1, 2. (a) Kɔkɔbɔlɛ boni a ɛlie menli dɔɔnwo ngoane a? (Nea mɔlebɛbo nvoninli ne.) (b) Adehilelɛ boni a Nyamenle menli lɛ mɔɔ ɔbahola yealie bɛ ngoane a?

“GYINLA, NEA, TIE.” Bɛhɛlɛ edwɛkɛ ɛhye bɛziezie keteke ndenle mɔɔ wɔ North America mɔɔ ahale pɛ nu wɔ ɛkɛ la azo. Bɛbɔle ɛhye ɛyɛlɛ bo la yebo ɛvolɛ 100. Duzu ati ɔ? Amaa keteke ambɔ kale biala mɔɔ ɛlɛpɛ adenle ne la. Menli dɔɔnwo mɔɔ lile kɔkɔbɔlɛ ɛhye azo la nyianle bɛ ti.

² Gyihova maa yɛ ninyɛne mgbalɛ mɔɔ tɛla kɔkɔbɔlɛ ɛhye mɔ la. Ɔkile ye menli adenle amaa bɛahola bɛanyia dahuu ngoane na bɛahwe bɛ nwo bɛavi esiane nwo. Gyihova le kɛ mboaneneavolɛ mɔɔ lɛ ɛlɔlɛ mɔɔ ɔkile ye mboane ne adenle na ɔbɔ bɛ kɔkɔ amaa bɛanva adenle ɛtane zo la.—Kenga Ayezaya 30:20, 21.

3. Duzu ati a ɛnee alesama amuala lua adenle mɔɔ ɔ nee bɛ kɔ ewule nu la azo a?

³ Gyihova ɛmaa menli adehilelɛ fɔɔnwo bie mɔ ɔvi mekɛ mɔɔ bɛbɔle alesama la. Kɛ neazo la, wɔ Yidɛn tola ne anu, Gyihova vale adehilelɛ mɔɔ anu la ɛkɛ la maanle alesama  amaa bɛanyia dahuu ngoane nee anyelielɛ. (Mɔlebɛbo 2:15-17) Noko Adam nee Yive kpole bɛ Ze mɔɔ lɛ ɛlɔlɛ la adehilelɛ ne. Yive diele folɛ mɔɔ ɛnee ɔzɔho kɛ ɛwɔlɛ bie ɛlɛtu ye la, na Adam noko diele ɔ ye. Duzu a vile nu rale a? Bɛ mu nwiɔ bɛnwunle amaneɛ na bɛwule mɔɔ bɛnlɛ anyelazo biala a. Ɔlua bɛ anzosesebɛ ne ati, ɛnee alesama amuala lua adenle mɔɔ ɔ nee bɛ kɔ ewule nu la azo.

4. (a) Duzu ati a ɛnee bɛhyia adehilelɛ bieko wɔ Azuyilɛ ne anzi ɛ? (b) Kɛzi tɛnlabelɛ fofolɛ bie maanle yɛnwunle Nyamenle adwenle ɛ?

⁴ Adehilelɛ mɔɔ Nyamenle vale maanle Nowa la liele menli ngoane. Wɔ Azuyilɛ ne anzi, Gyihova hanle kɛ menli mmadi anzɛɛ mmano mogya. Duzu ati ɔ? Ɛnee bɔ zo mɔɔ Gyihova bamaa menli adenle yeamaa bɛali nane a. Ɔlua tɛnlabelɛ fofolɛ ɛhye mɔɔ bɛhɔle nu la ati, ɛnee ɔwɔ kɛ bɛmaa bɛ adehilelɛ fofolɛ: “Debie ko ala a metua bɛ kɛ bɛmmadi a, yemɔ a le nane mɔɔ mogya ne tɛbɔ nu la, ɔboalekɛ mogya ne anu a ye ngoane wɔ a.” (Mɔlebɛbo 9:1-4) Yɛnwu adwenle mɔɔ Nyamenle lɛ wɔ ngoane, mɔɔ le ye ɛdeɛ anwo la wɔ mɛla ɛhye anu. Ɔdaye a ɔle Bɔvolɛ ne mɔɔ ɔmaa yɛ ngoane a, ɔti ɔlɛ adenle ɔdi mɛla ɔmaa yɛ wɔ ngoane nwo. Kɛ neazo la, ɔlile mɛla ɔmaanle alesama kɛ awie biala mmaku sonla. Nyamenle bu mogya nee ngoane kɛ ɔle nwuanzanwuanza, na ɔbahwe awie biala mɔɔ bu ɔ nye gua edwɛkɛ ɛhye azo la anzo.—Mɔlebɛbo 9:5, 6.

