WƆ December 26, 2004, azɛlɛkpusulɛ kpole bie (9.1m) zile Simeulue, bɔra bie mɔɔ wɔ Sumatra sɔlɔ adɔleɛ ɛnweazo wɔ Indonesia. Bɛdabɛ mɔɔ bɛgyi file zo la kɔsɔɔti nleanle nyevile nu lɔ. Ɛnee nyevile ne ɛlɛtwe ahɔ ɔ kunlu lɔ kpalɛ. Ɛkɛ ne ala, awie biala bɔle ɔ bo kɛ ɔnriandi yeahɔ awoka ne azo lɔ, na bɛlɛtea nu kɛ “Smong! Smong!” Kɛ bɛfɛlɛ nyevile mɔɔ tu ba sua zo la ɛne. Kɛyɛ mitini 30 anu, azɛlɛkye mgbole dule rale file zo, ɔzɛkyele azua nee namunamu dɔɔnwo.

Simeulue Bɔra ne a le ɛleka mɔɔ limoa mɔɔ nyevile mɔɔ tu ba sua zo sɛkye ninyɛne la zile wɔ zo a. Noko, menli 78,000 mɔɔ wɔ sua ne azo la anu 7 ala a wule a. Duzu ati a menli ɛhye mɔ anu ekyii bie a wule a? * Edwɛkɛ mɔɔ bɔra ne azo amra ka la ɛne: ‘Saa azɛlɛ ne kpusu na nyevile ne twe a, nriandi kɔ awoka ne mɔ azo, ɔluakɛ ɔnrɛhyɛ nyevile ne badu ara sua zo.’ Anwubielɛ kile kɛ Simeuluema nwu kɛ nzenzaleɛ ɛra nyevile ne anu a ɛnee bɛnwu kɛ ɔbadu yeara sua zo. Kɔkɔbɔlɛ mɔɔ bɛdiele la liele bɛ ngoane.

Baebolo ne ka esiane bie mɔɔ ɛlɛba la anwo edwɛkɛ kɛ, “anwongyelelɛ mɔɔ bara mekɛ zɔhane anu la, ye ɛzulolɛ, sumunli kɛ ewiade bɔle ɔ bo dedee mɔɔ yeradwu ɛnɛ la, bie ɛtɛsile ɛlɛ, yɛɛ bie noko ɛnrɛzi ɛlɛ na aloa abɔ.” (Mateyu 24:21) Noko, ɛhye ɛnle Azɛlɛ ne mɔɔ alesama mɔɔ ɛnnea ninyɛne zo boɛ bazɛkye ye anzɛɛ esiane bie mɔɔ bazi la awieleɛ, ɔluakɛ ɔle Nyamenle bodane kɛ azɛlɛ ne bayɛ kɛ ɔde la dahuu. (Nolobɔvo ne 1:4) Emomu, anwongyelelɛ ne mɔɔ ɛlɛba la le adenle mɔɔ Nyamenle balua zo ‘azɛkye bɛdabɛ mɔɔ bɛsɛkye azɛlɛ ye la.’ Ɔbava amumuyɛyɛlɛ nee amaneɛnwunlɛ kɔsɔɔti yeara awieleɛ. (Yekile 11:18; Mrɛlɛbulɛ 2:22) Nea nyilalɛ mɔɔ ɛhye bayɛ a!

Bieko, menli mɔɔ ɛnze nwolɛ bie la ɛnrɛwu wɔ ɛzɛkyelɛ ne mɔɔ ɛlɛba la anu kɛ mɔɔ nyevile mɔɔ tu ba sua zo, azɛlɛkpusulɛ anzɛɛ boka mɔɔ kpuke yɛ la. Baebolo ne ka kɛ “Nyamenle le ɛhulolɛ,” yɛɛ Nyamenle mɔɔ ye duma a le Gyihova la ɛbɔ ɛwɔkɛ kɛ “tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.” (1 Dwɔn 4:8; Edwɛndolɛ 37:29) Noko, kɛ ɔkɛyɛ na wɔanyia ngoane wɔ anwongyelelɛ kpole ne anu na wɔanyia nyilalɛ mɔɔ bɛva bɛbɔ ɛwɔkɛ la ɛ? Nɔhalɛ ne a le kɛ: Tie kɔkɔbɔlɛ!

