YINƆKO dɛnlanle aze hyɛle kpalɛ. Bie a ɔyɛ se kɛ yɛbadwenle nwo, noko nrenyia ɛhye lile ɛvolɛ kɛyɛ 365​—ɔbadɛla ɛnɛ awie mɔɔ ɛdɛnla aze ɛhyɛ la ngoane mekɛ mɔnwo nna! Noko ɛnee ɔtɛyɛle kpanyinli somaa wɔ ye mekɛ zo ewiade ne anu. Mekɛ zɔhane, wɔ ɛvoya mɔɔ bo 50 mɔɔ ɛze la anu, ɛnee menli tɛnla aze kyɛ tɛla ɛnɛ. Adam, nrenyia mɔɔ limoa la dɛnlanle aze ɛvolɛ mɔɔ bo ɛya nsia kolaa na bɛawo Yinɔko, na Adam dɛnlanle aze wɔ ɛvoya nsa bieko anu! Adam abozoamra bie mɔ dɛnlanle aze hyɛle kpalɛ dɛlale ye. Ɔti, bie a Yinɔko lile ɛvolɛ 365 la ɛnee ɔtɛdɛ anwosesebɛ kpalɛ, kɛ awie mɔɔ bɔ zo mɔɔ yebɔ ye ɛbɛla bo la. Noko, yeamba ye zɔ.

Ɔbayɛ kɛ ɛnee Yinɔko ngoane la esiane nu. Pɛ ye nvoninli wɔ wɔ adwenle nu kɛ ɔlɛnriandi, ɔngola ɔnye kɛzi menli mɔɔ yeha Nyamenle edwɛkɛ ne yehile bɛ kenlensa ye la bɛayɛ bɛ nyɛleɛ la ɔnvi ye adwenle nu. Ɛnee bɛva ɛya kpole kpalɛ. Menli zɔhane kpɔle ye. Bɛandie ye edwɛkɛ ne na bɛhyile Nyamenle ne mɔɔ zoanle ye la bɔbɔ. Ɛnee bɛnrɛhola bɛnrɛboda Gyihova, Yinɔko Nyamenle ne, noko ɛnee bɛbahola bɛaboda nrenyia ɛhye! Bie a ɛnee Yinɔko ɛngola ɛnnwu ye kɛ saa ɔbanwu ye abusua ne bieko a. Asoo ɔdwenlenle ɔ ye nee ɔ mra mraalɛ, ɔ ra Mɛtusɛla anzɛɛ ye anlɔnra Leemɛke anwo ɔ? (Mɔlebɛbo 5:21-23, 25) Asoo ye awieleɛ ɛne?

Yinɔko anwo edwɛkɛ dɔɔnwo ɛnle Baebolo kɛlɛtokɛ ne anu. Ɔ nwo edwɛkɛ ezinraa nsa pɛ a wɔ nu a. (Mɔlebɛbo 5:21-24; Hibuluma 11:5; Dwuudu 14, 15) Noko, ɔ nwo edwɛkɛ ekyi mɔɔ wɔ ngyɛnu ɛhye mɔ anu la maa yɛnwu nrenyia mɔɔ lɛ diedi kpole la. Asoo ɛlɛnea abusua bie ɔ? Asoo ɛpele kpalɛ amaa wɔayɛ debie mɔɔ ɛze kɛ ɔle kpalɛ la ɔ? Saa ɔle zɔ a, ɛnee ɛbazukoa dɔɔnwo wɔavi Yinɔko diedi ne anu.

