1. Nwane mɔ a boale maanle bɛdele Felepae asafo ne a?

MƆƆ ɛzoanvolɛ Pɔɔlo, Saelase, Luku yɛɛ Timote dwule Felepae mɔɔ ɛnee wɔ Wulomu abo la, bɛnyianle menli dɔɔnwo mɔɔ anye die Belemgbunlililɛ edwɛkɛ ne anwo la. Mediema nna ɛhye mɔ mɔɔ bɔ mɔdenle la boale maanle bɛdele asafo wɔ ɛkɛ, na ɛdoavolɛma ne amuala bɔle ɔ bo kɛ bɛyia nu, ɔbayɛ kɛ bɛyiale wɔ Ledea, diedinli bie mɔɔ ɔkulo ɛyɛvolɛyɛlɛ la sua nu.​—Gyi. 16:40.

2. Ngyegyelɛ boni a yeangyɛ asafo zɔhane yiale a?

² Yeangyɛ, asafo fofolɛ ne yiale ngyegyelɛ. Seetan zile nɔhalɛ ne anwo agbɔvolɛma adua ɔmaanle bɛdwazole bɛtiale daselɛlilɛ gyima ne mɔɔ nɔhalɛ Kilisienema ɛhye mɔ ɛlɛyɛ la. Bɛhyele Pɔɔlo nee Saelase, bɛguale bɛ empele na bɛdole bɛ efiade. Mɔɔ bɛyele bɛ bɛvile efiade la, bɛhɔmaanle ɛdoavolɛma fofolɛ ne mɔ anwosesebɛ. Akee Pɔɔlo, Saelase yɛɛ Timote vile suakpole ne azo na ɔbayɛ kɛ bɛgyakyile Luku wɔ ɛkɛ. Kɛzi mediema fofolɛ ɛhye mɔ yɛle bɛ nyɛleɛ ɛ? Ɔlua Gyihova sunsum ne moalɛ zo, diedima fofolɛ ɛhye mɔ nyianle anyuhɔlɛ wɔ Gyihova ɛzonlenlɛ nu. (Fel. 2:12) Ɔnyɛ nwanwane kɛ ɛnee Pɔɔlo fa bɛ tu ɔ nloa nu la!

3. Kɛ mɔɔ bɛha ye wɔ Felepaema 1:9-11 la, duzu a Pɔɔlo yɛle nwolɛ asɔne a?

³ Kɛyɛ ɛvolɛ bulu anzi, Pɔɔlo hɛlɛle kɛlata hɔmaanle Felepae asafo ne. Mekɛ mɔɔ ɛlɛkenga kɛlata zɔhane la, ɛbanwu kɛzi ɛnee Pɔɔlo kulo ɔ mediema ne mɔ la. Ɔhɛlɛle kɛ: “Me nwo ɛlɛdɔ bɛ muala na melɛ bɛ nwo ɛlɔlɛ kɛ Kelaese Gyisɛse la.” (Fel. 1:8) Ɔhɛlɛle bɛ kɛ ɔyɛ asɔne ɔmaa bɛ.  Ɔzɛlɛle Gyihova kɛ ɔmaa bɛ ɛlɔlɛ ɛyɛ kpole, bɛyɛ ninyɛne mɔɔ hyia kpalɛ, bɛ nwo ɛde saanwu na ɔboa bɛ na bɛandenda awie mɔ agyakɛ anu amaa bɛahɔ zo bɛazo tenleneyɛlɛ ma. Yɛbahola yɛanyia Pɔɔlo edwɛkɛ ne azo nvasoɛ ɛnɛ. Yemɔti bɛmaa yɛgenga mɔɔ Pɔɔlo hɛlɛle hɔmaanle Felepaema la. (Kenga Felepaema 1:9-11.) Akee yɛbazuzu ninyɛne mɔɔ ɔhanle nwolɛ edwɛkɛ la anwo yɛɛ kɛzi yɛbava ko biala yɛayɛ gyima la.

4. (a) Kɛ mɔɔ 1 Dwɔn 4:9, 10 kile la, kɛzi Gyihova ɛhile kɛ ɔkulo yɛ kpole ɛ? (b) Kɛzi ɔwɔ kɛ yɛkulo Nyamenle ɛ?

