Winston, ka kɛzi ɛyɛle ɛnwunle Nyamenle la anwo edwɛkɛ kile yɛ.

Bɛtetele me wɔ namule bie mɔɔ wɔ Queensland, Australia la, na ɛnee yɛngɔ asɔne. Kɛ mɔɔ ɛnee yɛwɔ moa la ati, ɛnee me abusua ne ala a meze bɛ a. Mɔɔ menyianle kɛyɛ ɛvolɛ 12 la yɛɛ membɔle ɔ bo kɛ mekpondɛ Nyamenle a. Menganle mengilele ye wɔ asɔneyɛlɛ nu kɛ, ɔmaa menwu ɔ nwo nɔhalɛ ne. Nzinlii, menvile namule ne azo na menyianle gyima wɔ Adelaide, mɔɔ wɔ South Australia la. Mɔɔ menyianle ɛvolɛ 21 la, menyiale Pam wɔ mekɛ mɔɔ ɛnee mehɔ ɛnwomenlelielɛ wɔ Sydney la, na ɔhanle British-Israel ɛzonlenlɛ eku bie anwo edwɛkɛ ɔhilele me. Menli ɛhye mɔ kile kɛ, menli mɔɔ vi Britian la le Yizilayɛ mbusua bulu ne mɔɔ bɛnle ɛkɛ la abozoamra. Eku ɛhye kile kɛ, bɛle sɔlɔ mbusua bulu belemgbunlililɛ ne anu amra mɔɔ bɛ nee bɛ hɔle akɛlɛzonlenlɛ nu wɔ ɛvoya mɔtwɛ K.Y.M. la. Yemɔti mɔɔ menziale mengɔle Adelaide la, menganle eku zɔhane anwo edwɛkɛ mengilele me gɔnwo gyimayɛvo bie mɔɔ ɛnee nee Gyihova Alasevolɛ sukoa Baebolo ne la. Mɔɔ ɔ nee me dendɛle ekyi, titili mɔɔ fale Gyihova Alasevolɛ diedi ne anwo la, menwunle kɛ, Nyamenle ɛlɛbua me asɔne ne mɔɔ menyɛle ye me ngakula nu la. Ɛnee melɛnwu Bɔvolɛ ne yɛɛ ye Belemgbunlililɛ ne anwo nɔhalɛ edwɛkɛ! Menwunle “avikpa ko mɔɔ ye bolɛ yɛ se.”​—Mat. 13:45, 46.

Pam, ɛdawɔ noko ɛbɔle ɔ bo kɛ ɛkpondɛ avikpa zɔhane wɔ wɔ ngakula nu. Kɛ ɔyɛle mɔɔ ɛnwunle ye ɛ?

Menyinle wɔ awuke mɔɔ bɛkulo Nyamenle ɛzonlenlɛ la anu wɔ Coffs Harbour, New South Wales. Me awovolɛ nee me nenyia mɔ liele British-Israel ɛzonlenlɛ ne dole nu. Bɛhilehilele  me nee me diema nrenyia kakula, me diema raalɛ kpanyinli yɛɛ mbusuafoɔ gyɛne bɛmaanle yɛliele yɛlile kɛ Nyamenle kulo menli mɔɔ bɛ nenyia mɔ vi Britian la tɛla menli gyɛne. Noko meande ngilehilelɛ ne abo kpalɛ yɛɛ ɛnee sunsum nu ɛhɔne tɛku me. Mɔɔ menyianle ɛvolɛ 14 la, mengɔle asɔne ngakyile le kɛ Anglican, Baptist yɛɛ SDA. Noko ɛnee sunsum nu ɛhɔne tɛku me.

Nzinlii me abusua ne dule hɔle Sydney, na ɛkɛ ne a menyiale Winston a, ɛnee yera kɛ ɔbalie ɔ menle wɔ ɛkɛ. Kɛ mɔɔ yelimoa yeha la, ɛzonlenlɛ nwo adawubɔlɛ ne a ɔlua zo ɔ nee Alasevolɛ ne mɔ bɔle debiezukoalɛ bo a. Yeangyɛ, ɛnee akee saa ɔlɛkɛlɛ me kɛlata a, nuhua ngɛlɛlera ngome! Nɔhalɛ nu, mɔlebɛbo ne ɛnee me nye ɛnlie nwo. Noko ngyikyi ngyikyi, menwunle kɛ nɔhalɛ wɔ mɔɔ ɔlɛka la anu.