Bɛkawo Yinɔko la, ɛnee alesama ɛbɛla ɛzɛkye. Adam awolɛndoazo mɔɔ tɔ zo nsuu la ɛne. Nɔhalɛ nu, ɛnee alesama bikye nwonane nu munlililɛ ne mɔɔ ɛnee Adam nee Yive lɛ ye mekɛ bie na ɔminlinle la anwo. Ɔti, ɛnee menli tɛnla aze kyɛ. Noko, ɛnee bɛ ɛbɛlabɔlɛ nee bɛ sunsum nu gyinlabelɛ ɛnle kpalɛ fee. Ɛnee basabasayɛlɛ ɛbu zo. Basabasayɛlɛ ɛhye bɔle ɔ bo wɔ awolɛndoazo mɔɔ tɔ zo nwiɔ la anu, wɔ mekɛ mɔɔ Keen hunle ɔ diema Ebɛle la. Ɛnee Keen abozoamra anu ko fa tu ɔ nwo kɛ ɔkulo basabasayɛlɛ na ɔdi nzenralɛ ɔtɛla Keen! Wɔ awolɛndoazo mɔɔ tɔ zo nsa la azo, ɛtaneyɛlɛ fofolɛ bɔle ɔ bo. Menli bɔle ɔ bo bɔle Gyihova duma ɛdeɛ, noko ɛnee bɛngile ɛbulɛ bɛmaa ye ɛzonlenlɛ ne. Ɔda ali kɛ ɛnee bɛbɔ Nyamenle duma nwuanzanwuanza ne wɔ adenle mɔɔ ɛnfɛta la azo.​—Mɔlebɛbo 4:8, 23-26.

Ɔbayɛ kɛ adalɛ ɛzonlenlɛ ɛhye hɔle zo wɔ Yinɔko mekɛ zo kpalɛ. Noko mɔɔ Yinɔko ɛlɛnyi la, ɛnee ɔwɔ kɛ ɔsi kpɔkɛ. Asoo ɔbava ɔ nwo yeabɔnle ye mekɛ zo menli dɔɔnwo ne ɔ? Anzɛɛ ɔbakpondɛ nɔhalɛ Nyamenle, Gyihova mɔɔ bɔle anwuma nee aze la abo zo? Bie a ɔzukoale Ebɛle mɔɔ wule kɛ mogya dasevolɛ ɔluakɛ ɔzonlenle Gyihova wɔ adenle mɔɔ sɔ Ɔ nye la anwo debie la, ɔhanle ye ahonle. Yinɔko zile kpɔkɛ kɛ ɔdaye noko ɔbayɛ zɔ. Mɔlebɛbo 5:22 ka kɛ: “Yinɔko nee Nyamenle luale.” Edwɛkɛ ɛhye maa yɛnwu kɛ  ɛnee Yinɔko sonle Nyamenle wɔ ewiade mɔɔ bɛnzonle Nyamenle la anu. Ɔdaye a ɔle awie mɔɔ limoa mɔɔ Baebolo ne ka ɔ nwo edwɛkɛ zɛhae a.

Baebolo ngyɛnu ko ne ala ka kɛ mɔɔ Yinɔko wole ɔ ra Mɛtusɛla la anzi, ɔhɔle zo ɔ nee Gyihova luale. Ɔti, yɛnwu Yinɔko kɛ awie mɔɔ lɛ abusua wɔ mekɛ mɔɔ ɛnee yeli ɛvolɛ kɛyɛ 65 la. Ɛnee ɔlɛ ɔ ye, mɔɔ bɛambɔ ye duma wɔ Baebolo ne anu yɛɛ mralɛ “mrenya nee mraalɛ” mɔɔ yɛnze bɛ dodo a. Saa selɛ bie bahola ɔ nee Nyamenle alua wɔ mekɛ mɔɔ ɔlɛtete mralɛ anzɛɛ ɔlɛnea abusua la a, ɔwɔ kɛ ɔbɔ mɔdenle ɔnea bɛ wɔ adenle mɔɔ Nyamenle die to nu la azo. Yinɔko nwunle kɛ Gyihova kulo kɛ ɔ nee ɔ ye tɛnla mɔɔ ɔngyakyi ye a. (Mɔlebɛbo 2:24) Na ɔbɔle mɔdenle ɔhilehilele ɔ mra ne mɔ Gyihova Nyamenle anwo debie. Boni a vile nu rale a?

