1-2. Duzu a Baebolo ne ka wɔ Yizilayɛ arelemgbunli bie mɔ anwo a?

 BAEBOLO ne bobɔ mrenyia mɔɔ bo 40 mɔɔ bɛlile belemgbunli wɔ Yizilayɛ la aluma. a Zɔhane kɛlɛtokɛ ne ka ninyɛne mɔɔ bɛyɛle la anwo edwɛkɛ wienyi. Kɛ neazo la, arelemgbunli mgbalɛ mɔɔ wɔ nu bɔbɔ la yɛle ninyɛndane bie mɔ. Suzu belemgbunli kpalɛ Devidi anwo. Gyihova hanle kɛ: ‘Me sonvolɛ Devidi vale ye ahonle muala ɔ nee me luale na ɔyɛle mɔɔ le kpalɛ wɔ me nye zo la.’ (1 Arl. 14:8) Noko zɔhane nrenyia ne nee raalɛ bie mɔɔ bɛgya ye la bɔle adwɔmane ɛbɛla na ɔbɔle adwenle ɔmaanle bɛhunle raalɛ ne ahu ne wɔ konle nu.—2 Sa. 11:​4, 14, 15.

² Bieko, arelemgbunli mɔɔ bɛanli nɔhalɛ la anu dɔɔnwo yɛle ninyɛne mgbalɛ bie mɔ. Fa Rilihɔbowam kɛ neazo. Wɔ Gyihova anye zo, “ɔyɛle ɛtane.” (2 Ek. 12:14) Noko mɔɔ Nyamenle hanle hilele Rilihɔbowam kɛ ɔmaa Yizilayɛ mbusua bulu ne ɛde bɛ nwo ɛvi ye belemgbunlililɛ ne anwo la, ɔdiele. Eza ɔliele azuamgbole mɔɔ wɔ ye maanle ne anu la anwo bane amaa yeabɔ Gyihova menli ne anwo bane.—1 Arl. 12:​21-24; 2 Ek. 11:​5-12.

3. Kpuya mɔɔ anwo hyia la boni a yɛbahola yɛabiza a, na duzu a yɛbazuzu nwo wɔ edwɛkɛ ɛhye anu a?

³ Ɔwɔ kɛ yɛnwu kpuya ɛhye mɔɔ hyia la anwo mualɛ. Saa Yizilayɛ arelemgbunli yɛle mɔɔ le kpalɛ nee mɔɔ le ɛtane la a, ɛnee duzu a Gyihova gyinla zo bu belemgbunli bie kɛ ɔdi nɔhalɛ anzɛɛ ɔnli nɔhalɛ wɔ Ɔ nye zo a? Kpuya zɔhane anwo mualɛ baboa  yɛ yeamaa yɛade mɔɔ ɔhyia kɛ yɛyɛ amaa yɛazɔ Gyihova anye la abo. Yɛbazuzu ninyɛne nsa mɔɔ ɔda ali kɛ Gyihova gyinlanle zo bule Yizilayɛ arelemgbunli kɛ bɛdi nɔhalɛ anzɛɛ bɛnli nɔhalɛ la anwo: mɔɔ wɔ bɛ ahonle nu la, kɛzi bɛnlunle bɛ nwo la nee kɛzi bɛbetanle nɔhalɛ ɛzonlenlɛ nwo la.

BƐVALE BƐ AHONLE MUALA BƐHULOLE GYIHOVA

4. Ngakyile boni a wɔ arelemgbunli mɔɔ lile nɔhalɛ nee bɛdabɛ mɔɔ bɛanli nɔhalɛ la anu a?

⁴ Arelemgbunli mɔɔ zɔle Gyihova anye la a le bɛdabɛ mɔɔ bɛvale bɛ ahonle muala bɛzonlenle ye la. b Belemgbunli kpalɛ Gyɛhɔhyafate “vale ye ahonle muala kpondɛle Gyihova.” (2 Ek. 22:9) Baebolo ne hanle Dwosaya anwo edwɛkɛ kɛ: “Arelemgbunli mɔɔ limoale ɔ nyunlu la, biala ɛnle ɛkɛ mɔɔ ɔvale ye ahonle muala . . . ɔziale ɔrale Gyihova ɛkɛ a.” (2 Arl. 23:25) Na Sɔlɔmɔn mɔɔ yɛle ɛtane wɔ ye mrelera nu la noko ɛ? “Yeanva ahonle mɔɔ di munli la yeanzonle Gyihova.” (1 Arl. 11:4) Yɛɛ Baebolo ne hanle ye wɔ Abaegyam, mɔɔ le belemgbunli bieko mɔɔ yeanli nɔhalɛ la anwo kɛ: “Yeanva ahonle mɔɔ di munli la yeanzonle Gyihova.”—1 Arl. 15:3.

