1-2. (a) Kɛzi tɛnlabelɛ mɔɔ yɛwɔ nu ɛnɛ la le kɛ Dwuuma mɔɔ ziale hɔle Gyɛlusalɛm la ɛdeɛ ne ɛ? (b) Ka ngyegyelɛ mɔɔ Dwuuma yiale la anwo edwɛkɛ sikalɛ. (Nea ɛlɛka, “ Hagae, Zɛkalaya Nee Ɛzela Mekɛ Zo.”)

 ƆYƐ a ɛdwenle mɔɔ ɔbazi kenle bie la anwo ɔ? Bie a wɔ gyima ɛvi ɛ sa na kɛzi ɛbanlea wɔ abusua ne la anwo adwenleadwenle ɛdɔ ɛ nwo. Bie noko a ɔlua maanyɛlɛ ngyehyɛleɛ mɔɔ ɛnle kpalɛ, kpɔdekpɔdeyɛlɛ anzɛɛ dwazotia mɔɔ yɛyia wɔ yɛ edwɛkɛhanlɛ gyima ne anu la ati, ɛdwenle kɛzi ɛbabɔ wɔ abusua ne anwo bane la anwo. Ɛlɛyia ngyegyelɛ ɛhye mɔ bie ɔ? Ɛlɛyia bie a, saa ɛsuzu kɛzi Gyihova boale tete Yizilayɛma wɔ mekɛ mɔɔ bɛlɛyia ngyegyelɛ zɔhane ala bie la anwo a, ɔbaboa wɔ.

² Ɛnee Dwuuma mɔɔ ɛdɛnla Babelɔn bɛ ngoane mekɛ kɔsɔɔti la hyia diedi amaa bɛagyakyi asetɛnla kpalɛ mɔɔ bɛlɛ wɔ Babelɔn la na bɛapɛ adenle bɛahɔ maanle mɔɔ bɛ nuhua dɔɔnwo ɛnze nwolɛ edwɛkɛ dɔɔnwo la anu. Bɛhɔdwule la, yeangyɛ biala yɛɛ bɛyiale ezukoa nee maanyɛlɛ nwo ngyegyelɛ yɛɛ dwazotia a. Ɛnee ɔyɛ se ɔmaa bie mɔ kɛ bɛbava bɛ adwenle bɛazie Gyihova ɛzonlenlɛsua ne mɔɔ bɛsi ye bieko la azo. Ɔti wɔ ɛvolɛ 520 K.Y.M. anu, Gyihova hanle hilele ngapezoma nwiɔ, Hagae nee Zɛkalaya kɛ bɛhɔmaa menli ne anwosesebɛ bɛmaa bɛdoa gyima ne azo. (Hagae 1:1; Zɛk. 1:1) Kɛ mɔɔ yɛbanwu ye la, anwosesebɛmaanlɛ mɔɔ ngapezoma ɛhye mɔ vale maanle bɛ la boale kpalɛ. Noko asɛɛ ɛvolɛ 50 anzi, Dwuuma ɛhye mɔ mɔɔ ziale hɔle la asa nu dole bieko. Akee Ɛzela mɔɔ ɛbe wɔ Mɛla ne ɛhɛlɛlɛ nu la vi Babelɔn rale Gyɛlusalɛm kɛ ɔmaa Nyamenle menli ne anwosesebɛ yeamaa bɛava nɔhalɛ ɛzonlenlɛ bɛalimoa bɛ ɛbɛlabɔlɛ nu.—Ɛzela 7:​1, 6.

