1-2. Kɛ mɔɔ Mateyu 5:11 kile la, adwenle boni a ɔwɔ kɛ yɛnyia ye wɔ sɔnea nwo a?

GYISƐSE bɔle ye ɛdoavolɛma ɛwɔkɛ kɛ bɛ nye balie kpalɛ. Eza ɔhanle ɔhilele bɛdabɛ mɔɔ bɛkulo ye la kɛ bɛbayia sɔnea. (Mat. 10:22, 23; Luku 6:20-23) Yɛ nye die kɛ yɛle Kelaese ɛdoavolɛma la. Noko saa yɛ abusua ne dwazo tia yɛ, arane ne kpɔ yɛ anzɛɛ yɛ gɔnwo mɔ gyimayɛvoma anzɛɛ sukuluma tinlitinli yɛ nwo zo kɛ yɛyɛ debie mɔɔ ɛnle kpalɛ la a, kɛzi yɛte nganeɛ ɛ? Saa yɛfa yɛ adwenle yɛkɔ ninyɛne ɛhye mɔ azo a, ɔmaa adwenleadwenle tɔ yɛ nwo.

² Menli dɔɔnwo ɛmbu kpɔdekpɔdeyɛlɛ kɛ ɔle debie mɔɔ maa bɛ nye die a. Noko Nyamenle Edwɛkɛ ne se ɔle debie mɔɔ ɔwɔ kɛ ɔmaa yɛ nye die. Kɛ neazo la, ɛdoavolɛ Gyemise hɛlɛle kɛ saa yɛyia sɔnea a, ɔnle kɛ yɛmaa ɔfo yɛ nwo zo emomu ɔwɔ kɛ ɔmaa yɛ nye die. (Gye. 1:2, 12) Gyisɛse noko hanle kɛ saa bɛlɛyɛ yɛ kpɔdekpɔde bɔbɔ a yɛmaa yɛ nye ɛlie. (Kenga Mateyu 5:11.) Yɛlɛyia sɔnea bɔbɔ a, kɛ ɔkɛyɛ na yɛ nye ahɔ zo alie ɛ? Saa yɛsuzu kɛlata mɔɔ Gyemise hɛlɛle hɔmaanle alimoa Kilisienema la anwo a, yɛbanyia ɛzukoalɛdeɛ dɔɔnwo yɛavi nu. Maa yɛlimoa yɛzuzu ngyegyelɛ mɔɔ Kilisienema zɔhane yiale la anwo.

3. Mɔɔ Gyemise rayɛle Gyisɛse ɛdoavolɛ la, yeangyɛ duzu a zile a?

³ Mɔɔ Gyisɛse adiema Gyemise rayɛle ɛdoavolɛ la, yeangyɛ bɛkpɔle Kilisienema mɔɔ wɔ Gyɛlusalɛm la. (Gyi. 1:14; 5:17, 18) Na mɔɔ bɛhunle ɛdoavolɛ Sitivin la, Kilisienema dɔɔnwo nriandinle vile suakpole ne azo na “bɛbɔle asande bɛhɔle  Dwudiya nee Samɛlea maanzinli ne mɔ anu.” Akee bɛhɔle too bɛhɔvindele Saepelɛse nee Anteɔko. (Gyi. 7:58–8:1; 11:19) Ɛdoavolɛma ne yiale ngyegyelɛ dɔɔnwo. Noko bɛbɔle mɔdenle bɛhanle edwɛkɛ ne wɔ ɛleka biala mɔɔ bɛhɔle la na bɛtetele asafo ngakyile wɔ maanle ngakyile mɔɔ ɛnee wɔ Wulomu Tumililɛ bo la anu. (1 Pita 1:1) Noko ɛnee ngyegyelɛ mgbole dɔɔnwo la bɛ nyunlu.

