Suzu edwɛkɛ mɔɔ ɛzonlenlɛ nu mgbanyima mɔɔ ɛlie duma ɛha ye wɔ Ukraine konle ne anwo la anwo:

•   “Ɛsɔfo kpanyinli Kirill mɔɔ la Russia Ɔtɔdɔso Asɔne ne anloa la ɛtɛtendɛle ɛtɛtiale konle ne mɔɔ Russia ɛlɛko ye wɔ Ukraine la. . . . Ye asɔne ne ɛheha Ukraine anwo adalɛ edwɛkɛ dɔɔnwo na Putin ɛgyinla zo ɛhile kɛ konle ne mɔɔ ɔlɛko la, ye adenle zo ɔ.”​—EUobserver, March 7, 2022.

•   “Ɛsɔfo kpanyinli Kirill . . . ɛhile kɛ konle mɔɔ Russia ɛlɛko ye wɔ Ukraine la, ye adenle zo ɔ​—ɔhanle kɛ bɛlɛfa bɛaho bɛatia ɛtane.”​—AP News, March 8, 2022.

•   “Wɔ Kenlenzile ne, ɛsɔfo kpanyinli Epiphanius I mɔɔ la Ukraine Ɔtɔdɔso Asɔne ne anloa wɔ Kyiv la yilale ye menli ne kɛ ‘bɛ nee Russia sogyama ne ɛho’ . . . Eza ɔhanle kɛ saa bɛku Russia sogyama a ɛnee bɛtɛyɛle ɛtane.”​—Jerusalem Post, March 16, 2022.

•   “Yɛdayɛ mɔɔ yɛwɔ [Ukraine Asɔne Asɔne Ngamɔnu Eku ne (Ukrainian Council of Churches and Religious Organizations (UCCRO))] anu la gyi Ukraine sogyama nee menli mɔɔ ɛlɛko amaa yɛ la amuala anzi. Bɛdabɛ mɔɔ bɛlɛko wɔ Ukraine bɛatia kpɔvolɛ ne la, yɛyila bɛ yɛɛ yɛyɛ asɔne yɛmaa bɛ.”​—Edwɛkɛ Mɔɔ UCCRO a Vale Dole Gua, February 24, 2022.

 Kɛzi ɛdwenle nwo ɛ? Asoo ɔwɔ kɛ asɔne mɔɔ kile kɛ ɔli Gyisɛse Kelaese anzi la ka kile ye menli kɛ bɛhɔ konle ɔ? Duzu a Baebolo ne ka ye wɔ nwo a?

Asɔne asɔne ne mɔ ɛva bɛ nwo ɛwulowula konle nu ɔvi tete

 Tetedwɛkɛ kile kɛ asɔne asɔne ne mɔ ta die konle konle to nu, bɛkile kɛ ɔfɛta yɛɛ nwolɛ hyia. Mekɛ ko ne ala bɛyɛ bɛ nwo kɛ bɛkulo anzodwolɛ. Gyihova Alasevolɛ ɛva ɛvolɛ dɔɔnwo ɛla bɛ nabalaba nyɛleɛ ne ali. Nea neazo bie mɔ mɔɔ wɔ yɛ mbuluku ne mɔ anu la.

•   “The Crusades​—A ‘Tragic Illusion’” hanle kɛzi Kateleke Asɔne ne maanle bɛhuhunle menli wɔ Nyamenle nee Kelaese duma nu la.

•   Saa ɛkenga “The Catholic Church in Africa” edwɛkɛ ne a, ɛbanwu kɛ asɔne asɔne ne mɔ angola anzi konle mɔɔ zile wɔ mbusua avinli la adenle. Yɛɛ wɔ mekɛ mɔɔ bɛlɛkuhu mbusua bie mɔ anu amra la bɛangola bɛanyɛ nwolɛ ɛhwee.

•   “Is Religion to Blame?,” “Religion’s Role in Man’s Wars,” yɛɛ “Religion Takes Sides” maa yɛnwu kɛzi Kateleke, Ɔtɔdɔso, yɛɛ Protɛstant ɛsɔfo ne mɔ gyinlanle konle dɔɔnwo anzi la.

Asoo ɔwɔ kɛ Kilisienema fa bɛ nwo wulowula konle nu ɔ?

 Mɔɔ Gyisɛse hilehilele la: “Kulo ɛ gɔnwo kɛ ɛ nwo.” (Mateyu 22:39) “Bɛhɔ zo bɛhulo bɛ kpɔvolɛma.”​—Mateyu 5:44-47.

 Mɔɔ Gyisɛse hanle la: “Me Belemgbunlililɛ ɛnvi ewiade ɛhye anu. Saa me Belemgbunlililɛ vi ewiade ɛhye anu a, anrɛɛ me sonvolɛma kɛho na bɛanye me bɛammaa.” (Dwɔn 18:36) “Bɛdabɛ mɔɔ bɛtwe dadeɛ la kɔsɔɔti bawu dadeɛ nloa.”​—Mateyu 26:47-52.

 Dwenle nwo nea: Saa Gyisɛse bɔbɔ bɛse ɔnle kɛ Kilisienema ko die ye a, asoo ɛnea a ɔwɔ kɛ debie gyɛne bie ati bɛkɔ konle ɔ? Kenga “Is War Compatible With Christianity?” amaa wɔanwu kɛzi alimoa Kilisienema vale nɔhalɛlilɛ lile Gyisɛse neazo nee ye ngilehilelɛ ne anzi la.

Kɛ bɛbayɛ ɛzonlenlɛ mɔɔ bɛfa bɛ nwo bɛwulowula konle konle nu la ɛ?

 Baebolo ne ka kɛ Nyamenle kyi ɛzonlenlɛ ngakyile mɔɔ bɛka kɛ bɛgyi Gyisɛse agyakɛ anu noko bɛnli ye ngilehilelɛ ne azo la.​—Mateyu 7:21-23; Taetɛse 1:16.

•   Yekile buluku ne kile kɛ, wɔ Nyamenle anye azo, ɛzonlenlɛ ngakyile ne mɔ di “bɛdabɛ mɔɔ bɛhunle bɛ wɔ azɛlɛ ye azo la amuala” mogya nwo fɔlɛ. (Yekile 18:21, 24) Amaa wɔanwu deɛmɔti ɔle zɔ la, kenga “Duzu A Le Babelɔn Kpole Ne?”

•   Gyisɛse hilele kɛ Nyamenle bazɛkye ɛzonlenlɛ kɔsɔɔti mɔɔ ɔlua bɛ ninyɛndane ti Nyamenle ɛkpo bɛ la. Ɔbayɛ bɛ kɛ mɔɔ bɛyɛ baka mɔɔ ɛnzo ma kpalɛ la, “bɛpɛ na bɛfa bɛwuda senle.” (Mateyu 7:15-20) Kenga “The End of False Religion Is Near!” amaa wɔanwu kɛzi ɔbayɛ ye la.

Nvoninli ɛvileka, ɔvi bɛne zo mɔɔ kɔ fema zo: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images