3. Kpuya boni mɔ a yɛbazuzu nwo a? (Mrɛlɛbulɛ 22:19)

 ³ Kɛ mɔɔ Hagae nee Zɛkalaya ngapezo ne mɔ boale Nyamenle menli wɔ tete ne ɔmaanle bɛhɔle zo bɛvale bɛ nwo bɛdole Gyihova anwo zo wɔ dwazotia mekɛ nu la, zɔhane ala a ɔbaboa yɛdayɛ noko yeamaa yɛahɔ zo yɛanyia anwodozo kɛ Gyihova baboa yɛ wɔ anwongyelelɛ mekɛ nu a. (Kenga Mrɛlɛbulɛ 22:19.) Saa yɛsuzu edwɛkɛ mɔɔ Nyamenle vale zoanle Hagae nee Zɛkalaya la yɛɛ Ɛzela neazo ne anwo a, ɔbaboa yɛ yeamaa yɛabua kpuya ɛhye mɔ: Kɛzi ngyegyelɛ ɛhye mɔ hanle Dwuuma mɔɔ ziale la ɛbɛlabɔlɛ ɛ? Duzu ati a ɔwɔ kɛ yɛkɔ zo yɛfa Nyamenle ɛhulolɛdeɛ yɛdimoa yɛ ɛbɛlabɔlɛ nu wɔ anwongyelelɛ mekɛ nu a? Kɛ ɔkɛyɛ na yɛanyia anwodozo kpole wɔ Gyihova anu wɔ anwongyelelɛ mekɛ nu ɛ?

4-5. Duzu a ɔbayɛ kɛ ɔmaanle anyelielɛ mɔɔ ɛnee Dwuuma ne ɛlɛfa azi ɛzonlenlɛsua ne la minlinle a?

⁴ Mɔɔ Dwuuma ne vi Babelɔn radwule Gyɛlusalɛm la, ɛnee bɛlɛ gyima dɔɔnwo bɛyɛ. Ndɛndɛ ne ala, bɛzile Gyihova afɔlemokyea ne bieko na bɛwulale ɛzonlenlɛsua ne adiabo. (Ɛzela 3:​1-3, 10) Noko anyelielɛ mɔɔ ɛnee bɛlɛfa bɛayɛ gyima ne la andɛnla ɛkɛ ne angyɛ. Duzu ati ɔ? Saa ɛye ɛzonlenlɛsua ne mɔɔ bɛlɛsi la ɛsie ahane a, ɛnee ɔwɔ kɛ bɛsisi bɛdabɛ mumua ne bɛ azua, bɛyɛ ɛya na bɛnea bɛ mbusua. (Ɛzela 2:​68, 70) Eza bɛ agbɔvolɛ mɔɔ bɔle adwenle kɛ bɛmaa bɛagyakyi ɛzonlenlɛsua ne ɛzilɛ la dwazole tiale bɛ.—Ɛzela 4:​1-5.

⁵ Eza Dwuuma mɔɔ vi akɛlɛzonlenlɛ nu ziale la yiale ezukoa nee maanyɛlɛ nwo ngyegyelɛ. Kɛkala bɛwɔ Pɛhyea Tumililɛ ne abo. Mɔɔ Pɛhyea Belemgbunli Saelɛse wule wɔ ɛvolɛ 530 K.Y.M. la, Cambyses mɔɔ lile ye agya la boɔboale sogyama anloa kɛ ɔkateta Yigyibitima. Mɔɔ ɔlua adenle zo ɔlɛkɔ Yigyibiti la, ɔbayɛ kɛ ye sogyama ne hanle kɛ Yizilayɛma ɛmaa bɛ aleɛ, nzule yɛɛ dabelɛ, na yemɔ maanle Yizilayɛma anwongyelelɛ ne akee yɛle kpole. Mɔɔ Dalayɛse I mɔɔ lile Cambyses agya la bɔle ɔ bo kɛ ɔdi tumi la, ɛnee akee atuadelɛ nee basabasayɛlɛ ɛbu zo. Kɛ ɔde ye biala la, tɛnlabelɛ ɛhye mɔ maanle Dwuuma mɔɔ ziale rale la anu dɔɔnwo dwenledwenlenle kɛzi bɛbanlea bɛ mbusua la anwo. Ɔlua anwongyelelɛ ɛhye mɔ amuala ati, ɛnee Dwuuma bie mɔ suzu kɛ ɔnle mekɛ kpalɛ mɔɔ ɔwɔ kɛ bɛsi Gyihova ɛzonlenlɛsua ne bieko a.—Hagae 1:2.

6. Ngyegyelɛ bieko boni a Dwuuma yiale a, na kɛ mɔɔ Zɛkalaya 4:​6, 7 kile la, anwodozo boni a Zɛkalaya maanle bɛnyianle a?