5. Saa bɛka kɛ yɛva yɛ ahonle muala yɛzonle Gyihova a ɔkile duzu?

⁵ Bɛka kɛ yɛva yɛ ahonle muala yɛzonle Gyihova a ɔkile duzu? Saa awie fa ye ahonle muala sonle Gyihova a, ɔkile kɛ tɛ kɛ ɔze kɛ ɔwɔ kɛ ɔsonle Nyamenle la ati a ɔlɛsonle ye a. Emomu ɛlɔlɛ nee ɛbulɛ kpole mɔɔ ɔlɛ ɔmaa Gyihova la ati a ɔsonle ye a. Yɛɛ ɔkɔ zo ɔda ɛlɔlɛ nee ɛbulɛ zɔhane ali ɔkile ye wɔ ye ngoane mekɛ kɔsɔɔti anu.

6. Kɛ ɔkɛyɛ na yɛahɔ zo yɛava yɛ ahonle muala yɛazonle Gyihova ɛ? (Mrɛlɛbulɛ 4:23; Mateyu 5:​29, 30)

⁶ Kɛ ɔkɛyɛ na yɛazukoa arelemgbunli mɔɔ lile nɔhalɛ la na yɛahɔ zo yɛava yɛ ahonle muala yɛazonle Gyihova ɛ? Yemɔ a le kɛ yɛbakpo ninyɛne mɔɔ ɔtwehwe yɛ kɛ yɛyɛ ɛtane la. Kɛ neazo la, anyelielɛ ninyɛne mɔɔ nwolɛ ɛnde la bahola amaa yɛ ahonle ne anu ahyɛ nwiɔ. Zɔhane ala a agɔnwolɛ ɛtane nee nwonane afoa nu ninyɛne nwo adwenleadwenle noko bahola ayɛ a. Saa yɛnwu kɛ debie ɛlɛbɔ ɔ bo amaa Gyihova anwo ɛlɔlɛ mɔɔ yɛlɛ la aha aze a, ɔwɔ kɛ yɛyɛ nwolɛ debie ndɛndɛ yɛye yɛfi ɛkɛ.—Kenga Mrɛlɛbulɛ 4:23; Mateyu 5:​29, 30.

7. Duzu ati a ɔwɔ kɛ yɛkpo ninyɛne mɔɔ ɔtwehwe yɛ kɛ yɛyɛ ɛtane la ɛ?

⁷ Ɔnle kɛ yɛmaa yɛ ahonle ne anu kyɛ nwiɔ. Saa yɛannea boɛ a, yɛbahola yɛabɛlɛbɛla yɛ nwo kɛ mekɛ ala mɔɔ yɛlɛyɛ dɔɔnwo wɔ Gyihova ɛzonlenlɛ nu la, ninyɛne mɔɔ ɔtwehwe yɛ kɛ yɛyɛ ɛtane la ɛnrɛhola ɛnrɛyɛ yɛ ɛhwee. Ndonwo bie ɛne, fa ye kɛ ɛnee ɛwɔ alienwo na ezule kpole bie ɛlɛtɔ yɛɛ ɛyɛyɛlɛ wɔ nu kpalɛ. Mɔɔ ɛrawolole wɔ sua ne anu la, ɛvale ɛdanlɛ ɛguale ɛ nwo. Noko saa wɔantoto anlenkɛ ne nee nvɛnzɛlɛ ne mɔ anu a, duzu a bazi a? Ezule ne babɔ nyɛlɛ ahɔ sua ne anu yɛɛ ɛyɛyɛlɛ noko bahu wɔ bieko. Boni a yɛkile a? Tɛ sunsum nu aleɛ mɔɔ ɔbamaa yɛabikye Gyihova kpalɛ la ala a ɔwɔ kɛ yɛdi a. Eza ɔwɔ kɛ yɛsi debie ɛtane biala mɔɔ ɔbahola yeanyia yɛ nwo zo tumi la adenle amaa ewiade ɛhye anu “anwoma” yɔlɔkɔkɔ ne anzɛɛ subane ɛtane ne anwolo yɛ ahonle nu na yeangyɛ nuhua nwiɔ.—Ɛfɛ. 2:2.