Wɔ 1962, mendule mengɔle Adelaide amaa meabikye Winston ekyi. Ɔyɛle ngyehyɛleɛ ɔmaanle mendɛnlanle Alasevolɛ agyalɛma bie sua nu​—Thomas yɛɛ Janice Sloman​—ɛnee bɛle edwɛkpatɛlɛvolɛma wɔ Papua New Guinea. Bɛlale atiakunlukɛnlɛma ali bɛhilele me wɔ adenle titili zo; ɛnee menyia ɛvolɛ 18, na bɛboale me wɔ sunsum nu kpalɛ. Yemɔti medame noko membɔle ɔ bo kɛ mesukoa Nyamenle Edwɛkɛ ne. Yeangyɛ, menwunle kɛ ɛhye a le nɔhalɛ ne a. Mɔɔ me nee Winston yɛgyale yɛwiele ala la, yɛdule yɛ nwo yɛmaanle kɛ yɛsonle Gyihova, ɔnva nwo sɔnea biala mɔɔ yɛbayia la, na ɛhye ɛmaa yɛ nye ɛzɔ avikpa ko zɔhane mɔɔ yɛnwunle ye la kpalɛ.

Winston, ka mekɛ mɔɔ ɛbɔle Gyihova ɛzonlenlɛ bo la anwo edwɛkɛ.

Mɔɔ me nee Pam yɛgyale ala la, Gyihova bukele gyima kpole mɔɔ limoa la ‘anwo adenle’ maanle yɛ, na ɛhye maanle yɛyɛle dɔɔnwo. (1 Kɔl. 16:9) Adiema Jack Porter mɔɔ ɛnee sonle kɛ maangyebakyi zo neavolɛ mɔɔ rakpɔlale yɛ asafo ekyi ne la a limoale hanle ɛhye anwo edwɛkɛ hilele yɛ a. (Kɛkala yɛ mu nwiɔ yɛlɛsonle wɔ Australasia Ɔfese Kɔmatii ne anu.) Jack nee ɔ ye Roslyn maanle yɛ anwosesebɛ kɛ yɛyɛ adekpakyelɛ gyima ne bie​—yɛvale anyelielɛ yɛyɛle gyima zɔhane ɛvolɛ nnu. Mɔɔ menyianle ɛvolɛ 29 la, bɛzele me nee Pam kɛ yɛhɔyɛ maangyebakyi zo neavolɛ gyima wɔ South Pacific Islands, mɔɔ ɛnee wɔ Fiji Bɛtɛle abo la. Mbɔra ne mɔ a le American Samoa, Samoa, Kiribati, Nauru, Niue, Tokelau, Tonga, Tuvalu yɛɛ Vanuatu.

Mekɛ zɔhane, ɛnee menli mɔɔ wɔ mbɔra ɛhye mɔ azo la ɛnlɛ Gyihova Alasevolɛ anwo adwenle kpalɛ, yemɔti ɛnee ɔwɔ kɛ yɛmaa yɛ nye da ɛkɛ kpalɛ. (Mat. 10:16) Ɛnee asafo ne mɔ le ngyikyi, na bie mɔ bɔbɔ ɛngola ɛmmaa yɛ dabelɛ. Yemɔti yɛkpondɛ sua ne azo amra bie ɛkɛ yɛkɔda wɔ namule ne anu, na bɛlale atiakunlukɛnlɛma ali bɛhilele yɛ.

Winston, yɛze kɛ ɛ nye die edwɛbohilelɛ gyima ne nwo kpalɛ. Duzu a maanle ɛ nye liele nwo zɔhane a?

Mekɛ zɔhane, ɛnee trate nee mbuluku ekyi bie a mediema mɔɔ wɔ Tonga bɔra ne mɔ azo la lɛ wɔ Tonga aneɛ nu a​—ɔboka aneɛ mɔɔ bɛka wɔ Polynesia la anwo. Ɛnee bɛfa The Truth That Leads to Eternal Life, Nrelenza ɛdeɛ ne a bɛyɛ Baebolo ɛzukoalɛ a. Yemɔti wɔ mgbanyima sukulu bie mɔɔ bɛyɛle ye dapɛne nna anu la, mgbanyima nsa mɔɔ ɛnee bɛnde Nrelenza kpalɛ la liele dole nu kɛ bɛbahile Truth buluku ne abo bɛahɔ Tonga aneɛ nu. Pam a taepele a, na yɛvale yɛnwanle United States Bɛtɛle ne yɛmaanle bɛpelentele. Yɛvale kɛyɛ dapɛne mɔtwɛ a yɛyɛle zɔhane gyima ne amuala a. Ɛnee gyima ne ɛnli munli kpalɛ ɛdeɛ, noko buluku zɔhane boale menli mɔɔ ka Tonga aneɛ ne la dɔɔnwo ɔmaanle bɛzukoale nɔhalɛ ne. Me nee Pam yɛnle edwɛbohilelɛma, noko anwubielɛ zɔhane maanle yɛ nye liele edwɛbohilelɛ gyima ne anwo.

