1. Kɛzi Gyisɛse yɛle tunwomaa sunsum mɔɔ di munli la anwo neazo ɛ?

MEKƐ mɔɔ Gyisɛse wɔ azɛlɛ ye azo la, ɔyɛle tunwomaa nwo neazo mɔɔ ɔdi munli. Ɔvale ye ɛhulolɛdeɛ ɔziele ahane na ɔyɛle Nyamenle ɛhulolɛdeɛ. (Dwɔn 5:30) Mekɛ mɔɔ ɔlile nɔhalɛ ɔhɔle ewule nu la, ɔlale ye ali kɛ ye tunwomaa sunsum ne ɛnlɛ ye ɛweɛne.—Fel. 2:8.

2. Kɛ ɔkɛyɛ na yɛala tunwomaa sunsum ali ɛ, na duzu ati a ɔwɔ kɛ yɛyɛ zɔ ɛ?

² Ɔwɔ kɛ yɛdayɛ mɔɔ yɛle Gyisɛse ɛdoavolɛma la noko da tunwomaa sunsum ali. Duzu a kile kɛ awie lɛ tunwomaa sunsum ɛ? Ye sikalɛ a le kɛ, ɔbakpo mɔɔ ɔ nye die nwo la na yeaboa awie mɔ. Ɔle angomedi angɔbɛnzi. (Mat. 16:24) Saa yɛanyɛ angomedi a, yɛbahola yɛadwenle awie mɔ nganeɛdelɛ nee bɛ ngyianlɛ nwo. (Fel. 2:3, 4) Nɔhalɛ, Gyisɛse lale ye ali kɛ tunwomaa sunsum a boa maa yɛsonle kpalɛ a. Kɛzi? Keleseɛne ɛlɔlɛ mɔɔ ka yɛ maa yɛda tunwomaa sunsum ali la le Gyisɛse nɔhalɛ azonvolɛ nzonlɛyɛlɛ titile. (Dwɔn 13:34, 35) Akee dwenle nyilalɛ mɔɔ yɛlɛ ɔluakɛ yɛboka ewiade amuala mediemayɛlɛ mɔɔ bɛda tunwomaa sunsum ali la anwo nea!

3. Duzu a bahola azɛkye tunwomaa sunsum mɔɔ yɛlɛ la ɛ?

 ³ Noko, yɛlɛ kpɔvolɛ bie mɔɔ kulo kɛ dua nrɛlɛbɛ adenle zo sɛkye yɛ tunwomaa sunsum ne a. Yemɔ a le angomedi subane mɔɔ yɛda ye ali la. Suzu kɛzi Adam nee Yive yɛle angomedi la anwo nea. Yive nyianle adwenle kɛ ɔkulo kɛ ɔyɛ kɛ Nyamenle. Ɔ hu noko hulole kɛ ɔbazɔ ɔ ye anye yeadɛla Gyihova na ɔlua zo ɔyɛle angomedi. (Mɔl. 3:5, 6) Ɔvi mekɛ mɔɔ Abɔnsam hwenle Adam nee Yive vile nɔhalɛ ɛzonlenlɛ nwo la, ɔlɛbɔ mɔdenle kɛ ɔmaa menli ayɛ angomedi. Yɛnwu ɛhye wɔ sɔnea mɔɔ ɔvale ɔrale Gyisɛse anwo zo la anu. (Mat. 4:1-9) Seetan ɛhola ɛbɛlabɛla menli dɔɔnwo wɔ yɛ mekɛ ye anu yemaa bɛyɛ angomedi wɔ ndenle dɔɔnwo azo. Ɔwɔ kɛ yɛnea ɛhye boɛ kpalɛ ɔluakɛ angomedi subane ɛhye mɔɔ ɛbu la bahola anyia yɛ nwo zo tumi.—Ɛfɛ. 2:2.

4. (a) Asoo yɛbahola yɛaye yɛ angomedi subane yɛavi ɛkɛ ne kɛkala ɔ? Kilehile nu. (b) Kpuyia boni mɔ a yɛbazuzu nwo a?

