ASOO ƐLƐ ADENLE ƐSI KƐZI WƆ KENLE BIE BAYƐ LA ANWO KPƆKƐ? Menli dɔɔnwo die di kɛ bɛhyehyɛ bɛ ɛbɛlabɔlɛ bɛdo ɛkɛ ne dɛba, tɛ bɛdabɛ a ɔwɔ kɛ bɛsi nwolɛ kpɔkɛ a. Saa ninyɛne angɔ ye boɛ ammaa bɛ a, bɛbu bɛ nye bɛgua zo na bɛka kɛ “Kɛ ɔbara ye ala ɛne, bɛhyehyɛ bɛdo ɛkɛ ne dɛba.”

Bie mɔ anye zo ta bɛ saa bɛnwu kɛ bɛnrɛhola bɛnrɛyɛ nyane nee nzisi mɔɔ ɛlɛkɔ zo wɔ ewiade la anwo ɛhwee a. Bie a bɛbɔ mɔdenle kɛ bɛmaa ninyɛne ahɔ boɛ wɔ bɛ ɛbɛlabɔlɛ nu, noko bɛkanwu ye la ɛnee konle, ɛtanelilɛ, esiane nee anwodolɛ bie ɛrava nu. Ɔba ye zɔ a, bɛbiza bɛ nwo kɛ ‘Duzu ati a melɛgyegye me nwo a?’

Ɔle zɔ, kɛ arɛlevilɛ nu debie bie bahola azɛkye debie mɔɔ yɛva yɛzie yɛ nye zo wɔ ɛbɛlabɔlɛ nu la. (Nolobɔvo ne 9:11) Noko saa ɔba ye wɔ yɛ kenle bie nwo a, yɛdayɛ a yɛlɛ adenle yɛsi nwolɛ kpɔkɛ a. Nɔhalɛ nu, Baebolo ne kile kɛ, wɔ kenle bie gyi kpɔkɛ mɔɔ ɛbazi la azo. Dwenle mɔɔ ɔka la anwo.

Ɔka ekyi Yizilayɛma dwu Ɛwɔkɛ Azɛlɛ ne azo la, Mosisi mɔɔ ɛnee le bɛ adekilevo la hanle hilele bɛ kɛ: “Meva ngoane nee ewule, yɛɛ saleɛ nee munzule mezie bɛ nyunlu. Zɔhane ati bɛva ngoane, amaa bɛ nee bɛ bo zo amra bɛanyia ngoane. Bɛhulo [Gyihova] bɛ Nyamenle ne, bɛdie ɔ ne na bɛdudu bɛhisa ye.”​—Mɛla ne 30:15, 19, 20.

“Meva ngoane nee ewule yɛɛ saleɛ nee munzule mezie bɛ nyunlu; Zɔhane ati bɛva ngoane.”—Mɛla ne 30:19

Ɛhɛe! Nyamenle liele Yizilayɛma vile akɛlɛzonlenlɛ nu na ɔvale ɛbɛlabɔlɛ mɔɔ yɛ ahunlundwolɛ la ɔbɔle bɛ ɛwɔkɛ wɔ Ɛwɔkɛ Azɛlɛ ne azo. Noko ɛnee saa bɛbanyia ye a, ɔnle kɛ bɛfa bɛ sa bɛsia bɛ ɛzɔlɛ nu. Ɛnee ɔwɔ kɛ ‘bɛkpa ngoane.’ Adenle boni azo? ‘Kɛ, bɛbahulo Nyamenle, bɛadie ɔ ne na bɛadudu bɛahisa ye.’

Ɛnɛ, ɛzukoalɛdeɛ ko ne ala wɔ ɛkɛ ne maa yɛ, na kpɔkɛ mɔɔ yɛbazi la a bahile kɛzi yɛ kenle bie bayɛ a. Saa ɛkpa kɛ ɛbahulo Nyamenle, wɔadie ɔ ne na wɔadudu wɔahisa ye a, ɔkile kɛ wɔkpa ngoane​—dahuu ngoane wɔ Paladaese azɛlɛ zo. Noko duzu a ninyɛne ɛhye mɔ anu ko biala kile a?