 Pam, saa ɛfa mbɔra ne mɔ azo asetɛnla ɛtoto Australia anwo a, kɛ ɔde ɛ?

Ɛnee ɔle ngakyile kolaa! Saa yɛkɔ ɛleka bie mɔ a, nretenrete yɛɛ ngila zonle wɔ ɛkɛ, wuluwulu ne le kpole, anwodolɛ yɛɛ ɔyɛ a yɛnnyia aleɛ mɔɔ sa yɛ la. Noko, saa aleɛ dwo biala a, yɛ nye die wɔ mekɛ mɔɔ yɛde yɛ sua ne anu na yɛlɛnea nyevile ne la. Saa maanle nu mua na siane ne finde a, yɛnwu kukue mbaka ne mɔ nee bɛ ɛlawolɛ na yɛnwu siane ne kɛ yedɔ nyevile ne azo. Tɛnlabelɛ kɛnlɛma zɛhae ka yɛ maa yɛdwenledwenle ninyɛne nwo na yɛyɛ asɔne, ɛhye maa yɛye yɛ adwenle yɛfi ngyegyelɛ ne azo yɛkɔ nyilalɛ ne azo.

Yɛ nye liele ngakula ne mɔ anwo kpalɛ, ɛnee saa bɛnwu yɛdayɛ alɔfolɛ a, bɛ nye die. Mekɛ bie mɔɔ yɛlɛkɔ Niue la, kakula nrenyia ekyi ko ravale ɔ sa hanle Winston asa anwo enrinli ne na ɔhanle kɛ, “Ɛ sa anwo ndɛkɛ ne yɛ me kɛnlɛma.” Nɔhalɛ nu, ɛnee ɔtɛnwunle enrinli dɔɔnwo zɔhane bie ɛlɛ, yemɔti yeannwu kɛzi ɔka nwolɛ edwɛkɛ a!

Ɛnee saa yɛnwu kɛzi bɛ nuhua dɔɔnwo ɛlɛdi ehyia la a, ɔyɛ yɛ nyane. Ɛnee bɛ ɛkɛ ne yɛ ahomeka noko ɛnee bɛnlɛ asopiti kpalɛ yɛɛ bɛnlɛ nzule kpalɛ dɔɔnwo mɔɔ bɛno a. Noko, ɛnee ɛhye ɛngyegye yɛ mediema ne mɔ. Ɔ nee bɛ nwo ɛli. Bɛ nye die kɛ bɛ nee bɛ abusua ne babɔ nu, bɛanyia ɛleka bɛayia bɛazonle na bɛaye Gyihova ayɛlɛ. Bɛ neazo ne boale yɛ ɔmaanle yɛvale yɛ adwenle yɛziele yɛ gyima ne azo na yɛtetele ninyɛne zo.

Pam, ɔdwu mekɛ ne bie a, ɛnee ɔwɔ kɛ ɛkɔsa nzule na ɛto aleɛ wɔ tɛnlabelɛ zɔhane mɔɔ le ngakyile la anu. Kɛzi ɛyɛle ye ɛ?

