1. Saa yɛka edwɛkɛkpɔkɛ “nɔhalɛ ne” a, ɛnee yɛlɛkile duzu?

“KƐ ƆYƐLE mɔɔ ɛnwunle nɔhalɛ ne ɛ?” “Bɛwole wɔ bɛdole nɔhalɛ ne anu ɔ?” “Wɔdɛnla nɔhalɛ ne anu ɛvolɛ nyɛ?” Bie a bɛbiza wɔ kpuya ɛhye mɔ anzɛɛ ɛdawɔ noko wɔbiza awie mɔ. Saa yɛka edwɛkɛ “nɔhalɛ ne” a, ɛnee yɛlɛkile duzu? Yɛta yɛfa yɛka yɛ diedi, kɛzi yɛsonle yɛɛ kɛzi yɛbɔ yɛ ɛbɛla la anwo edwɛkɛ. Menli mɔɔ wɔ “nɔhalɛ ne” anu la ze mɔɔ Baebolo ne kilehile la yɛɛ bɛfa nuhua ngyinlazo bɛbɔ bɛ ɛbɛla. Ɛhye maa bɛnyia fanwodi bɛfi adalɛ ɛzonlenlɛ ngilehilelɛ nwo na bɛnyia ɛbɛlabɔlɛ kpalɛ ɔnva nwo kɛ bɛnli munli la.​—Dwɔn 8:32.

2. Kɛ mɔɔ Dwɔn 13:34, 35 kile la, duzu a maa bie mɔ anye die nɔhalɛ ne anwo a?

² Duzu a maanle ɛ nye liele nɔhalɛ ne anwo a? Bie a subane kpalɛ mɔɔ Gyihova menli da ye ali la. (1 Pita 2:12) Anzɛɛ bie a ɛlɔlɛ mɔɔ bɛlale ye ali la. Menli dɔɔnwo nwunle ɛhye wɔ ayia mɔɔ limoa mɔɔ bɛhɔle la abo, na ɛhye hanle bɛ kpalɛ dɛlale edwɛkɛ mɔɔ bɛhanle ye wɔ bama ne azo la. Ɛhye ɛnzi yɛ nwo, ɔluakɛ Gyisɛse hanle kɛ, ɛlɔlɛ mɔɔ ye ɛdoavolɛma bala ye ali la bamaa bɛanwu bɛ. (Kenga Dwɔn 13:34, 35.) Noko amaa yɛanyia diedi kpole la, ɔwɔ kɛ yɛyɛ ninyɛne bie mɔ yɛboka nwo.

3. Saa yɛmaa yɛ diedi ne gyinla ɛlɔlɛ mɔɔ yɛ mediema da ye ali la angomekye azo a, duzu a bahola azi a?

³ Ɔnle kɛ yɛ diedi ne gyinla Kilisienema ɛlɔlɛ mɔɔ Nyamenle menli da ye ali la angomekye azo. Duzu ati ɔ? Fa ye kɛ ɛ gɔnwo diedinli bie, bɔbɔ asafo nu kpanyinli anzɛɛ adekpakyelɛnli bie ɛyɛ ɛtane kpole. Anzɛɛ fa ye kɛ adiema bie ɛyɛ debie ɛmaa yegyegye wɔ. Anzɛɛ bie a adiema bie ɛyɛ kpɔkyevolɛ na ɔlɛka kɛ tɛ nɔhalɛ ne a yɛwɔ nu la.  Saa ɔbaye zɛhae a, ɔbagyegye wɔ na wɔagyakyi Gyihova ɛzonlenlɛ ɔ? Mɔɔ yɛkpondɛ yɛaha la a le kɛ: Saa wɔammaa wɔ diedi ne angyinla agɔnwolɛvalɛ mɔɔ ɛ nee Gyihova lɛ la azo na ɔgyinla kɛzi awie mɔ yɛ bɛ nyɛleɛ la azo a, ɔnrɛmaa wɔ diedi ne anu ɛnrɛmia. Ɔnle kɛ wɔ diedi ne gyinla ninyɛne mɔɔ ɛngyɛ le kɛ nganeɛdelɛ zo, emomu ɔwɔ kɛ ɔgyinla Baebolo ne anu nɔhalɛ ne mɔɔ wɔzukoa na wɔlie wɔli la azo. Ɔwɔ kɛ ɛdawɔ mumua ne ɛnwu ye kɛ, mɔɔ Baebolo ne ka fale Gyihova anwo la le nɔhalɛ.​—Wlo. 12:2.

