1-2. Duzu ati a ɔle kpalɛ kɛ yɛbazukoa Samesɛn edwɛkɛ ne a?

 SAA ɛte duma Samesɛn a, duzu a ba wɔ adwenle nu a? Bie a nrenyia bie mɔɔ lɛ anwosesebɛ kpole la a ba wɔ adwenle nu a. Na ɔle nɔhalɛ. Noko Samesɛn zile kpɔkɛ ɛtane bie mɔɔ ɔmaanle ɔnwunle amaneɛ a. Noko Gyihova vale ye adwenle ziele Samesɛn nɔhalɛlilɛ ne azo, na ɔmaanle bɛhɛlɛle ye wɔ Baebolo ne anu amaa yɛanyia zolɛ nvasoɛ.

² Gyihova luale Samesɛn anwo zo yɛle nwanwane ninyɛne dɔɔnwo boale Ye menli Yizilayɛma mɔɔ yekpa bɛ la. Mɔɔ Samesɛn wule la anzi ɛvolɛ ɛya dɔɔnwo, Gyihova maanle ɛzoanvolɛ Pɔɔlo hɛlɛle ye duma bokale menli mɔɔ lɛ diedi kpole la anwo. (Hib. 11:​32-34) Samesɛn neazo ne bahola amaa yɛ anwosesebɛ. Ɔvale ɔ nwo ɔdole Gyihova anwo zo wɔ tɛnlabelɛ mɔɔ anu yɛ se bɔbɔ la anu. Maa yɛnlea kɛzi ye neazo ne bahola amaa yɛ anwosesebɛ nee ninyɛne mɔɔ yɛbahola yɛazukoa yɛavi nu la.

3. Duzu gyima a bɛvale bɛmaanle Samesɛn a?

³ Mɔɔ bɛwole Samesɛn la, ɛnee Filisitiama a di Yizilayɛ maanle ne anwo zo tumi a, na bɛhilele bɛ nyane. (Ndɛ. 13:1) Kɛmɔ ɛnee Filisitiama ati yɛ se la ati, bɛmaanle Yizilayɛma nwunle amaneɛ dɔɔnwo. Gyihova kpale Samesɛn kɛ “ɔbali Yizilayɛma anyunlu yealie bɛ yeavi Filisitiama asa anu.” (Ndɛ. 13:5) Ɛhye  le gyima ɛsesebɛ kpalɛ! Amaa Samesɛn ahola ayɛ gyima ɛsesebɛ ɛhye la, ɛnee ɔwɔ kɛ ɔfa ɔ nwo ɔto Gyihova anwo zo.

4. Kɛzi Gyihova boale Samesɛn maanle ɔliele ɔ nwo ɔvile Filisitiama asa anu ɛ? (Ndɛnebuavolɛma 15:​14-16)

⁴ Nea kɛzi Samesɛn vale ɔ nwo dole Gyihova anwo zo nee kɛzi Gyihova boale ye la anwo neazo. Kenle ko bie, ɛnee ɔwɔ kɛ Filisitia ɛlɔnema kɔkye Samesɛn wɔ Lihae mɔɔ ɔbayɛ kɛ ɔwɔ Dwuda la. Dwudama ahonle dule, ɔti bɛzile kpɔkɛ kɛ bɛbaye Samesɛn bɛamaa ye agbɔvolɛ. Samesɛn menli mumua ne vale nyɛma fofolɛ nwiɔ kyekyele ye kpalɛ na bɛvale ye bɛrɛlɛle Filisitiama. (Ndɛ. 15:​9-13) Noko “Gyihova sunsum ne maanle [Samesɛn] anwosesebɛ” na ɔtetele nyɛma ne. “Akee ɔnwunle asoaso nyinli awudwelɛ bowule fofolɛ bie,” ɔhɔvale na ɔvale ɔhunle Filisitia mrenyia 1,000!—Kenga Ndɛnebuavolɛma 15:​14-16.