⁴ Gyihova lale ɛlɔlɛ kpole ali hilele yɛ ɔlua ɔ Ra ne mɔɔ ɔmaanle ɔrale azɛlɛ ye azo ɔrawule wɔ yɛ ɛtane ti la. (Kenga 1 Dwɔn 4:9, 10.) Nyamenle ɛlɔlɛ ne ka yɛ maa yɛkulo ye. (Wlo. 5:8) Kɛzi ɔwɔ kɛ yɛkulo Nyamenle ɛ? Mɔɔ Gyisɛse bua zɔhane kpuya ne la, ɔzele Falasiinli bie kɛ: “Fa wɔ ahonle muala nee wɔ ɛkɛla muala nee wɔ adwenle muala kulo Gyihova wɔ Nyamenle ne.” (Mat. 22:36, 37) Ɔnle kɛ yɛfa ahonle foa yɛkulo Nyamenle. Yɛkulo kɛ ɛlɔlɛ mɔɔ yɛlɛ yɛmaa ye la yɛ kpole alehyenlɛ biala. Pɔɔlo zele Felepaema kɛ bɛmaa “bɛ ɛlɔlɛ ne ɛyɛ kpole ɛbo zo.” Duzu a yɛbahola yɛayɛ amaa yɛanyia ɛlɔlɛ kpole yɛamaa Nyamenle a?

5. Kɛ ɔkɛyɛ na yɛ ɛlɔlɛ ne ayɛ kpole ɛ?

⁵ Ɔwɔ kɛ yɛdimoa yɛnwu Nyamenle na yɛahulo ye. Baebolo ne ka kɛ: “Awie biala mɔɔ ɛnlɛ ɛlɔlɛ la ɛnze Nyamenle, ɔluakɛ Nyamenle le ɛlɔlɛ.” (1 Dwɔn 4:8) Ɛzoanvolɛ Pɔɔlo hilele kɛ ɛlɔlɛ mɔɔ yɛlɛ yɛmaa Nyamenle la bayɛ kpole saa yɛlɛ Ɔ nwo “nɔhalɛ ndelebɛbo nee nwunu muala” a. (Fel. 1:9) Mekɛ mɔɔ yɛbɔle Baebolo ne ɛzukoalɛ bo la, Nyamenle subane ngɛnlɛma ne mɔ anwo debie ekyi mɔɔ yɛzukoale la maanle yɛnyianle ɔ nwo ɛlɔlɛ. Akee mekɛ mɔɔ yɛlɛsukoa Gyihova anwo ninyɛne dɔɔnwo la, ɛlɔlɛ mɔɔ yɛlɛ yɛmaa ye la yɛle kpole. Ɛhye ati a yɛbu Baebolo ne mɔɔ yɛsukoa ye dahuu yɛɛ Nyamenle Edwɛkɛ ne mɔɔ yɛdwenledwenle nwo la kɛ ɔboka ninyɛne mɔɔ anwo hyia kpalɛ wɔ yɛ ɛbɛlabɔlɛ nu la anwo a!​—Fel. 2:16.

6. Kɛ mɔɔ 1 Dwɔn 4:11, 20, 21 kile la, duzu ati a ɔwɔ kɛ yɛnyia ɛlɔlɛ kpole a?

⁶ Ɛlɔlɛ kpole mɔɔ Nyamenle ɛla ye ali ɛhile yɛ la ka yɛ maa yɛkulo yɛ mediema. (Kenga 1 Dwɔn 4:11, 20, 21.) Bie a yɛbadwenle kɛ ɔnyɛ se kɛ yɛbahulo yɛ mediema. Yɛsonle Gyihova yɛɛ yɛkulo kɛ yɛsukoa ye subane ngɛnlɛma ne mɔ. Yɛsukoa Gyisɛse mɔɔ vale ye ngoane bɔle afɔle maanle yɛ la neazo ne, ɔluakɛ ɔlɛ ɛlɔlɛ kpole ɔmaa yɛ. Noko, ɔyɛ a ɔyɛ se kɛ yɛbali mɛla mɔɔ se yɛhulo yɛ nwo ngoko la azo. Suzu neazo bie mɔɔ zile wɔ Felepae asafo ne anu la anwo.

