1. Saa bɛka kɛ awie se anwunvɔne a, duzu a ba yɛ adwenle nu a?

SAA bɛka kɛ awie se anwunvɔne a, bie a mɔɔ ba yɛ adwenle nu la a le awie mɔɔ ɔ ti akunlu le kɛnlɛma, ɔ kunlu yelɛyela ye maa awie mɔ na ɔyɛ nyele la. Bie a yɛ adwenle bahɔ Samɛleanli agɔnwolɛ kpalɛ ne anwo edwɛkɛ mɔɔ Gyisɛse hanle la azo. Zɔhane nrenyia ne mɔɔ ɔvi maanle gyɛne nu la nwunle Dwuunli ne mɔɔ hɔdɔle nwulema asa anu la na “ɔzele ye anwunvɔne.” Mɔɔ Samɛleanli ne nwunle Dwuunli ne mɔɔ bɛboda ye la, “ɔ nwo yɛle ye alɔbɔlɛ” na ɔnleanle ye kɛnlɛma. (Luku 10:29-37) Ndonwo ɛhye maa yɛnwu subane kɛnlɛma bie mɔɔ yɛ Nyamenle ne lɛ la—anwunvɔnezelɛ. Ɛlɔlɛ a ka Nyamenle maa ɔse yɛ anwunvɔne a, na ɔda anwunvɔnezelɛ ali ɔkile yɛ alehyenlɛ biala.

2. Adenle bieko mɔɔ yɛdua zo yɛda anwunvɔnezelɛ ali la a le boni?

² Wɔannea a yɛ adwenle bahɔ adenle bieko mɔɔ bɛdua zo bɛda anwunvɔnezelɛ ali la azo. Yemɔ a le kɛ saa awie yɛ debie mɔɔ ɔwɔ kɛ yɛtwe ɔ nzo bɔbɔ a, yɛnrɛhwe ɔ nzo. Ɛhye kile kɛ amgba Gyihova se yɛ anwunvɔne. Edwɛndolɛnli ne hanle kɛ: “Ɔ nee yɛ ɛnli ye kɛ mɔɔ yɛ ɛtane ne mɔ de la.” (Edw. 103:10) Noko ɔdwu mekɛ ne bie a Gyihova tea awie mɔɔ ɛlɛyɛ ɛtane la kpalɛ.

3. Kpuya boni mɔ a yɛbazuzu nwo a?

³ Wɔ edwɛkɛ ɛhye anu, yɛbazuzu kpuya nsa anwo: Duzu ati a Gyihova se anwunvɔne a? Asoo yɛbahola yɛadea awie kpalɛ na yɛaze ye anwunvɔne wɔ mekɛ ko ne ala ɔ? Yɛɛ duzu a baboa yɛ yeamaa yɛaze anwunvɔne a? Maa yɛnlea kɛzi Nyamenle Edwɛkɛ ne bua kpuya ɛhye mɔ la.

4. Duzu ati a Gyihova se anwunvɔne a?

⁴ Gyihova anye die nwo kɛ ɔbaze anwunvɔne. Sunsum ne maanle ɛzoanvolɛ Pɔɔlo hɛlɛle kɛ “Nyamenle anwunvɔnezelɛ ne zonle.” Wɔ ɛke, ɛnee Pɔɔlo ɛlɛka kɛzi Nyamenle ɛze ye azonvolɛ mɔɔ ɛnli munli mɔɔ bɛkpokpa bɛ kɛ bɛhɔ anwuma anwunvɔne la anwo edwɛkɛ. (Ɛfɛ. 2:4-7) Noko tɛ ye azonvolɛ mɔɔ bɛkpokpa bɛ la angomekye a ɔse bɛ anwunvɔne a. Edwɛndolɛnli Devidi hɛlɛle kɛ: “Gyihova le kpalɛ maa menli kɔsɔɔti, na ye anwunvɔnezelɛ da ali wɔ ye gyima kɔsɔɔti anu.” (Edw. 145:9) Kɛmɔ Gyihova kulo menli la ati, mekɛ biala mɔɔ ɔbanwu kɛ ɔwɔ kɛ ɔse bɛ anwunvɔne la ɔyɛ ye zɔ.