⁶ Kenga Zɛkalaya 4:​6, 7. Tɛ ezukoa nee maanyɛlɛ nwo ngyegyelɛ ala a Dwuuma ne yiale a, eza bɛyiale kpɔdekpɔdeyɛlɛ. Wɔ ɛvolɛ 522 K.Y.M., bɛ agbɔvolɛ holale maanle bɛvale bɛ sa bɛdole Gyihova ɛzonlenlɛsua ne mɔɔ bɛlɛsi la azo. Noko Zɛkalaya maanle Dwuuma nyianle anwodozo kɛ Gyihova bava Ye sunsum ne mɔɔ tumi wɔ nu la aye debie biala mɔɔ ɔbazi bɛ adenle la avi ɛkɛ. Wɔ ɛvolɛ 520 K.Y.M., Belemgbunli Dalayɛse yele bɛ sa mɔɔ bɛvale bɛdole ɛzonlenlɛsua ne ɛzilɛ zo la na ɔmaanle Dwuuma ne ezukoa bɔbɔ mɔɔ bɛbava bɛazi sua ne la. Eza ɔhanle kɛ arane nu mgbanyima mɔɔ wɔ bɛ ɛkɛ ne la ɛboa bɛ.—Ɛzela 6:​1, 6-10.

7. Mɔɔ Dwuuma ne vale Nyamenle ɛhulolɛdeɛyɛlɛ limoale la, nyilalɛ boni mɔ a bɛnyianle a?

 ⁷ Gyihova luale Hagae nee Zɛkalaya anwo zo bɔle ye menli ne ɛwɔkɛ kɛ, saa bɛmaa ɛzonlenlɛsua ne mɔɔ bɛsi ye bieko la anwo kyia bɛ kpalɛ a, ɔbagyinla bɛ nzi. (Hagae 1:​8, 13, 14; Zɛk. 1:​3, 16) Ngapezoma ne edwɛkɛ ne maanle Dwuuma ne anwosesebɛ maanle bɛdoale ɛzonlenlɛsua ne ɛzilɛ zo wɔ 520 K.Y.M., na yeandwu ɛvolɛ nnu bɔbɔ yɛɛ bɛwiele ye si a. Kɛmɔ Dwuuma ne vale Nyamenle ɛhulolɛdeɛyɛlɛ limoale ɔnva nwo kɛ ɛnee bɛwɔ anwongyelelɛ  nu la ati, Gyihova boale bɛ wɔ nwonane afoa nu nee sunsum nu. Ɛhye ati bɛvale anyelielɛ bɛzonlenle Gyihova.—Ɛzela 6:​14-16, 22.

8. Kɛzi edwɛkɛ mɔɔ wɔ Hagae 2:4 bahola aboa yɛ yeamaa yɛava yɛ adwenle yɛazie Nyamenle ɛhulolɛdeɛyɛlɛ zo ɛ? (Eza nea ɔbodwɛkɛ ne.)

⁸ Mekɛ mɔɔ anwongyelelɛ kpole ne ɛlɛbikye la, akee yɛnwu ye bɔkɔɔ kɛ ɛnɛ a le mekɛ mɔɔ hyia kpalɛ kɛ yɛbali mɛla mɔɔ se yɛha edwɛkɛ ne la azo a. (Maake 13:10) Noko saa yɛlɛyia ezukoa nwo ngyegyelɛ anzɛɛ dwazotia wɔ yɛ edwɛkɛhanlɛ gyima ne anu a, bie a ɔbayɛ se kɛ yɛbava yɛ adwenle yɛazie yɛ ɛzonlenlɛ gyima ne azo. Duzu a bahola aboa yɛ yeamaa yɛava Belemgbunlililɛ ne yɛalimoa a? Ɔwɔ kɛ yɛkɔ zo yɛnyia anwodozo kɛ “ɛlɔne Gyihova” b wɔ yɛ afoa. Saa yɛkɔ zo yɛfa Belemgbunlililɛ ne yɛdimoa yɛ ɛbɛlabɔlɛ nu a, ɔbaboa yɛ. Ɔti ɔnle kɛ yɛsulo debie biala.—Kenga Hagae 2:4.

9-10. Kɛzi agyalɛma bie nwunle kɛ Gyisɛse edwɛkɛ mɔɔ wɔ Mateyu 6:33 la le nɔhalɛ ɛ?