Baebolo ne ɛnga nwolɛ edwɛkɛ dɔɔnwo. Ɔnga diedi mɔɔ Yinɔko ara Mɛtusɛla mɔɔ dɛnlanle aze hyɛle wɔ Baebolo kɛlɛtokɛ nu nyianle la anwo edwɛkɛ. Ye ngoane mekɛ rale awieleɛ wɔ ɛvolɛ mɔɔ nuhua a Azuyilɛ kpole ne rale la anu. Noko, Mɛtusɛla wole ralɛ nrenyia na ɔdonle ye Leemɛke. Leemɛke dɛnlanle aze wɔ ye nenyia Yinɔko mekɛ zo wɔ ɛvoya dɔɔnwo anu. Na Leemɛke nyinle rayɛle awie mɔɔ lɛ diedi kpole. Gyihova sunsum ne maanle ɔhanle ɔ ra, Nowa anwo edwɛkɛ ɔdole ɛkɛ, na zɔhane ngapezo ne rale nu wɔ Azuyilɛ ne anzi. Bɛhanle Nowa mɔɔ le kɛ ɔ nlenyia Yinɔko la anwo edwɛkɛ kɛ ɔ nee Nyamenle luale. Nowa annwu Yinɔko ɛlɛ. Noko Yinɔko gyakyile agyadeɛ mɔɔ sonle bolɛ la. Bie a Nowa zukoale agyadeɛ zɔhane anwo debie vile ye papa Leemɛke, ye nenyia Mɛtusɛla anzɛɛ bie a Yinɔko papa Gyɛlɛde, mɔɔ wule wɔ mekɛ mɔɔ ɛnee Nowa ɛli ɛvolɛ 366 la ɛkɛ.​—Mɔlebɛbo 5:25-29; 6:9; 9:1.

Dwenle kɛzi Yinɔko nee Adam le ngakyile la anwo. Ɛnee Adam di munli, noko ɔyɛle ɛtane ɔtiale Gyihova na ɔvale atuadelɛ nee nyanelilɛ ɔgyakyile ɔ bo zo amra. Ɛnee Yinɔko ɛnli munli, noko ɔ nee Nyamenle luale na ɔyɛle diedi nwo neazo ɔmaanle ɔ bo zo amra. Adam wule la ɛnee Yinɔko ɛli ɛvolɛ 308. Asoo Adam abusua ne zunle bɛ nlenyia angomedi ɛhye ɔ? Yɛnze. Noko, Yinɔko hɔle zo nee “Nyamenle luale.”​—Mɔlebɛbo 5:24.

Saa ɛlɛnea abusua bie a, suzu mɔɔ ɛbazukoa wɔavi Yinɔko ɛkɛ la anwo. Abusua ne nwonane afoa nu ninyɛne mɔɔ ɛbava wɔamaa bɛ la anwo hyia ɛdeɛ, noko sunsum nu ɛdeɛ ne hyia tɛla debie biala. (1 Temɔte 5:8) Ɛyɛ ɛhye ɔlua mɔɔ ɛka nee mɔɔ ɛyɛ la azo. Saa ɛkpa kɛ ɛ nee Nyamenle balua kɛ mɔɔ Yinɔko yɛle la, na ɛmaa Nyamenle ngyinlazo mɔɔ vi sunsum nu la kile wɔ ɛbɛlabɔlɛ adenle a, ɛdawɔ noko ɛbagyakyi wɔ abusua ne agyadeɛ kpalɛ​—neazo kɛnlɛma mɔɔ ɔwɔ kɛ bɛsukoa a.

Bie a Yinɔko dele nganeɛ kɛ ɔ ngomekye a ɔle sonla mɔɔ ɔlɛ diedi wɔ ewiade mɔɔ awie biala ɛnlɛ diedi la anu a. Noko, asoo Gyihova, ye Nyamenle ne nwunle ye ɔ? Ɛhɛe. Mekɛ bie rale mɔɔ Gyihova nee ye sonvolɛ nɔhavo ne dendɛle a. Nyamenle maanle Yinɔko nrɛlaleɛ bie kɛ ɔha ɔhile ye mekɛ zo amra. Ɔti, ɔyɛle Yinɔko ngapezonli, mɔɔ limoa mɔɔ ye edwɛkɛ ne wɔ Baebolo ne anu la. Yɛze edwɛkɛ ɛhye ɔluakɛ sunsum ne hanle Dwuudu, mɔɔ ɔ diema a le Gyisɛse  la maanle ɔhɛlɛle Yinɔko ngapezo edwɛkɛ ne wɔ ɛvoya dɔɔnwo anzi. *

