Tɛ edwɛkɛ mɔɔ wɔ Ditilɔnomi 22:25-27 la bodane titili a le kɛ ɔmaa bɛanwu deɛmɔti nrenyia ne di fɔlɛ la, ɔluakɛ wɔ tɛnlabelɛ ɛhye anu nrenyia ne di fɔlɛ dɛba. Ɛnee mɛla ɛhye ɛlɛmaa yeala ali kɛ raalɛ ne ɛnze nwolɛ bie. Yɛ edwɛkɛ mɔɔ boka nwo la nzonlɛ.

Ngyehyɛnu 23 nee 24 hanle nrenyia bie mɔɔ ɔ nee raalɛ mɔɔ nrenyia gyɛne ɛva ɔ nloa ɛdo ɔ nwo zo lale wɔ “suakpole ne azo” la anwo edwɛkɛ. Ɛhye maanle nrenyia ne zɛkyele agyalɛ, ɔluakɛ bɛbu raalɛ ne kɛ bɛgya ye. Na raalɛ ne noko ɛ? “Yeandeɛdea nu wɔ suakpole ne azo.” Saa ɔdeɛdeanle nu a, anrɛɛ menli bade ɔ ne na bɛaboa ye. Noko yeandeɛdea nu. Yemɔti, ɔboka nwo a bɛzɛkyele agyalɛ a, ɔti bɛ mu nwiɔ bɛdi fɔlɛ.​—Dit. 22:23, 24.

Mɛla ne eza hanle tɛnlabelɛ gyɛne nwo edwɛkɛ kɛ: “Noko akee, saa nrenyia ne nee bɛlɛra ne mɔɔ bɛva bɛ nloa bɛdo ɔ nwo zo la yiale wɔ kpɔkɛ nu yɛɛ ɔhyele ye mialeranu ɔ nee ye lale a, ɔwɔ kɛ nrenyia ne mɔɔ nee ye lale la angomekye wu, na ɔnle kɛ bɛyɛ bɛlɛra ne ɛhwee. Bɛlɛra ne ɛtɛyɛle ɛtane mɔɔ fɛta ewule a. Edwɛkɛ ɛhye le kɛ nrenyia mɔɔ ɛholo ɔ gɔnwo nrenyia anwo zo ɛhu ye la. Ɔluakɛ ɔyiale ye wɔ kpɔkɛ nu, yɛɛ bɛlɛra ne mɔɔ bɛva bɛ nloa bɛdo ɔ nwo zo la deɛdeanle nu noko ɛnee awie ɛnle ɛkɛ mɔɔ ɔdie ye a.”​—Dit. 22:25-27.

Ɛhye ati, ndɛnebuavolɛma ne die raalɛ ne di. Duzu ati ɔ? Ɔluakɛ bɛfa ye kɛ bɛlɛra ne “deɛdeanle nu noko ɛnee awie ɛnle ɛkɛ mɔɔ ɔdie ye a.” Yemɔti yeanzɛkye agyalɛ. Noko nrenyia ne ɛzɛkye agyalɛ, ɔluakɛ “ɔhyele [bɛlɛra ne] mialeranu ɔ nee ye lale.”

Yemɔti ɛnee Mɛla ne ɛlɛkile nu kɛ raalɛ ne ɛnze nwolɛ bie, yɛɛ eza ɔhilele nu kɛ nrenyia ne di fɔlɛ, ɔluakɛ ɔhyele bɛlɛra ne mialeranu ɔ nee ye lale yɛɛ ɔzɛkyele agyalɛ. Yɛbahola yɛanyia anwodozo kɛ ndɛnebuavolɛma ne “bɛanleɛnlea edwɛkɛ ne anu kpalɛ” na bɛazi kpɔkɛ mɔɔ nee Nyamenle mɛla ne yia la.​—Dit. 13:14; 17:4; Ɛzɛ. 20:14.