Asoo Ɛze?
Wɔ tete Yizilayɛ, duzu ati a ɛnee bɛtua bɛ ti asoa a?
WƆ TETE ne, ɛnee bɛtua bɛ ti asoa ne bɛmaa raalɛ ne abusua ne wɔ mekɛ mɔɔ bɛlɛyɛ agyalɛ ngyehyɛleɛ ne la. Ɛnee bɛfa ninyɛne mɔɔ sonle bolɛ, nane anzɛɛ ezukoa a bɛtua a. Ɔdwu mekɛ ne bie a bɛyɛ gyima bɛtua, kɛ mɔɔ Gyekɔbo yɛle la, ɔliele ɔdole nu kɛ ɔbayɛ gyima ɛvolɛ nsuu yeamaa Relahyɛle papa amaa yeagya ye. (Gyn. 29:17, 18, 20) Duzu ati a ɛnee bɛtua asoa ne a?
Baebolo nwo abɔlɔba Carol Meyers hanle kɛ: “Ɛnee bɛtua bɛ ti asoa ne bɛmaa raalɛ ne abusua ne bɛfa bɛtua gyima mɔɔ anrɛɛ bɛ ra raalɛ ne bayɛ aboa bɛ, titili wɔ ɛyazonlɛ nu la.” Eza ɔbayɛ kɛ bɛ ti asoa ne maanle agɔnwolɛvalɛ mɔɔ wɔ mbusua nwiɔ ne avinli la anu mianle. Abusuabɔlɛ ɛhye maanle bɛholale bɛboale bɛ nwo wɔ ngyegyelɛ mekɛ nu. Bieko, bɛ ti asoa ne hilele kɛ bɛyia raalɛ ne na ɔnrɛhyɛ ɔbavi ye papa sua nu yeahɔ ɔ hu ɛkɛ.
Bɛ ti asoa ne mɔɔ bɛtua la ɛngile kɛ raalɛ ne le debie mɔɔ bɛkola bɛtɔ anzɛɛ bɛtɔne ye a. Ancient Israel—Its Life and Institutions buluku ne ka kɛ: “Ezukoa ne anzɛɛ debie gyɛne mɔɔ bɛfa bɛmaa raalɛ ne abusua ne la maa Yizilayɛma agyalɛ ne yɛ kɛ asɛɛ debie mɔɔ bɛlɛtɔ. Noko ɔzɔho kɛ ɛnee bɛbu [bɛ ti asoa ne] kɛ debie mɔɔ bɛlɛfa bɛamaa abusua ne, emomu tɛ kɛ bɛfa bɛadua raalɛ ne bolɛ.”
Ɛnɛ, wɔ maanle bie mɔ anu bɛdi amaamuo ɛhye azo. Saa Kilisiene awovolɛ bie kulo kɛ bɛdie bɛ ra ne ati asoa a, ɔwɔ kɛ “bɛmaa menli kɔsɔɔti [nwu] kɛ bɛlɛ ndelebɛbo” na ɔnle kɛ bɛdie ezukoa kpole. (Fel. 4:5; 1 Kɔl. 10:32, 33) Ɛhye bahile kɛ ‘bɛngulo ezukoa’ anzɛɛ bɛnle anyebolo. (2 Tim. 3:2) Bieko, saa Kilisiene awovolɛ ambɔ bolɛ kpole a, ɔnrɛmaa nrenyia ne ɛnrɛdu agyalɛ ne ɛnrɛzie kɔkpula kɛ ɔbanyia ezukoa ne la. Anzɛɛ ɔnrɛmaa nrenyia ne ɛnrɛgyakyi adekpakyelɛ gyima ne amaa yeava mekɛ dɔɔnwo yeayɛ gyima yeadua asoa ne mɔɔ ye bolɛ yɛ se la.
Wɔ maanle bie mɔ anu, arane ne ɛli ezukoa mɔɔ bɛkola bɛdie kɛ bɛ ti asoa la anwo mɛla. Ɔwɔ kɛ Kilisiene awovolɛ mɔɔ wɔ maanle zɔhane mɔ anu la di mɛla ne azo. Duzu ati ɔ? Nyamenle Edwɛkɛ ne ka kɛ ɔwɔ kɛ Kilisienema ‘bɛlɛ bɛ nwo aze maa tumivolɛma ne’ na bɛdi mɛla mɔɔ ɛntia Nyamenle mɛla ne mɔ la azo.—Wlo. 13:1; Gyi. 5:29.