Yinɔko ngapezo ne a le boni? Kɛ ɔkɔ ye la ɛne: “Awulae nee ye soanvolɛma nwuanzanwuanza apenle apenle bara arabua awie biala ndɛne, na yeadea bɛdabɛ mɔɔ bɛnze Nyamenle la wɔ bɛ ninyɛndane mɔɔ bɛyɛ ye atisesebɛ nu nee amumuyɛ edwɛkɛ mɔɔ menli ɛhye mɔ mɔɔ ɛnze Nyamenle la ɛha ɛtia ye la anwo.” (Dwuudu 14, 15) Ɛnee Yinɔko lɛ diedi kpole kɛ zɔhane edwɛkɛ ne mɔ bara nu bɔkɔɔ. Wɔ ye afoa nu, ɔle kɛ asɛɛ Nyamenle ɛmaa ngapezo ɛhye ɛlimoa ɛra nu. Adenle ɛhye azo a ngapezo ngakyile ne mɔ luale zo a. Adwenle ne a le kɛ: Saa ngapezoma ne ɛlɛka debie mɔɔ bɛze kɛ ɔbara nu la anwo edwɛkɛ a, bɛka ye kɛ asɛɛ deɛ ne ɛlimoa ɛra nu la!​—Ayezaya 46:10.

Adenle boni azo a Yinɔko luale zo hanle nrɛlaleɛ zɔhane hilele awie biala ɛ? Nea kɛzi ɛnee kɔkɔbɔlɛ ne anloa yɛ se la​—wɔ aneɛ mɔɔ bɛlimoale bɛvale bɛhɛlɛle la anu, ɔvale edwɛkɛkpɔkɛ “bɛnze Nyamenle” ɔlile gyima fane nna ɔdendɛle ɔtiale menli ne, bɛ nyɛleɛ nee adenle mɔɔ bɛdua zo bɛyɛ bɛ ninyɛne la. Ngapezo zɔhane bɔle alesama kɔsɔɔti kɔkɔ kɛ ewiade zɔhane mɔɔ bɛkyekyele ɔvi mekɛ mɔɔ bɛvoanle Adam nee Yive bɛvile Yidɛn tola ne anu la ɛkpɔlɔ bɔkɔɔ. Ewiade zɔhane bara ye awieleɛ wɔ mekɛ mɔɔ Gyihova nee ye “soanvolɛma nwuanzanwuanza”​—anwumabɔvolɛma mgbe dɔɔnwo mɔɔ bɛlɛ tumi mɔɔ bɛle ɛlɔnema barazɛkye ye la. Yinɔko angomekye vale akɛnrasesebɛ hanle Nyamenle kɔkɔbɔlɛ ne! Bie a kɛzi Yinɔko lɛ akɛnrasesebɛ la zinle ye anlɔnra Leemɛke anwo. Saa ɔle zɔ a, ɛnee yɛbade deɛmɔti ɔle zɔ la abo.

Yinɔko diedi ne bahola aha yɛ yeamaa yɛabiza yɛ nwo saa yɛnwu ewiade ne kɛ mɔɔ Gyihova nwu ye la a. Ndɛnebualɛ ne mɔɔ Yinɔko vale akɛnrasesebɛ bɔle ye nolo la tɛbɔ ɛkɛ; ɔfale ɛnɛ ewiade ne anwo, kɛ mɔɔ ɛnee ɔde wɔ Yinɔko mekɛ zo la. Ɔlua Yinɔko kɔkɔbɔlɛ ne azo, Gyihova vale Azuyilɛ kpole ne zɛkyele ewiade bie mɔɔ ɛnee bɛnze Nyamenle la wɔ Nowa mekɛ zo. Zɔhane ɛzɛkyelɛ ne le ɛzɛkyelɛ kpole ne mɔɔ bara la anwo neazo. (Mateyu 24:38, 39; 2 Pita 2:4-6) Ɛnɛ, Nyamenle nee ye soanvolɛma nwuanzanwuanza ne ɛziezie bɛ nwo kɛ bɛfa ndɛnebualɛ fɔɔnwo bɛara ewiade mɔɔ ɛnze Nyamenle la anwo zo. Ɔwɔ kɛ yɛ nuhua ko biala maa Yinɔko kɔkɔbɔlɛ ne tɛnla ye adwenle nu na ɔka ɔkile awie mɔ. Bie a yɛ abusua ne nee yɛ gɔnwo mɔ nee yɛ ɛnrɛyɛ adwenle. Ɔyɛ a yɛte nganeɛ kɛ yeha yɛ ngome. Gyihova angyakyi Yinɔko; yɛɛ ɔnrɛgyakyi ye sonvolɛma nɔhavoma ɛnɛ noko!

