1, 2. Anwodozo boni a ɔwɔ kɛ yɛ nuhua ko biala nyia a? (Nea mɔlebɛbo nvoninli ne.)

KƐ MƆƆ bɛhilehile nu wɔ edwɛkɛ mɔɔ li ɛhye anyunlu anu la, Abɔnsam se Gyihova di tumi wɔ adenle ɛtane zo, na saa alesama sie bɛ nwo a ɔbawie bɛ boɛ. Seetan le nɔhalɛ ɔ? Fa ye kɛ anrɛɛ alesama kola sie bɛ nwo na bɛtɛnla aze dahuu. Asoo anrɛɛ ɔbawie bɛ boɛ na bɛ nye alie mɔɔ Nyamenle ɛnnea bɛ nwo zo ɔ? Saa ɛbahola wɔadɛnla aze dahuu mɔɔ tɛ Nyamenle a sie wɔ a, ɛ nye balie ɔ?

² Awie ɛnrɛhola ɛnrɛbua kpuya zɔhane ɛnrɛmaa wɔ. Ɔwɔ kɛ awie biala dwenle nwolɛ kpalɛ. Mekɛ mɔɔ yɛlɛyɛ ɛhye la, ɔwɔ kɛ ɔda ali kɛ Nyamenle tumililɛ ne ala a le kpalɛ na ɔfɛta a. Ɔwɔ kɛ yɛfi yɛ ahonle nu yɛgyinla ɔ nzi. Baebolo ne a maa yɛnyia anwodozo zɛhae a. Kɛ neazo la, suzu mɔɔ Ngɛlɛlera ne ka wɔ Gyihova tumililɛ mɔɔ fɛta la anwo.

3. Kɛmɔti a ɔfɛta kɛ Gyihova yɛ aleɛabo Belemgbunli a?

³ Ɔfɛta kɛ Gyihova yɛ aleɛabo Belemgbunli ɔluakɛ ɔdaye a ɔle Tumivolɛ Nyamenle nee Bɔvolɛ a. (1 Ek. 29:11; Gyi. 4:24) Wɔ Yekile 4:11 ne, menli 144,000 ne mɔɔ Kelaese nee bɛ bali tumi la ɛlɛka ye wɔ ɛnyelɛzodeɛnwunlɛ nu kɛ: “Gyihova yɛ Nyamenle, ɛfɛta kɛ ɛdie anyunlunyia, enililɛ nee tumi,  ɔluakɛ ɛdawɔ a ɛbɔle ninyɛne kɔsɔɔti a, na wɔ ɛhulolɛ zo a bɛwɔ ɛkɛ na ɛbɔle bɛ a.” Nɔhalɛ nu, kɛmɔ Gyihova a bɔle ninyɛne kɔsɔɔti la ati, ɔfɛta kɛ ɔdi alesama nee anwumabɔvolɛma anwo zo tumi.

4. Kɛmɔti a saa yɛdwazo yɛtia Gyihova tumililɛ ne a ɛnee yɛlɛfa yɛ fanwodi ne yɛali gyima wɔ adenle ɛtane zo ɛ?

⁴ Seetan ɛtɛbɔle ɛhwee. Ɔti, tɛ ɔdaye a ɔwɔ kɛ ɔdi tumi wɔ ewiade a. Gyihova tumililɛ ne mɔɔ ɔ nee agyalɛma mɔɔ limoa la dwazotiale la kile kɛ bɛmemanle bɛ nwo zo. (Gyɛ. 10:23) Nɔhalɛ nu, kɛ abɔdeɛ mɔɔ lɛ nwolɛ adenle kpa mɔɔ bɛkulo la, bɛbahola bɛali bɛ ti anwo mɔɔ Nyamenle ɛnnea bɛ nwo zo. Noko asoo ɛnee bɛlɛ adenle bɛyɛ zɔ ɔ? Kyɛkyɛ. Fanwodi mɔɔ menli lɛ la maa bɛkola bɛkpa ninyɛne dɔɔnwo mɔɔ bɛkulo la dahuu. Noko, ɛhye ɛngile kɛ ɔwɔ kɛ bɛdwazo bɛtia bɛ Bɔvolɛ ne nee Ngoane Maavolɛ ne. Ɔda ali kɛ, saa wɔangyinla Gyihova afoa a ɛnee ɛlɛfa wɔ fanwodi ahyɛlɛdeɛ ne wɔali gyima wɔ adenle ɛtane zo. Kɛ alesama la, Gyihova tumililɛ ne ala a ɔwɔ kɛ yɛgyinla ɔ nzi a.

