LISA * hanle kɛ: “Atiakunlukɛnlɛma mɔɔ mediema ne mɔ lale ye ali la a boale me kpalɛ a.” Ɛnee ɔlɛka debie mɔɔ limoale maanle ɔ nye liele nɔhalɛ ne anwo la anwo edwɛkɛ. Anne noko hanle kɛ: “Atiakunlukɛnlɛma mɔɔ bɛlale ye ali bɛhilele me la a boale me kpalɛ a, na tɛ bɛ ngilehilelɛ ne ɔ.” Kɛkala mediema mraalɛ nwiɔ ɛhye anye die nwo kɛ bɛbagenga Baebolo ne na bɛadwenledwenle nwolɛ, noko atiakunlukɛnlɛmayɛlɛ a boale bɛ kpalɛ a.

Kɛ ɔkɛyɛ na yɛala atiakunlukɛnlɛma ali yɛamaa yeaha menli mɔɔ bikye yɛ la ahonle ɛ? Maa yɛzuzu ndenle nwiɔ anwo: yɛ ɛdendɛlɛ nee yɛ nyɛleɛ. Akee yɛbazuzu menli mɔɔ ɔwɔ kɛ yɛda atiakunlukɛnlɛma ali yɛkile bɛ la anwo.

“Nyeleyɛlɛ mɛla” anzɛɛ atiakunlukɛnlɛmayɛlɛ mɛla wɔ yelɛ kpalɛ ne mɔɔ bɛha ɔ nwo edwɛkɛ wɔ Mrɛlɛbulɛ tile 31 la atafinlima azo. (Mrɛ. 31:26) Ɔmaa “mɛla” ɛhye kile ye edwɛkɛ mɔɔ ɔwɔ kɛ ɔka nee kɛzi ɔwɔ kɛ ɔka ye la. Ɔwɔ kɛ selɛma noko maa “mɛla” ɛhye tɛnla bɛ tafinlima azo. Awovolɛ dɔɔnwo ze kɛ saa bɛteɛdea bɛ mra nu a, ɔkola ɔboda bɛ. Saa awovolɛ tendɛ wɔ adenle zɛhae azo a, ɔnrɛmaa bɛ mra ne mɔ ɛnrɛdie bɛ edwɛkɛ. Ɔti saa awovolɛ tendɛ kɛnlɛma kile bɛ mra a, ɔbamaa bɛayɛ tieyɛ.

Saa ɛle awovolɛ o, ɛnle awovolɛ o, kɛ ɔkɛyɛ na wɔadendɛ kɛnlɛma ɛ? Yɛnwu nwolɛ edwɛkɛ ekyi wɔ Mrɛlɛbulɛ 31:26 foa ne mɔɔ limoa la anu: “Ɔbuke ɔ nloa nrɛlɛbɛ nu.” Ɛhye kile kɛ ɔwɔ kɛ yɛnea edwɛkɛ mɔɔ yɛka nee kɛzi yɛka ye la boɛ. Saa yɛbiza yɛ nwo kɛ, ‘Asoo edwɛkɛ mɔɔ melɛba meaha la baha ɛya anzɛɛ ɔbava anzodwolɛ yeara? a,’ ɔbaboa kpalɛ. (Mrɛ. 15:1) Nɔhalɛ nu, nrɛlɛbɛ wɔ nu kɛ yɛbadwenle kolaa na yɛadendɛ.

Ɛrɛlɛ gyɛne noko hanle kɛ: “Ɛdendɛlɛ mgbane mgbane le kɛ konle dadeɛ mɔɔ wowɔ la.” (Mrɛ. 12:18) Saa yɛdwenledwenle mɔɔ yɛ edwɛkɛ nee kɛzi yɛka ye la baha awie mɔ la anwo a, ɔbamaa yɛanlea yɛ ɛdendɛlɛ boɛ. Nɔhalɛ nu, saa yɛfa ‘atiakunlukɛnlɛmayɛlɛ mɛla’ ne yɛdi gyima a, ɔbaboa yɛ amaa edwɛkɛ mɔɔ yɛbaha nee kɛzi yɛbaha ye la angyegye awie mɔ. (Ɛfɛ. 4:31, 32) Ɔbamaa yɛaye menli nwo adwenletane yɛavi yɛ ti anu na yɛadendɛ kɛnlɛma yɛahile bɛ. Gyihova yɛle ɛhye anwo neazo wɔ mekɛ mɔɔ ɛnee ɔlɛmaa ye sonvolɛ Yilaegya mɔɔ ye ahonle ɛdu la anwosesebɛ la. Anwumabɔvolɛ ne mɔɔ Gyihova zoanle ye la vale ‘ɛnelɛ mɔɔ wɔ aze la dendɛle bɛtɛɛ.’ (1 Arl. 19:12) Noko tɛ ɛdendɛlɛ kɛnlɛma ala a yɛdua zo yɛda atiakunlukɛnlɛmayɛlɛ ali a. Eza ɔwɔ kɛ yɛyɛ nyele. Adenle boni azo?

