METƆ zo nsuu wɔ ngakula mɔtwɛ mɔɔ awovolɛ mɔɔ bɛyɛ gyima ɛsesebɛ wɔ Gilisi namule ekyi Karítsa azo wole bɛ la anu. Bɛwole me 1926.

Me awovolɛ yiale John Papparizos la ye ɛvolɛ ko yɛɛ bɛwole me a, ɔle Baebolo Sukoavo, kɛ ɛnee bɛfɛlɛ Gyihova Alasevolɛ la ɛne. Ɛnee ɔbɔ mɔdenle yɛɛ ɔkulo ɛdendɛlɛ na bɛ nye liele kɛzi John te Ngɛlɛlera ne abo la anwo, yemɔti bɛbɔle ɔ bo kɛ bɛkɔ debiezukoalɛ mɔɔ Baebolo Sukoavoma ne yɛ ye wɔ yɛ namule ne azo la bie. Ɛnee me mame lɛ Gyihova Nyamenle anu diedi kpole. Yeangɔ sukulu ɛdeɛ, noko ɔvale nwolɛ adenle biala ɔlile daselɛ. Ɔyɛ alɔbɔlɛ kɛ me papa vale ye adwenle ziele awie mɔ sinlidɔlɛ zo na ngyikyingyikyi ɔgyakyile debiezukoalɛ ɛhɔlɛ la.

Ɛnee me nee me mediema ne mɔ anye die Baebolo ne anwo noko mɔɔ yɛlɛnyi la, ninyɛne hwehwenle yɛ adwenle. Ewiade Konle II zile Abolokyi wɔ 1939 la, edwɛkɛ bie mɔɔ zile yɛ namule ne anu la gyegyele yɛ. Bɛvale yɛ gɔnwo nee yɛ busuanli Nicolas Psarras mɔɔ ɛnee bɛzɔnenle ye kɛ Dasevolɛ la ɔtɛkyɛle la, bɛbokale Giliki sogyama ne anwo. Nicolas mɔɔ ɛnee yeli ɛvolɛ 20 la vale akɛnrasesebɛ zele sogya mgbanyima ne mɔ kɛ: “Mengɔ konle ɔluakɛ mele Kelaese sogyanli.” Bɛlile ye edwɛkɛ wɔ sogyama kɔɔto bie anu na bɛhanle kɛ bɛto ye efiade ɛvolɛ bulu. Ɔzinle yɛ nwo!

Yɛ ti yɛle boɛ, wɔ 1941 mɔlebɛbo, sogyama bie rale Gilisi na bɛyele Nicolas bɛvile efiade. Ɔziale ɔrale Karítsa, na me diema nrenyia kpanyinli Ilias, bizebizale ye Baebolo nu kpuya dɔɔnwo. Mendiele ye kpalɛ. Nzinlii, Ilias nee medame yɛɛ yɛ diema raalɛ ekyi Efmorfia bɔle Baebolo ɛzukoalɛ bo, na yɛhɔle Alasevolɛ ne mɔ debiezukoalɛ ne bie dahuu. Ye ɛvolɛ bieko, yɛdayɛ menli nsa yɛyilale yɛ nwo zo  yɛmaanle Gyihova na bɛzɔnenle yɛ. Nzinlii, yɛ mediema nna noko rayɛle Alasevolɛ nɔhavoma.

Wɔ 1942, ɛnee mgbavolɛ nee mbɛlɛra ngɔnla mɔɔ bɛli ɛvolɛ 15 kɔdwu 25 la a wɔ Karítsa Asafo ne anu a. Ɛnee yɛ muala yɛze kɛ sɔnea mɔɔ anu yɛ se la la yɛ nyunlu. Ɔti saa yɛnyia nwolɛ adenle biala a, yɛyia yɛsukoa Baebolo ne, yɛto asafo edwɛne na yɛyɛ asɔne amaa yɛ nwo ayɛ se. Ɛhye maanle yɛnyianle diedi kpole.

Mɔɔ Ewiade Konle II ɛlɛba awieleɛ la, Giliki komunisima dele atua tiale arane ne, na ɛhye vale konle rale maanle ne anu. Komunis sogyama ne kpɔsale namunamu ne mɔ azo tinlitinlinle menli ne anwo zo kɛ bɛraboka bɛ nwo. Mɔɔ bɛrale yɛ namule ne azo la, bɛhyele Alasevolɛ mgbavolɛ nsa—Antonio Tsoukaris, Ilias, nee medame. Yɛkpale bɛ kyɛlɛ kɛ yɛle Kilisienema, yɛngyi afoa biala; noko bɛvale yɛ bɛhɔle Olympus Boka ne abo, ɔvi yɛ namule ne azo mɔɔ kɔ ɛkɛ la bayɛ dɔnehwele 12.