5. Kɛzi Samesɛn hilele kɛ ɔfa ɔ nwo ɔto Gyihova anwo zo ɛ?

⁵ Duzu ati a Samesɛn vale asoaso awudwelɛ bowule a? Ɛnee ɔnle debie mɔɔ bɛfa bɛko a! Nɔhalɛ nu, ɛnee Samesɛn ze kɛ saa ɔbali konim a, ɔgyi Gyihova anwo zo na tɛ akodeɛ mɔɔ ɔbava yeali gyima la ɔ. Nrenyia nɔhavo ɛhye vale debie mɔɔ ɔ sa hanle ye la yɛle Gyihova ɛhulolɛdeɛ. Ɔda ali kɛ, kɛmɔ Samesɛn vale ɔ nwo dole Gyihova anwo zo la ati, ɔlile konim kpole.

6. Saa yɛlɛyɛ yɛ teokelase gyimalilɛ ngakyile a, duzu a yɛbahola yɛazukoa yɛavi Samesɛn ɛkɛ a?

⁶ Gyihova bahola amaa yɛdayɛ noko anwosesebɛ yeamaa yɛayɛ yɛ gyimalilɛ ngakyile, bɔbɔ mɔɔ ɔzɔho kɛ ɔyɛ se kpalɛ la. Nyamenle bahola ayɛ ye zɔ wɔ adenle mɔɔ bie a ɔbazi yɛ nwo la azo. Die di kɛ, kɛ mɔɔ Gyihova maanle Samesɛn anwosesebɛ la, saa ɛkɔ zo ɛfa ɛ nwo ɛto Ɔ nwo zo a, ɔbaboa wɔ yeamaa wɔayɛ Ye ɛhulolɛdeɛ.—Mrɛ. 16:3.

7. Neazo boni a maa yɛnwu kɛzi ɔhyia kɛ yɛbamaa Gyihova ahile yɛ adenle a?

⁷ Mediema mrenyia nee mraalɛ dɔɔnwo mɔɔ bɛlɛyɛ teokelase suazilɛ gyima ngakyile la ɛhile kɛ bɛfa bɛ nwo bɛto Gyihova anwo zo. Dɛba ne, ɛnee mediema ta dolɔdolɔ Belemgbunlililɛ Asalo nee azua gyɛne fofolɛ anu dɔɔnwo na  bɛsisi. Noko kɛmɔ Gyihova ahyehyɛdeɛ ne ɛlɛkɔ ɔ nyunlu la ati, ɛnee ɔwɔ kɛ bɛyɛ nzenzaleɛ. Mediema mɔɔ li gyima ne anyunlu la yɛle asɔne kpondɛle Gyihova adehilelɛ na bɛzɔle ndenle fofolɛ bɛnleanle, bie a le kɛ bɛtotɔle azua na bɛzieziele bɛ boɛ. Robert mɔɔ ɛboa wɔ yɛ azua ɛzilɛ gyima dɔɔnwo anu wɔ ewiade ɛleka ngakyile kenlensa ye la hanle kɛ: “Mɔlebɛbo ne, ɛnee ɔnla aze ɔmmaa bie mɔ kɛ bɛbalie nzuzulɛ fofolɛ ɛhye bɛado nu.” Ɔdoale zolɛ kɛ: “Ɛnee ɔle ngakyile bɔkɔɔ ɔfi kɛzi yɛyɛle ye wɔ ɛvolɛ dɔɔnwo anu la anwo. Noko ɛnee mediema ne mɔ lɛ ɛhulolɛ kɛ bɛbayɛ nzenzaleɛ, na yɛnwu daselɛ mɔɔ kile kɛ Gyihova ɛlɛyila ngyehyɛleɛ ɛhye mɔ azo la.” Ɛhye le neazo kokye mɔɔ maa yɛnwu kɛzi Gyihova ɛlɛkile ye menli adenle yeamaa bɛayɛ ye ɛhulolɛdeɛ la. Ɔyɛ a ɔwɔ kɛ yɛ muala yɛbiza yɛ nwo kɛ, ‘Asoo melɛkpondɛ Gyihova adehilelɛ na meahɔ zo meayɛ nzenzaleɛ amaa meazonle Gyihova kpalɛ ɔ?’