BƐNLUNLE BƐ NWO WƆ BƐ ƐTANE NE MƆ ANWO

8-9. Mɔɔ bɛhwile Belemgbunli Devidi nee Belemgbunli Hɛzikaya anyunlu la, duzu a bɛyɛle a? (Nea nvoninli ne.)

⁸ Kɛ mɔɔ yɛlimoa yɛnwu ye la, Belemgbunli Devidi yɛle ɛtane kpole bie. Noko mɔɔ ngapezonli Neetan hɔhwile Devidi anyunlu wɔ ye ɛtane ne anwo la, ɔbɛlɛle ɔ nwo aze na ɔnlunle  ɔ nwo. (2 Sa. 12:13) Ye edwɛkɛ ne mɔɔ wɔ Edwɛne 51 la maa yɛnwu kɛzi ɔnlunle ɔ nwo nɔhalɛ nu la. Devidi anyɛ ɔ nwo kɛ asɛɛ ɔlɛdi nyane wɔ mɔɔ yeyɛ la anwo amaa yeabɛlɛbɛla Neetan anzɛɛ amaa bɛandwe ɔ nzo.—Edw. 51:​3, 4, 17, ɔtidwɛkɛ.

⁹ Belemgbunli Hɛzikaya noko yɛle ɛtane tiale Gyihova. Baebolo ne ka kɛ: “Ye ahonle memaanle ɔ nwo zo, na ɔmaanle ɛya kpole rale ɔdaye nee Dwuda yɛɛ Gyɛlusalɛm anwo zo.” (2 Ek. 32:25) Duzu ati a Hɛzikaya yɛle anwomemaazo a? Bie a ye anwonyia, konim mɔɔ ɔlile wɔ Aseleama anwo zo anzɛɛ kɛmɔ bɛluale nwanwane adenle zo bɛyɛle ye ayile la ati ɔdele nganeɛ kɛ ɔle sonlakpole. Bie a anwomemaazo a maanle ɔvale ye anwonyia ne ɔhilele Babelɔnoma ne a, na yemɔ maanle ngapezonli Ayezaya hwile ɔ nyunlu. (2 Arl. 20:​12-18) Noko kɛ mɔɔ Devidi yɛle la, Hɛzikaya noko bɛlɛle ɔ nwo aze na ɔnlunle ɔ nwo. (2 Ek. 32:26) Awieleɛ bɔkɔɔ ne, Gyihova nwunle ye kɛ ɔle belemgbunli mɔɔ ɔdi nɔhalɛ mɔɔ “ɔhɔle zo ɔyɛle mɔɔ le kpalɛ wɔ Gyihova anye zo” la.—2 Arl. 18:3.

10. Mɔɔ bɛdenrɛdenrɛle Belemgbunli Amazaya la, duzu a ɔyɛle a?

¹⁰ Dwuda Belemgbunli Amazaya noko yɛle mɔɔ le kpalɛ wɔ Gyihova anye zo la, “noko yeanva ahonle mɔɔ di munli la yeanyɛ zɔ.” (2 Ek. 25:2) Ɛtane boni a ɔyɛle a? Mɔɔ Gyihova boale Amazaya maanle ɔlile Yidɔmma anwo zo konim wiele la, ɔbɔle ɔ ti aze ɔmaanle Yidɔmma nyamenle ne mɔ. c Mɔɔ Gyihova ngapezonli bie rahanle ye ɛtane ne anwo edwɛkɛ la, yeampili ye emomu ɔvoanle ye.—2 Ek. 25:​14-16.

