1. Mekɛ boni a ɔbahola yeayɛ se kɛ yɛbazonle Gyihova a?

MEKƐ boni a ɛnea a ɔbahola yeayɛ se kpalɛ kɛ ɛbazonle Gyihova a​—mekɛ mɔɔ ɛlɛyia ngyegyelɛ anzɛɛ mekɛ mɔɔ ɛlɛ anzodwolɛ la? Saa yɛlɛyia ngyegyelɛ a, yɛfa yɛ nwo yɛto Gyihova anwo zo bɔkɔɔ. Noko saa yɛlɛ anzodwolɛ a, duzu a yɛyɛ a? Asoo ɔwɔ kɛ yɛmaa ninyɛne twehwe yɛ adwenle fi Nyamenle ɛzonlenlɛ zo ɔ? Ɛhye kola si na Gyihova bɔle Yizilayɛma kɔkɔ wɔ nwolɛ.​—Dit. 6:10-12.

2. Neazo boni a Belemgbunli Esa yɛle a?

² Belemgbunli Esa yɛle neazo kpalɛ, ɔyɛle ye debie nrɛlɛbɛ nu na ɔvale ɔ nwo ɔdole Gyihova anwo zo bɔkɔɔ. Ɔzonlenle Gyihova wɔ mekɛ mɔɔ ɔlɛyia ngyegyelɛ yɛɛ mekɛ mɔɔ ɔlɛ anzodwolɛ la. Mɔlebɛbo ne, Esa “vale ye ahonle muala maanle” Gyihova. (1 Arl. 15:14 ɔbdw.) Adenle ko mɔɔ Esa luale zo vale ye ahonle muala maanle Gyihova la a le kɛ ɔdule adalɛ ɛzonlenlɛ bo wɔ Dwuda. Baebolo ne ka kɛ, “ɔyeyele nyamenle gyɛne afɔlemokyea ne mɔ nee ɛzonlenlɛ ɛleka ne mɔ ɔvile ɛkɛ, ɔbubule bɛ ɛzonlenlɛ mpila ne mɔ na ɔpepɛle bɛ ɛzonlenlɛ mbaka ne mɔ.” (2 Ek. 14:3, 5) Ɔdule ye nana Meeyaka bɔbɔ ɔvile ebia zo kɛ ɔbahyema. Duzu ati ɔ? Ɔluakɛ ɔzile awozonle ɛzonlenlɛ adua.​—1 Arl. 15:11-13.

3. Duzu a yɛbazuzu nwo wɔ edwɛkɛ ɛhye anu a?

³ Tɛ adalɛ ɛzonlenlɛ ala a Esa dule ɔ bo a. Ɔzile nɔhalɛ ɛzonlenlɛ nwo adua na ɔboale Dwuda belemgbunlililɛ ne anu amra ɔmaanle bɛziale bɛrale Gyihova ɛkɛ. Gyihova maanle Esa nee Yizilayɛma nyianle anzodwolɛ wɔ  mekɛ bie anu. Wɔ Esa tumililɛ ne anu, “azɛlɛ ne liele ɔ menle” ɛvolɛ bulu. (2 Ek. 14:1, 4, 6) Wɔ edwɛkɛ ɛhye anu, yɛbanwu kɛzi Esa vale anzodwolɛ mekɛ zɔhane lile gyima la. Eza yɛbanwu kɛzi ɛvoya mɔɔ limoa Kilisienema vale anzodwolɛ mekɛ mɔɔ bɛnyianle lile gyima kɛ mɔɔ Esa yɛle la. Awieleɛ bɔkɔɔ ne yɛbabua kpuya ɛhye: Saa ɛde maanle mɔɔ bɛlɛ fanwodi bɛsonle la anu a, kɛzi ɛbahola wɔava anzodwolɛ mekɛ zɔhane wɔali gyima nrɛlɛbɛ nu ɛ? *