8. Kenle ko bie mɔɔ ɛnee nzuhɔne ɛlɛku Samesɛn kpalɛ la, duzu a ɔyɛle a?

⁸ Bie a wɔgenga nwanwane ninyɛne gyɛne mɔɔ Samesɛn yɛle la anwo debie. Ɔ ngomekye ɔhunle awenade yɛɛ nzinlii ɔhunle mrenyia 30 wɔ Filisitia suakpole Ahyekɛlɔn azo. (Ndɛ. 14:​5, 6, 19) Ɛnee Samesɛn ze kɛ saa Gyihova amboa ye a, anrɛɛ ɔ ngomekye ɔnrɛhola ɔnrɛyɛ ninyɛne ɛhye mɔ. Neazo ko a le mekɛ mɔɔ ɔhunle Filisitiama 1,000 ɔwiele na nzuhɔne hunle ye la. Duzu a ɔyɛle a? Kɛ anrɛɛ ɔdaye mumua ne ɔbakpondɛ nzule yeanlo la, ɔzunle ɔvɛlɛle Gyihova kɛ ɔboa ye.—Ndɛ. 15:18.

9. Kɛzi Gyihova buale asɔne mɔɔ Samesɛn yɛle kɛ ɔboa ye la ɛ? (Ndɛnebuavolɛma 15:19 nee ɔbodwɛkɛ)

⁹ Gyihova luale nwanwane adenle zo maanle Samesɛn nyianle nzule ɔvale ɔbuale ye asɔneyɛlɛ ne. Mɔɔ Samesɛn nlonle nzule ne bie la, “ɔnyianle ye anwosesebɛ ne bieko na ɔ nwo gyinlanle ye.” (Kenga Ndɛnebuavolɛma 15:19.) Ɔbayɛ kɛ mɔɔ sunsum ne hanle ngapezonli Samoɛle mɔɔ ɔkɛlɛ Ndɛnebuavolɛma buluku ne la, ɛnee nzubula ɛhye tɛbɔ ɛkɛ. Bie a Yizilayɛma mɔɔ nwunle nzule zɔhane la hakyele kɛ Gyihova azonvolɛ nɔhavoma bahola ava bɛ nwo ado ɔ nwo zo bɛamaa yeaboa bɛ wɔ ngyianlɛ mekɛ nu.

10. Duzu a ɔwɔ kɛ yɛyɛ amaa Gyihova aboa yɛ a? (Eza nea nvoninli ne.)

¹⁰ Ɔnva nwo ɛlolɛ ahyɛlɛdeɛ mɔɔ yɛlɛ, anzɛɛ kɛzi yɛze ninyɛne bie mɔ yɛ anzɛɛ mɔɔ yɛhola yɛyɛ wɔ Gyihova ɛzonlenlɛ nu la, ɔwɔ kɛ yɛfa yɛ nwo yɛto ɔ nwo zo yɛmaa ɔboa yɛ. Ɔwɔ kɛ yɛbɛlɛ yɛ nwo aze yɛdie yɛto nu kɛ, saa yɛbahola yɛayɛ debie biala mɔɔ Gyihova baha kɛ yɛyɛ la a, kyesɛ yɛfa yɛ nwo yɛto ɔ nwo zo. Kɛ mɔɔ Samesɛn nlonle nzule ne mɔɔ Gyihova vale maanle ye la na ɔnyianle anwosesebɛ la, zɔhane ala a saa yɛdayɛ noko yɛfa ngyehyɛleɛ biala mɔɔ Gyihova ɛyɛ ɛmaa yɛ la yɛdi gyima a yɛ nwo bayɛ se wɔ sunsum nu a.—Mat. 11:28.