Ɛlɔlɛ le Nyamenle subane titili. Sunsum ne hanle ɛzoanvolɛ Dwɔn maanle ɔhɛlɛle kɛ “Nyamenle le ɛlɔlɛ.” (1 Dwɔn 4:8) Yemɔti mekɛ mɔɔ bɛbizale Gyisɛse kɛ mɛla ne anu boni a le kpole la, ɔhanle kɛ: “Fa wɔ ahonle muala nee wɔ ɛkɛla muala nee wɔ adwenle muala kulo Gyihova wɔ Nyamenle ne.” (Mateyu 22:37) Ɔwɔ kɛ agɔnwolɛvalɛ kpalɛ mɔɔ yɛ nee Gyihova Nyamenle lɛ la gyinla ɛlɔlɛ zo, tɛ ɛzulolɛ anzɛɛ tieyɛ mɔɔ ɛnvi ahonle nu la azo. Duzu ati bɔbɔ yɛɛ ɔwɔ kɛ yɛkpa kɛ yɛbahulo ye a?

Ɛlɔlɛ mɔɔ Gyihova lɛ maa alesama la le kɛ mɔɔ awovolɛ lɛ maa bɛ mra la. Yɛnli munli ɛdeɛ, noko awovolɛ mɔɔ lɛ ɛlɔlɛ la maa bɛ mra adehilelɛ, anwosesebɛ, bɛboa bɛ na bɛtete bɛ ɔluakɛ bɛkulo kɛ ɔwie bɛ boɛ. Duzu a awovolɛ ne mɔ kulo kɛ bɛ mra ne mɔ yɛ maa bɛ fa tua bɛ kakɛ a? Bɛkulo kɛ bɛ mra ne mɔ kulo bɛ na bɛdi adehilelɛ biala mɔɔ bɛfa bɛmaa bɛ la azo amaa yeazi bɛ boɛ. Yemɔti saa yɛ anwuma Selɛ ne mɔɔ di munli la kulo kɛ yɛkulo ye na yɛkile anyezɔlɛ wɔ mɔɔ yeyɛ yemaa yɛ la anwo a, ɛnee ɔtɛtole ye lɔ.

Wɔ Giliki aneɛ mɔɔ bɛvale bɛhɛlɛle Baebolo ne la anu, edwɛkɛkpɔkɛ “tie” kola kile “di zo.” Asoo saa yɛka yɛkile kakula kɛ, “Tie wɔ awovolɛ” a, asoo tɛ mɔɔ ɛnee yɛlɛkile la ɛne? Yemɔti Nyamenle ane mɔɔ yɛtie la kile kɛ yɛbazukoa ɔ nwo debie na yɛali mɔɔ ɔka la azo. Kɛmɔ yɛnde kɛ Nyamenle ɛlɛtendɛ la ati, yɛdua ye Edwɛkɛ ne mɔɔ yɛbagenga na yɛali zo la azo yɛtie Ɔ ne.​—1 Dwɔn 5:3.

Mɔɔ Gyisɛse kile deɛmɔti nwolɛ hyia kɛ yɛtie Nyamenle la, ɔhanle ye wɔ mekɛ bie kɛ: “Tɛ paano angome a maa sonla tɛnla ngoane nu a, emomu edwɛkɛ biala mɔɔ vi Gyihova anloa nu la noko.” (Mateyu 4:4) Kɛ mɔɔ aleɛ nwo hyia la, zɔhane ala a Nyamenle anwo nrɛlɛbɛ noko hyia kpole kpalɛ a. Duzu ati ɔ? Belemgbunli Sɔlɔmɔn nrɛlɛbɛvolɛ ne hilele nu kɛ: ‘Nrɛlɛbɛ kola bɔ sonla nwo bane kɛ ezukoa la. Yɛɛ adwenlenubukelɛ nwo nvasoɛ a le kɛ nrɛlɛbɛ bɔ mɔɔ lɛ ye la anwo bane.’ (Nolobɔvo ne 7:12) Nrɛlɛbɛ nee adwenlenubukelɛ mɔɔ vi Nyamenle ɛkɛ ne la kola bɔ yɛ nwo bane ɛnɛ, ɔkola ɔmaa yɛsi kpɔkɛ mɔɔ nrɛlɛbɛ wɔ nu mɔɔ bamaa yɛanyia dahuu ngoane kenle bie la.