4. Kɛ mɔɔ Mateyu 13:3-6, 20, 21 kile la, saa bie mɔ yia bɛ diedi nwo sɔnea a, duzu a bɛyɛ a?

⁴ Gyisɛse hanle kɛ, bie mɔ fa “anyelielɛ” die edwɛkɛ ne, noko saa bɛyia bɛ diedi nwo sɔnea a, bɛngola nu gyinla. (Kenga Mateyu 13:3-6, 20, 21.) Bie a bɛanzuzu kɛ Gyisɛse mɔɔ bɛdi ɔ nzi la bamaa bɛ nwo ahyele bɛ. (Mat. 16:24) Anzɛɛ bie a bɛnyianle adwenle kɛ saa ɛbayɛ Kilisienenli a, ɛnrɛyia ngyegyelɛ, nyilalɛ ala a ɛbanyia a. Noko kɛ ɔde ye biala la, yɛbayia ngyegyelɛ wɔ ɛtane ewiade ɛhye anu. Ninyɛne kola kakyi na ɔsɛkye yɛ anyelielɛ wɔ mekɛ ekyi anu.​—Edw. 6:6; Nol. 9:11.

5. Kɛzi yɛ mediema dɔɔnwo ɛlɛkile kɛ bɛlɛ anwodozo kɛ bɛwɔ nɔhalɛ ne anu ɛ?

⁵ Yɛ mediema dɔɔnwo ɛhile kɛ bɛlɛ anwodozo kɛ bɛwɔ nɔhalɛ ne anu. Kɛzi? Ɔluakɛ saa bɛ gɔnwo diedinli yɛ debie maa ɔgyegye bɛ anzɛɛ bɔ ɛbɛla ɛtane a, bɛngyakyi Gyihova ɛzonlenlɛ. (Edw. 119:165) Sɔnea biala mɔɔ bɛbayia la maa bɛ diedi yɛ kpole, ɔnga aze. (Gye. 1:2-4) Kɛ ɔkɛyɛ na wɔanyia diedi zɔhane bie ɛ?

6. Duzu a ɛnee ɛvoya mɔɔ limoa Kilisienema diedi ne gyi zo a?

⁶ Ɛvoya mɔɔ limoa la anu Kilisienema maanle bɛ diedi ne gyinlanle Ngɛlɛlera ne anu nɔhalɛ ne yɛɛ Gyisɛse Kelaese ngilehilelɛ ne mɔɔ le “edwɛkpa ne anwo nɔhalɛ ne” la azo. (Gal. 2:5) Nɔhalɛ ɛhye a le Kilisiene ngilehilelɛ ne amuala mɔɔ Gyisɛse ɛkpɔnedeɛ ne yɛɛ ewudwazo ne anwo nɔhalɛ ne boka nwo la. Ɛzoanvolɛ Pɔɔlo liele lile kɛ, ngilehilelɛ ɛhye mɔ le nɔhalɛ. Duzu ati ɔ? Ɔluakɛ ɔgyinlanle Ngɛlɛlera ne azo “ɔhilele kɛ ɔwɔ kɛ Kelaese ne nwu amaneɛ na bɛdwazo ye bɛfi mowuamra anu.” (Gyi. 17:2, 3) Ɛvoya mɔɔ limoa Kilisienema liele ngilehilelɛ ɛhye mɔ dole nu na bɛmaanle sunsum ne boale bɛ maanle bɛdele Nyamenle Edwɛkɛ ne abo. Bɛnwunle ye wienyi kɛ ngilehilelɛ ɛhye mɔ gyi Ngɛlɛlera ne azo. (Gyi. 17:11, 12; Hib. 5:14) Bɛammaa bɛ diedi ne angyinla nganeɛdelɛ angomekye azo, yɛɛ bɛanzonle Gyihova ɔluakɛ bɛ nee bɛ gɔnwo mɔ diedima tu a bɛ nye die la ati. Emomu bɛmaanle bɛ diedi ne gyinlanle “Nyamenle anwo nɔhalɛ ndelebɛbo” zo.​—Kɔl. 1:9, 10.

