1. Kɛmɔ yɛwɔ Gyihova ahyehyɛdeɛ ne anu la ati, nyilalɛ boni mɔ a yɛnyia a?

 ƆLE nyilalɛ kpole bɔkɔɔ kɛ yɛwɔ Gyihova ahyehyɛdeɛ ne anu wɔ awieleɛ mekɛ ɛhye mɔɔ anu yɛ se la anu la. Mekɛ mɔɔ ewiade tɛnlabelɛ ne ɛlɛsɛkye la, Gyihova ɛmaa yɛ sunsum nu mediema mrenyia nee mraalɛ mɔɔ koyɛlɛ wɔ bɛ nu la. (Edw. 133:1) Ɔboa yɛ ɔmaa yɛnyia abusua asetɛnla mɔɔ yɛ anyelielɛ la. (Ɛfɛ. 5:33–6:1) Na ɔmaa yɛ nwunu nee nrɛlɛbɛ mɔɔ yɛhyia nwo amaa yɛanyia nɔhalɛ anzodwolɛ la.

2. Duzu a ɔhyia kɛ yɛyɛ a, na duzu ati ɔ?

² Noko ɔwɔ kɛ yɛbɔ mɔdenle yɛkɔ zo yɛsonle Gyihova nɔhalɛ nu. Duzu ati ɔ? Ɔluakɛ ɔdwu mekɛ ne bie a awie mɔ sinlidɔlɛ gyegye yɛ. Eza bie a yɛdayɛ mumua ne yɛ nvonleɛ maa yɛ sa nu to, titili saa yɛyɛ nvonleɛ ko ne ala fane dɔɔnwo a. Ɔwɔ kɛ yɛkɔ zo yɛsonle Gyihova wɔ mekɛ mɔɔ (1) yɛ diema diedinli bie bayɛ debie mɔɔ gyegye yɛ la, (2) yɛ hu anzɛɛ yɛ ye baye yɛ rɛle ado yɛ sa nu la yɛɛ (3) yɛ sinlidɔlɛ bamaa yɛ sa nu ado la. Wɔ edwɛkɛ ɛhye anu, yɛbazuzu nuhua ko biala anwo. Eza yɛbazuzu mɔɔ yɛbahola yɛazukoa yɛavi Gyihova sonvolɛ nɔhavo bie mɔɔ wɔ Baebolo ne anu ɛkɛ la anwo.

ADIEMA BIE YƐ DEBIE MƆƆ GYEGYE WƆ A, KƆ ZO SONLE GYIHOVA

3. Ngyegyelɛ boni a Gyihova menli yia a?

³ Ngyegyelɛ ne. Yɛ mediema diedima bie mɔ lɛ subane bie mɔ mɔɔ ka yɛ ɛya a. Wɔannea a bie mɔ noko baye yɛ rɛle ado yɛ sa nu anzɛɛ bɛ nee yɛ bali wɔ adenle ɛtane zo. Bɛdabɛ mɔɔ  bɛli gyima ne anyunlu la kola yɛ nvonleɛ. Tɛnlabelɛ ɛhye mɔ kola maa awie mɔ adwenle nu yɛ bɛ kesee kɛ saa amgba yɛwɔ Nyamenle ahyehyɛdeɛ ne anu a. Na kɛ anrɛɛ bɛ nee bɛ mediema babɔ nu ‘azonle wɔ koyɛlɛ nu’ la, bɛ nee menli mɔɔ hanle bɛ ɛya la ɛndendɛ anzɛɛ bɛgyakyi debiezukoalɛ ɛhɔlɛ bɔkɔɔ. (Zɛf. 3:9) Asoo nrɛlɛbɛ wɔ nu? Nea mɔɔ yɛbahola yɛazukoa yɛavi Baebolo ne anu sonla bie mɔɔ yiale ngyegyelɛ ko ne ala bie la neazo ne anu la.

