1. Duzu a bɛbahola bɛabiza yɛ nwolɛ edwɛkɛ wɔ gyima nu anzɛɛ sukulu a?

 SAA awie bie mɔɔ ɛ nee ye yɛ gyima anzɛɛ ɛ nee ye kɔ sukulu la biza wɔ wɔ diedi ne anwo edwɛkɛ a, kɛzi ɛte nganeɛ ɛ? Wɔ ahonle tu ɔ? Yɛ nuhua dɔɔnwo ahonle tu. Noko bie a kpuya ɛhye bamaa yɛanwu ahenle diedi anzɛɛ ye adwenle na yeamaa yɛanyia nwolɛ adenle yɛaha edwɛkpa ne yɛahile ye. Noko ɔyɛ a bie mɔ biza kpuya ɔluakɛ bɛ nee yɛ ɛnyɛ adwenle anzɛɛ bɛfa bɛazu kpolera. Ɔnle kɛ ɛhye si yɛ nwo. Ɔluakɛ ɔbayɛ kɛ bie mɔ ɛde yɛ diedi ne anwo adalɛ edwɛkɛ. (Gyi. 28:22) Eza yɛde “mekɛ mɔɔ li awieleɛ” la anu, na yɛ nee “menli mɔɔ bɛ nee bɛ ɛnyɛ ngyehyɛleɛ” nee “menli mɔɔ anwo yɛ ɛzulolɛ” bɔbɔ la a de a.—2 Tim. 3:​1, 3.

2. Duzu ati a ɔwɔ kɛ yɛbɛlɛ yɛ nwo aze a?

² Bie a ɛbabiza kɛ, ‘Saa awie kulo kɛ ɔsu me diedi ne mɔɔ gyi Baebolo ne azo la anwo kpolera a, kɛ ɔkɛyɛ na meazie me nwo dii na meandendɛ meantia ye ɛ?’ Duzu a baboa wɔ a? Mɛlɛbɛnwoaze ɔ. Sonla mɔɔ bɛlɛ ɔ nwo aze la ɛnva ɛya ndɛndɛ, emomu ɔkola ɔkomo ɔ nwo zo wɔ mekɛ mɔɔ bɛbaha ye ɛya anzɛɛ ɔnnwu kɛzi ɔwɔ kɛ ɔbua bɛ la. (Mrɛ. 16:32) Nɔhalɛ nu, tɛ mekɛ ne amuala a ɔla aze kɛ yɛbabɛlɛ yɛ nwo aze a. Kɛ ɔkɛyɛ na wɔanyia mɛlɛbɛnwoaze subane ɛ? Saa awie su wɔ diedi ne anwo kpolera a, kɛ ɔkɛyɛ na wɔavi mɛlɛbɛnwoaze nu wɔabua ye ɛ? Yɛɛ saa ɛle awovolɛ a, kɛ ɔkɛyɛ na wɔaboa ɛ mra wɔamaa bɛazukoa kɛ bɛbavi mɛlɛbɛnwoaze nu bɛahilehile bɛ diedi ne anu ɛ? Maa yɛnlea.