7. Saa yɛ diedi ne gyi Baebolo nu nɔhalɛ ne azo a, kɛzi ɔbaboa yɛ ɛ?

⁷ Baebolo ne anu nɔhalɛ ne ɛngakyi. (Edw. 119:160) Kɛ neazo la, saa yɛ gɔnwo diedinli bie yɛ debie maa ɔgyegye yɛ anzɛɛ yɛ ɛtane kpole bie a, ɔngakyi. Zɔhane ala a yɛlɛyia ngyegyelɛ a ɔde a. Yemɔti ɔwɔ kɛ yɛnwu Baebolo nu ngilehilelɛ ne kpalɛ na yɛdie yɛdi kɛ ɔle nɔhalɛ. Yɛ diedi ne mɔɔ gyi Baebolo nu nɔhalɛ ne azo la bamaa yɛagyinla sɔnea nloa,  kɛ mɔɔ sɛkɛ maa meli kola gyinla ahumu kpole nloa la. Kɛ ɔkɛyɛ na wɔanyia anwodozo kpole kɛ ɛwɔ nɔhalɛ ne anu ɛ?

8. Kɛ mɔɔ 2 Timote 3:14, 15 maa yɛnwu ye la, kɛzi Timote yɛle nwunle kɛ yenwu nɔhalɛ ne ɛ?

⁸ Timote liele lile kɛ yenwu nɔhalɛ ne. Kɛ ɔyɛle mɔɔ ɔnyianle anwodozo ɛhye ɛ? (Kenga 2 Timote 3:14, 15.) Ye mame nee ye nana vale “ngɛlɛlera nwuanzanwuanza ne” hilehilele ye. Noko ɔda ali kɛ, ɔdaye mumua ne ɔnyianle mekɛ ɔzukoale ngɛlɛlera ɛhye mɔ. Ɔti, ‘ɔliele ɔlile’ kɛ bɛle nɔhalɛ. Nzinlii, Timote, ye mame nee ye nana ranwunle Kilisiene ɛzonlenlɛ ne. Ɔda ali kɛ ɛlɔlɛ mɔɔ Gyisɛse ɛdoavolɛma lale ye ali la hanle Timote ahonle na ɔnyianle ɛhulolɛ kpole kɛ ɔ nee ɔ mediema diedima badu na yeaboa bɛ. (Fel. 2:19, 20) Noko ɛnee ye diedi ne ɛngyi nganeɛdelɛ nee ɛlɔlɛ mɔɔ ɔlɛ ɔmaa ɔ mediema la azo, emomu Gyihova anwo nɔhalɛ ne mɔɔ yezukoa la. Ɔwɔ kɛ ɛdawɔ noko ɛdwenledwenle ninyɛne mɔɔ wɔzukoa ye wɔ Gyihova anwo la anwo wɔ mekɛ mɔɔ ɛlɛkenga Baebolo ne la.

9. Nɔhalɛ edwɛkɛ nsa boni mɔ a ɔwɔ kɛ ɛdawɔ mumua ne ɛdie ɛdi a?

⁹ Yeanyɛ boɛ fee la, ɔwɔ kɛ ɛdie nɔhalɛ edwɛkɛ nsa ɛhye mɔ ɛdi. Mɔɔ limoa, ɔwɔ kɛ ɛdie ɛdi kɛ, Gyihova Nyamenle a le Bɔvolɛ ne a. (Ɛzɛ. 3:14, 15; Hib. 3:4; Yek. 4:11) Mɔɔ tɔ zo nwiɔ, ɔwɔ kɛ ɛdie ɛdi kɛ Baebolo ne le buluku mɔɔ vi Nyamenle ɛkɛ mɔɔ yeva yemaa alesama a. (2 Tim. 3:16, 17) Yɛɛ mɔɔ tɔ zo nsa, ɔwɔ kɛ ɛnwu ye kɛ Gyihova lɛ menli ekpunli bie mɔɔ bɛlɛsonle ye wɔ Kelaese adehilelɛ bo a, na bɛmɛ a le Gyihova Alasevolɛ. (Aye. 43:10-12; Dwɔn 14:6; Gyi. 15:14) Ɔngyia kɛ ɛsukoa Baebolo ne anu edwɛkɛ kɔsɔɔti kolaa na wɔalie nɔhalɛ edwɛkɛ nsa ɛhye mɔ wɔado nu. Ɔwɔ kɛ ɛfa ɛyɛ wɔ bodane kɛ, ‘ɛdwenle’ nɔhalɛ edwɛkɛ ɛhye mɔ mɔɔ wɔzukoa la anwo amaa wɔalie wɔali kɛ ɔle nɔhalɛ.​—Wlo. 12:1.