4. Kɛ mɔɔ 2 Edwɛkɛsisilɛ 14:2, 6, 7 kile la, kɛzi Esa vale anzodwolɛ mekɛ ne lile gyima ɛ?

⁴ Kenga 2 Edwɛkɛsisilɛ 14:2, 6, 7. Esa zele menli ne kɛ Gyihova yɛɛ ‘yemaa bɛlie bɛ menle wɔ ɛleka biala’ a. Esa ande nganeɛ kɛ ɔwɔ kɛ ɔto ye adwenle nu wɔ anzodwolɛ mekɛ ɛhye anu. Emomu, ɔbɔle ɔ bo kɛ ɔkyekye azuamgbole, yealie bane, yeasisi tawa yɛɛ nlenkɛ mgbole. Ɔzele Dwudama kɛ: “Azɛlɛ ne tɛde yɛ ɛdeɛ.” Boni a ɛnee Esa ɛlɛkile a? Ɛnee ɔlɛkile kɛ menli ne bahola ahɔ ɛleka biala wɔ azɛlɛ ne mɔɔ Nyamenle ɛva ɛmaa bɛ la azo mɔɔ bɛnzulo a, na bɛbahola bɛasisi azua mɔɔ bɛnrɛyia agbɔvolɛ biala a. Ɔzele menli ne kɛ, bɛva anzodwolɛ mekɛ ne bɛli gyima kpalɛ.

5. Kɛmɔti a Esa kpondɛle sogyama dɔɔnwo mɔɔ bɛ nwo yɛ se la ɛ?

⁵ Eza Esa vale anzodwolɛ mekɛ zɔhane kpondɛle sogyama dɔɔnwo mɔɔ bɛ nwo yɛ se. (2 Ek. 14:8) Asoo ɛnee ɛhye kile kɛ ɔnlɛ Gyihova anu anwodozo? Kyɛkyɛ. Emomu, ɛnee ɔze kɛ ɔle ye gyima kɛ ɔbaziezie menli ne yeamaa ngyegyelɛ mɔɔ bɛbayia ye kenle bie la. Ɛnee Esa ze kɛ anzodwolɛ mekɛ mɔɔ  Dwudama ɛnyia la ɛnrɛdɛnla ɛkɛ dahuu, na ɛhye yɛle zɔ.

6. Kɛzi ɛvoya mɔɔ limoa Kilisienema vale anzodwolɛ mekɛ mɔɔ bɛnyianle la lile gyima ɛ?

⁶ Ɔnva nwo kɛ ɛnee bɛta bɛyɛ ɛvoya mɔɔ limoa Kilisienema kpɔdekpɔde la, bɛdabɛ noko bɛnyianle anzodwolɛ wɔ mekɛ bie mɔ anu. Kɛzi ɛdoavolɛma ne vale mekɛ zɔhane lile gyima ɛ? Nɔhavoma zɔhane mɔ vale mɔdenlebɔlɛ hanle edwɛkpa ne. Gyima ne buluku ne ka kɛ, “bɛvale Gyihova anwo ɛzulolɛ” bɛluale. Bɛhɔle zo bɛbɔle edwɛkpa ne nolo, ɔti “bɛ nwo hɔle zo yɛle dɔɔnwo.” Ɔda ali kɛ, Gyihova yilale mɔdenlebɔlɛ mɔɔ bɛvale bɛhanle edwɛkɛ ne wɔ anzodwolɛ mekɛ nu la azo.​—Gyi. 9:26-31.

7-8. Mɔɔ nwolɛ adenle bukele maanle Pɔɔlo nee awie mɔ gyɛne la, duzu a bɛyɛle a? Kilehile nu.

