1. Saa yɛdwenledwenle dahuu ngoane nwo ɛwɔkɛ ne mɔɔ Gyihova ɛbɔ yɛ la anwo a, kɛzi ɔka yɛ ɛ?

 GYIHOVA ɛbɔ ɛwɔkɛ kɛ menli mɔɔ tie ye la banyia “dahuu ngoane.” (Wlo. 6:23) Saa yɛdwenledwenle dahuu ngoane nwo ɛwɔkɛ mɔɔ Gyihova ɛbɔ yɛ la anwo a, ɛlɔlɛ mɔɔ yɛlɛ yɛmaa ye la yɛ kpole. Dwenle nwolɛ nea: Yɛ anwuma Selɛ ne kulo yɛ kpole kpalɛ ɔti yɛnrɛvi ɔ nwo ɛlɛ.

2. Kɛzi dahuu ngoane nwo ɛwɔkɛ ne boa yɛ ɛ?

² Dahuu ngoane nwo ɛwɔkɛ mɔɔ Nyamenle ɛbɔ yɛ la boa yɛ maa yɛgyinla sɔnea ngakyile nloa ɛnɛ. Saa yɛ agbɔvolɛ fa ewule nwunlonwunla yɛ bɔbɔ a, yɛnrɛgyakyi Gyihova ɛzonlenlɛ. Duzu ati ɔ? Debie ko a le kɛ, yɛze kɛ yɛdi nɔhalɛ yɛkɔ ewule nu a Gyihova badwazo yɛ. (Dwɔn 5:28, 29; 1 Kɔl. 15:55-58; Hib. 2:15) Duzu ati a yɛbahola yɛalie yɛali kɛ yɛbahola yɛadɛnla aze dahuu a? Suzu deɛmɔti ɔle zɔ la bie mɔ anwo.

3. Duzu ati a yɛbahola yɛalie yɛali kɛ Gyihova kola maa yɛtɛnla aze dahuu a? (Edwɛne 102:12, 24, 27)

³ Yɛze kɛ Gyihova kola maa yɛtɛnla aze dahuu ɔluakɛ ye ɛkɛ ne a ngoane vi a, yɛɛ ɔde aze dahuu. (Edw. 36:9) Nea Baebolo nu edwɛkɛ ekyi mɔɔ kile kɛ Gyihova ɛdɛnla aze dahuu yɛɛ ɔbahɔ zo yeadɛnla aze dahuu la. Edwɛne 90:2 ka kɛ Gyihova  le Nyamenle, “ɔvi dahuu kɔdwu dahuu.” Edwɛne 102 ka edwɛkɛ ko ne ala bie. (Kenga Edwɛne 102:12, 24, 27.) Yɛɛ ngapezonli Habakɛke hanle yɛ anwuma Selɛ ne anwo edwɛkɛ kɛ: “O Gyihova, asoo tete ne amuala ɛnee ɛnle ɛkɛ ɔ? O me Nyamenle, me Nwuanzanwuanza Ko ne, ɛnwu.”​—Habakɛke 1:12.

4. Saa yɛnde Baebolo ne anu edwɛkɛ mɔɔ se Gyihova ɛdɛnla aze dahuu la abo a, asoo ɔwɔ kɛ yɛmaa ɔgyegye yɛ? Kilehile nu.

⁴ Asoo ɔyɛ se ɔmaa wɔ kɛ ɛbade Baebolo ne anu edwɛkɛ mɔɔ se Gyihova ɛdɛnla aze “dahuu” la abo ɔ? (Aye. 40:28) Tɛ ɛ ngomekye a ɛnde ɔ bo a. Ɛlaehu hanle ye wɔ Nyamenle anwo kɛ: “Ye ɛvolɛ ne dodo bo yɛ ndelebɛbo zo.” (Dwobu 36:26) Noko saa yɛnde debie bie abo a, ɔngile kɛ ɔnle nɔhalɛ. Kɛ neazo la, bie a yɛnde kɛzi lateleke yɛ gyima maa bɔɔbo sɔ la abo kpalɛ, noko asoo ɔkile kɛ debie biala ɛnle ɛkɛ mɔɔ bɛfɛlɛ ye lateleke ɔ? Ɔngile zɔ! Zɔhane ala a alesama noko ɛnrɛde kɛzi Gyihova ɛhola ɛdɛnla aze dahuu na ɔbahɔ zo yeadɛnla aze dahuu la abo a. Noko ɛhye ɛngile kɛ Nyamenle ɛnde aze dahuu. Yɛte ninyɛne bie mɔ abo yɛɛ yɛnde bie mɔ abo, noko tɛ kɛ yɛ Bɔvolɛ ne de ɛne. (Wlo. 11:33-36) Ɛnee ɔwɔ ɛkɛ ne kolaa na debie biala mɔɔ wɔ aleɛabo, le kɛ sɛnzɛne ne nee nwɔlɔra ne mɔ ara. Gyihova ɛmaa yɛnwu kɛ ɔdaye a “ɔvale ye tumi ɔyɛle azɛlɛ ne a.” Yɛɛ ɛnee ɔwɔ ɛkɛ ne kolaa na ‘yeadɛlɛ anwuma ne anu.’ (Gyɛ. 51:15; Gyi. 17:24) Debie bieko mɔɔ ɔti yɛbahola yɛalie yɛali kɛ yɛkola yɛtɛnla aze dahuu la a le boni?