5. Kɛ ɔyɛle mɔɔ Gyisɛse zukoale Gyihova anwunvɔnezelɛ ne anwo debie ɛ?

⁵ Gyisɛse ze kɛzi Gyihova anye die nwo kɛ ɔbaze anwunvɔne la anwo edwɛkɛ dɔɔnwo tɛla awie biala. Gyihova nee Gyisɛse dɛnlanle anwuma mekɛ tendenle kolaa na Gyisɛse ara azɛlɛ ye azo. (Mrɛ. 8:30, 31) Gyisɛse nwunle ye fane dɔɔnwo kɛ ɔ Ze ɛlɛse alesama mɔɔ ɛnli munli la anwunvɔne. (Edw. 78:37-42) Ɛnee Gyisɛse ta ka ɔ Ze subane kɛnlɛma ɛhye anwo edwɛkɛ wɔ ye ngilehilelɛ nu.

6. Kɛzi Gyisɛse boale yɛ maanle yɛdele ɔ Ze anwunvɔnezelɛ ne abo ɛ?

⁶ Kɛ mɔɔ yɛnwunle ye wɔ edwɛkɛ mɔɔ li ɛhye anyunlu anu la, Gyisɛse yɛle kakula ɛkobɔfo bie anwo ndonwo mɔɔ ka ahonle la ɔvale ɔhilehilele kɛzi Gyihova anye die nwo kɛ ɔbaze anwunvɔne la anu. Kpavolɛ ne vile sua nu, “ɔbɔle ɛbɛla mgbane mgbane ɔzɛkyele ye agyapadeɛ ne.” (Luku 15:13) Nzinlii, ɔnlunle ɔ nwo wɔ ye ɛbɛlatane ne anwo, ɔbɛlɛle ɔ nwo aze na ɔziale ɔhɔle sua nu. Duzu a ye papa yɛle a? Yeangyɛ fee yɛɛ kpavolɛ ne nwunle mɔɔ ye papa bayɛ la a. Gyisɛse hanle kɛ: “Mekɛ mɔɔ [kpavolɛ ne lua] moamoa mɔɔ ɔlɛba la, ye papa nwunle ye na ɔ nwo yɛle ye alɔbɔlɛ, na ɔnriandile ɔhɔyɛle ye atuu na ɔvole ɔ nloa anwo.” Selɛ ne angua ɔ ra ne anyunlu aze. Emomu, ɔzele kpavolɛ ne anwunvɔne na ɔvale ye ɛtane ɔhyɛle ye na ɔliele ye wɔ abusua ne anu bieko. Kakula ɛkobɔfo ne yɛle ɛtane kpole, noko kɛmɔ ɔnlunle ɔ nwo la ati, ye papa vale hyɛle ye. Wɔ ndonwo ne anu, selɛ ne mɔɔ se anwunvɔne la gyi ɛkɛ ne maa Gyihova. Gyisɛse vale ndonwo ɛhye mɔɔ ka ahonle la hilehilele kɛzi ɔ Ze lɛ ɛhulolɛ kɛ ɔbava ɛtanevolɛma mɔɔ nu bɛ nwo nɔhalɛ nu la ɛtane yeahyɛ bɛ la anu.—Luku 15:17-24.