⁷ Ɛvoya mɔɔ limoa ɛdoavolɛma vale nwolɛ adenle biala mɔɔ bɛnyianle la bɔle edwɛkpa ne nolo. Kɛ neazo la, mɔɔ ɛzoanvolɛ Pɔɔlo nwunle kɛ nwolɛ adenle kpole bie ɛbuke ɛmaa ye wɔ Ɛfɛsɛse la, ɔvale ɔbɔle edwɛkpa ne nolo na ɔyɛle menli ɛdoavolɛma wɔ ɛkɛ.​—1 Kɔl. 16:8, 9.

⁸ Pɔɔlo nee Kilisienema gyɛne nyianle nwolɛ adenle bieko wɔ mekɛ mɔɔ bɛzieziele mrenyiazo ɛpɛlɛ edwɛkɛ ne wɔ 49 Y.M. bɛwiele la. (Gyi. 15:23-29) Mɔɔ bɛvale kpɔkɛzilɛ ne bɛdole asafo ne mɔ anyunlu bɛwiele la, ɛdoavolɛma ne bɔle mɔdenle kpole bɔle “Gyihova edwɛkpa ne nolo.” (Gyi. 15:30-35) Duzu a vile nu rale a? Baebolo ne ka kɛ, “asafo ne mɔ anwo hɔle zo yɛle se wɔ diedi ne anu na bɛ dodo ne hɔle ɔ nyunlu alehyenlɛ biala.”​—Gyi. 16:4, 5.

9. Kɛzi tɛnlabelɛ ne de wɔ maanle dɔɔnwo anu ɛnɛ ɛ, na kpuya boni a yɛbahola yɛabiza yɛ nwo a?

⁹ Ɛnɛ, wɔ maanle dɔɔnwo azo, yɛkola yɛka edwɛkɛ ne mɔɔ bɛngyegye yɛ a. Ɛde maanle mɔɔ bɛlɛ ɛzonlenlɛ nwo fanwodi la anu ɔ? Saa ɔle zɔ a, ɛnee biza ɛ nwo kɛ, ‘Kɛzi melɛfa fanwodi ɛhye meali gyima ɛ?’ Wɔ awieleɛ mekɛ ɛhye mɔɔ anwo hyia la anu, Gyihova ahyehyɛdeɛ ne ɛlɛyɛ edwɛkɛhanlɛ nee ngilehilelɛ gyima mɔɔ tɛla biala wɔ ewiade amuala. (Maake 13:10) Nwolɛ adenle dɔɔnwo ɛbuke ɛmaa Gyihova menli.

10. Duzu a 2 Timote 4:2 maa yɛ anwosesebɛ kɛ yɛyɛ a?

¹⁰ Kɛzi ɛbahola wɔava anzodwolɛ mekɛ wɔayɛ gyima ɛ? (Kenga 2 Timote 4:2.) Neɛnlea wɔ tɛnlabelɛ ne anu kɛ saa ɛdawɔ anzɛɛ wɔ abusua ne anu sonla bie bahola ayɛ dɔɔnwo wɔ edwɛkɛhanlɛ gyima ne anu na bɔbɔ yeazonle kɛ adekpakyelɛ a. Tɛ mekɛ ɛhye a ɔwɔ kɛ ɛkpondɛ agyapadeɛ nee nwonane afoa nu ninyɛne dɔɔnwo a​—ninyɛne mɔɔ yɛnrɛhola yɛnrɛva yɛnrɛpɛ anwongyelelɛ kpole ne la.​—Mrɛ. 11:4; Mat. 6:31-33; 1 Dwɔn 2:15-17.

11. Duzu a bie mɔ ɛyɛ amaa bɛahola bɛaha edwɛkɛ ne bɛahile menli dɔɔnwo a?

¹¹ Nolobɔlɛma dɔɔnwo ɛzukoa aneɛ fofolɛ amaa bɛahola bɛaha edwɛkɛ ne na bɛahilehile awie mɔ. Nyamenle ahyehyɛdeɛ ne boa bɛ, ɔluakɛ yeyɛ Baebolo nwo mbuluku dɔɔnwo wɔ aneɛ ngakyile anu. Kɛ neazo la, wɔ 2010, ɛnee bɛyɛ yɛ mbuluku ne mɔ wɔ aneɛ kɛyɛ 500 anu. Ɛnɛ, ɔbo 1,000!

