1. Duzu a ɔwɔ kɛ yɛyɛ amaa yɛanyia nɔhalɛ anyelielɛ a, na duzu ati ɔ? (Ayezaya 48:​17, 18)

 YƐ ANWUMA Selɛ ne kulo yɛ kpole kpalɛ na ɔkpondɛ kɛ yɛ nye die ɛbɛlabɔlɛ nu ɛnɛ nee kenle bie. (Nol. 3:​12, 13) Yemaa yɛ ɛlolɛ ahyɛlɛdeɛ ngɛnlɛma dɔɔnwo, noko yeammaa yɛ tumi mɔɔ ɔbamaa yɛahola yɛanlea yɛ nwo zo anzɛɛ yɛazi mɔɔ le kpalɛ nee mɔɔ le ɛtane la anwo kpɔkɛ la. (Nol. 8:9; Gyɛ. 10:23) Ɔze kɛ amaa yɛahola yɛanyia nɔhalɛ anyelielɛ la, ɔwɔ kɛ yɛsonle ye na yɛfa ye ngyinlazo ne mɔ yɛbɔ yɛ ɛbɛla.—Kenga Ayezaya 48:​17, 18.

2. Adalɛ edwɛkɛ boni a Seetan kulo kɛ yɛdie yɛdi a, na duzu a Gyihova ɛyɛ wɔ nwo a?

² Seetan kulo kɛ yɛdie yɛdi kɛ yɛngyia Gyihova anwo na yɛ nye alie, na alesama mumua ne bahola anlea bɛ nwo zo bɛamaa yeawie bɛ boɛ. (Gyn. 3:​4, 5) Amaa yeala ali kɛ Seetan le adalɛ la, Gyihova ɛmaa alesama mɔɔ bɛde atua la adenle yemaa bɛnlea bɛ nwo zo mekɛ ekyii. Ɔngyia kɛ yɛtendɛ yɛkɔ moa amaa yɛanwu kɛ alesama tumililɛ ɛngɔ ye boɛ fee. Noko mrenyia nee mraalɛ mɔɔ bɛzonlenle Gyihova la ati bɛnyianle anyelielɛ kpole la anwo neazo dɔɔnwo wɔ Baebolo ne anu. Mɔɔ tɛla menli ɛhye mɔ amuala la a le Gyisɛse Kelaese. Maa yɛlimoa yɛnlea deɛmɔti ɔkpale kɛ ɔbazonle Gyihova la. Mɔɔ  tɔ zo nwiɔ, yɛbazuzu deɛmɔti ɔfɛta kɛ yɛsonle yɛ anwuma Selɛ ne la anwo. Yɛɛ mɔɔ li awieleɛ la, yɛbazuzu adwenle mɔɔ ɔti yɛkpa kɛ yɛbazonle Gyihova la bie mɔ anwo.

DEƐMƆTI GYISƐSE KPALE KƐ ƆBAZONLE GYIHOVA LA

3. Duzu a Seetan hanle kɛ ɔbava yeamaa Gyisɛse a, na boni a Gyisɛse kpale kɛ ɔbayɛ a?

³ Mɔɔ Gyisɛse wɔ azɛlɛ ye azo la, ɛnee ɔwɔ kɛ ɔkpa awie mɔɔ ɔbazonle ye la. Mɔɔ bɛzɔnenle Gyisɛse la, yeangyɛ biala Seetan hanle hilele ye kɛ saa ɔsonle ye kokye ala a, ɔbava azɛlɛ ye azo arelemgbunlililɛ kɔsɔɔti yeamaa ye. Gyisɛse buale ye kɛ: “Fi ɛke kɔ Seetan! Ɔluakɛ bɛhɛlɛ kɛ: ‘Gyihova wɔ Nyamenle ne a ɔwɔ kɛ ɛsonle ye a, na ɔ ngome ala a ɔwɔ kɛ ɛkoto ye a.’” (Mat. 4:​8-10) Duzu ati a Gyisɛse kpale kɛ ɔbazonle Gyihova a? Maa yɛnlea deɛmɔti ɔyɛle zɔ la bie mɔ.

4-5. Adwenle mɔɔ ɔti Gyisɛse kpale kɛ ɔbazonle Gyihova la bie mɔ a le boni?