5. Duzu a yɛbazuzu nwo wɔ edwɛkɛ ɛhye anu a, na duzu ati ɔ?

⁵ Wɔ Nowa mekɛ zo Azuyilɛ ne anzi, Nyamenle hɔle zo hilele ye menli adenle. Yɛbanwu nwolɛ neazo bie mɔ wɔ edwɛkɛ ɛhye anu. Ndinu ɛhye bamaa kpɔkɛ mɔɔ yɛzi kɛ yɛdi Gyihova adehilelɛ zo yɛahɔ ewiade fofolɛ ne anu la anu amia.

6. Duzu ati a ɛnee ɔhyia kɛ Nyamenle menli di mɛla mɔɔ ɔluale Mosisi anwo zo ɔvale ɔmaanle bɛ la azo ɛ, na subane boni a ɛnee ɔwɔ kɛ Yizilayɛma nyia a?

⁶ Wɔ Mosisi mekɛ zo, Gyihova maanle ye menli adehilelɛ mɔɔ anu la ɛkɛ wɔ kɛzi ɔwɔ kɛ bɛbɔ bɛ ɛbɛla na bɛsonle ye la anwo. Duzu ati ɔ? Ɔluakɛ bɛ tɛnlabelɛ ne hakyile. Yizilayɛma yɛle ngɛkɛlɛ ɛvolɛ mɔɔ bo ɛya nwiɔ la wɔ Yigyibiti, ɛleka mɔɔ ɛnee awie biala sonle mowuamra, ananze nee ninyɛne ngakyile mɔɔ Nyamenle kyi la. Mekɛ mɔɔ Nyamenle menli ne vile akɛlɛ ɛzonlenlɛ nu wɔ Yigyibiti la, ɛnee bɛhyia adehilelɛ fofolɛ. Bɛbayɛ maanle mɔɔ Gyihova Mɛla zo ala a bɛdi a. Neɛnleanu mbuluku bie mɔ ka kɛ Hibulu edwɛkɛkpɔkɛ mɔɔ bɛhile ɔ bo “mɛla” la le kɛ edwɛkɛkpɔkɛ bie mɔɔ kile “kile adenle” la. Mɛla ne bɔle Yizilayɛma anwo bane vile ɛbɛlatane nee adalɛ ɛzonlenlɛ mɔɔ wɔ maanle maanle mɔɔ ɛbɔ bɛ ɛyia anu la anwo. Mɔɔ Yizilayɛma diele Nyamenle la, ɔyilale bɛ. Mɔɔ bɛkpole ye la, bɛnwunle amaneɛ kpole.—Kenga Mɛla ne 28:1, 2, 15.

7. (a) Kilehile deɛmɔti Gyihova maanle ye menli adehilelɛ la anu. (b) Kɛzi ɛnee Mɛla ne le adekilevolɛ maa Yizilayɛma ɛ?

