NEA kɛzi atiakunlukɛnlɛmayɛlɛ kola maa yɛ anwosesebɛ na ɔkyekye yɛ rɛle a! Saa yɛnwu kɛ awie dwenle yɛ nwo a, yɛ nye die. Kɛmɔ yɛkulo kɛ bɛ nee yɛ di wɔ atiakunlukɛnlɛma nu la ati, kɛ ɔkɛyɛ na yɛanyia subane kɛnlɛma ɛhye ɛ?

Atiakunlukɛnlɛmayɛlɛ kile kɛ yɛnyia awie mɔ anwo anyelielɛ na yɛalua yɛ edwɛkɛ nee yɛ nyɛleɛ zo yɛaboa bɛ. Yɛfa yɛ nyɛleɛ yɛkile kɛ yɛle atiakunlukɛnlɛma, yɛbu debie ala a ɛnee yɛtɛwiele. Ɛlɔlɛ nee anwunvɔnezelɛ a ka yɛ maa yɛda atiakunlukɛnlɛma ali a. Mɔɔ tɛla ɛhye la, atiakunlukɛnlɛma zɛhae boka Nyamenle sunsum nwuanzanwuanza ne ma mɔɔ ɔwɔ kɛ Kilisienema so la anwo. (Gal. 5:​22, 23) Ɔwɔ kɛ yɛnyia atiakunlukɛnlɛma subane, ɔti, bɛmaa yɛnlea kɛzi Gyihova nee ɔ Ra ne ɛla subane ɛhye ali nee kɛzi yɛbahola yɛazukoa bɛ neazo ne la.

Gyihova da atiakunlukɛnlɛma ali yɛɛ ɔdwenle menli kɔsɔɔti anwo, bɔbɔ “anzeayɛlɛma nee ɛtanevolɛma.” (Luku 6:​35) Kɛ neazo la, Gyihova maa “ye ewia fi maa ɛtanevolɛma nee kpalɛma yɛɛ ɔmaa ezule tɔ gua tenlenema nee amumuyɛma anwo zo.” (Mat. 5:​45) Ɔti, menli mɔɔ bɛmbu Gyihova kɛ bɛ Bɔvolɛ bɔbɔ la nyia ninyɛne mɔɔ maa yɛnyia ngoane mɔɔ ɔfi atiakunlukɛnlɛma nu ɔfa ɔmaa yɛ la bie amaa bɛ nye alie.

Atiakunlukɛnlɛma nwo neazo ko mɔɔ di munli la a le mɔɔ Gyihova yɛle maanle Adam nee Yive la. Adam nee Yive yɛle ɛtane la anzi mekɛ ekyi la, “bɛkpomgbale feege nya bɛwowale bɛ nwo.” Noko, Gyihova nwunle kɛ bɛbahyia tɛladeɛ mɔɔ fɛta la amaa bɛadɛnla Yidɛn tola ne anzi, ɛleka mɔɔ bɛwa azɛlɛ ne amonle kɛ “mbaka nee ndile anwo mbowule” bafifi la. Ɔti, Gyihova vile atiakunlukɛnlɛma nu kpomgbale ‘nane nwoma adɛladeɛ ndendenle maanle bɛ.’​—Mɔl. 3:​7, 17, 18, 21.

Gyihova da atiakunlukɛnlɛma ali kile “ɛtanevolɛma nee kpalɛma,” noko ye azonvolɛ mɔɔ bɛdi nɔhalɛ la titili a ɔkulo kɛ ɔda atiakunlukɛnlɛma ali ɔkile bɛ a. Kɛ neazo la, wɔ ngapezonli Zɛkalaya mekɛ zo, ɔgyegyele anwumabɔvolɛ bie kɛ bɛgyakyi Gyɛlusalɛm ɛzonlenlɛ sua ne ɛzilɛ la. Gyihova diele anwumabɔvolɛ ne edwɛkɛ na ɔvale “ɛlolɛ nee arɛlekyekyelɛ edwɛkɛ” ɔbuale ye. (Zɛk. 1:​12, 13) Zɔhane ala a Gyihova nee ngapezonli Yilaegya lile a. Mekɛ bie, ngapezonli ne arɛle bɔle kpalɛ, ɔti ɔzɛlɛle Gyihova kɛ ɔmaa ɔwu. Gyihova dele Yilaegya nganeɛdelɛ bo, ɔti, ɔmaanle anwumabɔvolɛ hɔmaanle ye anwosesebɛ. Eza Nyamenle maanle ngapezonli ne nwunle kɛ ɔtɛkale ɔ ngome. Mɔɔ Yilaegya dele edwɛkɛ ɛhye na ɔnyianle mɔɔ ɔhyia la, ɔholale ɔdoale ye gyima ne azo. (1 Arl. 19:​1-18) Nyamenle azonvolɛ ne mɔ anu boni a ɛhola ɛzukoa Gyihova atiakunlukɛnlɛma subane ne kpalɛ a?