11. Kɛ ɔkɛyɛ na yɛava yɛ nwo yɛado Gyihova anwo zo yɛamaa yeaboa yɛ ɛ? Maa neazo.

¹¹ Suzu Aleksey mɔɔ boka yɛ mediema mɔɔ wɔ Russia mɔɔ bɛlɛyia kpɔdekpɔdeyɛlɛ mɔɔ anu yɛ se la neazo ne anwo. Duzu a ɛboa ye ɛmaa yegyinla tɛnlabelɛ mɔɔ anu yɛ se kpalɛ la anloa a? Ɔ nee ɔ ye ɛyɛ ngyehyɛleɛ kpalɛ mɔɔ bɛfa bɛyɛ sunsum nu ninyɛne a. Ɔhanle kɛ: “Mebɔ mɔdenle kɛ mebali ngyehyɛleɛ mɔɔ meyɛ kɛ mebayɛ me ti anwo debiezukoalɛ na meagenga Baebolo ne dahuu la azo. Nwonlomɔ biala, me nee me ye suzu alehyenlɛ ne anu tɛkese ne anwo na yɛbɔ nu yɛyɛ asɔne.” Duzu a yɛsukoa yɛfi ɛhye anu a? Ɔnle kɛ yɛfa yɛ nwo yɛto yɛ nwo zo, emomu ɔwɔ kɛ yɛfa yɛ nwo yɛto Gyihova anwo zo. Adenle boni azo? Ɔwɔ  kɛ yɛyɛ ngyehyɛleɛ kpalɛ yɛfa yɛsukoa Baebolo ne na yɛyɛ sunsum nu ninyɛne gyɛne amaa yɛ diedi nu amia. Gyihova noko bayila mɔdenle mɔɔ yɛlɛbɔ kɛ yɛsonle ye la azo. Nyamenle maanle Samesɛn anwosesebɛ na ɔbahola yeamaa yɛdayɛ noko anwosesebɛ.

12. Kɛzi Samesɛn nee Dɛlaela edwɛkɛ ne le ngakyile fi ɔ nee Filisitiama ɛdeɛ ne anwo ɛ?

¹² Ɛnee Samesɛn ɛnli munli kɛ yɛdayɛ ala la, ɔti ɔdwu mekɛ ne bie a ɔnsisi kpɔkɛ kpalɛ. Kpɔkɛ ko bie mɔɔ ɔzile la maanle ɔyiale ngyegyelɛ dɔɔnwo. Mɔɔ Samesɛn yɛle ndɛnebuavolɛ wɔ mekɛ bie anu la anzi, “ɔnwunle raalɛ bie mɔɔ bɛfɛlɛ ye Dɛlaela la wɔ Sɔlɛke Bɔnza ne anu na ɔhulole ye.” (Ndɛ. 16:4) Mekɛ bie, ɛnee Samesɛn kulo kɛ ɔgya Filisitia raalɛ bie, noko ɛnee “Gyihova a ɛlɛyɛ ɛhye a” ɔluakɛ ɛnee ‘ɔlɛkpondɛ adenle yealua zo yeaho yeatia Filisitiama.’ Nzinlii, Samesɛn hɔzokoɛle raalɛ tuutuunli bie mɔɔ wɔ Filisitia suakpole Gaza azo la sua nu. Wɔ mekɛ zɔhane, Nyamenle maanle Samesɛn anwosesebɛ ɔmaanle ɔdule suakpole ne anlenkɛ kpole ne na ɛhye zɛkyele suakpole ne anwobanebɔlɛ. (Ndɛ. 14:​1-4; 16:​1-3) Noko Dɛlaela edwɛkɛ ɛdeɛ ne le ngakyile, ɔluakɛ ɔbayɛ kɛ ɛnee ɔle Yizilayɛnli, ɔnle Filisitianli, na ɛnee Samesɛn mumua ne a ɛlɛsi ɔ ti anwo kpɔkɛ a.

13. Duzu a Dɛlaela vale yɛle Samesɛn a?

¹³ Dɛlaela liele ezukoa kpole bie vile Filisitiama ɛkɛ ne kɛ ɔbaye Samesɛn yeamaa bɛ. Asoo kɛmɔ ɛnee ɔdie Dɛlaela ɔdi somaa la ati—kɛmɔ ɛhulolɛ mɔɔ ɔlɛ ɔmaa ye la zinle ɔ nye la ati—yeannwu mɔɔ ɛnee ɔkulo kɛ ɔyɛ la ɔ? Kɛzi ɔde biala la, Dɛlaela hɔle zo tinlitinlinle Samesɛn anwo zo kɛ ɔha debie mɔɔ maa ɔnyia ye anwosesebɛ ne la ɔhile ye, na akee Samesɛn hanle hilele ye. Mɔɔ yɛ alɔbɔlɛ la a le  kɛ Samesɛn nvonleɛ ne maanle ɔminlinle ye anwosesebɛ nee Gyihova anyunlu ɛlolɛ mɔɔ ɔlɛ la wɔ mekɛ bie anu.—Ndɛ. 16:​16-20.

