1. Duzu a Gyihova ɛyɛ ɛmaa yɛ nuhua ko biala a?

GYIHOVA ɛhwe yɛ nuhua ko biala ɛbikye ɔ nwo. (Dwɔn 6:44) Dwenle mɔɔ ɛhye kile la anwo nea. Mɔɔ Gyihova ɛlɛneɛnlea menli mgbe mgbe dɔɔnwo mɔɔ wɔ ewiade la anu la, ɔnwunle debie mɔɔ sonle bolɛ la wɔ wɔ nu, ahonle kpalɛ mɔɔ bahulo ye la. (1 Ek. 28:9) Gyihova ze wɔ, ɔte wɔ edwɛkɛ bo yɛɛ ɔkulo wɔ. Nea kɛzi ɛhye kyekye yɛ rɛle a!

2. Ndonwo boni a Gyisɛse yɛle hilele kɛzi Gyihova anye die Ye mboane ne ko biala anwo la ɛ?

² Gyihova dwenle ɛ nwo kpalɛ yɛɛ ɔdwenle ɛ mediema Kilisienema kɔsɔɔti noko anwo. Amaa yɛade edwɛkɛ ɛhye abo la, Gyisɛse vale Gyihova totole mboaneneavolɛ nwo. Saa mboaneneavolɛ lɛ mboane 100 na ko minli a, duzu a ɔbayɛ a? “Asoo ɔnrɛgyakyi 99 ne wɔ awoka ne mɔ azo na ɔnrɛhɔkpondɛ ko ne mɔɔ ɛminli la ɔ?” Saa mboaneneavolɛ ne nwu boane ne a, ɔnrɛva ɔ nwo ɛya kɛ ɔminlinle la. Ɔbali fɛlɛko. Duzu a yɛsukoa yɛfi nu a? Boane biala anwo hyia Gyihova. Gyisɛse hanle kɛ: “Me Ze mɔɔ wɔ anwuma la anye ɛnlie nwo kɛ ngakula ɛhye mɔ anu ko bɔbɔ kɛminli.”​—Mat. 18:12-14.

3. Duzu a yɛbazuzu nwo wɔ edwɛkɛ ɛhye anu a?

³ Yɛngulo kɛ yɛbayɛ debie mɔɔ bamaa yɛ mediema ne mɔ asa anu ado la ɛlɛ. Kɛ ɔkɛyɛ na yɛanyɛ debie yɛammaa awie mɔ anli nyane ɛ? Yɛɛ saa awie yɛ debie mɔɔ gyegye yɛ noko la a, duzu a yɛbahola yɛayɛ a? Yɛbabua kpuya ɛhye mɔ wɔ edwɛkɛ ɛhye anu. Noko maa yɛlimoa yɛzuzu “ngakula ɛhye mɔ” mɔɔ bɛha bɛ nwo edwɛkɛ wɔ Mateyu tile 18 la anwo.

4. “Ngakula ɛhye mɔ” a le nwane mɔ?

⁴ “Ngakula ɛhye mɔ” a le Gyisɛse ɛdoavolɛma kɔsɔɔti ɔnva nwo ɛvolɛ biala mɔɔ bɛli la. Bɛ muala bɛle kɛ “ngakula la” ɔluakɛ bɛlɛ ɛhulolɛ kɛ bɛbamaa Gyisɛse Kelaese ahilehile bɛ. (Mat. 18:3) Bie a asolo ɛleka mɔɔ bɛvi nee bɛ amaamuo yɛɛ bɛlɛ adwenle nee subane ngakyile ɛdeɛ, noko bɛ muala bɛlɛ diedi wɔ Kelaese anu. Ɔdaye noko ɔkulo bɛ kpalɛ.​—Mat. 18:6; Dwɔn 1:12.

