Nahum 3:1-19
3 Suakpole ne mɔɔ ka mogya gua la, gyakɔ!
Adalɛ nee awule ɛyi ye tɛkɛɛ.
Ninyɛne bɛfe* ɛmkpa ɛkɛ ne ɛlɛ!
2 Empele ɛlɛsu* wɔ ɛkɛ yɛɛ ehwili ne mɔ ɛlɛyɛ dede,Mgbɔnwɔ ɛlɛnriandi ɛsesebɛ yɛɛ konle ehwili ne mɔ ɛlɛwuluwulu.
3 Ɛkpɔnwɔkavolɛ ne de ɛkpɔnwɔ zo, konle dadeɛ ne anwo kpa senle yɛɛ atwɛ ne ati ta memeamemea,Bɛhu menli dɔɔnwo yɛɛ avunli dɔɔnwo gua ɛkɛ—Avunli ne mɔ dodo ɛnlɛ ɔ nloa.
Avunli ne mɔ tenda bɛ gyakɛ anu.
4 Ɔlua ye tuutuu bebelebe ne mɔɔ ɔbɔle la ati ɔ,Ɔ nwo yɛ fɛ kpalɛ, ngonyiayelɛ nu raalɛ kpanyinli,Ɔdua ye tuutuubɔlɛ ne azo ɔsua maanle maanle ne ɛhane na ɔdua ye ngonyiayelɛ ne azo ɔbɛlɛbɛla mbusua.
5 Kɛ ɛlɔne Gyihova se la ɛne: “Nea! Mebahwe ɛ* nzo,+Mebamaa wɔ tɛladeɛ ne zo meaheda ɛ nyunlu;Mebamaa maanle maanle anwu kɛ ɛlɛ ɛ nwo zɔ,Na arelemgbunlililɛ anwu wɔ anyiemgba ne.
6 Mebado evinli meagua ɛ nwoNa meamaa wɔayɛ kyibadeɛ;Mebamaa menli anlea wɔ na bɛakpusu bɛ ti.+
7 Awie biala mɔɔ kɛnwu wɔ la banriandi wɔ+ na yeaha kɛ,‘Bɛzɛkye Nenɛvɛ bɔkɔɔ!
Nwane a bali ɔ nwo nyane a?’
Nienwu a mebanyia arɛlekyekyevolɛma meamaa wɔ a?
8 Asoo ɛle kpalɛ ɛtɛla No-amɔn,*+ mɔɔ wɔ Naele kanale* ne anloa la?+
Nzule ɛbɔ ye ɛyia;Ye anwonyia a le nyevile, na nyevile le ye bane.
9 Yiteyopea nee Yigyibiti a ye anwosesebɛ ne mɔɔ ɛnga aze ɛlɛ la vi a.
Pɛɛte+ nee Lebea le wɔ boavolɛma.+
10 Noko ɔdaye bɔbɔ, bɛhyele ye bɛhɔle;Ɔhɔle akɛlɛzonlenlɛ nu.+
Ɔ mra ne mɔ noko, bɛtetele bɛ nu wɔ awɔdenle ne mɔ amuala azo.*
Bɛguale ye menli mɔɔ bɛdi bɛ eni la ati ma,*Na bɛguale ye menli titili ne mɔ kɔsɔɔti kyeenyi.
11 Ɛdawɔ noko ɛbabo nza;+Ɛbanriandi wɔahɔvea.
Ɛbakpondɛ ɛvealeka wɔavi kpɔvolɛ ne ɛkɛ.
12 Wɔ azuamgbole mɔɔ bɛlie nwolɛ bane la kɔsɔɔti le kɛ feege mbakama mɔɔ kɛlimoa kɛbolo la;Saa bɛkpusu bɛ a, bɛbatete bɛagua awie mɔɔ ɔdi la anloa anu.
13 Nea! Wɔ ɛlɔnema ne le kɛ mraalɛ mɔɔ wɔ bɛ avinli la.
Bɛbabukebuke wɔ azɛlɛ ne anloa nlenkɛ mgbole ne mɔ wanaanwo bɛamaa wɔ kpɔvolɛma.
Senle bayela mbulalɛ mɔɔ gua wɔ nlenkɛ mgbole ne mɔ anzi la.
14 Sesa nzule sie na siezie ɛ nwo maa ɛlɔnema mɔɔ bɛbabɛnga wɔ bɛayia la!+
Miemia wɔ azuamgbole mɔɔ bɛlie nwolɛ bane la anu.
Kɔ ɛva ne anu na fɔtɔ ndɛtɛlɛ ne;Fa belekese ɛgualɛ ɛlɛka ne.
15 Nehane bɔbɔ senle bayela wɔ.
Konle dadeɛ bapɛ wɔ ado wɔ lɔ.+
Ɔbali ɛ nwo nane kɛ mɔɔ abɛbɛ mralɛ di nya la.+
Maa ɛ nwo ɛzo kɛ abɛbɛ mralɛ!
Ɛhɛe, maa ɛ nwo ɛzo kɛ abɛbɛ la!
16 Wɔmaa wɔ gualilɛma anwo ɛzo ɛdɛla anwuma nwɔlɔra.
Abɛbɛ ralɛ kpolo ɔ nwo gua ɛkɛ na ɔtu ɔkɔ.
17 Wɔ sinzavolɛma le kɛ abɛbɛ,Yɛɛ wɔ mgbanyima le kɛ abɛbɛ dɔɔnwo.
Bɛbetɛbeta bane nwo wɔ ɛyɛlɛ kenle,Noko saa ewia ne finde a, bɛtu bɛkɔ;Na awie biala ɛnze ɛleka mɔɔ bɛwɔ a.
18 O Aselea belemgbunli, wɔ mboaneneavolɛma bɔ ngɔsɔkɛ;Wɔ mgbanyima dede bɛ awuke nu.
Wɔ maanlema ɛbɔ asande wɔ awoka ne mɔ azo,Na awie biala ɛnle ɛkɛ mɔɔ ɔboɔboa bɛ nloa a.+
19 Ɛ nwo ɛnrɛdɔ wɔ ɛlɛ wɔ wɔ amaneɛnwunlɛ nu.
Bɛnrɛhola bɛnrɛyɛ wɔ hanlɛ ne ayile.
Bɛdabɛ mɔɔ bɛbade ɛ nwo edwɛkɛ la amuala babɔ bɛ sa nu;+Na nwane a ɛtɛnwunle amaneɛ wɔ wɔ amumuyɛ ne mɔɔ ɛyɛ ye dahuu la anwo a?”+
Ɔbodwɛkɛ
^ Anzɛɛ “Afedeɛ.”
^ Anzɛɛ “Mete empele ne.”
^ Ɛhye kile, Nenevɛ.
^ Ɛhye kile, Tibise.
^ Anzɛɛ “ɛbolo.”
^ Hibulu aneɛ nu, “awɔdenle ne mɔ kɔsɔɔti ati.”
^ Nea Edwɛkɛbohilelɛ.