⁴ Yɛbahola yɛava angomedi yɛado kɛzi bulalɛ dɔ nrɛnlana la anwo. Debie mɔɔ le kɛ nyevile nu anwoma la kola maa bulalɛ dɔ nrɛnlana. Mɔɔ ɛnle kpalɛ la a le kɛ yɛbabu yɛ nye yeagua nrɛnlana ne azo yeamaa deɛ ne abubu anzɛɛ azɛkye bɔkɔɔ. Zɔhane ala a yɛnrɛhola yɛnrɛye yɛ sinlidɔlɛ nee yɛ angomedi subane yɛnrɛvi ɛkɛ ne kɛkala a, noko ɔwɔ kɛ yɛmaa yɛ nye da ɛkɛ na yɛko yɛtia subane ɛhye mɔ dahuu. (1 Kɔl. 9:26, 27) Kɛ ɔkɛyɛ na yɛanwu angomedi subane mɔɔ wɔ yɛ nwo la ɛ? Na kɛzi yɛbamaa yɛ anwofamaa subane ne ayɛ kpole ɛ?

5. (a) Kɛzi Baebolo ne le kɛ neanleɛ ɛ? (Nea mɔlebɛbo nvoninli ne.) (b) Saa yɛkulo kɛ yɛnwu ye saa yɛle angomedi a, duzu a ɔwɔ kɛ yɛkoati a?

⁵ Kɛmɔ yɛkola yɛfa neanleɛ yɛnea kɛzi yɛ sonlabaka ne de la, zɔhane ala a yɛkola yɛdua Baebolo ne azo yɛneɛnlea yɛ nwo nu na yɛyɛ nzenzaleɛ mɔɔ fɛta la a. (Bɛgenga Gyemise 1:22-25.) Noko, kyesɛ yɛfa neanleɛ yɛdi gyima kpalɛ na yɛanwu kɛzi yɛ sonlabaka ne de la. Kɛ neazo la, saa yɛannea yɛ nwo kpalɛ wɔ neanleɛ ne anu a, yɛnrɛnwu nvonleɛ ngyikyi mɔɔ anwo hyia la. Anzɛɛ, saa yɛannea neanleɛ ne anu fɔɔnwo a, awie gyɛne a yɛbanwu ye wɔ nu a. Zɔhane ala a saa Baebolo ne bamaa yɛanwu ye saa yɛle angomedi a, ɛnee ɔnle kɛ yɛkenga ye mgbane ala, anzɛɛ yɛfa yɛkpondɛ awie mɔ nvonleɛ a.

6. Kɛzi ‘yɛsɔ’ fanwodi mɛla ne anu dwaa ɛ?

⁶ Kɛ neazo la, bie a yɛbagenga Nyamenle Edwɛkɛ ne dahuu, noko yɛnrɛnwu angomedi subane mɔɔ wɔ yɛ nu la. Kɛzi ɔkola ɔba ye zɔ ɛ? Suzu ɛhye anwo: Wɔ Gyemise neanleɛ nwo neazo ne anu, tɛ kɛ asɛɛ nrenya ne annea neanleɛ ne anu kpalɛ ɔ. Gyemise hɛlɛle kɛ sonla ne ‘nea ɔ nyunlu wie.’ Gyemise vale Giliki edwɛkɛkpɔkɛ mɔɔ kile debie mɔɔ bɛnea ye kpalɛ anzɛɛ bɛsuzu nwo kpalɛ la a lile gyima wɔ ɛke a. Yemɔti, duzu a ɛnee le nrenya ne ngyegyelɛ a? Gyemise doale zo kɛ: “Na ɔkɔ a ɛkɛ ne ala ɔ rɛle fi ɔdaye ye sonla holɛ mɔɔ ɔzɔho ye la.” Nrenya ne vile neanleɛ ne anwo, yeanyɛ mɔɔ ɔnwunle ye la anwo ɛhwee. Noko, awie mɔɔ fa edwɛkɛ ne bɔ ye ɛbɛla la “neɛnlea fanwodi mɛla ne mɔɔ di munli la anu” na “ɔsɔ nu dwaa.” Kɛ anrɛɛ ɔbabu ɔ nye yeagua Nyamenle Edwɛkɛ ne anu mɛla ne mɔɔ ɔdi munli azo la, ɔsɔ nu dwaa, ɔfa ngilehilelɛ ne ɔdi gyima. Gyisɛse hanle edwɛkɛ ko ne ala kɛ: “Saa bɛkɔ zolɛ bɛdi me ngilehilelɛ zo a, ɛnee bɛle me ɛdoavolɛma amgba.”—Dwɔn 8:31.

