SAA ɛ gɔnwo bie kɛlɛ wɔ kɛlata mɔɔ maa anwosesebɛ a, kɛzi ɛte nganeɛ ɛ? Ɛzoanvolɛ Pɔɔlo hɛlɛle kɛlata ɛhye bie hɔmaanle Kelaese ɛdoavolɛ Timote. Kɛlata zɔhane a le 2 Timote mɔɔ wɔ Baebolo ne anu la. Ye biala anu, Timote bakpondɛ ɛleka koonwu adɛnla na yeagenga kɛlata ne mɔɔ ɔ gɔnwo kpalɛ ne ɛhɛlɛ ye la. Bie a Timote bizale ɔ nwo kɛ: ‘Kɛ Pɔɔlo anwo de ɛ? Ɔlɛfa folɛdulɛ mɔɔ baboa me yeamaa meayɛ me gyima ne la yearɛlɛ me ɔ? Asoo kɛlata ɛhye baboa me yeamaa meayɛ me Kilisiene ɛzonlenlɛ gyima ne na meaboa awie mɔ ɔ?’ Kɛ mɔɔ yɛbanwu ye la, Timote nyianle kpuya zɔhane ne mɔ nee ninyɛne ngakyile dɔɔnwo anwo mualɛ wɔ kɛlata zɔhane anu. Noko kɛkala yɛbazuzu kɛlata ɛhye anu folɛdulɛ bie mɔ mɔɔ baboa yɛ la anwo wɔ edwɛkɛ ɛhye anu.

Mɔɔ Timote bɔle ɔ bo kɛ ɔkenga kɛlata ne la, ɛkɛ ne ala ɔnwunle kɛ Pɔɔlo dwenle ɔ nwo kpalɛ. Pɔɔlo vale anyelielɛ vɛlɛle ye “me ra kulovolɛ.” (2 Tim. 1:2) Mɔɔ Timote asa hanle kɛlata ɛhye wɔ kɛyɛ ɛvolɛ 65 Y.M. la, ɔbayɛ kɛ ɛnee ɔwɔ ye ɛvolɛ 30 ne anu na ɔle asafo nu kpanyinli mɔɔ lɛ anwubielɛ. Ɛnee ɔ nee Pɔɔlo ɛlua ɛvolɛ mɔɔ bo bulu na yezukoa ninyɛne dɔɔnwo yevi ye ɛkɛ.

Mɔɔ Timote nwunle kɛ Pɔɔlo ɛlɛfa nɔhalɛlilɛ agyinla sɔnea nloa la, ɔmaanle ye anwosesebɛ kpole. Ɛnee Pɔɔlo la efiade wɔ Wulomu na ɛnee ɔnrɛhyɛ na bahu ye. (2 Tim. 1:15, 16; 4:6-8) Timote nwunle kɛ ɛzoanvolɛ ne lɛ akɛnrasesebɛ ɔluakɛ ɔhanle kɛ: “Mekɔ zo megyinla kpundii wɔ debie biala anu.” (2 Tim. 2:8-13) Pɔɔlo kpundiigyinlanlɛ ne bahola amaa yɛ anwosesebɛ kɛ mɔɔ ɔmaanle Timote anwosesebɛ la.

Pɔɔlo zele Timote kɛ ɔbu gyima mɔɔ ɔyɛ ye wɔ Nyamenle ɛzonlenlɛ nu la kɛ ɔsonle bolɛ kpalɛ. Ɛnee Pɔɔlo kulo kɛ Timote ‘maa Nyamenle ahyɛlɛdeɛ ne mɔɔ ɔnyianle la kɔ zo sɔ kɛ senle.’ (2 Tim. 1:6) Pɔɔlo vale edwɛkɛkpɔkɛ khaʹri·sma a hanle “ahyɛlɛdeɛ” zɔhane anwo edwɛkɛ a. Giliki edwɛkɛkpɔkɛ zɔhane kile ɛlolɛ ahyɛlɛdeɛ mɔɔ bɛnyia ye mgbane, debie mɔɔ bɛnyɛ nwolɛ gyima na bɛ sa aha ye. Timote asa hanle ahyɛlɛdeɛ ɛhye wɔ mekɛ mɔɔ bɛvale asafo ne anu gyima titili bie bɛwulale ɔ sa la.​—1 Tim. 4:14.