14. Kɛmɔ Samesɛn liele Dɛlaela lile la ati, amaneɛ boni a ɔnwunle ye a?

¹⁴ Kɛmɔ Samesɛn liele Dɛlaela lile dɛlale Gyihova la ati, ɔnwunle amaneɛ. Filisitiama hyele Samesɛn na bɛbobɔle ɔ nye. Bɛhɔdole ye efiade wɔ Gaza, ɛleka mɔɔ ɛnee yelimoa yedudu bɛ suakpole ne nlenkɛ ne mɔ la, na bɛmaanle ɔdinle hwiiti. Akee mɔɔ Filisitiama yiale kɛ bɛdi bɛ ɛvoyia bie la, bɛgolole ɔ nwo. Bɛbɔle afɔle kpole bie bɛmaanle bɛ adalɛ nyamenle Deegɔn, kɛ asɛɛ ɔdaye a yeva Samesɛn yewula bɛ sa a. Bɛyele ye bɛvile efiade bɛhɔle ɛkponledolɛ ne abo kɛ “ɔralielie bɛ nye.”—Ndɛ. 16:​21-25.

15. Kɛzi Samesɛn hilele ye bieko kɛ ɔvale ɔ nwo ɔdole Gyihova anwo zo ɛ? (Ndɛnebuavolɛma 16:​28-30) (Nea ɔ nyunlu nvoninli ne.)

¹⁵ Samesɛn yɛle nvonleɛ dɔɔnwo noko yeammaa ɔ sa nu ando. Ɔkpondɛle adenle mɔɔ ɔbalua zo yeawie gyima mɔɔ Nyamenle vale maanle ye, mɔɔ yemɔ a le kɛ ɔbazɛkye Filisitiama la. (Kenga Ndɛnebuavolɛma 16:​28-30.) Samesɛn zɛlɛle Gyihova kɛ: “Maa menli Filisitiama nzenralɛ.” Nɔhalɛ Nyamenle ne buale Samesɛn modolɛ nzɛlɛlɛ ne na ɔluale nwanwane adenle zo ɔmaanle ye anwosesebɛ kpole bieko. Ɛhye maanle Samesɛn lile Filisitiama ne anwo zo konim kpole dɛlale mekɛ biala.

16. Duzu a yɛbahola yɛazukoa yɛavi Samesɛn nvonleɛ ne anu a?

¹⁶ Samesɛn nvonleɛ ne maanle ɔnwunle amaneɛ ɛdeɛ, noko yeambɔ mɔdenle kɛ ɔgyakyi Gyihova ɛhulolɛdeɛ ɛyɛlɛ. Saa yɛyɛ nvonleɛ bie na bɛtwi yɛ nyunlu anzɛɛ nwolɛ adenle bie fi yɛ sa a, ɔnle kɛ yɛmaa yɛ sa nu to. Kakye kɛ Gyihova ɛziezie ɔ nwo kɛ ɔbaboa yɛ. (Edw. 103:​8-10) Ɔnva nwo kɛ yɛyɛ nvonleɛ la, Gyihova bahola ahɔ zo ava yɛ ali gyima kɛ mɔɔ ɔvale Samesɛn ɔlile gyima la.

17-18. Kɛzi Michael neazo ne maa wɔ anwosesebɛ ɛ? (Eza nea nvoninli ne.)