5. Saa awie maa Gyihova menli ne bie di nyane a, kɛzi ɔte nganeɛ ɛ?

⁵ “Ngakula ɛhye mɔ” amuala sonle bolɛ maa Gyihova. Amaa yɛade kɛzi Gyihova te nganeɛ abo la, suzu kɛzi yɛdayɛ noko yɛte nganeɛ wɔ ngakula nwo la anwo nea. Ngakula sonle bolɛ maa yɛ. Yɛkulo kɛ yɛbɔ bɛ nwo bane ɔluakɛ bɛnlɛ anwosesebɛ, anwubielɛ nee nrɛlɛbɛ kɛ mgbanyinli la. Nɔhalɛ nu, yɛngulo kɛ yɛbanwu kɛ awie ɛyɛ awie gyɛne debie yemaa ɔlɛdi nyane, noko ye titili ne, saa bɛyɛ kakula debie bɛmaa ɔdi nyane a, yɛ nye ɛnlie nwolɛ fee, bie bɔbɔ a yɛfa nwolɛ ɛya. Zɔhane ala a Gyihova kulo kɛ ɔbɔ yɛ nwo bane a. Saa awie yɛ debie maa Ye menli ne bie di nyane a, ɔ nye ɛnlie nwolɛ fee na bie bɔbɔ ɔ ɔfa nwolɛ ɛya!​—Aye. 63:9; Maake 9:42.

6. Kɛ mɔɔ 1 Kɔlentema 1:26-29 kile la, kɛzi menli mɔɔ wɔ ewiade ne anu la bu Gyisɛse ɛdoavolɛma ɛ?

⁶ Adenle boni bieko azo a Gyisɛse ɛdoavolɛma le kɛ “ngakula” a? Ɔyɛ, nwane mɔ a menli mɔɔ wɔ ewiade la bu bɛ kɛ bɛ nwo hyia a? Sukoavolɛma, menli mɔɔ ɛlie duma yɛɛ menli mɔɔ lɛ tumi la. Noko bɛbu Gyisɛse ɛdoavolɛma kɛ bɛle kɛ “ngakula” mɔɔ nvasoɛ ɛnle bɛ nwo zo yɛɛ bɛ nwo ɛngyia. (Kenga 1 Kɔlentema 1:26-29.) Noko tɛ zɔhane a Gyihova bu bɛ a.

7. Kɛzi Gyihova kulo kɛ yɛbu yɛ mediema ɛ?

⁷ Gyihova kulo ye azonvolɛ kɔsɔɔti, saa bɛva mekɛ tendenle bɛzonle ye o anzɛɛ bɔ zo mɔɔ bɛra nɔhalɛ ne anu o. Yɛ mediema ne mɔ amuala anwo hyia Gyihova, ɔti ɔwɔ kɛ yɛmaa bɛ nwo kyia yɛdayɛ noko. Yɛkpondɛ kɛ ‘yɛkulo mediema muala,’ tɛ bɛ nuhua bie mɔ ala. (1 Pita 2:17) Ɔwɔ kɛ yɛnyia ɛhulolɛ kɛ yɛbayɛ biala mɔɔ yɛbahola la yɛabɔ bɛ nwo bane na yɛanlea bɛ. Saa yɛnwu kɛ yɛyɛ debie yɛmaa yegyegye awie anzɛɛ yɛha ye ɛya a, ɔnle kɛ yɛbu yɛ nye yɛgua zo na yɛka kɛ ahenle ɛngyɛ na yeava ɛya, ɔwɔ kɛ ɔfa ɔkyɛ yɛ na ɔye ye adwenle ɔfi zo. Duzu ati a yɛ nyɛleɛ bahola agyegye menli bie mɔ a? Bie a kɛzi bɛtetele mediema bie mɔ la ati, ɔmaa bɛte nganeɛ kɛ bɛ nwo ɛngyia kpalɛ. Bie mɔ noko rale nɔhalɛ ne anu la ɛtɛkyɛle; bɛtɛsukoale kɛzi bɛbagyinla awie mɔ sinlidɔlɛ nloa la. Kɛzi ɔde ye biala la, ɔwɔ kɛ yɛyɛ mɔɔ yɛbahola biala la yɛmaa ninyɛne kɔ boɛ. Bieko, ɔwɔ kɛ awie mɔɔ awie mɔ gyɛne nyɛleɛ ta gyegye ye la nwu ye kɛ ɛhye ɛnle subane kpalɛ na ɔwɔ kɛ ɔdi nwolɛ gyima. Ɔwɔ kɛ ɔyɛ ɛhye amaa yeanyia anzodwolɛ na ɔ nee ɔ mediema anyia agɔnwolɛvalɛ kpalɛ.

