1-2. Ngakyile boni a ɛnee wɔ arelemgbunli nwiɔ bie avinli a, na kpuya boni mɔ a yɛbazuzu nwo a?

MAA yɛzuzu arelemgbunli nwiɔ bie mɔɔ dɛnlanle aze wɔ tete ne la anwo. Ko lile tumi wɔ Yizilayɛ mbusua bulu belemgbunlililɛ ne azo; yɛɛ ko noko lile tumi wɔ Dwuda mbusua nwiɔ belemgbunlililɛ ne azo. Bɛandɛnla aze wɔ mekɛ ko ne ala anu, noko bɛbɔle ɛbɛla ko ne ala. Bɛ mu nwiɔ bɛdele Gyihova anwo atua na bɛmaanle ye menli ne yɛle ɛtane. Bɛzonlenle awozonle yɛɛ bɛhunle menli. Noko ɛnee ngakyile wɔ menli nwiɔ ɛhye avinli. Nuhua ko yɛle ninyɛndane too hɔle ewule nu, noko ko ne nlunle ɔ nwo na bɛvale ɛtane mgbole mɔɔ ɔyɛle la bɛhyɛle ye. Nwane mɔ ɔ?

² Bɛmɛ a le Yizilayɛ Belemgbunli Ehabe yɛɛ Dwuda Belemgbunli Manasɛ. Ngakyile mɔɔ wɔ mrenyia nwiɔ ɛhye mɔ avinli la bahola amaa yɛazukoa debie mɔɔ anwo hyia la—anlubɛnwo. (Gyi. 17:30; Wlo. 3:23) Duzu a le anlubɛnwo na kɛ ɔkɛyɛ na yɛahile kɛ yɛnlu yɛ nwo ɛ? Ɔhyia kɛ yɛnwu ye, ɔluakɛ saa yɛyɛ ɛtane a yɛkulo kɛ Gyihova fa kyɛ yɛ. Amaa yɛanwu kpuya ɛhye mɔ mualɛ ne la, yɛbazuzu arelemgbunli nwiɔ ɛhye mɔ anwo na yɛanwu mɔɔ yɛbahola yɛazukoa yɛavi bɛ neazo ne anu la. Eza yɛbazuzu mɔɔ Gyisɛse hilehilele wɔ anlubɛnwo nwo la anwo.

3. Nwane a le Ehabe?

³ Ehabe le Yizilayɛ mbusua bulu belemgbunlililɛ ne azo belemgbunli mɔɔ tɔ zo nsuu. Ɔgyale Saedɛn, maanle bie mɔɔ lɛ ezukoa mɔɔ wɔ Yizilayɛ sɔlɔ la belemgbunli ne ara raalɛ Gyɛzɛbɛle. Ɔbayɛ kɛ Gyɛzɛbɛle mɔɔ ɔgyale ye la maanle Yizilayɛ  maanle ne nyianle bɛ nwo. Noko ɔzɛkyele agɔnwolɛvalɛ mɔɔ wɔ maanle ne nee Gyihova avinli la. Ɛnee Gyɛzɛbɛle sonle Beeyale, na ɔmaanle Ehabe zile zɔhane ɛzonlenlɛ ne mɔɔ ɛnle kpalɛ fee mɔɔ ɛzonlenlɛsua nu tuutuubɔlɛ nee ngakula mɔɔ bɛfa bɛbɔ afɔle boka nwo la adua. Mɔɔ Gyɛzɛbɛle le ɔbahyema la, ɛnee Gyihova ngapezonli biala ngoane la esiane nu. Ɔmaanle bɛhunle bɛ nuhua dɔɔnwo. (1 Arl. 18:13) Ehabe mumua ne “yɛle ɛtane kpole wɔ Gyihova anye zo dɛlale bɛdabɛ mɔɔ bɛlimoale ɔ nyunlu la amuala.” (1 Arl. 16:30) Gyihova nwunle mɔɔ ɛnee Ehabe nee Gyɛzɛbɛle ɛlɛyɛ la amuala. Gyihova zele Ye menli ne anwunvɔne, ɔti ɔzoanle ngapezonli Yilaegya kɛ ɔhɔbɔ bɛ kɔkɔ kɛ bɛhakyi bɛ subane kolaa na yeaha amozi. Noko Ehabe nee Gyɛzɛbɛle andie.