Duzu a ɛnee ɔwɔ kɛ Timote fa ahyɛlɛdeɛ ɛhye yɛ a? Mekɛ mɔɔ ɔlɛkenga edwɛkɛ ‘maa ɔhɔ zo ɔzɔ  kɛ senle la,’ bie a ye adwenle hɔle senle mɔɔ bɛwuda ye wɔ sua nu na ɔyɛ a bɛgyakyi ye bɛmaa ɔyɛ samɛnlakɛ la azo. Ɛnee ɔwɔ kɛ bɛka samɛnlakɛ ɛhye anu amaa yeazɔ kpole. Edwɛbohilelɛ buluku bie hanle kɛ Giliki yɛkpɔkɛ (a·na·zo·py·reʹo) mɔɔ Pɔɔlo vale lile gyima la kile kɛ “ɛka senle nu anzɛɛ ɛwuda nu wɔamaa yeazɔ.” Ɔti wɔ sɛkɛlɛneɛ adenle zo ɔkile kɛ ɛmaa “ɛ nye alie debie nwo na wɔabɔ mɔdenle wɔayɛ.” Ɔti ɛnee Pɔɔlo ɛlɛtu Timote folɛ kɛ: ‘Maa ɛ nye ɛbolo wɔ gyima nwo!’ Ɛkola ɛnwu kɛ ɔwɔ kɛ yɛdayɛ noko yɛyɛ zɔhane ala, ɔwɔ kɛ yɛbɔ mɔdenle yɛyɛ yɛ ɛzonlenlɛ gyima ne.

Mɔɔ Timote gua zo ɔlɛkenga ɔ gɔnwo ne kɛlata ne la, ɔnwunle edwɛkɛ bieko mɔɔ baboa ye yeamaa yeayɛ ye ɛzonlenlɛ gyima ne kpalɛ la. Pɔɔlo hɛlɛle kɛ: “Dua sunsum nwuanzanwuanza ne mɔɔ wɔ yɛ nu la moalɛ zo nea debie kpalɛ ɛhye mɔɔ bɛva bɛwula ɛ sa nu la azo boɛ.” (2 Tim. 1:14) Duzu a le debie kpalɛ ɛhye mɔɔ bɛvale bɛwulale Timote asa anu la? Wɔ ngyɛnu mɔɔ limoa la anu, Pɔɔlo hanle “edwɛkɛ kpalɛ,” mɔɔ le nɔhalɛ ne mɔɔ wɔ ngɛlɛlera ne anu la anwo edwɛkɛ. (2 Tim. 1:13) Kɛ mɔɔ ɛnee Timote le Kilisienenli la ati ɛnee ɔwɔ kɛ ɔka nɔhalɛ ne anwo edwɛkɛ ɔkile menli mɔɔ wɔ asafo ne anu nee menli mɔɔ ɛnle nu la. (2 Tim. 4:1-5) Eza bɛkpale Timote kɛ asafo nu kpanyinli na ɛnee ɔwɔ kɛ ɔnea Nyamenle mboane ne. (1 Pita 5:2) Ɛnee ɔwɔ kɛ Timote fa ɔ nwo to Gyihova sunsum ne nee Ye Edwɛkɛ ne azo na ɔnea mɔɔ bɛva bɛwula ɔ sa nu mɔɔ le nɔhalɛ ne mɔɔ ɔkilehile awie mɔ la azo boɛ.​—2 Tim. 3:14-17.