5. Anyelazo boni a ɛnee agyalɛma mɔɔ limoa la lɛ a?

⁵ Gyihova anva dahuu ngoane ambɔ tease abɔdeɛ mɔɔ ɛha la kyesɛ alesama ala. Ɔmaanle bɛnyianle anyelazo kɛ bɛnrɛwu ɛlɛ. Noko Gyihova bɔle Adam kɔkɔ kɛ: “Baka ne mɔɔ maa bɛnwu kpalɛ nee ɛtane la ɛdeɛ, mmadi bie, ɔluakɛ kenle mɔɔ ɛbali bie la, ewule a ɛbawu a.” (Gyn. 2:17) Saa Adam nee Yive diele Gyihova a, anrɛɛ bɛanwu. Ndelebɛbo wɔ nu kɛ yɛbalie yɛali kɛ anrɛɛ ɔbadwu mekɛ bie la, Gyihova bamaa bɛali “ngoane baka ne” bie. Anrɛɛ ɛhye bahile kɛ Gyihova ɛmaa bɛ daselɛ mɔɔ kile kɛ ‘bɛbadɛnla ngoane nu dahuu’ a. b​—Gyn. 3:22.

6-7. (a) Duzu bieko a kile kɛ bɛambɔ alesama kɛ bɛwu a? (b) Ninyɛne mɔɔ ɛ nye die nwolɛ la boni a ɛ nye la kɛ ɛbayɛ ye kenle bie a? (Nea nvoninli ne mɔ.)

⁶ Abɔdeɛ nwo nrɛlɛbɛvolɛma bie mɔ ɛnyia daselɛ mɔɔ kile kɛ yɛ amelɛ ne bahola ava edwɛkɛ dɔɔnwo azie adɛla mɔɔ yɛkola yɛfa yɛsie kɛkala la, na ɛhye yɛ anyelielɛ kpalɛ. Wɔ 2010, edwɛkɛ bie mɔɔ bɛhɛlɛle ye wɔ Scientific American Mind magazine ne anu la hanle kɛ  yɛ amelɛ ne bahola ava dɔnehwele mɔɔ bo mgbe nsa anu edwɛkɛ anzɛɛ TV zo gyimalilɛ mɔɔ bɛhye too ɛvolɛ 300 la anu edwɛkɛ azie. Ɔbahola yeara ye kɛ ɔbo zɔ bɔbɔ. Noko ɛhye kile kɛ, Gyihova yɛle yɛ amelɛ ne mɔɔ ɔkola ɔfa edwɛkɛ dɔɔnwo ɔsie ɔtɛla mɔɔ yɛsukoa wɔ ɛvolɛ 70 anzɛɛ 80 anu la.​—Edw. 90:10.

