1. Diedi boni a bie mɔ lɛ ye wɔ bɛdabɛ mɔɔ bɛlɛsonle Nyamenle la anwo a?

ƐNƐ, menli dɔɔnwo ka kɛ asɔne titile ne mɔ ɛmboa alesama. Bie mɔ lɛ adwenle kɛ Nyamenle anye ɛnrɛlie ɛzonlenlɛ ɛhye mɔ anwo ɔluakɛ bɛngilehile Nyamenle anwo nɔhalɛ ne yɛɛ bɛyɛ ninyɛndane. Noko bɛdie bɛdi kɛ Nyamenle die kpalɛma mɔɔ bɛwɔ asɔne biala anu la to nu. Asoo ɔle nɔhalɛ? Anzɛɛ Nyamenle kpondɛ kɛ menli mɔɔ bɛsonle ye la twe bɛ nwo fi adalɛ ɛzonlenlɛ nwo ɔ? Yɛbanwu mualɛ ne wɔ mɔɔ Baebolo ne ka ye wɔ Gyihova tete nɔhalɛ azonvolɛ nwo la anu.

2. Nwane mɔ a rayɛle Gyihova menli a? Duzu a ɛnee le agɔnwolɛvalɛ titile ne mɔɔ ɛnee bɛ nee Gyihova lɛ la anwo sɛkɛlɛneɛ a? (Nea mɔlebɛbo nvoninli ne.)

² Kɛyɛ ɛvolɛ 4,000 mɔɔ ɛze la, Gyihova vale menli ekpunli bie yɛle ye menli wɔ azɛlɛ ye azo. Baebolo ne ka kɛ Ebileham le ‘bɛdabɛ mɔɔ bɛdie Nyamenle bɛdi la  kɔsɔɔti bɛ ze,’ nee abusua kpole bie mɔɔ azonvolɛ dɔɔnwo wɔ nu la kpanyinli. (Wulomuma 4:11; Mɔlebɛbo 14:14) Bɛbule ye “belemgbunli kpole” wɔ Keena. (Mɔlebɛbo 21:22; 23:6) Gyihova nee Ebileham nee ɔ bo zo amra yɛle ngyekyeleɛ, anzɛɛ ngyehyɛleɛ. (Mɔlebɛbo 17:1, 2, 19) Nyamenle zele Ebileham kɛ: “Ngyekyeleɛ mɔɔ wɔ me nee ɛdawɔ nee ɛ bo zo amra yɛ avinli, mɔɔ ɔwɔ kɛ bɛdi zolɛ la ɛne: Ɔwɔ kɛ bɛyɛ nrenya biala mɔɔ wɔ bɛ avinli la mrenyanu nzonlɛ.” Ɔvale ɔzɔle zo kɛ: “Ɛhye a bahile kɛ bɛlɛdi me ngyekyeleɛ ne azo a.” (Mɔlebɛbo 17:10, 11) Yemɔti bɛyɛle Ebileham nee mrenya mɔɔ bɛwɔ ye abusua ne anu la kɔsɔɔti mrenya nu nzonlɛ. (Mɔlebɛbo 17:24-27) Mrenyanu nzonlɛyɛlɛ ne manle Ebileham nee ɔ bo zo amra rayɛle menli mɔɔ bɛ nee Gyihova lɛ agɔnwolɛvalɛ titile.

3. Kɛzi Ebileham abo zo amra rayɛle maanle ɛ?

³ Ɛnee Ebileham alɔnra Gyekɔbo, anzɛɛ Yizilayɛ lɛ mralɛ mrenya 12. (Mɔlebɛbo 35:10, 22b-26) Mralɛ ɛhye mɔ anu a Yizilayɛ mbusua 12 ne vi a. (Gyima ne 7:8) Bɛvale Gyekɔbo ara Dwosefi bɛhɔle Yigyibiti na nzinlii Falo manle ye dibilɛ kpole. Mekɛ mɔɔ ɛhɔne kpole bie rale la, Dwosefi a ɛnee nea aleɛ mɔɔ wɔ maanle ne anu amuala la azo a. Ɔlua ɛhɔne ɛhye ati, Gyekɔbo nee ye abusua ne hɔle Yigyibiti. (Mɔlebɛbo 41:39-41; 42:6) Gyekɔbo abo zo amra ne anwo rayɛle dɔɔnwo na ɛnee bɛfɛlɛ bɛ “ɛlɔne.”—Mɔlebɛbo 48:4; bɛgenga Gyima ne 7:17.