10. Saa yɛnwu nɔhalɛ ne a, duzu bieko a ɔwɔ kɛ yɛkola yɛyɛ a?

¹⁰ Saa ɛdimoa ɛte nɔhalɛ edwɛkɛ nsa ɛhye mɔ mɔɔ fale Nyamenle, Baebolo ne yɛɛ Nyamenle menli nwo la abo a, ɔwɔ kɛ ɛkola ɛgyinla Ngɛlɛlera ne azo ɛkilehile nu ɛkile awie mɔ. Duzu ati ɔ? Ɔluakɛ ɔle Kilisienema gyima kɛ bɛbahilehile menli mɔɔ kɛdie bɛ la Baebolo nu nɔhalɛ ne mɔɔ bɛzukoa la. * (1 Tim. 4:16) Na mekɛ mɔɔ yɛlɛkilehile menli Baebolo nu nɔhalɛ ne la, ɔmaa anwodozo mɔɔ yɛlɛ ye wɔ nɔhalɛ ɛhye mɔ anu la yɛ kpole.

11. Duzu neazo a ɛzoanvolɛ Pɔɔlo yɛle kɛ kilehilevolɛ a?

¹¹ Mɔɔ ɛzoanvolɛ Pɔɔlo kilehile menli ne la, “ɔluale Mosisi Mɛla ne nee Ngapezoma ne anwo zo ɔhanle Gyisɛse anwo edwɛkɛ.” (Gyi. 28:23) Kɛzi yɛbazukoa Pɔɔlo wɔ yɛ ngilehilelɛ nu ɛ? Saa yɛka Baebolo nu nɔhalɛ ne yɛkile yɛ Baebolo sukoavoma a, ɛnee ɔtɛwiele. Ɔwɔ kɛ yɛboa bɛ yɛmaa bɛdwenle Ngɛlɛlera ne anwo amaa bɛabikye Gyihova. Yɛkulo kɛ bɛfa nɔhalɛ ne, tɛ kɛ bɛ nye die yɛ nwo la ati ɔ, emomu ɔluakɛ bɛnwu kɛ mɔɔ bɛlɛsukoa bɛavale yɛ ɛlɔlɛ Nyamenle ne anwo le nɔhalɛ la ati ɔ.

12-13. Kɛzi awovolɛ bahola aboa bɛ mra amaa bɛadɛnla nɔhalɛ ne anu ɛ?

¹² Awovolɛ, ɔda ali kɛ bɛkulo kɛ bɛboa bɛ mra bɛmaa bɛtɛnla nɔhalɛ ne anu. Bie a bɛte nganeɛ kɛ saa bɛnyia agɔnwolɛma kpalɛ wɔ asafo ne anu a, ɔbamaa bɛanyia anyuhɔlɛ wɔ sunsum nu. Noko amaa ɛ mra alie ali kɛ bɛwɔ nɔhalɛ ne anu la, saa bɛnyia agɔnwolɛma kpalɛ a, ɛnee ɔtɛwiele. Ɔwɔ kɛ bɛ nee Nyamenle nyia agɔnwolɛvalɛ na bɛdie bɛdi kɛ, mɔɔ Baebolo ne kilehile la le nɔhalɛ.