4. Anzohwenlɛ boni a Gyihova hanle kɛ ɔbava yeara Ehabe anwo zo a, na kɛzi ɔyɛle ye nyɛleɛ ɛ?

⁴ Akee Gyihova annyia ɔ nwo abotane bieko. Ɔzoanle Yilaegya kɛ ɔhɔha ɔhile Ehabe nee Gyɛzɛbɛle kɛ ɔbahwe bɛ nzo. Ɛnee bɛbahu bɛ abusua ne anu amra amuala. Yilaegya edwɛkɛ ne maanle Ehabe anwo bubule ye! Mɔɔ yɛ azibɛnwo la a le kɛ, nrenyia ɛhye mɔɔ memaa ɔ nwo zo la ‘bɛlɛle ɔ nwo aze.’—1 Arl. 21:19-29.

5-6. Duzu a kile kɛ ɛnee Ehabe ɛtɛnunle ɔ nwo nɔhalɛ nu a?

⁵ Ehabe bɛlɛle ɔ nwo aze wɔ zɔhane mekɛ ne ɛdeɛ, noko subane mɔɔ ɔlale ye ali nzinlii la ɛngile kɛ ɔnlunle ɔ nwo nɔhalɛ nu. Yeambɔ mɔdenle kɛ ɔtu Beeyale ɛzonlenlɛ bo yeavi ye belemgbunlililɛ ne anu. Yɛɛ yeammaa menli ne anwosesebɛ kɛ bɛzonle Gyihova. Ninyɛne gyɛne mɔɔ Ehabe yɛle la noko hilele kɛ yeannu ɔ nwo.

⁶ Nzinlii mɔɔ Ehabe hanle kɛ Dwuda Belemgbunli Gyɛhɔhyafate mɔɔ le sonlakpalɛ la ɛhɔboa ye ɔmaa bɛho bɛtia Seleama la, Gyɛhɔhyafate hanle kɛ ɔmaa bɛlimoa bɛhɔbiza Gyihova ngapezonli bie nwolɛ edwɛkɛ. Alimoa ne, Ehabe anlie ando nu na ɔhanle kɛ: “Sonla ko tɛbɔ ɛkɛ mɔɔ yɛbahola yɛalua ɔ nwo zo yɛabiza Gyihova a; noko mekpɔ ye, ɔluakɛ ɔnga ngapezo kpalɛ ɔnvale me nwo ɛlɛ, kɛ ɛtane ngome ala.” Noko bɛhɔbizale ngapezonli Maekaya. Kɛ mɔɔ Ehabe hanle la, Nyamenle sonla ne anga ɔ nwo edwɛkɛ kpalɛ! Kɛ anrɛɛ Ehabe atisesebɛ banlu ɔ nwo na yeazɛlɛ Gyihova ɛkɛ ne ɛtane fakyɛ la, yeanyɛ, emomu ɔmaanle bɛhyele ngapezonli ne bɛdole efiade. (1 Arl. 22:7-9, 23, 27) Belemgbunli ne holale dole Gyihova ngapezonli ne efiade ɛdeɛ, noko yeangola yeanzi ngapezo ne adenle kɛ ɔbara nu. Ehabe hɔle konle ne na bɛhunle ye.—1 Arl. 22:34-38.

7. Mɔɔ Ehabe wule la, duzu a Gyihova hanle wɔ ɔ nwo a?

⁷ Mɔɔ Ehabe wule la, Gyihova maanle bɛnwunle adwenle mɔɔ ɔlɛ wɔ nrenyia zɔhane anwo la. Mɔɔ Gyɛhɔhyafate mɔɔ le sonlakpalɛ la rale sua nu anzodwolɛ nu la, Gyihova zoanle ngapezonli Gyihu ɔmaanle ɔhɔhwile ɔ nyunlu kɛ ɔvale ɔ nwo ɔbɔle Ehabe la. Gyihova ngapezonli ne hanle kɛ: “Asoo amumuyɛma a ɔwɔ kɛ ɛboa bɛ a, yɛɛ menli mɔɔ kpɔ Gyihova la a ɔwɔ kɛ ɛkulo bɛ ɔ?” (2 Ek. 19:1, 2) Wɔmɔ nea o: Saa Ehabe nlunle ɔ nwo nɔhalɛ nu a, anrɛɛ ngapezonli ne ɛnrɛha kɛ ɔle amumuyɛnli mɔɔ kpɔ Gyihova. Ɔda ali wienyi kɛ, Ehabe lile nyane ekyi wɔ mɔɔ ɔyɛle la anwo ɛdeɛ, noko yeanlu ɔ nwo bɔkɔɔ.