4. Ngyegyelɛ boni mɔ a ɛzoanvolɛ Pɔɔlo yiale a?

⁴ Baebolo ne anu neazo bie. Ɛnee ɛzoanvolɛ Pɔɔlo ze kɛ ɔ mediema Kilisienema ne ɛnli munli. Kɛ neazo la, mɔɔ ɔrale asafo ne anu ala la, ɛnee bie mɔ ɛnlie ye ɛnli. (Gyi. 9:26) Nzinlii, bie mɔ hehanle ɔ nwo edwɛkɛ ɛtane na bɛzɛkyele ye duma. (2 Kɔl. 10:10) Pɔɔlo nwunle kɛ asafo nu kpanyinli bie ɛyɛ nvonleɛ mɔɔ ɔbahola yeadenda awie mɔ agyakɛ anu a. (Gal. 2:​11, 12) Yɛɛ Maake, mɔɔ le Pɔɔlo agɔnwo mɔ mɔɔ bikye ye kpalɛ la anu ko la yele ɔ rɛle dole ɔ sa nu. (Gyi. 15:​37, 38) Anrɛɛ Pɔɔlo bahola amaa tɛnlabelɛ ɛhye mɔ bie azi ye adenle kɛ ɔ nee mediema mɔɔ vonle ye la badendɛ. Noko ɔnyianle ɔ mediema nwo adwenle kpalɛ na ɔhɔle zo ɔzonlenle Gyihova. Duzu a boale Pɔɔlo a?

5. Duzu a boale Pɔɔlo maanle ɔhɔle zo ɔbikyele ɔ mediema a? (Kɔlɔsaema 3:​13, 14) (Eza nea nvoninli ne.)

⁵ Pɔɔlo hulole ɔ mediema ne mɔ. Ɛlɔlɛ mɔɔ Pɔɔlo lɛ maa awie mɔ la boale ye maanle ɔvale ye adwenle ɔziele bɛ subane kpalɛ ne mɔ azo na tɛ bɛ sinlidɔlɛ ne mɔ azo ɔ. Eza ɛlɔlɛ boale Pɔɔlo maanle ɔyɛle debie mɔɔ ɔdaye mumua ne ɔhɛlɛle ye wɔ Kɔlɔsaema 3:​13, 14 la. (Kenga.) Nea kɛzi ɔvale ɔlile gyima wɔ ɔ nee Maake edwɛkɛ ne anu la. Maake gyakyile Pɔɔlo ɛkɛ ne hɔle wɔ bɛ edwɛkpatɛlɛvolɛ adendulɛ mɔɔ limoa la anu ɛdeɛ, noko Pɔɔlo anva nwolɛ ɛya anzie ye nu. Nzinlii mɔɔ Pɔɔlo hɛlɛle kɛlata kɛnlɛma bie hɔmaanle Kɔlɔsae asafo ne la, ɔhanvole Maake kɛ ɔle ɔ gɔnwo gyimayɛvo mɔɔ sonle bolɛ, mɔɔ ‘kyekye ɔ rɛle kpole kpalɛ’ a. (Kɔl. 4:​10, 11) Mɔɔ bɛdole Pɔɔlo efiade wɔ Wulomu la, ɔdaye mumua ne ɔzɛlɛle kɛ Maake ɛraboa ye. (2 Tim. 4:11) Ɔda ali wienyi kɛ, Pɔɔlo vale ɔ mediema ɛtane hyɛle bɛ na ɔhɔle zo ɔbikyele bɛ. Duzu a yɛsukoa yɛfi Pɔɔlo ɛkɛ a?