7. Kɛzi yɛbahola yɛalua Baebolo ne azo yɛanleɛnlea yɛ nwo nu saa angomedi subane bie wɔ yɛ nu a?

⁷ Ɛhye ati, saa ɛbahola wɔali angomedi  zo a, ɔwɔ kɛ ɛdumua ɛkenga Nyamenle Edwɛkɛ ne boɛ. Yemɔ bamaa wɔanwu ɛleka mɔɔ ɔwɔ kɛ ɛyɛ nzenzaleɛ la. Noko tɛ yemɔ ala ɛne. Ɔwɔ kɛ ɛyɛ neɛnleanu ɛkɔ moa. Mekɛ mɔɔ Baebolo nu edwɛkɛ bie wɔ wɔ adwenle nu la, biza ɛ nwo kpuyia ɛhye mɔ: ‘Kɛzi anrɛɛ mebayɛ me nyɛleɛ wɔ tɛnlabelɛ ɛhye anu ɛ? Asoo anrɛɛ mebayɛ mɔɔ tenrɛ la?’ Mɔɔ tɛla biala la, mekɛ mɔɔ wɔdwenledwenle mɔɔ wɔgenga la anwo wɔwie la, bɔ mɔdenle fa di gyima. (Mat. 7:24, 25) Saa yɛsuzu mɔɔ Belemgbunli Sɔɔlo nee ɛzoanvolɛ Pita yɛle la anwo a, ɔbamaa yɛala tunwomaa sunsum ali.

8. Subane boni a Sɔɔlo vale bɔle ye belemgbunlililɛ ne abo a, na kɛzi ɔlale ɛhye ali ɛ?

⁸ Yizilayɛ Belemgbunli Sɔɔlo neazo ne le kɔkɔbɔlɛ maa yɛ wɔ kɛzi angomedi bahola azɛkye yɛ tunwomaa sunsum ne la anwo. Sɔɔlo bɔle ye belemgbunlililɛ ne abo la ɛnee ɔbɛlɛ ɔ nwo aze. (1 Sam. 9:21) Anrɛɛ ɔkola ɔtwe Yizilayɛma mɔɔ dendɛle tiale ye tumililɛ ne la anzo ɔluakɛ Nyamenle a vale ye ziele ɛkɛ a, noko yeanyɛ ye zɔ. (1 Sam. 10:27) Belemgbunli Sɔɔlo liele Nyamenle sunsum ne adehilelɛ dole nu ɔlile Yizilayɛma ati ɔmanle bɛhonle bɛtiale Amɔnoma. Ɛhye anzi, ɔbɛlɛle ɔ nwo aze ɔvale konimlilɛ ne anwo nganvolɛ ɔmanle Gyihova.—1 Sam. 11:6, 11-13.

9. Kɛ ɔyɛle mɔɔ Sɔɔlo ranyianle angomedi adwenle ɛ?

⁹ Nzinlii, Sɔɔlo manle anwomemaazo nee angomedi adwenle lɔle ye kɛ nrɛnlana. Ɔlile Amalɛkema anwo zo konim la, ɔvale ye ɛhulolɛdeɛ ɔlumuale tieyɛ mɔɔ ɔwɔ kɛ ɔyɛ ɔmaa Gyihova la anyunlu. Anyebolo manle Sɔɔlo vale ninyɛne mɔɔ Nyamenle hanle kɛ bɛzɛkye bɛ la bie. Eza Sɔɔlo memanle ɔ nwo zo zile ngakyedeɛ manle ɔ nwo. (1 Sam. 15:3, 9, 12) Mɔɔ ngapezonli Samoɛle zele ye kɛ Gyihova anye ɛnlie mɔɔ yeyɛ anwo la, Sɔɔlo bɔle mɔdenle kɛ ɔbua ɔ nwo benle kɛ yeli Nyamenle mɛla ne bie azo na ɔvale ye nvonleɛ ne anwo ɛzonle ɔzoale awie mɔ. (1 Sam. 15:16-21) Bieko, anwomemaazo maanle Sɔɔlo kpondɛle menli nyunlu anyunlunyia dɛlale Nyamenle anyunlu ɛlolɛ. (1 Sam. 15:30) Kɛzi Sɔɔlo anwo edwɛkɛ ne mɔɔ yɛbava ye kɛ neanleɛ la bamaa yɛahoati angomedi subane ɛ?