⁴ Ɛlɔlɛ a le debie titili mɔɔ ɔti Gyisɛse kpale kɛ ɔbazonle Gyihova a—ɛnee ɔlɛ ɔ Ze anwo ɛlɔlɛ kpole kpalɛ. (Dwɔn 14:31) Bieko, Gyisɛse zonlenle Gyihova ɔluakɛ yemɔ a le debie kpalɛ mɔɔ ɔwɔ kɛ ɔyɛ a. (Dwɔn 8:​28, 29; Yek. 4:11) Ɔze kɛ Gyihova a maa yɛ ngoane a, yɛkola yɛfa yɛ nwo yɛto ɔ nwo zo yɛɛ ɔmaa yɛ ninyɛne mgbalɛ dɔɔnwo. (Edw. 33:4; 36:9; Gye. 1:17) Gyihova ka nɔhalɛ kile Gyisɛse dahuu yɛɛ ɔdaye a ɔvale debie biala mɔɔ Gyisɛse lɛ la ɔmaanle ye a. (Dwɔn 1:14) Noko Seetan ɛdeɛ, ewule a yeva yera a. Ɔle adalɛ, yɛɛ anyebolo nee angomedi ɛdidi ye. (Dwɔn 8:44) Kɛmɔ Gyisɛse ze Gyihova kpalɛ na eza ɔze Seetan noko la ati, yeamba ye adwenle nu ɛlɛ kɛ ɔbazukoa Seetan na yeade Gyihova anwo atua.—Fel. 2:​5-8.

⁵ Debie bieko mɔɔ ɔti Gyisɛse kpale kɛ ɔbazonle Gyihova la a le kɛ ɛnee ɔ nye la mɔɔ vi ye nɔhalɛlilɛ ne anu bara la ade. (Hib. 12:2) Ɛnee ɔze kɛ saa ɔdi nɔhalɛ ɔkɔ awieleɛ a, ɔbade ɔ Ze duma nwo na yeamaa bɛahola bɛaye ngyegyelɛ mɔɔ Abɔnsam ɛva ɛra la bɛavi ɛkɛ.

DEƐMƆTI ƆFƐTA KƐ YƐSONLE GYIHOVA LA

6-7. Duzu ati a menli dɔɔnwo ɛnzonle Gyihova ɛnɛ a, na duzu ati a ɔfɛta kɛ yɛsonle ye a?

⁶ Menli dɔɔnwo ɛnzonle Gyihova ɛnɛ ɔluakɛ bɛtɛsukoale ye subane ngɛnlɛma ne mɔ anwo ɛhwee yɛɛ bɛnze ninyɛne mgbalɛ dɔɔnwo mɔɔ yeyɛ yemaa bɛ la. Zɔhane a ɛnee menli mɔɔ ɛzoanvolɛ Pɔɔlo hanle edwɛkɛ ne hilele bɛ wɔ Atɛnse la noko de a.—Gyi. 17:​19, 20, 30, 34.

⁷ Pɔɔlo hilehilele nu hilele Atɛnsema ne kɛ nɔhalɛ Nyamenle ne a maa “menli kɔsɔɔti ngoane nee ɛnwomenle nee debie biala a.” Eza ɔhanle kɛ: “Ɔlua ɔ nwo zo a yɛlɛ ngoane na yɛkɔ yɛba na yɛwɔ ɛkɛ a.” Nyamenle a le Bɔvolɛ ne mɔɔ “ɔmaanle menli mɔɔ wɔ maanle kɔsɔɔti anu la luale sonla ko anwo zo rale” a, ɔti ɔdaye a ɔfɛta kɛ yɛsonle ye a.—Gyi. 17:​25, 26, 28.