7. Duzu a yɛsukoa yɛfi folɛ mɔɔ Pɔɔlo dule Yiwodea nee Senteki la anu a?

⁷ Ɛnee Yiwodea nee Senteki le mediema mraalɛ mɔɔ bɔ mɔdenle, na “bɛ nee” ɛzoanvolɛ Pɔɔlo bɔle nu zonlenle. Noko bɛmaanle edwɛkɛ ngyikyi ngyikyi bie mɔ zɛkyele bɛ avinli. Wɔ kɛlata mɔɔ Pɔɔlo hɛlɛle asafo mɔɔ mediema mraalɛ ɛhye mɔ wɔ nu la anu, ɔbɔle Yiwodea nee Senteki aluma na ɔhanle kɛ “bɛnyia adwenle ko.” (Fel. 4:2, 3) Pɔɔlo nwunle kɛ ɔhyia kɛ ɔka nwolɛ edwɛkɛ ɔkile asafo ne amuala. Ɔzele bɛ kɛ: “Bɛmmatendɛ bɛ nzo abo na bɛsu kpolera wɔ bɛ debie biala ɛyɛlɛ nu.” (Fel. 2:14) Nɔhalɛ nu, Pɔɔlo folɛdulɛ ne mɔɔ anu la ɛkɛ la boale mediema mraalɛ nɔhavoma ɛhye mɔ nee asafo ne amuala ɔmaanle ɛlɔlɛ mɔɔ bɛlɛ bɛmaa bɛ nwo la yɛle kpole.

8. Duzu a maa ɔyɛ se kɛ yɛbahulo yɛ mediema a, na kɛzi yɛbahola yɛali zo ɛ?

 ⁸ Kɛ mɔɔ Yiwodea nee Senteki yɛle la, awie mɔ sinlidɔlɛ mɔɔ yɛbava yɛ adwenle yɛazie zo la bamaa yɛayɛ se kɛ yɛbanyia ɛlɔlɛ kpole yɛamaa bɛ. Yɛ muala yɛfo dahuu. Saa yɛfa yɛ adwenle yɛsie awie mɔ sinlidɔlɛ zo a, ɛlɔlɛ mɔɔ yɛlɛ yɛmaa bɛ la baha aze. Kɛ neazo la, saa adiema bie arɛle fi kɛ ɔbaboa yɛ yeamaa yɛaziezie Belemgbunlililɛ Asalo ɛkɛ a, bie a yɛbava ɛya. Saa yɛbɔ ɔ bo kɛ yɛtiedia nvonleɛ gyɛne mɔɔ yɛ diema ne ɛyɛ la a, ɔ nwo bayɛ yɛ ahyi na ɛlɔlɛ mɔɔ yɛlɛ yɛmaa ye la baminli. Saa ɛkɔ tɛnlabelɛ ɛhye bie anu a, ɔbayɛ kpalɛ kɛ ɛbahakye nɔhalɛ edwɛkɛ ɛhye: Gyihova nwu yɛ nee yɛ diema ne sinlidɔlɛ. Noko, ɛhye mɔ amuala anzi, ɔkulo yɛ diema ne yɛɛ ɔkulo yɛdayɛ noko. Ɛhye ati, ɔwɔ kɛ yɛsukoa Gyihova ɛlɔlɛ ne na yɛkɔ zo yɛnyia yɛ mediema nwo adwenle kpalɛ. Saa yɛbɔ mɔdenle ɛsesebɛ yɛkulo yɛ mediema a, koyɛlɛ mɔɔ wɔ yɛ avinli la bayɛ kpole.​—Fel. 2:1, 2.

9. “Ninyɛne mɔɔ hyia kpalɛ” mɔɔ Pɔɔlo hanle nwolɛ edwɛkɛ wɔ kɛlata mɔɔ ɔhɛlɛle ɔmaanle Felepaema anu la bie mɔ a le boni?

⁹ Sunsum nwuanzanwuanza ne hanle Pɔɔlo maanle ɔzele Felepaema yɛɛ Kilisienema kɔsɔɔti kɛ bɛnwu “ninyɛne mɔɔ hyia kpalɛ la.” (Fel. 1:10) Ninyɛne ɛhye mɔ mɔɔ anwo hyia la bie a le Gyihova duma ne mɔɔ bɛte nwo, ye bodane mɔɔ bara nu yɛɛ anzodwolɛ nee koyɛlɛ mɔɔ badɛnla asafo ne anu la. (Mat. 6:9, 10; Dwɔn 13:35) Saa yɛmaa yɛ ɛbɛlabɔlɛ gyinla ninyɛne ɛhye mɔ mɔɔ hyia kpalɛ la azo a, ɛnee yɛlɛkile kɛ yɛkulo Gyihova.