7. Kɛzi adenle mɔɔ Gyihova dua zo da anwunvɔnezelɛ ali la kile kɛ ɔze nrɛlɛbɛ kpalɛ ɛ?

 ⁷ Gyihova se anwunvɔne ɔluakɛ ye nrɛlɛbɛ le kpole. Dahuu Gyihova si kpɔkɛ mɔɔ baboa ye abɔdeɛ la. Baebolo ne ka kɛ “nrɛlɛbɛ ne mɔɔ vi anwuma lɔ la ɛdeɛ . . . anwunvɔnezelɛ yɛɛ ma kpalɛ ɛyi ye tɛkɛɛ.” (Gye. 3:17) Kɛmɔ Gyihova le kɛ selɛ mɔɔ lɛ ɛlɔlɛ la ati, ɔze kɛ saa ɔse ɔ mra anwunvɔne a ɔboa bɛ. (Edw. 103:13; Aye. 49:15) Saa Nyamenle se bɛ anwunvɔne a, ɔmaa bɛnyia anyelazo ɔnva nwo kɛ bɛnli munli la. Ɔti mekɛ biala mɔɔ Gyihova banwu kɛ ɔwɔ kɛ ɔse yɛ anwunvɔne la, ye nrɛlɛbɛ ne mɔɔ bo zo la ka ye maa ɔyɛ zɔ. Noko Gyihova ze mekɛ mɔɔ ɔnle kɛ ɔse anwunvɔne a. Kɛmɔ ɔze nrɛlɛbɛ la ati, ɔnze anwunvɔne wɔ mekɛ mɔɔ ɔze kɛ ɔyɛ ye zɔ a ɛnee ɔlɛkedɛheda ɛtane zo la.

8. Ɔdwu mekɛ ne bie a duzu a ɔhyia kɛ yɛyɛ a, na duzu ati ɔ?

⁸ Fa ye kɛ Nyamenle sonvolɛ bie anye fuu ɛlɛbɔ ɛbɛlatane bie. Duzu a ɔwɔ kɛ yɛyɛ a? Sunsum ne maanle Pɔɔlo hɛlɛle kɛ ‘bɛ nee ye mmatu.’ (1 Kɔl. 5:11) Bɛtu menli mɔɔ yɛ ɛtane na bɛnnu bɛ nwo la bɛfi asafo ne anu. Ɔhyia kɛ yɛyɛ ɛhye amaa yɛabɔ yɛ mediema mɔɔ di nɔhalɛ la anwo bane na yɛamaa yeala ali kɛ Gyihova ndenle le nwuanzanwuanza. Noko wɔannea a bie mɔ banyia adwenle kɛ saa bɛtu awie a, ɔkile kɛ Nyamenle anze ye anwunvɔne. Asoo ɔle zɔ? Maa yɛnlea.

9-10. Kɛ mɔɔ Hibuluma 12:5, 6 kile la, duzu ati a yɛbahola yɛaha kɛ saa bɛtu awie a ɔkile kɛ bɛze ye anwunvɔne a? Maa neazo.

⁹ Saa yɛkɔ debiezukoalɛ na yɛte nolobɔlɛ bie kɛ awie bie mɔɔ yɛze ye na yɛkulo ye edwɛkɛ la “ɛnle Gyihova Dasevolɛ bieko” a, ɔmaa yɛdi nyane kpalɛ. Bie a yɛbade nganeɛ kɛ anrɛɛ ɔngyia kɛ bɛtu ye. Saa bɛtu awie a, amgba ɔkile kɛ bɛze ye anwunvɔne ɔ? Ɛhɛe. Saa ɔwɔ kɛ yɛtea awie na yɛanyɛ ye zɔ a, ɔkile kɛ yɛanla nrɛlɛbɛ, anwunvɔnezelɛ anzɛɛ ɛlɔlɛ ali. (Mrɛ. 13:24) Saa awie yɛ ɛtane na yeannu ɔ nwo na bɛtu ye a, asoo ɔbahola yeaboa ye yeamaa yeahakyi ye subane ɔ? Ɛhɛe. Menli dɔɔnwo mɔɔ yɛle ɛtane kpole la ɛnwu kɛ, kɛmɔ asafo nu mgbanyima zile bɛ gyakɛ aze dule bɛ la ati, yemɔ ɛboa bɛ ɛmaa bɛ nye ɛra bɛ nwo zo, bɛyɛ nzenzaleɛ na bɛzia bɛra Gyihova ɛkɛ.—Kenga Hibuluma 12:5, 6.