Yeangyɛ, Komunis sogya kpanyinli ko zele yɛ kɛ yɛhɔboka sogyama mɔɔ ɛde atua la anwo. Mɔɔ yɛhilehilele nu yɛhilele sogya kpanyinli ne kɛ nɔhalɛ Kilisienema ɛnva ɛtu ɛngɔ konle la, ɔvale ɛya na ɔ nee yɛ hɔle sogya kpanyinli kpalɛ ne ɛkɛ. Mɔɔ yɛhanle yɛ edwɛkɛ ne bieko la, sogyanli ne hanle kɛ, “Ɛnee bɛva ɛkpɔnwɔ bɛsesa menli mɔɔ ɛboda wɔ konle nu la bɛhɔ asopiti.”

Yɛbuale kɛ, “Na saa arane sogyama ne kye yɛ ɛ? Asoo bɛnrɛha kɛ yɛle sogyama ɔ?” Ɔhanle kɛ: “Ɛnee bɛva paano bɛhɔmaa menli mɔɔ ɛlɛko la.” Yɛ nee ye zuzule nwolɛ kɛ, “Na saa sogya kpanyinli bie nwu yɛ kɛ yɛde ɛkpɔnwɔ ne azo na ɔka kɛ yɛva adu yɛhɔmaa sogyama ne ɛ?” Sogya kpanyinli ne dwenlenle nwolɛ kpalɛ. Awieleɛ kolaa ne, ɔhanle kɛ: “Ɔyɛ, bɛbahola bɛanlea mboane! Bɛdɛnla boka ne abo na bɛnlea mboane ne.”

Ɔti mɔɔ konle ne ɛlɛkɔ zo la, yɛdayɛ menli nsa ne yɛdele nganeɛ kɛ yɛ adwenle ɛnrɛbua yɛ fɔlɛ kɛ yɛbanlea mboane. Ɛvolɛ ko anzi, bɛmaanle Ilias mɔɔ le ralɛ nrenyia kpanyinli la hɔle sua nu hɔnleanle yɛ mame mɔɔ yeyɛ kunlavolɛ la. Antonio anwo dole ye yemɔti bɛgyakyile ye. Noko mame bɛangyakyi me.

Ɛnee Giliki sogyama ne ɛlɛba komunisima ne anwo zo. Ekpunli ne mɔɔ hyele me la nriandile hɔle awoka ne mɔ azo ɛleka mɔɔ bikye Albania la. Mɔɔ yɛbikyele ɛweɛne ne azo la, arɛlevilɛ nu ala Giliki sogyama ne bɔle yɛ yiale. Dwazotiama ne ahonle dule na bɛnriandile. Menveale baka bie mɔɔ ɛbu la anzi, ɛkɛ ne a sogyama ne mɔɔ menganle bɛ nwo edwɛkɛ la nwunle me a.

Mɔɔ menganle mengilele Giliki sogyama ne kɛ komunisima ne hyele me la, bɛvale me bɛhɔbizebizale me edwɛkɛ wɔ sogyama azokoɛleɛ bie mɔɔ bikye Véroia, tete suakpole Bɛlia mɔɔ wɔ Baebolo ne anu la. Bɛhanle kɛ mendu ahuma mɔɔ nzule bava nu la memaa sogyama ne. Meanyɛ la ati, sogya kpanyinli ne vale me hɔdole efiade wɔ Makrónisos (Makronisi).

Bodane bie mɔɔ bɛfɛlɛ ye Makrónisos la wɔ Attica ɛnweazo, ɔvi ɛkɛ ne mɔɔ kɔ Atɛnse la bayɛ mayɛlɛ 30 (km 50). Bɔra ne tendenle le mayɛlɛ mɔtwɛ (km 13) ala yɛɛ ye tɛtɛlɛ le mayɛlɛ 1.5 (km 2.5). Noko ɔvi 1947 kɔdwu 1958, bɛvale pilizama mɔɔ bo 100,000 la bɛhɔle ɛkɛ. Ɛnee bie mɔ le komunisima, menli mɔɔ honle ɛsesebɛ, nee Gyihova Alasevolɛ nɔhavoma.