10. Duzu a ɔwɔ kɛ yɛyɛ na yɛ nwo ade saanwu a?

¹⁰ Pɔɔlo eza hanle kɛ yɛmaa yɛ nwo ‘ɛde saanwu.’ Ɛhye ɛngile kɛ ɔwɔ kɛ yɛdi munli. Yɛnrɛhola yɛnrɛmaa yɛ nwo ɛnrɛde saanwu kɛ Gyihova Nyamenle la. Noko, Gyihova babu yɛ kɛ yɛ nwo te saanwu saa yɛmaa yɛ ɛlɔlɛ ne yɛ kpole na yɛnwu ninyɛne mɔɔ hyia kpalɛ la a. Adenle ko mɔɔ yɛdua zo yɛda yɛ ɛlɔlɛ ali la a le kɛ, yɛbɔ mɔdenle kɛ yɛnrɛdenda awie mɔ agyakɛ anu.

11. Kɛmɔti a ɔnle kɛ yɛtenda awie mɔ agyakɛ anu ɛ?

¹¹ Adehilelɛ mɔɔ se yɛmmatenda awie mɔ agyakɛ anu la le kɔkɔbɔlɛ. Kɛzi yɛbahola yɛadenda awie agyakɛ anu ɛ? Yɛbahola yɛayɛ zɔ ɔlua ninyɛne mɔɔ yɛfa yɛdielie yɛ nye, yɛ anwoziezielɛ anzɛɛ gyima mɔɔ yɛbakpa la azo. Bie a mɔɔ yɛbayɛ la ɛnle ɛtane. Noko, saa yɛ kpɔkɛzilɛ gyegye awie adwenle na ɔtenda ɔ gyakɛ anu a, anyebolo wɔ nu. Gyisɛse hanle kɛ saa yɛtenda ye mboane ne mɔ ko agyakɛ anu a, ɔle kpalɛ kɛ bɛkɛva ɛdibolɛ bɛkɛhenda yɛ kɔme bɛkɛhɔdo yɛ nyevile kunlu!​—Mat. 18:6.

12. Duzu a yɛsukoa yɛfi agyalɛma ne mɔɔ bɛle adekpakyelɛma la neazo ne anu a?

¹² Nea kɛzi agyalɛma bie mɔɔ bɛle adekpakyelɛma la vale Gyisɛse kɔkɔbɔlɛ ne yɛle gyima la. Ɛnee agyalɛma fofolɛ bie mɔɔ bɛtetele bɛ wɔ abusua mɔɔ bɛmmaa ninyɛne dɔɔnwo anwo adenle la wɔ bɛ asafo ne anu. Ɛnee bɛdie bɛdi kɛ ɔnle kɛ Kilisienema kɔ ɛleka mɔɔ bɛye vidio la bɛkɔnea vidio mɔɔ edwɛkɛ biala ɛnle nwo bɔbɔ la. Mekɛ mɔɔ bɛdele kɛ agyalɛma ne mɔɔ bɛle adekpakyelɛma ɛhɔnlea vidio wɔ ɛleka zɛhae la, ɔzinle bɛ nwo. Yemɔ anzi, agyalɛma ne mɔɔ bɛle adekpakyelɛma la kpole kɛ bɛbahɔnlea vidio, kɔkpula kɛ ɛdoavolɛma fofolɛ ne mɔ tetele bɛ adwenle na bɛnyianle adwenle kpalɛ wɔ ninyɛne nwo la. (Hib. 5:14) Angomedi subane mɔɔ agyalɛma ne mɔɔ bɛle adekpakyelɛma annyia la hilele kɛ bɛkulo bɛ mediema ne mɔɔ bɛle fofolɛ la wɔ bɛ edwɛkɛ nee bɛ nyɛleɛ nu.​—Wlo. 14:19-21; 1 Dwɔn 3:18.