⁹ Suzu agyalɛma bie, Oleg nee Irina, c mɔɔ bɛle adekpakyelɛma la neazo ne anwo. Mɔɔ bɛdule bɛhɔle ɛleka gyɛne kɛ bɛkaboa asafo mɔɔ wɔ ɛkɛ la, gyima mɔɔ ɛnee bɛyɛ bɛnea bɛ nwo la zɛkyele ɔluakɛ bɛ maanle ne anu ezukoa gyinlabelɛ zɛkyele. Bɛannyia gyima kpalɛ mɔɔ bɛbayɛ la wɔ asɛɛ ɛvolɛ ko anu ɛdeɛ, noko dahuu bɛnwunle kɛ Gyihova ɛlɛnea bɛ yɛɛ ɔyɛ a bɛnyia moalɛ bɛfi bɛ mediema ɛkɛ. Duzu a boale bɛ maanle bɛgyinlanle ngyegyelɛ ɛhye mɔ anloa a? Oleg mɔɔ mɔlebɛbo ne ɔ rɛle bɔle la hanle kɛ, “Ɛzonlenlɛ gyima ne mɔɔ yɛmaanle yɛ nye bolole yɛyɛle la boale yɛ maanle yɛvale yɛ adwenle yɛziele debie mɔɔ hyia kpalɛ wɔ ɛbɛlabɔlɛ nu la azo.” Ɔ nee ɔ ye anye bolole ɛzonlenlɛ gyima ne ɛyɛlɛ nu wɔ mekɛ mɔɔ bɛlɛkɔ zo bɛakpondɛ gyima la.

 ¹⁰ Kenle ko bie mɔɔ bɛvi daselɛlilɛ bɛrale sua nu la, awie maanle bɛdele kɛ, bɛ gɔnwo bie ɛva baage nwiɔ mɔɔ aleɛ aleɛ wɔ nu la ɛpɛ adenle kɛyɛ kilomita 160 (mayɛlɛ 100) ɛrɛlɛ bɛ. Oleg hanle kɛ: “Wɔ kenle zɔhane, eza yɛnwunle kɛzi Gyihova nee asafo ne dwenle yɛ nwo kpole la. Yɛdie yɛdi bɔkɔɔ kɛ, saa Gyihova azonvolɛ tɛnlabelɛ ne anu yɛ se kɛ nzɔne bɔbɔ a, ɔ rɛle ɛnrɛvi bɛ ɛlɛ.”—Mat. 6:33.

11. Saa yɛfa yɛ adwenle yɛsie Nyamenle ɛhulolɛdeɛyɛlɛ zo a, duzu a yɛ nye bahola ala ye ade a?

¹¹ Gyihova kpondɛ kɛ yɛfa yɛ adwenle yɛsie ɛdoavolɛyɛlɛ gyima ne mɔɔ die ngoane la zo. Kɛ mɔɔ yɛnwunle ye wɔ  ɛdendɛkpunli 7 ne anu la, Hagae hanle hilele Gyihova menli ne kɛ bɛbɔ bɛ ɛzonlenlɛ nwuanzanwuanza ne abo fofolɛ, kɛ asɛɛ bɛlɛto ɛzonlenlɛsua ne adiabo ne bieko la. Gyihova bɔle ɛwɔkɛ kɛ saa bɛyɛ ye zɔ a, ‘ɔbayila bɛ.’ (Hagae 2:​18, 19) Yɛdayɛ noko yɛbahola yɛanyia anwodozo kɛ saa yɛfa gyima mɔɔ Gyihova ɛva ɛmaa yɛ la yɛdimoa yɛ ɛbɛlabɔlɛ nu a, ɔbayila yɛ.

