1-2. Duzu ati a yɛbahola yɛade nganeɛ kɛ Gyihova ɛmbua yɛ asɔneyɛlɛ a?

 “MAA ɛ nye ɛlie Gyihova anwo kpalɛ, na ɔbamaa wɔanyia mɔɔ wɔ ahonle kulo la.” (Edw. 37:4) Ɛwɔkɛ ɛhye yɛ anyelielɛ kpalɛ! Noko asoo ɔwɔ kɛ yɛmaa yɛ nye da kɛ Gyihova bava debie biala mɔɔ yɛbabiza ye la yeamaa yɛ ɛkɛ ne ala ɔ? Duzu ati a kpuya ɛhye anwo hyia a? Suzu neazo ɛhye mɔ anwo. Adiema bɛlɛra bie mɔɔ ɔtɛgyale la yɛle asɔne kɛ bɛvɛlɛ ye bɛmaa ɔhɔ Belemgbunlililɛ Edwɛkpakavolɛma Sukulu ne bie. Ɛvolɛ dɔɔnwo ɛpɛ nu noko bɛtɛfɛlɛle ye. Adiema kpavolɛ bie zɛlɛle Gyihova kɛ ɔyɛ ewule kpole bie mɔɔ ɛlɛgyegye ye la ayile ɔmaa ye amaa yeahola yeayɛ dɔɔnwo wɔ asafo ne anu. Noko ye ewule ne angɔ. Awovolɛ bie yɛle asɔne kɛ bɛ ra ne badɛnla nɔhalɛ ne anu. Noko bɛ ra ne zile kpɔkɛ kɛ ɔnrɛzonle Gyihova.

² Bie a ɛdawɔ noko wɔzɛlɛ debie wɔvi Gyihova ɛkɛ, noko ɛ sa ɛtɛkanle ye. Ɛhye ati, bie a ɛbaha kɛ Gyihova bua menli bie mɔ asɔneyɛlɛ noko ɔmbua wɔ ɛdeɛ ne. Anzɛɛ wɔannea a ɛbadwenle kɛ wɔyɛ ɛtane bie. Zɔhane a adiema raalɛ bie mɔɔ bɛfɛlɛ ye Janice b la dele nganeɛ a. Ɛnee ɔ nee ɔ hu lɛ ɛhulolɛ kpole kɛ bɛbayɛ gyima wɔ Bɛtɛle, ɔti bɛyɛle nwolɛ asɔne. Ɔhanle kɛ: “Ɛnee medie medi bɔkɔɔ kɛ ɔnrɛhyɛ na bɛavɛlɛ yɛ.” Ɛvolɛ dɔɔnwo pɛle nu noko bɛanvɛlɛ bɛ. Janice hanle kɛ: “Me rɛle bɔle yɛɛ me adwenle dule fonyianle. Ɛnee mennwu debie mɔɔ meyɛ mɔɔ ɔti Gyihova anye ɛnlie me nwo a. Ɛnee meyɛ Bɛtɛle ɛhɔlɛ ne anwo asɔne fane dɔɔnwo. Duzu ati a yeambua me asɔneyɛlɛ ne a?”

3. Duzu a yɛbazuzu nwo wɔ edwɛkɛ ɛhye anu a?

 ³ Ɔdwu mekɛ ne bie a yɛngola yɛnnwu ye saa Gyihova tie yɛ asɔneyɛlɛ o. Nɔhavoma mɔɔ dɛnlanle aze wɔ tete ne la bie mɔ bɔbɔ nyianle zɔhane adwenle ne bie. (Dwobu 30:20; Edw. 22:2; Hab. 1:2) Duzu a bahola amaa wɔanyia anwodozo kɛ Gyihova badie wɔ asɔneyɛlɛ a? (Edw. 65:2) Amaa yɛahola yɛabua zɔhane kpuya ne la, ɔhyia kɛ yɛdimoa yɛbua kpuya ɛhye mɔ: (1) Duzu a Gyihova bayɛ a? (2) Duzu a Gyihova kulo kɛ yɛyɛ a? (3) Duzu ati a bie a ɔbahyia kɛ yɛyɛ debie gyɛne anwo asɔne a?