Kɛzi ɔwiele Yinɔko ɛ? Wɔ adenle bie azo, ye ewule ne yɛ azibɛnwo tɛla ye ɛbɛlabɔlɛ. Mɔlebɛbo buluku ne ka kɛ: “Yinɔko nee Nyamenle luale na yeanwu, ɔminliminlinle, ɔboalekɛ Nyamenle vale ye hɔle.” (Mɔlebɛbo 5:24) Adenle boni azo a Nyamenle vale Yinɔko hɔle a? Ɛzoanvolɛ Pɔɔlo hilele nu nzinlii kɛ: “Diedi ti a bɛvale Yinɔko bɛhɔle amaa yeannwu ewule a, na bɛannwu ye wɔ ɛleka biala ɔluakɛ ɛnee Nyamenle ɛye ye ɛvi ɛkɛ; kolaa na bɛava ye bɛahɔ la ɔnyianle daselɛ kɛ yezɔ Nyamenle anye.” (Hibuluma 11:5, NW) Duzu a ɛnee Pɔɔlo ɛlɛkile wɔ mekɛ mɔɔ ɔhanle kɛ “bɛvale Yinɔko bɛhɔle amaa yeannwu ewule” la ɛ? Baebolo ngilebɛbo bie mɔ ka kɛ Nyamenle vale Yinɔko hɔle anwuma. Noko ɛhye ɛnle nɔhalɛ. Baebolo ne ka kɛ, Gyisɛse Kelaese a le awie mɔɔ limoa mɔɔ bɛdwazole ye bɛhɔle anwuma a.​—Dwɔn 3:13.

Adenle boni azo a bɛvale Yinɔko “bɛhɔle” amaa  “yeannwu ewule” a? Ɔbayɛ kɛ Gyihova maanle Yinɔko wule mɔɔ yeande nyane wɔ ye ewule nu a. Noko mɔɔ limoa, Yinɔko nyianle “daselɛ kɛ yezɔ Nyamenle anye.” Kɛzi? Kolaa na yeawu la, ɔnyianle yekile ɔvile Nyamenle ɛkɛ, mɔɔ bie a ɛnee ɔlɛfa paladaese azɛlɛ ne yeahile ye a. Kɛmɔ Gyihova maanle ɔnwunle sɛkɛlɛneɛ mɔɔ kile kɛ yelie ye yedo nu la ati, Yinɔko lale wɔ ewule nu. Ɛzoanvolɛ Pɔɔlo ɛlɛkɛlɛ Yinɔko nee nɔhavoma gyɛne anwo edwɛkɛ la, ɔhanle kɛ: “Diedi nu yɛɛ menli ɛhye mɔ amuala wule a.” (Hibuluma 11:13) Nzinlii, bie a ye agbɔvolɛ kpondɛle ye funli ne, noko “bɛannwu ye wɔ ɛleka biala.” Ɔbayɛ kɛ Gyihova vale ye ziele amaa bɛangua nwolɛ evinli anzɛɛ bɛanva bɛanyɛ adalɛ ɛzonlenlɛ nu debie. *

