔ nwo aze ɔyɛ Nyamenle ɛhulolɛdeɛ. Tetedwɛkɛ kɛlɛvolɛ J. B. Russell hilehilele nu wɔ ye buluku Mephistopheles ne anu kɛ Protestant Reformer Martin Luther bule Abɔnsam kɛ ɔle Nyamenle adwinli bulalɛ, “ɔle kɛ koanlɛ mɔɔ ɔfa ɔyɛ ye tola a.” Russell vale zɔle zo kɛ, adwenle mɔɔ wɔ edwɛkɛ ne anu la a le kɛ “koanlɛ ne anye die nwo kɛ  ɔbadudu ndile” noko Nyamenle a fa ye di gyima a, yemɔti ɔmaa Nyamenle ɛhulolɛdeɛ yɛ ɛkɛ. Nzinlii, Felanzenli asɔne kilehilevolɛ John Calvin liele Luther ngilehilelɛ ne dole nu—diedima dɔɔnwo anye anlie edwɛkɛ ɛhye anwo. Kɛ ɔkɛyɛ na Nyamenle mɔɔ lɛ ɛlɔlɛ la amaa ɛtane nwo adenle na bɔbɔ yeamaa yeazi ɛ? (Gyemise 1:13) Ngilehilelɛ ɛhye nee ɛtane mɔɔ menli ɛli ye wɔ ɛvoya 20 ne anu la ati, menli dɔɔnwo ɛnlie ɛnli kɛ Nyamenle nee Abɔnsam wɔ ɛkɛ.

▪ “Abɔnsam a le adwenle ɛtane mɔɔ ba menli ti anu la” Saa yɛbu Abɔnsam kɛ ɔle adwenle ɛtane mɔɔ wɔ sonla ti anu ala a, yɛnrɛde Baebolo nu edwɛkɛ bie mɔ abo. Kɛ neazo la, nwane a ɛnee Nyamenle nee ye ɛlɛdi adwelie kɛmɔ bɛhile ye wɔ Dwobu 2:3-6 ne la ɛ? Asoo ɛnee ɔlɛtendɛ yeahile ɛtane bie mɔɔ vea Dwobu anu la, anzɛɛ ɛnee ɔlɛtendɛ yeahile ɔ nwo? Bieko, asoo ɛnee Nyamenle bahanvo Dwobu wɔ ye subane kpalɛ nwo na akee yeamaa adwenle ɛtane mɔɔ wɔ Dwobu anu la azɔ Dwobu anlea wɔ mekɛ fofolɛ nu ɔ? Saa yɛfa ɛhye mɔ amuala yɛto Nyamenle anwo zo a, ɛnee yɛlɛmaa yeayɛ Awie mɔɔ ɔ ti yɛ se, na tɛ awie mɔɔ “ɔnli mɔguazo” a. (Edwɛndolɛ 92:15) Noko Nyamenle anva ɔ sa anga Dwobu kɛ ɔkile ye nyane. Ɔda ali wienyi kɛ tɛ Abɔnsam a le adwenle ɛtane mɔɔ ba sonla ti anu la anzɛɛ subane ɛtane bie mɔɔ wɔ Nyamenle anwo a, emomu, ɔle sunsum nu sonla mɔɔ yɛle ɔ nwo Nyamenle Kpɔvolɛ a.

Nwane A Ɛlɛsie Ewiade Ne A?

Ɛnɛ, menli ka kɛ dɛba ne yɛɛ ɛnee bɛdie bɛdi kɛ Abɔnsam wɔ ɛkɛ a. Noko akee, saa bɛanlie bɛanli kɛ Abɔnsam wɔ ɛkɛ a, bɛnrɛhola bɛnrɛhile deɛmɔti ɛtane ɛzo la anu. Nɔhalɛ nu, ɔlua mɔdenle mɔɔ bɛbɔ kɛ bɛmaa menli alie ali kɛ Abɔnsam ɛnle ɛkɛ la ati, yemaa menli dɔɔnwo ɛkpo Nyamenle nee ɛbɛla kpalɛ nwo ngyinlazo biala.