5. Kɛmɔti a yɛbahola yɛalie yɛali kɛ Nyamenle kpɔkɛzilɛ le fɔɔnwo ɛ?

⁵ Ndelebɛbo bie ati, ɔfɛta kɛ Gyihova yɛ aleɛabo Belemgbunli. Ɔfa pɛlepɛlelilɛ mɔɔ di munli la ɔdi tumi. Ɔka kɛ: “Mame a mele [Gyihova] a. Me ɛhulolɛ ne gyi kpundii, yɛɛ meyɛ mɔɔ le pɛpɛ nee fɔɔnwo. Ɛhye mɔ a sɔ me nye a.” (Gyɛ. 9:24) Ɔngyinla mɛla mɔɔ alesama mɔɔ bɛnli munli ɛhyehyɛ la azo ɔngile mɔɔ le pɛpɛ nee fɔɔnwo la. Ɔle pɛlepɛle, na ɔgyinla ye pɛlepɛlelilɛ ne azo ɔfa mɛla ɔmaa alesama. “Tenleneyɛlɛ nee pɛlepɛlelilɛ le wɔ belemgbunli ebia ne adiabo,” ɛhye ati yɛbahola yɛanyia anwodozo kɛ ye mɛla, ngyinlazo nee ye kpɔkɛzilɛ ne mɔ le fɔɔnwo. (Edw. 89:14; 119:128) Mɔɔ nee ɛhye le ngakyile la, wɔ Gyihova tumililɛ ne mɔɔ Seetan ɛdendɛ ɛtia la amuala anzi, ɔtɛkolale ɔtɛmaanle yɛtɛnyianle ewiade mɔɔ pɛlepɛlelilɛ wɔ nu la.

6. Ndelebɛbo boni ati a ɔfɛta kɛ Gyihova di ewiade ne azo tumi a?

⁶ Bieko, ɔfɛta kɛ Gyihova yɛ aleɛabo Belemgbunli, ɔluakɛ ɔlɛ adwenle nee nrɛlɛbɛ mɔɔ ɔbava yeanlea ewiade ne azo la. Kɛ neazo la, Nyamenle boale ɔ Ra ne ɔmaanle ɔyɛle ewule ngakyile mɔɔ dɔketama angola bɛ ayile yɛ la ayile. (Mat. 4:23, 24; Maake 5:25-29) Ɛhye ɛnle nwanwane debie ɛmmaa Gyihova. Ɔze mɔɔ kɔ zo wɔ sonlabaka ne anu la yɛɛ ɔlɛ tumi ɔyɛ ewule biala ayile. Zɔhane ala a ɔlɛ tumi ɔdwazo mowuamra na ɔkola ɔsi esiane ngakyile adenle a.

7. Kɛzi Gyihova nrɛlɛbɛ ne le kpole tɛla ewiade ne mɔɔ wɔ Seetan tumi bo la ɛdeɛ ne ɛ?

⁷ Ewiade ne mɔɔ wɔ Seetan tumi bo la ɛlɛkpondɛ adenle alua zo amaa anzodwolɛ ara maanle maanle ne mɔ avinli; noko Gyihova ala a lɛ nrɛlɛbɛ ɛhye mɔɔ bahola amaa anzodwolɛ ara ewiade a. (Aye. 2:3, 4; 54:13) Mekɛ mɔɔ yɛlɛsukoa Gyihova anwo nrɛlɛbɛ nee ndelebɛbo la, ɔmaa yɛte nganeɛ kɛ ɛzoanvolɛ Pɔɔlo mɔɔ sunsum ne maanle ɔhɛlɛle kɛ: “O nea kɛzi Nyamenle anwonyia nee ye nrɛlɛbɛ nee ye adwenle le kpole a! Nea, bɛngola bɛnde ye ndɛnebualɛ bo yɛɛ bɛngola bɛneɛnlea ye ndenle nu bɛnwie ɛlɛ!”—Wlo. 11:33.

