1. Duzu a maanle Nyamenle menli ne nyianle anyelazo kɛ bɛbavi Babelɔn Kpole ne anu a, na kpuya boni mɔ a yɛbazuzu nwo a?

WƆ EDWƐKƐ mɔɔ li ɛhye anyunlu la anu, yɛnwunle kɛzi nɔhalɛ Kilisienema hɔle nlɔnu nu wɔ Babelɔn la. Edwɛkpa ne a le kɛ ɛnee bɛnrɛha zɔhane tɛnlabelɛ ne anu dahuu. Anrɛɛ Nyamenle mɛla ne mɔɔ se “bɛvinde, me menli, bɛvi zolɛ bɛye bɛ nwo” la ɛnrɛhile ɛhwee, saa awie biala ɛnrɛhola ɛnrɛvi ewiade amuala adalɛ ɛzonlenlɛ ne tumi bo a. (Kenga Yekile 18:4.) Yɛ nwo ɛlɛkpo yɛ kɛ yɛbanwu mekɛ mɔɔ Nyamenle menli vile Babelɔn tumililɛ bo bɔkɔɔ la! Noko mɔɔ limoa, ɔwɔ kɛ yɛye kpuya ɛhye mɔ anloa: Kolaa na 1914 adwu la, kpɔkɛ boni a Baebolo Sukoavoma ne zile ye wɔ Babelɔn Kpole ne anwo a? Kɛzi yɛ mediema ne mɔ bɔle mɔdenle yɛle daselɛlilɛ gyima ne wɔ Ewiade Konle I la anu ɛ? Asoo abusuabɔlɛ bie wɔ ɛdenrɛdenrɛlɛ yɛɛ anzohwenlɛ mɔɔ ɛnee bɛhyia nwo wɔ zɔhane mekɛ ne nee nlɔnu nu mɔɔ bɛhɔle ye wɔ Babelɔn la anu ɔ?

2. Kpɔkɛ boni a alimoa Baebolo Sukoavoma ne zile ye wɔ adalɛ ɛzonlenlɛ nwo a?

² Ɛvolɛ dɔɔnwo kolaa na Ewiade Konle I ara la, Charles Taze Russell nee ɔ gɔnwo mɔ nwunle kɛ Kilisienemaanle ne anu ahyehyɛdeɛ ne mɔ ɛngilehile Baebolo ne anu  nɔhalɛ ne. Ɔti bɛgyinlanle ndelebɛbo mɔɔ ɛnee bɛlɛ ye wɔ adalɛ ɛzonlenlɛ nwo la azo bɛzile kpɔkɛ kɛ bɛ nee ye ɛnrɛyɛ ɛhwee biala. Wɔ November 1879 ne anu, Zion’s Watch Tower ne lale bɛ gyinlabelɛ mɔɔ gyi Ngɛlɛlera ne azo la ali wienyi kɛ: “Asɔne biala mɔɔ ka kɛ ɔle bɛlɛra mɔɔ ɔ nwo te, ɔle Kelaese aye noko ɔ nee ewiade (nane) ne ɛyɛ ko na ɔboa ye la, ɔwɔ kɛ yɛbu ye kɛ ɔle asɔne tuutuu, kɛ mɔɔ ngɛlɛlera ne ka la” ɔboka Babelɔn Kpole ne anwo.​—Kenga Yekile 17:1, 2.

3. Kpɔkɛ boni a Baebolo Sukoavoma ne zile vale hilele kɛ bɛze kɛ ɔwɔ kɛ bɛtwe bɛ nwo bɛfi adalɛ ɛzonlenlɛ nwo a? (Nea mɔlebɛbo nvoninli ne.)