11. Kɛ mɔɔ 2 Kɔlentema 7:​9, 11 kile la, duzu a ɔwɔ kɛ yɛyɛ amaa yɛanyia ɛtanefakyɛ a? (Eza nea nvoninli ne mɔ.)

¹¹ Duzu a yɛsukoa yɛfi neazo ɛhye mɔ anu a? Ɔwɔ kɛ yɛnu yɛ nwo wɔ yɛ ɛtane ne mɔ anwo na yɛyɛ biala mɔɔ yɛbahola la kɛ yɛnrɛzia yɛnrɛyɛ bɛ bieko. Na saa asafo nu mgbanyima tu yɛ folɛ wɔ ninyɛne mɔɔ yɛnea a ɔnzɔho ɛhwee bɔbɔ la anwo ɛ? Ɔnle kɛ yɛte nganeɛ kɛ Gyihova anzɛɛ mgbanyima ne mɔ ɛkpo yɛ. Ɛnee Yizilayɛ arelemgbunli mɔɔ yɛ mɔɔ le kpalɛ bɔbɔ la ɛmbo folɛdulɛ nee bɛ nyunlu ɛhwilɛ zo. (Hib. 12:6) Saa bɛtenrɛdenrɛ yɛ a, ɔwɔ kɛ (1) yɛbɛlɛ yɛ nwo aze yɛdie yɛto nu, (2) yɛyɛ nzenzaleɛ mɔɔ fɛta la yɛɛ (3) yɛkɔ zo yɛfa yɛ ahonle muala yɛsonle Gyihova. Saa yɛnu yɛ nwo wɔ yɛ ɛtane ne mɔ anwo a, Gyihova bava ahyɛ yɛ.—Kenga 2 Kɔlentema 7:​9, 11.

BƐBETANLE NƆHALƐ ƐZONLENLƐ NWO

12. Duzu titili a maanle arelemgbunli mɔɔ lile nɔhalɛ la yɛle ngakyile a?

¹² Arelemgbunli mɔɔ Gyihova bule bɛ kɛ bɛdi nɔhalɛ la andwe bɛ nwo anvi nɔhalɛ ɛzonlenlɛ nwo. Yɛɛ bɛmaanle bɛ maanlema ne anwosesebɛ bɛmaanle bɛyɛle zɔhane ala. Nɔhalɛ nu, kɛ mɔɔ yɛnwu ye la, ɛnee bɛtɔ sinli wɔ ninyɛne bie mɔ anu. Noko bɛzonlenle Gyihova angomekye na bɛbɔle mɔdenle ɛsesebɛ bɛdule awozonle ɛzonlenlɛ bo bɛvile maanle ne anu. d

13. Duzu ati a Gyihova buale Belemgbunli Ehabe ndɛne kɛ ɔnli nɔhalɛ a?

¹³ Na arelemgbunli mɔɔ Gyihova buale bɛ ndɛne kɛ bɛanli nɔhalɛ la noko ɛ? Tɛ debie biala mɔɔ bɛyɛle la a le ɛtane a. Mɔɔ belemgbunli atisesebɛ Ehabe bɔbɔ dele kɛ ɔdaye ti a bɛhunle Neebɔto la, ɔlale mɛlɛbɛnwoaze nee anlubɛnwo ekyi ali. (1 Arl. 21:​27-29) Eza ɔkyekyele azuamgbole na ɔlile Yizilayɛ agbɔvolɛ bie mɔ anwo zo konim. (1 Arl. 20:​21, 29; 22:39) Noko Ehabe maanle ɔ ye nyianle ɔ nwo zo tumi  na ɔmaanle menli dɔɔnwo zonlenle awozonle. Noko yeanlu ɔ nwo wɔ ɛhye anwo.—1 Arl. 21:​25, 26.

14. (a) Duzu ati a Gyihova bule Belemgbunli Rilihɔbowam kɛ ɔnli nɔhalɛ ɛ? (b) Ɛtane boni a arelemgbunli mɔɔ bɛanli nɔhalɛ la anu dɔɔnwo yɛle a?

¹⁴ Suzu Rilihɔbowam mɔɔ le belemgbunli bieko mɔɔ anli nɔhalɛ la noko anwo. Kɛ mɔɔ yɛlimoa yɛnwu ye wɔ ɛdendɛkpunli 2 ne anu la, ɔyɛle ninyɛne mgbalɛ bie mɔ wɔ mekɛ mɔɔ ɔdi tumi la. Noko mɔɔ ye tumililɛ ne gyinlanle kpundii la, ɔkpole Gyihova Mɛla ne na ɔzonlenle awozonle. (2 Ek. 12:1) Ɛhye anzi, ɔyɛ a yehɔzonle Gyihova ekyi yɛɛ ɔyɛ noko a ɛnee yehɔzonle awozonle. (1 Arl. 14:​21-24) Tɛ Rilihɔbowam nee Ehabe ala a le arelemgbunli mɔɔ bɛhwenle bɛ nwo bɛvile nɔhalɛ ɛzonlenlɛ nwo a. Saa ɛnea nuhua kpalɛ a, arelemgbunli mɔɔ anli nɔhalɛ la anu dɔɔnwo gyinlanle adalɛ ɛzonlenlɛ nzi wɔ adenle bie azo. Ɔda ali kɛ, wɔ Gyihova anye zo saa ɔbabu belemgbunli bie kɛ ɔlile nɔhalɛ anzɛɛ yeanli nɔhalɛ a, ɔgyi kɛzi ɔbetanle nɔhalɛ ɛzonlenlɛ nwo la azo.