4. Mɔlebɛbo ne, ɛnee abusuabɔlɛ boni a wɔ Yigyibitima nee Gyekɔbo abo zo amra avinli a?

⁴ Gyekɔbo abo zo amra lile ɛvolɛ 200 wɔ Gohyɛn, wɔ Yigyibiti. (Mɔlebɛbo 45:9, 10) Falo manle Yizilayɛma radɛnlanle Yigyibiti ɔluakɛ ɛnee ɔze Dwosefi na ɔbu ye. (Mɔlebɛbo 47:1-6) Bɛ nee Yigyibitima dɛnlanle anzondwolɛ nu asɛɛ ɛvolɛ 100. Yizilayɛma dɛnlanle azua ngyikyi zo ziele nyɛmoa. Ɛnee Yigyibitima ɛngulo menli mɔɔ sie mboane la, noko Falo ati bɛmanle Yizilayɛma dɛnlanle ɛkɛ.—Mɔlebɛbo 46:31-34.

5, 6. (a) Kɛzi Nyamenle menli ne tɛnlabelɛ hakyile wɔ Yigyibiti ɛ? (b) Kɛ ɔyɛle mɔɔ bɛangu Mosisi ɛ, na duzu a Gyihova yɛle manle Ye menli ne a?

 ⁵ Mekɛ ekyi guale nu la, Yigyibitima vale Yizilayɛma yɛle bɛ ngɛkɛlɛ. Baebolo ne ka kɛ: “Na belemgbunli fofolɛ mɔɔ ɛnze Dwosefi la ralile Yigyibiti ebia ne. Ɔhanle ɔhilele ye menli ne kɛ, ‘Bɛnlea, Yizilayɛma ɛzo somaa yɛɛ bɛ nwo yɛ se.’” Ɛhye ati, Yigyibitima manle Yizilayɛma pɛle belekese, nleanle bɛ egyinli zo, na bɛyɛle gyima biala mɔɔ ngɛkɛlɛ yɛ la. Bɛhilele Yizilayɛma nyane.—Adendulɛ 1:8, 9, 13, 14.

⁶ Falo fofolɛ ɛhye eza manle bɛhunle mralɛ mrenya mɔɔ Yizilayɛma wole bɛ la. (Adendulɛ 1:15, 16) Zɔhane mekɛ ne, Dwɔkɛbɛde, Yizilayɛnli raalɛ bie wole Mosisi. Mekɛ mɔɔ ɔlile siane nsa la, ɔvale ye ɔdole kɛndɛne nu ɔhɔziele Azule Naele ne anloa. Yeangyɛ Falo ara ralɛ ne nwunle Mosisi na ɔvale ye ɔyɛle ɔ ra. Ɔmanle Mosisi mame nleanle ye manle ɔnyinle. Nzinlii, Mosisi rayɛle Gyihova nɔhalɛ sonvolɛ. (Adendulɛ 2:1-10; Hibuluma 11:23-25) Gyihova nwunle kɛ ye menli ne ɛlɛnwu amaneɛ yemɔti ɔmanle Mosisi yele bɛ vile Yigyibiti. (Adendulɛ 2:24, 25; 3:9, 10) Wɔ adenle ɛhye azo, Gyihova ‘liele’ Yizilayɛma ngoane.—Adendulɛ 15:13; bɛgenga Mɛla ne 15:15.

7, 8. Kɛ ɔyɛle mɔɔ Gyihova menli ne rayɛle maanle nwuanzanwuanza ɛ?