8. Duzu a ka wɔ ahonle wɔ kɛzi Gyihova di tumi la anwo a?

⁸ Baebolo ne ka dɔɔnwo tɛla Gyihova mɔɔ ɔmaa yɛanwu ye kɛ ɔfɛta kɛ ɔdi tumi la. Ɔmaa yɛnwu deɛmɔti ye tumililɛ ne kpogya tɛla gyɛne biala la. Debie ko a le kɛ ɔdi tumi wɔ ɛlɔlɛ nu. Nɔhalɛ nu, kɛzi ɔdi ye tumi ne la ka yɛ ahonle kpole. Ɔle  ‘anwunvɔnezelɛ nee atiakunlukɛnlɛma Nyamenle, ɔnva ɛya mgbane mgbane, yɛɛ ɛhulolɛ kpundii nee nɔhalɛlilɛ ɛyi ye tɛkɛɛ.’ (Ade. 34:6) Nyamenle bu menli mɔɔ sonle ye la yɛɛ ɔdi bɛ eni. Ɔnea yɛ nwo zo kpalɛ ɔtɛla kɛzi yɛbahola yɛanlea yɛ nwo zo la. Mɔɔ nee Abɔnsam edwɛkɛ ne ɛnle ko la, Gyihova ɛnva debie kpalɛ ɛnvea ye nɔhalɛ azonvolɛ. Ɔmaanle ye kulovolɛ Ralɛ ne bɔbɔ rawule amaa yɛanyia dahuu ngoane!—Kenga Edwɛndolɛ 84:11; Wulomuma 8:32.

9. Kɛzi yɛkola yɛnwu ye kɛ Nyamenle dwenle yɛ nuhua ko biala anwo ɛ?

⁹ Gyihova dwenle ye menli nwo kɛ ekpunli, noko tɛ yemɔ ala ɛne. Ɔ nye die awie ko biala anwo. Kɛ neazo la, Gyihova vale ndɛnebuavolɛma lile gyima hilele Yizilayɛ maanle ne adenle na bɛlile bɛ agbɔvolɛ anwo zo konim wɔ kɛyɛ ɛvolɛ ɛya nsa anu. Wɔ ngyegyelɛ mekɛ zɔhane anu, ɔ rɛle anvi Wulutu mɔɔ ɔnle Yizilayɛnli la. Ɔbɔle afɔle kpole ɔvale ɔ nwo ɔwulale nɔhalɛ ɛzonlenlɛ nu. Gyihova yilale Wulutu maanle ɔnyianle kunli na ɔwole kakula nrenyia. Noko tɛ ɔmuala ɛne. Saa bɛdwazo Wulutu a, ɔbade kɛ ɔ ra ne boka abusua ne mɔɔ Mɛzaya ne luale zo rale la anwo. Pɛ kɛzi ɔ nye balie wɔ mekɛ mɔɔ ɔbanwu kɛ ɛnee ɔ nwo edwɛkɛ wɔ Baebolo buluku ne mɔɔ ye duma la zo anu la anwo nvoninli nea!—Wut. 4:13; Mat. 1:5, 16.

10. Duzu ati a, Gyihova tumililɛ ne ɛmmaa yɛ nwo ɛngyele yɛ yɛɛ ɔnle kyengye ɛ?

¹⁰ Gyihova tumililɛ ɛmmaa yɛ nwo ɛngyele yɛ yɛɛ ɔnle kyengye. Ɔmaa yɛnyia fanwodi na yɛ nye die. (2 Kɔl. 3:17) Devidi hanle kɛ: “Kpoleyɛlɛ nee anyunlunyia ɛbɔ ɛyia ye, [Nyamenle] tumi nee anyelielɛ ɛyi ye Ɛzonlenlɛ Sua ne.” (1 Ek. 16:7, 27) Edwɛndolɛnli Yitan noko hɛlɛle kɛ: “O [Gyihova], nyilalɛ ɛha bɛdabɛ mɔɔ bɛfa edwɛndolɛ bɛtea nu bɛfɛlɛ wɔ, nee bɛdabɛ mɔɔ bɛdua wɔ ahunlunyele wienyi ne anu la. Nyilalɛ ɛha bɛdabɛ mɔɔ bɛfa wɔ duma ne bɛtu bɛ nwo, na bɛyeyɛ wɔ tenleneyɛlɛ ne la.”—Edw. 89:15, 16.