8. Anlubɛnwo nwo debie boni a yɛsukoa yɛfi Ehabe neazo ne anu a?

⁸ Duzu a yɛsukoa yɛfi Ehabe neazo ne anu a? Mɔɔ Yilaegya hanle hilele Ehabe kɛ bɛbahwe ye abusua ne anzo la, ɛkɛ ne ala ɔbɛlɛle ɔ nwo aze. Ɔbɔle ɔ bo kɛnlɛma. Noko subane mɔɔ ɔlale ye ali nzinlii la hilele kɛ ɛnee ɔtɛnunle ɔ nwo wɔ ye ahonle nu. Ɔti saa yɛyɛ debie na yɛdie yɛto nu kɛ yɛanyɛ ye boɛ a, yemɔ angomekye ɛngile kɛ yɛnlu yɛ nwo. Maa yɛzuzu neazo bieko mɔɔ  baboa yɛ yeamaa yɛade mɔɔ nɔhalɛ anlubɛnwo kile abo la anwo.

9. Duzu a Belemgbunli Manasɛ yɛle a?

⁹ Kɛyɛ ɛvolɛ ɛya nwiɔ anzi, Manasɛ rayɛle Dwuda belemgbunli. Ɔbayɛ kɛ ɛnee Ehabe bɔbɔ le kpalɛ tɛla ye! Baebolo ne ka kɛ: “Ɔyɛle ɛtane kpole wɔ Gyihova anye zo ɔvale ɔhanle ye ɛya.” (2 Ek. 33:1-9) Manasɛ sisile afɔlemokyea maanle adalɛ nyamenle ne mɔ na ɔzele ɛzonlenlɛ baka bɔbɔ—ɔbayɛ kɛ ɔle nla ɛzonlenlɛ sɛkɛlɛneɛ—ɔziele Gyihova ɛzonlenlɛsua nwuanzanwuanza ne anu! Ɔyele ngonyia, ɔbizale debie yɛɛ ɔhɔle silikyevoma ɛkɛ. “Eza Manasɛ hanle menli mɔɔ ɛnze nwolɛ bie la mogya dɔɔnwo kpalɛ guale.” Kodiawu ɛbɛla mɔɔ ɔbɔle la bie a le kɛ, “ɔmaanle ɔdaye mumua ne ɔ mra vale senle nu,” ɔvale ɔbɔle afɔle ɔmaanle adalɛ nyamenle ne mɔ.—2 Arl. 21:6, 7, 10, 11, 16.

10. Kɛzi Gyihova deanle Manasɛ ɛ, na duzu a belemgbunli ne yɛle ye wɔ nwolɛ a?

¹⁰ Manasɛ yɛle kɛ Ehabe la, yeandie kɔkɔbɔlɛ mɔɔ Gyihova luale Ye ngapezoma ne anwo zo vale maanle ye la. Akee “Gyihova maanle Aselea belemgbunli ne ɛlɔne mgbanyima rale bɛ nwo zo, na bɛbobɔle Manasɛ koba na bɛvale kɔbele kyeenyi nwiɔ bɛguale ye na bɛvale ye bɛhɔle Babelɔn.” Mɔɔ Manasɛ la efiade wɔ Babelɔn la, ɔbayɛ kɛ ɔdwenlenle mɔɔ ɔyɛle la anwo kpalɛ. “Ɔhɔle zo ɔbɛlɛle ɔ nwo aze kpalɛ wɔ ye nenyia mɔ Nyamenle ne anyunlu.” Ɔyɛle dɔɔnwo bɔbɔ ɔbokale nwo. “Ɔzɛlɛle Gyihova ye Nyamenle ne kɛ ɔmaa ɔnyia ɔ nyunlu ɛlolɛ.” Nɔhalɛ nu, Manasɛ ‘hɔle zo zɛlɛle Nyamenle.’ Ɛnee nrenyia amumuyɛnli ɛhye ɛlɛkakyi. Ɔbɔle ɔ bo ɔnwunle Gyihova kɛ “ye Nyamenle” na ɔhɔle zo ɔzɛlɛle ye.—2 Ek. 33:10-13.