12. Duzu ati a ɛnee Ɛzela nee ɔ gɔnwo mɔ mɔɔ ɔ nee bɛ hɔle akɛlɛzonlenlɛ nu la hyia diedi kpole a?

¹² Wɔ ɛvolɛ 468 K.Y.M., Ɛzela nee Dwuuma ekpunli mɔɔ tɔ zo nwiɔ la vi Babelɔn hɔle Gyɛlusalɛm. Ɛnee Ɛzela nee menli mɔɔ boka ɔ nwo la hyia diedi kpole na bɛahola bɛadu adenle ɛhye. Ɛnee ɔwɔ kɛ bɛfa nvutuke nee dwɛtɛ fufule dɔɔnwo mɔɔ bɛva bɛhyɛ bɛ kɛ bɛva bɛzi ɛzonlenlɛsua ne la bɛfa adenle mɔɔ zolɛ yɛ ɛzulolɛ kpalɛ la azo. Ɛhye ati ɛnee nwule bahola ateta bɛ wɔ adenle nu. (Ɛzela 7:​12-16; 8:31) Bieko, yɛangyɛ, bɛnwunle kɛ anwobanebɔlɛ ɛnle Gyɛlusalɛm. Ɛnee menli dɔɔnwo ɛnle suakpole ne azo, yɛɛ ɛnee ɔhyia kɛ bɛyɛ ye bane ne nee ye nlenkɛ mgbole ne mɔ boɛ. Kɛzi yɛbanyia Gyihova anu anwodozo kpole la anwo debie boni a yɛsukoa yɛfi Ɛzela ɛkɛ a?

13. Kɛzi Ɛzela nyianle Gyihova anu anwodozo ɛ? (Eza nea ɔbodwɛkɛ ne.)

¹³ Ɛzela nwunle kɛzi Gyihova boale Ye menli wɔ sɔnea mekɛ nu la. Wɔ ɛvolɛ 484 K.Y.M., ɔbayɛ kɛ ɛnee Ɛzela de Babelɔn wɔ mekɛ mɔɔ Belemgbunli Ahazelɔse hanle kɛ bɛhu Dwuuma mɔɔ de Pɛhyea Tumililɛ ne amuala anu la. (Ɛseta 3:​7, 13-15) Ɛnee Ɛzela ngoane la esiane nu! Mɔɔ Dwuuma mɔɔ wɔ “maanzinli biala” anu la dele mɛla mɔɔ belemgbunli ne ɛli la, bɛhyele ɛhɔne na bɛzunle, na ye biala anu bɛyɛle asɔne bɛzɛlɛle Gyihova kɛ ɔhile bɛ adenle. (Ɛseta 4:3) Nea kɛzi Ɛzela nee ɔ gɔnwo mɔ Dwuuma bade nganeɛ wɔ mekɛ mɔɔ edwɛkɛ ne hakyile dɔle menli mɔɔ vale Dwuuma ne anwo adwenle kɛ bɛbɔ bɛ zo la anwo zo la! (Ɛseta 9:​1, 2) Bie a mɔɔ dole Ɛzela wɔ zɔhane mekɛ ɛsesebɛ ne anu la zieziele ye maanle sɔnea mɔɔ ɔbayia ye kenle bie la na ɔbayɛ kɛ ɔmaanle ɔnyianle anwodozo kpole kɛ Gyihova balie Ye menli. d

14. Duzu a adiema raalɛ bie nwunle ye wɔ mekɛ mɔɔ Gyihova nleanle ye wɔ anwongyelelɛ mekɛ nu la ɛ?

¹⁴ Saa Gyihova die yɛ wɔ anwongyelelɛ mekɛ nu a, ɔmaa yɛnyia ye nu anwodozo kpole. Suzu Anastasia mɔɔ de Eastern Europe la neazo ne anwo. Amaa yeangyinla afoa biala la, ɔgyakyile gyima mɔɔ ɔyɛ la. Ɔhanle kɛ: “Mekɛ ɛhye a limoa mɔɔ me ezukoa kɔsɔɔti wiele me nwo a.” Akee ɔdoale zolɛ kɛ: “Mengyakyile edwɛkɛ ne memaanle Gyihova na menwunle kɛzi ɔvile ɛlɔlɛ nu ɔnleanle me la. Saa me gyima fi me sa bieko a, menrɛzulo. Saa me anwuma Selɛ ne nea me ɛnɛ a, ɔbanlea me ɛhyema noko.”

15. Duzu a boale Ɛzela ɔmaanle ɔhɔle zo ɔnyianle Gyihova anu anwodozo a? (Ɛzela 7:​27, 28)

¹⁵ Ɛzela nwunle Gyihova asa wɔ ɔdaye mumua ne ye ɛbɛlabɔlɛ nu. Mɔɔ Ɛzela dwenledwenlenle  mekɛ mɔɔ Gyihova boale ye la anwo la, ye biala anu ɔboale ye ɔmaanle ɔhɔle zo ɔnyianle Ye nu anwodozo kpole. Yɛ edwɛkɛ, “Gyihova, me Nyamenle ne asa wɔ me nwo zo” nzonlɛ. (Kenga Ɛzela 7:​27, 28.) Ɛzela vale edwɛkɛ zɔhane lile gyima fane nsia wɔ buluku ne mɔɔ ɔdaye mumua ne ɔhɛlɛle la anu.—Ɛzela 7:​6, 9; 8:​18, 22, 31.