Saa yɛsukoa Gyihova a, yɛyɛ nyele yɛboka yɛ ɛdendɛlɛ kɛnlɛma nwo. (Ɛfɛ. 4:32; 5:1, 2) Lisa mɔɔ yɛlimoa yɛha ɔ nwo edwɛkɛ la hanle atiakunlukɛnlɛma mɔɔ Alasevolɛ ne mɔ lale ye ali hilele ye la anwo edwɛkɛ kɛ: “Mɔɔ bɛhanle bɛhilele yɛ arɛlevilɛ nu kɛ yɛdu yɛvi ɛleka mɔɔ yɛde la, agyalɛma nwiɔ bie mɔɔ wɔ asafo ne anu la zɛlɛle adenle wɔ gyima nu na bɛraboale ye bɛmaanle yɛboɔboale yɛ ninyɛne ne anloa. Zɔhane mekɛ ne, ɛnee me nee bɛ ɛnzukoa Baebolo ne bɔbɔ!” Zɔhane atiakunlukɛnlɛmayɛlɛ ne hanle Lisa maanle ɔzukoale nɔhalɛ ne.

 Anne mɔɔ yɛhanle ɔ nwo edwɛkɛ wɔ mɔlebɛbo ne la noko hanle atiakunlukɛnlɛma mɔɔ Alasevolɛ ne mɔ lale ye ali hilele ye la anwo edwɛkɛ. Ɔhanle kɛ: “Ɔlua subane mɔɔ menli da ye ali wɔ ewiade ye anu la ati, ɛnee menlie bɛ menli.” Ɔdoale zolɛ kɛ: “Mɔɔ menyiale Alasevolɛ ne mɔ bɔbɔ la, ɛnee menlie bɛ menli. Membizale me nwo kɛ, ‘Duzu ati a bɛkulo kɛ bɛfa me agɔnwolɛ a?’ Noko atiakunlukɛnlɛma mɔɔ me Baebolo kilehilevolɛ ne lale ye ali hilele me la maanle menliele ye menlile.” Debie kpalɛ boni a ɛvi nu ɛra a? Ɔhanle kɛ, “Nzinlii membɔle ɔ bo kɛ medwenledwenle mɔɔ melɛsukoa la anwo kpalɛ.”

Yɛ ye nzonlɛ kɛ atiakunlukɛnlɛma mɔɔ mediema mɔɔ wɔ asafo ne anu la lale ye ali hilele Lisa nee Anne la hanle bɛ kpalɛ, na yemɔ a boale bɛ ɔmaanle bɛzukoale nɔhalɛ ne a. Atiakunlukɛnlɛma mɔɔ mediema ne mɔ lale ye ali hilele bɛ la boale bɛ maanle bɛliele Gyihova nee ye menli ne bɛlile.

Bie mɔ tendɛ kɛnlɛma yɛɛ bɛsele ɔlua ɛleka mɔɔ bɛvi la ati. Subane kɛnlɛma ɛhye mɔ mɔɔ  awie mɔ amaamuo anzɛɛ kɛzi bɛde la maa bɛda ye ali la le kpalɛ. Noko saa yɛ amaamuo anzɛɛ kɛzi yɛde la ati a yɛyɛ zɔ a, bie a ɛnee ɔkile kɛ yɛnzukoa Nyamenle.​—Fa toto Gyima ne 28:2 anwo.

Atiakunlukɛnlɛmayɛlɛ kpalɛ le Nyamenle sunsum nwuanzanwuanza ne ma ne foa. (Gal. 5:22, 23) Ɔti ɛhye kile kɛ yɛhyia Nyamenle sunsum ne amaa yeaboa yɛ yeamaa yɛala atiakunlukɛnlɛmayɛlɛ kpalɛ ali. Saa yɛyɛ ye zɔ a, ɛnee yɛlɛsukoa Gyihova nee Gyisɛse. Yɛɛ kɛ Kilisienema la, yɛ nye die awie mɔ noko anwo. Ɛhye ati, ɛlɔlɛ mɔɔ yɛlɛ yɛmaa Gyihova Nyamenle nee menli la a ka yɛ maa yɛda atiakunlukɛnlɛma ali a. Ɛhye maa yɛ atiakunlukɛnlɛmayɛlɛ ne yɛ subane mɔɔ ɔvi ahonle nu na Nyamenle die to nu a.

Bie a ɔnrɛyɛ se kɛ yɛbala atiakunlukɛnlɛma ali yɛahile bɛdabɛ mɔɔ bɛla bie ali bɛhile yɛ anzɛɛ yɛze bɛ la. (2 Sa. 2:6) Adenle ko mɔɔ yɛdua zo yɛyɛ ɛhye la a le kɛ yɛbayɛ bɛ mo. (Kɔl. 3:15) Na saa yɛte nganeɛ kɛ ɔnfɛta kɛ yɛda atiakunlukɛnlɛma ali yɛkile awie bie noko ɛ?