10, 11. (a) Duzu a Sɔɔlo nyɛleɛ ne maa yɛnwu ye wɔ angomedi subane nwo a? (b) Kɛ ɔkɛyɛ na yɛanyɛ Sɔɔlo nyɛleɛ ɛtane ne bie ɛ?

¹⁰ Mɔɔ lumua, Sɔɔlo nyɛleɛ ne maa yɛnwu kɛ ɔnle kɛ yɛbu yɛ nye yɛgua ninyɛne zo yɛsuzu kɛ kɛmɔ mekɛ bie ɛnee yɛnle angomedi la ati, zɔhane ala a yɛbayɛ ye dahuu a. (1 Tem. 4:10) Kakye kɛ ɛnee Sɔɔlo bɔ mɔdenle na ɔnyianle Nyamenle anyunlu ɛlolɛ mekɛ bie, noko yeangola yeanli angomedi subane mɔɔ ɔnyianle la azo. Awieleɛ bɔkɔɔ ne, Gyihova kpole Sɔɔlo ɔlua ye anzosesebɛ ti.

¹¹ Mɔɔ tɔ zo nwiɔ, ɔnle kɛ yɛfa yɛ adwenle yɛsie ɛbɛla kpalɛ mɔɔ yɛlɛbɔ la ala azo, yɛbu yɛ nye yɛgua ninyɛne mɔɔ ɔwɔ kɛ yɛyɛ nzenzaleɛ wɔ nu la azo. Ɛhye bayɛ kɛ yɛlɛfa neanleɛ yɛanlea tɛladeɛ fofolɛ mɔɔ yɛwula noko yɛnnwu kɛ evinli wɔ yɛ nyunlu la. Saa bɔbɔ yɛnrɛyɛ kɛ Sɔɔlo mɔɔ bule ɔ nwo somaa la a, ɔwɔ kɛ yɛbɔ mɔdenle yɛkoati subane biala mɔɔ ɔbamaa yɛayɛ ye ɛtane ne bie la. Saa bɛtu yɛ folɛ a, ɔnle kɛ yɛfa edwɛkɛ yɛye yɛ nloa, yɛbu ngyegyelɛ ne debie ekyi, anzɛɛ yɛfa ɛzonle ne yɛsoa awie mɔ. Kɛ anrɛɛ yɛbayɛ kɛ Sɔɔlo la, ɔle kpalɛ kɛ yɛbadie folɛdulɛ.—Bɛgenga Edwɛndolɛ 141:5.

12. Saa yɛyɛ ɛtane kpole bie a, kɛzi tunwomaa sunsum bahola aboa yɛ ɛ?

 ¹² Na saa yɛyɛ ɛtane kpole bie ɛ? Ɛnee Sɔɔlo ɛngulo kɛ ye duma kɛzɛkye, na ɛhye ammaa yeanwie ye boɛ wɔ sunsum nu. Noko, tunwomaa sunsum bamaa yɛali nyianezelɛ zo na yɛakpondɛ moalɛ mɔɔ fɛta. (Mrɛ. 28:13; Gye. 5:14-16) Kɛ neazo la, adiema ko bɔle ɔ bo veale nleanle nlanwonvoninli wɔ mekɛ mɔɔ ɛnee yenyia ɛvolɛ 12 la, na ɔyɛle ɛhye ɛvolɛ bulu nee ɔ nzi. Ɔka kɛ: “Ɛnee ɔnla aze kɛ mebaha meahile me ye nee mgbanyima ne mɔ. Noko kɛkala mɔɔ meha la, ɔle kɛ asɛɛ bɛzokoɛ me adesoa ɛlomboɛ bie la. Mɔɔ bɛliele me sonvolɛ la, me gɔnwo mɔ bie lile nyane na bɛdele nganeɛ kɛ memaa bɛ sa ɛzi aze. Noko, meze kɛ kɛkala Gyihova die me ɛzonlenlɛ to nu tɛla mekɛ mɔɔ ɛnee menea nlanwonvoninli la, na mɔɔ ɔkpondɛ kɛ yɛyɛ la a nwolɛ hyia kpalɛ a.”

13, 14. Kɛzi Pita lale angomedi subane ali ɛ?