¹⁰ Suzu neazo ɛhye anwo. Mboaneneavolɛ bie ɛnwu kɛ ye mboane ne ko ɛnde kpɔkɛ. Ɔze kɛ amaa yeahola yeayɛ ye ayile la kyesɛ ɔye ye ɔfi mɔɔ ɛha la anu. Noko mboane kulo kɛ bɛtɛnla kɛ ekpunli, ɔti saa ɛye bie ɛfi nu a ɔgyegye ye. Ɔti saa mboaneneavolɛ bie ye ko ne mɔɔ ɛnde kpɔkɛ la fi mɔɔ ɛha la anu a, asoo ɔkile kɛ ɔ ti yɛ se? Kyɛkyɛ. Ɔze kɛ saa ɔmaa boane ne mɔɔ ɛnde kpɔkɛ la kɔboka bɛ a, ewule ne bie baha bɛdabɛ noko. Saa ɔye mɔɔ ɛnde kpɔkɛ la ɔfi nu a, ɔbamaa yeabɔ mɔɔ ɛha la anwo bane.—Fa toto Lɛvitikɔso 13:3, 4.

11. (a) Kɛzi yɛbahola yɛava awie mɔɔ bɛdu ye la yɛatoto boane mɔɔ ɛnde kpɔkɛ la anwo ɛ? (b) Ninyɛne mɔɔ awie mɔɔ bɛdu ye la lɛ nwolɛ adenle yɛ nee moalɛ mɔɔ ɔbahola yeanyia la bie mɔ a le boni?

¹¹ Saa bɛtu Kilisienenli bie a, ɛnee yerayɛ kɛ boane ne mɔɔ ɛnde kpɔkɛ la. Ɔnde kpɔkɛ wɔ sunsum nu. (Gye. 5:14) Sunsum nu anwodolɛ le kɛ nwonane nu ewule bie mɔ la, ɔkola ɔsalo ndɛndɛ. Ɔti ɔdwu mekɛ ne bie a, ɔhyia kɛ bɛye ahenle mɔɔ ɛnde kpɔkɛ wɔ sunsum nu la bɛfi asafo ne anu. Ndeanlɛ ɛhye da ɛlɔlɛ mɔɔ Gyihova lɛ maa Ye mboane ne mɔɔ di nɔhalɛ la ali na bie a ɔbaha ɛtanevolɛ ne ahonle yeamaa yeanlu ɔ nwo. Saa bɛtɛdiele ahenle bɔbɔ a, ɔbahola yeara debiezukoalɛ, ɛleka mɔɔ ɔbanyia Baebolo nu ngilehilelɛ mɔɔ bamaa ye diedi ne anu amia la. Eza ɔbahola yealie mbuluku mɔɔ ɔbava yeayɛ ɔ ti anwo debiezukoalɛ la na yeanlea JW Broadcasting^® gyimalilɛ ne bie.  Saa mgbanyima ne mɔ nwu kɛ ɔlɛyɛ nzenzaleɛ a, ɔyɛ a bɛbadu ye folɛ mɔɔ baboa ye yeamaa yeaziezie ɔ nee Gyihova avinli la amaa bɛalie ye bieko kɛ Gyihova Dasevolɛ. *

12. Ɛlɔlɛ nee anwunvɔnezelɛ mɔɔ mgbanyima bahola ala ye ali ahile ɛtanevolɛ mɔɔ ɔtɛnunle ɔ nwo la a le boni?

¹² Ɔwɔ kɛ yɛkakye kɛ ɛtanevolɛma mɔɔ bɛnnu bɛ nwo la ala a bɛtu bɛ a. Mgbanyima ne mɔ ze kɛ ɔwɔ kɛ bɛdwenle edwɛkɛ ne anwo kpalɛ kolaa na bɛazi kpɔkɛ kɛ bɛtu awie. Bɛze kɛ Gyihova tea menli “kɛ mɔɔ ɔfɛta la.” (Gyɛ. 30:11) Bɛkulo bɛ mediema, ɔti bɛngulo kɛ bɛyɛ debie biala mɔɔ bazɛkye bɛ nee Gyihova agɔnwolɛvalɛ ne la. Noko, ɔdwu mekɛ ne bie a, debie mɔɔ kile ɛlɔlɛ nee anwunvɔnezelɛ la ala a le kɛ bɛbadu ɛtanevolɛ ne bɛavi asafo ne anu.