⁷ Ɛnee Gyihova ɛtɛyɛle Yizilayɛma maanle mɔɔ bɛlɛ bɛ mɛla nee bɛ ɛsɔfoma a, noko ɛnee bɛle ye menli. Ɛhye ati, ɔmanle Mosisi nee Aalɔn hanle hilele Falo kɛ: “Kɛ [Gyihova], Yizilayɛ Nyamenle ne se la ɛne, ‘Maa me menli ne ɛhɔ, amaa bɛali ɛvoyia wɔ fienemgbole ne anu bɛawula me anyunlunyia.’”—Adendulɛ 5:1.

⁸ Noko ɛnee Falo ɛngulo kɛ Yizilayɛma kɔ. Gyihova vale ngyegyelɛ bulu rale Yigyibitima anwo zo, na nzinlii ɔhunle Falo nee ye ɛlɔne ne wɔ Nyevile Kɔkɔlɛ ne anu na ɔliele ye menli ne. (Adendulɛ 15:1-4) Ye siane nsa anu, Gyihova nee Yizilayɛma yɛle ngyekyeleɛ wɔ Boka Saenae ne abo, ɔhanle kɛ: ‘Saa bɛtie me ne bɔkɔɔ na bɛdi me ngyekyeleɛ ne azo a, mebaye bɛ meavi maanle kɔsɔɔti avinli meayɛ bɛ me agyadeɛ titile.’ Bɛbayɛ “maanle nwuanzanwuanza.”—Adendulɛ 19:5, 6.

9, 10. (a) Kɛmɔ Mɛla ne 4:5-8 kile la, kɛzi Yizilayɛma yɛle ngakyile wɔ maanle mɔɔ bɛha la anwo ɛ? (b) Duzu a ɛnee ɔwɔ kɛ Yizilayɛma yɛ fa kile kɛ bɛle ‘Gyihova ɔdaye ye menli mɔɔ anwo te’ ɛ?

⁹ Wɔ ɛvolɛ dɔɔnwo anu, Gyihova manle mbusua tile yɛle mgbanyima, ndɛnebuavolɛ nee ɛsɔfoma manle ye azonvolɛ. Yizilayɛma vale ngyehyɛleɛ ɛhye yɛle gyima wɔ Yigyibiti kolaa na bɛarayɛ ahanra. (Mɔlebɛbo 8:20; 18:19; Dwobu 1:4, 5) Noko, mekɛ mɔɔ Gyihova liele Yizilayɛma vile akɛlɛzonlenlɛ nu la, ɔmanle bɛ mɛla yemɔti bɛyɛle ngakyile bɛvile maanle mɔɔ bɛha la kɔsɔɔti anwo. (Bɛgenga Mɛla ne 4:5-8; Edwɛndolɛ 147:19, 20) Mɛla ne manle  bɛ nuhua bie mɔ yɛle maanle ne ɛsɔfoma. Eza mɛla ne manle “mgbanyima” mɔɔ ze nrɛlɛbɛ na bɛlɛ adwenle la yɛle ndɛnebuavolɛma. (Mɛla ne 25:7, 8) Mɛla ne manle menli ne nwunle kɛzi ɔwɔ kɛ bɛsonle na bɛbɔ bɛ ɛbɛla la.

¹⁰ Ɔka ekyi Yizilayɛma dwu Ɛwɔkɛ Azɛlɛ ne azo la, Gyihova dinle ye mɛla ne anu hilele bɛ. Mosisi zele bɛ kɛ: “[Gyihova] noko ɛva ɛdo gua ɛnɛ kenle ye kɛ bɛle ɔdaye ye menli, kɛmɔ ɔvale ɔbɔle bɛ ɛwɔkɛ la; ɔwɔ kɛ bɛdi ye mɛla ne mɔ azo. Ɔbakpogya bɛ zo yeayɛ bɛ maanle kpole mɔɔ bo maanle maanle kɔsɔɔti anwo zo a, na bɛali bɛ eni bɛaye bɛ ayɛlɛ. Bɛbayɛ [Gyihova] bɛ Nyamenle ne ɔdaye ye menli mɔɔ anwo te a.”—Mɛla ne 26:18, 19.