3. Duzu ati a yɛbahola yɛaha kɛ mɛlɛbɛnwoaze kile kɛ yɛ nwo yɛ se na ɔngile kɛ yɛle bobonyia a? (2 Timote 2:​24, 25)

³ Sonla mɔɔ bɛlɛ ɔ nwo aze la anwo yɛ se, ɔnle bobonyia. Ɔwɔ kɛ awie anwo yɛ se na yeahola yeazie ɔ nwo dii wɔ mekɛ mɔɔ ɔlɛyia tɛnlabelɛ mɔɔ anu yɛ se la. Mɛlɛbɛnwoaze le “sunsum ne  ma” ne foa kokye ala. (Gal. 5:​22, 23) Ɛnee ɔyɛ a bɛfa Giliki edwɛkɛ mɔɔ bɛkile ɔ bo “mɛlɛbɛnwoaze” la bɛkilehile ɛkpɔnwɔ mɔɔ ɔ nye yɛ se na bɛtete ye bɛmaa ɔ nye ɛha aze la anu. Pɛ ɛkpɔnwɔ anyesesebɛ bie mɔɔ bɛyɛ ye abɛ la anwo nvoninli nea. Ɛkpɔnwɔ ne anye ɛha aze ɛdeɛ, noko ɔ nwo yɛ se. Kɛ menli la, kɛ ɔkɛyɛ na yɛanyia mɛlɛbɛnwoaze subane na mekɛ ko ne ala yɛ nwo ayɛ se ɛ? Yɛ ngomekye yɛnrɛhola yɛnrɛyɛ ɛhye. Ɔhyia kɛ yɛyɛ asɔne yɛkpondɛ Nyamenle sunsum ne na yɛsɛlɛ ye kɛ ɔboa yɛ ɔmaa yɛnyia subane kɛnlɛma ɛhye. Menli dɔɔnwo ɛhola ɛyɛ ye zɔ. Alasevolɛ dɔɔnwo lale mɛlɛbɛnwoaze ali wɔ mekɛ mɔɔ awie mɔ bɔle mɔdenle kɛ bɛka bɛ ɛya la, na ɛhye ɛmaa menli mɔɔ nwunle bɛ neazo ne la ɛnyia yɛ nwo adwenle kpalɛ. (Kenga 2 Timote 2:​24, 25.) Kɛ ɔkɛyɛ na wɔamaa mɛlɛbɛnwoaze amaa ɛ nwo ayɛ se ɛ?

4. Mɛlɛbɛnwoaze nwo debie boni a yɛbahola yɛazukoa yɛavi Ayezeke neazo ne anu a?

⁴ Edwɛkɛ dɔɔnwo wɔ Baebolo ne anu mɔɔ maa yɛnwu nvasoɛ mɔɔ wɔ mɛlɛbɛnwoaze zo la. Fa Ayezeke ɛdeɛ ne kɛ neazo. Mɔɔ ɔhɔdɛnlanle Filisitiama azɛlɛ zo wɔ Gilaa la, ɛkɛ ne amra mɔɔ bɛ nye bolole ye la duoduale bula mɔɔ ye papa sonvolɛma ne dudule la. Kɛ anrɛɛ Ayezeke nee bɛ baho na yealie ye ninyɛne ne la, ɔ nee ye abusua ne dule vile ɛkɛ hɔle moamoa na bɛdudule bula fofolɛ. (Gyn. 26:​12-18) Noko eza Filisitiama hanle kɛ nzule ne mɔɔ wɔ bula ne mɔ anu la le bɛ ɛdeɛ. Noko mɔɔ Ayezeke yɛle la hilele kɛ ɔkulo anzodwolɛ. (Gyn. 26:​19-25) Duzu a boale ye ɔmaanle ɔhɔle zo ɔbɛlɛle ɔ nwo aze ɔnva nwo kɛ ɛnee awie mɔ ɛbɔ kpɔkɛ kɛ bɛyɛ debie mɔɔ baha ye ɛya la ɛ? Ɔda ali kɛ ɔnleanle ye awovolɛ neazo ne, ɔzukoale anzodwolɛ subane mɔɔ Ebileham lale ye ali nee Sɛla “koonwuyɛlɛ nee mɛlɛbɛnwoaze subane” ne anwo ninyɛne dɔɔnwo.—1 Pita 3:​4-6; Gyn. 21:​22-34.

5. Neazo boni a kile kɛ Kilisiene awovolɛ bahola ahilehile bɛ mra bɛamaa bɛanwu nvasoɛ mɔɔ wɔ mɛlɛbɛnwoaze zo la ɛ?

⁵ Kilisiene awovolɛ, bɛnyia anwodozo kɛ bɛdabɛ noko bɛbahola bɛahilehile bɛ mra bɛamaa bɛanwu nvasoɛ mɔɔ wɔ mɛlɛbɛnwoaze zo la. Suzu Maxence mɔɔ yeli ɛvolɛ 17 la neazo ne anwo. Ɛnee ɔta ɔyia menli mɔɔ ɛva ɛya la wɔ sukulu nee daselɛlilɛ nu. Ye awovolɛ zile abotane boale ye bɛmaanle ɔnyianle mɛlɛbɛnwoaze subane. Bɛhanle kɛ, “Kɛkala Maxence ɛde ɔ bo kɛ saa awie ka wɔ ɛya a, ɔnyɛ se kɛ ɛbava ɛya anzɛɛ ɛbayɛ basabasa, noko kyesɛ awie mɔɔ anwo yɛ se kpalɛ la na yeahola yeahomo ɔ nwo zo.” Maxence ɛzukoa kɛ ɔbabɛlɛ ɔ nwo aze.