12. Saa menli te Belemgbunlililɛ edwɛkɛ ne wɔ bɛ aneɛ nu a, kɛzi ɔka bɛ ɛ? Maa neazo.

¹² Saa menli te nɔhalɛ mɔɔ wɔ Nyamenle Edwɛkɛ ne anu la wɔ bɛ aneɛ nu a, kɛzi ɔka bɛ ɛ? Suzu adiema raalɛ bie mɔɔ nyianle  maanzinli nyianu bie mɔɔ bɛyɛle ye wɔ Memphis, Tennessee, U.S.A. azo nvasoɛ la anwubielɛ ne anwo. Bɛyɛle nyianu ne wɔ Kinyarwanda aneɛ nu. Bɛka ye wɔ Rwanda, Congo (Kinshasa) yɛɛ Uganda. Mɔɔ bɛwiele nyianu ne la, adiema raalɛ ne mɔɔ ka Kinyarwanda la hanle kɛ: “Ɛvolɛ 17 mɔɔ mendule membale United States ɛke la, ɛnɛ a le mekɛ mɔɔ limoa mɔɔ menyia sunsum nu gyimalilɛ mɔɔ bɛyɛ la azo nvasoɛ kpalɛ a.” Ɔda ali kɛ, gyimalilɛ ne mɔɔ adiema raalɛ ɛhye dele ye wɔ ye sua zo aneɛ nu la hanle ye ahonle kpalɛ. Saa wɔ tɛnlabelɛ ne maa adenle a, ɛbahola wɔazukoa aneɛ fofolɛ na wɔava wɔaboa wɔ azɛlɛsinli ne anu amra bie mɔ ɔ? Ɛhye bahola aboa kpalɛ, ɔluakɛ bie a, menli bie mɔ wɔ wɔ asafo ne azɛlɛsinli ne anu mɔɔ bɛlɛka aneɛ gyɛne a, bɛ nye die nwo a. Saa ɛbɔ mɔdenle a, ɔbamaa ɛ nye alie.

13. Kɛzi yɛ mediema mɔɔ bɛwɔ Russia la vale anzodwolɛ mekɛ lile gyima ɛ?

¹³ Tɛ yɛ mediema ne mɔ amuala a lɛ fanwodi ka edwɛkɛ ne wɔ bagua nu a. Ɔdwu mekɛ ne bie a, arane ne fa ɔ sa to yɛ ɛzonlenlɛ gyima ne azo, na ɔmaa ɔyɛ se kɛ yɛbawie yɛ gyima ne. Fa yɛ mediema mɔɔ wɔ Russia la kɛ neazo. Bɛkpɔle bɛ kpalɛ wɔ ɛvolɛ dɔɔnwo anu, noko wɔ March 1991, bɛliele bɛ bɛdole nu wɔ mɛla nu. Mekɛ zɔhane, ɛnee Belemgbunlililɛ nolobɔlɛma mɔɔ bɛwɔ Russia la le kɛyɛ 16,000. Wɔ ɛvolɛ abulanwiɔ anzi, bɛ dodo bole 160,000. Ɔda ali kɛ, yɛ mediema ne mɔ yɛle bɛ debie nrɛlɛbɛ nu, ɔluakɛ bɛvale nwolɛ adenle mɔɔ bɛnyianle la bɛhanle edwɛkɛ ne. Anzodwolɛ mekɛ zɔhane andɛnla ɛkɛ angyɛ. Noko bɛ tɛnlabelɛ ne mɔɔ ɛhakyi la ɛtɛmaanle bɛ mɔdenlebɔlɛ ɛtɛkanle aze. Bɛlɛkɔ zo bɛava nwolɛ adenle biala mɔɔ bɛlɛ la bɛazonle Gyihova.