8. Adwenle mɔɔ ɛnee menli dɔɔnwo lɛ wɔ Gyisɛse mekɛ zo la boni a hanle ye ɛdoavolɛma ne a?

⁸ Duzu a maanle Gyisɛse hanle “ngakula ɛhye mɔ” anwo edwɛkɛ a? Ɛnee ye ɛdoavolɛma ne ɛlimoa ɛbiza ye kɛ: “Nwane a le kpole kpalɛ wɔ anwuma Belemgbunlililɛ ne anu a?” (Mat. 18:1) Ɛnee Dwuuma mɔɔ wɔ Gyisɛse mekɛ zo la bu dibilɛ kɛ nwolɛ hyia kpalɛ. Abɔlɔba ko hanle kɛ: “Mɔɔ ɛnee hyia menli wɔ bɛ ɛbɛlabɔlɛ nu la a le anyunlunyia, enililɛ, dumalielɛ, menli nyunlu ɛlolɛ yɛɛ ɛbulɛ.”

9. Duzu a ɛnee ɔwɔ kɛ Gyisɛse ɛdoavolɛma ne yɛ a?

⁹ Ɛnee Gyisɛse ze kɛ ɛzulɛ subane ɛsosɔ ndinli wɔ Dwuuma amaamuo nu, ɔti ɔwɔ kɛ ye ɛdoavolɛma ne bɔ mɔdenle kpalɛ na bɛahola bɛadu zɔhane subane ne abo bɛavi bɛ ahonle  nu. Ɔzele bɛ kɛ: “Mɔɔ le kpole wɔ bɛ nu la ɛyɛ kakula, na mɔɔ li bɛ nyunlu la ɛzonle bɛ.” (Luku 22:26) Saa ‘yɛbu yɛ gɔnwo mɔ yɛtɛla yɛ nwo a,’ ɛnee yɛlɛyɛ yɛ nwo ngakula. (Fel. 2:3) Saa yɛnyia zɔhane subane ne a, ɔnrɛmaa yɛnrɛda yɛnrɛyɛ ninyɛne mɔɔ bamaa awie mɔ ali nyane la.

10. Folɛdulɛ mɔɔ Pɔɔlo vale maanle la boni a ɔwɔ kɛ yɛfa yɛyɛ gyima a?

¹⁰ Yɛ mediema ne mɔ kɔsɔɔti tɛla yɛ wɔ adenle bie azo. Saa yɛfa yɛ adwenle yɛsie bɛ subane mgbalɛ ne mɔ azo a, ɔnrɛyɛ se kɛ yɛbanwu ye zɔ. Ɔwɔ kɛ yɛfa folɛdulɛ mɔɔ Pɔɔlo vale maanle Kɔlentema la yɛdi gyima: “Na nwane a maa ɛyɛ ngakyile ɛfi ɛ gɔnwo anwo a? Nɔhalɛ nu, duzu a ɛlɛ ye mɔɔ wɔannyia ye a? Na saa ɛnyianle ye amgba a, ɛnee duzu ati a ɛmemaa ɛ nwo zo kɛ asɛɛ wɔannyia ye ɛ?” (1 Kɔl. 4:7) Ɔwɔ kɛ yɛnea boɛ na yɛandwe awie mɔ adwenle yɛamba yɛ nwo zo anzɛɛ yɛannyia adwenle kɛ yɛ nwo hyia tɛla awie mɔ. Saa adiema nrenyia bie kola maa ɛdendɛlɛ mɔɔ ka ahonle anzɛɛ adiema raalɛ bie kola bɔ Baebolo ɛzukoalɛ bo ndɛndɛ a, ɔwɔ kɛ bɛ nuhua biala yɛ ye ndɛndɛ fa nwolɛ nganvolɛ ne maa Gyihova.