¹³ Ɛzoanvolɛ Pita lale tunwomaa sunsum ali wɔ mekɛ mɔɔ ɛnee Gyisɛse ɛlɛtete ye la. (Luku 5:3-11) Noko, ɛnee ɔwɔ kɛ ɔko ɛsesebɛ ɔdi angomedi zo konim. Kɛ neazo la, mɔɔ ɛzoanvolɛ Gyemise nee Dwɔn kpondɛle dibilɛ kpole vile Gyisɛse ɛkɛ wɔ Nyamenle Belemgbunlililɛ ne anu la, ɔvale ɛya. Bie a Pita dwenlenle kɛ ɔdaye a ɔwɔ kɛ ɔnyia zɔhane dibilɛ ne a, ɔluakɛ ɛnee Gyisɛse ɛha kɛ Pita bali gyima titile bie. (Mat. 16:18, 19) Gyisɛse bɔle Gyemise, Dwɔn, Pita, nee ɛzoanvolɛma mɔɔ ɛha la kɔkɔ wɔ angomedi adenle mɔɔ bɛdua zo bɛdi bɛ mediema “nwo zo tumi la” anwo.—Maake 10:35-45.

¹⁴ Mɔɔ Gyisɛse bɔle mɔdenle kɛ ɔtenrɛ Pita nzuzulɛ bɔbɔ la, ɔliele mekɛ na Pita ahola azenza kɛzi ɔnwu ɔ nwo la. Mɔɔ Gyisɛse zele ye ɛdoavolɛma ne kɛ bɛbakpo ye mekɛ ekyi bie anu la, Pita memanle ɔ nwo zo wɔ ɔ gɔnwo mɔ anyunlu ɛkɛ ne kɛ ɔ ngome ala a ɔbali nɔhalɛ a. (Mat. 26:31-33) Noko, ɛnee ɔ nwo mɔɔ ɔdie ɔdi la ɛngyi kpɔkɛ zo, ɔluakɛ wɔ zɔhane nɔsolɛ ne yeangola yeanla tunwomaa sunsum ali. Mɔdenle mɔɔ Pita bɔle kɛ ɔbɔ ɔ nwo bane la manle ɔyele Gyisɛse ɔmanle fane nsa.—Mat. 26:69-75.

15. Duzu ati a Pita neazo ne maa anwosesebɛ ɛ?

 ¹⁵ Ɔnva nwo ye bɛtɛɛyɛlɛ nee ye sinlidɔlɛ ne, Pita yɛle neazo kpalɛ. Ɔlua ye mɔdenlebɔlɛ nee Nyamenle sunsum ne moalɛ zo, Pita holale homole ɔ nwo zo na ɔlale tunwomaa sunsum ali. (Gal. 5:22, 23) Ɔholale ɔgyinlanle sɔnea mɔɔ anu yɛ se tɛla alumua ɛdeɛ ne mɔɔ dole ye aze la anloa. Mɔɔ ɔyɛle ye wɔ mekɛ mɔɔ Pɔɔlo hwile ɔ nyunlu wɔ bagua nu la maa yɛnwu kɛ ɔbɛlɛ ɔ nwo aze. (Gal. 2:11-14) Mekɛ mɔɔ bɛhwile Pita anyunlu la, yeanva ɛya yeanzie ye nu, yeande nganeɛ kɛ Pɔɔlo ɛgua ɔ nyunlu aze. Pita hɔle zo lale ɛlɔlɛ ali hilele Pɔɔlo. (2 Pita 3:15) Ye neazo ne bahola aboa yɛ yeamaa yɛala tunwomaa sunsum ali.

16. Kɛzi ɛbahola wɔala tunwomaa sunsum ali wɔ tɛnlabelɛ mɔɔ anu yɛ se la anu ɛ?

¹⁶ Suzu mɔɔ ɛkɔ tɛnlabelɛ mɔɔ anu yɛ se la anu a ɛyɛ la anwo. Mɔɔ bɛguale Pita nee ɛzoanvolɛ ne mɔ efiade bɛbole bɛ ɔlua bɛ edwɛkɛhanlɛ ne ati la, bɛlile fɛlɛko “kɛ bɛdabɛ bɔbɔ Nyamenle ɛbu bɛ bie, na ɔlua Gyisɛse duma ne ati bɛnwu amaneɛ [la].” (Gyi. 5:41) Ɛdawɔ noko ɛbahola wɔabu kpɔdekpɔdeyɛlɛ kɛ adenle mɔɔ bɛdua zo bɛsukoa Pita na bɛfa Gyisɛse agyakɛ bɛda tunwomaa sunsum ali. (Bɛgenga 1 Pita 2:20, 21.) Saa mgbanyima ne mɔ tea wɔ a, subane ɛhye bahola amaa wɔalie wɔado nu. Fa Pita agyakɛ, mmafa ɛya.—Nolo. 7:9.