11. Kɛ ɔkɛyɛ na anwodozo mɔɔ yɛlɛ kɛ Gyihova tumililɛ le kpalɛ la anu amia ɛ?

¹¹ Saa yɛta yɛdwenledwenle Gyihova kpalɛyɛlɛ nwo a, anwodozo mɔɔ yɛlɛ kɛ ye tumililɛ le kpalɛ la anu bamia. Ɔbamaa yɛade nganeɛ kɛ edwɛndolɛnli ne la, ɔhanle kɛ: “Wɔ sua nu ɛkɛ ne kenle ko ɛdɛnlanlɛ le kpalɛ tɛla kenle apenle wɔ ɛleka gyɛne.” (Edw. 84:10) Yɛ nye bahola alie wɔ ɛleka gyɛne ɔ? Gyihova le yɛ Hyehyɛvolɛ nee Bɔvolɛ, ɔti ɔze mɔɔ yɛhyia nwo na yɛ nye alie kpalɛ la, na ɔmaa yɛnyia ye dɔɔnwo. Ɛhye le zɔ saa bɔbɔ ɔwɔ kɛ yɛbɔ afɔle na yɛahola yɛayɛ mɔɔ ɔkpondɛ yeavi yɛ ɛkɛ la a, yɛtie Gyihova a yɛ nye balie dahuu.—Kenga Ayezaya 48:17.

12. Duzu ati a yɛkulo kɛ yɛgyinla Gyihova tumililɛ ne anzi a?

¹² Baebolo ne kile kɛ wɔ Kelaese Ɛvolɛ Apenle Ko Tumililɛ ne anzi, bie mɔ badwazo atia Gyihova tumililɛ ne. (Yek. 20:7, 8) Duzu a bamaa bɛayɛ zɔ a? Abɔnsam mɔɔ bɛbaye ye bavi efiade la babɔ mɔdenle kɛ ɔdua angomedi subane mɔɔ menli lɛ la azo yeabɛlɛbɛla bɛ kɛ mɔɔ ɔyɛ ye dahuu la. Ɔbabɔ mɔdenle kɛ ɔmaa menli alie ali kɛ bɛbahola bɛadɛnla aze dahuu mɔɔ ɔngyia kɛ bɛtie Gyihova a? Ɔda ali kɛ ɛhye ɛnle nɔhalɛ fee. Ɔwɔ kɛ yɛbiza yɛ nwo kɛ: Mebalie adalɛ edwɛkɛ ɛhye meali ɔ? Saa yɛkulo Gyihova na yɛsonle ye ɔluakɛ ɔle kpalɛ yɛɛ ɔfɛta kɛ Aleɛabo Belemgbunli la ati a, yɛbakpo atisesebɛ adwenle ɛhye. Yɛkpondɛ kɛ yɛtɛnla Gyihova mɔɔ le ɛlɔlɛ la tumililɛ bo.

13. Saa yɛsukoa Nyamenle a, kɛzi ɔkile kɛ yɛgyi ye tumililɛ ne anzi ɛ?

¹³ Nɔhalɛ nu, ɔwɔ kɛ yɛfi yɛ ahonle muala anu yɛgyinla Gyihova tumililɛ ne anzi. Kɛ mɔɔ yɛnwu ye la, ɔfɛta kɛ ɔdi tumi, yɛɛ kɛzi ɔdi tumi la le kpalɛ kpole. Saa yɛgyinla yɛ munlililɛ nu na yɛfa nɔhalɛlilɛ yɛsonle Nyamenle a, ɛnee yɛlɛgyinla Gyihova tumililɛ ne anzi. Boni bieko a yɛbahola yɛayɛ yɛagyinla ye tumililɛ ne anzi a? Saa yɛyɛ yɛ ninyɛne yɛmaa ɔ nee Gyihova adehilelɛ yia a. Saa yɛdi ninyɛne nwo gyima kɛ mɔɔ anrɛɛ Gyihova bayɛ ye la a, ɛnee yɛlɛkile kɛ yɛkulo ye yɛɛ yɛgyi ye tumililɛ ne anzi.—Kenga Ɛfɛsɛsema 5:1, 2.