13. Duzu ati a ɛnee ɔwɔ kɛ bɛtu Kilisienenli bie mɔɔ wɔ Kɔlente la ɛ?

¹³ Suzu mɔɔ ɛzoanvolɛ Pɔɔlo yɛle wɔ ɛtanevolɛ bie mɔɔ annu ɔ nwo wɔ alimoa Kilisienema ne mekɛ zo anwo la anwo. Ɛnee Kilisienenli bie mɔɔ wɔ Kɔlente la ɛhɔva ye papa aye. Edwɛkɛ ɛzulolɛ boni ɛne! Ɛnee Gyihova ɛlimoa ɛha ɛhye anwo edwɛkɛ ɛhile Yizilayɛma kɛ: “Awie mɔɔ nee ye papa aye kɛla la ɛbɔ ye papa anyiemgba. Ɔwɔ kɛ bɛku bɛ mu nwiɔ.” (Lɛv. 20:11) Noko Pɔɔlo ɛnrɛhola ɛnrɛha kɛ bɛhu nrenyia ne. Ɔti ɔhanle ɔhilele Kɔlentema ne kɛ bɛdu ye. Ɛnee nrenyia zɔhane ɛbɛlatane ne ɛlɛka asafo ne anu amra bie mɔ, na ɛnee bie mɔ bɔbɔ ɛmbu ye ɛtane ne kɛ anyebolo wɔ nu!—1 Kɔl. 5:1, 2, 13.

14. Kɛzi Pɔɔlo zele nrenyia ne mɔɔ bɛdule ye wɔ Kɔlente la anwunvɔne ɛ, na duzu ati ɔ? (2 Kɔlentema 2:5-8, 11)

¹⁴ Nzinlii, Pɔɔlo dele kɛ kpavolɛ ne ɛhakyi ye subane bɔkɔɔ. Ɛnee ɛtanevolɛ ne ɛnlu ɔ nwo nɔhalɛ nu. Nrenyia ne guale asafo ne anwo evinli ɛdeɛ, noko Pɔɔlo hanle hilele mgbanyima ne mɔ kɛ ɔngulo kɛ ɔka nwolɛ “edwɛkɛ dɔɔnwo.” Ɔhanle ɔhilele bɛ kɛ: “Ɔwɔ kɛ bɛfa bɛkyɛ ye bɔkɔɔ na bɛkyekye ɔ rɛle.” Deɛmɔti Pɔɔlo hanle hilele bɛ kɛ bɛyɛ ye zɔ la a le kɛ: “Amaa nyanelilɛ somasoma ne ambo ɔ nwo zo.” Nrenyia ne mɔɔ ɛnlu ɔ nwo la anwo yɛle Pɔɔlo alɔbɔlɛ. Ɛnee ɛzoanvolɛ ne ɛngulo kɛ ɔbanwu kɛ nrenyia ne ɛlɛdi mɔɔ ɔyɛle la anwo alɔbɔlɛ too mɔɔ ɔbazi ye adenle kɛ ɔbakpondɛ ɛtane fakyɛ a.—Kenga 2 Kɔlentema 2:5-8, 11.

15. Kɛzi mgbanyima bahola adea ɛtanevolɛ bie kpalɛ na eza bɛaze ye anwunvɔne wɔ mekɛ ko ne ala ɛ?

¹⁵ Kɛmɔ mgbanyima ne mɔ sukoa Gyihova la ati, bɛ nye die nwo kɛ bɛbaze anwunvɔne. Saa  ɔhyia kɛ bɛtea ɛtanevolɛ bie kpalɛ a, bɛyɛ ye zɔ, yɛɛ saa bɛnwu kɛ bɛse ye anwunvɔne a ɔyɛ boɛ noko a, bɛyɛ ye zɔ. Saa mgbanyima ne mɔ andea ɛtanevolɛ ne fee a, ɔngile anwunvɔnezelɛ emomu ɔkile kɛ bɛkedɛheda ɛtane zo. Noko asoo asafo nu mgbanyima angomekye a ɔwɔ kɛ bɛse anwunvɔne a?