11. Ɛzukoalɛdeɛ boni a wɔ Gyisɛse ndonwo ne mɔɔ fale belemgbunli bie nee ye akɛlɛ ne anwo la anu a?

¹¹ Mɔɔ Gyisɛse bɔle ye ɛdoavolɛma ne kɔkɔ kɛ bɛmmayɛ debie bɛmaa awie mɔ di nyane la anzi, ɔyɛle ndonwo bie mɔɔ fale belemgbunli bie nee ye akɛlɛ nwo la. Belemgbunli ne pɛle kakɛ kpole bie mɔɔ ɛnee ye akɛlɛ ne tua na ɔnrɛhola ye tua ɛlɛ la anu. Nzinlii, zɔhane akɛlɛ ne angulo kɛ ɔbapɛ kakɛ ekyi mɔɔ ɔ gɔnwo akɛlɛ bie tua ye la anu. Awieleɛ bɔkɔɔ ne, belemgbunli ne hɔdole zɔhane akɛlɛ ne mɔɔ ɛnze anwunvɔne la efiade. Duzu a yɛsukoa yɛfi nu a? Gyisɛse hanle kɛ: “Saa bɛ nuhua ko biala anvi ye ahonle nu anva ɔ diema ɛtane angyɛ ye a, zɔhane ala a me Ze mɔɔ wɔ anwuma la noko bayɛ bɛ a.”​—Mat. 18:21-35.

12. Saa yɛanva ɛtane yɛangyɛ a, kɛzi yɛgyegye awie mɔ ɛ?

¹² Mɔɔ akɛlɛ ne yɛle la anga ɔ ngomekye, ɔhanle awie mɔ noko. Mɔɔ limoa, yeanze ɔ gɔnwo akɛlɛ ne anwunvɔne, emomu “ɔvale ye ɔhɔdole efiade kɔkpula kɛ ɔkɛdua kakɛ ne.” Mɔɔ tɔ zo nwiɔ, ɔmaanle ngɛkɛlɛ gyɛne mɔɔ nwunle mɔɔ ɔyɛle la noko lile nyane. “Mɔɔ ɔ gɔnwo ngɛkɛlɛ ne mɔ nwunle mɔɔ ɛzi la, nyane kpole hanle bɛ.” Zɔhane ala a yɛ nyɛleɛ ka awie mɔ a. Saa awie fo yɛ na yɛanva yɛangyɛ ye a, duzu a bahola azi a? Mɔɔ limoa, saa yɛanva yɛangyɛ ye, yɛtwe yɛ nwo yɛfi ɔ nwo na yɛanla ɛlɔlɛ ali yɛangile ye a, yɛmaa ɔdi nyane. Mɔɔ tɔ zo nwiɔ, saa mediema gyɛne mɔɔ wɔ asafo ne anu la nwu kɛ anzodwolɛ ɛnle yɛ nee ahenle ne avinli a, ɔgyegye bɛ.

13. Duzu a ɛsukoa ɛfi adekpakyelɛnli bie anwubielɛ ne anu a?

¹³ Saa yɛfa yɛ mediema ɛtane yɛkyɛ bɛ a, ɔboa yɛdayɛ mumua ne nee awie mɔ. Ɛhye bie a dole adiema raalɛ adekpakyelɛnli bie mɔɔ yɛbavɛlɛ ye Crystal la a. Adiema raalɛ ko mɔɔ wɔ ye asafo ne anu la yɛle debie maanle ɔgyegyele ye. Crystal hanle kɛ: “Ɔdwu mekɛ ne bie a ye edwɛkɛ wowɔ me kɛ dadeɛ. Ɛnee mengulo kɛ me nee ye kɔ daselɛlilɛ bɔbɔ. Mɔdenlebɔlɛ nee anyelielɛ mɔɔ mefa meyɛ daselɛlilɛ gyima ne la bɔle ɔ bo kɛ ɔka aze.” Crystal dele nganeɛ kɛ ɔkola ɔgyinla mɔɔ adiema ne yɛ la azo ɔfa ɛya. Noko yeanva adiema ne anwo ɛya yeanzie ye nu anzɛɛ yeanva ye adwenle yeanzie kɛzi ɔte nganeɛ la azo. Ɔbɛlɛle ɔ nwo aze na ɔvale Ngɛlɛlera ne anu folɛdulɛ bie mɔɔ ɔnwunle ye wɔ edwɛkɛ mɔɔ ɔ ti ne se, “Forgive From Your Heart” mɔɔ wɔ October 15, 1999 The Watchtower ne anu la ɔlile gyima. Ɔvale ɔhyɛle ɔ diema raalɛ ne. Crystal hanle kɛ: “Kɛkala menwu kɛ yɛ muala yɛlɛbɔ mɔdenle kɛ yɛbava  subane fofolɛ ne yɛawula na Gyihova fa yɛ ɛtane kyɛ yɛ bɔkɔɔ alehyenlɛ biala. Mete nganeɛ kɛ bɛye adesoa bie bɛvi me kɔme zo. Eza me nye ɛlie.”