⁷ Ɔlua debie bieko ati, ɛnee Yizilayɛma hyia adehilelɛ fofolɛ. Mɛla ne zieziele Yizilayɛma maanle debie titili wɔ Gyihova bodane nu, Gyisɛse Kelaese, Mɛzaya ne ɛralɛ. Mɛla ne maanle Yizilayɛma hakyele kɛ bɛnli munli. Eza ɔboale bɛ ɔmaanle bɛdele ɔ bo kɛ bɛhyia ɛkpɔnedeɛ, kile kɛ bɛhyia afɔlebɔlɛ mɔɔ di munli mɔɔ ɔbaye  bɛ ɛtane ne mɔ yeavi ɛkɛ ne bɔkɔɔ la. (Galeehyeama 3:19; Hibuluma 10:1-10) Mɛla ne eza bɔle Mɛzaya abusua ɛlɔnwɔne ne anwo bane na ɔboale Yizilayɛma ɔmaanle bɛnwunle Mɛzaya ne wɔ mekɛ mɔɔ ɔlale ɔ nwo ali la. Nɔhalɛ nu, ɛnee Mɛla ne le mekɛ ezinra nu adekilevolɛ, anzɛɛ ‘kilehilevolɛ,’ ɔhɔdwule Kelaese anwo zo.—Galeehyeama 3:23, 24, NW.

8. Duzu ati a ɔwɔ kɛ yɛmaa ngyinlazo mɔɔ wɔ Mosisi Mɛla ne anu la kile yɛ adenle ɛ?

⁸ Kɛ Kilisienema la, yɛdayɛ noko yɛbahola yɛanyia adehilelɛ mɔɔ Gyihova vale maanle wɔ Mɛla ne anu la azo nvasoɛ. Wɔ adenle boni azo? Yɛbahola yɛagyinla, na yɛanlea ngyinlazo mɔɔ Mɛla ne gyi zo la. Yɛnle mɛla zɔhane mɔ abo bieko ɛdeɛ, noko yɛbahola yɛamaa bie mɔ dɔɔnwo ahile yɛ adenle wɔ yɛ ɛbɛlabɔlɛ nu nee Gyihova ɛzonlenlɛ nu. Gyihova ɛmaa bɛhɛlɛ mɛla ɛhye mɔ wɔ Baebolo ne anu amaa yɛazukoa, yɛamaa nuhua ngyinlazo ne mɔ ahile yɛ adenle na yɛahile anyezɔlɛ wɔ debie mɔɔ tɛla Mɛla ne mɔɔ Gyisɛse ɛhilehile yɛ la anwo. Tie mɔɔ Gyisɛse hanle la: “Bɛde kɛ bɛha kɛ, ‘Mmafa awuvolɛ.’ Noko mame, mese: saa nrenya nea raalɛ maa ɔ nwo dɔ ye a ɛnee yeva ye wɔ ye ahonle nu.” Ɔti tɛ agyalɛ ɛzɛkyelɛ ala a ɔwɔ kɛ yɛkpo a, ɔwɔ kɛ yɛkoati ɛbɛlatane nwo adwenle nee atiakunluwɔzo ɛtane.—Mateyu 5:27, 28.

9. Tɛnlabelɛ fofolɛ boni ati a ɛnee ɔhyia kɛ Nyamenle fa adehilelɛ fofolɛ maa a?

⁹ Mɔɔ Gyisɛse rayɛle Mɛzaya ne la anzi, Gyihova vale adehilelɛ fofolɛ maanle ɔmaanle yɛnwunle ye bodane ne anwo ninyɛne dɔɔnwo. Duzu ati a ɛnee ɛhye hyia ɛ? Wɔ ɛvolɛ 33 ne anu, Gyihova kpole Yizilayɛ maanle ne na ɔkpale Kilisiene asafo ne ɔmaanle bɛyɛle ye menli. Yemɔti Nyamenle menli ne tɛnlabelɛ ne hakyile bieko.

10. Duzu ati a bɛvale mɛla fofolɛ bɛmaanle Kilisiene asafo ne a, na duzu ati a ɛnee mɛla ɛhye mɔ le ngakyile fi Yizilayɛma ɛdeɛ ne anwo ɛ?