14. Kɛzi asafo nu mgbanyima nee mbusua tile bahola azukoa Gyihova ɛ?

¹⁴ Baebolo ne mɔɔ yɛsukoa la ɛmaa yɛnwu ye kɛ, Gyihova di tumi wɔ ɛlɔlɛ adenle zo. Ɛhye ati mbusua tile nee asafo nu mgbanyima mɔɔ bɛ nye die Gyihova tumililɛ ne anwo la bazukoa ye, bɛnrɛyɛ kyengye anzɛɛ bɛnrɛtinlitinli awie mɔ anwo zo. Pɔɔlo yɛle ɛhye anwo neazo, ɔzukoale Nyamenle nee ɔ Ra ne. (1 Kɔl. 11:1) Pɔɔlo ambɔ awie mɔ anyiemgba yɛɛ yeantinlitinli bɛ kɛ bɛyɛ debie. Emomu, ɔmaanle bɛ anwosesebɛ kɛ bɛyɛ zɔ. (Wlo. 12:1; Ɛfɛ. 4:1; Fae. 8-10) Kɛ Gyihova yɛ ye ninyɛne la ɛne. Yemɔti, kɛ ɔwɔ kɛ yɛ kɔsɔɔti mɔɔ yɛkulo ye na yɛ nye die ye tumililɛ ne nwo la noko yɛ la ɛne.

15. Saa yɛbu bɛdabɛ mɔɔ bɛlɛ teokelase tumi la a, kɛzi ɔkile kɛ yɛgyi Gyihova tumililɛ ne anzi ɛ?

¹⁵ Kɛzi yɛyɛ yɛ nyɛleɛ wɔ menli mɔɔ Nyamenle ɛmaa bɛ tumi la anwo ɛ? Saa yɛfi ɛbulɛ nu yɛdi bɛ adehilelɛ nzi a, ɛnee yɛlɛkile kɛ yɛgyi Gyihova tumililɛ ne anzi. Saa yɛnde kpɔkɛzilɛ bie abo  kpalɛ anzɛɛ yɛnlie yɛndo nu bɔbɔ a, yɛkulo kɛ yɛdi teokelase adehilelɛ nzi. Ɛhye ɛnle zɔ wɔ ewiade ne anu, noko kɛ ɔde wɔ Gyihova tumililɛ bo la ɛne. (Ɛfɛ. 5:22, 23; 6:1-3; Hib. 13:17) Saa yɛyɛ zɔ a ɔboa yɛ, ɔluakɛ Nyamenle kpondɛ kɛ ɔwie yɛ boɛ.

16. Kɛzi menli mɔɔ gyi Nyamenle tumililɛ ne anzi la si kpɔkɛ ɛ?

¹⁶ Yɛ kpɔkɛzilɛ noko maa bɛnwu kɛ yɛgyi Nyamenle tumililɛ ne anzi. Gyihova ɛmkpondɛ kɛ ɔmaa yɛ mɛla fɔɔnwo wɔ tɛnlabelɛ biala anu. Emomu, ɔmaa yɛnwu ye adwenle wɔ ninyɛne nwo ɔfa ɔkile yɛ adenle. Kɛ neazo la, ɔmmaa Kilisienema mɛla fɔɔnwo wɔ bɛ adɛladeɛ ɛwulalɛ nwo. Emomu, ɔkulo kɛ yɛkpa adɛladeɛ mɔɔ fɛta na yɛsiezie yɛ nwo kɛ Kilisienema mɔɔ nyiane wɔ yɛ nye zo. (1 Tim. 2:9, 10) Eza ɔngulo kɛ yɛdua yɛ kpɔkɛzilɛ zo yɛtenda awie mɔ agyakɛ anu anzɛɛ yɛgyegye bɛ. (1 Kɔl. 10:31-33) Saa yɛangyinla mɔɔ yɛdayɛ mumua ne yɛkulo la azo, emomu adwenle mɔɔ Gyihova lɛ ye wɔ ninyɛne nwo la azo yɛsi kpɔkɛ a, ɛnee yɛlɛkile kɛ yɛkulo ye na yɛgyi ye tumililɛ ne anzi.

17, 18. Kɛzi agyalɛma bahola ahile kɛ bɛgyi Gyihova tumililɛ ne anzi ɛ?