16. Tɛnlabelɛ boni mɔ anu a yɛbahola yɛanwu Nyamenle asa kpalɛ wɔ yɛ ɛbɛlabɔlɛ nu a? (Eza nea nvoninli ne.)

¹⁶ Saa yɛlɛyia ngyegyelɛ a, Gyihova bahola aboa yɛ. Kɛ neazo la, saa yɛka yɛkile yɛ gyimamenle kɛ ɔmaa yɛ mekɛ ɔmaa yɛhɔ nyianu anzɛɛ ɔyɛ nzenzaleɛ wɔ mekɛ mɔɔ yɛfa yɛyɛ gyima la anu amaa yɛahola yɛahɔ yɛ debiezukoalɛ ne mɔ amuala a, ɔmaa yɛnyia nwolɛ adenle mɔɔ ɔbamaa yɛanwu Gyihova asa wɔ yɛ ɛbɛlabɔlɛ nu la. Bie a kɛzi ninyɛne bahɔ boɛ amaa yɛ la bazi yɛ nwo kpole. Ɛhye maa Gyihova anu anwodozo mɔɔ yɛlɛ la yɛ kpole.

17. Kɛzi Ɛzela lale mɛlɛbɛnwoaze ali wɔ mekɛ mɔɔ anu yɛ se la anu ɛ? (Nea ɔ nyunlu nvoninli ne.)

¹⁷ Ɛzela zɛlɛle Gyihova kɛ ɔboa ye. Mekɛ biala mɔɔ Ɛzela bade nganeɛ kɛ ye gyima ne ɛlɛbo ɔ nwo zo la, ɔbɛlɛ ɔ nwo aze ɔsɛlɛ Gyihova moalɛ. (Ɛzela 8:​21-23; 9:​3-5) Ɛzela subane ne hanle menli mɔɔ ɔ nee bɛ wɔ la ɔmaanle bɛboale ye na bɛzukoale ye diedi ne. (Ɛzela 10:​1-4) Saa nwonane afoa nu ninyɛne mɔɔ yɛhyia nwo anzɛɛ yɛ abusua ne anwo banebɔlɛ nwo adwenleadwenle fo yɛ nwo zo a, ɔwɔ kɛ yɛfa anwodozo yɛsɛlɛ Gyihova kɛ ɔboa yɛ.

18. Duzu a baboa yeamaa anwodozo mɔɔ yɛlɛ wɔ Gyihova anu la ayɛ kpole a?

¹⁸ Saa yɛbɛlɛ yɛ nwo aze yɛkpondɛ moalɛ yɛfi Gyihova ɛkɛ na yɛmaa yɛ mediema diedima boa yɛ a, ɔbamaa yɛanyia Nyamenle anu anwodozo kpole. Ɛrɛladane bie mɔɔ bɛfɛlɛ ye Erika mɔɔ lɛ ngakula nsa la hɔle zo nyianle Gyihova anu anwodozo wɔ mekɛ mɔɔ ɔyiale ngyegyelɛ ngakyile la. Wɔ mekɛ ezinraa bie anu, ɔ ra mɔɔ ɔlɛnrenzɛ ye la nee ɔ hu wule. Ɔhanle mɔɔ dole ye la amuala anwo edwɛkɛ kɛ: “Ɛnrɛhola ɛnrɛlimoa ɛnrɛnwu kɛzi Gyihova baboa wɔ la. Ɛbahola wɔanyia moalɛ wɔ ndenle mɔɔ yɛ nwanwane la azo. Menwu ye kɛ Gyihova ɛlua me gɔnwo mɔ edwɛkɛ nee bɛ nyɛleɛ zo ɛbua me asɔneyɛlɛ ne mɔ dɔɔnwo. Saa meka ngyegyelɛ mɔɔ melɛyia la anwo edwɛkɛ mekile me gɔnwo mɔ a, bɛkola bɛboa me kpalɛ wɔ adenle sikalɛ zo.”