³ Ɛnee menli mɔɔ sulo Nyamenle la ze mɔɔ ɔwɔ kɛ bɛyɛ a. Bɛnrɛhola bɛnrɛnyia Nyamenle nyilalɛ wɔ mekɛ mɔɔ bɛkɔ zo bɛboa adalɛ ɛzonlenlɛ ahyehyɛdeɛ la. Ɔti Baebolo Sukoavoma dɔɔnwo hɛlɛle kɛlata kɛ bɛhwe bɛ nwo bɛvi bɛ asɔne ne mɔ anwo. Ɔdwu mekɛ ne bie a, bɛkenga kɛlata ne bagua nu wɔ mekɛ mɔɔ bɛkɛhɔ asɔne la. Ɛleka mɔɔ bɛmmaa bɛngenga ye bagua nu la, bie mɔ kɛlɛ bie kɔmaa awie biala mɔɔ wɔ asɔne ne anu la. Ɛnee bɛngulo kɛ bɛ nee adalɛ ɛzonlenlɛ bayɛ debie biala bieko! Mekɛ bie mɔɔ ɛze la a, anrɛɛ bɛ ngoane bahola avi bɛ sa. Noko wɔ 1870 ne anu, Maanle nee amboa asɔne ne kɛ mɔɔ ɛnee ɔyɛ ye la wɔ maanle dɔɔnwo anu. Ɛnee bɛnzulo kɛ bɛbahwe bɛ nzo wɔ maanle ɛhye mɔ anu, yemɔti, ɛnee menli kola ka ɛzonlenlɛ nwo edwɛkɛ na saa bɛ nee asɔne ne ɛnyɛ adwenle a bɛkola bɛka ye bagua nu.

4. Wɔ Ewiade Konle I la anu, duzu a Nyamenle menli ne yɛle ye wɔ Babelɔn Kpole ne anwo a?

⁴ Baebolo Sukoavoma ne ɛnee ze kɛ ɔwɔ kɛ bɛyɛ dɔɔnwo bɛtɛla bɛ mbusuafoɔ, agɔnwolɛma, nee asɔnema ne mɔɔ bɛmaa bɛanwu kɛ bɛhwe bɛ nwo bɛvi adalɛ ɛzonlenlɛ nwo la. Ɛnee ɔwɔ kɛ ewiade amuala nwu kɛzi Babelɔn Kpole ne de la​—ɛzonlenlɛ nu tuutuunli! Yemɔti, ɔvi December 1917 kɔdwu 1918 mɔlebɛbo, Baebolo Sukoavoma apenle ekyi ne bɔle mɔdenle hyɛle trate ne mɔɔ se “The Fall of Babylon” la 10,000,000​—Kilisienemaanle ne anye anlie nwo fee. Kɛ mɔɔ ɛkola ɛnwu ye la, asɔne mgbanyima ne mɔ vale ɛya; noko Baebolo Sukoavoma ne ahonle andu, bɛhɔle zo bɛyɛle gyima ɛhye mɔɔ anwo hyia la. Ɛnee bɛkulo kɛ ‘bɛtie Nyamenle kɛ tumivolɛ bɛtɛla sonla.’ (Gyi. 5:29) Duzu a yɛbaha a? Kɛ anrɛɛ Kilisienema mrenyia nee mraalɛ ɛhye mɔ bahɔ zo ayɛ ngɛkɛlɛ amaa Babelɔn Kpole ne wɔ konle ne anu la, bɛhwenle bɛ nwo bɛvile ye tumililɛ bo na bɛboale awie mɔ bɛmaanle bɛyɛle zɔ.

5. Daselɛ boni a maa yɛnwu kɛ mediema ne mɔ bɔle mɔdenle wɔ Ewiade Konle I la anu a?

⁵ Dɛba ne, ɛnee yɛdie yɛdi kɛ kɛmɔ Gyihova menli ne anyele bɛ nwo anyɛ daselɛlilɛ gyima ne wɔ Ewiade Konle I la anu ati, ɔ nye anlie bɛ nwo. Yɛhanle kɛ ɛhye ati, Gyihova maanle Babelɔn Kpole ne vale bɛ hɔle nlɔnu nu mekɛ ekyi. Noko, yɛ mediema nɔhavoma mɔɔ bɛzonlenle Nyamenle wɔ 1914-1918 mekɛ ne anu la nzinlii maanle ɔlale ali kɛ, kɛ ekpunli la Awulae menli ne bɔle mɔdenle yɛle daselɛlilɛ gyima ne. Yɛlɛ edwɛkɛ ɛhye anwo daselɛ mɔɔ di munli. Yɛ teokelase tetedwɛkɛ ne anwo ndelebɛbo kpalɛ mɔɔ yɛnyia la ɛmaa yɛde Baebolo ne anu edwɛkɛ bie mɔ abo kpalɛ.