6. Kɛzi asɔneyɛlɛ bahola aboa yɛ yeamaa yɛala mɛlɛbɛnwoaze ali ɛ?

⁶ Saa awie mɔ kulo kɛ bɛka yɛ Nyamenle ne duma ne anwo edwɛkɛ ɛtane anzɛɛ bɛgolo Baebolo ne anwo bɛfa bɛka yɛ ɛya a, duzu a yɛbahola yɛayɛ a? Ɔwɔ kɛ yɛsɛlɛ Gyihova kɛ ɔva ye sunsum ne nee ye nrɛlɛbɛ ne ɔmaa yɛ ɔmaa yɛvi mɛlɛbɛnwoaze nu yɛbua bɛ. Na saa nzinlii yɛnwu kɛ yɛambua bɛ kpalɛ kɛmɔ anrɛɛ ɔwɔ kɛ yɛyɛ ye la noko ɛ? Yɛbahola yɛayɛ edwɛkɛ ne anwo asɔne bieko na yɛadwenle kɛzi yɛbahola yɛabua bɛ kpalɛ wɔ mekɛ fofolɛ la anwo. Gyihova noko bava ye sunsum nwuanzanwuanza ne amaa yɛ amaa yɛahola yɛahomo yɛ nwo zo na yɛala mɛlɛbɛnwoaze ali.

7. Saa yɛkye ngɛlɛlera bie mɔ yɛgua yɛ ti anu a, kɛzi ɔbaboa yɛ yeamaa yɛahomo yɛ ɛdendɛlɛ nee yɛ nyɛleɛ zo ɛ? (Mrɛlɛbulɛ 15:​1, 18)

⁷ Baebolo nu ngyehyɛnu bie mɔ bahola aboa yɛ wɔ mekɛ mɔɔ ɔyɛ se kɛ yɛbavi mɛlɛbɛnwoaze nu yeadendɛ la. Nyamenle sunsum ne bahola aboa yɛ yeamaa yɛahakye ngyehyɛnu zɔhane mɔ. (Dwɔn 14:26) Kɛ neazo la, ngyinlazo mɔɔ wɔ Mrɛlɛbulɛ buluku ne anu la bahola aboa yɛ yeamaa yɛala mɛlɛbɛnwoaze ali.  (Kenga Mrɛlɛbulɛ 15:​1, 18.) Eza Mrɛlɛbulɛ buluku ne maa yɛnwu nvasoɛ mɔɔ wɔ zo kɛ yɛbazɔ yɛ nwo wɔ mekɛ mɔɔ ɔyɛ se kɛ yɛbazie yɛ nwo dii la.—Mrɛ. 10:19; 17:27; 21:23; 25:15.

8. Duzu ati a ɔwɔ kɛ yɛsuzu debie mɔɔ maanle awie bizale yɛ yɛ diedi ne anwo kpuya la anwo a?

⁸ Nwunu noko kola boa yɛ. (Mrɛ. 19:11) Sonla mɔɔ lɛ nwunu la komo ɔ nwo zo wɔ mekɛ mɔɔ awie mɔ kulo kɛ bɛsu ye diedi ne anwo kpolera la. Fane dɔɔnwo ne ala saa awie mɔ biza yɛ kpuya a, bɛnga deɛmɔti bɛlɛbiza kpuya ne la bɛngile yɛ. Ɔti kolaa na yɛabua bɛ la, ɔwɔ kɛ yɛnwu kɛ yɛnze debie mɔɔ ɛha ahenle ne mɔɔ ɔlɛmaa yeabiza kpuya ne a.—Mrɛ. 16:23.