⁷ Eza Gyihova anva ewule ambɔ yɛ. Baebolo ne ka ye wɔ alesama anwo kɛ, Nyamenle vale “mekɛ mɔɔ ɛnlɛ awieleɛ bɔbɔ la [wulale] bɛ ahonle nu.” (Nol. 3:11) Ɛhye le debie ko mɔɔ ɔti yɛbu ewule kɛ ɔle kpɔvolɛ la. (1 Kɔl. 15:26) Saa yɛ nwo to yɛ kpole a, asoo yɛnyɛ nwolɛ ɛhwee, emomu mɔɔ yɛkendɛ la ala a le ewule ɔ? Kyɛkyɛ. Fane dɔɔnwo ne ala yɛkɔ asopiti yɛɛ bie a yɛno nyile amaa yɛade kpɔkɛ. Nɔhalɛ nu, yɛyɛ biala mɔɔ yɛbahola la amaa yɛanwu. Na saa yɛ kulovolɛ bie wu a, kpanyinli o, kakula o, ɔmaa yɛdi nyane mekɛ tendenle. (Dwɔn 11:32, 33) Nɔhalɛ nu, saa yɛ Bɔvolɛ ne mɔɔ lɛ ɛlɔlɛ la ɛngulo kɛ alesama tɛnla aze dahuu a, anrɛɛ ɔnrɛva tumi mɔɔ yɛlɛ yɛfa yɛsukoa ninyɛne dɔɔnwo nee ɛhulolɛ mɔɔ yɛlɛ kɛ yɛbadɛnla aze dahuu la ɔnrɛwula yɛ nu. Noko yɛlɛ ninyɛne dɔɔnwo mɔɔ maa yɛdie yɛdi kɛ yɛbahola yɛadɛnla aze dahuu a. Maa yɛzuzu ninyɛne mɔɔ Gyihova yɛle wɔ tete ne nee mɔɔ ɔlɛyɛ ye kɛkala mɔɔ kile kɛ ɔtɛkakyile ye mɔlebɛbo bodane ne la bie mɔ anwo.

8. Mɔɔ fale Gyihova bodane ne anwo la, anwodozo boni a Ayezaya 55:11 maa yɛnyia a?

⁸ Adam nee Yive yɛle ɛtane na bɛvale ewule bɛrɛlɛle bɛ mra ɛdeɛ, noko Gyihova angakyi ye adwenle wɔ ye bodane ne anwo. (Kenga Ayezaya 55:11.) Ɔtɛde ye bodane kɛ ɔbamaa alesama mɔɔ di nɔhalɛ la adɛnla aze dahuu.  Yɛkola yɛka ye zɔ ɔlua ninyɛne mɔɔ Gyihova ɛha nee mɔɔ yeyɛ amaa ye bodane ara nu la ati.

9. Ɛwɔkɛ boni a Nyamenle ɛbɔ a? (Daneɛle 12:2, 13)

⁹ Gyihova ɛbɔ ɛwɔkɛ kɛ ɔbadwazo mowuamra na yeamaa bɛanyia nwolɛ adenle mɔɔ ɔbamaa bɛadɛnla aze dahuu la. (Gyi. 24:15; Tae. 1:1, 2) Ɛnee nɔhavo Dwobu lɛ diedi bɔkɔɔ kɛ Gyihova anwo ɛlɛdɔ kɛ ɔbadwazo menli mɔɔ ɛwu la. (Dwobu 14:14, 15) Ɛnee ngapezonli Daneɛle ze kɛ alesama lɛ anyelazo kɛ bɛbadwazo bɛ na bɛanyia nwolɛ adenle bɛadɛnla aze dahuu. (Edw. 37:29; kenga Daneɛle 12:2, 13.) Ɛnee Dwuuma mɔɔ wɔ Gyisɛse mekɛ zo la noko ze kɛ Gyihova bahola amaa ye azonvolɛ “dahuu ngoane.” (Luku 10:25; 18:18) Gyisɛse hanle ɛwɔkɛ ɛhye anwo edwɛkɛ fane dɔɔnwo, na ɔ Ze dwazole ɔdaye mumua ne.​—Mat. 19:29; 22:31, 32; Luku 18:30; Dwɔn 11:25.

10. Duzu a menli mɔɔ bɛdwazole bɛ wɔ tete ne la maa yɛnwu ye a? (Nea nvoninli ne.)

¹⁰ Gyihova a le Ngoane Maavolɛ ne a, na ɔlɛ tumi ɔkola ɔmaa menli ba ngoane nu bieko. Ɔmaanle ngapezonli Yilaegya tumi ɔmaanle ɔdwazole kunlavolɛ raalɛ ne mɔɔ wɔ Zalefate la ara ne. (1 Arl. 17:21-23) Nzinlii, Nyamenle boale ngapezonli Yilaehya ɔmaanle ɔdwazole Hyunɛm raalɛ bie ara. (2 Arl. 4:18-20, 34-37) Ewudwazo zɔhane mɔ nee gyɛne maa yɛnwu kɛ Gyihova lɛ tumi ɔkola ɔmaa menli ba ngoane nu bieko. Mɔɔ ɛnee Gyisɛse wɔ azɛlɛ ye azo la, ɔmaanle ɔlale ali kɛ ɔ Ze ɛva zɔhane tumi ne ɛmaa ye. (Dwɔn 11:23-25, 43, 44) Kɛkala Gyisɛse wɔ anwuma, na “bɛva tumi muala bɛmaa [ye] wɔ anwuma nee azɛlɛ ye azo.” Ɛhye ati ɔbahola yeamaa ɛwɔkɛ mɔɔ se “bɛdabɛ mɔɔ bɛwɔ ngakyelɛ nla ne mɔ anu la kɔsɔɔti” badwazo ara ngoane nu na bɛanyia anyelazo kɛ bɛbadɛnla aze dahuu la ara nu.​—Mat. 28:18; Dwɔn 5:25-29.