8. Duzu a Gyihova ɛnrɛyɛ ye ɛlɛ a? Kilehile nu.

⁸ Kɛmɔ Gyihova a le Bɔvolɛ yɛɛ anwuma nee aze Belemgbunli ne la ati, anrɛɛ ɔbahola yeayɛ ye kyengye kɛ yɛkulo o, yɛngulo o, ɔwɔ kɛ yɛsonle ye. Noko Gyihova ɛnrɛyɛ ye zɔ ɛlɛ. Emomu, yemaa yɛ daselɛ mɔɔ kile kɛ ɔwɔ ɛkɛ na ɔkulo yɛ nuhua ko biala kpalɛ la. Ɔkulo kɛ menli dɔɔnwo bayɛ ɔ gɔnwo mɔ dahuu. (1 Tim. 2:​3, 4) Ɛhye ati, Gyihova ɛtete yɛ kɛ yɛha ye bodane ne mɔ nee ninyɛne mgbalɛ mɔɔ ɔbayɛ yeamaa alesama la anwo edwɛkɛ yɛhile awie mɔ. (Mat. 10:​11-13; 28:​19, 20) Yemaa yɛnyia asafo ngakyile mɔɔ yɛkola yɛsonle ye wɔ nu yɛɛ yɛnyia moalɛ yɛfi mgbanyima mɔɔ lɛ ɛlɔlɛ la ɛkɛ.—Gyi. 20:28.

9. Kɛzi Gyihova ɛhile kɛ ɔkulo menli kɔsɔɔti ɛ?

 ⁹ Mɔɔ Gyihova yɛ maa bɛdabɛ mɔɔ bɛnlie bɛnli kɛ ɔwɔ ɛkɛ la le daselɛ mɔɔ kile kɛ ɔkulo yɛ kpole. Suzu ɛhye anwo: Ɔvi tete ne too badwu ɛnɛ, menli mgbe mgbe dɔɔnwo gyinla mɔɔ bɛsuzu kɛ ɔle kpalɛ anzɛɛ ɛtane la azo a bɔ bɛ ɛbɛla a. Yemɔ bɔbɔ, Gyihova maa bɛnyia ninyɛne mɔɔ bɛhyia nwo amaa bɛadɛnla ngoane nu na bɛ nye alie la. (Mat. 5:​44, 45; Gyi. 14:​16, 17) Yemaa bɛnyia agɔnwolɛma nee mbusuafoɔ mɔɔ kulo bɛ, bɛkola bɛwo ngakula na bɛyɛ gyima bɛnyia zolɛ nvasoɛ. (Edw. 127:3; Nol. 2:24) Ɛhye mɔ kile kɛ yɛ anwuma Selɛ ne kulo alesama amuala. (Ɛzɛ. 34:6) Akee maa yɛnlea deɛmɔti yɛkpa kɛ yɛbazonle Gyihova nee kɛzi ɔyila bɛdabɛ mɔɔ bɛsonle ye la.

DEƐMƆTI YƐKPA KƐ YƐBAZONLE GYIHOVA LA

10. (a) Debie titili mɔɔ ɔti yɛsonle Gyihova la a le boni? (Mateyu 22:37) (b) Kɛzi Gyihova abotanezilɛ ne ɛboa wɔ ɛ? (Edwɛne 103:​13, 14)

¹⁰ Yɛkulo Gyihova kpole kpalɛ, na yemɔ a le debie titili mɔɔ ɔti yɛsonle Ye a, kɛ mɔɔ Gyisɛse yɛle la. (Kenga Mateyu 22:37.) Saa yɛsukoa Gyihova subane ne mɔ anwo debie a, ɔmaa yɛbikye ye. Kɛ neazo la, suzu kɛzi Gyihova si yɛ nwo abotane la anwo. Mɔɔ Yizilayɛma yɛle ɔ nwo anzosesebɛ la, ɔzɛlɛle bɛ kɛ: “Mesɛlɛ bɛ, bɛzia bɛ nzi bɛvi bɛ ndenle ɛtane ne mɔ azo.” (Gyɛ. 18:11) Gyihova kakye kɛ yɛnli munli, yɛle ndɛtɛlɛ ala. (Kenga Edwɛne 103:​13, 14.) Saa ɛdwenledwenle Gyihova abotanezilɛ nee ye subane gyɛne ngɛnlɛma ne mɔ anwo a, asoo ɔmmaa ɛnnyia ɛhulolɛ kɛ ɛzonle ye dahuu ɔ?