11-13. (a) Nwane mɔ a nee Nyamenle menli ne zonlenle a? (b) Saa menli mɔɔ bɛnle Yizilayɛma la kpondɛ kɛ bɛsonle Gyihova a, duzu a ɛnee ɔwɔ kɛ bɛyɛ a?

¹¹ Ɔnva nwo kɛ ɛnee Yizilayɛma a le menli mɔɔ Gyihova ɛkpa bɛ wɔ azɛlɛ ye azo la, ɔmanle menli gyɛne nee bɛ dɛnlanle. Kɛ neazo la, Baebolo ne ka kɛ, mekɛ mɔɔ Nyamenle ye Yizilayɛma avi Yigyibiti la, ɔmanle menli gyɛne dɔɔnwo mɔɔ Yigyibitima bie mɔ boka nwo la nee bɛ hɔle. (Adendulɛ 12:38) Ɔbayɛ kɛ Falo ngɛkɛlɛ mɔɔ bɛdiele edwɛkɛ mɔɔ Mosisi hanle wɔ mekɛ mɔɔ ngyegyelɛ ne mɔɔ tɔ zo nsuu bazi la boka nwo.—Adendulɛ 9:20.

¹² Ɔka ekyi Yizilayɛma pɛ Azule Dwɔdan ne kɔ Keena azɛlɛ ne azo la, Mosisi zele bɛ kɛ, bɛhulo nyɛvolɛ, menli mɔɔ bɛnle Yizilayɛma mɔɔ bɛwɔ bɛ avinli la. (Mɛla ne 10:17-19) Bɛhanle bɛhilele Nyamenle menli ne kɛ saa awie mɔɔ ɔnle Yizilayɛnli la bali mɛla ne, mɔɔ bie a le Mɛla Bulu ne la azo a, ɔwɔ kɛ bɛmaa ɔ nee bɛ tɛnla. (Sɛlɛvolɛma 24:22) Menli mɔɔ bɛnle Yizilayɛma la bie mɔ bɔbɔ razonlenle Gyihova. Kɛ neazo la, ɛnee Mowabenli Wulutu kpondɛ kɛ ɔsonle Gyihova. Ɔhanle ɔhilele Yizilayɛnli Nawome kɛ: “Wɔ menli bayɛ me menli, na wɔ Nyamenle ne ayɛ me Nyamenle.” (Wulutu 1:16) Bɛvɛlɛle nyɛvolɛ ɛhye mɔ kɛ menli mɔɔ ɛhakyi ɛyɛ Yizilayɛma, na bɛyɛle mrenya mɔɔ bɛwɔ nu la mrenyanu nzonlɛ. (Adendulɛ 12:48, 49) Gyihova anye liele kɛ bɛraboka ye menli ne anwo la.—Ɛdianlɛ 15:14, 15.

¹³ Sɔlɔmɔn nzɛlɛlɛ ko noko kile kɛ Gyihova die menli mɔɔ bɛnle Yizilayɛma mɔɔ bɛkulo kɛ bɛsonle ye la to nu. Mekɛ mɔɔ bɛyila ɛzonlenlɛ sua ne azo la, Sɔlɔmɔn yɛle nzɛlɛlɛ kɛ: “Zɔhane ala yɛɛ saa ɛyɛvolɛ mɔɔ ɛnle Yizilayɛnli la te wɔ nganeɛ wɔ ninyɛne mgbole mɔɔ wɔyɛ, wɔ tumi nee wɔ ɛlolɛ, na ɔvi ye maanle nu moa moa ɔba kɛ ɔbazonle wɔ wɔ Ɛzonlenlɛ Sua ye anu a, tie ye wɔ anwuma lɔ, ɛleka mɔɔ ɛde la na yɛ debie biala mɔɔ ɔkpondɛ la maa ye. Ɛhye bamaa menli kɔsɔɔti mɔɔ wɔ aleɛabo la anwu wɔ na bɛazulo wɔ, kɛmɔ wɔ menli Yizilayɛma ɛnwu wɔ na  bɛsulo wɔ la. Eza bɛbanwu kɛ amgba ɔwɔ kɛ bɛsonle wɔ wɔ Ɛzonlenlɛ Sua ɛhye mɔɔ mezi memaa wɔ la anu.” (2 Edwɛkɛsisilɛ 6:32, 33) Wɔ Gyisɛse mekɛ zo bɔbɔ, ɛnee saa menli mɔɔ bɛnle Yizilayɛma la kulo kɛ bɛsonle Gyihova na bɛ nee Ye menli ne bɔ nu a bɛkola bɛsonle ye.—Dwɔn 12:20; Gyima ne 8:27.