4. Kɛ mɔɔ Gyɛlɛmaya 29:12 kile la, duzu a Gyihova ɛbɔ ɛwɔkɛ kɛ ɔbayɛ a?

⁴ Gyihova ɛbɔ ɛwɔkɛ kɛ ɔbadie yɛ asɔneyɛlɛ. (Kenga Gyɛlɛmaya 29:12.) Yɛ Nyamenle ne kulo ye azonvolɛ nɔhavoma ɔti dahuu ɔbadie bɛ asɔneyɛlɛ. (Edw. 10:17; 37:28) Noko ɛhye ɛngile kɛ ɔbayɛ debie biala mɔɔ yɛbabiza ye la yeamaa yɛ. Bie a ɔwɔ kɛ yɛkendɛ too yɛkɔdwu ewiade fofolɛ ne anu kolaa na yɛanyia ninyɛne mɔɔ yɛbiza la bie mɔ.

5. Saa Gyihova ɛlɛtie yɛ asɔneyɛlɛ a, duzu a ɔsuzu nwo a? Kilehile nu.

⁵ Gyihova suzu kɛzi deɛ ne mɔɔ yɛlɛbiza la fale ye bodane ne amuala anwo la anwo. (Aye. 55:​8, 9) Ye bodane ne bie a le kɛ menli mɔɔ bɛ nye die la bayi azɛlɛ ne na bɛadɛnla koyɛlɛ nu wɔ ye tumililɛ bo. Noko Seetan hanle kɛ saa alesama mumua ne nea bɛ nwo zo a, ɔbawie bɛ boɛ. (Gyn. 3:​1-5) Amaa yeala ali kɛ Abɔnsam le adalɛ la, Gyihova ɛmaa alesama adenle kɛ bɛnlea bɛ nwo zo. Noko sonla tumililɛ a ɛva ngyegyelɛ mɔɔ yɛyia ye ɛnɛ la anu dɔɔnwo ɛra a. (Nol. 8:9) Yɛte ɔ bo kɛ Gyihova ɛnrɛye ngyegyelɛ ɛhye mɔ amuala ɛnrɛvi ɛkɛ ne kɛkala. Saa ɔyɛ ye zɔhane a, menli bie mɔ banyia adwenle kɛ alesama kola nea bɛ nwo zo kpalɛ, na bɛlɛdi yɛ ngyegyelɛ nwo gyima bɛamaa yɛ.

6. Duzu ati a ɔwɔ kɛ yɛdie yɛdi kɛ dahuu Gyihova bayɛ ninyɛne mɔɔ kile ɛlɔlɛ la yɛɛ ɔnrɛli mɔguazo a?

⁶ Bie a Gyihova babua yɛ asɔneyɛlɛ bie mɔ wɔ adenle ngakyile zo. Kɛ neazo la, mɔɔ Belemgbunli Hɛzikaya anwo dole ye kpole bie la, ɔzɛlɛle Gyihova kɛ ɔboa ye ɔmaa ɔde kpɔkɛ. Gyihova diele ye na ɔmaanle ɔdele kpɔkɛ. (2 Arl. 20:​1-6) Noko mɔɔ ɛzoanvolɛ Pɔɔlo zɛlɛle Gyihova kɛ ɔye ‘debie mɔɔ le kɛ bowule mɔɔ ɔwɔ ɔ nwonane nu,’ ɔbayɛ kɛ anwodolɛ bie, ɔvi ɛkɛ la, Gyihova anyɛ. (2 Kɔl. 12:​7-9) Eza suzu ɛzoanvolɛma, Gyemise nee Pita neazo ne anwo. Ɛnee Belemgbunli Hɛlɔdo kulo kɛ ɔku bɛ mu nwiɔ. Asafo ne yɛle asɔne maanle Pita, yɛɛ ɔbayɛ kɛ bɛyɛle bie bɛmaanle Gyemise noko. Noko bɛhunle Gyemise na bɛliele Pita wɔ nwanwane adenle zo. (Gyi. 12:​1-11) Bie a ɛbabiza kɛ, ‘Duzu ati a Gyihova liele Pita na yeanlie Gyemise a?’ Baebolo ne anga. c Mɔɔ yɛze ye bɔkɔɔ la a le kɛ Gyihova ɛnli “mɔguazo.” (Dit. 32:4) Yɛze noko kɛ ɛnee Gyihova kulo Pita nee Gyemise. (Yek. 21:14) Ɔyɛ a Gyihova ɛmbua yɛ asɔneyɛlɛ ne mɔ kɛ mɔɔ yɛ nye la la. Noko kɛmɔ yɛze kɛ dahuu Gyihova yɛ ninyɛne mɔɔ kile ɛlɔlɛ yɛɛ ɔnli mɔguazo la ati, saa ɔbua yɛ asɔneyɛlɛ wɔ adenle bie azo a, yɛndendɛ nwolɛ.—Dwobu 33:13.

