Maake Edwɛkpa 9:1-50
-
Gyisɛse hakyile (1-13)
-
Kakula nrenyia bie mɔɔ sunsum ɛtane wɔ ɔ nwo la ayileyɛlɛ (14-29)
-
Debie biala kola yɛ boɛ maa awie mɔɔ lɛ diedi la (23)
-
-
Bɛhanle Gyisɛse ewule ne bɛdole ɛkɛ bieko (30-32)
-
Ɛdoavolɛma ne su kpoleyɛlɛ nwo kpolera (33-37)
-
Awie biala mɔɔ ɛndwazo ɛntia yɛ la wɔ yɛ afoa (38-41)
-
Azedolɛ bolɛ (42-48)
-
“Bɛnyia ngyenle wɔ bɛ nu” (49, 50)
9 Ɔzele bɛ bieko kɛ: “Nɔhalɛ nu meka meahile bɛ kɛ, bɛdabɛ mɔɔ bɛgyigyi ɛke la anu bie mɔ ɛnrɛwu kɔkpula kɛ bɛkɛnwu kɛ Nyamenle Belemgbunlililɛ ne ɛlɛdi tumi la.”+
2 Kenle nsia pɛle nu la, Gyisɛse vale Pita nee Gyemise yɛɛ Dwɔn na ɔ nee bɛ hɔle boka tendenle bie azo. Na ɔhakyile wɔ bɛ nye zo;+
3 ye tɛladeɛ aguzo ne yɛle fufule nwohyee dɛlale kɛ mɔɔ awie mɔɔ kpo ninyɛne wɔ azɛlɛ ye azo biala kɛhola kɛmaa ɔkɛyɛ la.
4 Eza Mosisi nee Yilaegya vindele bɛ nwo ɛkɛ, na ɛnee bɛ nee Gyisɛse ɛlɛtendɛ.
5 Akee Pita zele Gyisɛse kɛ: “Relabae, ɔle kpalɛ kɛ yɛwɔ ɛke a. Yemɔti maa yɛzi ɛdanlɛ azua nsa wɔ ɛke, wɔ ɛdeɛ ko, Mosisi ɛdeɛ ko yɛɛ Yilaegya ɛdeɛ ko.”
6 Nɔhalɛ nu, ɛnee ɔnnwu edwɛkɛ bieko mɔɔ ɔka a, ɔluakɛ ɛnee bɛ ahonle ɛdu.
7 Na amungu rahedale bɛ nwo zo, na ɛnelɛ bie+ vi amungu ne anu hanle kɛ: “Ɛhye a le me Ra mɔɔ mekulo ye la.+ Bɛdie ye.”+
8 Ɛkɛ ne ala bɛtotole bɛ nye bɛnleanle na bɛannwu awie biala wɔ bɛ nwo ɛkɛ ne bieko kɛ Gyisɛse angome.
9 Mɔɔ bɛvi boka ne azo bɛlɛdwu la, ɔbɔle bɛ kɔkɔ ɛsesebɛ kɛ bɛmmaka mɔɔ bɛnwu ye la bɛkile awie biala+ kɔkpula kɛ sonla Ra ne badwazo avi mowuamra anu.+
10 Bɛvale edwɛkɛ ne bɛziele bɛ ahonle nu,* noko ɛnee bɛlɛsuzu mɔɔ ewudwazo ɛhye kile la anwo.
11 Na bɛbɔle ɔ bo bɛbizale ye kɛ: “Duzu ati a mɛla kilehilevolɛma ne se ɔwɔ kɛ Yilaegya+ dimoa ba ɛ?”+
12 Ɔzele bɛ kɛ: “Yilaegya balimoa ara amgba na yeatoto ninyɛne kɔsɔɔti boɛ;+ na kɛmɔti a bɛhɛlɛ sonla Ra ne anwo edwɛkɛ kɛ ɔwɔ kɛ ɔnwu amaneɛ dɔɔnwo+ na bɛkpo ye ɛ?+
13 Nɔhalɛ nu meka meahile bɛ kɛ, Yilaegya+ ɛra, na bɛyɛle ye debie biala mɔɔ bɛkulo, kɛ mɔɔ bɛhɛlɛle ye wɔ ɔ nwo la.”+
14 Mekɛ mɔɔ bɛrale ɛdoavolɛma ne mɔɔ ɛha la anwo ɛkɛ la, bɛnwunle kɛ menli dɔɔnwo ɛbɔ ɛyia bɛ, na mɛla kilehilevolɛma ne nee bɛ ɛlɛsu kpolera.+