4. Sɔnea gyɛne boni mɔ a ɛnee ɔwɔ kɛ alimoa Kilisienema gyinla ɔ nloa a?

⁴ Ɛnee ɔwɔ kɛ Kilisienema gyinla sɔnea ngakyile nloa. Kɛ neazo la, wɔ kɛyɛ ɛvolɛ 50 Y.M., Wulomu Amɛnlado Kolɔdeɛse hanle kɛ Dwuuma kɔsɔɔti ɛvi Wulomu. Yemɔti ɛnee ɔwɔ kɛ Dwuuma mɔɔ ɛrayɛ Kilisienema la tu fi bɛ azua nu na bɛkɔ ɛleka gyɛne. (Gyi. 18:1-3) Wɔ kɛyɛ 61 Y.M., ɛzoanvolɛ Pɔɔlo hɛlɛle kɛ menli bɔle ɔ mediema Kilisienema aholoba wɔ bagua nu, bɛhyele bɛ bɛguale efiade na bɛwuale bɛ nwo ninyɛne. (Hib. 10:32-34) Kɛ mɔɔ ɔto awie biala la, ɛnee Kilisienema bie mɔ di ehyia yɛɛ bɛnde kpɔkɛ.​—Wlo. 15:26; Fel. 2:25-27.

5. Kpuya boni mɔ a yɛbabua a?

⁵ Gyemise hɛlɛle ye kɛlata ne kolaa na 62 Y.M. adwu, na ɛnee ɔze sɔnea ngakyile mɔɔ ɔ mediema ɛlɛyia la kpalɛ. Gyihova sunsum ne hanle Gyemise maanle ɔvale folɛdulɛ mɔɔ ɔbaboa Kilisienema zɔhane yeamaa bɛ nye ahɔ zo alie ɔnva nwo sɔnea ngakyile mɔɔ bɛlɛyia la ɔmaanle bɛ. Bɛmaa yɛzuzu Gyemise kɛlata ne anwo na yɛbua kpuya ɛhye mɔ: Anyelielɛ boni a Gyemise hanle nwolɛ edwɛkɛ a? Duzu a bahola azɛkye Kilisienenli bie anyelielɛ a? Na kɛzi nrɛlɛbɛ, diedi yɛɛ akɛnrasesebɛ bahola aboa yɛ yeamaa yɛ nye ahɔ zo alie ɔnva sɔnea biala mɔɔ yɛlɛyia la ɛ?

6. Kɛ mɔɔ Luku 6:22, 23 kile la, duzu ati a saa Kilisienenli ɛlɛyia sɔnea a ɔ nye bahola alie a?

⁶ Menli dɔɔnwo suzu kɛ saa bɛlɛ kpɔkɛdelɛ kpalɛ, ezukoa dɔɔnwo nee abusua mɔɔ anzodwolɛ wɔ nu la a, yɛɛ bɛ nye bahola alie a. Noko anyelielɛ anzɛɛ fɛlɛkolilɛ ne mɔɔ Gyemise hanle nwolɛ edwɛkɛ la boka Nyamenle sunsum ne ma ne anwo na ɔngyi tɛnlabelɛ mɔɔ awie wɔ nu la azo. (Gal. 5:22) Saa Kilisienenli bie ze kɛ ɔlɛyɛ mɔɔ sɔ Gyihova anye yɛɛ ɔlɛdi Gyisɛse neazo ne anzi a, ɔ nye die anzɛɛ ɔdi fɛlɛko kpole. (Kenga Luku 6:22, 23; Kɔl. 1:10, 11) Kɛ mɔɔ debie bɔ senle mɔɔ ɛlɛsɔ wɔ kɛnlaneɛ nu anwo bane maa ɔkɔ zo ɔsɔ la, zɔhane ala a anyelielɛ ɛhye sɔ wɔ Kilisienenli ahonle nu a. Saa yɛnde kpɔkɛ anzɛɛ yɛnlɛ ezukoa dɔɔnwo bɔbɔ a, ɔnnu. Saa awie mɔ golo yɛ nwo anzɛɛ saa yɛ abusua anzɛɛ awie mɔ gyɛne dwazo tia yɛ bɔbɔ a, ɔkɔ zo ɔsɔ. Mekɛ biala mɔɔ dwazotiama babɔ mɔdenle kɛ bɛnua ye la, ɔnnu, emomu ɔkɔ zo ɔsɔ kpole. Yɛ diedi ne anwo sɔnea ngakyile mɔɔ yɛyia la maa ɔda ali kɛ yɛle Kelaese nɔhalɛ ɛdoavolɛma. (Mat. 10:22; 24:9; Dwɔn 15:20) Ɛhye ati a Gyemise hɛlɛle kɛ: “Me mediema, saa bɛyia sɔnea ngakyile dɔɔnwo a, bɛli nwolɛ fɛlɛko kpole” la.​—Gye. 1:2.

7-8. Saa bɛsɔ yɛ bɛnea a, kɛzi ɔka yɛ diedi ne ɛ?

