Mateyu Edwɛkpa 24:1-51
24 Mɔɔ Gyisɛse vi ɛzonlenlɛsua ne anu ɛlɛkɔ la, ye ɛdoavolɛma ne rale ɔ nwo ɛkɛ ne kɛ bɛkile ye ɛzonlenlɛsua ne azua ne mɔ.
2 Ɔbuale bɛ kɛ: “Bɛnwu ninyɛne ɛhye mɔ amuala ɔ? Nɔhalɛ nu meka meahile bɛ kɛ, kɛ ɔde ye biala la, bɛnrɛgyakyi bolɛ wɔ bolɛ zo wɔ ɛke mɔɔ bɛnrɛdwula ye aze a.”+
3 Mekɛ mɔɔ ɔde Ɔlivi Boka ne azo la, ɛdoavolɛma ne rale ɔ nwo ɛkɛ ne ahane rahanle kɛ: “Ka kile yɛ, mekɛ boni a ninyɛne ɛhye mɔ bazi a, na sɛkɛlɛneɛ boni a bahile kɛ wɔra*+ na mekɛ ɛhye ɛlɛkɔ awieleɛ* a?”+
4 Gyisɛse buale bɛ kɛ: “Bɛnlea boɛ na awie ambɛlɛbɛla bɛ,+
5 ɔluakɛ menli dɔɔnwo bava me duma ara na bɛaha kɛ, ‘Mame a mele Kelaese ne a,’ na bɛbabɛlɛbɛla menli dɔɔnwo.+
6 Bɛbade konle mɔɔ bikye bɛ nee konle mɔɔ wɔ moamoa la anwo amaneɛbɔlɛ. Bɛnlea na bɛ ahonle andu, ɔluakɛ ɔwɔ kɛ ninyɛne ɛhye mɔ sisi noko ɛnee awieleɛ ne ɛtɛnyianle ɛtɛbale.+
7 “Na maanle badwazo atia maanle yɛɛ belemgbunlililɛ badwazo atia belemgbunlililɛ,+ na ɛhɔne+ nee azɛlɛkpusulɛ bara ɛleka ngakyile.+
8 Ɛhye mɔ amuala le awolɛ nyanedelɛ mɔlebɛbo.
9 “Akee menli bayɛ bɛ kpɔdekpɔde+ na bɛahu bɛ,+ na me duma ne ati maanle maanle kɔsɔɔti bakpɔ bɛ.+
10 Eza noko menli dɔɔnwo bavi diedi ne anwo na bɛbaye bɛ nwo ngoko bɛamaa na bɛakpɔ bɛ nwo.
11 Adalɛ ngapezoma dɔɔnwo badwazo na bɛabɛlɛbɛla menli dɔɔnwo;+
12 na kɛmɔ ɛtaneyɛlɛ bazo la ati, menli dɔɔnwo ɛlɔlɛ baha aze.
13 Noko mɔɔ kɛgyinla nu kɛhɔ awieleɛ la bɛbalie ye ngoane.+
14 Na bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ,+ kolaa na awieleɛ ne ara.
15 “Yemɔti, saa bɛnwu kyibadeɛ ne mɔɔ bɔ maanle, mɔɔ ngapezonli Daneɛle hanle nwolɛ edwɛkɛ la kɛ ɔgyi ɛleka nwuanzanwuanza ne a+ (maa kengavolɛ ne ɛva nwunu ɛli gyima),
16 ɛnee bɛmaa bɛdabɛ mɔɔ bɛwɔ Dwudiya la ɛbɔ ɔ bo ɛnriandi ɛhɔ awoka ne mɔ azo.+
17 Mɔɔ wɔ sua ti zo la mmadwu aze kɛ ɔkava ninyɛne wɔ ye sua nu,
18 yɛɛ mɔɔ wɔ ɛbɔ nu la mmasia kɛ ɔkava ye tɛladeɛ aguzo.
