ƐZINZALƐ ARANE—DEBIEZUKOALƐ ƐDEƐ September 2019
Edwɛkɛ mɔɔ yɛbazukoa wɔ October 28–December 1, 2019.
Gyihova Azonvolɛ Mɔɔ Bɛbɛlɛ Bɛ Nwo Aze La Sonle Bolɛ Maa Ye
Mɛlɛbɛnwoaze le subane ko mɔɔ anwo hyia kpalɛ mɔɔ ɔwɔ kɛ yɛnyia a. Kɛzi tɛnlabelɛ mɔɔ kakyi la kola sɔ yɛ mɛlɛbɛnwoaze nea ɛ?
Amagɛdɔn Le Edwɛkɛ Kpalɛ!
Edwɛkɛ boni mɔ a basisi kolaa na Amagɛdɔn abɔ ɔ bo a? Kɛ ɔkɛyɛ na yɛahɔ zo yɛali nɔhalɛ wɔ mekɛ mɔɔ awieleɛ ne ɛlɛbikye la ɛ?
Bɛlɛ Ɛ Nwo Aze Fea Gyihova Abo—Duzu Ati Yɛɛ Kɛzi Ɛbayɛ Ye Ɛ?
Asafo nu mgbanyima, selɛma yɛɛ ninlima bahola azukoa kɛzi Nihɛmaya, Belemgbunli Devidi yɛɛ Gyisɛse mame Mɛle bɛlɛle bɛ nwo aze veale Gyihova abo la.
“Bɛrɛla Me Nwo Ɛke, Na Mebamaa Bɛalie Bɛ Menle”
Kɛ ɔkɛyɛ na yɛalie Gyisɛse ɛsalɛdolɛ ne azo ɛ? Yɛ nwo badɔ yɛ wɔ Gyisɛse gyɛnvayile ne abo saa yɛyɛ ninyɛne nsa bie a.
“Nea! Menli Ekpunli Kpole Bie”
Dwɔn yekile ne mɔɔ le ngapezo la maa yɛnwu ekpunli kpole ne nee kɛzi ye kpole de la, yɛɛ yɛnwu kɛ “ekpunli kpole” mɔɔ nuhua menli vi ɛleka ngakyile la bapɛ anwongyelelɛ kpole ne na badɛnla aze dahuu wɔ azɛlɛ ye azo.