⁷ Gyemise hanle debie bieko mɔɔ ɔti Kilisienema lɛ ɛhulolɛ kɛ bɛbagyinla sɔnea mɔɔ anu yɛ se bɔbɔ anloa la anwo edwɛkɛ. Ɔhanle kɛ: “Bɛ diedi ne mɔɔ bɛzɔ bɛnlea la bamaa bɛanyia anwosesebɛ kpole bɛagyinla kpundii.” (Gye. 1:3) Yɛbahola yɛava sɔnea yɛatoto senle mɔɔ bɛfa bɛbɔ dadeɛ la anwo. Saa bɛye dadeɛ ne bɛfi senle ne anu bɛwula ye nzule nu bɛmaa ɔdwo a, ɔ nwo yɛ se kpalɛ. Zɔhane ala a saa yɛgyinla sɔnea nloa a, ɔmaa yɛ diedi nu yɛ se a. Ɛhye ati a Gyemise hɛlɛle kɛ: “Bɛmaa kpundiigyinlanlɛ ɛwie ye gyima, amaa bɛali munli bɔkɔɔ mɔɔ edwɛkɛ biala ɛnle bɛ nwo wɔ ninyɛne kɔsɔɔti anu” la. (Gye. 1:4) Saa yɛnwu kɛ sɔnea mɔɔ yɛyia la maa yɛ diedi nu yɛ se a, ɔmaa yɛfa anyelielɛ yɛgyinla ɔ nloa.

⁸ Eza Gyemise hanle ninyɛne bie mɔ mɔɔ bahola azɛkye yɛ anyelielɛ la anwo edwɛkɛ wɔ ye kɛlata ne anu. Bɛmɛ a le boni mɔ, na kɛ kɛyɛ na yɛahola yɛali zolɛ konim ɛ?

9. Duzu ati a yɛhyia nrɛlɛbɛ a?

⁹ Ngyegyelɛ ne: Saa yɛnnwu mɔɔ yɛyɛ a. Saa yɛlɛyia sɔnea a, yɛkulo kɛ Gyihova boa yɛ ɔmaa yɛsi kpɔkɛ mɔɔ ɔbazɔ ɔ nye, ɔbaboa yɛ mediema ne mɔ na yeaboa yɛ yeamaa yɛagyinla kpundii la. (Gyɛ. 10:23) Yɛhyia nrɛlɛbɛ amaa yɛanwu mɔɔ ɔwɔ kɛ yɛyɛ nee edwɛkɛ mɔɔ ɔwɔ kɛ yɛka yɛkile menli mɔɔ dwazo tia yɛ la. Saa yɛnnwu mɔɔ yɛyɛ a, ɔbahola yeamaa yɛ sa nu ado na yeazɛkye yɛ anyelielɛ ndɛndɛ.

10. Amaa yɛanyia nrɛlɛbɛ la, duzu a Gyemise 1:5 se ɔwɔ kɛ yɛyɛ a?

 ¹⁰ Mɔɔ ɔwɔ kɛ ɛyɛ: Sɛlɛ Gyihova kɛ ɔmaa wɔ nrɛlɛbɛ. Amaa yɛahola yɛava anyelielɛ yɛagyinla sɔnea nloa la, ɔwɔ kɛ yɛdimoa yɛsɛlɛ Gyihova kɛ ɔmaa yɛ nrɛlɛbɛ amaa yɛahola yɛazi kpɔkɛ kpalɛ. (Kenga Gyemise 1:5.) Saa yɛte nganeɛ kɛ Gyihova ɛmbua yɛ asɔneyɛlɛ ne ɛkɛ ne ala a, duzu a ɔwɔ kɛ yɛyɛ a? Gyemise se ‘yɛhɔ zo yɛbiza’ Nyamenle. Saa yɛkɔ zo yɛsɛlɛ Gyihova kɛ ɔmaa yɛ nrɛlɛbɛ a, ɔnrɛva yɛ nwo ɛya. Ɔnrɛdea yɛ. Saa yɛsɛlɛ yɛ anwuma Selɛ ne kɛ ɔmaa yɛ nrɛlɛbɛ ɔmaa yɛva yɛgyinla sɔnea nloa a, ‘ɔbavi atiakunlukɛnlɛma nu’ yeava yeamaa yɛ. (Edw. 25:12, 13) Ɔnwu sɔnea mɔɔ yɛyia la, ɔte yɛ nyane bo yɛɛ ɔlɛ ɛhulolɛ kɛ ɔbaboa yɛ. Nɔhalɛ nu, ɛhye maa yɛ nye die kpalɛ! Noko, kɛzi Gyihova fa nrɛlɛbɛ ne maa yɛ ɛ?