14-15. Kɛzi Gyihova vale ye tumi ne boale Esa ɛ?

¹⁴ Wɔ Esa mekɛ zo, anzodwolɛ mekɛ ne rale awieleɛ. Sogyama mgbe ko mɔɔ bɛ nwo yɛ se la vi Yiteyopea rale bɛ nwo zo. Ɛnee Zilaa mɔɔ li bɛ ti la lɛ anwodozo kɛ bɛbali Dwudama anwo zo konim. Noko, Belemgbunli Esa anva ɔ nwo ando sogyama mɔɔ ɔlɛ bɛ la anwo zo, emomu ɔvale ɔ nwo ɔdole ye Nyamenle Gyihova ne anwo zo. Esa yɛle asɔne kɛ: “O Gyihova yɛ Nyamenle, boa yɛ, ɔluakɛ yɛva yɛ nwo yɛdo ɛ nwo zo, na yɛra menli dɔɔnwo ɛhye mɔ anwo zo wɔ wɔ duma nu.”​—2 Ek. 14:11.

¹⁵ Ɛnee Yiteyopea sogyama anwo zonle kpalɛ tɛla Yizilayɛ sogyama, noko Esa nwunle kɛ Gyihova bahola ava ye tumi ne alie Ye menli ne. Na Gyihova anye ɔ rɛle ando ɔ sa nu; ɔlile Yiteyopea sogyama anwo zo konim bɔkɔɔ.​—2 Ek. 14:8-13.

16. Kɛzi yɛkola yɛnwu kɛ anzodwolɛ mekɛ ne ɛnrɛdɛnla ɛkɛ ɛnrɛhyɛ ɛ?

¹⁶ Ɔnva nwo kɛ yɛnze mɔɔ bado yɛ nuhua ko biala kenle bie la, yɛze kɛ anzodwolɛ mɔɔ Nyamenle menli lɛ la ɛnrɛdɛnla ɛkɛ ɛnrɛhyɛ. Nɔhalɛ nu, Gyisɛse hanle dole ɛkɛ kɛ, “maanle maanle kɔsɔɔti bakpɔ” ye ɛdoavolɛma wɔ awieleɛ mekɛ ne anu. (Mat. 24:9) Ɛzoanvolɛ Pɔɔlo noko hanle kɛ, “bɛdabɛ mɔɔ bɛkulo kɛ bɛfa nyamenlezonlenlɛ kpalɛ bɛbɔ bɛ ɛbɛla kɛ Kelaese Gyisɛse ɛdoavolɛma la amuala, bɛbayɛ bɛdabɛ noko kpɔdekpɔde.” (2 Tim. 3:12) Seetan ɛva “ɛya kpole,” na saa yɛnyia adwenle kɛ ɔnrɛva ye ɛya ne ɔnrɛra yɛ nwo zo a, ɛnee yɛlɛbɛlɛbɛla yɛ nwo.​—Yek. 12:12.

17. Ndenle boni mɔ azo a bɛbahola bɛazɔ yɛ diedi bɛanlea a?

¹⁷ Ɔnrɛhyɛ, yɛ nuhua ko biala bayia ye nɔhalɛlilɛ nwo sɔnea. Ɔnrɛhyɛ, “anwongyelelɛ kpole mɔɔ sumunli kɛ ewiade bɔle ɔ bo badwu ɛnɛ bie ɛtɛsile ɛlɛ la bara.” (Mat. 24:21) Mekɛ zɔhane, bie a yɛ mbusuafoɔ bɛadwazo atia yɛ yɛɛ bie a bɛbava bɛ sa bɛado yɛ gyima ne azo. (Mat. 10:35, 36) Asoo yɛ nuhua ko biala banyia anwodozo kɛ Gyihova baboa ye na yeabɔ ɔ nwo bane kɛ mɔɔ Esa yɛle la ɔ?