14-16. (a) Kɛzi ɛnee Yizilayɛma le Gyihova alasevolɛ maanle ɛ? (b) Duzu a Nyamenle kpondɛ kɛ ye menli yɛ ye ɛnɛ a?

¹⁴ Yizilayɛma zonlenle Gyihova, bɛ Nyamenle ne, noko ɛnee maanle mɔɔ bɛha la biala lɛ ye nyamenle. Yemɔti kpuyia titile bie wɔ ɛkɛ mɔɔ ɔwɔ kɛ yɛbua a: Nwane a le nɔhalɛ Nyamenle ne a? Wɔ Ayezaya mekɛ zo, Gyihova hanle kɛ ɔwɔ kɛ bɛbua edwɛkɛ ɛhye kɛ kɔɔto edwɛkɛ la. Ɔhanle kɛ saa maanle maanle ne nyamenle ne mɔ ɛnle adalɛ nyamenle a, bɛva bɛ alasevolɛ bɛrɛla. Ɔhanle kɛ: “Bɛmaa bɛva bɛ alasevolɛ bɛrɛla bɛmaa bɛrali bɛmaa bɛ, anzɛɛ bɛdie na bɛha kɛ, ‘Ɔle nɔhalɛ.’”—Ayezaya 43:9.

¹⁵ Maanle maanle ne mɔ nyamenle ne mɔ angola angile kɛ bɛle nɔhalɛ nyamenle. Bɛle ananze, bɛngola tendɛ, bɛngola bɛndu bɛ bo, kyesɛ awie maa bɛ zo. (Ayezaya 46:5-7) Noko Gyihova zele ye menli Yizilayɛma kɛ: “Bɛle me alasevolɛ nee me sonvolɛma mɔɔ mekpa nu meye bɛ, amaa bɛanwu ye na bɛalie me bɛali, na bɛade ɔ bo kɛ medame a mele Nyamenle a. Ɛye me a,  nyamenle biala ɛnle ɛkɛ mɔɔ li me nyunlu, yɛɛ bie vi me nzi ɛnrɛra. Medame, medame ala a mele [Gyihova] a, ɛye me a dievolɛ bieko ɛnle ɛkɛ. . . . Bɛdabɛ a bɛle me alasevolɛ a.”—Ayezaya 43:10-12.

¹⁶ Gyihova menli ɛnyia nwolɛ adenle ɛlɛdi daselɛ kɛmɔ bɛyɛ ye wɔ kɔɔto la kɛ Gyihova a le nɔhalɛ Nyamenle ne a. Ɔvɛlɛle bɛ kɛ “me menli ne mɔɔ mebɔ bɛ memaa me nwo . . . na bɛaye me ayɛlɛ” la. (Ayezaya 43:21) Bɛze bɛ kɛ Gyihova menli. Kɛmɔ Gyihova liele Yizilayɛma vile Yigyibiti la ati, ɛnee ɔkpondɛ kɛ bɛfi bɛ ɛhulolɛ nu bɛtie ye na bɛdi ye eni kɛ bɛ Belemgbunli. Zɔhane ala a Gyihova kpondɛ kɛ ye menli mɔɔ bɛwɔ ɛkɛ ɛnɛ la noko yɛ a. Ngapezonli Maeka lale subane mɔɔ ɔwɔ kɛ Nyamenle menli nyia ye la ali: “Maanle maanle kɔsɔɔti di bɛ nyamenle ne mɔ mɛla zo na bɛsonle bɛ, na yɛmɛ, yɛbazonle [Gyihova] yɛ Nyamenle ne na yɛali ye mɛla zo dahuu.”—Maeka 4:5.

