1-2. Duzu ati a ɔwɔ kɛ Kilisienema kɔsɔɔti sukoa anwuma ewudwazo ne anwo debie a?

MENLI mɔɔ ɛlɛsonle Gyihova ɛnɛ la anu dɔɔnwo lɛ anyelazo kɛ bɛbadɛnla azɛlɛ ye azo dahuu. Noko Kilisienema mɔɔ bɛkpokpa bɛ la mɔhama lɛ anyelazo kɛ bɛbadwazo bɛ bɛahɔ anwuma. Bɛdabɛ mɔɔ bɛkpokpa bɛ la kulo kɛ bɛnwu kɛzi bɛ asetɛnla bayɛ wɔ anwuma la, noko duzu ati a bɛdabɛ mɔɔ bɛbadɛnla azɛlɛ ye azo la noko kulo kɛ bɛsukoa ɛhye anwo debie a? Kɛ mɔɔ yɛbanwu ye la, anwuma ewudwazo ne bamaa bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo la anyia nyilalɛ. Ɔti saa yɛbahɔ anwuma o anzɛɛ yɛbadɛnla azɛlɛ ye azo o, ɔwɔ kɛ yɛsukoa anwuma ewudwazo ne anwo debie.

² Wɔ ɛvoyia mɔɔ limoa la anu, Nyamenle vale ye sunsum ne boale Gyisɛse ɛdoavolɛma bie mɔ ɔmaanle bɛhɛlɛle anwuma ewudwazo ne anwo edwɛkɛ. Ɛzoanvolɛ Dwɔn hanle kɛ: “Kɛkala yɛle Nyamenle amra, noko kɛzi yɛbayɛ la ɛtɛdale ali. Yɛze kɛ mekɛ mɔɔ bɛbala ye ali la yɛbayɛ kɛ ɔdaye la.” (1 Dwɔn 3:2) Ɔti Kilisienema mɔɔ bɛkpokpa bɛ la ɛnze kɛzi bɛdwazo bɛ bɛkɔ anwuma kɛ sunsum nu abɔdeɛ a bɛbayɛ a. Noko saa bɛkɔdwu anwuma nehane a bɛbava bɛ nye bɛanwu Gyihova. Tɛ anwuma ewudwazo ne anwo edwɛkɛ ne amuala a Baebolo ne ka a, noko ɛzoanvolɛ Pɔɔlo  hanle nwolɛ edwɛkɛ ekyi. Bɛdabɛ mɔɔ bɛkpokpa bɛ la bɛahɔboka Kelaese anwo wɔ mekɛ mɔɔ ɔsɛkye “arane kɔsɔɔti nee tumivolɛma yɛɛ tumi kɔsɔɔti la.” Eza bɛbazɛkye “kpɔvolɛ mɔɔ li amozi” la, “ewule.” Awieleɛ bɔkɔɔ ne, Gyisɛse nee bɛdabɛ mɔɔ ɔ nee bɛ bali tumi la bɛava bɛ nwo nee ninyɛne kɔsɔɔti awula Gyihova abo. (1 Kɔl. 15:24-28) Mekɛ zɔhane bayɛ anyelielɛ kpole! *

3. Kɛ mɔɔ 1 Kɔlentema 15:30-32 kile la, duzu a diedi mɔɔ Pɔɔlo lɛ ye wɔ ewudwazo ne anu la maanle ɔyɛle a?

³ Diedi mɔɔ Pɔɔlo lɛ ye wɔ ewudwazo ne anu la boale ye maanle ɔgyinlanle sɔnea ngakyile nloa. (Kenga 1 Kɔlentema 15:30-32.) Pɔɔlo zele Kɔlentema kɛ: “Dahuu me nee ewule yia.” Eza ɔhɛlɛle kɛ: “Me nee nane anwo ɛzulolɛ ɛho wɔ Ɛfɛsɛse.” Ɔbayɛ kɛ ɛnee ɔlɛka nane kpalɛ mɔɔ ɔ nee bɛ honle wɔ Ɛfɛsɛse nwɔhoalilɛleka bie la. (2 Kɔl. 1:8; 4:10; 11:23) Anzɛɛ bie a ɛnee ɔlɛka Dwuuma mɔɔ dwazo tia ye yɛɛ menli gyɛne mɔɔ bɛyɛ bɛ nyɛleɛ kɛ “nane anwo ɛzulolɛ” la anwo edwɛkɛ. (Gyi. 19:26-34; 1 Kɔl. 16:9) Pɔɔlo yiale ngyegyelɛ dɔɔnwo, noko ɛnee ɔlɛ anyelazo kɛ kenle bie ninyɛne bayɛ boɛ.​—2 Kɔl. 4:16-18.