¹³ Amaa awovolɛ ahola ahilehile bɛ mra Nyamenle anwo nɔhalɛ ne la, ɔwɔ kɛ bɛsukoa Baebolo ne kpalɛ bɛfa bɛyɛ neazo bɛmaa bɛ. Ɔwɔ kɛ bɛnyia mekɛ bɛdwenledwenle mɔɔ bɛsukoa la anwo. Ɛhye bamaa bɛahola bɛahilehile bɛ mra bɛamaa bɛayɛ zɔ. Ɔwɔ kɛ bɛkilehile bɛ mra bɛmaa bɛfa ninyɛne mɔɔ bɛfa bɛyɛ neɛnleanu la bɛdi gyima kɛ mɔɔ bɛkile bɛ Baebolo sukoavoma la. Ɛhye bamaa bɛabu Gyihova nee “akɛlɛ nɔhavo nee badwema ne” mɔɔ ɔdua bɛ nwo zo ɔmaa yɛ sunsum nu aleɛ la. (Mat. 24:45-47) Awovolɛ, bɛmmakilehile bɛ mra mɔlebɛbo Baebolo nu ngilehilelɛ ne ala. Bɛboa bɛ bɛmaa bɛnyia diedi kpole ɔlua  “Nyamenle ninyɛne mɔɔ anu le kuloonwu” mɔɔ bɛbanlea bɛ ɛvolɛ ne anwo bɛahilehile bɛ la azo.​—1 Kɔl. 2:10.

14. Kɛmɔti a ɔwɔ kɛ yɛsukoa Baebolo ngapezo ɛ? (Eza nea ɛlɛka, “ Ɛbahola Wɔahilehile Ngapezo Ɛhye Mɔ Anu Ɔ?”)

¹⁴ Baebolo ngapezo boka Nyamenle Edwɛkɛ ne mɔɔ boa yɛ maa yɛnyia diedi kpole wɔ Gyihova anu la anwo. Ngapezo boni mɔ a ɛmaa wɔ diedi nu ɛmia a? Bie a ɛbaha mɔɔ fale ‘mekɛ ɛhye mɔɔ li awieleɛ’ la anwo edwɛkɛ. (2 Tim. 3:1-5; Mat. 24:3, 7) Noko ngapezo gyɛne mɔɔ ɛra nu la boni a bahola amaa anwodozo mɔɔ ɛlɛ la ayɛ kpole a? Kɛ neazo la, ɛbahola wɔahilehile kɛzi ngapezo mɔɔ wɔ Daneɛle tile 2 anzɛɛ tile 11 ɛra nu anzɛɛ ɛlɛba nu la anu ɔ? * Saa ɛlɛ diedi kpundii mɔɔ gyi Baebolo ne azo a, diedi zɔhane ɛnrɛkpo aze ɛlɛ. Fa yɛ mediema mɔɔ bɛyɛle bɛ kpɔdekpɔde kpole wɔ Germany wɔ Ewiade Konle II anu la kɛ neazo. Ɔnva nwo kɛ bɛande Baebolo ngapezo mɔɔ fale awieleɛ mekɛ ne anwo abo kpalɛ la, bɛnyianle diedi kpole wɔ Nyamenle Edwɛkɛ ne anu.

15-17. Kɛzi Baebolo ne ɛzukoalɛ boale yɛ mediema mɔɔ bɛyiale ɛkpɔlɛ wɔ Germany la ɛ?

¹⁵ Wɔ Nazi Germany tumililɛ bo, bɛguale yɛ mediema apenle dɔɔnwo efiade. Hitler yɛɛ sogya kpanyinli Heinrich Himmler kpɔle Gyihova Alasevolɛ. Adiema raalɛ ko ka kɛ, Himmler zele mediema mraalɛ ekpunli bie mɔɔ ɛnee bɛgua efiade la kɛ: “Bɛ Gyihova ne di tumi wɔ anwuma, na azɛlɛ ye azo mɔɔ ɔle yɛ ɛdeɛ! Bɛdabɛ nee yɛdayɛ, yɛbanlea mɔɔ badɛnla ɛkɛ ahyɛ a!” Duzu a boale Gyihova menli ɔmaanle bɛgyinlanle kpundii a?