6, 7. (a) Ngyegyelɛ boni mɔ a ɛnee ɔwɔ kɛ Baebolo sukoavoma ne gyinla ɔ nloa wɔ Ewiade Konle I la anu a? (b) Maa ndonwo fa kile kɛzi Baebolo Sukoavoma ne bɔle mɔdenle la anu.

 ⁶ Nɔhalɛ nu, Baebolo Sukoavoma mɔɔ ɛnee wɔ ɛkɛ wɔ Ewiade Konle I (1914-1918) anu la, yɛle daselɛlilɛ gyima ne kpalɛ wɔ zɔhane mekɛ ne. Ɛnee ɔnla aze kɛ bɛbayɛ ɛhye ɔlua ninyɛne bie mɔ ati. Yɛbazuzu nuhua nwiɔ anwo. Mɔɔ limoa la, wɔ zɔhane mekɛ ne gyima titili mɔɔ bɛyɛle la a le Baebolo nwo mbuluku mɔɔ bɛhyɛle la. Mekɛ mɔɔ tumivolɛma ne ammaa adenle bɛammaa bɛanva The Finished Mystery buluku ne bɛanli gyima wɔ 1918 mɔlebɛbo la, daselɛlilɛ gyima ne yɛle se maanle yɛ mediema ne mɔ. Ɛnee bɛnze kɛzi bɛfa Baebolo ne angome bɛdi daselɛ a, ɛnee The Finished Mystery ne a “tendɛ” maa bɛ a. Mɔɔ tɔ zo nwiɔ la a le Spanish Influenza ewule ne mɔɔ rale 1918 la. Ewule ne sane yemɔti ɔmaanle ɔyɛle se kɛ nolobɔlɛma bɛahɔ menli ɛkɛ. Baebolo Sukoavoma ne yiale ngyegyelɛ ɛhye nee ngyegyelɛ fofolɛ ɛdeɛ, noko bɛ muala bɛbɔle mɔdenle bɛyɛle gyima ne.

⁷ Wɔ 1914 ala anu, Baebolo Sukoavoma ekyi ne yele “Photo-Drama of Creation” ne hilele menli mɔɔ bɛbo 9,000,000 la. Drama ne, kɛ mɔɔ ɛnee bɛfɛlɛ ye la, saa bɛfa nvoninli ne a ɛnee bɛha nwolɛ edwɛkɛ na ɔka alesama anwo edwɛkɛ ɔvi mekɛ mɔɔ bɛbɔle ewiade la ɔkɔdwu ɛvolɛ apenle ko Tumililɛ ne awieleɛ. Ɛnee ɔle debie mɔɔ yɛ azibɛnwo wɔ zɔhane mekɛ ne. Dwenle nwolɛ nea. Menli dodo mɔɔ nleanle zɔhane Drama ne wɔ 1914 ala anu la anwo zonle tɛla Belemgbunlililɛ nolobɔlɛma mɔɔ wɔ ɛkɛ ne ɛnɛ la! Amaneɛbɔlɛ bieko kile kɛ wɔ 1916 menli 809,393 a hɔle ayia mɔɔ bɛyɛle ye wɔ United States la a, yɛɛ wɔ 1918 bɛ dodo hɔdwule 949,444. Baebolo Sukoavoma zɔhane bɔle mɔdenle!