14. Kɛ mɔɔ Mateyu 18:21, 22 kile la, ngyegyelɛ boni a ɔbayɛ kɛ ɛnee ɛzoanvolɛ Pita lɛ a, na duzu a yɛsukoa yɛfi edwɛkɛ mɔɔ Gyisɛse hanle la anu a?

¹⁴ Yɛze kɛ ɔwɔ kɛ yɛfa ɛtane yɛkyɛ; na yemɔ a le debie kpalɛ mɔɔ ɔwɔ kɛ yɛyɛ a. Noko bie a ye ɛyɛlɛ ɛnla aze ɛmmaa yɛ. Ɔbayɛ kɛ ɔdwu mekɛ ne bie a zɔhane ala a ɛzoanvolɛ Pita te nganeɛ a. (Kenga Mateyu 18:21, 22.) Duzu a bahola aboa yɛ a? Mɔɔ limoa, dwenledwenle kɛzi Gyihova ɛva wɔ ɛtane ɛhye wɔ la anwo. (Mat. 18:32, 33) Yɛnfɛta kɛ ɔfa yɛ ɛtane ɔkyɛ yɛ, noko ɔfa ɔkyɛ yɛ bɔkɔɔ. (Edw. 103:8-10) Zɔhane ala a “ɔle yɛ gyima kɛ yɛdayɛ noko yɛkɛhulo yɛ nwo ngoko” a. Ɔti tɛ kɛ yɛkulo a yɛɛ yɛfa ɛtane yɛkyɛ a. Kɛzi ɔde ye biala la, ɔwɔ kɛ yɛfa yɛ mediema ɛtane yɛkyɛ bɛ. (1 Dwɔn 4:11) Mɔɔ tɔ zo nwiɔ, dwenledwenle mɔɔ yɛfa ɛtane yɛkyɛ a ɔfi nu ɔba la anwo. Ɔboa ahenle mɔɔ vonle yɛ la, ɔmaa koyɛlɛ ba asafo ne anu, ɔbɔ yɛ nee Gyihova agɔnwolɛvalɛ ne anwo bane yɛɛ ɔye adesoa ɔfi yɛ kɔme zo. (2 Kɔl. 2:7; Kɔl. 3:14) Mɔɔ li awieleɛ la, fa wɔ asɔneyɛlɛ to Ahenle mɔɔ se yɛva ɛtane yɛhyɛ la anyunlu. Mmamaa Seetan sɛkye anzodwolɛ mɔɔ wɔ ɛ nee ɛ mediema diedima avinli la. (Ɛfɛ. 4:26, 27) Ɔwɔ kɛ Gyihova boa yɛ amaa yɛandɔ Seetan ɛhane nu.