19 Mekɛ ne anu, nrenzɛvolɛma nee bɛdabɛ mɔɔ bɛmaa ngakula nyɛfonlɛ la, bɛ gyakɔ!
20 Bɛhɔ zo bɛyɛ asɔne na bɛ ɛnriandilɛ mekɛ ne anyɛ fɔsɛlɛ nu anzɛɛ Ɛnwomenlelielɛ kenle;
21 ɔluakɛ anwongyelelɛ kpole+ mɔɔ sumunli kɛ ewiade bɔle ɔ bo badwu ɛnɛ bie ɛtɛsile ɛlɛ yɛɛ bieko noko ɛnrɛzi ɛlɛ la bara.+
22 Nɔhalɛ nu, saa bɛampɛ mekɛ zɔhane azo a, bɛnrɛlie nwonane biala ngoane; noko ɔlua bɛdabɛ mɔɔ bɛkpa bɛ la ati bɛbapɛ mekɛ ne azo.+
23 “Akee saa awie ka kile bɛ kɛ, ‘Nea! Kelaese ne wɔ ɛke,’+ anzɛɛ ‘Nehane!’ a, bɛmmadie bɛdi.+
24 Ɔluakɛ adalɛ Kelaesema nee adalɛ ngapezoma+ badwazo na bɛbayɛ sɛkɛlɛneɛ mgbole nee nwanwane ninyɛne bɛava bɛabɛlɛbɛla menli,+ na saa bɛyɛ na ɔkɛyɛ boɛ a, bɛabɛlɛbɛla bɛdabɛ mɔɔ bɛkpa bɛ la bɔbɔ.
25 Nea! Melimoa mebɔ bɛ kɔkɔ.
26 Yemɔti, saa menli ka kile bɛ kɛ, ‘Nea! Ɔwɔ fienemgbole nu lɔ’ a, bɛmmakɔ lɔ; ‘Nea! Ɔwɔ suakunlu’ a, bɛmmadie bɛdi.+
27 Na kɛ mɔɔ ɛsɛlɛmanye kpakye aduduleɛ na ye ɛdalɛ ne kɔdwu adɔleɛ la, zɔhane ala a sonla Ra ne ɛralɛ* ne bayɛ a.+
28 Ɛleka biala mɔɔ debie funli wɔ la, ɛkɛ ne a kɔleɛ dɔɔnwo boɔboa bɛ nloa a.+
29 “Anwongyelelɛ mekɛ zɔhane anzi ɛkɛ ne ala, awozinli baheda sɛnzɛne ne azo,+ na siane ne ɛnrɛda, na nwɔlɔra vi anwuma badudu agua aze, na bɛbawoso anwuma tumi ne.+
30 Akee sonla Ra ne anwo sɛkɛlɛneɛ bavinde anwuma, na azɛlɛ ye azo mbusua kɔsɔɔti bali nyane,+ na bɛbanwu kɛ sonla Ra ne+ lɛ tumi nee anyunlunyia kpole lua anwuma amungu nu ɔlɛba.+
31 Na ɔbazoa ye anwumabɔvolɛma yeamaa bɛava aweɛne mɔɔ ane dielie kpole la bɛara, na bɛbaboɔboa bɛdabɛ mɔɔ yekpa bɛ la anloa bɛavi anwoma nna ne anu, ɔvi anwuma ati lɔ yeahɔdwu ɔ bo.+
32 “Akee bɛzukoa debie bɛvi feege baka ne anwo ndonwo ɛhye anu: Saa ɔ nye wɔlɔ na ɔwula nya a, ɛnee bɛze kɛ wawaa ɛbikye.+