8. Wɔ ewiade konle ne mɔɔ limoa la anu, kɛzi mediema ne mɔ asa hanle bɛ sunsum nu ngyianlɛ ɛ?

⁸ Wɔ ewiade konle ne mɔɔ limoa la anu, bɛbɔle mɔdenle bɛmaanle Baebolo Sukoavoma ne mɔɔ ɛkponde la sunsum nu aleɛ nee anwosesebɛ. Nziezielɛ ɛhye boale mediema ne ɔmaanle bɛyɛle daselɛlilɛ gyima ne. Richard H. Barber, mɔɔ ɛnee bɔ mɔdenle wɔ zɔhane mekɛ  ne la hanle kɛ: “Yɛbɔle mɔdenle yɛnleanle neavolɛ adenduvoma ekyi yɛɛ yɛvale The Watch Tower yɛhɔle Canada mɔɔ ɛnee bɛva bɛ sa bɛdo yɛ gyima ne azo la. . . . Menvale The Finished Mystery buluku ne mɔɔ kɔ bɛ kodoku nu la bie memaanle me gɔnwo mɔ mɔɔ ɛnee bɛ ɛdeɛ ne ɛminli ɔluakɛ bɛzale bɛ bɛliele la ati la. Adiema Rutherford maanle bɛyɛle nyianu nwo ngyehyɛleɛ wɔ azuamgbole zo wɔ United States adɔleɛ na ɔmaanle menli hɔmaanle ɛdendɛlɛ vale maanle bɛ anwosesebɛ.”

9. (a) Duzu ati a ɛnee Nyamenle menli ne hyia ɛdenrɛdenrɛlɛ nee anzohwenlɛ wɔ 1914 kɔdwu 1919 ɛ? (b) Duzu a anzohwenlɛ ɛhye ɛngile a?

⁹ Tɛ debie biala mɔɔ Baebolo Sukoavoma ne yɛle ye wɔ 1914 kɔdwu 1919 la a nee Baebolo ngyinlazo yia a. Ɛnee bɛle nɔhavoma ɛdeɛ, noko ɛnee mediema ne mɔ ɛnlɛ ndelebɛbo mɔɔ fɛta la wɔ ewiade tumililɛ nwo. (Wlo. 13:1) Yemɔti, kɛ ekpunli la, tɛ mekɛ ne amuala a bɛangyinla afoa biala wɔ konle nu a. Kɛ neazo la, mɔɔ United States maanle kpanyinli ne hanle kɛ bɛbayɛ nzɛlɛlɛ bɛamaa maanle ne anyia anzodwolɛ wɔ May 30, 1918 la, The Watch Tower ne hanle kɛ Baebolo Sukoavoma ɛyɛ bie. Mediema bie mɔ vale ezukoa boale konle ne, na bie mɔ noko vale bɛ nwo wulale konle ne anu. Noko, ɔbayɛ nvonleɛ kɛ yɛbaha kɛ Baebolo Sukoavoma ne limoale hɔle nlɔnu wɔ Babelɔn Kpole ne anu ɔluakɛ ɛnee bɛhyia ɛdenrɛdenrɛlɛ nee anzohwenlɛ. Noko, ɛnee bɛze kɛ ɔwɔ kɛ bɛtwe bɛ nwo bɛfi adalɛ ɛzonlenlɛ nwo, na wɔ Ewiade Konle I la anu, ɛnee asɛɛ bɛhwe bɛ nwo bɛvi nwolɛ bɔkɔɔ.​—Kenga Luku 12:47, 48.

10. Kpɔkɛ boni a Baebolo Sukoavoma ne zile vale hilele kɛ ngoane le nwuanzanwuanza a?

¹⁰ Ɛnee Baebolo sukoavoma ne ɛnlɛ ndelebɛbo mɔɔ yɛlɛ ye ɛnɛ wɔ afoa biala mɔɔ yɛngyi la anwo ɛdeɛ, noko ɛnee bɛze debie ko: Baebolo ne tua sonla ɛhunlɛ. Yemɔti mediema ekyi ne mɔɔ vale ɛtu hɔle konle wɔ Ewiade Konle I anu bɔbɔ la, zile kpɔkɛ kɛ bɛnrɛva ɛtu ne bɛnrɛhu sonla. Bɛvale bɛdabɛ mɔɔ bɛzile kpɔkɛ kɛ bɛnrɛhu sonla la bie mɔ bɛhɔle ɛleka mɔɔ konle ne anu yɛ se la, ɔluakɛ ɛnee bɛsuzu kɛ bɛbahu bɛ.