Kakye Gyisɛse ndonwo ne mɔɔ yɛlimoa yɛha nwolɛ edwɛkɛ la, ɔhanle kɛ: “Anlenkɛ ekyi ne nee adenle ɛdenraa ne kɔ ngoane nu, na menli ekyi bie a nwu ye a.” (Mateyu 7:13, 14) Saa ɛlua adenle ɛhye azo a, ɛbahulo kɛ ɛ nee awie mɔɔ ze adenle ne azo kpalɛ la dua na ɔkile wɔ adenle amaa wɔadwu ɛleka mɔɔ ɛkɔ la​—dahuu ngoane. Yemɔti ndelebɛbo kpalɛ bie ati a ɔwɔ kɛ yɛbeta Nyamenle anwo a. (Edwɛndolɛ 16:8) Kɛzi yɛbayɛ ɛhye ɛ?

Alehyenlɛ biala yɛlɛ ninyɛne dɔɔnwo wɔ ɛkɛ ne mɔɔ ɔwɔ kɛ yɛyɛ a, yɛɛ dɔɔnwo wɔ ɛkɛ ne mɔɔ yɛkulo kɛ yɛyɛ a. Ninyɛne ɛhye mɔ kola twehwe yɛ adwenle dedee mɔɔ ɔmmaa yɛndwenle mɔɔ Nyamenle kulo kɛ yɛyɛ la anwo. Yemɔti a Baebolo ne kakye yɛ kɛ: “Bɛnlea boɛ kpalɛ na kɛzi bɛlua la anyɛ kɛ menli mɔɔ ɛnze nrɛlɛbɛ emomu kɛ nrɛlɛbɛvolɛma, na bɛva bɛ mekɛ bɛli gyima kpalɛ, ɔluakɛ yɛwɔ mekɛ ɛtane nu.” (Ɛfɛsɛsema 5:15, 16) Saa yɛmaa agɔnwolɛvalɛ mɔɔ yɛ nee Nyamenle lɛ la kyia yɛ tɛla debie biala wɔ ɛbɛlabɔlɛ nu a, ɔkile kɛ yɛdudu yɛhisa ye.​—Mateyu 6:33.

Ɔwɔ nu kɛ ɛnrɛhola ɛnrɛhakyi ninyɛne mɔ ɛsisi wɔ ɛbɛlabɔlɛ nu dɛba la, noko ɛbahola wɔakpondɛ kenle bie kpalɛ wɔamaa ɛ nwo nee wɔ alɔvolɛ. Baebolo ne maa yɛnwu ye kɛ, yɛ anwuma Selɛ Gyihova Nyamenle kulo yɛ kpole kpalɛ na yemaa yɛnwu mɔɔ ɔkpondɛ yeavi yɛ ɛkɛ ne la. Yɛ edwɛkɛ mɔɔ ngapezonli Maeka hanle la nzonlɛ:

‘Gyihova ɛhile wɔ mɔɔ le kpalɛ la, na duzu bieko yɛɛ akee ɔkpondɛ kɛ ɛyɛ a? Ɔkulo kɛ ɛdi pɛlepɛle, ɛkile ɛhulolɛ kpundii, na ɛfa mɛlɛbɛnwoaze ɛ nee Ye dua!’​—Maeka 6:8.

Ɛbalie Gyihova ɛsalɛdolɛ ne wɔado nu na ɛ nee ye alua amaa wɔanyia nyilalɛ ne mɔɔ ɔbava yeamaa menli mɔɔ bayɛ zɔ la ɔ? Kpɔkɛzilɛ ne le wɔ ɛdeɛ!