Ɛnɛ, bɛva nɔhalɛ ne mɔɔ yɛkilehile awie mɔ la bɛwula yɛdayɛ noko yɛ sa nu. (Mat. 28:19, 20) Ɔwɔ kɛ yɛyɛ asɔne dahuu na yɛsukoa Nyamenle Edwɛkɛ ne kpalɛ yɛfa yɛkile kɛzi yɛ nye sɔ gyima ɛhye mɔɔ bɛva bɛwula yɛ sa nu la. (Wlo. 12:11, 12; 1 Tim. 4:13, 15, 16) Bie a yɛbanyia gyima bieko kɛ asafo nu kpanyinli anzɛɛ yɛbayɛ dahuu ɛzonlenlɛ gyima ne bie. Ɔwɔ kɛ gyima zɛhae maa yɛbɛlɛ yɛ nwo aze na ɔboa yɛ ɔmaa yɛnwu kɛ ɔwɔ kɛ yɛfa yɛ nwo yɛto Nyamenle anwo zo kɛ ɔboa yɛ. Ɔti saa yɛbu gyima ɛhye kɛ nwolɛ hyia na yɛfa yɛ nwo yɛto Gyihova anwo zo kɛ ɔboa yɛ ɔmaa yɛyɛ a, ɔbamaa yɛanlea zolɛ boɛ anzɛɛ yɛabɔ nwolɛ bane.

Ɛnee ɔwɔ kɛ Timote noko tete awie mɔ ɔmaa bɛyɛ gyima mɔɔ ɔlɛyɛ la bie. Ɛhye ati a Pɔɔlo zele Timote kɛ: ‘Mɔɔ ɛdele ɛvile me ɛkɛ la, fa wula mrenyia nɔhavoma asa anu, amaa bɛdabɛ noko bɛafɛta bɔkɔɔ kɛ bɛkɛhilehile awie mɔ’ la. (2 Tim. 2:2) Ɔti, ɛnee ɔwɔ kɛ Timote sukoa debie fi ɔ mediema Kilisienema ɛkɛ na ɔdaye noko ɔfa bie ɔkilehile awie mɔ. Ɔhyia kɛ neavolɛ biala mɔɔ wɔ asafo ne anu la noko bɔ mɔdenle yɛ zɔ. Neavolɛ kpalɛ biala ɛnyɛ angomedi na ɔnva mɔɔ ɔze wɔ gyima bie anwo la ɔnvea awie mɔ. Emomu, ɔkilehile awie mɔ ɔmaa bɛnwu gyima ne yɛ. Ɔnzulo kɛ saa ɔkile bɛ a bɛbanwu gyima ne anye zo bɛadɛla ye anzɛɛ bɛbayɛ ye boɛ bɛadɛla ye. Ɔti saa neavolɛ ne ɛlɛkilehile awie mɔ a, ɔntete zolɛ ala ɔngɔ. Ɔkulo kɛ ɔboa menli mɔɔ ɔlɛtete bɛ la ɔmaa bɛte gyima ne abo kpalɛ na bɛnyi sunsum nu. Saa ɔyɛ zɔhane a “mrenyia nɔhavoma” ne mɔɔ ɔtetele bɛ la baboa asafo ne kpole kpalɛ.

Ye biala anu, Timote anye liele kɛlata ɛhye mɔɔ maa anwosesebɛ la anwo. Yɛbahola yɛapɛ kɛzi ɔgengale kɛlata ne anu fane dɔɔnwo na ɔdwenledwenlenle kɛzi nuhua folɛdulɛ kpalɛ ne baboa ye wɔ ye gyimalilɛ ne anu la anwo nvoninli.

Yɛkulo kɛ yɛdayɛ noko yɛfa folɛdulɛ ɛhye yɛdi gyima. Adenle boni azo? Yɛbahola yɛabɔ mɔdenle yɛamaa yɛ ahyɛlɛdeɛ ne azɔ kɛ senle, yɛanlea mɔɔ bɛva bɛwula yɛ sa nu la azo boɛ na yɛava yɛ anwubielɛ nee ninyɛne mɔɔ yɛze la yɛahilehile awie mɔ. Saa yɛyɛ zɔ a, yɛbahola yɛayɛ yɛ “ɛzonlenlɛ gyima ne kpalɛ” kɛ mɔɔ Pɔɔlo hanle hilele Timote la.​—2 Tim. 4:5.