17, 18. (a) Kpuyia boni a ɔwɔ kɛ yɛbiza yɛ nwo wɔ yɛ sunsum nu bodane ne mɔ anwo a? (b) Saa yɛnwu kɛ angomedi subane ɛlɛda ali wɔ yɛ nu a, duzu a yɛbayɛ a?

¹⁷ Mɔɔ fane sunsum nu bodane nwo la, Pita neazo ne eza bahola aboa wɔ. Ɛbahola wɔalua tunwomaa sunsum zo wɔadwu wɔ bodane ne anwo. Noko, nea boɛ na wɔanyɛ ɛhye kɛ ɛfa wɔakpondɛ duma. Yemɔti, biza ɛ nwo kɛ, ‘Kɛmɔ Gyemise nee Dwɔn bizale nwolɛ adenle vile Gyisɛse ɛkɛ la, asoo duma ɛlielɛ anzɛɛ tumi mɔɔ mekpondɛ la ati a mekulo kɛ meyɛ dɔɔnwo wɔ Gyihova ɛzonlenlɛ nu ɔ?’

¹⁸ Saa ɛnwu kɛ angomedi subane wɔ wɔ nu a, sɛlɛ Gyihova maa ɔdenrɛ wɔ nzuzulɛ nee wɔ nganeɛdelɛ; na bɔ mɔdenle kɛ ɛbawula ye anyunlunyia tɛla kɛ ɛbawula ɛ nwo anyunlunyia. (Edw. 86:11) Ɛbahola wɔayɛ ninyɛne mɔɔ ɔnrɛmaa menli adwenle ɛnrɛra ɛ nwo zo la noko. Kɛ neazo la, ɛbahola wɔazo sunsum ne ma ne foa bie mɔ mɔɔ ɛmbɔ nwolɛ mɔdenle la. Anzɛɛ saa ɛbɔ mɔdenle ɛsiezie ɛ nwo ɛmaa debiezukoalɛ noko ɛ nye ɛnlie Belemgbunlililɛ Asalo ɛziezielɛ nwo a, ɛbahola wɔava wɔayɛ wɔ bodane kɛ ɛbali folɛdulɛ mɔɔ wɔ Wulomuma 12:16 la azo.—Bɛgenga.

19. Duzu a yɛbahola yɛayɛ na yɛ sa nu ando wɔ mɔɔ yɛkɛnwu ye wɔ Nyamenle Edwɛkɛ ne mɔɔ ɔle kɛ neanleɛ la anu a?

¹⁹ Saa yɛnea yɛ nwo wɔ Nyamenle Edwɛkɛ ne mɔɔ le kɛ neanleɛ la anu, na yɛnwu sinlidɔlɛ le kɛ angomedi wɔ yɛ nu a bie a yɛ sa nu bɛado. Saa ɛhye bie to wɔ a, dwenledwenle nrenya ne mɔɔ ɔvale edwɛkɛ ne ɔlile gyima wɔ Gyemise ndonwo ne anu la neazo ne anwo. Gyemise anzi kɛzi nrenya ne lile ye ngyegyelɛ ne azo ndɛndɛ anzɛɛ ɔyele ɔvile ɛkɛ ne bɔkɔɔ la azo; emomu, Gyemise hanle kɛ nrenya ne ‘sɔ mɛla ne mɔɔ di munli la anu dwaa ɔfa ɔbɔ ye ɛbɛla.’ (Gye. 1:25) Ɔhakyele mɔɔ ɔnwunle ye wɔ neanleɛ ne anu la na ɔyɛle nwolɛ debie. Yemɔti, nyia adwenle kpalɛ wɔ wɔ sinlidɔlɛ nwo. (Bɛgenga Nolobɔvo ne 7:20.) Kɔ zo neɛnlea mɛla ne mɔɔ di munli la anu, na bɔ mɔdenle da tunwomaa sunsum ali dahuu. Gyihova kulo kɛ ɔboa wɔ kɛmɔ yeboa ɛ mediema dɔɔnwo mɔɔ, ɔnva nwo kɛ bɛnli munli noko bɛkola bɛnyia Nyamenle anyunlu ɛlolɛ nee nyilalɛ la.