6-7. Kɛ ɔkɛyɛ na yɛahɔ zo yɛahulo yɛ mediema ɔnva nwo bɛ sinlidɔlɛ ne mɔ ɛ? (1 Dwɔn 4:7)

⁶ Mɔɔ yɛsukoa yɛfi nu. Gyihova kulo kɛ yɛkɔ zo yɛda ɛlɔlɛ ali yɛkile yɛ mediema. (Kenga 1 Dwɔn 4:7.) Saa awie anla subane kpalɛ bie ali a, yɛbahola yɛava ye kɛ ɔkulo  kɛ ɔdi Baebolo ngyinlazo zo na yeandwenle mɔɔ ɔyɛle la anwo kpalɛ ala. (Mrɛ. 12:18) Nyamenle kulo ye azonvolɛ nɔhavoma ɔnva nwo kɛ bɛtɔ sinli la. Saa yɛyɛ nvonleɛ a ɔmpɛ yɛ duma nu anzɛɛ ɔnva nwolɛ ɛya ɔnzie ye nu. (Edw. 103:9) Nea kɛzi ɔhyia kɛ yɛbazukoa yɛ Ze ne mɔɔ fa ɛtane kyɛ la!—Ɛfɛ. 4:32–5:1.

⁷ Eza kakye kɛ, mekɛ mɔɔ awieleɛ ne ɛlɛbikye la, ɔhyia kɛ yɛbikye yɛ mediema dahuu. Yɛ nye bahola ala kɛ yɛbayia kpɔdekpɔdeyɛlɛ mɔɔ anu yɛ se. Bie a yɛ diedi ne ati bɛbagua yɛ efiade. Saa yɛkɔ tɛnlabelɛ zɛhae mɔ anu a, yɛbahyia yɛ mediema nwo yɛadɛla mekɛ biala. (Mrɛ. 17:17) Suzu mɔɔ dole Josep, a asafo nu kpanyinli bie mɔɔ wɔ Spain la anwo. Kɛmɔ ɔ nee mediema mrenyia gyɛne angyinla afoa biala la ati, bɛguale bɛ efiade. Ɔhanle kɛ: “Kɛmɔ ɛnee yɛ muala yɛwɔ sua ko anu wɔ efiade ɛkɛ ne la ati, ɛnee ɔnyɛ se kɛ ɛbava ɛ diema diedinli bie anwo ɛya. Ɛnee ɔwɔ kɛ yɛsi yɛ nwo abotane na yɛfa yɛ ɛtane yɛkyɛ yɛ nwo ngoko bɔkɔɔ. Ɛhye boale yɛ maanle yɛyɛle ko na yɛbɔle yɛ nwo bane ngoko. Ɛnee pilizama gyɛne mɔɔ ɛnzonle Gyihova la ɛbɔ yɛ ɛyia. Mekɛ bie membodale, na bɛkyekyele me sa, ɔti ɛnee mengola menva menyɛ ɛhwee. Noko me mediema ne mɔ ko kpole me ninyɛne na ɔyɛle ninyɛne gyɛne ɔboale me. Bɛlale ɛlɔlɛ ali bɛhilele me wɔ mekɛ mɔɔ ɛnee mehyia nwo kpalɛ la.” Ɔle kpalɛ bɔkɔɔ kɛ yɛbaziezie yɛ nee yɛ mediema avinli kɛkala!

Ɛ HU ANZƐƐ Ɛ YE YE Ɛ RƐLE TO Ɛ SA NU A, KƆ ZO SONLE GYIHOVA

8. Ngyegyelɛ boni a agyalɛma yia a?

⁸ Ngyegyelɛ ne. Agyalɛ biala lɛ ye ngyegyelɛ. Baebolo ne maa ɔda ali wienyi kɛ agyalɛma “anwo bahyele bɛ wɔ nwonane nu.” (1 Kɔl. 7:28) Duzu ati ɔ? Ɔluakɛ menli nwiɔ mɔɔ bɛnli munli la a gya a, asolo awie biala subane, mɔɔ bɛkulo nee mɔɔ bɛngulo. Bie a asolo awie biala amaamuo. Nzinlii, bie a bɛbala subane ɛtane bie mɔ mɔɔ bɛannwu ye kolaa na bɛagya la ali. Ninyɛne ɛhye mɔ anu biala kola fa ngyegyelɛ ba. Kɛ anrɛɛ bɛbalie bɛado nu kɛ bɛ nuhua ko biala boka nwo a ngyegyelɛ ne rale na bɛabɔ nu bɛali nwolɛ gyima la, bie a bɛnrɛyɛ ye zɔ, emomu biala babɔ ɔ gɔnwo somolɛ. Bie bɔbɔ a bɛbanyia adwenle kɛ ɔwɔ kɛ bɛtete agyalɛ ne anu anzɛɛ bɛbɔ ewole. Noko asoo agyalɛ nu ɛtetelɛ anzɛɛ ewolebɔlɛ bapɛ ngyegyelɛ ne azo? b Maa yɛzuzu raalɛ bie mɔɔ wɔ Baebolo ne anu mɔɔ hɔle zo lile nɔhalɛ maanle Gyihova ɔnva nwo kɛ ɛnee ninyɛne nu yɛ se maa ye wɔ ye agyalɛ ne anu la anwo.