7. Duzu a yɛbɔ mɔdenle kɛ yɛnrɛyɛ a, na duzu ati ɔ?

⁷ Ɔwɔ kɛ yɛbɔ mɔdenle kɛ yɛnrɛva yɛ tɛnlabelɛ ne yɛnrɛtoto awie mɔ ɛdeɛ nwo. Kɛ neazo la, bie a yɛbazɛlɛ Gyihova kɛ ɔboa yɛ wɔ adenle fɔɔnwo bie azo, noko yɛ sa ɛnga mɔɔ yɛyɛ nwolɛ asɔne la. Nzinlii, yɛdele kɛ awie noko ɛyɛ deɛ ko ne ala anwo asɔne, na ɔzɔho kɛ Gyihova ɛbua ye ɛdeɛ ne. Adiema raalɛ Anna nyianle anwubielɛ ɛhye bie. Ɔyɛle  asɔne kɛ ɔ hu Matthew mɔɔ ɛnyia kansa la ɛde kpɔkɛ. Wɔ mekɛ ko ne ala, Kilisiene mraalɛ nwiɔ mɔɔ ɛnee bɛyɛ mgbanyinli la noko nyianle kansa. Anna yɛle asɔne ɛsesebɛ maanle Matthew nee mraalɛ nwiɔ ne. Mraalɛ nwiɔ ne dele kpɔkɛ, noko Matthew wule. Mɔlebɛbo ne, ɛnee Anna ɛngola ɛnnwu ye saa Gyihova a boale bɛ ɔmaanle bɛdele kpɔkɛ o. Na saa Gyihova a boale bɛ a, duzu ati a yeambua asɔne mɔɔ ɔyɛle kɛ ɔmaa ɔ hu ɛde kpɔkɛ la ɛ? Nɔhalɛ nu, yɛnrɛhola yɛnrɛha debie mɔɔ ɔmaanle bɛdele kpɔkɛ la. Mɔɔ yɛze la a le kɛ Gyihova lɛ yɛ ngyegyelɛ kɔsɔɔti sɔbelɛ, na ɔ nye la ye ɛsesebɛ kɛ ɔbadwazo ɔ gɔnwo mɔ mɔɔ bɛwu la.—Dwobu 14:15.

8. (a) Kɛ mɔɔ Ayezaya 43:2 kile la, kɛzi Gyihova boa yɛ ɛ? (b) Saa yɛlɛyia ngyegyelɛ a, kɛzi asɔneyɛlɛ bahola aboa yɛ ɛ? (Nea vidio, Asɔneyɛlɛ Boa Maa Yɛgyinla Ɔ Nloa.)

⁸ Gyihova baboa yɛ dahuu. Yɛ ɛlɔlɛ Selɛ Gyihova ɛngulo kɛ ɔbanwu kɛ yɛlɛnwu amaneɛ. (Aye. 63:9) Noko ɔnzi yɛ sɔnea ne mɔ kɔsɔɔti mɔɔ le kɛ azule nee sendɔlɔra la adenle. (Kenga Ayezaya 43:2.) Emomu, yebɔ ɛwɔkɛ kɛ ɔbaboa yɛ yeamaa ‘yɛalua nu.’ Na ɔnrɛmaa yɛ sɔnea ne mɔ ɛnrɛbo yɛ nwo zo. Eza Gyihova fa ye sunsum nwuanzanwuanza ne boa yɛ ɔmaa yɛgyinla yɛ sɔnea ne mɔ anloa. (Luku 11:13; Fel. 4:13) Ɛhye ati, yɛbahola yɛanyia anwodozo kɛ dahuu yɛ sa baha mɔɔ yɛhyia nwo amaa yɛagyinla kpundii na yɛahɔ zo yɛali nɔhalɛ yɛamaa ye la. d