11. Ninyɛne gyɛne mɔɔ ɔti yɛkpa kɛ yɛbazonle yɛ anwuma Selɛ ne la bie mɔ a le boni?

¹¹ Eza yɛsonle Gyihova ɔluakɛ yemɔ a le debie kpalɛ mɔɔ ɔwɔ kɛ yɛyɛ a. (Mat. 4:10) Bieko, yɛze mɔɔ yɛsonle Gyihova nɔhalɛ nu a ɔbavi nu yeara la. Saa yɛsonle Gyihova nɔhalɛ nu a ɔmaa yɛte ye duma ne anwo, yɛkile kɛ Abɔnsam le adalɛ yɛɛ ɔmaa yɛ anwuma Selɛ ne ahonle di fɛlɛko. Eza saa yɛsonle Gyihova ɛnɛ a, ɔbamaa yɛanyia nwolɛ adenle yɛazonle ye dahuu!—Dwɔn 17:3.

12-13. Duzu a yɛsukoa yɛfi Jane nee Pam anwubielɛ ne anu a?

¹² Mekɛ mɔɔ yɛtɛde ngakula bɔbɔ la, yɛbahola yɛanyia Gyihova anwo ɛlɔlɛ kpole, na ɛlɔlɛ zɔhane bahola ayɛ kpole wɔ mekɛ mɔɔ yɛlɛnyi la. Suzu Jane nee ɔ diema Pam neazo ne anwo. a Mɔɔ ɛnee Jane ɛli ɛvolɛ 11 na Pam ɛli ɛvolɛ 10 la yɛɛ bɛbɔle ɔ bo kɛ bɛsukoa Baebolo ne a. Ɛnee bɛ awovolɛ mumua ne anye ɛnlie nwolɛ kɛ bɛbazukoa Baebolo ne ɛdeɛ, noko bɛhanle kɛ saa Jane nee Pam nee bɛ bahɔ asɔne dapɛne awieleɛ biala a, yemɔ bɛbahola bɛ nee Alasevolɛ ne mɔ azukoa Baebolo ne. Jane hanle kɛ: “Mɔɔ Alasevolɛ ne mɔ hilehilele me wɔ Baebolo ne anu la boale me maanle mengoatile kɛ mebanlo nyiletane anzɛɛ mebabɔ ɛbɛlatane kɛ mɔɔ me tipɛnema yɛ la.”

¹³ Ɛvolɛ ekyii guale nu la, bɛ mu nwiɔ bɛrayɛle nolobɔlɛma. Nzinlii bɛrayɛle dahuu adekpakyelɛma wɔ mekɛ mɔɔ ɛnee bɛlɛnea bɛ awovolɛ mɔɔ bɛyɛ mgbanyinli la. Mɔɔ Jane ɛlɛdwenle mɔɔ zile la anwo la, ɔhanle kɛ: “Medame mumua ne membanwunle kɛ Gyihova nea ɔ gɔnwo mɔ kpalɛ, na kɛ mɔɔ 2 Timote 2:19 ka la, ‘Gyihova ze bɛdabɛ mɔɔ bɛle ye ɛdeɛ la.’” Ɔda ali wienyi kɛ Gyihova nea bɛdabɛ mɔɔ bɛkulo ye na bɛsonle ye la!

14. Kɛzi yɛ edwɛkɛ nee yɛ nyɛleɛ boa maa yɛte Gyihova duma nwo ɛ? (Eza nea nvoninli ne mɔ.)

¹⁴ Yɛkulo kɛ yɛboa yɛmaa menli nwu kɛ edwɛkɛ dɔɔnwo mɔɔ bɛha ye wɔ Gyihova  anwo la ɛnle nɔhalɛ. Maa yɛyɛ ndonwo bie: Fa ye kɛ ɛlɛ ɛ gɔnwo bie mɔɔ ɔ ti akunlu le kɛnlɛma, ɔyɛ nyele yɛɛ ɔfa ɛtane ɔkyɛ la. Kenle ko bie ɛdele kɛ awie ɛlɛbɔ ɛ gɔnwo ne somolɛ kɛ ɔ ti yɛ se yɛɛ ɔnli nɔhalɛ. Duzu a ɛbayɛ a? Ɛbaha bie wɔamaa ɛ gɔnwo ne. Zɔhane ala a saa yɛte kɛ awie mɔ ɛlɛka Gyihova anwo adalɛ edwɛkɛ a, yɛgyinla Ɔ nzi na yɛka Ɔ nwo nɔhalɛ edwɛkɛ yɛkile awie mɔ a. (Edw. 34:1; Aye. 43:10) Yɛdua mɔɔ yɛka nee mɔɔ yɛyɛ la azo yɛkile kɛ yɛkulo kɛ yɛfa yɛ ɛkɛla muala yɛsonle Gyihova.