11. Kɛ mɔɔ 2 Edwɛkɛsisilɛ 33:15, 16 kile la, kɛzi Manasɛ hilele kɛ ɛnee yenlu ɔ nwo nɔhalɛ nu ɛ?

¹¹ Nzinlii, Gyihova buale Manasɛ asɔneyɛlɛ ne. Ɔnwunle ye wɔ Manasɛ asɔneyɛlɛ ne anu kɛ yehakyi. Gyihova diele Manasɛ modolɛ ne na ɔmaanle ɔziale ɔhɔlile belemgbunli. Manasɛ yɛle biala mɔɔ ɔbahola la ɔhilele kɛ yenlu ɔ nwo nɔhalɛ nu. Ɔyɛle debie mɔɔ Ehabe anyɛ bie ɛlɛ la. Ɔhakyile ye subane. Ɔhonle ɔtiale adalɛ ɛzonlenlɛ na ɔmaanle menli anwosesebɛ kɛ bɛzonle Gyihova. (Kenga 2 Edwɛkɛsisilɛ 33:15, 16.) Ɛnee Manasɛ hyia akɛnrasesebɛ nee diedi na yeahola yeayɛ ɛhye, ɔluakɛ ɔyɛle neazo ɛtane ɔmaanle ye abusua ne, ye mgbanyima ne mɔ yɛɛ menli ne wɔ ɛvolɛ dɔɔnwo anu. Noko mɔɔ Manasɛ yɛle kpanyinli la, ɔbɔle mɔdenle kɛ ɔdi ngyegyelɛ mɔɔ ɔvale ɔrale la bie mɔ anwo gyima. Ɔbayɛ kɛ mɔɔ Manasɛ yɛle la boale ye anlɔnra Dwosaya mɔɔ nzinlii ɔrayɛle belemgbunli kpalɛ la.—2 Arl. 22:1, 2.

12. Anlubɛnwo nwo debie boni a yɛsukoa yɛfi Manasɛ neazo ne anu a?

¹² Duzu a yɛsukoa yɛfi Manasɛ neazo ne anu a? Ɔbɛlɛle ɔ nwo aze na ɔyɛle ninyɛne  dɔɔnwo ɔbokale nwo. Ɔyɛle asɔne ɔzɛlɛle Gyihova kɛ ɔze ye anwunvɔne. Yɛɛ ɔhakyile ye subane. Ɔbɔle mɔdenle ɛsesebɛ kɛ ɔbali ngyegyelɛ mɔɔ yeva yera la anwo gyima, ɔmianle ɔ nwo ɔzonlenle Gyihova yɛɛ ɔboale awie mɔ noko ɔmaanle bɛyɛle zɔ. Manasɛ neazo ne maa menli mɔɔ yɛ ɛtane mgbole kpalɛ bɔbɔ la nyia anyelazo. Ɛhye le daselɛ kpalɛ mɔɔ kile kɛ Gyihova Nyamenle ‘le kpalɛ yɛɛ ɔlɛ ɛhulolɛ kɛ ɔbava ɛtane yeahyɛ.’ (Edw. 86:5) Bɛbahola bɛava bɛdabɛ mɔɔ bɛnlu bɛ nwo nɔhalɛ nu la ɛtane bɛahyɛ bɛ.