9. Kɛ mɔɔ Gyemise 1:​6, 7 kile la, duzu ati a ɔwɔ kɛ yɛnyia Gyihova anu anwodozo kɛ ɔbaboa yɛ a?

⁹ Gyihova kulo kɛ yɛnyia ye nu anwodozo. (Hib. 11:6) Ɔyɛ a ɔbayɛ kɛ yɛ sɔnea ne mɔ bo yɛ nwo zo. Wɔannea a yɛ adwenle nu bayɛ yɛ kesee kɛ saa Gyihova baboa yɛ a. Noko Baebolo ne maa yɛnyia anwodozo kɛ Nyamenle bava ye tumi ne aboa yɛ yeamaa ‘yɛahola yɛawulu bane.’ (Edw. 18:29) Ɔti kɛ anrɛɛ yɛbamaa yɛ adwenle nu ayɛ yɛ kesee la, ɔwɔ kɛ yɛfa diedi kpole yɛyɛ asɔne na yɛnyia anwodozo kɛ Gyihova babua yɛ asɔneyɛlɛ.—Kenga Gyemise 1:​6, 7.

10. Maa kɛzi yɛbahola yɛayɛ yɛ asɔneyɛlɛ ne anwo gyima la anwo neazo.

¹⁰ Gyihova kulo kɛ yɛyɛ yɛ asɔneyɛlɛ ne anwo gyima. Kɛ neazo la, adiema nrenyia bie bahola azɛlɛ Gyihova kɛ ɔboa ye ɔmaa ɔnyia adenle wɔ gyima nu amaa yeahola yeahɔ maanzinli nyianu ne bie. Kɛzi Gyihova bahola abua zɔhane asɔneyɛlɛ ne ɛ? Bie a ɔbamaa adiema nrenyia ne akɛnrasesebɛ mɔɔ ɔhyia nwo la amaa yeahola yeaha yeahile ye gyimamenle ne. Noko ɔwɔ kɛ adiema ne kɔ ye gyimamenle ne ɛkɛ kɔsɛlɛ ye adenle. Bie a ɔwɔ kɛ adiema ne kɔ ɛkɛ fane dɔɔnwo kɔsɛlɛ adenle. Ɔbahola yeayɛ ngyehyɛleɛ yeamaa gyimayɛvo bie ava ɔ bo zo ne na ɔdaye noko yeahɔva ahenle ne abo zo ne. Yɛɛ saa nwolɛ bahyia a, ɔbahola yeaha kɛ bɛde mekɛ zɔhane mɔɔ ɔnrɛva ɔnrɛyɛ gyima la anwo ezukoa bɛvi ye ahatualɛ ne anu.

11. Duzu ati a ɔwɔ kɛ yɛyɛ yɛ ngyegyelɛ ne mɔ anwo asɔne fane dɔɔnwo a?

¹¹ Gyihova kulo kɛ yɛyɛ yɛ ngyegyelɛ ne mɔ anwo asɔne fane dɔɔnwo. (1 Tɛs. 5:17) Wɔ Gyisɛse edwɛkɛ ne anu, ɛnee ɔlɛkile kɛ Gyihova ɛnrɛli ninyɛne bie mɔ mɔɔ yɛbabiza la anwo gyima ɛnrɛmaa yɛ ɛkɛ ne ala. (Luku 11:9) Ɔti mmamaa ɛ sa nu to! Fi wɔ ahonle nu yɛ asɔne fane dɔɔnwo. (Luku 18:​1-7) Saa yɛkɔ zo yɛyɛ debie bie anwo asɔne a, ɛnee yɛlɛmaa Gyihova anwu kɛ deɛ ne anwo hyia yɛ. Eza yɛda ye ali kɛ yɛlɛ diedi kɛ ɔbaboa yɛ.

12. (a) Kpuya ko mɔɔ ɔwɔ kɛ yɛbiza yɛ nwo wɔ mekɛ mɔɔ yɛlɛsɛlɛ debie la a le boni, na duzu ati ɔ? (b) Kɛ ɔkɛyɛ na yɛanwu kɛ yɛ asɔneyɛlɛ kile kɛ yɛbu Gyihova ɛ? (Nea ɛlɛka, “ Asoo Mɔɔ Mebiza La Kile Kɛ Mebu Gyihova?”)