Ɔwɔ kɛ meda me papa ase. Ɔhilele me ninyɛne dɔɔnwo, le kɛ kɛzi bɛsɔ senle wɔ alie nwo bɛfa bɛto aleɛ yɛɛ kɛzi bɛdi ehyia la. Wɔ mekɛ bie mɔɔ yɛhɔle Kiribati la, yɛlale kɛnlampone sua mɔɔ bɛva ɛya bɛdu zo la anu. Saa meto aleɛ a, metu kuma na meazɔ senle ne wɔ nu na akee meava kukue abonle meagua nu. Saa mekaza nzule a, mekɔ bula ne mɔɔ sua ne azo mraalɛ sa nzule wɔ ɛkɛ la azo. Saa bɛto bula ne a, bɛfa nyɛma bɛkyekye baka mɔɔ ye tendenle bayɛ kɛ fuutu nsia la ati, na bɛava bokiti bɛadoa zo. Saa ɔdwu ɛ nwo zo na ɛto wɔ nzule a, ɛfa bokiti ne ɛto nzule ne anu, na wɔahyiba ɛ sa wɔamaa yeanloma yeaza nzule ne. Ɛnee meze kɛ ye ɛyɛlɛ ɛnyɛ se. Mɔɔ ɔdwule me nwo zo la, menyɛle ye biala ɛnee ɔnrɛyɛ boɛ! Mɔɔ bɛ muala bɛzelele me bɛwiele la, raalɛ ko raliele dole maanle me. Ɛnee bɛ ti akunlu le kɛnlɛma yɛɛ dahuu bɛkulo kɛ bɛboa.

Bɛ mu nwiɔ bɛ nye liele bɛ gyimalilɛ ne anwo wɔ mbɔra ne mɔ azo. Bɛha ninyɛne mɔɔ bɛkakye ye kpalɛ la bie bɛhile yɛ.

Winston: Ɔliele mekɛ na yɛahola yɛazukoa bɛ amaamuo bie mɔ. Kɛ neazo la, saa mediema ne mɔ maa yɛ aleɛ a, fane dɔɔnwo ne ala bɛfa aleɛ ne amuala mɔɔ bɛ ɛdeɛ mɔɔ bɛdi boka nwo la bɛmaa yɛ. Mɔlebɛbo ne, ɛnee yɛnze kɛ ɔwɔ kɛ yɛgyakyi aleɛ ne bie yɛmaa bɛ. Yemɔti yɛdi aleɛ ne amuala! Nɔhalɛ nu, mɔɔ yɛdele tɛnlabelɛ ne abo la, ɛnee akee yɛdi a yɛgyakyi bɛ bie. Ɔnva nwo kɛ yɛyɛle nvonleɛ bie mɔ la, yɛ mediema ne mɔ dele yɛ edwɛkɛ bo. Ɛnee bɛ nye die kɛ bɛbanwu yɛ siane nsia biala wɔ mekɛ mɔɔ yɛbazia yɛahɔkpɔla bɛ wɔ maangyebakyi gyima ne anu la. Ɛye mediema mɔɔ wɔ ɛkɛ la ɛsie ahane a, yɛ ngomekye a ɛnee yɛle nyɛvolɛ mɔɔ yɛle Alasevolɛ wɔ mekɛ zɔhane a.

Yɛ ɛkpɔlalɛ ne eza yɛle daselɛlilɛ maanle sua ne azo amra. Ɛnee namule ne azo amra dɔɔnwo te nganeɛ kɛ, sua ne azo ala a ɛzonlenlɛ ne wɔ a. Yemɔti saa me nee me ye mɔɔ yɛvi maanle gyɛne zo la kɔ ɛkɛ a, sua ne azo amra nwu ye kɛ yɛwɔ ewiade ɛleka dɔɔnwo na bɛ nye die.

Pam: Mekakye mekɛ mɔɔ yɛhɔle Kiribati la, ɛnee mediema ekyi bie a wɔ asafo ne anu a. Ɛnee Itinikai Matera mɔɔ ɔ ngomekye a ɔle asafo nu kpanyinli la yɛ mɔɔ ɔbahola biala la ɔnea yɛ. Kenle ko, ɔvale kɛndɛne bie mɔɔ kolonvia ko pɛ la nu la ɔrɛlɛle yɛ na ɔhanle kɛ: “Bɛ ɛdeɛ ɔ.” Ɛnee akɔlɛ kolonvia nwo hyia  wɔ zɔhane mekɛ ne. Atiakunlukɛnlɛma subane ekyi zɔhane hanle yɛ ahonle kpole.

Pam, nzinlii ɛnrenzɛle na ɛ ko ne kpɔnenle, duzu a boale wɔ maanle ɛgyinlanle ɔ nloa a?