33 Zɔhane ala a bɛdabɛ noko, saa bɛnwu ninyɛne ɛhye mɔ amuala a, bɛnwu ye kɛ yebikye nlenkɛ ne mɔ anloa a.+
34 Nɔhalɛ nu meka meahile bɛ kɛ, awolɛndoazo ɛhye ɛnrɛpɛ nu ɛlɛ kɔkpula kɛ ninyɛne ɛhye mɔ amuala bara nu la.
35 Anwuma nee aze* bapɛ nu, noko me edwɛkɛ ɛnrɛpɛ nu ɛlɛ.+
36 “Mɔɔ fale kenle zɔhane nee dɔnehwele ne anwo la ɛdeɛ, awie biala ɛnze,+ anwumabɔvolɛma mɔɔ wɔ anwuma nee Ralɛ ne bɔbɔ ɛnze, kyesɛ Selɛ ne ala.+
37 Na kɛ mɔɔ ɛnee ɔde wɔ Nowa mekɛ zo la,+ zɔhane ala a sonla Ra ne ɛralɛ* ne bayɛ a.+
38 Wɔ mekɛ mɔɔ li Azuyilɛ ne anyunlu la anu, bɛlile na bɛnlonle, mrenyia gyale yɛɛ bɛvale mraalɛ bɛmaanle agyalɛ, ɔhɔdwule kenle mɔɔ Nowa vole ɛlɛne ne anu la,+
39 na bɛannwu ye kɔkpula kɛ Azuyilɛ ne ravale bɛ muala la,+ zɔhane ala a sonla Ra ne ɛralɛ bayɛ a.
40 Akee mrenyia nwiɔ bahɔ ɛbɔ nu; bɛbava ko bɛahɔ na bɛagyakyi ko.
41 Mraalɛ nwiɔ badi debie wɔ ɛdibolɛ zo; bɛbava ko bɛahɔ na bɛagyakyi ko.+
42 Yemɔti bɛhɔ zo bɛzinza, ɔboalekɛ bɛnze kenle mɔɔ bɛ Menle ne bara a.+
43 “Noko bɛnwu ɛhye: saa suamenle ne ze ɛzinzalɛ mekɛ mɔɔ awule ne bara la a,+ anrɛɛ ɔzinzale na yeannyia adenle yeambu ye sua ne yeanwolo nu.+
44 Ɛhye ati, bɛdabɛ noko bɛziezie bɛ nwo,+ ɔluakɛ sonla Ra ne bara mekɛ mɔɔ bɛ nye ɛnla la.
45 “Ɛnee akee nwane a le akɛlɛ nɔhavo nee badwema* ne mɔɔ ɔ menle ɛkpa ye kɛ ɔnlea ye sonvolɛma anwo zo na ɔmaa bɛ aleɛ wɔ mekɛ kpalɛ nu la?+
46 Anyelielɛ a le akɛlɛ ne mɔɔ ɔ menle ne barado ye kɛ ɔlɛyɛ zɔ la!+
47 Nɔhalɛ nu meka meahile bɛ kɛ, ɔbamaa yeanlea ye ninyɛne kɔsɔɔti azo.
48 “Noko saa akɛlɛ amumuyɛ zɔhane ka ye wɔ ye ahonle nu kɛ, ‘Me menle ɛlɛkyɛ,’+
49 na ɔbɔ ɔ bo ɔbo ɔ gɔnwo mɔ ngɛkɛlɛ na ɔ nee nzama di no a,
50 akɛlɛ zɔhane amenle ne bara kenle mɔɔ ɔ nye ɛnla nee dɔnehwele mɔɔ ɔnze la anu,+
51 na ɔbahwe ɔ nzo kpole kpalɛ na yeava ye yeado ɛleka mɔɔ nabalabama ne wɔ la. Ɛkɛ ne a ɔbazu na yeali nyane a.+
Ɔbodwɛkɛ
^ Nea Edwɛkɛbohilelɛ.
^ Nea Edwɛkɛbohilelɛ.
^ Nea Edwɛkɛbohilelɛ.
^ Anzɛɛ “azɛlɛ.”
^ Nea Edwɛkɛbohilelɛ.
^ Anzɛɛ “nrɛlɛbɛvolɛ.”