¹² Saa yɛyɛ debie bie anwo asɔne na yɛ sa anga ye a, yɛbahola yɛabiza yɛ nwo kpuya nsa ɛhye mɔ. Mɔɔ limoa la a le kɛ, ‘Mɔɔ melɛyɛ nwolɛ asɔne la fɛta ɔ?’ Fane dɔɔnwo ne ala, yɛte nganeɛ kɛ yɛze mɔɔ le kpalɛ maa yɛ la. Noko bie a ninyɛne mɔɔ yɛbiza la ɛnrɛboa yɛ. Saa yɛlɛyɛ ngyegyelɛ bie anwo asɔne a, bie a nwolɛ sɔbelɛ kpalɛ wɔ ɛkɛ tɛla mɔɔ yɛdayɛ yɛlɛbiza la. Yɛɛ ɔbahola yeara ye kɛ ninyɛne mɔɔ yɛlɛbiza la nee Gyihova ɛhulolɛdeɛ ɛnyia. (1 Dwɔn 5:14) Kɛ neazo la, suzu awovolɛ ne mɔ mɔɔ yɛhanle bɛ nwo edwɛkɛ la anwo. Bɛzɛlɛle Gyihova kɛ ɔboa bɛ ra ne ɔmaa ɔdɛnla nɔhalɛ ne anu. Ɔzɔho kɛ ɛhye le debie mɔɔ anwo hyia. Noko Gyihova ɛnrɛtinlitinli yɛ nuhua biala anwo zo kɛ ɔzonle ye. Ɔkulo kɛ yɛ muala mɔɔ yɛ mra ne mɔ boka nwo la kpa kɛ yɛbazonle ye. (Dit. 10:​12, 13; 30:​19, 20) Ɔti awovolɛ ne bahola azɛlɛ Gyihova kɛ ɔboa bɛ ɔmaa bɛ edwɛkɛ ɛha bɛ ra ne ahonle amaa yeahulo Gyihova na yeayɛ ɔ gɔnwo.—Mrɛ. 22:6; Ɛfɛ. 6:4.

13. Kɛ mɔɔ Hibuluma 4:16 kile la, mekɛ boni a Gyihova baboa yɛ a? Kilehile nu.

¹³ Kpuya mɔɔ tɔ zo nwiɔ la a le kɛ, ‘Asoo ɔle Gyihova mekɛ kɛ ɔbayɛ mɔɔ mebiza la ɔ?’ Bie a yɛbade nganeɛ kɛ ɔhyia kɛ Gyihova bua yɛ asɔneyɛlɛ ne mɔ ndɛndɛ. Noko nɔhalɛ ne a le kɛ, Gyihova a ze mekɛ kpalɛ mɔɔ ɔbaboa yɛ a. (Kenga Hibuluma 4:16.) Saa yɛ sa anga mɔɔ yɛbabiza la ɛkɛ ne ala a, bie a yɛbanyia adwenle kɛ mɔɔ Gyihova ɛlɛka la a le kɛ ‘Menrɛyɛ.’ Noko bie a ye mualɛ ne a le kɛ ‘Mekɛ ɛtɛdwule.’ Kɛ neazo la, suzu adiema kpavolɛ ne mɔɔ yɛle asɔne kɛ Gyihova ɛyɛ ye ewule ne ayile  la anwo bieko. Saa Gyihova luale nwanwane adenle zo yɛle ye ayile a, anrɛɛ Seetan baha kɛ kɛmɔ Gyihova yɛle adiema kpavolɛ ne ayile la ati a ɔtɛsonle Gyihova a. (Dwobu 1:​9-11; 2:4) Eza Gyihova ɛlimoa ɛkpa mekɛ mɔɔ ɔbayɛ anwodolɛ kɔsɔɔti ayile la. (Aye. 33:24; Yek. 21:​3, 4) Na kɔkpula kɛ mekɛ zɔhane kɛdwu la, ɔnle kɛ yɛmaa yɛ nye da kɛ bɛbalua nwanwane adenle zo bɛayɛ yɛ ayile. Ɔti adiema kpavolɛ ne bahola azɛlɛ Gyihova kɛ ɔmaa ye anwosesebɛ nee anzodwolɛ ɔmaa ɔgyinla ye anwodolɛ ne anloa na ɔhɔ zo ɔzonle ye nɔhalɛ nu.—Edw. 29:11.