13. Ndonwo boni a boa yɛ ɔmaa yɛte ɛzukoalɛdeɛ mɔɔ wɔ anlubɛnwo nu la abo kpalɛ a?

¹³ Manasɛ anli ye ɛtane ne anwo nyane ala, ɔyɛle ninyɛne dɔɔnwo ɔbokale nwo. Ɛhye maa yɛnwu anlubɛnwo nwo ɛzukoalɛdeɛ mɔɔ hyia kpalɛ la. Fa ye kɛ wɔhɔ ɛleka mɔɔ bɛtɔne paano la kɛ ɛkadɔ bie. Noko ahenle mɔɔ tɔne ye la ammaa wɔ paano, emomu ɔmaanle wɔ esamo kɔpo ko. Ɛbalie ɔ? Kyɛkyɛ! Na saa ahenle mɔɔ tɔne paano ne la kilehile nuhua kile wɔ kɛ, paano mumua ne esamo a le debie titili mɔɔ bɛfa bɛyɛ noko ɛ? Asoo ɛbalie ɔ? Kyɛkyɛ! Zɔhane ala a saa awie yɛ ɛtane a, Gyihova kulo kɛ ɔnu ɔ nwo nɔhalɛ nu a. Saa ɛtanevolɛ ne di ye ɛtane ne anwo nyane a, ɔle kpalɛ. Ɛtane mɔɔ bɛdi nwolɛ nyane la hyia kpalɛ amaa awie ahile kɛ yenlu ɔ nwo, noko tɛ ɔ muala ala ɛne. Duzu bieko a ɔhyia kɛ ɔyɛ a? Yɛbanwu nwolɛ edwɛkɛ dɔɔnwo wɔ ndonwo kɛnlɛma bie mɔɔ Gyisɛse yɛle la anu.

14. Wɔ Gyisɛse ndonwo ne anu, duzu a kakula ɛkobɔfo ne limoale yɛle hilele kɛ yenlu ɔ nwo a?

¹⁴ Gyisɛse yɛle kakula ɛkobɔfo bie anwo ndonwo mɔɔ ka ahonle la. Bɛhɛlɛ ye wɔ Luku 15:11-32. Kpavolɛ bie dele ye papa anwo atua, ɔvile sua nu na ɔdule adenle “ɔhɔle maanle bie mɔɔ wɔ moamoa la azo.” Ɔhɔle la, ɔbɔle ɛbɛla mgbane mgbane. Noko mɔɔ ɔ nwo hyelele ye la, ɔdwenlenle mɔɔ yeyɛ la anwo kpalɛ. Ɔhakyele kɛ mɔɔ ɛnee ɔde ye papa sua nu ɛkɛ ne la, ɛnee ɔ nwo tɔ ye. Gyisɛse hanle kɛ kpavolɛ ne anye “rale ɔ nwo zo.” Ɔzile kpɔkɛ kɛ ɔsia yeahɔ sua nu na yeazɛlɛ ye papa kɛ ɔva ye ɛtane ɔhyɛ ye. Ɔle kpalɛ kɛ kpavolɛ ne nwunle kɛ yeanzi kpɔkɛ mɔɔ nrɛlɛbɛ wɔ nu la. Noko asoo yemɔ ala a hyia a? Kyɛkyɛ. Ɛnee ɔwɔ kɛ ɔyɛ nwolɛ debie!

15. Kɛzi kakula ɛkobɔfo ne mɔɔ wɔ Gyisɛse ndonwo ne anu la hilele kɛ yenlu ɔ nwo nɔhalɛ nu ɛ?

¹⁵ Kakula ɛkobɔfo ne hilele kɛ yenlu ɔ nwo nɔhalɛ nu wɔ mɔɔ ɔyɛle la anwo. Ɔpɛle adenle tendenle ɔziale ɔhɔle sua nu. Mɔɔ ɔdwule ye papa anwo ɛkɛ ne la ɔhanle kɛ: “Meyɛ ɛtane metia Nyamenle nee ɛdawɔ. Menfɛta kɛ ɛkɛvɛlɛ me ɛ ra bieko.” (Luku 15:21) Kɛmɔ kpavolɛ ne vile ye ahonle nu hanle ɛtane mɔɔ yeyɛ la ati, ɔda ali kɛ ɛnee ɔkulo kɛ ɔsiezie ɔ nee Gyihova avinli agɔnwolɛvalɛ ne. Eza ɔnwunle kɛ ye nyɛleɛ ne gyegyele ye papa. Na ɛnee yeziezie ɔ nwo kɛ ɔbayɛ biala mɔɔ ɔbahola la amaa  yeanyia ye papa anyunlu ɛlolɛ, saa ɔwɔ kɛ ɔyɛ ye papa ɛkpafoma ne anu ko bɔbɔ a ɔbayɛ! (Luku 15:19) Ndonwo ɛhye ɛnle edwɛkɛ mɔɔ ka ahonle ala. Ngyinlazo mɔɔ wɔ nu la baboa asafo nu mgbanyima yeamaa bɛanwu ye saa bɛ diema diedinli bie mɔɔ yɛle ɛtane kpole la ɛnlu ɔ nwo nɔhalɛ nu a.