16. Kɛ mɔɔ Mrɛlɛbulɛ 21:13 kile la, duzu a Gyihova bava ayɛ bɛdabɛ mɔɔ bɛnze anwunvɔne la ɛ?

¹⁶ Kilisienema kɔsɔɔti bɔ mɔdenle kɛ bɛbazukoa Gyihova anwunvɔnezelɛ ne. Duzu ati ɔ? Debie ko a le kɛ Gyihova ɛnrɛdie bɛdabɛ mɔɔ bɛnze awie mɔ anwunvɔne la edwɛkɛ. (Kenga Mrɛlɛbulɛ 21:13.) Yɛ nuhua ko biala kulo kɛ Gyihova tie ye asɔneyɛlɛ, ɔti ɔwɔ kɛ yɛnea boɛ na yɛanyɛ atisesebɛ. Ɔnle kɛ yɛtuodua yɛ nzo wɔ yɛ diema Kilisienenli bie mɔɔ ɛlɛdi nyane la edwɛkɛ nwo, emomu ɔwɔ kɛ dahuu yɛsiezie yɛ nwo kɛ yɛbadie “koahweabane ɛzunlɛ.” Eza yɛbɔ mɔdenle kɛ yɛbava Baebolo nu folɛdulɛ ɛhye yɛali gyima: “Mɔɔ ɛnze anwunvɔne la, bɛnrɛze ye anwunvɔne wɔ ye ndɛnebualɛ nu.” (Gye. 2:13) Saa yɛbɛlɛ yɛ nwo aze na yɛkakye kɛzi ɔhyia kɛ bɛse yɛ anwunvɔne la a, ɔbamaa yɛdayɛ noko yɛaze anwunvɔne. Mekɛ mɔɔ ɛtanevolɛ bie mɔɔ ɛnlu ɔ nwo la ɛzia ɛra asafo ne anu la a yɛkulo kɛ yɛse anwunvɔne kpalɛ a.

17. Kɛzi Belemgbunli Devidi vile ye ahonle nu zele anwunvɔne ɛ?

¹⁷ Baebolo nu neazo bie mɔ bahola aboa yɛ amaa yɛaze anwunvɔne na yɛanyɛ kyengye. Dwenle Belemgbunli Devidi neazo ne anwo. Ɔvile ye ahonle nu ɔzele anwunvɔne fane dɔɔnwo. Ɛnee Sɔɔlo kulo kɛ ɔku ye, noko Devidi zele Nyamenle belemgbunli ne mɔɔ yekpokpa ye la anwunvɔne, yeanli ye nzenralɛ anzɛɛ yeanyɛ debie mɔɔ baboda ye la ɛlɛ.—1 Sa. 24:9-12, 18, 19.

18-19. Tɛnlabelɛ nwiɔ boni mɔ anu a Devidi anze anwunvɔne a?

¹⁸ Noko tɛ mekɛ ne amuala a Devidi zele anwunvɔne a. Kɛ neazo la, mɔɔ Neebale mɔɔ ye edwɛkɛ yɛ se la bɔle Devidi aholoba na yeammaa ɔ nee ye menli ne aleɛ la, Devidi vale ɛya na ɔzile kpɔkɛ kɛ ɔkahu nrenyia ne nee mrenyia mɔɔ wɔ ye sua nu la amuala. Noko Neebale aye Abegɛle mɔɔ lɛ abotane la yɛle tɛnlabelɛ ne anwo debie ndɛndɛ na yeammaa Devidi anli mogya nwo fɔlɛ.—1 Sa. 25:9-22, 32-35.

¹⁹ Mekɛ fofolɛ noko, ngapezonli Neetan hanle nrenyia sukoavolɛ bie mɔɔ wuale ehyianli bie mɔɔ de ye kpalɛzo la boane kokye mɔɔ ɔkulo ye la anwo edwɛkɛ hilele Devidi. Devidi vale ɛya na ɔhanle kɛ: “Mekɛ ala mɔɔ Gyihova de aze la, nrenyia ne mɔɔ yɛle ɛhye la fɛta ewule!” (2 Sa. 12:1-6) Ɛnee Devidi ze Mosisi Mɛla ne. Ɛnee saa awie wua boane a, ɔwɔ kɛ ɔfa nna ɔsie ɔ bo zo. (Ɛzɛ. 22:1) Noko asoo ɔwɔ kɛ bɛku ye? Ɛhye anloa yɛ se somaa. Noko ɛnee Neetan ɛlɛyɛ ndonwo bie mɔɔ baboa Devidi amaa yeade ɛtane mgbole mɔɔ ɔdaye mumua ne yeyɛ la abo la! Na Gyihova zele Devidi anwunvɔne kpole dɛlale kɛzi anrɛɛ Devidi baze ahenle mɔɔ wuale boane ne mɔɔ wɔ Neetan ndonwo ne anu anwunvɔne la!—2 Sa. 12:7-13.