9. Ngyegyelɛ boni a Abegɛle yiale a?

⁹ Baebolo ne anu neazo bie. Ɛnee Abegɛle ahu a le Neebale, mɔɔ Baebolo ne ka kɛ ye edwɛkɛ yɛ se yɛɛ ɔnlɛ subane la. (1 Sa. 25:3) Bie a ɛnee ɔnla aze kɛ Abegɛle nee nrenyia zɛhae badɛnla. Asoo Abegɛle nyianle adenle kɛ ɔbavi agyalɛ ɛhye abo ɔ? Ɛhɛe. Ɔnyianle nwolɛ adenle ɛhye wɔ mekɛ mɔɔ Devidi mɔɔ ɔbayɛ Yizilayɛ belemgbunli kenle bie la rale kɛ ɔbahu ɔ hu mɔɔ bɔle ɔ nee ye menli ne aholoba la. (1 Sa. 25:​9-13) Anrɛɛ Abegɛle bahola anriandi na yeamaa Devidi anyia adenle ayɛ mɔɔ ɔyɛ la. Noko ɔvale ɔ nwo ɔliele edwɛkɛ ne anu na ɔmaanle Devidi gyakyile Neebale. (1 Sa. 25:​23-27) Duzu ati a ɔyɛle zɔ a?

10. Duzu a ɔbayɛ kɛ ɔmaanle Abegɛle hɔle zo dɛnlanle agyalɛ ɛtane ɛhye abo a?

¹⁰ Ɛnee Abegɛle kulo Gyihova yɛɛ ɔbu ye  agyalɛ nwo ngyinlazo ne. Ye biala anu ɔze edwɛkɛ mɔɔ Nyamenle hanle hilele Adam nee Yive wɔ mekɛ mɔɔ ɔhyehyɛle agyalɛ mɔɔ limoa la. (Gyn. 2:24) Ɛnee Abegɛle ze kɛ Gyihova bu agyalɛ kɛ ɔle nwuanzanwuanza. Ɛnee ɔkulo kɛ ɔyɛ mɔɔ sɔ Nyamenle anye la, na bie a yemɔti a ɔyɛle biala mɔɔ ɔbahola la ɔliele ye sua nu amra nee ɔ hu la. Ɔyɛle ye ninyɛne ndɛndɛ ɔzile Devidi adenle amaa yeangu Neebale. Eza ɛnee ɔlɛ ɛhulolɛ kɛ ɔbakpa ɛtane mɔɔ tɛ ɔdaye a ɔyɛle la anwo kyɛlɛ. Ɔda ali kɛ, Gyihova anye liele raalɛ ɛhye mɔɔ lɛ akɛnrasesebɛ yɛɛ ɔnle angomedi la anwo. Duzu a yelɛma nee kunlima amuala bahola azukoa avi Abegɛle neazo ne anu a?

11. (a) Duzu a Gyihova anye la kɛ agyalɛma bayɛ a? (Ɛfɛsɛsema 5:33) (b) Duzu a ɛsukoa ɛfi mɔɔ Carmen yɛle bɔle ye agyalɛ ne anwo bane la anu a? (Eza nea nvoninli ne.)