4. Kɛzi ewudwazo nwo anyelazo ne maa Kilisienema anwosesebɛ ɛnɛ ɛ? (Nea ɔ nyunlu nvoninli ne.)

⁴ Yɛde mekɛ mɔɔ anu yɛ ɛzulolɛ la anu. Yɛ mediema bie mɔ ɛnwu amaneɛ wɔ amumuyɛma asa anu. Bie mɔ de ɛleka mɔɔ konle konle ɛlɛkɔ zo la na bɛnlɛ anwobanebɔlɛ biala. Bie mɔ noko de ɛleka mɔɔ bɛva bɛ sa bɛdo yɛ gyima ne azo la na bɛkɔ zo bɛsonle Gyihova ɔnva nwo kɛ bɛbahola bɛagua bɛ efiade anzɛɛ bɛahu bɛ la. Noko mediema ɛhye mɔ amuala ɛlɛbɔ mɔdenle wɔ Gyihova ɛzonlenlɛ nu, na ɛhye le neazo kɛnlɛma maa yɛ. Bɛze ye wienyi kɛ saa bɛ ngoane fi bɛ sa wɔ mekɛ ɛhye anu bɔbɔ a, Gyihova bamaa bɛ debie mɔɔ sonle bolɛ kpalɛ la kenle bie.

5. Adwenle ɛtane boni a bahola amaa diedi mɔɔ yɛlɛ ye wɔ ewudwazo ne anu la aha aze a?

⁵ Pɔɔlo bɔle ɔ mediema ne mɔ kɔkɔ wɔ adwenle ɛtane ɛhye mɔɔ ɛnee menli lɛ la anwo: “Saa bɛnrɛdwazo mowuamra a, ɛnee ‘bɛmaa yɛli na yɛnlo, ɔluakɛ ɛhyema ɛnee yɛwu.’” Kolaa na bɛawo Pɔɔlo bɔbɔ la, ɛnee menli lɛ zɔhane adwenle ne. Bie a ɔhwenle adwenle ɔhɔle Ayezaya 22:13 azo, ɔfale subane mɔɔ ɛnee Yizilayɛma lɛ la anwo. Kɛ anrɛɛ bɛbanyia Nyamenle anwo ɛlɔlɛ kpole la, bɛlile anyelielɛ ninyɛne nzi. Ɛnee Yizilayɛma subane a le kɛ, “maa yɛdwenle yɛ nwo, sonla ɛngyɛ na yeawu.” Ɛnɛ noko menli dɔɔnwo lɛ adwenle ɛhye bie. Noko Baebolo ne ka mɔɔ vile Yizilayɛ maanle ne subane ɛtane ɛhye anu rale la anwo edwɛkɛ.​—2 Ek. 36:15-20.

6. Ɔlua ewudwazo nwo anyelazo mɔɔ yɛlɛ la ati, nwane mɔ a ɔwɔ kɛ yɛfa bɛ agɔnwolɛ a?

⁶ Yɛze ye wienyi kɛ Gyihova badwazo mowuamra ɔti ɔwɔ kɛ yɛnea yɛ agɔnwolɛvalɛ boɛ. Ɛnee ɔnle kɛ mediema mɔɔ wɔ Kɔlente la nee menli mɔɔ bɛnlie ewudwazo ne bɛnli la tu. Duzu yɛsukoa yɛfi nu a? Saa yɛta yɛ nee menli mɔɔ lɛ adwenle kɛ bɛmaa yɛlie yɛ nye na sonla ɛngyɛ na yeawu la tu a ɔnrɛboa yɛ. Saa nɔhalɛ Kilisienenli nee menli zɛhae mɔ tu a bɛbazɛkye ye adwenle nee ye subane. Nɔhalɛ nu, bɛbahola bɛamaa yɛayɛ ninyɛne mɔɔ Nyamenle kyi la​—ɛtane. Ɛhye ati, Pɔɔlo hanle ye anyebolo zo kɛ: “Bɛmaa bɛ nye ɛla ɛkɛ na bɛyɛ mɔɔ le kpalɛ la na bɛmmayɛ ɛtane.”​—1 Kɔl. 15:33, 34.