¹⁰ Gyihova vale Mosisi Mɛla ne maanle Yizilayɛma amaa yeahilehile bɛ kɛzi ɔwɔ kɛ bɛbɔ bɛ ɛbɛla nee kɛzi ɔwɔ kɛ bɛsonle ye la. Wɔ alimoa Kilisienema mekɛ zo, ɛnee Nyamenle menli ɛnle maanle ko anu, ɛnee bɛvi maanle ngakyile nu na bɛvɛlɛle bɛ sunsum nu Yizilayɛ. Bɛyɛle Kilisiene asafo ne na ɛnee bɛwɔ ngyekyeleɛ fofolɛ ne abo. Gyihova vale kɛzi ɔwɔ kɛ bɛbɔ bɛ ɛbɛla na bɛsonle ye la anwo adehilelɛ fofolɛ dɔɔnwo maanle bɛ. Nɔhalɛ nu, “Nyamenle bu menli kɔsɔɔti kɛ bɛsɛ. Awie biala mɔɔ sulo ye na ɔdi boɛ la ɔdie ye ɔto nu, yɛɛ ɔnnea ɛleka mɔɔ ɔvi nee maanle holɛ ko mɔɔ ɔvi nu la.” (Gyima ne 10:34, 35) Bɛlile “Kelaese mɛla ne” mɔɔ ɛnee ɔgyi ngyinlazo mɔɔ bɛhɛlɛ azo titili la azo, tɛ edwɛkɛ mɔɔ wɔ awolɛ zo la, emomu, mɔɔ wɔ ahonle nu la. Ɛnee mɛla ɛhye bahile Kilisienema adenle na yeaboa bɛ wɔ ɛleka biala mɔɔ bɛde la.—Galeehyeama 6:2.

11. Kilisienema ɛbɛlabɔlɛ nu ɛleka nwiɔ boni a ɔwɔ kɛ bɛfa “Kelaese mɛla ne” bɛdi gyima a?

¹¹ Sunsum nu Yizilayɛ nyianle adehilelɛ mɔɔ Gyihova luale Gyisɛse anwo zo vale maanle la azo nvasoɛ kpalɛ. Noko kolaa na Gyisɛse ava ngyekyeleɛ fofolɛ ne azie ɛkɛ la, ɔvale mɛla titili nwiɔ ɔmaanle. Ɛnee ko fale daselɛlilɛ gyima ne anwo, yɛɛ ko noko fale kɛzi ɔwɔ kɛ Kilisienema bɔ bɛ ɛbɛla na bɛ nee bɛ nwo di  la anwo. Ɛnee adehilelɛ ɛhye mɔ wɔ ɛkɛ maa Kilisienema amuala, ɔti saa yɛbadɛnla anwuma anzɛɛ azɛlɛ ye azo bɔbɔ a, ɔfale yɛ muala yɛ nwo.

12. Duzu a ɛnee le ngakyile wɔ daselɛlilɛ gyima ne anwo a?

¹² Wɔ tete ne, ɛnee ɔwɔ kɛ maanle maanle ne anu amra ba Yizilayɛ na bɛbasonle Gyihova. (1 Arelemgbunli 8:41-43) Akee Gyisɛse vale mɛla ne mɔɔ wɔ Mateyu 28:19, 20 la maanle. (Kenga.) Gyisɛse zele ye ɛdoavolɛ ne mɔ kɛ “bɛhɔ” menli kɔsɔɔti ɛkɛ. Wɔ ɛvolɛ 33 Pɛntekɔso ne, Gyihova maanle ɔlale ali kɛ ɔkpondɛ kɛ bɛka edwɛkpa ne wɔ ewiade ɛleka biala. Zɔhane kenle ne, sunsum ne yile menli kɛyɛ 120 mɔɔ bɛwɔ asafo fofolɛ ne anu la na bɛbɔle ɔ bo kɛ bɛka aneɛ ngakyile bɛahile Dwuuma nee bɛdabɛ mɔɔ bɛhakyi bɛrayɛ Dwuuma la. (Gyima ne 2:4-11) Bɛhanle edwɛkɛ ne bɛhilele Samɛleama noko. Akee wɔ ɛvolɛ 36 ne anu, bɛhanle edwɛkɛ ne bɛhilele Maanle Maanle ne anu amra bɔbɔ. Ɛnee ɛhye kile kɛ ɔwɔ kɛ Kilisienema kɔka edwɛkɛ ne kile awie biala mɔɔ wɔ ewiade ye anu la!