Yɛnrɛhola yɛnrɛnwu kenle kpɔtee mɔɔ amumuyɛyɛlɛ nee amaneɛnwunlɛ kɔsɔɔti bara awieleɛ la, ɔluakɛ Gyisɛse hanle kɛ: “Awie biala ɛnze kenle ne nee mekɛ ne; anwuma soanvolɛma nee Ralɛ ne bɔbɔ ɛnze. Selɛ ne angomekye a ze a.” Noko, Gyisɛse maanle yɛ anwosesebɛ kɛ ‘yɛhɔ zo yɛzinza.’ (Mateyu 24:36; 25:13) Nzɔne ati ɔ? Baebolo ne ka ninyɛne mɔɔ basisi ewiade kolaa na Nyamenle ava awieleɛ ne ara la anwo edwɛkɛ. Kɛ mɔɔ nyevile ne  mɔɔ hwenle arɛlevilɛ nu maanle Simeuluema nwunle kɛ ɔbadu yeara sua zo la, zɔhane ala a ninyɛne mɔɔ ɛlɛsisi ɛnɛ la maa yɛnwu kɛ awieleɛ ne ɛbikye a. Ɛlɛka ne bazi nzenzaleɛ mɔɔ Baebolo ne ka nwolɛ edwɛkɛ la bie mɔ azo.

Nɔhalɛ nu, edwɛkɛ ɛhye mɔ mɔɔ wɔ ɛlɛka ne anu la bie ɛdo menli bie mɔ wɔ mekɛ bie mɔɔ ɛze la anu. Noko Gyisɛse hanle kɛ saa yɛnwu “ninyɛne ɛhye mɔ” a, yɛnwu ye kɛ awieleɛ ne ɛbikye. (Mateyu 24:33) Biza ɛ nwo kɛ, ‘Mekɛ boni a ninyɛne ɛhye mɔ mɔɔ bɛha nwolɛ edwɛkɛ la ɛzi (1) ewiade amuala a, (2) mekɛ ko ne ala anu, yɛɛ (3) ɛhɔ zo ɛzɛkye kpole a?’ Ɔda ali kɛ, yɛde mekɛ zɔhane anu.

U.S. maanle kpanyinli bie hanle kɛ, “Kɔkɔbɔlɛ mɔɔ bɛfa bɛmaa ndɛ . . . la die ngoane.” Nyevile mɔɔ tu ba sua zo zile wɔ 2004 la anzi, bɛvale kɔkɔbɔlɛ debie bɛziele ɛleka mɔɔ edwɛkɛ ne zile la amaa kenle bie awie mɔ anwu bieko. Zɔhane ala a, Nyamenle ɛyɛ nziezielɛ amaa bɛalimoa bɛabɔ menli kɔkɔ kolaa na awieleɛ ne ara a. Baebolo ne hanle kɛ: “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.”​—Mateyu 24:14.