11. Duzu bieko a ɔwɔ kɛ yɛyɛ amaa yɛanyia nrɛlɛbɛ a?

¹¹ Gyihova dua ye Edwɛkɛ ne azo maa yɛ nrɛlɛbɛ. (Mrɛ. 2:6) Amaa yɛanyia zɔhane nrɛlɛbɛ ne la, ɔwɔ kɛ yɛsukoa Nyamenle Edwɛkɛ ne nee yɛ mbuluku ne mɔ. Noko ɔnle kɛ yɛsukoa ala. Ɔwɔ kɛ yɛfa Nyamenle nrɛlɛbɛ yɛdi gyima wɔ yɛ ɛbɛlabɔlɛ nu ɔlua ye folɛdulɛ mɔɔ yɛbava yɛayɛ gyima la azo. Gyemise hɛlɛle kɛ: “Bɛli edwɛkɛ ne azo, bɛmmatie ala.” (Gye. 1:22) Saa yɛfa Nyamenle folɛdulɛ yɛyɛ gyima a, ɔmaa yɛyɛ menli mɔɔ yɛkulo anzodwolɛ, yɛlɛ ndelebɛbo na yɛse anwunvɔne a. (Gye. 3:17) Subane ɛhye mɔ maa yɛgyinla sɔnea biala anloa mɔɔ ɔnzɛkye yɛ anyelielɛ a.

12. Duzu ati a ɔwɔ kɛ yɛnwu Baebolo ne anu kpalɛ a?

¹² Nyamenle Edwɛkɛ ne le kɛ neanleɛ la, ɔboa ɔmaa yɛnwu ninyɛne bie mɔ mɔɔ ɔwɔ kɛ yɛdi nwolɛ gyima nee kɛzi yɛbayɛ ye la. (Gye. 1:23-25) Kɛ neazo la, saa yɛsukoa Nyamenle Edwɛkɛ ne a, bie a yɛbanwu kɛ ɔwɔ kɛ yɛkomo yɛ ɛyavalɛ zo. Ɔlua Gyihova moalɛ zo, yɛbanwu kɛzi yɛbazie yɛ nwo dii wɔ mekɛ mɔɔ awie  mɔ baha yɛ ɛya anzɛɛ yɛbahɔ tɛnlabelɛ mɔɔ kola ka yɛ ɛya anu la. Saa yɛsie yɛ nwo dii a, ɔmaa yɛkola yɛdi ngyegyelɛ mɔɔ yɛyia la anwo gyima kpalɛ. Ɔmaa yɛkola yɛdwenle ninyɛne nwo kpalɛ na yɛsi kpɔkɛ kpalɛ. (Gye. 3:13) Nea kɛzi ɔhyia kɛ yɛbanwu Baebolo ne anu kpalɛ a!

13. Duzu ati a ɔwɔ kɛ yɛsukoa menli mɔɔ bɛ nwo edwɛkɛ wɔ Baebolo ne anu la neazo ne ɛ?

¹³ Ɔdwu mekɛ ne bie a, yɛyɛ nvonleɛ na akee yɛazukoa debie yɛavi nu. Noko ɛhye ɛnle kpalɛ. Adenle kpalɛ mɔɔ yɛkola yɛdua zo yɛnyia nrɛlɛbɛ la a le kɛ yɛbazukoa debie yɛavi bɛdabɛ mɔɔ bɛyɛle neazo kpalɛ nee bɛdabɛ mɔɔ bɛanyɛ neazo kpalɛ la ɛkɛ. Ɛhye ati a Gyemise maanle yɛ anwosesebɛ kɛ yɛzuzu neazo mɔɔ Baebolo nu menli le kɛ Ebileham, Releehabe, Dwobu yɛɛ Yilaegya yɛle la anwo la. (Gye. 2:21-26; 5:10, 11, 17, 18) Gyihova azonvolɛ ɛhye mɔ holale gyinlanle sɔnea mɔɔ anrɛɛ bahola azɛkye bɛ anyelielɛ la anloa. Bɛ kpundiigyinlanlɛ nwo neazo ne maa yɛnwu kɛ ɔlua Gyihova moalɛ zo yɛdayɛ noko yɛbahola yɛagyinla kpundii.