7. Kɛ mɔɔ 1 Kɔlentema 15:35-38 kile la, ewudwazo ne anwo kpuya boni a bie mɔ babiza a?

⁷ Kenga 1 Kɔlentema 15:35-38. Bie a awie mɔɔ kulo kɛ ɔsɛkye awie mɔ adwenle wɔ ewudwazo ne anwo la babiza kɛ: “Sonlabaka boni a bɛbava bɛara a?” Ɔwɔ kɛ yɛdwenle Pɔɔlo mualɛ ne anwo ɔluakɛ ɛnɛ, asolo adwenle mɔɔ menli dɔɔnwo lɛ ye wɔ mɔɔ to awie wɔ ye ewule nzi la anwo. Noko duzu a Baebolo ne ka a?

8. Ndonwo boni a bahola aboa yɛ amaa yɛade anwuma ewudwazo ne abo a?

⁸ Saa awie wu a ye sonlabaka ne kpɔlɔ. Noko Ahenle mɔɔ bɔle anwuma ne aze la bahola adwazo ahenle mɔɔ ɛwu la na yeamaa ye sonlabaka mɔɔ fɛta. (Gyn. 1:1; 2:7) Pɔɔlo vale ndonwo hilehilele nu kɛ saa Nyamenle ɛlɛdwazo awie a, ɔngyia kɛ ɔbamaa yeava ye sonlabaka dɛba ne ala yeara. Wɔmɔ fa “ma” bie kɛ neazo. Saa bɛdua ma ne a, ɔfifi ɔyɛ baka fofolɛ. Baka ne mɔɔ ɛfifi la le ngakyile bɔkɔɔ fi ma ne anwo. Pɔɔlo vale ndonwo ɛhye hilele kɛ yɛ Bɔvolɛ ne kola maa ye “baka kɛ mɔɔ ɔkulo la.”

9. Nwonane ngakyile boni a 1 Kɔlentema 15:39-41 ka nwolɛ edwɛkɛ a?

⁹ Kenga 1 Kɔlentema 15:39-41. Pɔɔlo hanle kɛ abɔdeɛ gua ye ngakyile. Kɛ neazo la, asolo nlankɛ, nloma yɛɛ fɛlɛ nwonane. Ɔhanle kɛ saa ɛnea anwomanyunlu a ɛnwu kɛ ngakyile wɔ sɛnzɛne ne nee siane ne anu. Eza ɔhanle kɛ nwɔlɔra ne mɔ bɔbɔ “asolo ko biala anyunlunyia.” Ɛhye le nɔhalɛ saa bɔbɔ yɛnva yɛ nye yɛnnwu bɛ a. Abɔdeɛ nwo nrɛlɛbɛvolɛma ka kɛ nwɔlɔra ne mɔ gua ye ngakyile, bie le kpole, bie le ekyi, bie le kɔkɔlɛ, bie le fufule yɛɛ bie le yɛlo kɛ sɛnzɛne ne la. Eza Pɔɔlo hanle kɛ, “asolo anwomanyunlu abɔdeɛ anyunlunyia yɛɛ asolo azɛlɛ ye azo abɔdeɛ noko ɛdeɛ.” Duzu a ɛnee ɔlɛkile a? Nwonane nu sonlabaka a wɔ azɛlɛ ye azo a, noko sunsum nu  sonlabaka mɔɔ anwumabɔvolɛ ne mɔ lɛ bie la a wɔ anwuma nehane a.

10. Duzu sonlabaka a menli mɔɔ bɛbadwazo bɛ bɛahɔ anwuma la banyia a?

¹⁰ Yɛ edwɛkɛ bieko mɔɔ Pɔɔlo hanle la nzonlɛ: “Zɔhane ala a mowuamra ɛdwazolɛ ne de a. Mɔɔ bɛdua la kpɔlɔ; mɔɔ bɛdwazo ye la ɛmkpɔlɔ.” Nɔhalɛ nu, yɛze kɛ saa sonla wu a ɔ nwo nane ne kpɔlɔ na ɔkakyi ndɛtɛlɛ. (Gyn. 3:19) Ɔti, duzu ati a yɛkola yɛka kɛ mɔɔ “bɛdwazo ye la ɛmkpɔlɔ” a? Tɛ menli mɔɔ bɛdwazole bɛ bɛrale azɛlɛ ye azo le kɛ mɔɔ Yilaegya, Yilaehya yɛɛ Gyisɛse dwazole bɛ la anwo edwɛkɛ a ɛnee Pɔɔlo ɛlɛka a. Ɛnee Pɔɔlo ɛlɛka awie mɔɔ bɛdwazo ye na bɛmaa ye sonlabaka mɔɔ kola tɛnla anwuma, mɔɔ le “sunsum nu sonlabaka” la anwo edwɛkɛ.​—1 Kɔl. 15:42-44.