¹¹ Mɔɔ yɛsukoa yɛfi nu. Gyihova kulo kɛ agyalɛma kɔ zo bɔ nu tɛnla saa bɔbɔ ahenle ne aye anzɛɛ ɔ hu ne le sonla mɔɔ ɔnla aze kɛ ɔ nee ye badɛnla a. Saa Nyamenle nwu kɛ agyalɛma ɛlɛbɔ mɔdenle aziezie ngyegyelɛ mɔɔ ɛra bɛ agyalɛ ne anu na bɛala ɛlɔlɛ mɔɔ angomedi ɛnle nu nee ɛbulɛ ali bɛahile bɛ nwo a, ɔmaa ɔ nye die kpalɛ. (Kenga Ɛfɛsɛsema 5:33.) Suzu Carmen neazo ne anwo. Mɔɔ bɛgyale Carmen la, ɛvolɛ nsia anzi, ɔbɔle ɔ bo kɛ ɔ nee Gyihova Alasevolɛ sukoa debie na nzinlii bɛzɔnenle ye. Carmen hanle kɛ: “Me hu anye anlie nwo fee. Ɔhwenle Gyihova anwo nungule. Ɔyɛ a ɔbɔ me aholoba na ɔnwunlonwunla me kɛ ɔbagyakyi me ɛkɛ yeahɔ.” Noko Carmen hɔle zo dɛnlanle ye agyalɛ ne anwo. Yebɔ mɔdenle kɛ ɔbahulo ɔ hu na yeabu ye, na yeyɛ zɔ too ɛvolɛ 50. Ɔhanle kɛ: “Mɔɔ mekɛ ɛlɛkɔ la, ɛnee melɛsukoa kɛ mebade me hu edwɛkɛ bo na meadendɛ kɛnlɛma meahile ye. Kɛmɔ meze kɛ Gyihova bu agyalɛ kɛ ɔle nwuanzanwuanza la ati, meyɛ biala mɔɔ mebahola la kɛ mefa meabɔ nwolɛ bane. Meambɔ mɔdenle kɛ mebagyakyi me hu ɔluakɛ mekulo Gyihova.” c Saa ngyegyelɛ ba wɔ agyalɛ ne anu a, ɛbahola wɔanyia anwodozo kɛ Gyihova bagyinla ɛ nzi na yeaboa wɔ yeamaa wɔahɔ zo wɔagyinla ɔ nloa.

SAA WƆ SINLIDƆLƐ MAA Ɛ SA NU TO A

12. Saa yɛyɛ ɛtane kpole bie a, ngyegyelɛ boni a bie a yɛbayia a?

¹² Ngyegyelɛ ne. Saa yɛyɛ ɛtane kpole bie a, wɔannea a yɛ sa nu bado bɔkɔɔ. Baebolo ne ka kɛ yɛ ɛtane ne mɔ bahola amaa yɛ nwo ‘abubu yɛ na yeabɛtɛ’ yɛ. (Edw. 51:17) Adiema bie mɔɔ bɛfɛlɛ ye Robert la ɛbɔ mɔdenle  wɔ ɛvolɛ dɔɔnwo anu kɛ ɔbafɛta kɛ asafo nu sonvolɛ. Noko ɔyɛle ɛtane kpole bie na ɔnwunle kɛ yeye Gyihova yemaa. Ɔhanle kɛ: “Mɔɔ menwunle mɔɔ meyɛ la, me adwenle gyegyele me kpole. Nzinlii me kunlu tetele me. Menzunle na menzɛlɛle Gyihova. Mekakye kɛ menyianle adwenle bɔbɔ kɛ Nyamenle ɛnrɛgyegye ɔ nwo ɛnrɛdie me edwɛkɛ bieko. Duzu ati a ɔwɔ kɛ ɔtie me a? Meye ɔ rɛle medo ɔ sa nu.” Saa yɛyɛ ɛtane kpole bie a, wɔannea a yɛ nwo babubu yɛ bɔkɔɔ na yɛade nganeɛ kɛ Gyihova ɛkpo yɛ ɔti nwolɛ ɛngyia kɛ yɛbahɔ zo yɛazonle ye. (Edw. 38:4) Saa wɔde nganeɛ zɛhae bie a, suzu nɔhavo bie mɔɔ wɔ Baebolo ne anu mɔɔ hɔle zo zonlenle Gyihova ɔnva nwo kɛ ɔyɛle ɛtane kpole la anwo.