14-15. Saa yɛ adwenle nu yɛ yɛ kesee a, duzu ati a ɔwɔ kɛ yɛyɛ nwolɛ debie a?

¹⁴ Ngyegyelɛ ne: Saa yɛ adwenle nu yɛ yɛ kesee a. Ɔdwu mekɛ ne bie a, ɔyɛ se kɛ yɛbade edwɛkɛ bie mɔɔ wɔ Nyamenle Edwɛkɛ ne anu la abo. Anzɛɛ bie a Gyihova ɛnrɛbua yɛ asɔneyɛlɛ kɛ mɔɔ yɛkpondɛ la. Ɛhye kola maa yɛ adwenle nu yɛ yɛ kesee. Saa yɛanyɛ nwolɛ debie a, ɔbamaa yɛ diedi aha aze na yeazɛkye agɔnwolɛvalɛ mɔɔ yɛ nee Gyihova lɛ la. (Gye. 1:7, 8) Na ɔbahola yeazɛkye kenle bie anyelazo mɔɔ yɛlɛ la.

¹⁵ Ɛzoanvolɛ Pɔɔlo vale kenle bie nwo anyelazo mɔɔ yɛlɛ la totole sɛkɛ nwo. (Hib. 6:19) Saa ahumu ɛlɛtu a, sɛkɛ ne maa meli ne gyinla ɛleka ko na ɔmmaa ɔmmutu. Noko saa kyeenyi ne mɔɔ zɔ sɛkɛ ne la anwo yɛ se a, yɛɛ ɔbahola yeazɔ meli ne yeamaa yeagyinla a. Kɛ mɔɔ nrɛlana kola sɛkye kyeenyi mɔɔ zɔ sɛkɛ la, zɔhane ala a saa yɛ adwenle nu yɛ yɛ kesee na yɛanyɛ nwolɛ debie a ɔbazɛkye yɛ diedi ne a. Saa awie mɔɔ ye adwenle nu yɛ ye kesee la yia dwazotia a, ɔnrɛmaa ɔnrɛnyia diedi kɛ Gyihova bali ye ɛwɔkɛ zo. Saa yɛ diedi minli a, yɛ anyelazo ne noko baminli. Kɛ mɔɔ Gyemise hanle la, awie mɔɔ ye adwenle nu yɛ ye kesee la le kɛ “nyevile sɛlɛkye mɔɔ anwoma bɔ ye kɔ ba la.” (Gye. 1:6) Sonla zɛhae anye ɛnrɛlie ɛlɛ!

16. Saa yɛ adwenle nu yɛ yɛ kesee a, duzu a ɔwɔ kɛ yɛyɛ a?

¹⁶ Mɔɔ ɔwɔ kɛ ɛyɛ: Di adwenle nu keseeyɛlɛ zo; maa wɔ diedi ne anu ɛyɛ se. Yɛ nwolɛ debie ndɛndɛ. Wɔ ngapezonli Yilaegya mekɛ zo, Gyihova menli ne adwenle yɛle bɛ nwiɔ nwiɔ. Yilaegya zele bɛ kɛ: “Mekɛ tendenle nyɛ a bɛmaa bɛ adwenle ayɛ bɛ nwiɔ nwiɔ a? Saa Gyihova a le nɔhalɛ Nyamenle ne a, bɛdoa ye; saa Beeyale noko a, bɛdoa ye!” (1 Arl. 18:21) Zɔhane ala a ɔwɔ kɛ yɛyɛ ye ɛnɛ a. Ɔwɔ kɛ yɛyɛ neɛnleanu amaa yɛanwu ye wienyi kɛ Gyihova a le nɔhalɛ Nyamenle ne a, Baebolo ne le ye Edwɛkɛ yɛɛ Gyihova Alasevolɛ le ye menli. (1 Tɛs. 5:21) Saa yɛyɛ ɛhye mɔ amuala a, ɔnrɛmaa yɛ adwenle nu ɛnrɛyɛ yɛ kesee bieko; yɛ diedi nu bayɛ se. Saa yɛhyia moalɛ mɔɔ bamaa yɛali adwenle nu keseeyɛlɛ zo a, yɛbahola yɛamaa mgbanyima ne mɔ aboa yɛ. Saa yɛbahola yɛanyia anyelielɛ wɔ Gyihova ɛzonlenlɛ nu a, ɔwɔ kɛ yɛdi adwenle nu keseeyɛlɛ nwo gyima ndɛndɛ!