13, 14. (a) Duzu a Gyisɛse “mɛla fofolɛ” ne kpondɛ kɛ yɛyɛ a? (b) Duzu a yɛsukoa yɛfi Gyisɛse neazo ne anu a?

¹³ Eza Gyisɛse maanle yɛ “mɛla fofolɛ” mɔɔ fale kɛzi ɔwɔ kɛ yɛ nee yɛ mediema di la anwo. (Kenga Dwɔn 13:34, 35.) Ɔwɔ kɛ yɛda ɛlɔlɛ ali yɛkile bɛ dahuu, noko ɔwɔ kɛ eza yɛnyia ɛhulolɛ kɛ yɛbava yɛ ngoane yɛado aze yɛamaa bɛ. Ɛhye le debie mɔɔ Mɛla ne anga kɛ bɛyɛ a.—Mateyu 22:39; 1 Dwɔn 3:16.

¹⁴ Gyisɛse a le awie mɔɔ yɛle ɛlɔlɛ ɛhye mɔɔ angomedi ɛnle nu la anwo neazo mɔɔ tɛla biala a. Kɛmɔ ɛnee ɔkulo ye ɛdoavolɛma ne kpole la ati, ɛnee ɔlɛ ɛhulolɛ kɛ ɔbawu yeamaa bɛ. Na ɔ nye la kɛ ye ɛdoavolɛma kɔsɔɔti bayɛ zɔhane ala. Yemɔti ɔwɔ kɛ yɛnyia ɛhulolɛ kɛ yɛbagyinla ngyegyelɛ nloa na yɛawu yɛamaa yɛ mediema bɔbɔ.—1 Tɛsalonaekama 2:8.

15, 16. Tɛnlabelɛ fofolɛ boni a yɛwɔ nu a, na kɛzi Nyamenle kile yɛ adenle ɛ?

¹⁵ Gyisɛse ɛkpa “sonvolɛ nɔhavo mɔɔ ze nrɛlɛbɛ la” kɛ ɔmaa ye ɛdoavolɛma sunsum nu “aleɛ wɔ mekɛ ne anloa.” (Mateyu 24:45-47) Aleɛ ɛhye bie a le adehilelɛ titili mɔɔ bɛfa bɛmaa Nyamenle menli wɔ tɛnlabelɛ bie mɔ anu la. Kɛzi yɛ tɛnlabelɛ ne ɛhakyi ɛ?

¹⁶ Yɛde “awieleɛ mekɛ ne anu,” na ɔnrɛhyɛ yɛbahɔ anwongyelelɛ mɔɔ bie ɛtɛsile ɛlɛ la anu. (2 Temɔte 3:1; Maake 13:19) Eza bɛvuandi Seetan nee ye mbɔnsam ne mɔ bɛgua azɛlɛ ye azo, na yemaa alesama ɛlɛnwu amaneɛ kpalɛ. (Yekile 12:9, 12) Bieko, yɛlɛdi Gyisɛse mɛla ne azo ɔlua edwɛkpa ne mɔɔ yɛlɛka yɛahile menli dɔɔnwo wɔ aneɛ dɔɔnwo anu la azo!

17, 18. Kɛzi ɔwɔ kɛ yɛyɛ yɛ nyɛleɛ wɔ adehilelɛ mɔɔ yɛnyia la anwo ɛ?

¹⁷ Nyamenle ahyehyɛdeɛ ne maa yɛ ninyɛne dɔɔnwo mɔɔ yɛbava yɛayɛ edwɛkɛhanlɛ gyima ne a. Ɛfa ɛdi gyima ɔ? Yɛnyia kɛzi yɛbava ninyɛne ɛhye mɔ yɛali gyima wɔ adenle kpalɛ zo la anwo adehilelɛ wɔ yɛ ayia ne mɔ abo. Ɛbu adehilelɛ ɛhye mɔ kɛ ɔvi Nyamenle ɛkɛ ɔ?