Suzu ɛhye anwo nea: Gyihova da atiakunlukɛnlɛma ali kile menli kɔsɔɔti, ɔnva nwo kɛ bɛfɛta anzɛɛ bɛnfɛta la, fa yɛ neazo kɛnlɛma maa yɛ. Na ye Edwɛkɛ ne ɛmaa yɛnwu deɛmɔti ɔhyia kɛ yɛda subane kɛnlɛma ɛhye ali la. Bɛva edwɛkɛ “ɛlolɛ kpole” bɛli gyima fane dɔɔnwo wɔ Kilisiene Giliki Ngɛlɛlera ne anu. Ɔkile debie mɔɔ bɛfa bɛmaa awie ɔlua atiakunlukɛnlɛmayɛlɛ ti na tɛ kɛ ahenle mɔɔ bɛlɛfa bɛamaa ye la fɛta la ati ɔ. Kɛzi Nyamenle da atiakunlukɛnlɛma ali kile yɛ ɛ?

Dwenle menli mgbe mgbe mɔɔ Gyihova ɛla atiakunlukɛnlɛma ali ɛhile bɛ ɔlua ninyɛne mɔɔ ɔfa ɔmaa bɛ amaa bɛahola bɛadɛnla ngoane nu la anwo nea. (Mat. 5:45) Nɔhalɛ nu, kolaa na yɛanwu Gyihova la, ɔlale atiakunlukɛnlɛma ali ɔhilele yɛ. (Ɛfɛ. 2:4, 5, 8) Kɛ neazo la, ɔvale debie mɔɔ tɛla biala, ɔ Ra kokye ne ɔmaanle alesama kɔsɔɔti. Ɛzoanvolɛ Pɔɔlo hɛlɛle kɛ Gyihova vale ɛkpɔnedeɛ ne maanle yɛ “kɛ mɔɔ ye ɛlolɛ kpole ne de la.” (Ɛfɛ. 1:7) Ɔnva nwo kɛ yɛyɛ ɛtane na yɛmaa Gyihova di nyane la, ɔkɔ zo ɔkile yɛ adenle na ɔkilehile yɛ. Ye adehilelɛ nee ye ngilehilelɛ le kɛ “ezule mɔɔ tɔ” bɛtɛɛ la. (Dit. 32:2) Yɛnrɛhola yɛnrɛdua ye kakɛ wɔ atiakunlukɛnlɛma mɔɔ ɔda ye ali ɔkile yɛ la anwo. Na nɔhalɛ edwɛkɛ ne a le kɛ atiakunlukɛnlɛma mɔɔ Gyihova da ye ali kile yɛ la a maa yɛnyia anyelazo a.​—Fa toto 1 Pita 1:13 anwo.

Nɔhalɛ nu, Gyihova atiakunlukɛnlɛma ne ka ahonle yɛɛ ɔmaa anwosesebɛ. Ɛhye ati, kɛ anrɛɛ yɛbala atiakunlukɛnlɛma ali yɛahile menli ekyi bie ala la, ɔwɔ kɛ yɛbɔ mɔdenle yɛsukoa Gyihova na yɛda atiakunlukɛnlɛma ali yɛkile awie biala. (1 Tɛs. 5:15) Saa yɛda atiakunlukɛnlɛma ali dahuu a, ɔmaa yɛyɛ kɛ senle wɔ ɛyɛlɛ mekɛ nu. Ɔmaa yɛkyekye yɛ mbusuafoɔ, yɛ gɔnwo mɔ diedima, menli mɔɔ yɛ nee bɛ yɛ gyima, yɛ nee bɛ kɔ sukulu nee yɛ kpalɛzoamra arɛle.

Dwenle menli mɔɔ bɛwɔ wɔ abusua ne anzɛɛ asafo ne anu mɔɔ wɔ edwɛkɛ nee wɔ nyɛleɛ kɛnlɛma ne baboa bɛ la anwo. Bie a awie wɔ wɔ asafo ne anu mɔɔ ɔbahyia moalɛ amaa yɛahola yeaziezie ye sua nu anzɛɛ ye alienwo ɛkɛ anzɛɛ awie mɔɔ baboa ye yeamaa yeahɔli gua dahuu la. Bieko saa ɛyia awie wɔ daselɛlilɛ nu mɔɔ ɔhyia moalɛ a, ɛbahola wɔaboa ye wɔ adenle bie azo ɔ?

Bɛmaa yɛzukoa Gyihova na ‘atiakunlukɛnlɛmayɛlɛ mɛla’ ne ɛboa yɛ dahuu wɔ yɛ edwɛkɛ nee yɛ nyɛleɛ nu.