15. Mɔɔ ɛzoanvolɛ Pɔɔlo yɛle nzenzaleɛ wɔ ye ɛbɛlabɔlɛ nu la, nvasoɛ boni a ɔnyianle a? (Felepaema 3:​7, 8)

¹⁵ Yɛfi yɛ ɛhulolɛ nu yɛyɛ nzenzaleɛ wɔ yɛ ɛbɛlabɔlɛ nu amaa yɛahola yɛazonle Gyihova kpalɛ anzɛɛ yɛayɛ dɔɔnwo wɔ ye ɛzonlenlɛ nu. Kɛ neazo la, ɛnee ɛzoanvolɛ Pɔɔlo lɛ dibilɛ kpole wɔ Dwuuma ɛzonlenlɛ ne anu noko ɔgyakyile amaa yeahola yeali Kelaese anzi na yeazonle Gyihova. (Gal. 1:14) Ɛhye ati, ɔ nye liele wɔ Gyihova ɛzonlenlɛ nu na ɔnyianle nwolɛ adenle kɛ ɔ nee Kelaese bahɔli tumi wɔ anwuma. Yeannu ɔ nwo wɔ kpɔkɛ mɔɔ ɔzile kɛ ɔbazonle Gyihova la anwo ɛlɛ na yɛdayɛ noko yɛnrɛnlu yɛ nwo ɛlɛ.—Kenga Felepaema 3:​7, 8.

16. Duzu a yɛsukoa yɛfi Julia anwubielɛ ne anu a? (Eza nea nvoninli ne mɔ.)

¹⁶ Saa yɛfa yɛyɛ yɛ bodane kɛ yɛsonle Gyihova a, yɛ nye balie ɛnɛ nee kenle bie. Suzu adiema raalɛ Julia anwubielɛ ne anwo. Ɛnee Julia to edwɛne wɔ ye asɔne ne anu ɔvi ye ngakula nu kolaa na yeazukoa nɔhalɛ ne. Awie mɔɔ ɛnee yebe wɔ edwɛne ɛdolɛ nu la vale ye na ɔtetele ye. Yeangyɛ Julia liele duma na ɔdole edwɛne wɔ ɛleka ngakyile mɔɔ bɛlie duma kpole la. Mekɛ mɔɔ ɔlɛkɔ sukulu bie  mɔɔ ɛlie duma la, ɔ gɔnwo bie mɔɔ ɔ nee ye kɔ sukulu la hanle Nyamenle anwo edwɛkɛ hilele ye na ɔmaanle ɔnwunle kɛ Nyamenle duma a le Gyihova. Yeangyɛ, Julia bɔle ɔ bo kɛ ɔsukoa Baebolo ne fane nwiɔ dapɛne biala. Akee ɔzile kpɔkɛ kɛ ɔbagyakyi edwɛne ɛdolɛ na yeava ye mekɛ ne amuala yeazonle Gyihova. Ɛnee ɔnla aze kɛ ɔbazi kpɔkɛ zɔhane. Ɔhanle kɛ: “Menli dɔɔnwo hanle hilele me kɛ melɛsɛkye me ahyɛlɛdeɛ ne, noko ɛnee mekulo kɛ mefa me ngoane mekɛ kɔsɔɔti mesonle Gyihova.” Ɛnɛ, kɛzi ɔte nganeɛ wɔ kpɔkɛ zɔhane mɔɔ ɔzile wɔ ɛvolɛ mɔɔ bo 30 mɔɔ ɛpɛ nu la anwo ɛ? Ɔse: “Me nzo nu dwo me yɛɛ melɛ anwodozo kɛ Gyihova bayɛ mɔɔ mekpondɛ la amuala amaa me kenle bie.”—Edw. 145:16.