Ngɛlɛlera nu ndelebɛbo ɛhye wɔ yɛ adwenle nu la, bɛmaa yɛbɔ mɔdenle yɛnlea kɛzi Yinɔko ɛbɛlabɔlɛ rale awieleɛ la. Pɛ ɛhye anwo nvoninli wɔ wɔ adwenle nu, na kakye kɛ ɔbahola yeara ye zɔ. Ɛnee Yinɔko ɛlɛnriandi na yevɛ. Ye agbɔvolɛ doa ye, ɛya ɛwie bɛ ku ɔlua ye ndɛnebualɛ edwɛkɛ ne ati. Yinɔko nyianle ɛleka bie veale na ɔliele ɔ menle ekyi, noko ɛnee ɔze kɛ ɔnrɛhola ɔnrɛvi ɛsalɛ. Ɔnwunle kɛ ye ewule mekɛ ɛbikye kpalɛ. Mɔɔ ɔlɛdie ɔ menle la, ɔzɛlɛle ye Nyamenle ne. Akee ɔnyianle anzodwolɛ. Yinɔko nwunle yekile kɛnlɛma bie wɔ moamoa kɛ asɛɛ ɔwɔ ɛkɛ ne bie la.

Fa ye kɛ ɔkabuke ɔ nye la yenwu ewiade bie mɔɔ ɔle ngakyile kolaa ɔfi mɔɔ ɔze ye la anwo. Ɔnwunle kɛ ye kɛnlɛma ne le kɛ Yidɛn tola ne la, noko kyɛlɔbemma ɛnzinza ɛkɛ mɔɔ menli ɛngola ɛngɔ ɛkɛ a. Mrenyia nee mraalɛ kɔsɔɔti mɔɔ te kpɔkɛ na bɛlɛ anwosesebɛ la anwo zonle kpalɛ. Anzodwolɛ wɔ bɛ avinli. Ɛkpɔlɛ nee ɛzonlenlɛ nu basabasayɛlɛ mɔɔ Yinɔko ɛnwu bie ɛlɛ la bie ɛnle ɛkɛ. Yinɔko nwunle kɛ Gyihova kulo ye, ɔdie ye ɔto nu na ɔmaa ye anwosesebɛ. Ɔnwu ye wienyi kɛ ɛke a fɛta ye a; ɔbayɛ ye sua nu. Akee Yinɔko anzo nu dwole ye, ɔhedale ɔ nye na ɔhale nu ɔlafele botoo.

Ɛkɛ ne a ɔwɔ badwu ɛnɛ a​—yela wɔ ewule nu, ɔwɔ Gyihova Nyamenle ngakyelɛ nu dahuu! Kɛ mɔɔ nzinlii Gyisɛse bɔle ɛwɔkɛ la, mekɛ bara mɔɔ bɛdabɛ mɔɔ bɛwɔ Nyamenle ngakyelɛ nu la bade Kelaese ane na bɛavi bɛ nla ne mɔ anu bɛavinde, bɛava bɛ nye bɛanwu anzodwolɛ ewiade fofolɛ ne mɔɔ le kɛnlɛma la.​—Dwɔn 5:28, 29.

Ɛbahɔ ɛkɛ ne bie ɔ? Nea kɛzi ɛ nye balie kɛ ɛbanwu Yinɔko la. Nea ninyɛne ngɛnlɛma mɔɔ yɛkola yɛsukoa yɛfi ye ɛkɛ a! Ɔbahola yeaha yɛahile yɛ saa mɔɔ yɛpɛle nwolɛ nvoninli wɔ yɛ adwenle nu mɔɔ fale ye ɛbɛlabɔlɛ mɔɔ li awieleɛ la asɛɛ nee nɔhalɛ ne le ko a. Noko, ɔwɔ kɛ yɛsukoa debie bie mɔɔ anwo hyia la yɛfi ye ɛkɛ ne kɛkala. Pɔɔlo hanle Yinɔko anwo edwɛkɛ wiele la, ɔdoale zo kɛ: “Ɔyɛ se kɛ awie mɔɔ ɛnlɛ diedi la kɛhola kɛzɔ Nyamenle anye.” (Hibuluma 11:6) Nea kɛzi ndelebɛbo wɔ nu kɛ yɛ nuhua ko biala bazukoa diedi kpole mɔɔ Yinɔko lale ye ali la!