Wɔ 1949 mɔlebɛbo ne, ɛnee bɛhyehyɛ pilizama ne anu ekpunli ekpunli. Bɛvale me bɛhɔle azokoɛleɛ ne ɛleka mɔɔ banebɔlɛ kpalɛ ɛnle ɛkɛ na mrenyia dɔɔnwo bie boka me nwo la. Yɛ nuhua kɛyɛ 40 lale azɛlɛ nwo wɔ ɛdanlɛ sua bie mɔɔ bɛyɛ bɛmaa menli 10 ala la anu. Yɛnlonle nzule evinli yɛɛ ɛnee aluba nee ndɔlɔra ala a yɛta yɛdi a. Munlutu nee anwoma mɔɔ bɔle yɛ dahuu la maanle yɛlile nyane. Noko bɛammaa yɛanzuhu awolɛ, kɛ mɔɔ ɛnee bɛfa bɛyɛ pilizama dɔɔnwo amumuyɛ la.

Kenle ko bie mɔɔ ɛnee melua ɛnwea ne anloa la, menyiale Alasevolɛ dɔɔnwo mɔɔ bɛvi azokoɛleɛ gyɛne zo la. Yɛ nye liele kɛ yɛyia la! Yɛnleanle boɛ kpalɛ amaa bɛannwu yɛ noko yɛyiale kɛ mɔɔ yɛbahola la. Eza saa yɛka edwɛkɛ ne yɛahile pilizama gyɛne a yɛnea boɛ, na bɛ nuhua bie mɔ rayɛle Gyihova Alasevolɛ. Zɔhane ninyɛne ne mɔ nee asɔne mɔɔ yɛvile ahonle nu yɛyɛle la maanle yɛ nee Nyamenle nyianle agɔnwolɛvalɛ kpalɛ.

Mɔɔ bɛhyele me la anzi siane bulu, akee bɛzile kpɔkɛ kɛ ɔwɔ kɛ mewula sogya tɛladeɛ. Meanyɛ yemɔti bɛhwenle me bɛhɔle kpanyinli ne mɔɔ nea azokoɛleɛ ɛkɛ ne la anyunlu. Menvale edwɛkɛ mɔɔ mehɛlɛ la memaanle nrenyia ne, ɔse, “Mekpondɛ kɛ meyɛ Kelaese sogyanli ala.” Kpanyinli ne nwunlonwunlanle me ekyi la, ɔvale me ɔhɔmaanle kpanyinli mɔɔ tɔ zo nwiɔ la, ɔle Giliki Asɔne ne ɛsɔfo kpanyinli na ɛnee ɔwula ɛsɔfo tɛladeɛ. Mɔɔ menvale akɛnrasesebɛ mengyinlanle Ngɛlɛlera ne azo membuale ye kpuya ne mɔ la, ɔvale ɛya ɔdeanle nu kɛ: “Bɛva ye bɛhɔ. Ɔle kyengye!”

Aleɛ hyenle la, sogyama ne eza hanle kɛ menwula sogya tɛladeɛ. Meanyɛ ɔti bɛvale bɛ baka ne bɛbole me na bɛbobɔle me abotokuma. Akee bɛvale me bɛhɔle azokoɛleɛ ne asopiti ɛkɛ bɛnleanle saa me bowule bie ɛtɛbule a, na bɛ nee me ziale hɔle me ɛdanlɛsua ne anu. Amaneɛnwunlɛ ɛhye hɔle zo too siane nwiɔ.

Meamkpo me diedi ne, yemɔti sogyama ne mɔɔ bɛ nye zo ɛda bɛ la zɔle adenle fofolɛ nleanle. Bɛkyekyele me sa wɔ me nzi na bɛvale nyɛma bɛbilale me gyakɛ akunlu kpalɛ. Wɔ amaneɛnwunlɛ zɔhane anu, mengakyele Gyisɛse edwɛkɛ ɛhye: “Anyelielɛ ɛha bɛ kɛ medame ti menli bɔ bɛ aholoba na bɛyɛ bɛ kpɔdekpɔde . . . Bɛmaa bɛ nye ɛlie na bɛli fɛlɛko, ɔluakɛ bɛ ahatualɛ le kpole wɔ anwuma, zɔhane ala a bɛyɛle ngapezoma mɔɔ limoale bɛ nyunlu la kpɔdekpɔde a.” (Mat. 5:11, 12) Awieleɛ bɔkɔɔ ne, kɛ mɔɔ bɛhilele me nyane dɔɔnwo la ati, me nye zo bulule me.