9. Kɛzi Gedɛyɔn lale nwunu nee mɛlɛbɛnwoaze ali wɔ ɔ nee Yifelaem mrenyia ne mɔ edwɛkɛ ne anu ɛ?

⁹ Suzu kɛzi Gedɛyɔn buale Yifelaem mrenyia ne mɔ la anwo. Bɛvale ɛya bɛbizale ye deɛmɔti yeanlimoa yeanvɛlɛ bɛ yeammaa bɛ nee ye angɔngo antia Yizilayɛ agbɔvolɛ la. Noko duzu ati a bɛvale ɛya kpole zɔhane a? Asoo anwomemaazo ɔ? Kɛzi ɔde ye biala la, Gedɛyɔn bɔle mɔdenle kɛ ɔbanwu deɛmɔti bɛva ɛya la na ɔvile mɛlɛbɛnwoaze nu ɔbuale bɛ. Duzu a vi nu rale a? Baebolo ne ka kile yɛ kɛ, “mekɛ mɔɔ ɔhanle edwɛkɛ ɛhye la, bɛ ɛya ne dwole.”—Ndɛ. 8:​1-3.

10. Duzu a baboa yɛ yeamaa yɛanwu kɛzi yɛbabua menli mɔɔ biza yɛ diedi ne anwo kpuya la ɛ? (1 Pita 3:15)

 ¹⁰ Bie a awie mɔɔ yɛ nee ye yɛ gyima anzɛɛ yɛ nee ye kɔ sukulu la babiza yɛ deɛmɔti yɛfa Baebolo ngyinlazo yɛbɔ yɛ ɛbɛla la. Yɛbabɔ mɔdenle yɛahilehile deɛmɔti yɛyɛ zɔ la anu wɔ mekɛ mɔɔ yɛlɛda ɛbulɛ ali yɛahile ahenle ne la. (Kenga 1 Pita 3:15.) Fane dɔɔnwo ne ala, saa yɛnwu ye kpuya ne kɛ ɔle adenle mɔɔ yɛbalua zo yɛanwu mɔɔ ɔlɛdwenle nwo la a ɔboa, na ɔnle kɛ yɛnwu ye kɛ ɔlɛdua zo yeadendɛ yeatia yɛ anzɛɛ yeazu kpolera. Ɔnva nwo adwenle biala mɔɔ ahenle lɛ mɔɔ ɔti ɔlɛbiza kpuya ne la, ɔwɔ kɛ yɛbua ye bɛtɛɛ wɔ adenle kɛnlɛma zo. Bie a yɛ mualɛ ne baha ye yeamaa yeazuzu adwenle mɔɔ ɔlɛ la anwo bieko. Saa yeambu yɛ anzɛɛ ɔgolo yɛ nwo bɔbɔ a, ɔwɔ kɛ yɛfa yɛyɛ yɛ bodane kɛ yɛbabua ye kɛnlɛma.—Wlo. 12:17.

11-12. (a) Duzu a yɛbahola yɛazuzu nwo kolaa na yɛabua kpuya bie mɔɔ ɔ nloa ɛyelɛ yɛ se la ɛ? (Eza nea nvoninli ne.) (b) Maa kɛzi awie biza kpuya a ɔbahola yeamaa yɛanyia nwolɛ adenle yɛ nee ye abɔ adawu la anwo neazo.

¹¹ Saa awie biza yɛ kpuya bie a, ɔhyia kɛ yɛdwenle deɛmɔti ɔbizale zɔhane kpuya ne la anwo. Kɛ neazo la, saa awie mɔɔ yɛ nee ye yɛ gyima la biza yɛ deɛmɔti yɛnli awolɛkenle la a, biza ɛ nwo kɛ: Asoo ɔkulo kɛ ɔnwu ye kɛ bɛmaa yɛ adenle bɛmaa yɛdie yɛ nye ɔ? Anzɛɛ ɔte nganeɛ kɛ yɛ kpɔkɛzilɛ ne bazɛkye koyɛlɛ mɔɔ wɔ gyima ne anu la ɔ? Yɛbahola yɛaha ye ahonle yɛado ye azule nu na yɛamaa yeanwu kɛ yɛ nye die kɛzi ɔdwenle gyima ne anu amra anwo la anwo na yɛamaa yeanyia anwodozo kɛ yɛdayɛ noko yɛkulo kɛ yɛ nee bɛ fa anyelielɛ bɔ nu yɛ gyima. Ɛhye bahola amaa yɛanyia nwolɛ adenle yɛ nee ye abɔ mɔɔ Baebolo ne ka ye wɔ awolɛkenle ɛlilɛ nwo la anwo adawu.