¹⁷ Suzu adiema kpavolɛ bie mɔɔ bɛfɛlɛ ye Michael la neazo ne anwo. Ɛnee ɔ nye bolo wɔ Gyihova ɛzonlenlɛ nu, ɔle asafo nu sonvolɛ yɛɛ dahuu adekpakyelɛnli. Noko mɔɔ yɛ alɔbɔlɛ la a le kɛ, ɔyɛle nvonleɛ bie na ɛhye maanle nwolɛ adenle ngakyile mɔɔ ɔlɛ wɔ asafo ne anu la vile ɔ sa. Ɔhanle kɛ: “Kolaa na edwɛkɛ ɛhye ado me la, ɛnee ninyɛne ɛlɛkɔ boɛ wɔ ɛzonlenlɛ mɔɔ mefa memaa Gyihova la anu.  Akee arɛlevilɛ nu, mendele nganeɛ kɛ mengola menyɛ ɛhwee wɔ Gyihova ɛzonlenlɛ nu. Yeamba me adwenle nu ɛlɛ kɛ Gyihova bagyakyi me, noko ɛnee mengola mennwu ye saa me nee ye agɔnwolɛvalɛ ne bayɛ kpalɛ bieko kɛ dɛba ne la anzɛɛ mebahola meazonle ye kpalɛ bieko wɔ asafo ne anu a.”

¹⁸ Mɔɔ yɛ anyelielɛ la a le kɛ Michael ammaa ɔ sa nu ando. Ɔvale ɔzɔle zolɛ kɛ: “Menvale me adwenle menziele me nee Gyihova agɔnwolɛvalɛ ne mɔɔ ɔbayɛ kpalɛ la azo ɔlua asɔne mɔɔ menyɛle ye dahuu, debie mɔɔ menzukoale na mendwenledwenlenle nwolɛ la azo.” Nzinlii, Michael nyianle nwolɛ adenle mɔɔ ɔlɛ wɔ asafo ne anu la bieko. Kɛkala ɔle asafo nu kpanyinli nee dahuu adekpakyelɛnli. Ɔhanle kɛ: “Moalɛ nee anwosesebɛmaanlɛ mɔɔ menyianle menvile mgbanyima ne mɔ ɛkɛ titili la, boale me maanle menwunle kɛ Gyihova tɛkulo me. Mekola mefa adwenle mɔɔ anu te la mesonle bieko wɔ asafo ne anu. Anwubielɛ ɛhye ɛmaa menwu kɛ Gyihova bava awie biala mɔɔ kɛnlu ɔ nwo nɔhalɛ nu la ɛtane ahyɛ ye.” Saa yɛyɛ nvonleɛ na yɛbɔ mɔdenle biala kɛ yɛbali nwolɛ gyima, yɛaziezie yɛ adenle nu na yɛava yɛ nwo yɛado Gyihova anwo zo a, yɛbahola yɛanyia anwodozo kɛ ɔbava yɛ yeali gyima na yeayila yɛ kpalɛ.—Edw. 86:5; Mrɛ. 28:13.

19. Kɛzi Samesɛn neazo ne maa wɔ anwosesebɛ ɛ?

¹⁹ Wɔ edwɛkɛ ɛhye anu, yɛzuzule Samesɛn ɛbɛlabɔlɛ nu edwɛkɛ mɔɔ yɛ anyelielɛ la ekyi anwo. Ɛnee ɔnli munli; noko yeammaa ɔ sa nu ando wɔ mɔdenle mɔɔ ɔbɔle ɔzonlenle Gyihova la anu ɔnva kɛ ɔdoa Dɛlaela too ɔyɛle nvonleɛ la. Na Gyihova noko amkpo ye. Eza Nyamenle vale Samesɛn lile gyima wɔ adenle mɔɔ yɛ nwanwane la azo. Ɛnee Gyihova tɛbu ye kɛ ɔle sonla mɔɔ lɛ diedi kpole na ɔmaanle bɛvale ye duma bɛbokale nɔhavoma mɔɔ bɛbobɔle bɛ aluma wɔ Hibuluma tile 11 la anwo. Saa yɛnwu kɛ yɛlɛsonle anwuma Selɛ zɛhae mɔɔ lɛ ɛlɔlɛ na ɔlɛ ɛhulolɛ kɛ ɔbaboa yɛ, titili wɔ mekɛ mɔɔ yɛlɛyia ngyegyelɛ la a, nea kɛzi ɔmaa yɛ anwosesebɛ a! Ɔti kɛ mɔɔ Samesɛn yɛle la, bɛmaa yɛdayɛ noko yɛzɛlɛ Gyihova kɛ: “Mesɛlɛ wɔ kakye me na maa me anwosesebɛ.”—Ndɛ. 16:28.