11-12. Mɔɔ bɛdwazole Gyisɛse la, duzu sonlabaka a ɔnyianle a, na menli mɔɔ bɛkpokpa bɛ la noko ɛ?

¹¹ Mɔɔ Gyisɛse wɔ azɛlɛ ye azo la, ɛnee ɔlɛ nwonane nu sonlabaka. Noko mɔɔ bɛdwazole ye la “ɔrayɛle sunsum mɔɔ maa ngoane” na ɔziale ɔhɔle anwuma. Zɔhane ala a bɛbadwazo menli mɔɔ bɛkpokpa bɛ la na bɛamaa bɛ sonlabaka mɔɔ kola tɛnla anwuma a. Pɔɔlo hilehilele nu kɛ: “Kɛ mɔɔ yɛle mɔɔ bɛvale ndɛtɛlɛ bɛbɔle ye la ɛsaso la, zɔhane ala a yɛbayɛ mɔɔ vi anwuma la ɛsaso a.”​—1 Kɔl. 15:45-49.

¹² Ɛnee Pɔɔlo ɛlɛfa ye ewudwazo nwo edwɛkɛ ne ara ye awieleɛ. Yɛ ye nzonlɛ kɛ mɔɔ bɛdwazole Gyisɛse la ɛnee ɔnlɛ nwonane nu sonlabaka. Pɔɔlo hanle ye wienyi kɛ: “Nwonane nee mogya ɛnrɛhola ɛnrɛnyia Nyamenle Belemgbunlililɛ ne” wɔ anwuma. (1 Kɔl. 15:50) Bɛnrɛdwazo ɛzoanvolɛma nee menli gyɛne bɛnrɛhɔ anwuma wɔ mekɛ mɔɔ bɛlɛ nwonane nee mogya mɔɔ kpɔlɔ la. Mekɛ boni a bɛbadwazo bɛ a? Pɔɔlo zile zolɛ kɛ ewudwazo ɛhye tɛbɔ yɛ nyunlu; ɔnle debie mɔɔ saa bɛwu a, ɛkɛ ne ala ɛnee bɛdwazo bɛ a. Mekɛ mɔɔ Pɔɔlo kɛlɛ 1 Kɔlentema la, ɛnee ɛdoavolɛma bie mɔ, le  kɛ ɛzoanvolɛ Gyemise “ɛla wɔ ewule nu” dɛbadɛba. (Gyi. 12:1, 2) Nzinlii, ɛzoanvolɛma gyɛne nee menli mɔɔ bɛkpokpa bɛ la noko bala “wɔ ewule nu.”​—1 Kɔl. 15:6.

13. Saa Gyisɛse ba a, duzu a bazi a?

¹³ Gyisɛse nee Pɔɔlo hanle mekɛ titili bie anwo edwɛkɛ dole ɛkɛ, yemɔ a le Kelaese ɛralɛ ne. Saa Kelaese ba a konle konle, azɛlɛkpusulɛ, ewulenzane nee ninyɛndane ngakyile basisi wɔ ewiade amuala. Ɔvi 1914 mɔɔ ba la, yɛnwu kɛ Baebolo ngapezo ɛhye mɔ ɛlɛba nu. Debie titili bie noko bahɔ zo wɔ zɔhane mekɛ ne. Gyisɛse hanle kɛ, bɛbabɔ edwɛkpa ne mɔɔ kile kɛ Nyamenle Belemgbunlililɛ ne ɛlɛdi tumi la “nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.” (Mat. 24:3, 7-14) Pɔɔlo hanle kɛ bɛbadwazo Kilisienema mɔɔ “ɛla wɔ ewule nu la” wɔ “Kelaese ɛralɛ ne anu.”​—1 Tɛs. 4:14-16; 1 Kɔl. 15:23.

