Maake Edwɛkpa 11:1-33
11 Akee mekɛ mɔɔ bɛlɛbikye Gyɛlusalɛm, Bɛtefagye nee Bɛtani+ wɔ Ɔlivi Boka ne azo la, ɔzoanle ye ɛdoavolɛma ne anu nwiɔ+
2 na ɔzele bɛ kɛ: “Bɛhɔ namule ne mɔɔ bɛ nye dua ye la azo, na bɛdwu ɛkɛ ne ala a bɛbanwu asoaso ralɛ mɔɔ awie biala ɛtɛtɛnlanle zolɛ ɛlɛ la kɛ bɛhenda ye wɔ ɛkɛ. Bɛzianyi ye na bɛva ye bɛrɛla.
3 Na saa awie biza bɛ kɛ, ‘Duzu ati a bɛlɛyɛ ɛhye a?’ bɛha kɛ, ‘Awulae hyia nwolɛ na ɔbamaa bɛava bɛara ndɛndɛ.’”
4 Yemɔti bɛhɔle na bɛhɔnwunle kɛ asoaso ralɛ ne henda anlenkɛ bie anloa wɔ gua ne azo, na bɛzianyinle ye.+
5 Na menli mɔɔ gyi ɛkɛ ne la bie mɔ bizale bɛ kɛ: “Duzu ati a bɛlɛsianyi asoaso ralɛ ne a?”
6 Bɛhanle mɔɔ Gyisɛse hanle la pɛpɛɛpɛ bɛhilele bɛ, na bɛmaanle bɛhɔle.
7 Na bɛvale asoaso ralɛ+ ne bɛrɛlɛle Gyisɛse, na bɛvale bɛ adɛladeɛ aguzo ne mɔ bɛguale zolɛ, na ɔdɛnlanle zo.+
8 Menli dɔɔnwo noko vale bɛ adɛladeɛ aguzo ne mɔ sesɛle adenle ne anu, yɛɛ bie mɔ noko pepɛle arɛlɛ mrɛlakɛ.+
9 Na menli mɔɔ li ɔ nyunlu nee bɛdabɛ mɔɔ bɛli ɔ nzi la hɔle zo deɛdeanle nu kɛ: “Yɛsɛlɛ wɔ, die ye!+ Nyilalɛ ɛha mɔɔ ɛlɛba wɔ Gyihova* duma nu la!+
10 Nyilalɛ ɛha yɛ papa Devidi Belemgbunlililɛ ne mɔɔ ɛlɛba la!+ Yɛsɛlɛ wɔ, die ye, wɔmɔ mɔɔ ɛwɔ anwuma anwuma lɔ la!”
11 Na ɔdwule Gyɛlusalɛm la, ɔhɔle ɛzonlenlɛsua ne anu, na ɔnleɛnleanle nuhua ninyɛne ne ɔyiale. Na kɛmɔ ɛnee aleɛ asɛɛ ɛdwo la ati, ɔvile ɛkɛ na ɔ nee Bulu Nee Nwiɔ ne hɔle Bɛtani.+
12 Aleɛ hyenle mɔɔ bɛvile Bɛtani la, ɛhɔne hunle ye.+
13 Ɔnwunle feege baka bie mɔɔ nya dɔɔnwo wɔ zo la wɔ moamoa lɔ, na ɔhɔnleanle saa ɔbanyia debie wɔ zo a. Noko ɔhɔdwule nwolɛ la, yeannwu ɛhwee kɛ nya ala, ɔluakɛ ɛnee ɔnle mekɛ mɔɔ feege so a.
14 Yemɔti ɔzele baka ne kɛ: “Awie biala ɛnrɛli wɔ ma bieko ɛlɛ.”+ Na ɛnee ye ɛdoavolɛma ne ɛlɛtie.
15 Akee bɛrale Gyɛlusalɛm. Ɔhɔle ɛzonlenlɛsua ne anu na ɔbɔle ɔ bo ɔvoanle bɛdabɛ mɔɔ bɛlɛtɔne ninyɛne nee bɛdabɛ mɔɔ bɛlɛtɔ debie wɔ ɛzonlenlɛsua ne anu la, na ɔbutubutule menli mɔɔ senza ezukoa la ɛkponle ne mɔ na ɔhanle menli mɔɔ ɛlɛtɔne abubule la mbia ɔguale,+
16 na yeammaa awie biala anzoa debie ampɛ nu wɔ ɛzonlenlɛsua ne anu.