11. Kɛzi ɛkpɔnedeɛ ne kola maa yɛtɛnla aze dahuu ɛ?

¹¹ Duzu ati a Gyihova maanle adenle maanle ye kulovolɛ Ralɛ ne wule nyane ewule a? Gyisɛse hanle deɛmɔti ɔyɛle zɔ la anwo edwɛkɛ kɛ: “Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle, amaa awie biala mɔɔ kɛla ye ali kɛ ɔlɛ diedi wɔ ye nu la bɛanzɛkye ye na yeanyia dahuu ngoane.” (Dwɔn 3:16) Kɛmɔ Nyamenle vale ɔ Ra ne yɛle ɛkpɔnedeɛ duale yɛ ɛtane ne mɔ anwo kakɛ la ati, yemaa yeyɛ boɛ yemaa yɛ kɛ yɛbahola yɛanyia dahuu ngoane. (Mat. 20:28) Ɛzoanvolɛ Pɔɔlo hanle Nyamenle bodane ne foa ɛhye mɔɔ hyia la anwo edwɛkɛ kɛ: “Kɛ mɔɔ ewule luale sonla ko anwo zo a rale la, zɔhane ala a ewudwazo ɛlua sonla ko anwo zo ɛra a. Na kɛ mɔɔ Adam ati menli kɔsɔɔti wu la, zɔhane ala a Kelaese ati menli kɔsɔɔti banyia ngoane a.”​—1 Kɔl. 15:21, 22.

12. Kɛzi Belemgbunlililɛ ne baboa yeamaa bodane mɔɔ Gyihova lɛ maa yɛ la ara nu ɛ?

¹² Gyisɛse hilehilele ye ɛdoavolɛma ne kɛ bɛyɛ asɔne kɛ Nyamenle Belemgbunlililɛ ne ɛrɛla na Nyamenle ɛhulolɛdeɛ ɛyɛ ɛkɛ wɔ azɛlɛ ye azo. (Mat. 6:9, 10) Nyamenle bodane ne foa bie a le kɛ alesama badɛnla aze dahuu wɔ azɛlɛ ye azo. Amaa ɛhye ara nu la, Gyihova ɛkpa ɔ Ra ne kɛ Mɛzaya Belemgbunlililɛ ne azo Belemgbunli. Nyamenle ɛlɛboɔboa menli 144,000 anloa avi azɛlɛ ye azo amaa bɛ nee Gyisɛse ayɛ gyima bɛamaa Nyamenle ɛhulolɛdeɛ ara nu.​—Yek. 5:9, 10.

13. Duzu a Gyihova ɛlɛyɛ ye ɛnɛ a, na duzu a ɔwɔ kɛ ɛdawɔ noko ɛyɛ a?

¹³ Gyihova ɛlɛboɔboa “menli ekpunli kpole bie” anloa ɛnɛ na yeatete bɛ yeamaa bɛayɛ ye Belemgbunlililɛ ne anu maanlema. (Yek. 7:9, 10; Gye. 2:8) Ɛkpɔlɛ nee konle konle  ɛkpakyekpakye menli dɔɔnwo anu ɛnɛ ɛdeɛ, noko menli mɔɔ wɔ ekpunli ɛhye anu la bɔ mɔdenle kɛ bɛnrɛmaa maanle, mbusua nee menli nwo ɛkpɔlɛ ɛnrɛkpakyekpakye bɛ nu. Bɛfa bɛ nyɛleɛ bɛkile kɛ bɛlɛbolo bɛ konle dadeɛ ne mɔ bɛayɛ funduazɛlɛ. (Maeka 4:3) Kɛ anrɛɛ bɛbava bɛ nwo bɛawula konle konle mɔɔ maa menli dɔɔnwo wu la anu la, bɛkilehile bɛ nɔhalɛ Nyamenle nee ye bodane ne anwo debie amaa bɛaboa bɛ bɛamaa bɛanwu “nɔhalɛ ngoane ne.” (1 Tim. 6:19) Bie a bɛ mbusuafoɔ bɛadwazo atia bɛ anzɛɛ bɛ nwo bahyele bɛ wɔ ezukoa afoa nu ɔlua Nyamenle Belemgbunlililɛ ne mɔɔ bɛgyi ɔ nzi la ati, noko Gyihova banlea kɛ bɛ sa baha ninyɛne mɔɔ bɛhyia nwo la. (Mat. 6:25, 30-33; Luku 18:29, 30) Nɔhalɛ edwɛkɛ ɛhye mɔ maa yɛnwu kɛ, Nyamenle Belemgbunlililɛ ne wɔ ɛkɛ ne amgba na ɔbahɔ zo yeamaa Gyihova bodane ne ara nu.