¹⁸ Amaa Nyamenle ayila yɛ la, ɔwɔ kɛ yɛtie adehilelɛ kɔsɔɔti mɔɔ ɔdua Kilisiene asafo ne azo ɔfa ɔmaa yɛ la. Saa yɛyɛ tieyɛ kɛkala a, ɔnrɛyɛ se kɛ yɛbali adehilelɛ zo wɔ ‘anwongyelelɛ kpole’ ne anu,  mekɛ mɔɔ bɛbazɛkye Seetan ɛtane ewiade ne amuala la. (Mateyu 24:21) Yemɔ anzi, yɛbahyia adehilelɛ fofolɛ mɔɔ yɛbava yɛabɔ yɛ ɛbɛla wɔ tenlene ewiade fofolɛ ne anu, ɛleka mɔɔ Seetan ɛnrɛgyegye awie biala bieko la.

19, 20. Nwomamobɔleɛ boni mɔ a bɛbabukebuke nu a, na duzu a bazi a?

¹⁹ Mosisi mekɛ zo, ɛnee Yizilayɛ maanle ne hyia adehilelɛ fofolɛ, ɔti Nyamenle vale Mɛla ne maanle bɛ. Nzinlii, ɛnee ɔwɔ kɛ Kilisiene asafo ne di “Kelaese mɛla ne” azo. Zɔhane ala a Baebolo ne ka kile yɛ kɛ wɔ ewiade fofolɛ ne anu, yɛbanyia mbuluku anzɛɛ nwomamobɔleɛ mɔɔ adehilelɛ fofolɛ wɔ nu la a. (Kenga Yekile 20:12.) Bie a nwomamobɔleɛ ɛhye mɔ bahilehile mɔɔ Gyihova kpondɛ kɛ yɛyɛ wɔ zɔhane mekɛ ne anu la anu ahile yɛ. Saa menli kɔsɔɔti, mɔɔ mowuamra mɔɔ bɛdwazo bɛ la boka nwo la sukoa nwomamobɔleɛ ɛhye a, bɛbanwu mɔɔ Nyamenle kpondɛ kɛ bɛyɛ la. Nwomamobɔleɛ ne mɔ baboa yɛ yeamaa yɛanwu Gyihova adwenle wɔ ninyɛne nwo. Eza yɛbade Baebolo ne abo kpalɛ, yemɔti yɛbala ɛlɔlɛ, ɛbulɛ nee enililɛ ali yɛahile yɛ gɔnwo mɔ wɔ Paladaese. (Ayezaya 26:9) Nea ninyɛne dodo mɔɔ yɛbazukoa na yɛahilehile awie mɔ wɔ Belemgbunli Gyisɛse Kelaese adehilelɛ bo a!

²⁰ Saa yɛdi adehilelɛ mɔɔ “bɛhɛlɛ bɛ wɔ mbuluku ne mɔ anu la” azo na yɛdi nɔhalɛ yɛmaa Gyihova wɔ sɔnea mɔɔ li awieleɛ la anu a, ɔbahɛlɛ yɛ aluma wɔ “teasema buluku” anzɛɛ ngoane buluku ne anu. Yɛbanyia dahuu ngoane! Yemɔti ɔwɔ kɛ YƐGYINLA yɛkenga mɔɔ Baebolo ne ka la, YƐNEA kɛ yɛbade mɔɔ ɔkile la abo, na YƐTIE ɔlua Nyamenle adehilelɛ mɔɔ yɛbali zo kɛkala la azo. Saa yɛyɛ ninyɛne ɛhye mɔ a, yɛbahola yɛanyia yɛ ti wɔ anwongyelelɛ kpole ne anu na yɛazukoa Gyihova, yɛ ɛlɔlɛ Nyamenle ne mɔɔ ze nrɛlɛbɛ la anwo debie dahuu.—Nolobɔvo ne 3:11; Wulomuma 11:33.