15. Duzu ati a nɔhalɛ ɛzonlenlɛ mɔɔ yɛfa yɛ nwo yɛabeta ye la anwo hyia Gyihova a?

¹⁵ Duzu ati a ɛnee ɛzonlenlɛ nwo edwɛkɛ hyia Gyihova zɔhane a? Debie ko a le kɛ, ɛnee ɔle arelemgbunli ne mɔ ɛzonlelilɛ kɛ bɛbaboa Nyamenle menli ne bɛamaa bɛazonle ye nɔhalɛ nu. Eza adalɛ ɛzonlenlɛ maa menli yɛ ɛtane mgbole gyɛne na bɛ nee menli di ye atisesebɛ nu. (Hozia 4:​1, 2) Bieko, ɛnee arelemgbunli ne mɔ yɛɛ maanlema ne ɛyila bɛ nwo zo ɛmaa Gyihova. Ɔti Baebolo ne vale mɔɔ bɛyɛle la totole agyalɛzɛkyelɛ nwo. (Gyɛ. 3:​8, 9) Saa awie sɛkye agyalɛ a, ɛnee yeyɛ ɛtane kpole yetia ɔ ye anzɛɛ ɔ hu mɔɔ anrɛɛ ɔwɔ kɛ ɔdi nɔhalɛ ɔmaa ye la na ɔmaa ɔdi nyane kpole. Zɔhane ala a saa  Gyihova sonvolɛ mɔɔ ɛyila ɔ nwo zo ɛmaa Ye la kɔsonle awozonle a ɛnee yeyɛ ɛtane yetia ye na ɔmaa ɔdi nyane. e—Dit. 4:​23, 24.

16. Wɔ Gyihova anye zo, duzu titili a maa tenlenenli yɛ ngakyile fi amumuyɛnli anwo a?

¹⁶ Duzu a yɛbahola yɛazukoa yɛavi nu a? Ɔwɔ kɛ yɛbɔ kpɔkɛ kɛ yɛbahwe yɛ nwo yɛavi adalɛ ɛzonlenlɛ nwo. Noko eza ɔwɔ kɛ yɛbeta nɔhalɛ ɛzonlenlɛ nwo na yɛfa yɛ nwo yɛwula nu ɛsesebɛ. Ngapezonli Malakae hanle debie mɔɔ wɔ Gyihova anye zo ɔmaa sonlakpalɛ yɛ ngakyile fi sonlatane nwo la anwo edwɛkɛ wienyi. Ɔhɛlɛle kɛ: “Akee bɛbanwu ngakyile mɔɔ wɔ tenlenenli nee amumuyɛnli avinli, nee awie mɔɔ sonle Nyamenle nee mɔɔ ɛnzonle ye la avinli la.” (Mal. 3:18) Ɔti ɔnle kɛ yɛmaa debie biala—yɛ sinlidɔlɛ nee yɛ nvonleɛ ne mɔ bɔbɔ—maa yɛ sa nu to too yɛgyakyi Nyamenle ɛzonlenlɛ. Saa awie gyakyi Gyihova ɛzonlenlɛ a, yemɔ bɔbɔ le ɛtane kpole.