15 Na mɔɔ menli dɔɔnwo ne nwunle ye ala la, ɔzinle bɛ nwo na bɛnriandile bɛhɔyiale ye.
16 Yemɔti ɔbizale bɛ kɛ: “Duzu anwo kpolera a bɛ nee bɛ ɛlɛsu a?”
17 Na menli ne anu ko buale ye kɛ: “Kilehilevolɛ, menvale me ra nrenyia mɔɔ mumule sunsum wɔ ɔ nwo la membɛlɛle wɔ.+
18 Ɛleka biala mɔɔ ɔkɛra ɔ nwo zo la, ɔpɛ ye ɔto aze, ɔ nloa wu awubue, ɔtwi ɔ gye na ɔyɛ bɛtɛɛ. Menganle mengilele wɔ ɛdoavolɛma ne kɛ bɛdu ye noko bɛangola.”
19 Ɔbuale bɛ kɛ: “O awolɛndoazo mɔɔ bɛnlɛ diedi a,+ me nee bɛ ɛdɛnla ɔhɔkpula kenlenzu? Menyia bɛ nwo abotane ɔhɔdwu kenlenzu? Fa ye bɛlɛ me.”+
20 Ɔti bɛvale kakula nrenyia ne bɛrɛlɛle ye, noko mɔɔ sunsum ne nwunle ye ala la, ɔkpusule kakula ne kpole kpalɛ.* Akee ɔdɔle aze, ɔhundohundole ɔ nwo aze, na ɔ nloa wule awubue.
21 Akee Gyisɛse bizale ye papa kɛ: “Ɔvale ɛhye ɛyɛlɛ la yehyɛ ɔ?” Ɔhanle kɛ: “Ɔvi ye ngakula nu,
22 na ɔta ɔpɛ ye ɔto senle nee nzule nu kɛ ɔsɛkye ye. Na saa ɛbahola wɔayɛ nwolɛ debie a, ɛnee nwu yɛ anwunvɔne, na boa yɛ.”
23 Gyisɛse zele ye kɛ: “Ɛse, ‘Saa ɛbahola wɔayɛ nwolɛ debie a’? Nea, debie biala kola yɛ boɛ maa awie mɔɔ lɛ diedi la.”+
24 Ndɛndɛ ne ala, kakula ne papa deanle nu hanle kɛ: “Melɛ diedi! Ɛleka mɔɔ mehyia diedi la boa me!”+
25 Akee mɔɔ Gyisɛse nwunle kɛ menli dɔɔnwo bie ɛlɛba bɛ nwo ɛkɛ la, ɔdeanle sunsum ɛtane ne ɔzele ye kɛ: “Mumule nee anzondilira sunsum, mese, ɛvi ɔ nwo tu na mmawolo ye bieko!”+
26 Mɔɔ ɔdeanle nu na ɔpɛle ɔdɔle aze fane dɔɔnwo la, ɔvile ye nu, na ɔyɛle kɛ asɛɛ kakula ne ɛwu la, yemɔti ɛnee menli ne anu dɔɔnwo ɛlɛka kɛ: “Yewu!”
27 Noko Gyisɛse zɔle ɔ sa maanle ye zo na ɔdwazole ɔgyinlanle.
28 Yemɔti mɔɔ ɔhɔle sua bie anu la, ye ɛdoavolɛma ne bizale ye wɔ ahane kɛ: “Duzu ati a yɛangola ye tu a?”+
29 Ɔzele bɛ kɛ: “Asɔneyɛlɛ ala a bahola ɛhye tu a.”
30 Bɛvile ɛkɛ ne bɛhɔle, na bɛhɔvale Galeli, noko yeangulo kɛ awie biala kɛde.
31 Ɔluakɛ ɛnee ɔlɛkilehile ye ɛdoavolɛma ne na ɔlɛka yeahile bɛ kɛ: “Bɛbaye sonla Ra ne bɛawula menli sa nu, na bɛbahu ye,+ noko saa bɛku ye a, ye kenle nsa ne azo ɔbadwazo.”+