11. Duzu a tumivolɛma ne yɛle ye wɔ Baebolo Sukoavoma ne kpɔkɛzilɛ ne mɔɔ gyi Ngɛlɛlera ne azo la anwo a?

¹¹ Ɔda ali kɛ ɛnee Abɔnsam anye ɛnlie kpɔkɛ mɔɔ yɛ mediema ne mɔ ɛzi wɔ konle ne anwo la anwo. Ɛhye ati, ɔluale “mɛla” zo ɔvale ngyegyelɛ ɔrale. (Edw. 94:20) Sogya Kpanyinli James Franklin Bell mɔɔ wɔ U.S. la hanle ye wɔ adwelielilɛ nu hilele Mediema J. F. Rutherford nee W. E. Van Amburgh kɛ U.S. Department of Justice ne ɛli mɛla mɔɔ bamaa bɛahu awie biala mɔɔ anva ɛtu angɔ konle ne bie la. Baebolo Sukoavoma ne anwo edwɛkɛ a ɛnee ɔlɛka a. Sogya Kpanyinli Bell hanle ye ɛya zo hilele Adiema Rutherford kɛ: “Bɛando mɛla zɔhane gua ɔluakɛ [U.S. Maanle Kpanyinli] Wilson ammaa adenle; noko yɛze mɔɔ yɛbayɛ a, na yɛbayɛ noko!”

12, 13. (a) Duzu a maanle bɛvale mediema mɔtwɛ ne bɛguale efiade mekɛ tendenle a? (b) Asoo efiadenla ammaa mediema ne mɔ andie Gyihova ɔ? Kilehile nu.

¹² Tumivolɛma ne yɛle mɔɔ bɛhanle la. Bɛhyele Mediema Rutherford, Van Amburgh nee mediema nsia mɔɔ bɛgyi Watch Tower Society ne agyakɛ anu la bɛguale efiade. Mekɛ mɔɔ bɛdi bɛ edwɛkɛ la, ndɛnebuavolɛ ne hanle kɛ: “Edwɛkɛ ɛhye mɔɔ menli ɛhye mɔ  ɛlɛka la yɛ ɛzulolɛ tɛla mgbakyemgbakyenu mɔɔ wɔ German sogyama avinli la. Tɛ Arane mgbanyima mɔɔ di mɛla nee sogyama mɔɔ yɛ neɛnleanu la angome a bɛdendɛle bɛtiale bɛ a, emomu asɔne ne mɔ mgbanyima ne amuala. Ɔwɔ kɛ bɛtwe bɛ nzo kpalɛ.” (Faith on the March, mɔɔ A. H. Macmillan, hɛlɛle la, m. 99) Bɛyɛle ye zɔ. Bɛvale Baebolo Sukoavoma mɔtwɛ ne bɛguale efiade mekɛ tendenle wɔ Atlanta, Georgia. Mekɛ mɔɔ konle ne rale awieleɛ la, bɛgyakyile bɛ na bɛyele ɛzonledolɛ ne bɛvile bɛ nwo zo.