Menrenzɛle wɔ 1973 wɔ mekɛ mɔɔ me nee Winston wɔ South Pacific la. Yɛyɛle yɛ adwenle kɛ yɛsia yɛahɔ Australia, na ye siane nna anzi, kakula ne zɛkyele. Ɛhye gyegyele Winston kpalɛ; ɔluakɛ ɔdaye noko ɔ ra ɔ. Ngyikyi ngyikyi nyane ne hanle aze, noko ɔ bo andu kɔkpula kɛ April 15, 2009, The Watchtower ne rale la. Wɔ “Questions From Readers” foa ne bɛbiza kpuya ɛhye wɔ ɛkɛ: “Is there any hope of a resurrection for a baby that dies in its mother’s womb?” Edwɛkɛ zɔhane maanle yɛnyianle anwodozo kɛ, Gyihova yɛ mɔɔ fɛta la dahuu. Ɔbaye nyane biala mɔɔ ewiade ɛhye ɛva ɛra yɛ nwo zo la yeavi ɛkɛ, na ɔbamaa ɔ Ra ne ‘azɛkye Seetan gyima.’ (1 Dwɔn 3:8) Edwɛkɛ zɔhane boale yɛ maanle yɛnwunle kɛ, kɛ Gyihova menli la, yɛlɛ “avikpa” mɔɔ sonle bolɛ a! Saa tɛ Belemgbunlililɛ anyelazo ne a, anrɛɛ yɛwɔ ni?

Mɔɔ kakula ne zɛkyele la anzi, yɛyɛle dahuu ɛzonlenlɛ gyima ne bieko. Yɛzonlenle wɔ siane ekyi anu wɔ Australia Bɛtɛle, na nzinlii bɛmaanle yɛziale yɛhɔle maangyebakyi gyima ne anu. Wɔ 1981, mɔɔ ɛnee yɛva ɛvolɛ nna yɛzonle wɔ namule bie mɔɔ wɔ New South Wales yɛɛ Sydney la, bɛdole ɛsalɛ bɛvɛlɛle yɛ wɔ dɛba ne Australia Bɛtɛle, na ɛkɛ ne a yɛtɛbɔ a.

Winston, asoo anwubielɛ mɔɔ ɛnyianle ye wɔ South Pacific Islands la ɛlɛboa wɔ wɔ gyima mɔɔ ɛlɛ kɛ Australasia Ɔfese Kɔmatii ne anu sonla la ɔ?

Ɛhɛe, yeboa me wɔ ndenle dɔɔnwo azo. Mɔɔ limoa, bɛhanle kɛ Australia Bɛtɛle ne ɛnlea American Samoa yɛɛ Samoa azɛlɛsinli ne azo. Akee bɛvale New Zealand nee Australia Bɛtɛle ne mɔ bɛbɔle nu. Kɛkala, azɛlɛsinli mɔɔ Australasia Bɛtɛle ne nea zo la a le Australia, American Samoa yɛɛ Samoa, Cook Islands, New Zealand, Niue, Timor-Leste, Tokelau yɛɛ Tonga​—na menyia nwolɛ adenle mehɔzonle kɛ Bɛtɛle agyakɛ anu gyinlavolɛ wɔ ɛleka ɛhye mɔ dɔɔnwo. Anwubielɛ mɔɔ menyianle ye wɔ mekɛ mɔɔ me nee mediema ɛhye mɔ yɛle gyima la ɛboa me kpalɛ, ɔluakɛ kɛkala, melɛsonle bɛ wɔ Bɛtɛle.

Maa menga ɛhye mendwula ye, me nee Pam yɛnwu ye kɛ, tɛ mgbanyima angome a kpondɛ Nyamenle a. Ngakula noko kulo kɛ bɛnwu ‘avikpa ko ne mɔɔ sonle bolɛ la’​—saa bɔbɔ bɛ mbusuafoɔ gyɛne anye ɛnlie nwo a. (2 Arl. 5:2, 3; 2 Ek. 34:1-3) Yɛze ye wienyi kɛ, Gyihova le Nyamenle mɔɔ lɛ ɛlɔlɛ, na ɔkulo kɛ ngakula nee mgbanyinli amuala nyia ngoane!

Mɔɔ me nee Pam bɔle ɔ bo kɛ yɛkpondɛ Nyamenle wɔ kɛyɛ ɛvolɛ 50 mɔɔ ɛze la, ɛnee yɛnze kɛ ɛleka mɔɔ ɔbava yɛ yeahɔdwu la ɛne. Amgba Belemgbunlililɛ nɔhalɛ ne le avikpa mɔɔ ye bolɛ yɛ se tɛla biala! Yɛbɔ kpɔkɛ kɛ yɛbava yɛ anwosesebɛ kɔsɔɔti yɛazɔ avikpa zɔhane anu dwaa!