19-20. Duzu a yɛsukoa yɛfi Dwuuma mɔɔ bɛangola bɛanzia bɛangɔ Gyɛlusalɛm la ɛkɛ a?

¹⁹ Eza yɛbahola yɛazukoa debie yɛavi Dwuuma mɔɔ bɛangola bɛanzia bɛangɔ Gyɛlusalɛm  la ɛkɛ. Ɔbayɛ kɛ kɛmɔ ɛnee bie mɔ ɛyɛ mgbanyinli, bie mɔ ɛnde kpɔkɛ fee anzɛɛ abusua nu ɛzonlelilɛ ti, ɛnee bɛngola bɛnyɛ ninyɛne dɔɔnwo. Noko bɛvile bɛ ɛhulolɛ nu bɛvale ninyɛne mɔɔ bɛbava bɛazi ɛzonlenlɛsua ne la bɛmaanle menli mɔɔ ɛlɛsia ahɔ la. (Ɛzela 1:​5, 6) Ɔbayɛ kɛ mɔɔ ekpunli mɔɔ limoale vile akɛlɛzonlenlɛ nu la ziale hɔle Gyɛlusalɛm la, kɛyɛ ɛvolɛ 19 anzi, ɛnee bɛdabɛ mɔɔ bɛtɛte Babelɔn la tɛfa ndoboa tɛnwa menli mɔɔ wɔ Gyɛlusalɛm la.—Zɛk. 6:10.

²⁰ Saa yɛngola yɛnyɛ dɔɔnwo wɔ Nyamenle ɛzonlenlɛ nu bɔbɔ a, yɛbahola yɛanyia anwodozo kɛ Gyihova nwu debie biala mɔɔ yɛfi yɛ ahonle nu yɛyɛ la. Kɛzi yɛkola yɛnwu ye zɔ ɛ? Wɔ Zɛkalaya mekɛ zo, Gyihova hanle hilele ye ngapezonli ne kɛ ɔva nvutuke nee dwɛtɛ fufule mɔɔ Dwuuma mɔɔ de Babelɔn la vale rɛlɛle bɛ la ɔyɛ belemgbunli kyɛlɛ. (Zɛk. 6:11) “Belemgbunli kyɛlɛ kpole” ɛhye bayɛ “ngakyelɛ” amaa bɛ wɔ moalɛ mɔɔ bɛyɛle la anwo. (Zɛk. 6:​14, ɔbdw.) Yɛbahola yɛanyia anwodozo kɛ Gyihova arɛlɛ ɛnrɛvi mɔdenle mɔɔ yɛfi yɛ ahonle nu yɛbɔ yɛsonle ye wɔ mekɛ mɔɔ anu yɛ se anu la ɛlɛ.—Hib. 6:10.

21. Duzu a baboa yɛ yeamaa yɛava anwodozo yɛagyinla mɔɔ bazi kenle bie la anloa a?

²¹ Kɛ ɔde ye biala la, yɛbayia ngyegyelɛ wɔ awieleɛ mekɛ ɛhye anu, na bie a ninyɛne nu bayɛ se kpalɛ bɔbɔ kenle bie. (2 Tim. 3:​1, 13) Noko ɔnle kɛ yɛmaa ɛhye mɔ anwo adwenleadwenle fo yɛ nwo zo. Kakye edwɛkɛ mɔɔ Gyihova hanle hilele Hagae mekɛ zo amra la: “Me nee bɛ lua . . . Bɛmmasulo.” (Hagae 2:​4, 5) Yɛdayɛ noko yɛbahola yɛanyia anwodozo kɛ saa yɛyɛ biala mɔɔ yɛbahola la yɛyɛ Gyihova ɛhulolɛdeɛ a, ɔ nee yɛ balua. Saa yɛfa ɛzukoalɛdeɛ mɔɔ yɛnyia yɛvi Hagae nee Zɛkalaya ngapezo ne mɔ nee Ɛzela neazo ne anu la yɛbɔ yɛ ɛbɛla a, yɛbahɔ zo yɛanyia anwodozo wɔ Gyihova anu ɔnva nwo ngyegyelɛ mɔɔ bie a yɛbayia ye kenle bie la.