Ɛvoya 19 ne anu edwɛkɛdwɛndolɛ kɛlɛvolɛ Charles-Pierre Baudelaire hɛlɛle kɛ, “abɔnsam ɛhane titile a le kɛ, ɔmaa yɛalie yɛali kɛ ɔnle ɛkɛ.” Ɔluakɛ Abɔnsam ɛva ɔ nwo ɛvea la ati, yemaa menli adwenle nu ɛyɛ bɛ kesee wɔ Nyamenle anwo. Saa Abɔnsam ɛnle ɛkɛ a, ɛnee tɛ Nyamenle a ɛmaa ɛtanelilɛ kɔsɔɔti ɛra ɔ? Asoo tɛ mɔɔ Abɔnsam kpondɛ kɛ menli die di la ɛne?

Kɛmɔ amumuyɛma kpanyinli yɛ la, Abɔnsam fa ɔ nwo fea amaa yeadwu ye bodane nwo. Ye bodane a le duzu? Baebolo ne bua kɛ: “Bɛnlie bɛnli, ɔluakɛ ɛtane ewiade ɛhye nyamenle ne ɛzi bɛ adwenle ne anye. Ɔmmaa bɛnnwu wienyi ne mɔɔ ɛlɛta fi Edwɛkpa ne mɔɔ fane Kelaese, mɔɔ le Nyamenle sɔhovolɛ kpalɛ ne anyunlunyia ne anwo la.”—2 Kɔlentema 4:4.

Kpuyia ko tɛbɔ ɛkɛ mɔɔ nwolɛ hyia a. Duzu a Nyamenle bayɛ abɔdeɛ ɛhye mɔɔ anye ɛde na ɔvea ɛtane nee amaneɛnwunlɛ kɔsɔɔti anzi la ɛ? Yɛbaha ɛhye anwo edwɛkɛ wɔ edwɛkɛ mɔɔ doa zo la anu.

[Ɔ bo ɛkɛ ne edwɛkɛ]

[Edwɛkɛ mɔɔ bɛkpa wɔ mukelɛ 5]

Abɔnsam le Nyamenle sonvolɛ anzɛɛ ɔdwazo ɔtia Nyamenle?

[Ɛlɛka/Nvoninli wɔ mukelɛ 6]

 Asoo Abɔdeɛ Mɔɔ Di Munli La Kola Minli Ye Munlililɛ?

Munlililɛ mɔɔ Nyamenle ɛva ɛmaa ye abɔdeɛ mɔɔ lɛ nrɛlɛbɛ la lɛ ye ɛweɛne. Ɔwɔ nuhua kɛ bɛbɔle Adam mɔɔ ɛnee ɔdi munli, noko ɛnee ɔwɔ kɛ ɔdi mɛla bie mɔ mɔɔ ye Bɔvolɛ ne vale manle ye la azo. Kɛ neazo la, ɛnee ɔnrɛhola ɔnrɛli anwea, awolɛ, anzɛɛ taboa mɔɔ ɔnrɛgyegye ye a. Saa ɔbule ɔ nye ɔguale mɛla mɔɔ twe ninyɛne ba aze la azo na ɔvile boka tendenle bie azo ɔwulule a, anrɛɛ ɔwule anzɛɛ ɔbodale kpole.

Yemɔti, abɔdeɛ mɔɔ di munli biala—sonla anzɛɛ anwumabɔvolɛ—mɔɔ babu ɔ nye agua ɛbɛlabɔlɛ nwo mɛla mɔɔ Nyamenle ɛva ɛmaa azo la banwu amaneɛ. Zɔhane ati, saa abɔdeɛ mɔɔ lɛ nrɛlɛbɛ la fa adenle mɔɔ ɔlɛ ɔkpa mɔɔ ɔkulo la ɔdi gyima wɔ adenle ɛtane zo a ɔfo anzɛɛ ɔyɛ ɛtane.—Mɔlebɛbo 1:29; Mateyu 4:4.