16. Duzu ati a ɔbahola yeayɛ se yeamaa asafo nu mgbanyima kɛ bɛbanwu ye saa awie ɛnlu ɔ nwo nɔhalɛ nu a?

¹⁶ Ɔnla aze ɔmmaa asafo nu mgbanyima kɛ bɛbanwu kɛ awie mɔɔ yɛle ɛtane kpole bie la ɛnlu ɔ nwo nɔhalɛ nu. Duzu ati ɔ? Mgbanyima ne mɔ ɛngola ɛnnwu ahonle nu, ɔti ɔwɔ kɛ bɛgyinla mɔɔ bɛnwu ye la azo bɛnea kɛ amgba bɛ diema ne ɛhakyi ye adwenle wɔ ɛtane mɔɔ ɔyɛle la anwo. Ɔdwu mekɛ ne bie a, awie bayɛ ɛtane kpole kpalɛ, ɔti bie a mgbanyima mɔɔ nee ye bayia la ɛnrɛlie ɛnrɛli kɛ yenlu ɔ nwo nɔhalɛ nu.

17. (a) Neazo boni a kile kɛ saa awie di nyane wɔ ɛtane mɔɔ yeyɛ la anwo a, yemɔ angomekye ɛngile kɛ yenlu ɔ nwo nɔhalɛ nu a? (b) Kɛ mɔɔ 2 Kɔlentema 7:11 kile la, duzu a ɔwɔ kɛ awie mɔɔ ɛnlu ɔ nwo nɔhalɛ nu la yɛ a?

¹⁷ Kɛ neazo la, adiema nrenyia bie ɛzɛkye agyalɛ fane dɔɔnwo wɔ ɛvolɛ dɔɔnwo anu. Yeanga yeammaa bɛamboa ye, emomu ɔvale ɔveale ɔ ye, ɔ gɔnwo mɔ yɛɛ mgbanyima ne mɔ. Nzinlii, ɔ nwo lale ali. Mɔɔ mgbanyima ne mɔ bizale ye la, ɔliele ɔdole nu kɛ ɔyɛle ye zɔ na ɔzɔho kɛ ɔlɛdi nwolɛ nyane bɔbɔ. Asoo ɛhye kile kɛ yenlu ɔ? Kyɛkyɛ. Ɔwɔ kɛ mgbanyima mɔɔ ɛlɛdi edwɛkɛ ɛhye la nea kɛ bɛbanwu dɔɔnwo bɛadɛla nyane mɔɔ ɔlɛdi la. Tɛ kɛ nrenyia ɛhye anzi kpɔkɛ kpalɛ la ati a ɔyɛle ɛtane ko bie a, emomu yeyɛ ɛtane kpole ɛhye fane dɔɔnwo wɔ ɛvolɛ dɔɔnwo anu. Tɛ ɔdaye mumua ne a ɔhɔhanle ye ɛtane ne a, ɔ nwo a lale ali a. Ɔti ɔwɔ kɛ mgbanyima ne mɔ nwu daselɛ mɔɔ kile kɛ ɛtanevolɛ ne ɛhakyi ye nzuzulɛ, kɛzi ɔte nganeɛ wɔ ɛtane ne anwo nee ye nyɛleɛ bɔkɔɔ la. (Kenga 2 Kɔlentema 7:11.) Bie a ɔbalie mekɛ tendenle na nrenyia ne ahola ayɛ nzenzaleɛ mɔɔ fɛta la. Fane dɔɔnwo ne ala, bɛbadu sonla zɛhae bɛavi asafo ne anu.—1 Kɔl. 5:11-13; 6:9, 10.