14. Duzu a ɛsukoa ɛfi Janice anwubielɛ ne anu a?

¹⁴ Kakye Janice mɔɔ ɔyɛle asɔne kɛ ɔbanyia nwolɛ adenle yeahɔzonle wɔ Bɛtɛle la neazo ne anwo. Ɛvolɛ nnu pɛle nu kolaa na yeanwu kɛzi Gyihova buale ye asɔneyɛlɛ ne la. Ɔhanle kɛ: “Gyihova vale mekɛ zɔhane hilehilele me na ɔmaanle menyianle Kilisiene subane ngɛnlɛma. Ɛnee ɔhyia kɛ menyia ye nu anwodozo kpole. Eza ɛnee ɔwɔ kɛ menyia anyuhɔlɛ la wɔ me ti anwo debiezukoalɛ nu. Yɛɛ ɛnee ɔhyia kɛ menyia anyelielɛ mɔɔ vi ahonle nu, mɔɔ yemɔ ɛngyi tɛnlabelɛ mɔɔ mewɔ nu la azo la.” Nzinlii, bɛmaanle Janice nee ɔ hu hɔyɛle maangyebakyi zo neavolɛ gyima ne bie. Saa Janice nea mɔɔ ɛzi la, ɔka kɛ: “Gyihova buale me asɔneyɛlɛ ne mɔ, noko yeambua ye kɛ mɔɔ ɛnee me nye la ye la. Ɔliele mekɛ ekyii na meanwu kɛzi mualɛ mɔɔ Gyihova vale maanle me la le kɛnlɛma la, noko ɔyɛ me fɛ kɛ menyia nwolɛ adenle menwu ye ɛlɔlɛ nee ye atiakunlukɛnlɛmayɛlɛ ne la.”

15. Duzu ati a ɔyɛ a ɔnle kɛ yɛyɛ ninyɛne fɔɔnwo bie mɔ anwo asɔne a? (Eza nea nvoninli ne.)

¹⁵ Kpuya mɔɔ tɔ zo nsa la a le kɛ, ‘Asoo ɔwɔ kɛ meyɛ debie gyɛne nwo asɔne ɔ?’ Ɔle kpalɛ kɛ yɛbayɛ debie fɔɔnwo bie anwo asɔne ɛdeɛ, noko ɔyɛ a ɔwɔ kɛ yɛbuke yɛ asɔneyɛlɛ nu  amaa yɛanwu mɔɔ Gyihova kulo kɛ yɛyɛ la. Suzu adiema raalɛ bie mɔɔ ɔtɛgyale mɔɔ ɔyɛle asɔne kɛ ɔbahɔ Belemgbunlililɛ Edwɛkpakavolɛma Sukulu ne bie la neazo ne anwo. Ɔkulo kɛ ɔkɔ sukulu ne bie amaa yeahɔzonle wɔ ɛleka mɔɔ bɛhyia moalɛ kpole la. Ɔti mekɛ mɔɔ ɔlɛkɔ zo yeayɛ asɔne kɛ bɛbavɛlɛ ye kɛ ɔrɛla sukulu ne bie la, eza ɔbahola yeazɛlɛ Gyihova kɛ ɔboa ye ɔmaa ɔnwu ndenle mɔɔ ɔbalua zo yeadɛlɛ ye ɛzonlenlɛ gyima ne anu la. (Gyi. 16:​9, 10) Akee ɔbahola yeayɛ ye asɔneyɛlɛ ne anwo debie; ɔbahola yeabiza ye maangyebakyi zo neavolɛ ne kɛ saa asafo mɔɔ bikye bɛ la bie hyia adekpakyelɛma dɔɔnwo a. Anzɛɛ ɔbahola yeahɛlɛ Bɛtɛle yeabiza ɛleka mɔɔ bɛhyia Belemgbunlililɛ nolobɔlɛma dɔɔnwo la. e

16. Anwodozo boni a yɛbahola yɛanyia a?

¹⁶ Kɛ mɔɔ yɛnwu ye la, yɛbahola yɛanyia anwodozo kɛ Gyihova babua yɛ asɔneyɛlɛ ne mɔ wɔ ɛlɔlɛ nu nee adenle kpalɛ zo. (Edw. 4:3; Aye. 30:18) Ɔdwu mekɛ ne bie a yɛnrɛnyia mualɛ mɔɔ yɛ nye la la. Noko Gyihova ɛnrɛbu ɔ nye ɛnrɛgua yɛ asɔneyɛlɛ ne mɔ azo ɛlɛ. Ɔkulo yɛ kpole kpalɛ. Na ɔnrɛkpo yɛ ɛlɛ. (Edw. 9:10) Ɔti kɔ zo fa ɛ ‘nwo to ɔ nwo zo dahuu’ na ka wɔ ahonle nu edwɛkɛ kile ye wɔ asɔneyɛlɛ nu.—Edw. 62:8.