14-15. Kɛzi Gyihova bamaa ɛwɔkɛ mɔɔ yebɔ kɛ ɔbaye ewule yeavi ɛkɛ la ara nu ɛ?

¹⁴ Kɛkala Gyisɛse ɛlɛdi tumi wɔ anwuma na ɔbamaa ɛwɔkɛ mɔɔ Gyihova ɛbɔ la kɔsɔɔti ara nu. (2 Kɔl. 1:20) Ɔvi 1914 mɔɔ ba la, Gyisɛse ɛlɛdi ye agbɔvolɛ anwo zo konim. (Edw. 110:1, 2) Ɔnrɛhyɛ, ɔ nee menli mɔɔ bɛ nee ye bali tumi la bawie bɛ konimlilɛ ne na bɛazɛkye amumuyɛma.​—Yek. 6:2.

¹⁵ Wɔ Gyisɛse Ɛvolɛ Apenle Ko Tumililɛ ne  anu, bɛbadwazo mowuamra na bɛamaa alesama mɔɔ yɛ tieyɛ la ali munli. Wɔ sɔnea mɔɔ li awieleɛ la anzi, bɛdabɛ mɔɔ Gyihova babua bɛ ndɛne kɛ bɛle tenlenema la “banyia azɛlɛ ne, na bɛadɛnla zolɛ dahuu.” (Edw. 37:10, 11, 29) Mɔɔ yɛ anyelielɛ la a le kɛ, “kpɔvolɛ mɔɔ li amozi mɔɔ bɛbazɛkye ye la a le ewule.”​—1 Kɔl. 15:26.

16. Adwenle titili boni a ɔwɔ kɛ yɛfa yɛsonle Gyihova a?

¹⁶ Kɛ mɔɔ yɛnwu ye la, anyelazo mɔɔ yɛlɛ kɛ yɛbadɛnla aze dahuu la gyi Nyamenle Edwɛkɛ ne azo. Anyelazo zɔhane bahola aboa yɛ yeamaa yɛahɔ zo yɛali nɔhalɛ wɔ awieleɛ mekɛ ɛhye mɔɔ anu yɛ se la anu. Noko tɛ ɛhulolɛ mɔɔ yɛlɛ kɛ yɛbadɛnla aze dahuu la a ɔwɔ kɛ ɔka yɛ ɔmaa yɛyɛ mɔɔ sɔ Gyihova anye la a. Debie titili mɔɔ ɔti ɔwɔ kɛ yɛkɔ zo yɛdi nɔhalɛ yɛmaa Gyihova nee Gyisɛse la a le kɛ yɛkulo bɛ kpalɛ. (2 Kɔl. 5:14, 15) Ɛlɔlɛ zɔhane ka yɛ maa yɛsukoa bɛ na yɛka yɛ anyelazo ne anwo edwɛkɛ yɛkile awie mɔ. (Wlo. 10:13-15) Saa yɛsukoa kɛ yɛnrɛyɛ angomedi na yɛyɛ nyele a, ɔbamaa yɛayɛ Gyihova agɔnwo mɔ dahuu.​—Hib. 13:16.

17. Duzu a ɔwɔ kɛ yɛ nuhua ko biala yɛ a? (Mateyu 7:13, 14)

¹⁷ Asoo yɛbaboka bɛdabɛ mɔɔ bɛbanyia dahuu ngoane la anwo ɔ? Gyihova ɛbuke zɔhane nwolɛ adenle ne ɛmaa yɛ. Kɛkala yedo yɛmaa yɛdayɛ kɛ yɛbahɔ zo yɛalua adenle ne mɔɔ kɔ ngoane nu la azo. (Kenga Mateyu 7:13, 14.) Kɛzi ɛbɛlabɔlɛ bayɛ wɔ mekɛ mɔɔ yɛde aze dahuu la ɛ? Yɛbazuzu kpuya zɔhane anwo mualɛ ne anwo wɔ edwɛkɛ bieko anu.