17 Ɛnee ɔlɛkilehile bɛ na ɔhanle kɛ: “Asoo bɛtɛkɛlɛle kɛ, ‘Bɛbavɛlɛ me sua ne maanle maanle asɔneyɛlɛ sua’?+ Noko bɛmɛ bɛyɛ ye nwule feabelɛ.”+
18 Na ɛsɔfo mgbanyinli nee mɛla kilehilevolɛma ne mɔ dele, na bɛbɔle ɔ bo bɛkpondɛle adenle mɔɔ bɛbalua zo bɛahu ye la;+ noko ɛnee bɛsulo ye, ɔluakɛ ye ngilehilelɛ ne zinle menli dɔɔnwo ne amuala anwo.+
19 Ɔdwule nɔsolɛ nu la, bɛvile sua ne azo bɛhɔle.
20 Nwonlomɔ mangyee ne mɔɔ bɛlɛpɛ nu la, bɛnwunle kɛ feege baka ne nee ye ndinli ne amuala ɛwu.+
21 Pita hakyele na ɔzele ye kɛ: “Relabae, nea! feege baka ne mɔɔ ɛwale ye amonle la ɛwu.”+
22 Gyisɛse buale bɛ kɛ: “Bɛnyia Nyamenle anu diedi.
23 Nɔhalɛ nu meka meahile bɛ kɛ, awie biala mɔɔ kɛha kɛhile boka ɛhye kɛ, ‘Tu kɔdɔ nyevile nu,’ na ɔnzu kpolera wɔ ye ahonle nu na ɔlɛ diedi kɛ mɔɔ ɔkɛha la kɛyɛ ɛkɛ la, ɔbayɛ zɔ yeamaa ye.+
24 Ɛhye ati meka meahile bɛ kɛ, debie biala mɔɔ bɛkɛbiza ye wɔ asɔneyɛlɛ nu la, bɛnyia diedi kɛ bɛ sa ɛha ye, na bɛbanyia ye.+
25 Na saa bɛdwazo bɛgyinla kɛ bɛyɛ asɔne a, bɛva debie biala mɔɔ awie ɛyɛ ɛtia bɛ la bɛhyɛ ye, amaa bɛ Ze mɔɔ wɔ anwuma la noko ava bɛ ɛtane ahyɛ bɛ.”+
26 * ——
27 Bɛradwule Gyɛlusalɛm bieko. Na mekɛ mɔɔ ɔlua ɛzonlenlɛsua ne anu la, ɛsɔfo mgbanyinli nee mɛla kilehilevolɛma nee mgbanyima ne mɔ rale ɛkɛ
28 na bɛbizale ye kɛ: “Tumi boni a ɛfa ɛyɛ ninyɛne ɛhye mɔ a? Anzɛɛ nwane a maanle wɔ tumi kɛ ɛyɛ ninyɛne ɛhye mɔ a?”+
29 Gyisɛse buale bɛ kɛ: “Mebiza bɛ edwɛkɛ ko. Saa bɛye ɔ nloa a, mebaha tumi ne mɔɔ mefa meyɛ ninyɛne ɛhye mɔ la meahile bɛ.
30 Tumi ne mɔɔ Dwɔn vale zɔnenle la,+ ɔvi anwuma anzɛɛ ɔvi menli? Bɛha bɛhile me.”+
31 Ɔti bɛbɔle ɔ bo bɛzuzule nwo kɛ: “Saa yɛka kɛ, ‘Ɔvi anwuma’ a, ɔbaha kɛ, ‘Ɛnee duzu ati a bɛanlie ye bɛanli ɛ?’
32 Noko kɛ ɔkɛyɛ na yɛaha kɛ, ‘Ɔvi menli’ ɛ?” Ɛnee bɛsulo menli dɔɔnwo ne, ɔluakɛ ɛnee bɛ muala bɛbu Dwɔn kɛ ɔle ngapezonli amgba.+
33 Yemɔti bɛbuale Gyisɛse kɛ: “Yɛnze.” Gyisɛse zele bɛ kɛ: “Ɛnee medame noko menrɛha tumi ne mɔɔ mefa meyɛ ninyɛne ɛhye mɔ la menrɛhile bɛ.”