14. Duzu a bazi Kilisienema mɔɔ bɛkpokpa bɛ mɔɔ bɛbawu wɔ Kelaese ɛralɛ ne anu la anwo zo a?

¹⁴ Saa Kilisienema mɔɔ bɛkpokpa bɛ la bie wu ɛnɛ a ɛkɛ ne ala bɛdwazo ye bɛmaa ɔkɔ anwuma. Pɔɔlo edwɛkɛ mɔɔ wɔ 1 Kɔlentema 15:51, 52 la maa yɛnwu ye zɔ. Ɔse: “Yɛ muala yɛnrɛla wɔ ewule nu, emomu yɛ muala yɛbahakyi, ndɛndɛ ne ala, bɛkabɔ bɛ nye bɛade la, wɔ mekɛ mɔɔ bɛbabɔ aweɛne tendenle ne mɔɔ li amozi la.” Pɔɔlo edwɛkɛ ɛhye ɛlɛkɔ zo ɛnɛ! Saa bɛdwazo Kelaese amediema ɛhye mɔ a, bɛ nye die kpole ɔluakɛ bɛ “nee Awulae badɛnla dahuu.”​—1 Tɛs. 4:17.

15. Duzu gyima a menli mɔɔ “bɛkabɔ bɛ nye bɛade la” bɛhakyi la bayɛ a?

¹⁵ Baebolo ne maa yɛnwu gyima mɔɔ bɛdabɛ  mɔɔ “bɛkabɔ bɛ nye bɛade la” bɛhakyi la bayɛ ye wɔ anwuma la. Gyisɛse zele bɛ kɛ: “Mɔɔ kɛli konim na ɔkɛyɛ me gyima ne ɔkɛhɔ awieleɛ la, mebamaa ye tumi wɔ maanle maanle ne mɔ anwo zo, na ɔbava bulalɛ kpɔma yeaha menli ne kɛ mboaneneavolɛ la na yeabubu bɛ dwɔkɔdwɔkɔ kɛ ɛyɛba, kɛ mɔɔ medame noko menyia ye mevi me Ze ɛkɛ ne la.” (Yek. 2:26, 27) Bɛbali Gyisɛse anzi na bɛava bulalɛ kpɔma bɛali maanle maanle ne mɔ anwo zo tumi.​—Yek. 19:11-15.

16. Kɛzi alesama dɔɔnwo bali ewule nwo zo konim ɛ?

¹⁶ Ɔda ali wienyi kɛ menli mɔɔ bɛkpokpa bɛ la bɛali ewule nwo zo konim. (1 Kɔl. 15:54-57) Saa bɛdwazo bɛ bɛkɔ anwuma a bɛbaboka Gyisɛse anwo na bɛaye amumuyɛyɛlɛ bɛavi azɛlɛ ye azo wɔ Amagɛdɔn konle ne anu. Kilisienema gyɛne mgbe dɔɔnwo mɔɔ “ɛvi anwongyelelɛ kpole ne anu” la banyia ngoane ahɔ ewiade fofolɛ ne anu. (Yek. 7:14) Menli ɛhye mɔ banwu kɛzi bɛbali ewule nwo zo konim bieko la, yemɔ a le menli mgbe mgbe dɔɔnwo mɔɔ wule mɔɔ bɛbadwazo bɛ la. Saa yɛnwu nwanwane deɛ ɛhye a, nea kɛzi yɛ nye balie kpole a! (Gyi. 24:15) Menli mɔɔ di nɔhalɛ maa Gyihova la amuala noko bali ewule mɔɔ yɛnyianle yɛvile Adam ɛkɛ la anwo zo konim. Bɛbahola bɛadɛnla aze dahuu.

17. Duzu a 1 Kɔlentema 15:58 maa yɛ anwosesebɛ kɛ yɛyɛ a?

¹⁷ Ɔwɔ kɛ Kilisienenli biala mɔɔ de aze ɛnɛ la maa ɔ nye die ewudwazo nwo edwɛkɛ mɔɔ kyekye yɛ rɛle mɔɔ Pɔɔlo hɛlɛle hɔmaanle Kɔlentema la anwo. Yɛdie Pɔɔlo edwɛkɛ mɔɔ se yɛbɔ mɔdenle yɛyɛ “dɔɔnwo wɔ Awulae gyima ne anu” la yɛto nu bɔkɔɔ. (Kenga 1 Kɔlentema 15:58.) Saa yɛbɔ mɔdenle yɛyɛ gyima ɛhye dahuu a yɛbahola yeanyia kenle bie mɔɔ yɛ anyelielɛ. Mɔɔ yɛbanyia ye kenle bie la bayɛ anyelielɛ adɛla kɛzi yɛsuzu la. Ɔbamaa yɛanwu ye wienyi kɛ Awulae ati yɛ ɛvɛlɛ anyɛ gyɛne.