Mateyu Edwɛkpa 14:1-36
14 Mekɛ zɔhane Hɛlɔdo mɔɔ nea maagyeba ne azo la dele Gyisɛse anwo edwɛkɛ+
2 na ɔzele ye sonvolɛma ne kɛ: “Dwɔn Sɔnevolɛ ne ɔ. Bɛdwazo ye bɛvi mowuamra anu, yemɔti a ɔlɛyɛ nwanwane gyima ɛhye mɔ a.”+
3 Ɛnee Hɛlɔdo* ɛhye Dwɔn ɛkyekye ye na yedo ye efiade ɔlua ɔ diema Felepe aye Hɛlɔdease ati.+
4 Ɔluakɛ ɛnee Dwɔn ɛha ye fane dɔɔnwo ɛhile ye kɛ: “Mɛla ɛmmaa adenle kɛ ɛkɛgya ye.”+
5 Ɛnee ɔkpondɛ kɛ ɔku ye, noko ɔzulole menli ne, ɔluakɛ ɛnee bɛbu ye kɛ ɔle ngapezonli.+
6 Na mekɛ mɔɔ Hɛlɔdo ɛlɛdi ye awolɛ kenle la,+ Hɛlɔdease ara raalɛ ne razile agole wɔ ɔ bo na Hɛlɔdo anye liele nwolɛ kpalɛ+
7 yemɔti ɔhanle ndane ɔbɔle ɛwɔkɛ kɛ debie biala mɔɔ ɔbabiza la ɔbava yeamaa ye.
8 Yemɔti, ye mame maanle ɔhanle kɛ: “Fa Dwɔn Sɔnevolɛ ne ati to apawa nu maa me wɔ ɛke.”+
9 Ɔyɛle belemgbunli ne nyane ɛdeɛ, noko ɔluakɛ ɛnee yeha ndane yɛɛ menli mɔɔ ɔ nee bɛ ɛlɛdi aleɛ ne* la ati, ɔhanle kɛ bɛva bɛmaa ye.
10 Yemɔti ɔzoanle ɔmaanle bɛhɔpɛle Dwɔn ati wɔ efiade ne.
11 Bɛvale ɔ ti ne bɛdole apawa nu bɛrɛlɛle bɛlɛra ne, na ɔvale ɔhɔmaanle ye mame.
12 Nzinlii ye ɛdoavolɛma ne rayele ye funli ne hɔziele ye; na bɛhɔbɔle Gyisɛse amaneɛ.
13 Mɔɔ Gyisɛse dele edwɛkɛ ne la, ɔvole ɛlɛne nu ɔvile ɛkɛ na ɔ ngomekye ɔhɔle ɛleka koonwu bie. Noko mɔɔ menli ne dele la, bɛvi azua ne mɔ azo bɛvale aze bɛdoale ye.+
14 Mekɛ mɔɔ ɔrale ɛnwea ne anloa la, ɔnwunle menli dɔɔnwo bie, na bɛ nwo yɛle ye alɔbɔlɛ,+ na ɔyɛle wuliravolɛma mɔɔ wɔ nu la ayile.+
15 Noko ye nɔsolɛ nu, ye ɛdoavolɛma ne rale ɔ nwo ɛkɛ na bɛhanle kɛ: “Ɛke ɛmbikye sua zo yɛɛ aleɛ ɛlɛdwo; maa menli ne ɛhɔ, amaa bɛahola bɛahɔ namunamu ne mɔ azo bɛahɔdɔ aleɛ.”+
16 Noko Gyisɛse zele bɛ kɛ: “Ɔnle kɛ bɛkɔ; bɛdabɛ bɛmaa bɛ debie bɛli.”
17 Bɛzele ye kɛ: “Yɛnlɛ debie biala wɔ ɛke kɛ paano nnu yɛɛ fɛlɛ nwiɔ ala.”
18 Ɔhanle kɛ: “Bɛva bɛrɛlɛ me.”
19 Na ɔmaanle menli ne dɛnlanle aze wɔ ndile ne azo. Akee ɔvale paano nnu ne yɛɛ fɛlɛ nwiɔ ne, ɔnleanle anwuma na ɔyilale zo,+ na ɔbubule paano ne anu ɔmaanle ye ɛdoavolɛma ne, na ɛdoavolɛma ne vale maanle menli ne.