Mɔɔ Gyisɛse yɛ ye ɛzonlenlɛ gyima ne wɔ azɛlɛ ye azo la, ɛnee bɛze ye kɛ ɔdwenle menli nwo yɛɛ ɔle atiakunlukɛnlɛma. Yeanyɛ kyengye anzɛɛ yeantinlitinli menli nwo zo. Ɔvile anwunvɔnezelɛ nu ɔhanle kɛ: “Bɛdabɛ mɔɔ bɛvɛ na bɛzo adesoa la amuala, bɛrɛla me nwo ɛke, na mebamaa bɛalie bɛ menle. . . . Me gyɛnvayile ne ɛmmaa bɛ kɔme ɛnyɛ bɛ nyane.” (Mat. 11:​28-30) Ɛhye ati, menli doale Gyisɛse wɔ ɛleka biala mɔɔ ɔbahɔ la. “Bɛ nwo yɛle ye alɔbɔlɛ,” ɔti Gyisɛse maanle bɛ aleɛ, ɔyɛle wuliravolɛma ayile, na ɔhilehilele bɛ ɔ Ze anwo “ninyɛne dɔɔnwo.”​—Maake 6:​34; Mat. 14:​14; 15:​32-38.

Gyisɛse atiakunlukɛnlɛma ne le kpole la ati, ɔlale ndelebɛbo ali wɔ mekɛ mɔɔ ɔ nee awie mɔ ɛlɛdi la. Nɔhalɛ nu, ɛnee saa mɔɔ bɛkulo kɛ ɔyɛ ɔmaa bɛ la bamaa ɔ nwo ahyele ye bɔbɔ a, ɔfi “atiakunlukɛnlɛma” nu ɔdi nwolɛ gyima ɔmaa bɛ. (Luku 9:​10, 11) Kɛ neazo la, yeandea raalɛ ne mɔɔ ahonle ɛdu, ɔlɛtudu mogya na ɔ nwo ɛnde mɔɔ ɔzɔle ye tɛladeɛ ne anu ɔluakɛ ɛnee ɔkulo kɛ ɔte kpɔkɛ la. (Sɛl. 15:​25-28) Gyisɛse vile anwunvɔnezelɛ nu zele raalɛ ne mɔɔ ɛdudu mogya too ɛvolɛ 12 la kɛ: “Me ra raalɛ, wɔ diedi ɛmaa wɔde kpɔkɛ. Fa anzodwolɛ kɔ na ɛ nwo ɛdɔ wɔ bɔkɔɔ.” (Maake 5:​25-34) Atiakunlukɛnlɛma nyɛleɛ boni ɛne!

Wɔ neazo mɔɔ yɛha nwolɛ edwɛkɛ la anu, yɛnwu kɛ yɛ nyɛleɛ a yɛfa yɛda atiakunlukɛnlɛma ali a. Gyisɛse luale Samɛleanli agɔnwolɛ kpalɛ ne anwo ndonwo ne azo ɔzile ɛhye azo. Ɛnee Samɛleama nee Dwuuma ɛnga ɛdeɛ, noko Samɛleanli ne mɔɔ wɔ ndonwo ne anu la vile atiakunlukɛnlɛma nu boale nrenyia ne mɔɔ bɛwua ye na bɛbo dedee ɔka ekyi ɔwu la. Atiakunlukɛnlɛma subane a hanle Samɛleanli ne maanle ɔboale ye a. Ɔyɛle nrenyia ne nganlɛ ne mɔ ayile na ɔ nee ye hɔle nyɛvolɛ sua nu. Samɛleanli ne duale nyɛvolɛ sua ne amenle kakɛ kɛ ɔnlea nrenyia ne mɔɔ ɛboda la na ɔbadua kakɛ biala mɔɔ ɔbabɔ ye ɔ nzi la.​—Luku 10:​29-37.