13. Ɛtane kpole boni a ɛzoanvolɛ Pita yɛle a, na nvonleɛ boni mɔ a maanle ɔyɛle ɛtane zɔhane a?

¹³ Baebolo nu neazo bie. Nɔe ne mɔɔ aleɛ kye a bɛbahu Gyisɛse la, ɛzoanvolɛ Pita yɛle nvonleɛ ngakyile na yemɔ maanle ɔyɛle ɛtane kpole bie. Mɔɔ limoa, Pita liele ɔ nwo lile somaa, na ɔdule ɔ nloa anu kɛ saa ɛzoanvolɛma mɔɔ ɛha la kpo Gyisɛse a, yemɔ ɔnrɛkpo ye ɛlɛ. (Maake 14:​27-29) Bieko, mɔɔ bɛwɔ Gɛtesɛmani tola ne anu la, Pita angɔ zo anzinza. (Maake 14:​32, 37-41) Akee mɔɔ nzakama bie rahyele Gyisɛse la, Pita nriandile gyakyile Gyisɛse. (Maake 14:50) Awieleɛ bɔkɔɔ ne, Pita hanle ye fane nsa kɛ ɔnze Gyisɛse, na bɔbɔ ɔhanle adalɛ ɛhye anwo ndane. (Maake 14:​66-71) Mɔɔ Pita nwunle ɛtane kpole mɔɔ yeyɛ la, duzu a ɔyɛle a? Alɔbɔlɛ hunle ye na ɔzunle kpole, bie a kɛmɔ ye adwenle buale ye fɔlɛ kpole la ati ɔ. (Maake 14:72) Wɔmɔ nea kɛzi Pita bali nyane kpole wɔ mekɛ mɔɔ bɛhunle ɔ gɔnwo Gyisɛse la. Ɔbayɛ kɛ Pita dele nganeɛ kɛ yeyɛ mgbane bɔkɔɔ!

14. Duzu a boale Pita maanle ɔhɔle zo ɔzonlenle Gyihova a? (Nea nvoninli ne.)

¹⁴ Mɔɔ maanle Pita hɔle zo zonlenle Gyihova la zonle. Yeande ɔ nwo; ɔhɔle ɔ mediema ɛzoanvolɛma mɔɔ ɛha la anwo ɛkɛ na bɛkyekyele ɔ rɛle. (Luku 24:33) Eza Gyisɛse dwazole la, ɔyele ɔ nwo ɔhilele Pita, na ɔbayɛ kɛ ɛnee ɔkulo kɛ ɔmaa ye anwosesebɛ. (Luku 24:34; 1 Kɔl. 15:5) Nzinlii, kɛ anrɛɛ Gyisɛse badea Pita wɔ ye nvonleɛ ne mɔ anwo la, ɔhanle ɔhilele ɔ gɔnwo ne kɛ ɔbamaa ye ɛzonlelilɛ dɔɔnwo. (Dwɔn 21:​15-17) Ɛnee Pita ze kɛ yeyɛ ɛtane kpole, noko yeammaa ɔ sa nu ando kɛ ɔbayɛ mɔɔ le kpalɛ la. Duzu ati ɔ? Ɔluakɛ ɛnee ɔdie ɔdi bɔkɔɔ kɛ ɔ Menle Gyisɛse ɛtɛkpole ye. Yɛɛ Pita amediema ɛzoanvolɛma mɔɔ ɛha la hɔle zo boale ye. Duzu a yɛsukoa yɛfi Pita neazo ne anu a?