¹² Saa awie mɔ biza yɛ kpuya gyɛne mɔɔ ɔ nloa ɛyelɛ yɛ se la a, yɛbahola yɛalua adenle ko ne ala azo yɛaboa bɛ. Bie a awie mɔɔ yɛ nee ye kɔ sukulu la baha kɛ ɔwɔ kɛ Gyihova Alasevolɛ kakyi adwenle mɔɔ bɛlɛ wɔ menli mɔɔ bɛ awodeɛ le ko nla nwo la. Asoo ɛhye kile kɛ ɔnde Gyihova Alasevolɛ diedi mɔɔ fale menli mɔɔ bɛ awodeɛ le ko la nla nwo la abo ɔ? Anzɛɛ ɔlɛ ɔ gɔnwo anzɛɛ ye busuanli bie mɔɔ ɔ nee awie mɔɔ ɔ nee ye awodeɛ le ko la da ɔ? Ɔsuzu kɛ yɛkyi menli mɔɔ bɔ ɛbɛla zɛhae la ɔ? Yɛbahola yɛamaa yeanyia anwodozo kɛ yɛkulo awie biala yɛɛ yɛbu nwolɛ adenle mɔɔ awie ko biala lɛ si ɔ ti anwo kpɔkɛ la. b (1 Pita 2:17) Akee yɛbahola yɛaha kɛzi yɛfa mɔɔ Baebolo ne ka ye wɔ edwɛkɛ ne anwo la yɛdi gyima a ɔmaa yɛ nye die la anwo edwɛkɛ yɛahile ye.

13. Kɛzi ɛbahola wɔaboa awie mɔɔ ɔsuzu kɛ ɔnle kɛ yɛdie Nyamenle yɛdi la ɛ?

¹³ Saa yɛyia awie mɔɔ ɔ nee yɛ ɛnyɛ adwenle fee la a, ɔnle kɛ yɛfa yɛ adwenle yɛbu ye ndɛndɛ kɛ yɛze mɔɔ ɔdie ɔdi la. (Tae. 3:2) Kɛ neazo la, saa awie mɔɔ ɛ nee ye kɔ sukulu la ka kɛ nrɛlɛbɛ ɛnle nu kɛ yɛbalie Nyamenle yɛali noko ɛ? Asoo ɔwɔ kɛ ɛnyia adwenle kɛ ɔdie ngakyihakyililɛ ɔdi yɛɛ ɔze nwolɛ edwɛkɛ dɔɔnwo ɔ? Nɔhalɛ nu, bie a edwɛkɛ mɔɔ ɔte kɛ awie mɔ ɛlɛka la bie a ɔlɛka a. Kɛ anrɛɛ ɛbazu ngakyihakyililɛ ne anwo kpolera la, ɛbahola wɔakpondɛ adenle wɔalua zo wɔamaa ye buluku anzɛɛ wɔagyakyi ye kpuya bie mɔɔ ɔbadwenle nwolɛ la. Ɛbahola wɔahile ye ɛleka mɔɔ ɔbanyia abɔdeɛ nwo edwɛkɛ wɔ jw.org la. Bie a nzinlii, ɔbahulo kɛ ɔ nee wɔ bazuzu edwɛkɛ anzɛɛ vidio bie mɔɔ ɔnwunle ye wɔ ɛkɛ la anwo. Nɔhalɛ nu, saa yɛda ɛbulɛ ali yɛkile ye a, bie a ɔbaha ye yeamaa yeahakyi ye adwenle.

14. Kɛzi Niall luale yɛ wɛbsaete ne azo boale ɔ gɔnwo bie mɔɔ ɔ nee ye kɔ sukulu la maanle ɔhakyile adwenle mɔɔ ɔlɛ wɔ Gyihova Alasevolɛ anwo la ɛ?