17. Kɛzi awie mɔɔ yɛbakpa kɛ yɛbagya ye la baha ɛzonlenlɛ mɔɔ yɛfa yɛmaa Gyihova la ɛ?

¹⁷ Saa ɛtɛgyale na ɛlɛdwenle agyalɛ nwo a, ɛnwu kɛzi Malakae edwɛkɛ ne mɔɔ fale Nyamenle ɛzonlenlɛ nwo la fale ahenle mɔɔ ɛbagya ye la anwo la ɔ? Bie a awie lɛ subane ngɛnlɛma bie mɔ, noko saa ɔnzonle nɔhalɛ Nyamenle ne a, asoo bɛbabu ye kɛkala kɛ ɔle tenlenenli wɔ Gyihova anye zo ɔ? (2 Kɔl. 6:14) Saa ɛgya ye a asoo ɔbaboa wɔ yeamaa wɔahɔ zo wɔali nɔhalɛ wɔamaa Gyihova ɔ? Wɔmɔ nea o: Bie a ɛnee Belemgbunli Sɔlɔmɔn awozonle ɛzonlenlɛ mraalɛ ne mɔ lɛ subane mgbalɛ bie mɔ. Noko kɛmɔ ɛnee bɛnzonle Gyihova la ati, ngyikyi ngyikyi bɛhwenle Sɔlɔmɔn bɛmaanle ɔhɔzonlenle awozonle.—1 Arl. 11:​1, 4.

18. Duzu a ɔwɔ kɛ awovolɛ kilehile bɛ mra a?

¹⁸ Awovolɛ, bɛbahola bɛava arelemgbunli ne  mɔ neazo ne mɔɔ wɔ Baebolo ne anu la bɛahilehile bɛ mra bɛamaa bɛ nye abolo Gyihova ɛzonlenlɛ nwo. Bɛboa bɛ bɛmaa bɛnwu ye kɛ debie titili mɔɔ Gyihova gyinlanle zo bule belemgbunli bie kɛ ɔdi nɔhalɛ anzɛɛ ɔnli nɔhalɛ la gyi kɛzi ɔgyinlanle nɔhalɛ ɛzonlenlɛ nzi la azo. Bɛlua bɛ edwɛkɛ nee bɛ neazo zo bɛhilehile bɛ mra ne mɔ kɛ sunsum nu ninyɛne—le kɛ Baebolo ɛzukoalɛ, debiezukoalɛ nee daselɛlilɛ ɛhɔlɛ—hyia tɛla debie biala mɔɔ ɛha la. (Mat. 6:33) Tɛ ye zɔhane a bɛ mra ne mɔ banyia adwenle kɛ kɛmɔ bɛ abusua ne le Gyihova Alasevolɛ la ati a bɛdabɛ noko bɛkɔ bie a. Ɛhye ati bie a bɛbabu nɔhalɛ ɛzonlenlɛ kɛ nwolɛ ɛngyia kpalɛ anzɛɛ bie a bɛbavi nu bɔkɔɔ.

19. Anyelazo boni a wɔ ɛkɛ ne maa bɛdabɛ mɔɔ bɛgyakyi Gyihova ɛzonlenlɛ la a? (Eza nea ɛlɛka, “ Ɛbahola Wɔazia Wɔara Gyihova Ɛkɛ!”)

¹⁹ Saa awie ɛgyakyi Gyihova ɛzonlenlɛ a, asoo yemɔ kile kɛ ɔnrɛhola ɔnrɛzonle ye bieko ɔ? Kyɛkyɛ, ɔluakɛ ɔbahola yeanlu ɔ nwo na yeazia yeara nɔhalɛ ɛzonlenlɛ nu. Saa ɔbahola yeayɛ zɔ a, ɔwɔ kɛ ɔbɛlɛ ɔ nwo aze na ɔmaa asafo nu mgbanyima ne mɔ boa ye. (Gye. 5:14) Mɔdenle biala mɔɔ ɔbabɔ amaa yeayɛ Gyihova agɔnwo bieko la baboa ye kpalɛ!

20. Saa yɛsukoa arelemgbunli mɔɔ lile nɔhalɛ la a, kɛzi Gyihova babu yɛ ɛ?

²⁰ Duzu a yɛzukoa yɛvi Yizilayɛ arelemgbunli ne mɔ ɛkɛ a? Saa yɛbahola yɛayɛ kɛ arelemgbunli mɔɔ lile nɔhalɛ la a, kyesɛ yɛfa yɛ ahonle muala yɛsonle Gyihova. Bɛmaa yɛzukoa debie yɛvi yɛ nvonleɛ ne mɔ anu, yɛnlu yɛ nwo na yɛyɛ nzenzaleɛ mɔɔ hyia la. Eza bɛmaa yɛhakye kɛzi ɔhyia kɛ yɛbabeta nɔhalɛ Nyamenle kokye ne ɛzonlenlɛ nwo la. Saa ɛdawɔ mumua ne ɛkɔ zo ɛdi nɔhalɛ ɛmaa Gyihova a, ɔbabu wɔ kɛ ɛle awie mɔɔ yɛ mɔɔ le kpalɛ wɔ ɔ nye zo la.