15. Anwodozo boni a Gyihova kulo kɛ yɛnyia a? (Edwɛne 86:5; Wulomuma 8:​38, 39) (Eza nea nvoninli ne.)

 ¹⁵ Mɔɔ yɛsukoa yɛfi nu la. Gyihova kulo kɛ yɛnyia anwodozo kɛ ɔkulo yɛ na yeziezie ɔ nwo kɛ ɔbava ɛtane yeahyɛ. (Kenga Edwɛne 86:5; Wulomuma 8:​38, 39.) Saa yɛyɛ ɛtane a, yɛ adwenle babua yɛ fɔlɛ. Kɛ awie biala bade nganeɛ la ɛne, yɛɛ ɔfɛta. Noko ɔnle kɛ yɛnyia adwenle kɛ ɔngulo yɛ anzɛɛ ɔnrɛva ɔnrɛhyɛ yɛ. Emomu, ɔwɔ kɛ yɛkpondɛ moalɛ ndɛndɛ. Robert mɔɔ yɛhanle ɔ nwo edwɛkɛ la hanle kɛ: “Kɛmɔ menvale me nwo mendole me anwosesebɛ zo kɛ mefa meaho meatia sɔnea la ati, ɔmaanle menyɛle ɛtane.” Ɔnwunle kɛ ɔwɔ kɛ ɔ nee mgbanyima ne mɔ tendɛ. Ɔhanle kɛ: “Mɔɔ menyɛle zɔhane la, ɛkɛ ne ala bɛmaanle menwunle kɛ Gyihova kulo me. Mgbanyima ne mɔ angyakyi me zɔ. Bɛboale me bɛmaanle menliele menlile kɛ Gyihova ɛtɛkpole me.” Yɛdayɛ noko yɛbahola yɛanyia anwodozo kɛ Gyihova kulo yɛ kpole kpalɛ na saa yɛnu yɛ nwo, yɛkpondɛ moalɛ mɔɔ fɛta na yɛbɔ mɔdenle ɛsesebɛ kɛ yɛnrɛyɛ nvonleɛ zɔhane mɔ bieko a, ɔbava yeahyɛ yɛ. (1 Dwɔn 1:​8, 9) Anwodozo zɔhane ɛnrɛmaa yɛ sa nu ɛnrɛdo wɔ mekɛ mɔɔ yɛbadɔ aze la.

16. Duzu ati a wɔzi kpɔkɛ kɛ ɛbahɔ zo wɔazonle Gyihova a?

¹⁶ Gyihova anye sɔ mɔdenle mɔɔ yɛbɔ kɛ yɛbazonle ye wɔ awieleɛ mekɛ ɛhye mɔɔ anu yɛ se anu la. Saa ninyɛne ɛngɔ boɛ bɔbɔ a, ɔlua Gyihova moalɛ zo, yɛbahola yɛahɔ zo yɛazonle ye. Saa yɛ mediema yɛ yɛ ɛtane bɔbɔ a, yɛbahola yɛanyia ɛlɔlɛ yɛamaa bɛ na yɛava yɛahyɛ bɛ. Ɔwɔ kɛ yɛyɛ biala mɔɔ yɛbahola la yɛsiezie ngyegyelɛ mɔɔ bara yɛ agyalɛ nu la yɛfa yɛkile kɛ yɛkulo yɛ Nyamenle ne kpole yɛɛ yɛlɛ ɛbulɛ yɛmaa ye agyalɛ ngyehyɛleɛ ne. Saa yɛyɛ ɛtane a, yɛbahola yɛakpondɛ Gyihova moalɛ, yɛalie yɛado nu kɛ ɔkulo yɛ yɛɛ ɔlɛ ɛhulolɛ kɛ ɔbava yeahyɛ yɛ, na yɛkɔ yɛ nyunlu wɔ ye ɛzonlenlɛ nu. Yɛbahola yɛanyia anwodozo kɛ, saa ‘yɛamkpo aze wɔ kpalɛyɛlɛ nu’ a, Gyihova bayila yɛ kpole.—Gal. 6:9.