¹⁷ Suzu adenle ko mɔɔ Kilisiene agyalɛma bahola alua zo ahile kɛ bɛkulo Gyihova na bɛgyi ye tumililɛ ne anzi la anwo. Bie a tɛ kɛ agyalɛma ne anye la kɛ bɛ agyalɛ ne bayɛ la ɛne. Bie a ɛnee bɛlɛyia ngyegyelɛ kpole wɔ bɛ agyalɛ nu. Saa ɔle zɔ a, ɛnee ɔwɔ kɛ bɛsuzu kɛzi Gyihova nee Yizilayɛma lile la anwo. Ɔhanle kɛ ɔle kunli ɔmaa tete Yizilayɛ maanle ne. (Aye. 54:5; 62:4) “Agyalɛ” zɔhane anu yɛle se kpalɛ! Noko Gyihova ampele ɔ nwo amkpo ye. Ɔzele maanle ne anwunvɔne yɛɛ ɔlile ngyekyeleɛ mɔɔ ɔ nee bɛ yɛle la azo. (Kenga Edwɛndolɛ 106:43-45.) Ɛlɔlɛ kpundii ɛhye ɛmaa yɛmbikye Gyihova ɔ?

¹⁸ Agyalɛma mɔɔ bɛkulo Gyihova la sukoa ye. Saa bɛlɛyia ngyegyelɛ wɔ bɛ agyalɛ nu bɔbɔ a, bɛmbɔ mɔdenle kɛ bɛdua adenle mɔɔ Ngɛlɛlera ne ɛmmaa adenle la azo bɛabɔ ewole. Bɛze kɛ Gyihova ɛha bɛ mu nwiɔ ɛbɔ nu na ɔkulo kɛ ‘bɛbeta’ bɛ nwo kyengye. Ngɛlɛlera ne ka kɛ, adwɔmane ɛbɔlɛ ala a maa bɛkola bɛbɔ ewole na bɛgya fofolɛ a. (Mat. 19:5, 6, 9) Saa bɛbɔ mɔdenle kɛ ɔnva nwo kɛzi agyalɛ ne de biala la bɛmaa yeayɛ kpalɛ na anyelielɛ ara nu a, ɛnee bɛlɛkile kɛ bɛgyi Gyihova tumililɛ ne anzi.

19. Saa yɛfo wɔ Nyamenle tumililɛ ne mɔɔ yɛgyinla ɔ nzi la anwo a, duzu a ɔwɔ kɛ yɛyɛ a?

¹⁹ Kɛmɔ yɛnli munli la ati, ɔdwu mekɛ ne bie a yɛ nyɛleɛ bamaa Gyihova ali nyane. Ɛhye ati, yevi ɛlɔlɛ nu yeyɛ ngyehyɛleɛ yemaa yɛ ɔlua Kelaese ɛkpɔnedeɛ ne ati. Yemɔti, saa yɛfo a, ɔwɔ kɛ yɛsɛlɛ Gyihova kɛ ɔva ɔhyɛ yɛ. (1 Dwɔn 2:1, 2) Kɛ anrɛɛ yɛbahɔ zo yɛali nyane la, ɔwɔ kɛ yɛbɔ mɔdenle kɛ yɛbazukoa debie yɛavi yɛ nvonleɛ ne anu. Saa yɛbeta Gyihova a, ɔbava yɛ ɛtane yɛahyɛ yɛ, na yɛaboa yɛ yeamaa yɛade kpɔkɛ wɔ sunsum nu amaa yɛahola yɛazonle ye dahuu.—Edw. 103:3.

20. Duzu ati a ɔwɔ kɛ yɛgyinla Gyihova tumililɛ ne anzi ɛnɛ a?

²⁰ Wɔ ewiade fofolɛ ne anu yɛ muala yɛbadɛnla Gyihova tumililɛ ne abo na yɛazukoa ye tenlene ndenle ne mɔ. (Aye. 11:9) Yɛnyia ngilehilelɛ zɔhane dɔɔnwo ɛnɛ. Ɔnrɛhyɛ, awie biala ɛnrɛdendɛ ɛnrɛtia Nyamenle tumililɛ ne bieko. Ɛnɛ a le mekɛ mɔɔ ɔwɔ kɛ yɛdua yɛ munlililɛ, yɛ ɛzonlenlɛ, nee mɔdenle mɔɔ yɛbɔ yɛazukoa Nyamenle wɔ yɛ nyɛleɛ kɔsɔɔti anu la azo yɛahile kɛ yɛgyi ye tumililɛ ne anzi a.