Yɛfa yɛ nyɛleɛ a yɛda atiakunlukɛnlɛma ali a, noko eza yɛbahola yɛalua yɛ edwɛkɛhanlɛ zo yɛayɛ zɔ. Ɔnva nwo kɛ “adwenleadwenle maa sonla yɛ basaa” la, Baebolo ne toa zo kɛ “edwɛkɛ kpalɛ maa sonla di fɛlɛko.” (Mrɛ. 12:​25) Saa yɛda atiakunlukɛnlɛma nee kpalɛyɛlɛ ali yɛkile awie mɔ a, yɛbayɛ ninyɛne mɔɔ maa anwosesebɛ la, ɛhye bamaa bɛ nye alie. * Edwɛkɛ kpalɛ mɔɔ yɛbaha la bahile kɛ yɛdwenle bɛ nwo. Yɛ anwosesebɛmaanlɛ bamaa bɛahola bɛagyinla sɔnea mɔɔ bɛbayia la anloa.​—Mrɛ. 16:24.

Kɛmɔ bɛbɔle yɛ kɔsɔɔti kɛ ‘Nyamenle ɛsaso’ la ati, yɛbahola yɛala atiakunlukɛnlɛma ali. (Mɔl. 1:​27) Kɛ neazo la, Wulomu sogya kpanyinli Dwuleɛse mɔɔ ɛnee ɔ nee ɛzoanvolɛ Pɔɔlo ɛlɛkɔ Wulomu la lale ‘atiakunlukɛnlɛma ali hilele ɛzoanvolɛ ne, na ɔmaanle ye adenle ɔmaanle ɔhɔle ɔ gɔnwo mɔ anwo na bɛboale ye’ wɔ sua Saedɛn azo. (Gyi. 27:3) Mekɛ bie, menli mɔɔ wɔ Mɔleta la lale “nyele kpalɛ” ali hilele Pɔɔlo nee menli gyɛne mɔɔ bɛ meli butule la. Bɔra ne azo amra huanle senle bɔbɔ maanle bɛdɛnlanle nwo. (Gyi. 28:​1, 2) Yɛ nye die subane zɔhane mɔɔ bɛlale ye ali la anwo, noko atiakunlukɛnlɛmayɛlɛ ɛnle debie mɔɔ bɛyɛ ye ko ala bɛgyakyi a.

Amaa yɛazɔ Nyamenle anye kpalɛ la, ɔwɔ kɛ yɛmaa atiakunlukɛnlɛmayɛlɛ yɛ yɛ subane. Ɛhye ati, Gyihova ka kile yɛ kɛ ‘yɛwula’ atiakunlukɛnlɛma. (Kɔl. 3:​12) Nɔhalɛ nu, ɔnla aze kɛ yɛbanyia subane kpalɛ ɛhye. Duzu  ati ɔ? Bie a nyianezelɛ, dwazotia anzɛɛ angomedi subane ti, ɔmmaa yɛnla atiakunlukɛnlɛma ali. Noko, saa yɛfa yɛ nwo yɛto sunsum nwuanzanwuanza ne azo na yɛsukoa kɛzi Gyihova da atiakunlukɛnlɛma ali la a, yɛbahola yɛali ngyegyelɛ zɛhae azo.​—1 Kɔl. 2:12.

Ndenle boni mɔ azo a yɛbala atiakunlukɛnlɛma subane ali a? Ɔwɔ kɛ yɛbiza yɛ nwo kɛ: ‘Asoo mefi ahonle nu metie awie mɔ ɔ? Mebɔ mɔdenle kɛ mebanwu awie mɔ ngyianlɛ ɔ? Mekɛ mɔɔ li amozi mɔɔ menlale atiakunlukɛnlɛma ali mengilele awie mɔɔ ɔnle me busuanli anzɛɛ me gɔnwo kpalɛ la a le boni?’ Yɛbahola yɛava bodane yɛazie yɛ nye zo, kɛ yɛbanwu menli mɔɔ de bikye yɛ la kpalɛ, titili wɔ Kilisiene asafo ne anu. Ɛhye bamaa yɛanwu tɛnlabelɛ mɔɔ bɛwɔ nu la nee bɛ ngyianlɛ. Bieko, ɔwɔ kɛ yɛbɔ mɔdenle kɛ yɛbala atiakunlukɛnlɛma ali yɛahile awie mɔ kɛ mɔɔ yɛbahulo kɛ bɛyɛ bɛmaa yɛ saa yɛwɔ bɛ tɛnlabelɛ ne anu bie a. (Mat. 7:​12) Mɔɔ li awieleɛ, saa yɛsɛlɛ Gyihova kɛ ɔboa yɛ ɔmaa yɛla atiakunlukɛnlɛma ali a, ɔbaboa yɛ.​—Luku 11:13.