32 Noko bɛande ye edwɛkɛ ne abo, yɛɛ ɛnee bɛsulo kɛ bɛkɛbiza ye.
33 Na bɛhɔle Kapɛnayɛm. Mekɛ mɔɔ ɔwɔ sua ne anu la, ɔbizale bɛ kɛ: “Duzu a bɛzule nwolɛ kpolera wɔ adenle nu la?”+
34 Bɛyɛle koonwu, ɔluakɛ bɛlua adenle ne anu la, ɛnee bɛlɛsu mɔɔ le kpole wɔ bɛ avinli la anwo kpolera.
35 Yemɔti ɔdɛnlanle aze na ɔvɛlɛle Bulu Nee Nwiɔ ne ɔzele bɛ kɛ: “Saa awie kpondɛ kɛ ɔdi bɛ nyunlu a, ɔwɔ kɛ ɔdi bɛ nzi na ɔsonle bɛ muala.”+
36 Akee ɔvale kakula ekyi bie ɔziele bɛ avinli; ɔvale ɔ sa ɔdole ɔ kɔme na ɔzele bɛ kɛ:
37 “Awie biala mɔɔ kɛlie ngakula ngyikyi+ zɛhae mɔ ko wɔ me duma nu la ɛlie medame noko; na awie biala mɔɔ kɛlie me la ɛnlie me ngome ala, emomu Ahenle mɔɔ zoanle me la noko.”+
38 Dwɔn zele ye kɛ: “Kilehilevolɛ, yɛnwunle awie kɛ ɔlɛfa wɔ duma yeadu sunsum ɛtane, na yɛbɔle mɔdenle kɛ yɛsi ye adenle ɔluakɛ ɔndoa yɛ.”+
39 Na Gyisɛse hanle kɛ: “Bɛmmabɔ mɔdenle kɛ bɛsi ye adenle, ɔluakɛ awie biala ɛnrɛhola ɛnrɛyɛ nwanwane gyima wɔ me duma nu na ɛkɛ ne ala yeaha me nwo edwɛkɛ ɛtane.
40 Ɔluakɛ awie biala mɔɔ ɛndwazo ɛntia yɛ la wɔ yɛ afoa.+
41 Na awie biala mɔɔ ɔluakɛ bɛle Kelaese ɛdeɛ la ati ɔkɛmaa bɛ nzule kanrɛlɛ ko bɛkɛnlo la,+ meka ye nɔhalɛ nu meahile bɛ, ye ahatualɛ ɛnrɛbɔ ye.+
42 Noko awie biala mɔɔ kɛmaa ngakula ɛhye mɔ mɔɔ lɛ diedi la anu ko kɛgyakyi ye diedi nu la, ɔle kpalɛ kɛ anrɛɛ bɛkɛva ɛdibolɛ mɔɔ asoaso twe la bɛkɛhenda ɔ kɔme na bɛkɛhɔdo ye nyevile nu.+
43 “Saa ɛ sa ɛlɛmaa wɔayɛ ɛtane a, pɛ ye to ye lɔ. Ɔle kpalɛ kɛ ɛkɛyɛ wuliravolɛ na ɛkɛhɔ ngoane nu tɛla kɛ ɛ sa nwiɔ na ɛkɛhɔ Gehenna,* senle ne mɔɔ bɛngola bɛnnua ye la anu.+
44 * ——
45 Na saa ɛ gyakɛ a ɛlɛmaa wɔayɛ ɛtane a, pɛ ye to ye lɔ. Ɔle kpalɛ kɛ ɛ gyakɛ kɛha ko na ɛkɛhɔ ngoane nu tɛla kɛ ɛ gyakɛ nwiɔ na bɛkɛvuandi wɔ bɛkɛdo Gehenna.*+
46 * ——
47 Na saa ɛ nye a ɛlɛmaa wɔayɛ ɛtane a, tu ye to ye lɔ.+ Ɔle kpalɛ kɛ ɛ nye kɛha ko na ɛkɛhɔ Nyamenle Belemgbunlililɛ ne anu tɛla kɛ ɛ nye nwiɔ na bɛkɛvuandi wɔ bɛkɛdo Gehenna,*+
48 ɛleka mɔɔ azonlɛ ɛnwu na senle ne ɛnnu ɛlɛ la.+
49 “Ɔluakɛ ɔwɔ kɛ bɛfa senle bɛwula awie biala ngyenle.+
50 Ngyenle le kpalɛ, noko saa ngyenle menlemenle ne ta a, kɛ ɔkɛyɛ na bɛamaa yeayɛ menlemenle bieko ɛ?+ Bɛnyia ngyenle wɔ bɛ nu,+ na bɛmaa anzodwolɛ ɛdɛnla bɛ avinli.”+
Ɔbodwɛkɛ
^ Anzɛɛ ɔkola ɔkile, “bɛanga bɛangile awie biala.”
^ Giliki aneɛ nu, “ɔmaanle kakula ne pɛle mgbutike.”
^ Nea Edwɛkɛbohilelɛ.
^ Nea Edwɛkɛbohilelɛ.
^ Nea Edwɛkɛbohilelɛ.