20. Duzu a yɛbahola yɛazukoa yɛavi Devidi neazo ne anu a?

 ²⁰ Yɛ ye nzonlɛ kɛ, mɔɔ Devidi vale ɛya la, ɔbuale Neebale nee mrenyia mɔɔ wɔ ye sua nu la amuala ndɛne kɛ bɛfɛta ewule. Nzinlii, Devidi hanle kɛ ɔwɔ kɛ bɛku sukoavolɛ ne mɔɔ wɔ Neetan ndonwo ne anu la. Wɔ tɛnlabelɛ mɔɔ tɔ zo nwiɔ la anu, bie a yɛnrɛnwu deɛmɔti nrenyia ɛhye mɔɔ ɔ ti akunlu le kɛnlɛma la anze anwunvɔne wɔ ye ndɛnebualɛ nu la. Dwenle mɔɔ ɛnee ɛzi la anwo. Zɔhane mekɛ ne, ɛnee Devidi adwenle ɛlɛbua ye fɔlɛ. Saa awie nee Gyihova avinli agɔnwolɛvalɛ ne ɛnle kpalɛ a, ɔmaa ɔyɛ kyengye wɔ ye ndɛnebualɛ nu. Gyisɛse bɔle ye ɛdoavolɛma kɔkɔ ɛsesebɛ kɛ: “Bɛgyakyi ndɛnebualɛ na bɛambua bɛ ndɛne; ɔluakɛ ndɛne mɔɔ bɛbabua awie mɔ la yɛɛ bɛbava bɛabua bɛ a.” (Mat. 7:1, 2) Ɔti bɛmmamaa yɛyɛ kyengye, emomu bɛmaa yɛyɛ kɛ yɛ Nyamenle ne mɔɔ ye “anwunvɔnezelɛ ne zonle” la.

21-22. Ndenle boni mɔ a yɛbahola yɛalua zo yɛaze anwunvɔne a?

²¹ Anwunvɔnezelɛ ɛnle nganeɛdelɛ ala. Menli mɔɔ se anwunvɔne la “yɛ ninyɛne boa awie mɔ.” Ɔti yɛ muala yɛbanlea kɛ yɛbanwu menli mɔɔ wɔ yɛ abusua ne anu, yɛ asafo ne anu yɛɛ ɛleka mɔɔ yɛde mɔɔ bɛhyia moalɛ la. Yɛbanwu ndenle dɔɔnwo mɔɔ yɛbalua zo yɛaze menli anwunvɔne a! Awie hyia arɛlekyekyelɛ ɔ? Yɛbahola yɛaboa ye, bie a yɛamaa ye aleɛ anzɛɛ yɛayɛ ninyɛne gyɛne yɛamaa ye ɔ? Kilisienenli bie mɔɔ bɛlie ye bieko wɔ asafo ne anu la bahyia agɔnwolɛ kpalɛ mɔɔ bamaa ye anwosesebɛ ɔ? Yɛbahola yɛaha edwɛkpa ne mɔɔ kyekye menli rɛle la yɛahile awie mɔ ɔ? Ɛhye le adenle kpalɛ ko mɔɔ yɛdua zo yɛse awie biala mɔɔ yɛbayia ye la anwunvɔne a.—Dwobu 29:12, 13; Wlo. 10:14, 15; Gye. 1:27.

²² Saa yɛze kɛ awie mɔ hyia moalɛ zɛhae a, yɛbanwu kɛ ndenle dɔɔnwo wɔ ɛkɛ mɔɔ yɛbahola yɛalua zo yɛaze awie mɔ anwunvɔne a. Saa yɛse anwunvɔne a, yɛbamaa yɛ anwuma Selɛ ne, Nyamenle ne mɔɔ ye “anwunvɔnezelɛ ne zonle” la anye alie kpalɛ!