¹⁶ Ɛnee Baebolo Sukoavoma zɔhane ze kɛ Nyamenle Belemgbunlililɛ ne bɔle ɔ bo kɛ ɔdi tumi wɔ 1914. Yemɔti yeanyɛ bɛ azibɛnwo kɛ bɛlɛkpɔ bɛ zɔhane la. Noko ɛnee Gyihova menli die di kɛ, sonla arane biala ɛnrɛhola ɛnrɛzi Nyamenle bodane  adenle. Hitler angola andu nɔhalɛ ɛzonlenlɛ bo yɛɛ ye arane ne angola anli Nyamenle Belemgbunlililɛ ne azo konim. Ɛnee yɛ mediema ne mɔ lɛ anwodozo kɛ adenle biala azo Hitler arane ne bagu.

¹⁷ Anyelazo mɔɔ ɛnee mediema zɔhane mɔ lɛ la rale nu. Yeangyɛ, Nazi arane ne gule, na Heinrich Himmler mɔɔ hanle kɛ “azɛlɛ ye azo mɔɔ ɔle yɛ ɛdeɛ” la guale ndwɛlɛ aze. Mekɛ mɔɔ ɔlɛnriandi la, ɔnwunle Adiema Lübke mɔɔ ɛnee ɔdaye noko ɔla efiade la. Himmler mɔɔ anye zo ɛda ye la bizale Adiema Lübke kɛ: “Baebolo Sukoavo, boni a si a?” Adiema Lübke hilehilele nu hilele Himmler kɛ, ɛnee Gyihova Alasevolɛ ze ye dɛbadɛba kɛ Nazi arane ne bagu na bɛaye bɛ bɛavi efiade. Himmler mɔɔ alimoa ne hehanle Gyihova Alasevolɛ anwo edwɛkɛ dɔɔnwo la anloa hale nwolɛ. Yeangyɛ, ɔhunle ɔ nwo. Duzu a yɛsukoa yɛfi nu a? Baebolo ne nee nuhua ngapezo mɔɔ yɛbazukoa la bamaa yɛanyia Nyamenle anu diedi kpole na yɛanyia akɛnrasesebɛ yɛagyinla sɔnea nloa.​—2 Pita 1:19-21.

18. Kɛ mɔɔ Dwɔn 6:67, 68 kile la, duzu ati a yɛhyia “nɔhalɛ ndelebɛbo nee adwenlenunwunlɛ muala” mɔɔ Pɔɔlo hanle nwolɛ edwɛkɛ la ɛ?

¹⁸ Ɔwɔ kɛ yɛ nuhua ko biala da ɛlɔlɛ mɔɔ maa bɛnwu nɔhalɛ Kilisienema la ali. Noko eza ɔwɔ kɛ yɛnyia “nɔhalɛ ndelebɛbo nee adwenlenunwunlɛ muala.” (Fel. 1:9) Tɛ ye zɔhane a, menli mɔɔ le mɛlɛbɛla mɔɔ kpɔkyevolɛma boka nwo la ‘bava bɛ adalɛ ngilehilelɛ anwoma ne nee bɛ agyiba ne mɔ abɛlɛbɛla yɛ.’ (Ɛfɛ. 4:14) Mɔɔ ɛvoya mɔɔ limoa Y.M. anu Kilisienema bie mɔ gyakyile Gyisɛse anzi ɛlilɛ la, ɛzoanvolɛ Pita vale anwodozo hanle kɛ Gyisɛse a lɛ “edwɛkɛ mɔɔ maa dahuu ngoane a.” (Kenga Dwɔn 6:67, 68.) Ɔnva nwo kɛ ɛnee Pita ɛnde zɔhane edwɛkɛ ne abo kpalɛ la, ɔhɔle zo ɔlile nɔhalɛ ɔluakɛ ɔnwunle Kelaese anwo nɔhalɛ ne. Ɛdawɔ noko ɛbahola wɔanyia anwodozo kpole wɔ mɔɔ Baebolo ne kilehile la anu. Saa ɛyɛ zɔ a, ɛbahola wɔagyinla wɔ diedi nwo sɔnea nloa, na wɔaboa awie mɔ noko wɔamaa bɛanyia diedi kpole.​—2 Dwɔn 1, 2.