Ɛkenle ɛvolɛ ne angome, Gyihova Alasevolɛ vale dɔnehwele mɔɔ bo mgbe mgbe 1.9 la bɔle edwɛkpa ne nolo wɔ maanle 240 azo nee aneɛ mɔɔ bo 700 la anu. Yɛ mekɛ ye azo anyuhɔlɛ ɛhye le daselɛ mɔɔ kile kɛ awieleɛ ne ɛbikye. Ɛlɔlɛ mɔɔ Gyihova Alasevolɛ lɛ maa bɛ gɔnwo mɔ la ka bɛ maa bɛbɔ mɔdenle bɛbɔ awie mɔ kɔkɔ wɔ Nyamenle ndɛnebualɛ kenle ne mɔɔ ɛlɛbikye ndɛndɛ la. (Mateyu 22:39) Edwɛkɛ ɛhye mɔɔ ɛlɛkenga la di daselɛ kɛ Gyihova kulo wɔ. Kakye kɛ, ‘Nyamenle ɛngulo kɛ bɛsɛkye awie biala. Ɔkpondɛ kɛ awie biala nu ɔ nwo.’ (2 Pita 3:9) Asoo ɛbahulo Nyamenle na wɔadie ye kɔkɔbɔlɛ ne ɔ?

Kakye kɛ Simeuluema mɔɔ de namunamu ɛnweazo la nriandile hɔle awoka ne mɔ azo amaa bɛanyia banebɔlɛ wɔ mekɛ mɔɔ bɛnwunle kɛ nyevile ne ɛlɛtwe la; bɛangendɛ too bɛammaa yeanzia. Kpɔkɛ kpalɛ mɔɔ bɛzile la maanle bɛnyianle ngoane. Amaa yɛanyia ngoane wɔ anwongyelelɛ ne mɔɔ ɛlɛba anu la, ɔwɔ kɛ yɛnriandi yɛkɔ awoka ne mɔ azo, saa yɛbaha a, kolaa na yeaha amozi. Kɛzi? Sunsum ne hanle ngapezonli Ayezaya maanle ɔhɛlɛle ɛsalɛdolɛ mɔɔ bahɔ zo wɔ “mekɛ ne mɔɔ li awieleɛ,” mɔɔ yemɔ a yɛwɔ nu ɛnɛ la anwo edwɛkɛ. Ɔse: ‘Bɛrɛla, bɛmaa yɛhɔ Gyihova Boka ne azo. Amaa yeahilehile yɛ ye ndenle ne mɔ, na yɛalua ye ndenle ne mɔ anu.’​—Ayezaya 2:2, 3.

Saa ɛkɔ boka ti zo a ɔmaa ɛkɔ anwuma na ɔyɛ ɛleka mɔɔ banebɔlɛ wɔ la. Zɔhane ala a, Nyamenle ndenle mɔɔ yɛbalua Baebolo ne azo yɛanwu ye la ɛlɛboa menli mgbe dɔɔnwo wɔ ewiade ye anu ɛnɛ yeamaa bɛayɛ nzenzaleɛ wɔ bɛ ɛbɛlabɔlɛ nu a. (2 Temɔte 3:16, 17) Ɔlua ɛhye azo, bɛlɛkɔ zo ‘bɛalua Nyamenle ndenle ne mɔ anu’ na bɛanyia ɔ nyunlu ɛlolɛ nee banebɔlɛ.

Asoo ɛbalie ɛsalɛdolɛ ɛhye azo na wɔanyia Nyamenle ɛkɛ ne banebɔlɛ wɔ anwongyelelɛ mekɛ ɛhye anu ɔ? Yɛmaa wɔ anwosesebɛ kɛ suzu Ngɛlɛlera ne anwo daselɛ mɔɔ kile kɛ yɛwɔ “awieleɛ mekɛ ne” anu mɔɔ wɔ ɛlɛka ne anu la anwo. Gyihova Alasevolɛ mɔɔ wɔ wɔ ɛkɛ ne la anye balie kɛ bɛbaboa wɔ bɛamaa wɔade ngɛlɛlera mɔɔ wɔ ɛkɛ ne la abo kpalɛ nee kɛzi ɛbava wɔali gyima la. Anzɛɛ saa ɛkɔ yɛ wɛbsaete, www.jw.org azo a ɛbanyia wɔ kpuya ne mɔ anwo mualɛ. Nea BIBLE TEACHINGS > BIBLE QUESTIONS ANSWERED abo wɔ Nrelenza nu.