Me nye zo tetele me la, ɛnee mela efiade mɔɔ ɛkɛ ne le weɛlɛkɔkɔ kpalɛ na aleɛ, nzule anzɛɛ kundu ɛnle ɛkɛ la. Noko, me adwenle gyinlanle. Kɛ mɔɔ Baebolo ne bɔ ɛwɔkɛ la, “Nyamenle anzodwolɛ ne” bɔle ‘me ahonle nee me adwenle nzuzulɛ nwo bane.’ (Fel. 4:7) Aleɛ hyenle la, sogyanli bie maanle me paano nee nzule yɛɛ tɛladeɛ. Ko noko vale ninyɛne mɔɔ bɛfa bɛmaa ye la maanle me. Ninyɛne ɛhye mɔ maanle menwunle kɛ Gyihova dwenle me nwo.

Mgbanyima ne mɔ bule me kɛ mele atuadelɛnli mɔɔ me nwo yɛ ɛvɛlɛ na bɛ nee me hɔle sogyama kɔɔto ne mɔɔ wɔ Atɛnse la. Bɛbuale me fɔlɛ na bɛdole me efiade ɛvolɛ nsa wɔ Yíaros (Gyaros), bɔra bie mɔɔ wɔ Makrónisos aduduleɛ kɛyɛ mayɛlɛ 30 (km 50) la.

Bɛvale belekese mgbole ngɔkɔlɛ a bɛzile Yíaros pilizama sua ne a, na pilizama mɔɔ maanyɛlɛ ti bɛ nee bɛ ɛra ɛkɛ la bo 5,000. Ɛnee Alasevolɛ nsuu mɔɔ ɔluakɛ bɛngyi afoa biala la ati bɛ nee bɛ ɛhɔ ɛkɛ la noko boka nwo. Bɛduale Baebolo ne ɛzukoalɛ bɔkɔɔ, noko yɛdayɛ nsuu ne yɛveale yɛ nwo yɛzukoale. Ɛnee yɛ sa ka Ɛzinzalɛ Arane ne mɔɔ bɛfa bɛfea  bɛbɛlɛ yɛ la dahuu, yɛvale yɛ sa yɛhɛlɛle bie na yɛazukoa.

Kenle ko bie mɔɔ ɛnee yɛhɔvea yɛlɛsukoa la, pilizama sinzavolɛ bie ravindele yɛ nwo zo na ɔliele yɛ mbuluku ne mɔ. Bɛ nee yɛ hɔle kpanyinli kpalɛ ne ɛkɛ, na ɛnee yɛ nye la kɛ bɛbamaa yɛala nu mekɛ tendenle. Noko kpanyinli ne hanle kɛ: “Yɛze bɛ menli holɛ, na yɛze kpɔkɛ mɔɔ bɛzi la. Yɛze kɛ yɛbahola yɛanyia bɛ nu anwodozo. Bɛzia bɛhɔyɛ gyima.” Ɔmaanle yɛ nuhua bie mɔ gyima mɔɔ ɛnyɛ se la bɔbɔ. Yɛ nye zɔle mɔɔ Gyihova yɛle la. Wɔ efiade ɛkɛ ne bɔbɔ, yɛ munli nu mɔɔ yɛgyinlanle kɛ Kilisienema la maanle bɛyele Gyihova duma ne ayɛlɛ.

Yɛ munli nu mɔɔ yɛgyinlanle la vale ninyɛne mgbalɛ dɔɔnwo rale. Mɔɔ pilizanli bie mɔɔ ze mgbondabulɛ nye zo kpalɛ la nwunle yɛ subane kpalɛ ne la, ɔbizale yɛ diedi ne anwo edwɛkɛ. Mɔɔ bɛyele yɛ wɔ 1951 mɔlebɛbo la, bɛyele ɔdaye noko. Nzinlii, ɔrayɛle Dasevolɛ mɔɔ bɛzɔne ye na ɔyɛle dahuu ɛzonlenlɛ gyima ne bie.

Mɔɔ bɛyele me la, menziale mengɔle me sua zo Karítsa. Nzinlii, me nee me sua zo amra dɔɔnwo dule hɔle Melbourne, Australia. Menwunle Janette, adiema raalɛ kɛnlɛma bie na yɛgyale, yɛtetele nrenyia ko nee mraalɛ nsa yɛmaanle bɛnwunle nɔhalɛ ne.

Kɛkala, mebo ɛvolɛ 90 noko metɛde asafo nu kpanyinli mɔɔ bɔ mɔdenle. Kɛmɔ bɛbole me dɔɔnwo la ati, ɔyɛ a me nwo nane nee me gyakɛ fofo me, titili mekɛ mɔɔ mekɛkpɔne daselɛlilɛ la. Noko mezi pi kɛ mebahɔ zo meayɛ “Kelaese sogyanli.”—2 Tim. 2:3.