¹³ Mekɛ mɔɔ ɛnee bɛgua efiade bɔbɔ la, menli mɔtwɛ ne lile Ngɛlɛlera ne azo kɛ mɔɔ ɛnee bɛ ndelebɛbo ne de la. Wɔ kɛlata bie mɔɔ bɛhɛlɛle bɛmaanle United States maanle kpanyinli ne kɛ ɔze bɛ anwunvɔne la anu, bɛhanle kɛ: “Awulae ɛhulolɛdeɛ mɔɔ wɔ Baebolo ne anu la kile kɛ, ‘Mmaku sonla,’ ɛhye ati awie biala [Baebolo Sukoavoma] mɔɔ ɛdu ɔ nwo ɛmaa Awulae na ɔkɛvi ye ɛhulolɛ nu ɔkɛtulu ye tunwomaa ngyekyeleɛ ne la ɛnrɛnyia Nyamenle anyunlu ɛlolɛ, na bɛbazɛkye ye bɔbɔ. Ɛhye ati menli ɛhye mɔ ɛnrɛhola ɛnrɛvi bɛ ɛhulolɛ nu ɛnrɛhu menli yɛɛ bɛ adwenle babua bɛ fɔlɛ.” Akɛnrazilɛ edwɛkɛ boni ɛne! Ɔda ali kɛ, ɛnee mediema ne mɔ ɛngulo kɛ bɛkpo bɛ diedi ne!

14. Fa Ngɛlɛlera ne kilehile mɔɔ zile ɔvi 1914 kɔdwu 1919 la anu.

¹⁴ Malakae 3:1-3 la kile kɛ ɔvi 1914 kɔdwu 1919 mɔlebɛbo bɛbade “Livaema” mɔɔ bɛkpokpa bɛ la anwo. (Kenga.) Wɔ mekɛ zɔhane anu, Gyihova Nyamenle, nɔhalɛ “Awulae ne” nee Gyisɛse Kelaese, “ngyekyeleɛ ne anwo ɛbɔfoɔ” ne rale sunsum nu ɛzonlenlɛ sua ne anu ranleanle bɛdabɛ mɔɔ bɛlɛsonle wɔ ɛkɛ ne la. Mɔɔ bɛhwenle bɛ nzo bɛwiele la, Gyihova menli ne mɔɔ ɛnee bɛde bɛ nwo la zieziele bɛ nwo kɛ bɛbayɛ gyima dɔɔnwo wɔ ye ɛzonlenlɛ nu. Wɔ 1919, bɛkpale ‘akɛlɛ nɔhavo nee nrɛlɛbɛvolɛ ne’ kɛ ɔmaa diedima ne sunsum nu aleɛ. (Mat. 24:45) Ɛnee akee Nyamenle menli ne ɛvi Babelɔn Kpole ne tumililɛ bo. Ɔvi zɔhane mekɛ ne, ɔlua Gyihova ɛlolɛ ne ati, ye menli ɛhɔ zo ɛnyia anyuhɔlɛ dahuu wɔ Nyamenle ɛhulolɛdeɛ ne anwo ndelebɛbo nee bɛ anwuma Selɛ ne anwo ɛlɔlɛ nu. Nea kɛzi bɛ nye die ye nyilalɛ ne anwo a! ^[1]

15. Duzu a ɔwɔ kɛ Babelɔn Kpole ne anu mɔɔ yɛvi la maa yɛyɛ a?

¹⁵ Ɔyɛ yɛ fɛ kpole kɛ yɛhola yɛhwe yɛ nwo yɛvi Babelɔn Kpole ne anwo la! Mɔdenle mɔɔ Seetan bɔle kɛ ɔye nɔhalɛ Kilisiene ɛzonlenlɛ yeavi azɛlɛ ye azo la anyɛ boɛ. Noko, ɔnle kɛ yɛmaa yɛ rɛle fi deɛmɔti Gyihova maanle yɛ fanwodi ɛhye la. (2 Kɔl. 6:1) Ahonle kpalɛma dɔɔnwo tɛbɔ adalɛ ɛzonlenlɛ nu. Ɔwɔ kɛ bɛkile bɛ adenle. Yɛbahola yɛaboa bɛ. Adenle biala azo, bɛmaa yɛzukoa yɛ mediema mɔɔ dɛnlanle aze wɔ tete ne la, na yɛyɛ mɔɔ yɛbahola la amuala yɛmaa bɛvi nu!