13. Kɛzi yɛbahola yɛamaa awie ayɛ ɛtane ɛ?

 ¹³ Debie bieko mɔɔ kola maa yɛtenda awie agya anu la a le kɛ yɛbamaa yeayɛ ɛtane. Kɛzi yɛbahola yɛayɛ ɛhye ɛ? Suzu tɛnlabelɛ ɛhye anwo nea. Baebolo sukoavo bie ɛhola ɛbɔ mɔdenle ɛgyakyi nzanlonlɛ mɔɔ ɛha ɔ nwo la. Yenwu ye kɛ ɔwɔ kɛ ɔgyakyi ye ɛnlonlɛ bɔkɔɔ. Yeyɛ nzenzaleɛ ndɛndɛ wɔ ye ɛbɛlabɔlɛ nu na bɛzɔne ye. Nzinlii, adiema bie to ɛsalɛ fɛlɛ ye wɔ ɛkponledolɛ bie abo, na ɔmaa adiema ɛhye mɔɔ le fofolɛ la nza kɛ ɔnlo, ɔka kɛ: “Kɛkala ɛle Kilisienenli; Gyihova sunsum ne wɔ ɛ nwo zo. Bɛnwozohomolɛ boka sunsum nwuanzanwuanza ne ma ne anwo. Saa ɛlɛ bɛnwozohomolɛ a, ɔwɔ kɛ ɛkola ɛno ekyi.” Saa yɛ diema ɛhye mɔɔ le fofolɛ la tie folɛdulɛ ɛtane ɛhye a, nea mɔɔ bavi nu ara a!

14. Kɛzi Kilisiene ayia boa maa yɛfa folɛdulɛ mɔɔ wɔ Felepaema 1:10 la yɛyɛ gyima ɛ?

¹⁴ Yɛ Kilisiene ayia ne mɔ boa maa yɛfa folɛdulɛ mɔɔ wɔ Felepaema 1:10 la yɛyɛ gyima wɔ ndenle dɔɔnwo azo. Mɔɔ limoa, sunsum nu aleɛ nwo ngyehyɛleɛ kpalɛ ne kakye yɛ mɔɔ Gyihova bu ye kɛ ɔhyia kpalɛ la. Mɔɔ tɔ zo nwiɔ, yɛsukoa kɛzi yɛbava mɔɔ yɛlɛsukoa yɛabɔ yɛ ɛbɛla amaa yɛ nwo ade saanwu la. Yɛɛ mɔɔ tɔ zo nsa, yɛmaa yɛ nwo anwosesebɛ yɛkɔ “ɛlɔlɛ nee gyima kpalɛ ɛyɛlɛ nu.” (Hib. 10:24, 25) Mekɛ mɔɔ yɛ mediema ne mɔ ɛlɛmaa yɛ anwosesebɛ la, ɔmaa ɛlɔlɛ mɔɔ yɛlɛ yɛmaa Nyamenle nee yɛ mediema la yɛ kpole. Saa yɛfi yɛ ahonle muala anu yɛkulo Nyamenle nee yɛ mediema a, yɛbabɔ mɔdenle kɛ yɛnrɛdenda bɛ gyakɛ anu.

15. “Tenleneyɛlɛ ma” mɔɔ yɛmaa yeayi yɛ tetɛkɛɛ la kile duzu?

¹⁵ Pɔɔlo yɛle asɔne ɛsesebɛ kɛ, “tenleneyɛlɛ ma” ɛyi Felepaema tetɛkɛɛ. (Fel. 1:11) Kpolerazulɛ biala ɛnle nwolɛ kɛ, Gyihova nee ye menli ne mɔɔ yɛkulo bɛ la boka “tenleneyɛlɛ ma” mɔɔ yɛso la anwo. Diedi mɔɔ yɛlɛ wɔ Gyisɛse anu yɛɛ yɛ kenle bie anyelazo kɛnlɛma ne mɔɔ yɛbaha nwolɛ edwɛkɛ yɛahile awie mɔ la noko boka nwo. Wɔ Felepaema 2:15, Pɔɔlo vale ndonwo fofolɛ lile gyima, ɔhanle kɛ, “bɛda wɔ bɛ avinli kɛ ahɛnlaneɛ wɔ ewiade.” Neazo ne fɛta ɔluakɛ Gyisɛse hanle ye ɛdoavolɛma anwo edwɛkɛ kɛ “bɛle ewiade kɛnlaneɛ.” (Mat. 5:14-16) Eza ɔmaanle ye ɛdoavolɛma mɛla kɛ, ‘bɛyɛ menli ye ɛdoavolɛma,’ akee ɔhanle kɛ bɛbayɛ “alasevolɛ . . . bɛahɔdwu azɛlɛ ye azo ɛleka biala.” (Mat. 28:18-20; Gyi. 1:8) Saa yɛfa yɛ nwo yɛwula gyima ɛhye mɔɔ anwo hyia tɛla biala la anu a, ɛnee yɛlɛso “tenleneyɛlɛ ma.”

