Duzu ati a yɛkulo kɛ yɛtɛnla ngoane nu dahuu a? Ngɛlɛlera ne kile kɛ kɛ Nyamenle bɔle yɛ la ɛne. (Nolobɔvo ne 3:11) Eza ɔka kɛ “Nyamenle le ɛlɔlɛ.” (1 Dwɔn 4:8) Asoo ndelebɛbo wɔ nu kɛ ɛlɔlɛ Nyamenle ne babɔ sonla kɛ ɔdɛnla ngoane nu dahuu wɔ mekɛ mɔɔ ɔze kɛ ɔnrɛyɛ boɛ la ɔ?

Nɔhalɛ nu, awie biala ɛngulo kɛ ɔwu. Baebolo ne ka kɛ ewule le “kpɔvolɛ” mɔɔ ɔ nwo yɛ ɛvɛlɛ kpalɛ. (1 Kɔlentema 15:26) Bie mɔ wu bɛ ngakula nu, yɛɛ bie mɔ nyi yɛ mrelera, noko awieleɛ bɔkɔɔ ne awie biala bawu. Ɛzulolɛ ti menli dɔɔnwo ɛngulo kɛ bɛbabɔ zo bɔbɔ na bɛadwenle nwo. Asoo bɛbali kpɔvolɛ ewule anwo zo konim kenle bie? Asoo ɔbayɛ boɛ?

Saa ɛnwu kɛ Nyamenle ambɔ sonla kɛ ɔwu a, ɔbazi ɛ nwo ɔ? Baebolo ne maa yɛnwu kɛ Nyamenle bɔle sonla kɛ ɔdɛnla aze dahuu wɔ azɛlɛ ye azo. Gyihova Nyamenle vale debie biala mɔɔ bamaa sonla nye alie na yeadɛnla aze dahuu la ɔzieziele azɛlɛ ne. Akee ɔbɔle sonla mɔɔ limoa, Adam ɔdole paladaese, tola bie mɔɔ wɔ Yidɛn la anu. Yemɔ anzi, “Nyamenle nwunle kɛ debie biala mɔɔ yeyɛ la le kpalɛ kpole.”​—Mɔlebɛbo 1:26, 31.

Nyamenle bɔle Adam kɛ sonla mɔɔ di munli. (Mɛla ne 32:4) Ɛnee Adam aye Yive noko di munli mɔɔ dɛne biala ɛnle ɔ nwo a. Gyihova zele bɛ kɛ:  “Bɛlɔ, bɛyɛ mɔnwo mɔnwo, bɛyi azɛlɛ ye na bɛzie azɛlɛ ye. Eza bɛzie azule nee nyevile nu fɛlɛ, anwomanyunlu nloma nee azɛlɛ ye azo abɔdeɛ biala mɔɔ die ɛnwomenle la.”​—Mɔlebɛbo 1:28.

Ɛnee ɔbalie mekɛ na Adam nee Yive awo ayi azɛlɛ ye. Ɛnee ɔwɔ kɛ Yive wo, ɔ kunlu mralɛ noko wo too kɔkpula kɛ azɛlɛ ne amuala bayi kɛ mɔɔ Nyamenle kpondɛ la. (Ayezaya 45:18) Asoo ndelebɛbo wɔ nu kɛ Gyihova babɔ Adam nee Yive ɛwɔkɛ zɛhae wɔ mekɛ mɔɔ ɔze kɛ bɛbadɛnla aze bɛanwu bɛ mra nee bie a bɛ nlɔnra ala la ɔ?

Akee dwenle mɛla mɔɔ ɔvale ɔmaanle bɛ kɛ bɛzie nane ne mɔ la anwo. Ɔzele Adam kɛ ɔtoto nane ne mɔ aluma, na ɛnee ɛhye noko balie mekɛ. (Mɔlebɛbo 2:19) Noko amaa yeahola yeazie nane ne mɔ la ɛnee ɔwɔ kɛ ɔsukoa bɛ nwo debie amaa yeahola yeanlea bɛ boɛ. Anrɛɛ gyima zɔhane balie mekɛ adɛla mekɛ mɔɔ ɔvale ɔtotole nane ne mɔ aluma la.

Ɔti gyima mɔɔ Nyamenle vale maanle agyalɛma mɔɔ bɛlimoa kɛ bɛwo bɛyi azɛlɛ ne na bɛzie nane ne mɔ la di daselɛ kɛ ɔbɔle bɛ kɛ bɛdɛnla aze bɛhyɛ. Nɔhalɛ nu, Adam dɛnlanle aze hyɛle kpalɛ.

Baebolo ne kile kɛ wɔ tete ne menli dɛnlanle aze hyɛle dɛlale ɛnɛ. Ɔka kɛ: “Adam lile ɛvolɛ ɛya ngɔnla abulasa.” Akee ɔbobɔle mrenyia nsia bie mɔɔ bɛdɛnlanle aze bɛbole ɛvolɛ 900 la aluma! Bɛmɛ a le Sɛte, Yinɔhye, Kinan, Gyɛlɛde, Mɛtusɛla yɛɛ Nowa. Bɛ kɔsɔɔti bɛdɛnlanle aze kolaa na Nowa Azuyilɛ ne ara, Nowa noko lile ɛvolɛ 600 kolaa na Azuyilɛ ne ara. (Mɔlebɛbo 5:5-27; 7:6; 9:29) Kɛ ɔyɛle mɔɔ bɛholale bɛdɛnlanle aze mekɛ tendenle zɛhae ɛ?

Adam nee Yive yɛle ɛtane la yeangyɛ yɛɛ bɛwole menli ɛhye mɔ a, yemɔti ɛnee bɛbikye munlililɛ. Ɔbayɛ kɛ ɛhye ati a bɛnyinle bɛhyɛle a. Noko akee, kɛzi awie di munli a ɔmaa ɔnyi ɔkyɛ ɛ? Na kɛzi bɛbali ewule nwo zo konim ɛ? Amaa yɛabua kpuya ɛhye mɔ la, ɔwɔ kɛ yɛdimoa yɛnwu deɛmɔti yɛyɛ mrelera na yɛwu la.