YOMARA nee ɔ mediema mrenyia​—Marcelo nee Hiver​—de Guatemala namule ekyi bie azo. Yomara bɔle ɔ bo kɛ ɔ nee Alasevolɛ ne mɔ sukoa Baebolo ne, na nzinlii ɔ mediema mrenyia ne mɔ rabokale nwo. Noko ɛnee ngyegyelɛ bie wɔ ɛkɛ. Mediema nsa ɛhye mɔ amuala anye ɛzi yɛɛ bɛngola bɛngenga anyezinlirama mbuluku. Ɔti ɛnee bɛ Baebolo kilehilevolɛ ne kenga deɛ ne mɔɔ bɛlɛsukoa la nee Baebolo ngyehyɛnu ne mɔ mɔɔ wɔ nu la kile bɛ.

Eza ɛnee ɔnla aze kɛ bɛbahɔ debiezukoalɛ. Bɛ ngomekye bɛnrɛhola bɛnrɛpɛ adenle mitini 40 bɛnrɛhɔ Belemgbunlililɛ Asalo mɔɔ bikye bɛ bɔbɔ la anu. Noko mediema ne mɔ yɛle ngyehyɛleɛ vale bɛ hɔle debiezukoalɛ ne mɔ amuala. Na mɔɔ bɛbɔle ɔ bo kɛ bɛyɛ gyimalilɛ wɔ dapɛne avinli debiezukoalɛ ne mɔ anu la, mediema ne mɔ boale bɛ maanle bɛhyele mɔɔ bɛbaha la bɛguale bɛ ti anu.

Wɔ May 2019, bɛbɔle ɔ bo kɛ bɛyɛ asafo debiezukoalɛ ne bie wɔ bɛ namule ne azo. Ɔkadwu mekɛ zɔhane la, ɛnee agyalɛma bie mɔɔ bɛle adekpakyelɛma la ɛdu ɛradɛnla zɔhane namule ne azo. Ɛnee agyalɛma ɛhye ɛnze anyezinlirama buluku kenga, noko bɛvale bɛyɛle bɛ bodane kɛ bɛbahile mediema nsa ɛhye bɛamaa bɛanwu ye kenga na bɛahɛlɛ. Bɛhɔle mbulukuzielɛleka kɛ bɛkazukoa anyezinlirama mbuluku nwo debie amaa bɛanwu kɛzi bɛbahile awie bɛamaa yeanwu ye kenga la.

Yeangyɛ biala, mediema nsa ɛhye nwunle anyezinlirama buluku kenga na yemɔ maanle bɛnyianle anyuhɔlɛ wɔ sunsum nu. a Kɛkala, Yomara, Marcelo yɛɛ Hiver le dahuu adekpakyelɛma. Marcelo le asafo nu sonvolɛ. Bɛfa bɛ nwo bɛwula sunsum nu gyimalilɛ nu wɔ dapɛne ne amuala anu. Bɛ mɔdenlebɔlɛ ne ka awie mɔ maa bɛdabɛ noko bɛbɔ mɔdenle.

Mediema nsa ne anye sɔ ɛlɔlɛ nu mɔɔ asafo ne fi boa bɛ la. Yomara hanle kɛ: “Ɔvi mekɛ mɔɔ limoa mɔɔ yɛyiale Alasevolɛ ne mɔ la, bɛla nɔhalɛ Kilisiene ɛlɔlɛ ali bɛhile yɛ.” Marcelo vale zɔle zolɛ kɛ: “Yɛlɛ agɔnwolɛma kpalɛ wɔ asafo ne anu yɛɛ yɛboka ewiade amuala mediema mɔɔ ɛlɔlɛ wɔ bɛ nu la anwo.” Yomara nee ɔ mediema mrenyia ne mɔ anye la mekɛ mɔɔ bɛbanwu kɛ ewiade amuala ɛyɛ paladaese la ade.​—Edw. 37:10, 11; Aye. 35:5.