Malakae 1:1-14
1 Nyamenle nrɛlaleɛ:
Gyihova edwɛkɛ mɔɔ ɔluale Malakae* anwo zo ɔvale ɔrɛlɛle Yizilayɛma la ɛne:
2 “Mela ɛlɔlɛ ali mehile bɛ,”+ Gyihova a se a.
Noko bɛse: “Kɛzi wɔla ɛlɔlɛ ali wɔhile yɛ ɛ?”
“Asoo tɛ Yisɔ adiema a le Gyekɔbo?”+ kɛ ɛlɔne Gyihova se la ɛne. “Noko mengulole Gyekɔbo,
3 na memkpɔle Yisɔ;+ memaanle ye awoka ne mɔ dɔle mgbane+ na menvale ye agyapadeɛ memaanle fienemgbole nu ɛzonlɛ.”+
4 “Yidɔm ka kɛ, ‘Bɛzɛkye yɛ ɛdeɛ, noko yɛbazia yɛakyekye mɔɔ ɛzɛkye la,’ mɔɔ ɛlɔne Gyihova ɛha la ɛne, ‘Bɛbazi, noko mebabubu ye meagua, na bɛbavɛlɛ bɛ “amumuyɛ azɛlɛ” nee “menli mɔɔ Gyihova ɛbua bɛ fɔlɛ dahuu a.”+
5 Bɛbava bɛ nye bɛanwu ɛhye na bɛaha kɛ: “Bɛyeyɛ Gyihova wɔ Yizilayɛ azɛlɛ ne kɔsɔɔti azo.”’”
6 “‘Ralɛ nrenyia di ye papa eni,+ yɛɛ sonvolɛ di ɔ menle eni. Ɔti saa mele bɛ papa a,+ enililɛ mɔɔ fɛta me la wɔ nienwu?+ Na saa mele bɛ menle* a, ɛzulolɛ* mɔɔ fɛta me la wɔ nienwu?’ Medame ɛlɔne Gyihova, melɛka ɛhye meahile bɛdabɛ ɛsɔfoma mɔɔ bɛmbu me duma ne la.+
“‘Noko bɛka kɛ: “Kɛzi yɛmbu wɔ duma ne ɛ?”’
7 “‘Ɔluakɛ bɛfa aleɛ* mɔɔ nwolɛ ɛgua evinli la bɛba me afɔlemokyea ne azo.’
“‘Na bɛka kɛ: “Kɛzi yɛgua ɛ nwo evinli ɛ?”’
“‘Bɛse: “Gyihova ɛkponle ne+ le debie mgbane.”
8 Na saa bɛfa nane mɔɔ anye ɛzi la bɛabɔ afɔle a, bɛka kɛ: “Ɔnle ɛtane.” Yɛɛ saa bɛfa nane mɔɔ agyakɛ ɛbu anzɛɛ ɛnde kpɔkɛ la noko bɛabɔ afɔle a: “Ɔnle ɛtane.”’”+
“Mesɛlɛ bɛ, bɛbɔ mɔdenle bɛva bɛhɔmaa bɛ amɛnlado ne. Asoo ɔ nye balie nwo anzɛɛ ɔbanlea bɛ nyunlu?” ɛlɔne Gyihova a se a.
9 “Mesɛlɛ bɛ, bɛbodo Nyamenle bɛmaa yɛ amaa yɛanyia ɔ nyunlu ɛlolɛ. Afɔlebɔlɛ zɛhae mɔɔ wɔ bɛ sa nu la ati, asoo ɔbanlea bɛ nuhua bie anyunlu?” ɛlɔne Gyihova a se a.
10 “Na bɛ nuhua boni a lɛ ɛhulolɛ kɛ ɔbatoto nlenkɛ ne mɔ anu a?*+ Ɔluakɛ bɛpɛ bolɛ na bɛazɔ me afɔlemokyea ne azo senle ne bɔbɔ.+ Me nye ɛnlie bɛ nwo yɛɛ me nye ɛnzɔ bɛ sa nu ahyɛlɛ afɔlebɔdeɛ biala,” ɛlɔne Gyihova a se a.+
11 “Ɔvi sɛnzɛne aduduleɛ kɔdwu adɔleɛ, me duma bayɛ kpole wɔ maanle maanle ne mɔ avinli.+ Bɛbabɔ afɔle wɔ ɛleka biala, yɛɛ bɛbava afɔlebɔdeɛ bɛamaa wɔ me duma nu, kɛ ahyɛlɛdeɛ mɔɔ anwo te; ɔluakɛ me duma bayɛ kpole wɔ maanle maanle ne mɔ anu,”+ ɛlɔne Gyihova a se a.
12 “Noko bɛgua nwolɛ* evinli+ bɛka kɛ, ‘Gyihova ɛkponle ne anwo ɛgua evinli, na zolɛ ma, zolɛ aleɛ, le debie mgbane.’+
13 Eza bɛka kɛ, ‘Bɛnlea! Ɔyɛ ɛvɛlɛ somaa!’ bɛfunvua na bɛminziminzi bɛ nyunlu,” ɛlɔne Gyihova a se a. “Bɛfa nane mɔɔ bɛwuale, mɔɔ agyakɛ ɛbu nee mɔɔ ɛnde kpɔkɛ la bɛba. Ɛhɛe, bɛfa ninyɛne ɛhye mɔ bɛba kɛ ahyɛlɛdeɛ! Asoo ɔwɔ kɛ medie bɛ sa nu ninyɛne ɛhye mɔ ɔ?”+ Gyihova a se a.
14 “Munzule ɛha adalɛ sonla mɔɔ ɔlɛ nane nyinli mɔɔ te kpɔkɛ wɔ ye tunli nu, noko ɔbɔ ɛwɔkɛ na ɔfa mɔɔ dɛne wɔ nwolɛ la ɔbɔ afɔle ɔmaa Gyihova la. Ɔluakɛ mele Belemgbunli kpole+ na me duma bayɛ ɛzulolɛ wɔ maanle maanle ne mɔ anu,” ɛlɔne Gyihova a se a.+
Ɔbodwɛkɛ
^ Ɔ bo kile “Me Soanvolɛ.”
^ Anzɛɛ “menlenlɛ kpole.”
^ Anzɛɛ “ɛbulɛ.”
^ Hibulu aneɛ nu, “paano.”
^ Ɔda ali kɛ, ɛzonlenlɛsua ne nlenkɛ ne mɔ ɔ.
^ Anzɛɛ ɔkola ɔkile, “me nwo.”