16. Kɛzi Felepaema 1:12-14 maa yɛnwu kɛ yɛbahola yɛada kɛ ahɛnlaneɛ bɔbɔ wɔ tɛnlabelɛ mɔɔ anu yɛ se la anu ɛ? (Nea ɔ nyunlu nvoninli ne.)

¹⁶ Ɔnva nwo kɛzi yɛ tɛnlabelɛ ne de biala la, yɛbahola yɛada kɛ ahɛnlaneɛ. Wɔ tɛnlabelɛ bie mɔ anu, debie mɔɔ bie a ɛbaha kɛ ɔsi yɛ adenle la bahola abuke adenle amaa yɛahola yɛaha edwɛkɛ ne. Kɛ neazo la, mekɛ mɔɔ ɛzoanvolɛ Pɔɔlo hɛlɛle ye kɛlata ne hɔmaanle Felepaema la, ɛnee ɔla efiade wɔ Wulomu. Noko kyeenyi mɔɔ gua ɔ sa la anzi ye adenle kɛ ɔbali sogyama nee menli mɔɔ rakpɔlale ye la daselɛ. Pɔɔlo hanle edwɛkɛ ne anyebolo zo wɔ tɛnlabelɛ ɛhye mɔ anu, na ɛhye maanle mediema ne mɔ nyianle anwodozo nee akɛnrasesebɛ kpole ‘hanle Nyamenle edwɛkɛ ne mɔɔ bɛanzulo a.’​—Kenga Felepaema 1:12-14; 4:22.

17. Yɛ mekɛ ye azo neazo boni a kile kɛ yɛbahola yɛazo ma wɔ tɛnlabelɛ mɔɔ anu yɛ se la anu a?

 ¹⁷ Yɛ mediema mrenyia nee mraalɛ dɔɔnwo ɛnyia nwolɛ adenle kɛ bɛbala akɛnrasesebɛ mɔɔ Pɔɔlo lale ye ali la bie ali. Bɛde maanle mɔɔ bɛngola bɛnga edwɛkɛ ne wɔ bagua nu anzɛɛ wɔ azua nu la azo, yemɔti bɛkpondɛ ndenle gyɛne bɛdua zo bɛka edwɛkpa ne. (Mat. 10:16-20) Wɔ maanle zɛhae bie anu, maangyebakyi zo neavolɛ bie zele nolobɔlɛnli biala kɛ ɔva ye mbusuafoɔ, ye kpalɛzoamra, ɔ gɔnwo mɔ sukuluma nee gyimayɛvoma yɛɛ ɔ gɔnwo mɔ kɛ bɛwɔ ye azɛlɛsinli ne anu na ɔbɔ mɔdenle ɔli bɛ daselɛ. Wɔ ɛvolɛ nwiɔ anu, asafo mɔɔ wɔ maangyebakyi zɔhane anu la hɔle ɔ nyunlu kpalɛ. Bie a yɛde maanle mɔɔ yɛkola yɛka edwɛkɛ ne wɔ bagua nu la anu. Noko, yɛbahola yɛazukoa ninyɛne dɔɔnwo yɛavi yɛ mediema ɛhye mɔ mɔɔ bɔ mɔdenle la ɛkɛ: Dahuu kpondɛ ndenle dua zo yɛ dɔɔnwo wɔ ɛzonlenlɛ gyima ne anu, na nyia anwodozo kɛ Gyihova baboa wɔ yeamaa wɔali ngyegyelɛ biala azo.​—Fel. 2:13.

18. Duzu a ɔwɔ kɛ yɛbɔ kpɔkɛ kɛ yɛbayɛ a?

¹⁸ Wɔ mekɛ ɛhye mɔɔ anu yɛ se la anu, bɛmaa yɛbɔ kpɔkɛ kɛ yɛbava Pɔɔlo folɛdulɛ mɔɔ vi sunsum nu mɔɔ ɔhɛlɛle ɔmaanle Felepaema la yɛayɛ gyima. Bɛmaa yɛyɛ ninyɛne mɔɔ anwo hyia kpalɛ la, yɛmaa yɛ nwo ɛde saanwu, yɛnlea boɛ na yɛandenda awie mɔ agyakɛ anu na yɛzo tenleneyɛlɛ ma. Saa yɛyɛ zɔ a, yɛ ɛlɔlɛ bayɛ kpole na ɔbava enililɛ yearɛlɛ Gyihova, yɛ ɛlɔlɛ Selɛ ne.