Ɛzoanvolɛ Pɔɔlo dianle “atiakunlukɛnlɛma” subane bokale ninyɛne mɔɔ maa ɔyɛ ngakyile kɛ Nyamenle sonvolɛ la anwo. (2 Kɔl. 6:​3-6) Menli bikyele Pɔɔlo ɔluakɛ ɛnee ɔdwenle bɛ nwo, ɔluale ye nyɛleɛ nee ye edwɛkɛhanlɛ zo ɔyɛle zɔ. (Gyi. 28:​30, 31) Yɛ atiakunlukɛnlɛma subane ne noko bahola amaa menli ava nɔhalɛ ne. Saa yɛda atiakunlukɛnlɛma ali yɛkile awie biala yɛɛ menli mɔɔ dwazo tia yɛ la a, ɔbaha bɛ ahonle yeamaa bɛagyakyi bɛ dwazotia ne. (Wlo. 12:​20) Nzinlii, bie a bɛ nye bɛalie Baebolo nu edwɛkɛ ne anwo.

Wɔ Paladaese ne mɔɔ ɛlɛba la anu, atiakunlukɛnlɛma mɔɔ yɛbala ye ali yɛahile menli dɔɔnwo mɔɔ bɛbadwazo bɛ la bazi bɛ nwo. Anyezɔlɛ bamaa bɛdabɛ noko bɛala atiakunlukɛnlɛma ali bɛahile awie mɔ. Awie biala mɔɔ badɛnla aze wɔ mekɛ zɔhane mɔɔ ɔbakpo kɛ ɔbala atiakunlukɛnlɛma ali na yeaboa awie mɔ la ɛnrɛnyia kyɛfoa wɔ Nyamenle Belemgbunlililɛ ne anu. Noko menli mɔɔ Nyamenle ɛlie bɛ ɛdo nu kɛ bɛdɛnla aze dahuu la bavi ɛlɔlɛ nu ala atiakunlukɛnlɛma ali ahile bɛ nwo. (Edw. 37:​9-11) Nea kɛzi banebɔlɛ nee anzodwolɛ bara ewiade zɔhane anu a! Noko, kolaa na anyelielɛ mekɛ zɔhane ara la, saa yɛda atiakunlukɛnlɛma ali a, kɛzi ɔbaboa yɛ ɛ?

Baebolo ne ka kɛ, “Sonla mɔɔ atiakunlu le kpalɛ la nyia ye kpalɛyɛlɛ ne azo nvasoɛ.” (Mrɛ. 11:​17) Menli bikye sonla mɔɔ atiakunlu le kpalɛ la, na bɛda atiakunlukɛnlɛma ali bɛkile ɔdaye noko. Gyisɛse hanle kɛ: “Debie mɔɔ bɛfa bɛsuzu bɛmaa awie mɔ la yɛɛ bɛbava bɛazuzu bɛamaa bɛdabɛ noko a.” (Luku 6:​38) Ɛhye ati, atiakunlukɛnlɛma sonla nyia agɔnwolɛma kpalɛ dahuu.

Ɛzoanvolɛ Pɔɔlo dule Ɛfɛsɛse asafo ne anu amra folɛ kɛ “bɛyɛ atiakunlukɛnlɛma, bɛze anwunvɔne, bɛva bɛ gɔnwo mɔ ɛtane bɛhyɛ bɛ.” (Ɛfɛ. 4:​32) Asafo mɔɔ nuhua menli fi bɛ ahonle nu da atiakunlukɛnlɛma ali na bɛkpondɛ ndenle bɛdua zo bɛboa bɛ nwo ngoko la nyia nvasoɛ kpole. Menli zɛhae mɔ ɛndendɛ ɛntia bɛ gɔnwo, bɛnle kyengye anzɛɛ bɛnwɔ safule. Kɛ anrɛɛ bɛbaha awie mɔ anwo edwɛkɛ ɛtane la, bɛbɔ mɔdenle kɛ bɛbamaa bɛ nwo anwosesebɛ. (Mrɛ. 12:​18) Ɛhye maa asafo ne nyia anyuhɔlɛ wɔ sunsum nu.

Ɛhɛe, yɛ ɛdendɛlɛ nee yɛ nyɛleɛ a yɛfa yɛda atiakunlukɛnlɛma ali a. Saa yɛda atiakunlukɛnlɛma ali a, ɛnee yɛlɛsukoa Gyihova Nyamenle subane kɛnlɛma zɔhane. (Ɛfɛ. 5:1) Ɛhye bamaa yɛ asafo ne mɔ anwo ayɛ se na yeamaa awie mɔ ara nɔhalɛ ɛzonlenlɛ nu. Ɔrɛla ye kɛ bɛbanwu yɛ dahuu kɛ yɛle menli mɔɔ yɛda atiakunlukɛnlɛma ali!