20 Yemɔti bɛ muala bɛlile na bɛ ko yile, na bɛsesale ɔ bo zo mɔɔ hale la ahɛndɛne 12 tetɛkɛɛ.+
21 Na bɛdabɛ mɔɔ bɛlile la le mrenyia kɛyɛ 5,000 yɛɛ mraalɛ nee ngakula.+
22 Akee ndɛndɛ ne ala, ɔmaanle ye ɛdoavolɛma ne vole ɛlɛne nu na bɛlimoale ɔ nyunlu wɔ nyevile ne anzi lɔ, na yemɔ ɔnleanle ɔmaanle menli ne hɔle.+
23 Mɔɔ menli ne hɔle la, ɔ ngome ɔhɔle boka ne azo ɔhɔyɛle asɔne.+ Aleɛ dwole la, ɛnee ɔ ngome a ɔwɔ ɛkɛ a.
24 Zɔhane mekɛ ne ɛnee ɛlɛne ne ɛhɔ moa, na azɛlɛkye ne ɛmaa bɛ nwo ɛhyele bɛ ɔluakɛ ɛnee anwoma ne ɛlɛbɔ atia bɛ.
25 Mɔɔ ɔdwule aleɛbahye* la, ɔdiale nyevile ne anye ɔrale bɛ nwo ɛkɛ.
26 Mekɛ mɔɔ ɛdoavolɛma ne nwunle kɛ ɔlua nyevile ne anye la, bɛ ahonle dule na bɛhanle kɛ: “Debie ɛzulolɛ boni ɛne!” Na ɛzulolɛ maanle bɛdeɛdeanle nu.
27 Na ɛkɛ ne ala, Gyisɛse hanle hilele bɛ kɛ: “Bɛnyia akɛnrasesebɛ! Medame ɔ; bɛmmasulo.”+
28 Pita buale ye kɛ: “Awulae, saa ɛdawɔ amgba a, ɛnee maa mendia azule ne anye membɛla ɛ nwo ɛkɛ.”
29 Ɔhanle kɛ: “Bɛla!” Yemɔti Pita vi ɛlɛne ne anu dwule na ɔdiale azule ne anye kɛ ɔkɔ Gyisɛse anwo lɔ.
30 Noko mɔɔ ɔnwunle kɛzi anwoma ne ɛlɛbɔ la, ye ahonle dule. Na mɔɔ ɔbɔle ɔ bo kɛ ɔnoma la, ɔdeanle nu kɛ: “Awulae, die me!”
31 Ɛkɛ ne ala, Gyisɛse dendenle ɔ sa zɔle ye na ɔzele ye kɛ: “Wɔmɔ mɔɔ wɔ diedi le ekyi a, duzu ati a wɔ adwenle nu yɛle wɔ kesee ɛ?”+
32 Mɔɔ bɛvole ɛlɛne ne anu la, anwoma ne gyinlanle.
33 Akee bɛdabɛ mɔɔ bɛwɔ ɛlɛne ne anu la hotole ye* hanle kɛ: “Ɛle Nyamenle Ara amgba.”
34 Na bɛpɛle nyevile ne bɛhɔle Gɛnɛzalɛte.+
35 Mɔɔ bɛnwunle ye la, menli mɔɔ wɔ ɛkɛ la zoanle maanle bɛhɔbɔle azua mɔɔ bikye ɛkɛ ne la amuala azo amra amaneɛ, na menli vale wuliravolɛma kɔsɔɔti rɛlɛle ye.
36 Na bɛzɛlɛle ye kɛ ɔmaa bɛva bɛ sa bɛha ye tɛladeɛ aguzo ne anloa ala,+ na bɛdabɛ mɔɔ bɛvale bɛ sa bɛhanle ye tɛladeɛ ne la amuala dele kpɔkɛ bɔkɔɔ.
Ɔbodwɛkɛ
^ Ɛhye a le Hɛlɔdo Antepase. Nea Edwɛkɛbohilelɛ.
^ Anzɛɛ “ɔ nee bɛ de ɛkponle ne anwo.”
^ Giliki aneɛ nu, “ɛzinzalɛ mɔɔ tɔ zo nna.” Ɛhye kile, ɔvi kɛyɛ nwonlomɔ dɔne nsa kɔdwu mekɛ mɔɔ sɛnzɛne ne finde la wɔ nwonlomɔ kɛyɛ dɔne nsia.
^ Anzɛɛ “bɔle bɛ ti aze maanle ye.”