17. Saa yɛ sa nu to a, duzu a bazi a?

¹⁷ Ngyegyelɛ ne: Saa yɛ sa nu to a. Nyamenle Edwɛkɛ ne ka kɛ: “Saa ɛ sa nu to wɔ anwongyelelɛ mekɛ nu a, wɔ anwosesebɛ zo bade.” (Mrɛ. 24:10) Hibulu edwɛkɛkpɔkɛ mɔɔ bɛhile ɔ bo “ɛ sa nu to” la kola kile kɛ “ɛnlɛ akɛnrasesebɛ.”  Saa wɔannyia akɛnrasesebɛ a, wɔ anyelielɛ bahola aminli ndɛndɛ.

18. Saa bɛka kɛ ɛgyinla kpundii a, boni a ɔkile a?

¹⁸ Mɔɔ ɔwɔ kɛ ɛyɛ: Fa ɛ nwo to Gyihova anwo zo amaa wɔanyia akɛnrasesebɛ wɔagyinla kpundii. Yɛhyia akɛnrasesebɛ amaa yɛahola yɛagyinla sɔnea nloa. (Gye. 5:11) Edwɛkɛkpɔkɛ mɔɔ Gyemise vale lile gyima mɔɔ bɛhile ɔ bo “kpundiigyinlanlɛ” la maa yɛdwenle awie mɔɔ ɔkɔ so ɔgyinla ɔ bo zo ne mɔɔ ɔndu ɔ bo la anwo. Bie a yɛ adwenle bahɔ sogyanli mɔɔ ɔlɛfa akɛnrasesebɛ yeagyinla ɔ gyakɛ anu yeaho yeatia ye kpɔvolɛ la anwo zo.

19. Duzu a yɛsukoa yɛfi ɛzoanvolɛ Pɔɔlo neazo ne anu a?

¹⁹ Ɛzoanvolɛ Pɔɔlo yɛle akɛnrasesebɛ nee kpundiigyinlanlɛ nwo neazo kɛnlɛma. Ɔyɛ a ɛnee yeyɛ bɛtɛɛ. Noko ɔholale ɔgyinlanle kpundii ɔluakɛ ɔvale ɔ nwo ɔdole Gyihova anwo zo na ɔmaanle ye anwosesebɛ mɔɔ ɔhyia la. (2 Kɔl. 12:8-10; Fel. 4:13) Saa yɛbɛlɛ yɛ nwo aze na yɛdie yɛto nu kɛ yɛhyia Gyihova moalɛ a, yɛdayɛ noko yɛbahola yɛanyia anwosesebɛ nee akɛnrasesebɛ zɔhane bie.​—Gye. 4:10.

20-21. Duzu a yɛbahola yɛalie yɛali a?

²⁰ Yɛbahola yɛalie yɛali kɛ saa yɛlɛyia sɔnea a, ɔngile kɛ Gyihova ɛlɛtwe yɛ nzo. Gyemise hanle kɛ: “Saa awie kɔ sɔnea nu a, ɔmmaka kɛ: ‘Nyamenle ɛlɛsɔ me anlea.’ Ɔluakɛ bɛngola bɛnva ninyɛndane bɛnzɔ Nyamenle bɛnnea, yɛɛ ɔdaye noko ɔnzɔ awie biala ɔnnea.” (Gye. 1:13) Saa yɛdie nɔhalɛ edwɛkɛ zɔhane yɛdi a, ɔbamaa yɛabikye yɛ anwuma Selɛ ne mɔɔ lɛ ɛlɔlɛ la.​—Gye. 4:8.

²¹ Gyihova ‘ɛngakyi.’ (Gye. 1:17) Ɔboale alimoa Kilisienema wɔ sɔnea biala mɔɔ bɛyiale la anu na ɔbaboa yɛ nuhua ko biala ɛnɛ noko. Sɛlɛ Gyihova ɛsesebɛ kɛ ɔboa wɔ ɔmaa ɛnyia nrɛlɛbɛ, diedi nee akɛnrasesebɛ. Ɔbabua wɔ asɔneyɛlɛ. Akee ɛbahola wɔalie wɔali kɛ ɔbaboa wɔ yeamaa ɛ nye ahɔ zo alie wɔ mekɛ mɔɔ ɛlɛyia sɔnea la!