18. Kɛ mɔɔ Hibuluma 10:38, 39 kile la, duzu a baboa yɛ yeamaa yɛaziezie yɛ nwo yɛamaa anzodwolɛ mekɛ ne awieleɛ a?

 ¹⁸ Gyihova ɛlɛsiezie yɛ wɔ sunsum nu yeamaa mɔɔ bazi kenle bie la. Ɔlɛkile “akɛlɛ nɔhavo nee badwema ne” adenle yeamaa bɛamaa yɛ sunsum nu “aleɛ wɔ mekɛ kpalɛ nu,” amaa yɛahola yɛagyinla kpundii wɔ yɛ ɛzonlenlɛ nu. (Mat. 24:45) Noko, ɔwɔ kɛ yɛyɛ yɛ afoa nu ɛdeɛ, amaa yɛanyia Gyihova anu diedi kpole.​—Kenga Hibuluma 10:38, 39.

19-20. Kɛ mɔɔ 1 Edwɛkɛsisilɛ 28:9 kile la, kpuya boni mɔ a ɔwɔ kɛ yɛbiza yɛ nwo a, na duzu ati ɔ?

¹⁹ Le kɛ Belemgbunli Esa la, ɔwɔ kɛ ‘yɛkpondɛ Gyihova.’ (2 Ek. 14:4; 15:1, 2) Saa yɛsukoa Gyihova anwo debie na yɛmaa bɛsɔne yɛ a, ɛnee ɔkile kɛ yɛbɔ ɔ bo yɛlɛkpondɛ ye. Akee yɛyɛ biala mɔɔ yɛbahola la yɛmaa ɛlɔlɛ mɔɔ yɛlɛ yɛmaa ye la anu mia. Amaa yɛanwu kɛzi yɛlɛbɔ mɔdenle wɔ ɛhye anwo la, yɛbahola yɛabiza yɛ nwo kɛ: ‘Asoo mekɔ debiezukoalɛ dahuu?’ Saa yɛkɔ ayia mɔɔ Gyihova ahyehyɛdeɛ ne ɛyɛ la a, yɛnyia sunsum nu aleɛ kpalɛ yɛɛ agɔnwolɛvalɛ mɔɔ maa anwosesebɛ la. (Mat. 11:28) Yɛbahola yɛabiza yɛ nwo kɛ: ‘Asoo mesukoa Baebolo ne dahuu?’ Saa ɛ nee wɔ abusua ne a de a, asoo bɛyɛ abusua ɛzonlenlɛ dapɛne biala? Anzɛɛ saa ɛ ngome a ɛde a, asoo ɛyɛ ɛ ti anwo debiezukoalɛ dahuu? Bieko, asoo ɛfa ɛ nwo ɛwula edwɛkɛhanlɛ nee ɛdoavolɛyɛlɛ gyima ne anu kpalɛ ɔ?

²⁰ Duzu ati a ɔwɔ kɛ yɛbiza kpuya ɛhye mɔ a? Baebolo ne ka kɛ, Gyihova neɛnlea yɛ ahonle nu na ɔnwu yɛ adwenle nzuzulɛ biala, na zɔhane a ɔwɔ kɛ yɛdayɛ noko yɛyɛ a. (Kenga 1 Edwɛkɛsisilɛ 28:9.) Saa yɛnwu kɛ ɔwɔ kɛ yɛyɛ nzenzaleɛ wɔ yɛ kpɔkɛzilɛ, yɛ subane nee kɛzi yɛdwenle la anu a, ɔwɔ kɛ yɛsɛlɛ Gyihova kɛ ɔboa yɛ ɔmaa yɛyɛ zɔ. Ɛnɛ a le mekɛ mɔɔ ɔwɔ kɛ yɛsiezie yɛ nwo yɛmaa sɔnea mɔɔ la yɛ nyunlu la a. Mmamaa debie biala si wɔ adenle kɛ ɛbava anzodwolɛ mekɛ wɔali gyima nrɛlɛbɛ nu!