15. Kɛ mɔɔ Kɔlɔsaema 3:13 kile la, saa adiema bie nyɛleɛ gyegye yɛ a, duzu a ɔwɔ kɛ yɛyɛ a?

¹⁵ Na saa ɛ diema diedinli bie ɛyɛ debie mɔɔ gyegye wɔ kpalɛ la noko ɛ? Duzu a ɔwɔ kɛ ɛyɛ a? Yɛ biala mɔɔ ɛbahola la maa anzodwolɛ ɛdɛnla bɛ avinli. Ka kɛzi ɛte nganeɛ la kile Gyihova wɔ asɔneyɛlɛ nu. Sɛlɛ ye kɛ ɔboa ahenle mɔɔ vonle wɔ la na ɔboa wɔ ɔmaa ɛnwu ahenle ne subane mgbalɛ ne mɔɔ ɔdaye Gyihova ɔ nye die nwo la. (Luku 6:28) Saa ɛnrɛhola ɛnrɛbu ɛ nye ɛnrɛgua mɔɔ ɛ diema ne ɛyɛ  la azo a, suzu adenle kpalɛ mɔɔ ɛbahola wɔalua zo ɛ nee ye adendɛ la anwo. Saa dahuu ɛnyia adwenle kɛ tɛ ɛ diema ne anye fuu a ɔkulo kɛ ɔyɛ ninyɛne mɔɔ baboda wɔ la a, ɔbaboa. (Mat. 5:23, 24; 1 Kɔl. 13:7) Saa ɛ nee ye ɛlɛtendɛ a, fa ye kɛ ɔnlɛ ɛ nwo adwenle ɛtane. Na saa ɔngulo kɛ ɔ nee wɔ siezie bɛ avinli ɛ? Kɔ zo nyia ɔ nwo “abotane.” Mmamaa ɛ sa nu to. (Kenga Kɔlɔsaema 3:13.) Mɔɔ hyia kpalɛ la, mmafa ɔ nwo ɛyɛ ɛsie wɔ nu ɔluakɛ yemɔ bahola azɛkye ɛ nee Gyihova agɔnwolɛvalɛ ne. Mmamaa debie biala tenda ɛ gyakɛ anu ɛlɛ. Ɛyɛ ye zɔ a, ɛbahile kɛ ɛkulo Gyihova ɛtɛla debie gyɛne biala.​—Edw. 119:165.

16. Gyima boni a la yɛ nuhua ko biala anwo zo a?

¹⁶ Yɛ nye sɔ nwolɛ adenle mɔɔ yɛnyia yɛlɛsonle Gyihova wɔ koyɛlɛ nu kɛ “mboane ekpunli ko” mɔɔ yɛlɛ “neavolɛ ko” la! (Dwɔn 10:16) Ahyehyɛdeɛ Mɔɔ Yɛ Gyihova Ɛhulolɛdeɛ buluku ne mukelɛ 165 ka kɛ: “Saa ɛlɛnyia koyɛlɛ zɔhane azo nvasoɛ a ɛnee ɔle wɔ gyima kɛ ɛbaboa wɔamaa yeadɛnla ɛkɛ.” Ɔti “ɔwɔ kɛ yɛbɔ mɔdenle yɛnwu yɛ mediema mrenyia nee mraalɛ kɛmɔ Gyihova nwu bɛ la.” Yɛ muala yɛle “ngakula” mɔɔ yɛsonle bolɛ yɛmaa Gyihova. Zɔhane a ɛbu ɛ mediema ɔ? Gyihova nwu debie biala mɔɔ ɛyɛ ɛboa bɛ na ɛnea bɛ la, na ɔ nye die nwo kpalɛ.​—Mat. 10:42.

17. Duzu a yɛbɔ kpɔkɛ kɛ yɛbayɛ a?

¹⁷ Yɛkulo yɛ mediema diedima. Ɔti “yɛbɔ kpɔkɛ kɛ yɛnrɛva azedolɛ bolɛ anzɛɛ adenzilɛ debie bie yɛnrɛdo adiema bie anyunlu.” (Wlo. 14:13) Yɛbu yɛ mediema ne mɔ kɛ bɛtɛla yɛ na yɛkulo kɛ yɛfi yɛ ahonle nu yɛfa bɛ ɛtane yɛkyɛ bɛ. Ɔnle kɛ yɛmaa awie mɔ nyɛleɛ gyegye yɛ. Emomu, “bɛmaa yɛkpondɛ ninyɛne mɔɔ fa anzodwolɛ ba nee ninyɛne mɔɔ boa maa yɛmaa yɛ nwo ngoko anwosesebɛ la.”​—Wlo. 14:19.