18. Kɛ ɔkɛyɛ na awie mɔɔ bɛdu ye la ahile kɛ yenlu ɔ nwo nɔhalɛ nu ɛ, na duzu a bavi nu ara a?

¹⁸ Amaa awie mɔɔ bɛdu ye la ahile kɛ yenlu ɔ nwo nɔhalɛ nu la, ɔwɔ kɛ ɔba debiezukoalɛ dahuu na ɔdi folɛ mɔɔ mgbanyima ne mɔ dule ye kɛ ɔyɛ asɔne na ɔzukoa debie dahuu la azo. Eza ɔwɔ kɛ ɔbɔ mɔdenle kɛ ɔbahwe ɔ nwo yeavi ninyɛne mɔɔ maanle ɔyɛle ɛtane ne la anwo. Saa ɔbɔ mɔdenle ɔsiezie ɔ nee Gyihova avinli a, ɔbahola yeanyia anwodozo kɛ Gyihova bava ye ɛtane ne ahyɛ ye bɔkɔɔ yɛɛ mgbanyima ne mɔ balie ye bieko wɔ asafo ne anu. Nɔhalɛ nu, saa mgbanyima ne mɔ ɛlɛdi ɛtanevolɛ bie edwɛkɛ a, bɛze kɛ asolo kɛzi edwɛkɛ biala de la, ɔti bɛneɛnlea nuhua kpalɛ na bɛmpele bɛ nwo bɛmbua ndɛne.

19. Duzu a kile kɛ awie ɛnlu ɔ nwo nɔhalɛ nu a? (Yizikeɛle 33:14-16)

 ¹⁹ Kɛ mɔɔ yɛlimoa yɛnwu ye la, saa awie di nyane wɔ ɛtane bie mɔɔ yeyɛ la anwo a, yemɔ angomekye ɛngile kɛ yenlu ɔ nwo nɔhalɛ nu. Emomu eza ɔwɔ kɛ ɔkakyi ye adwenle nee ye nyɛleɛ na ɔyɛ ninyɛne mɔɔ kile kɛ amgba yenlu ɔ nwo la. Ɔwɔ kɛ ɔgyakyi ninyɛndane mɔɔ ɔyɛ la na ɔfa Gyihova ngyinlazo ne mɔ ɔbɔ ye ɛbɛla. (Kenga Yizikeɛle 33:14-16.) Debie mɔɔ ɔwɔ kɛ ɛtanevolɛ ne maa ɔkyia ye kpalɛ la a le kɛ ɔbaziezie ɔ nee Gyihova avinli.

20-21. Kɛ ɔkɛyɛ na yɛaboa awie mɔɔ ɛyɛ ɛtane kpole la ɛ?

²⁰ Gyisɛse hanle debie mɔɔ anwo hyia kpalɛ wɔ ye ɛzonlenlɛ gyima ne anu la anwo edwɛkɛ kɛ: “Membale kɛ mebavɛlɛ ɛtanevolɛma meamaa bɛanlu bɛ nwo.” (Luku 5:32) Zɔhane ɛhulolɛ ne bie a ɔwɔ kɛ yɛdayɛ noko yɛnyia a. Fa ye kɛ yɛnwu kɛ yɛ gɔnwo kpalɛ bie ɛyɛ ɛtane kpole bie. Duzu a ɔwɔ kɛ yɛyɛ a?

²¹ Saa yɛbɔ mɔdenle kɛ yɛkedɛheda yɛ gɔnwo ne ɛtane ne azo a, ɛnee yɛlɛboda ye. Yɛnrɛhola yɛnrɛva ɛtane ne yɛnrɛvea bɔkɔɔ, ɔluakɛ Gyihova ɛnwu ye. (Mrɛ. 5:21, 22; 28:13) Saa ɛmaa ɛ gɔnwo ne nwu kɛ mgbanyima ne mɔ kulo kɛ bɛboa ye a, yemɔ baboa ye. Saa ɛ gɔnwo ne anga angile mgbanyima ne mɔ a, ɔwɔ kɛ ɛka ɛkile bɛ amaa wɔahile kɛ amgba ɛkulo kɛ ɛboa ye. Saa wɔanyɛ ye zɔ a, ɔbahola yeamaa ɔ nee Gyihova agɔnwolɛvalɛ ne azɛkye!

22. Duzu a yɛbazuzu nwo wɔ edwɛkɛ bieko anu a?

²² Na saa ɛtanevolɛ bie ɛyɛ ɛtane kpole wɔ ɛvolɛ dɔɔnwo anu, na mgbanyima ne mɔ si kpɔkɛ kɛ ɔwɔ kɛ bɛtu ye noko ɛ? Asoo ɛhye kile kɛ bɛanze ye anwunvɔne ɔ? Wɔ edwɛkɛ bieko anu, yɛbazuzu kɛzi Gyihova ɛlɛtea ɛtanevolɛma a ɔse bɛ anwunvɔne nee kɛzi yɛbahola yɛazukoa ye la anwo.