¹⁴ Adiema kpavolɛ bie mɔɔ bɛfɛlɛ ye Niall  la luale yɛ wɛbsaete ne azo maanle ɔ gɔnwo bie nwunle kɛ adwenle mɔɔ ɔlɛ wɔ Gyihova Alasevolɛ anwo la ɛnle nɔhalɛ. Ɔhanle kɛ, “Ɛnee me gɔnwo bie mɔɔ me nee ye kɔ sukulu la ta ka kile me kɛ menlie abɔdeɛ nwo nrɛlɛbɛ menli ɔluakɛ medie buluku mɔɔ nwɔra ngome a wɔ nu la medi metɛla edwɛkɛ mɔɔ le nɔhalɛ la.” Kɛmɔ Niall agɔnwo ne ammaa yeangilehile ye diedi ne anu yeangile ye la ati, Niall hanle hilele ye kɛ ɔhɔnlea jw.org foa ne mɔɔ se “Abɔdeɛ Nwo Nrɛlɛbɛ Nee Baebolo Ne” la. Nzinlii, Niall nwunle kɛ ɔ gɔnwo ne ɛgenga edwɛkɛ mɔɔ wɔ ɛkɛ ne la na ɛnee ɔlɛ ɛhulolɛ kɛ ɔ nee ye bazuzu kɛzi ngoane bɔle ɔ bo la anwo. Ɛdawɔ noko ɛbahola wɔanyia anwubielɛ ɛhye bie.

15. Kɛ ɔkɛyɛ na awovolɛ aboa bɛ mra bɛamaa bɛavi mɛlɛbɛnwoaze nu bɛabua bɛ gɔnwo mɔ wɔ mekɛ mɔɔ bɛlɛsu bɛ diedi ne anwo kpolera la ɛ?

¹⁵ Awovolɛ bahola ahilehile bɛ mra kpalɛ bɛamaa bɛanwu kɛzi bɛbavi mɛlɛbɛnwoaze nu bɛabua awie mɔɔ su bɛ diedi ne anwo kpolera la. (Gye. 3:13) Awovolɛ bie mɔ ɛlɛyɛ abusua ɛzonlenlɛ a, bɛyɛ ɛhye mɔ bie bɛnea. Bɛnea edwɛkɛ mɔɔ bɛbahola bɛayia ye wɔ sukulu la, bɛsuzu kɛzi bɛbabua bɛ la anwo na bɛyɛ nwolɛ yɛkile. Bɛkilehile bɛ mra ne mɔ kɛzi bɛbavi mɛlɛbɛnwoaze nu bɛadendɛ wɔ adenle kɛnlɛma zo la.—Nea ɛlɛka, “ Bɛdimoa Bɛsiezie Bɛ Nwo A, Ɔbahola Yeaboa Bɛ Abusua Ne.”

16-17. Saa bɛdimoa bɛsiezie bɛ nwo a, kɛzi ɔbaboa ngakula ne mɔ ɛ?

¹⁶ Saa Kilisienema dimoa siezie bɛ nwo a, ɔbamaa bɛaha edwɛkɛ mɔɔ tɔ ɛnzolɛ nu na bɛahilehile bɛ diedi ne anu bɛahile awie mɔ. Wɔ jw.org, ɛbanwu “Mgbavolɛ Nee Mbɛlɛra Biza Kɛ” edwɛkɛ ne mɔ mɔɔ ba toɔdoa zo nee mgbavolɛ nee mbɛlɛra gyimayɛlɛ ngɛlata wɔ Mgbavolɛ Nee Mbɛlɛra abo. Bɛziezie ɛhye kɛ  bɛfa bɛaboa mgbavolɛ nee mbɛlɛra bɛamaa bɛamia bɛ diedi ne anu na yeamaa bɛava bɛdabɛ mumua ne bɛ edwɛkɛ bɛaziezie kɛzi bɛbabua awie mɔ la. Saa yɛ abusua ne bɔ nu sukoa edwɛkɛ ɛhye mɔ a, yɛ muala yɛbanwu kɛzi yɛbavi mɛlɛbɛnwoaze nu yɛahilehile yɛ diedi ne anu wɔ adenle kɛnlɛma zo la.