17. Duzu ati a Gyihova bule Yizilayɛma kɛ vanye mɔɔ nvasoɛ ɛnle zo ɛ?

¹⁷ Ɔyɛ alɔbɔlɛ kɛ Yizilayɛma anli nɔhalɛ la. Bɛzukoale maanle maanle mɔɔ ɛnee bɛsonle mbaka nee awolɛ nyamenle la na bɛzile afɔlemokyea dɔɔnwo bɛmanle adalɛ nyamenle. Kɛyɛ ɛvolɛ 2,800 mɔɔ ɛze la, ngapezonli Hozia hanle kɛ Yizilayɛma le kɛ vanye baka mɔɔ ɛnzo ma kpalɛ bieko la. Ɔdoale zo kɛ: “Bɛnli nɔhalɛ, yemɔti ɔwɔ kɛ bɛdi bɛ ɛtane ne mɔ anwo ɛzonle.” (Hozia 10:1, 2) Wɔ ɛvolɛ 150 anzi, Gyɛlɛmaya noko vale Yizilayɛma mɔɔ dele atua la dole vanye nyinli nwo. Ɔhanle kɛ bɛle kɛ vanye kpalɛ mɔɔ hakyile yɛle vanye mɔɔ nvasoɛ ɛnle zo la. Gyihova luale Gyɛlɛmaya anwo zo hanle kɛ: “Bɛ nyamenle ne mɔ mɔɔ bɛdabɛ bɛyɛle la wɔ nienwu? Saa bɛdabɛ bɛkɛhola bɛ die a, ɛnee saa ngyegyelɛ to bɛ a bɛmaa bɛdwazo.” Ɔdoale zo kɛ: “Me menli ne arɛle ɛvi me.”—Gyɛlɛmaya 2:21, 28, 32.

18, 19. (a) Kɛzi Gyihova lale ye ali kɛ ɔbakpa menli fofolɛ wɔ azɛlɛ ye azo ɛ? (b) Duzu a yɛbazuzu nwo wɔ edwɛkɛ mɔɔ doa zo la anu a?

¹⁸ Yizilayɛma anzo ma kpalɛ ɔluakɛ bɛanzonle Gyihova wɔ adenle kpalɛ zo. Bɛandoa zo bɛanyɛ ye alasevolɛ, emomu, bɛzonlenle awozonle. Yemɔti, Gyisɛse zele ye mekɛ zo Dwuuma ɛzonlenlɛ nu mgbanyima mɔɔ bɛyɛle anzosesebɛ la kɛ: “Bɛbalie Nyamenle Belemgbunlililɛ ne bɛ sa nu na bɛava bɛamaa menli mɔɔ yɛ tieyɛ la.” (Mateyu 21:43) Menli mɔɔ Gyihova bakpa bɛ la ala a bahola ayɛ sunsum nu Yizilayɛ maanle fofolɛ ne anu amra a. Ɔ nee bɛ bayɛ “ngyekyeleɛ fofolɛ.” Gyihova hanle bɛ nwo edwɛkɛ kɛ: “Mebayɛ bɛ Nyamenle, na bɛdabɛ noko bɛayɛ me menli.”—Gyɛlɛmaya 31:31-33.

¹⁹ Yizilayɛma anli nɔhalɛ la ati, Gyihova kpale sunsum nu Yizilayɛma kɛ bɛrayɛ ye menli wɔ ɛvoya ne mɔɔ lumua la anu. Na ɛnɛ ɛ, nwane mɔ a le ye menli a? Kɛ ɔkɛyɛ na menli mɔɔ bɛkpondɛ kɛ bɛsonle Nyamenle la anwu ye nɔhalɛ azonvolɛ ɛ? Yɛbazuzu ɛhye anwo wɔ edwɛkɛ mɔɔ doa zo la anu.