KƆ ZO SONLE GYIHOVA

17. Kɛzi ɔwɔ kɛ awieleɛ ne mɔɔ ɛbikye kpole kpalɛ la ka bɛdabɛ mɔɔ bɛlɛsonle Nyamenle nee bɛdabɛ mɔɔ bɛnzonle ye la ɛ?

¹⁷ Yɛbikye awieleɛ ne kpole kpalɛ. Ɛzoanvolɛ Pɔɔlo hɛlɛle kɛ: “Ɔluakɛ ‘yeha ekyii bie,’ na ‘ahenle mɔɔ ɛlɛba la ara, na ɔnrɛhyɛ fee.’” (Hib. 10:37) Kɛzi edwɛkɛ ɛhye ka yɛ ɛ? Mekɛ mɔɔ ɛha mɔɔ ɔwɔ kɛ menli fa kpa kɛ bɛbazonle Gyihova la anzo. (1 Kɔl. 7:29) Yɛɛ saa yɛlɛsonle Nyamenle a, yɛze kɛ yɛbayia sɔnea ngakyile noko ɔbayɛ mekɛ “ekyii bie” ala.

18. Duzu a Gyisɛse nee Gyihova kulo kɛ yɛyɛ a?

¹⁸ Gyisɛse ammaa ye ɛdoavolɛma ne anwosesebɛ kɛ bɛdoa ye ala, emomu ɔse bɛhɔ zo bɛdoa ye. (Mat. 16:24) Ɔti saa yɛva ɛvolɛ  dɔɔnwo yɛzonle Gyihova bɔbɔ a, bɛmaa yɛbɔ kpɔkɛ kɛ yɛbahɔ zo yɛazonle ye. Ɔwɔ kɛ yɛbɔ mɔdenle kpalɛ amaa yɛahola yɛali kpɔkɛ mɔɔ yɛbɔ kɛ yɛsonle ye la azo. Bie a ɛhye ɛyɛlɛ bayɛ se, noko saa yɛsonle ye a yɛbanyia nyilalɛ na yɛ kunlu adwo yɛ nwo ɛnɛ bɔbɔ!—Edw. 35:27.

19. Duzu a yɛsukoa yɛfi Gene anwubielɛ ne anu a?

¹⁹ Bie mɔ suzu kɛ kyesɛ ɛfa ninyɛne dɔɔnwo ɛbɔ afɔle kolaa na wɔahola wɔazonle Gyihova. Saa ɛle kakula a, ɔyɛ a ɛte nganeɛ kɛ Gyihova ɛzonlenlɛ yɛ se ɔ? Adiema kpavolɛ bie mɔɔ bɛfɛlɛ ye Gene la hanle kɛ: “Mendele nganeɛ kɛ saa ɛle Gyihova Dasevolɛ a, ɛnnyia adenle ɛnyɛ ninyɛne mɔɔ ɛ nye die nwo bɔbɔ la. Ɛnee ɔzɔho kɛ me gɔnwo mɔ ngakula kola kɔ party, bɛ nee mraalɛ tu anzɛɛ bɛbɔ vidio game mɔɔ basabasayɛlɛ wɔ nu la, noko me ɛdeɛ mɔɔ, debiezukoalɛ nee daselɛlilɛ ala a mekɔ a.” Kɛzi adwenle ɛhye mɔɔ ɛnee Gene lɛ la hanle ye ɛ? Ɔhanle kɛ: “Membɔle ɔ bo kɛ meyɛ ninyɛne bie mɔ meavea na me nye liele wɔ mekɛ ekyii anu. Noko anyelielɛ ne angyɛ. Akee mendwenledwenlenle Baebolo nu nɔhalɛ ne mɔɔ meanva meanli gyima la anwo na menzile kpɔkɛ kɛ mebavi me ahonle nu amuala meazonle Gyihova. Ɔvi mekɛ zɔhane, menwu kɛ Gyihova ɛbua me asɔneyɛlɛ ko biala.”

20. Duzu a ɔwɔ kɛ yɛbɔ kpɔkɛ kɛ yɛbayɛ a?

²⁰ Edwɛndolɛnli bie dole edwɛne maanle Gyihova kɛ: “Anyelielɛ a le sonla ne mɔɔ wɔkpa ye na wɔmaa yebikye wɔ kɛ ɔradɛnla wɔ alienwo ɛkɛ ne la.” (Edw. 65:4) Bɛmaa yɛbɔ kpɔkɛ ko ne ala mɔɔ Dwɔhyua bɔle la bie, ɔse: “Na mame, me nee me sua nu amra, yɛbazonle Gyihova.”—Dwɔh. 24:15.