¹⁷ Kpavolɛ bie mɔɔ bɛfɛlɛ ye Matthew la hanle kɛzi bɛ nwo mɔɔ bɛdimoa bɛsiezie la boale ye la. Saa bɛlɛyɛ abusua ɛzonlenlɛ a, Matthew nee ye awovolɛ ta yɛ edwɛkɛ mɔɔ bɛbahola bɛazuzu nwolɛ wɔ sukulu la anwo neɛnleanu. Ɔhanle kɛ: “Yɛdwenle kpuya mɔɔ bɛbahola bɛabiza la anwo na yɛfa neɛnleanu mɔɔ yɛyɛle la yɛyɛ kɛzi yɛbabua bɛ la anwo yɛkile. Saa mete debie mɔɔ me diedi ne gyi zo la abo kpalɛ a, ɔmaa menyia anwodozo na ɔmmaa ɔnyɛ se kɛ mebavi mɛlɛbɛnwoaze nu me nee awie mɔ adendɛ.”

18. Duzu a Kɔlɔsaema 4:6 maa yɛnwu kɛ nvasoɛ wɔ zo a?

¹⁸ Nɔhalɛ nu, saa yɛkilehile yɛ edwɛkɛ ne anu kpalɛ kɛ nzɔne bɔbɔ a, tɛ awie biala a bahulo kɛ ɔbalie yeado nu a. Noko saa yɛfi mɛlɛbɛnwoaze nu yɛbua bɛ na yɛandendɛ yɛantia bɛ a, ɔbaboa. (Kenga Kɔlɔsaema 4:6.) Yɛlɛka yɛ diedi ne anwo edwɛkɛ yɛahile awie a, ɔle kɛ yɛlɛfuandi bɔɔlo yɛamaa ye la. Yɛbahola yɛavuandi ye bɛtɛɛ anzɛɛ yɛavuandi ye kpole. Saa yɛfuandi ye bɛtɛɛ a, ahenle bahola ahye ye na yɛadoa yɛ nwɔhoalilɛ ne azo. Zɔhane ala a saa yɛandendɛ yɛantia awie mɔ na yɛfi mɛlɛbɛnwoaze nu yɛbua bɛ a, ɔbamaa bɛanyia ɛhulolɛ kɛ bɛbadoa adawubɔlɛ ne azo a. Noko saa ahenle kulo kɛ ɔka kɛ yedo yɛ ɛbɔ nu anzɛɛ ɔgolo yɛ diedi ne anwo a, yemɔ ɔnle kɛ yɛtoa adawubɔlɛ ne azo. (Mrɛ. 26:4) Noko tɛ awie biala a bayɛ zɔhane a; menli dɔɔnwo badie.

19. Saa yɛlɛkilehile yɛ diedi ne anu a, duzu a ɔwɔ kɛ ɔka yɛ ɔmaa yɛbɛlɛ yɛ nwo aze a?

¹⁹ Saa yɛsukoa kɛ yɛbabɛlɛ yɛ nwo aze a, ɔboa yɛ kpalɛ. Sɛlɛ Gyihova kɛ ɔboa wɔ wɔ mekɛ mɔɔ ɛlɛye kpuya bie mɔɔ ɔ nloa ɛyelɛ yɛ se la anloa anzɛɛ ɛlɛgyinla tendɛtia nloa la. Kakye kɛ, wɔ mɛlɛbɛnwoaze ne ɛnrɛmaa edwɛkɛ mɔɔ bɛ adwenle ɛnle ko wɔ nwo la ɛnrɛyɛ kpolerazulɛ. Yɛɛ mɛlɛbɛnwoaze nu mɔɔ ɛbavi wɔabua awie mɔ na wɔabu bɛ la baha menli mɔɔ tie wɔ la bie mɔ yeamaa bɛahakyi adwenle mɔɔ bɛlɛ wɔ yɛ nwo nee Baebolo nu nɔhalɛ ne anwo la. ‘Siezie ɛ nwo mekɛ biala kɛ ɛkɛbua’ wɔ diedi ne anwo kpuya mɔɔ bɛkɛbiza la “wɔ mɛlɛbɛnwoaze nee ɛbulɛ kpole nu.” (1 Pita 3:15) Ɛhɛe, bɛlɛ ɛ nwo aze fa kile kɛ ɛ nwo yɛ se!